دعوه توثيق لمحجوب شريف

[عمار مكى عمر حسن]

بور وبورتسودان
بارا والجنينه
عبرى ولا واو
حاجه موش كويسه
كل زول براو
هكذا يقول محجوب وهو يرقص على طبول اورباب فى لوحه سودانيه مفعمه بالحب التسامح وروح الوحده
هى دعوه لتوثيق اعمال شاعر الشعب
محجوب شريف

[خضر حسين خليل]

عمار ياخ ازيك

أما الشوق بحر ياصاح ! حاولت اتصل عليك وتلفونك عامل عمايل
(ومرة أضحك ومرات ابكي
ومرة تغلبني الحكاية)
فـ العايز أقولو عمك محجوب دة سرو باتع ! وحرفو واصل وروحو سلبة
وزول بالمواصفات دي يستحق إنو يتمدد في رموش العين ويتمدد
فوق ضهاري البلد غنوة ورقصة فال ! محجوب يستحق منا والله علي ما أقول
شهيد شهد الكلام !
معاك في السيرة يا صاحب

[فيصل سعد]

سلام يا عمار،
و مرحبا يا خضر ..
و معكم في اضاءة هذا الخير الانساني الشامخ النبيل ..

[align=center]عشرة مقاطع للحياة
محجوب شريف

1

غطى الجبال الليل
لكن هدير السيل
لكن صهيل الخيل
تحت الجبل مسموع
نار الغضب والجوع
يضووا عز الليل

2

والموج شديد الظلام
غطى الشهيد الهمام
لكن دماه بتقيد
لكن طريقه المجيد
ابدا شديد الزحام
رايات ترفرف غمام
و ينزل رزاز النشيد
والنجمة تلمع هناك
رغم المكان البعيد

3

والنهر عبر السنين
يزحف بعنف وبلين
في الليل بيلمع يبين
فارس بسيفو السنين
يحمينا حضنه الامين
نطلع بكتفوا الشمال
ننزل بكتفوا اليمين
لكنه مين يقدر يقول
أنا سيدو مين

4

في منحنى
الدرب الطويل
الحبة تفلت
من جراب
عابر سبيل
مسكين هزيل
عطشان يموت
في السكة
ما يتم الرحيل
الحبة تفلت
من جراب
عابر سبيل
تكبر تشيل
تلبس جميل
تصبح مقيل
عابر سبيل

5

عصفورة من
آخر بلاد
في رحلة لي
آخر بلاد
تعرف مواعيد
الحصاد
وكل دورات
الفصول
وأنضر
ايام الحقول
وتعادي
أسراب الجراد
وتنادي لو
كركب زناد
صياد على
العش والولاد

6

أنسانة ابسط
ما يقال
لو صاح
اعز من
النساوين الرجال
أنثى ولا دستة رجال
تمشي وما بتطأطي
ما بين بير وشاطي
نهارها مع السواقي
وليلها مع الطواقي
وعمرها للجهال

7

والنملة في
الصف العجيب
وعلى انفراد
نفس النشاط
والأنضباط
نفس الحماس
تسعى وتجيب
و لا من رقيب
و لا حتي في
الأمر التباس
ولا في اختلاس
أحسن كتير
من بعض ناس
هيلا هيلا هيلا
تلقى نفسها
في سفينة
و تاني في
شارع مدينة
والحكمة بنفس
الحماس
تلقاها في
الصف العجيب
كم مرة تهرب
من مداس
و من طفل عابث
و من لهيب
بالحبة
تمسك في عناد
و الحبة
ملك الاتحاد

8

والحكمة في
مر السحاب
والعلاقة البينه
ما بين الجذور
واللسة في
الباطن بذور
وغنا الطيور
المعركة الدارت
تصلصل
بسيوفها و بالحراب
والعلاقة البينها
بين الغابة والهبابة
والربابة والمنديل
ومجرى النيل
وضلفة باب
وبكية طفلة
في الكتّاب
تفتش عن
قلم رصاص
وقع في الباص
وحس رصاص
هدر في ناحية
فيها العيش
حكر للجيش
بتاكل من
زمن مافيش
وتشرب من
زمن مافيش
وكان اضراب

9

والشمس تطلع يبين
ادق ما في الجبال
تبدأ الموانئ
العظيمة الهدور
وتصحى المصانع
بهمة وتدور
و تملأ الشوارع
و كل الجسور
وتشفى الصدور
جموع الشغيله
خطاها فتيلة
تخلى القصور
تحس بالفتور
وحمى الزوال

10

تصحى المدينة
تقوم تستحمى
و تولع سيجارة
تدخن تسخن
بشاى الصباح
وحق الملاح
و سيد الجزارة
وتقعد تدندن
تخيط زرارة
ترتق هدوما
و تفتق هموما
وتسب الحكومة
و تفن الريال
وتنفض سريعاً
غبار النعال
وتنزل تواجه
مشاكل عويصه
تشرّط قميصا
و تدق العيال
ليه العيال
يعيش النضال
اليخلى الحكومة
تدخن تسخن
بنار الكفاح
وتقعد تطنطن
لحدي الصباح
بتطلع بتطلع
حزينة وكتومة
تشرّط هدوما
وتخش المصحة
يعيش الأصح
و يعيش النضال [/align]

[فيصل سعد]

[align=center]في انتظارك
محجوب شريف

في انتظارك ..
في انتظارك ..
في انتظارك
وفي شراييني
بيدمدم حس قطارك
لو اطير من سجني
و انزل في جوارك
وعنك امسح بي
رموش العين غبارك
واملا عيني من نهارك
انتي يا صحو المدارك
كل نجمة جميلة
تلمع في مدارك
وكل نخلة ظليلة
عندها من ثمارك
وكل نسمة حنينة دارك
وباختياري وباختيارك
كم نشارك في المعارك
وما بنخلي فرسنا بارك
وما بنقيف نستني
في الآخر نبارك

شدي ايدي
وتبقي زادي
نظرة من
عينيك تنادي
يا بلادي ..
يا بلادي ..
يا بلادي
وكلمة منك جمرة
للفداء في فؤادي
يوم اجيك
وعلي جبيني
وسم عنادي
ولا مت
وراي يجيك
يعتب جوادي
ولا خفت وفت منك
غادي غادي
انتي ما الحضن البلم
من ساحة هارب
ولا البنكس راسو
من الذلة شارب
ولا البدس الراية
في قش المغارب
انتي ساحل لما
عصف الموج يضارب
وانتي صافي النبع
في سكة محارب
وانا وانت
حدين سيف سنين
وسوا بنحارب

سلميلي
علي البحسو
بكل نبض
الارض ديا
و سلميلي
على البيابو
الحق هدية
وسلميلي ع
لي مهيريات
شهيدن نارو حية
وسلميلي علي رفاقي
وبلغيهم اشتياقي
وعن حياتم قولي لي
وسلميلي علي حبايب
في زوايا المغربية
وقولي ليهم حبو غنو
الدنيا ما زالت ندية
وما حنقبل في
وطنا الغالي دية
وما بنخلي
وطن سبية
ولا وطن
زوجين
وحارس
و بندقية [/align]

[طارق صديق كانديك]

يا سلااااام كيف لا وهو لا ينفك يستعير ألسن الجميع في التعبير عن دواخلهم وأمنياتهم وأحلامهم ... !!

التحية لذاك الرجل الرجل .. !!

شكرا عمار وحانكون في البوست ده لحام بس .. !!!

ربما لجهلي أو لسببٍ آخر حاولت كثيراً البحث عن قصديته ( دمتم سالمين ) فلم أهتدى لها وحدثتني نفسي قائلة

بالله مش حرام الأسافير دي تتملئ بغث الحروف وتحتجب كلمات زي البكتبا المناضل محجوب شريف .. !!

يجب التوثيق في أكثر من مكان وبأكثر من طريقة .. !!

واسمحوا لينا بالكوبي والبيست مقدماً ... !!!

شكراً أخ عمار

تحياتي

[فيصل سعد]

[align=center][/align]

[فيصل سعد]

[align=center][/align]

[فيصل سعد]

[align=center]تبتبا تبتب
محجوب شريف

تبتبا تبتب
تبتب تبتب
باكر تعرف
تقرا وتكتب
وياما ترتب
نحنا بنحلم
و كم نتمني
هل تحقق
كل ما تحب

تبني حياتا
الند بالند
اي مكانة
و خانة تسد

هدهدا هدهد
كل الورد
ينوم و يفرهد
زي عصفورة
تطير و ترك
تحبا وتمسك
و تاني تفك
سيبا تفكفك
سيبا تلكلك
عايزة تنطط
بكرة حترسم
وياما تخطط

بكرة حا يبنوا
مدائن ضو
ما بيعكر
صفو الجو
صفارة حرب
تشطب من
قاموس الدنيا
الضرب
الشك
الخوف
ينعموا كم
بالشم والشوف
واغاني الحب

افتح بابك
آمن تب
زي ما النهر
بيلقي مصب
اي حمامة
بتلقي الحب
تلقي الوردة
الندي في الكم
تلقي حداها
جناها الام
يرضع صافي
حليب الحب

نقدل نحن
الجد والعم
تملا عيونا
كهارب سد
بابا جاب
الهم والزم
والصد ينسد
نفرح لما
ندمع جد
مد البصر
الامل يمتد
العمل يشتد
البنا ينتم
الغنا يمتد

هدهدا هدهد
اكتبي اكتبي
الف المد
حمام و سلام
و سعادة بجد
اكتبي اكتبي
ياء المد
سرير وعصير
وعبير ينشم
اكتبي اكتبي
واو المد
حقول وعقول
تقرا المجهول
كتاب الغد
اكتبي علم و سلم
لا حد يئن
لا تسمع بم
لا ينزف دم
لا يعجز رد
لا يعجز طب
لا دمعه في خد
تبتبا تبتب[/align]


و لمزيدا من التوثيق
راجعوا هذه الروابط
في ارشيف "سودانيات"

http://sudanyat.org/vb/showthread.php?t=6562

http://sudanyat.org/vb/showthread.ph...8+%D4%D1%ED%DD

http://sudanyat.org/vb/showthread.ph...%E6%C8+%D4%D1%

http://sudanyat.org/vb/showthread.ph...%E6%C8+%D4%D1%

http://sudanyat.org/vb/showthread.ph...%E6%C8+%D4%D1%

http://sudanyat.org/vb/showthread.ph...%E6%C8+%D4%D1%

[خضر حسين خليل]

فيصل يا ود ابوك



صغر الصورة قدر ما سكيناها ابت تتسك


والشوق بحر والله

[خضر حسين خليل]

الربة الربة الربة
المنقة تجينا مربي
الصمغ العربي معبأ
الكورنفلكس الفاره
راقد في سوق الدبة

[خضر حسين خليل]

يا فيصل
بالله لو عالجت صورتك الفوق عالج صورتي برضو


اها بقينا ممن يشملهم الشفاهة السودانية لها التجلة :

الجمل ما بشوف عوجة رقبتو

أو كما قال

[فيصل سعد]

المشاركة الأصلية كتبت بواسطة خضر حسين خليل

يا فيصل
بالله لو عالجت صورتك الفوق عالج صورتي برضو


اها بقينا ممن يشملهم الشفاهة السودانية لها التجلة :

الجمل ما بشوف عوجة رقبتو

أو كما قال

تسلم يا خضر و حاشاك
عوج الرقبة يا حبوب ..

و ود الحاج بجي بظبط الصور
بمزاج .. فتريث قليلا و مهلا ..

[فيصل سعد]

[align=center]"أم اليتامي"

كلمات شاعر الشعب / محجوب شريف
الحان و موسيقى الفنان / حمزة سليمان
اداء المطربة الصاعدة / شروق ابو الناس

بين العمل والبيت
فصّّّّّّّّّّّّّد جبينا عرق
ام اليتامي بكت
لمن حسابا فرق
ماهية تمشي السوق
مركب مصيرا غرق
حق اللبن والزيت
الكسرة و الكراس
هم في عيونا برق
المابحس مابهم
والخان همومو سرق

هذا المرتب تب
ما بسدها الفرقة
القعدة في المكتب
والامضا، في الورقة
العبرة في الخبرة
الايدي لو تعمل
جرح الزمن يبرا
اتباصرت مكنة
ماكوكا يتقدل
بين خيطا والابرة
زي ما القلب ساساق
الخطوه ساساقة
عيونا منتبهة
تباري زقزاقا
لا شك ولا شبهة
والسترة اشواقا
الشفع القصر
والدمعة رقراقا
ياحليل شريك العمر
الدنيا فراقة
اتيقنت احسن
من تبقي نقناقة

شقشق مقص في ليل
نامت خلايق الله
طاير سقد حلق
في بيتا واتدلي
تدي الولاد بصة
وتجرب القصة
وتقلب الحلة
جاهز عمل بكرا
اسال تقاريرا
السرية والسمعة
هل ركلست يوما
حتي لو جمعة

مشكورة في المكتب
مستورة في الحلة
رغم الشجن هبت
لم تعرف الذلة
مافارقت سربا
ماخالفت ملة
واتعلمت شرطا
كلا بلي الا
واتعلمت تعزف
في الاجهزة الاخري
تتفهم الموقف
تستدرك العلة
ولم تعد اما
مسكينة بتشفق

تفتق وترتق
قصاصة في ايدا
كالوردة بتبتق
ريانة منشرحة
هدم قدم يصبح
في لمحة كم طرحة
لابد من تكية
لابد من بكية
لابد من غمدة
لابد من سرحة
انعم بها اما
بين العمل والبيت
يامرحي يامرحي[/align]

[align=center][flash=http://www.youtube.com/v/2IZWlpk26M4&autoplay=1]WIDTH=400 HEIGHT=350[/flash][/align]

[عمار مكى عمر حسن]

خضر اخوى
ازيك يا جميل
محجوب زول مننا وفينا
ويستحق اكتر
انا قاعد وتلفونى حتلقاهو فى رساله فى الخاص
كيييب ان تتش
سلام

[عمار مكى عمر حسن]

فيصل اخوى
ازيك
دايما موسوعه
ودايما مداخلاتك ثريه
منتظرين لسه
لاقدام