اقتباس:
المشاركة الأصلية كتبت بواسطة شليل
مرحبتين حبابك يا عماد
شرفت الديار والله
كل الأمنيات بإقامة طيبه.
ـــــــــ
تحياتي لأسرتك الكريمة ، إلى أن نتشاوف.
|
دي شوزية كرم مني ليكم اخر ديوان شعر لاخونا مدني النخلي طبع في السودان والدوحة وكان لي شرف ان اكون من ضمن قام بالاشراف عليه وعبركم التحية للصوت الندي علي السقيد وفرحانة بيكم كل النجوم وكمان البنت الحامت في الشريان لانها عامله هوس لي ناس جننوني وكل واحدة بتشوف انها من كتبت فيها هذه القصيدة وبتشابها وانا بقول ليهم مبروك عليكم
شلعت برق
رفت حِلِمْ ..
هماً مقسم
في العِلِم..
الكِسره والسُتره
الهِدِمْ ..
ما أنبلا ..
ما أحملا ..
دي الحالمه
ابسط من حِلِمْ
جنبك تمش
وتبق شمس
رمز الخصوبة
ومكمنا ..
يصدأ الدهب
ما يصدأ أبداً
معدنا ...
النيل سقاها الاخضرار
بالعفة زانا وهجنا
وأتمنى لو شلعت
برق ..
رفت حلم ..
إحترت في غنا
يشبها ..
في معنى يقدر ينصفا
كل الغنا الفات والبجي
ما أظنوا يقدر يوصفا
بهجة زماني الما صفا ..
أنا ليها كم شقيت زحام
متمني مره أصادفا ..
أو حتى لو شلعت برق
رفت حِلِمْ ..
بت من غناي إتوهما
لغه للوداد إتكلما
هدأة مسايا البحلما
تدخل رئه شوقي
وأشيل نفس الأمان
إتنسما ..
وأتمنى لو رفت حِلِمْ
شلعت برق
هماً مقسم في العلم
الكسرة والسترة الهدم
ما أجملا ..
دي الحالمة أبسط
من حلم ...
وعد الأرض
لمصطفى سيد أحمد
مهموم
وموزع في ناسك
ومتفرد
بنلك وإحساسك
النرجس
عابق أنفاسك
يا وش الغيمة الضهريه
وصديق الفكرة ودخريا
مالك متعجل يا ساند
قامات الشدر المحنيه
يا برق الليل المتكحل
بشموس الغد البدريه
أسبلت الجفن المتسهد
في منافي العدم القهريه
ودخلت منامك مطامن
علي بكره ميقن وبتراهن
مَهرت وعودك بي دمك
الكان والحاصل والراهن
يا وعد الأرض المكلومه
لا عشت مرابي ولا ماجن
ادخل ميعادك في وكتو
مع ناسك ...
وأرضك متضامن
الليله القمري صباحاتو
غطاها غناك ومناحاتو
المشهد باهت والصوره
للفرح البَطّل جياتو
الأنس البهتت ليلاتو
والسهر المسخن لماتو
يا صدق الناس الفي المبدأ
الحق الرجح ميزانو
هزيت بي فقدك أحلامم
الناس المتلك بتفانو
يا أجمل وأنبل فرسانو
الشدو الكترت أحزانو
برحيلك بهتت الوانو
يا ضد القُبح المستشري
في جسد الأرض وقاومتو
الحلم الشارد من طرفك
قسمت منامك وناغمتو
أزمت العالم بي فقدك
لي وعدك قلبك سلمتو
فوضى اللون
يا منسوبه إليّ من طمْيك
وخدرة لونك با فرهيده
مين الغير عينيك علمني
زهد الدنيا وعشم الريده
مين الدافر ليل الوجعه
شان عينيكي ويموت في ريدا
قسماً عظماً لأني بدونك
لا قبالك عشت الريده
فهل يا دافره النيل للضفه
بينا تدور الدنيا وتصفا
وأنا واعدتك ضهري القبله
إني أحبك أكتر وأوفي
بس خليها تروق يا حلوه
وعكر المويه المالح يصفا
يا بيني وبين الأشجان
وفوضى اللون ...
وحديث الريشه
زي عصفور الجنه الغنا
راكز حيلو
علي صوت أحمد
وأحمد غايب
جانا زمن
سرق الضي
من عين النجمه
وشبه حريق
في قلب النسمه
وسدا طريق
الحب والبسمه
وتاه في عيونك
زمن الفال
صدق اللون
وحديث الريشه
يا مطموره وغايب مطرك
في العبادي الشقه سماكي
في مخلاية الذكرى معاي
طمي النيل الجاري حداكي
وبين القاكي ولا ألقاكي
لأني الضاحك لأني الباكي
وزي عصفور الجنه الغنا
وخلا وصيتو على شباكي
تاه في عيونك زمن الفال
صدق اللون
وحديث الريشه
أصايل وعدك
أفرح
لما أجيك حزنان
وأنسى
الألم السورني
وبرضي
أغالط فيك ظني
من أسوارك
طاله تعايني
فرح يتحدى
مدى الأحزان
طفل الأمل
اللسه بتاتي
كايس لي خطواتو
مكان ...
وأفرح لما أجيك حزنان
أنسى
الألم السورني ..
شاردة ملامحك
مني ظلال
والكلمات مشحونة
شجن ...
انتي الساكنه
معايا طيوف
بحلم بيكي ملاذ
ووطن ...
وافرح لما اجيك
حزنان
وأنسى الألم السورني
أصايل وعدك
مسرى خطاي
بدء الرحلة على
الاشراق ...
سرب غمامك
غطى سماي
وهج الصدق
نداء الاعماق
وقفت اخاصم
فيك حزني
وافتش فيك
عن إيه معاني
رجعت أصالح بيك
نفسي ...
وأقالد فيك الزمن
الجاي ...
وافرح لما اجيك
حزنان ...
أنسى الالم السورني ...
قنديل الكلام
أشعلت قنديل
الكلام
ورقصت تايه
في الطرب ...
محبوبك السوا
العجب
درويشك الغاب
وإنجذب ..
دخلت قلبك
لو أكون ..
فيهو الوحيد
أو لا أكون ..
علمني صمت الليل
غناك ..
وسرحت في عالم
معاك ..
فجيت زحام
الهم مشيت
عبرت لي ضفة
هواك ..
دخلتَ قلبِك
لو أكون ..
فيهو الوحيد
أو لا أكون ..
زفاني ليك الليل
حبيب ..
لملم نجومو وسهرا ..
كنت الأميرة وكان هواي ..
بدر الليالي النورا ..
وإنتي الوحيدة اللي شقاي
الواحة والحب والضرا ..
دخلت قلبك
لو أكون ..
فيهو الوحيد
أو لا أكون ..
الحلم البريق
شردتي من وعدي وخطاي
وقعدتي في وهمي وغناي
بقت الأماسي ملونه
النيل دفق طميو ومشى
الغيم فِرح بيكي إنتشى
جات النسايم هبهبت
غازل هضابك ورشرشا
وأنا وإنتي ديمه علي سفر
يا فاتحة في صْمْتي الكلام
ومسافره في دمي القصيد
يا هل ترى المدن السراب
مستني شوقا يجيهو عيد
ولا العيون بكتِك أمل
متواري في الزمن البعيد
وأنا وإنتي ديمه علي سفر
يا مارقة من برقاً برق
شاقه اللجج ..
خايفه الغرق ...
شن باقي ليك شان تفرحي
من حلمك الضاع وإنسرق
وأنا وإنتي ديمه علي سفر
خلي الغمامات ترحل
حلم العصافير المطر
يا واقفة في درب الخطر
يا عارفه أحزان الشجر
كُل ما إنطفى الحلم البريق
نلقاهو في سكة سفر
كل ما زوى النجم الرفيق
في السكة يتوهج قمر
وانا .. وإنتي
ديمه علي سفر
سر البيننا
لو شرقتي
بتلقي هواي
ولو غربتي
وراكي نداي
يا مدخورة عشم
مدخور
في بستان الزمن الجاي
ريدك يا العزيتي الريد
ايه لولاه يكون معناي
العصفور والنسمة حبايب
سر الحب غامض مجهول
خطوة أشيلا عليك وارتاح
خطوة تصارع كايسة وصول
سر البينا يحير جد
لغز غريب ما ليهو حلول
يا المديتي ضفاير الليل
بيني وبينك .. جسر ونيل
يا الرشيتي الإلفة رذاذ
في الإحساس والوقت أصيل
وعدك مالي دواخلي يقين
مستنيك والصبر جميل
ولو شرقتي بتلقي هواي
ولو غربتي وراكي نداي
يا العلمتي عيوني الحب
في الإحساس وترك مشدود
بتجيني ومنك بنداح
فرح الروح الما محدود
لا بنضيع خلف الأسوار
لا يتقوم بيناتنا سدود
ولو شرقتي بتلقي هواي
ولو غربتي وراكي نداي
ومضة عشم
ومضة عشم فيا
تفتح مدايا الشوف
تنده مراسيا
أعبر زحام الخوف
ست الغزال الريم
عارفاني صيادا
قريافا رامي البال
والكيف صبح عاده
فنجانا مسكو يفوح
السكرو زياده
بتاً بتتعطر
عارفاني ريادا
ناديتا خلتني
في حاله ما حاله
ضارب مضارب الهم
والخطوة جواله
يا ريتا حاساني
أو حتى في بالا
وادي الحنين يا شوق
فترني مشوارا
سكك الرحيل الصد
تفصلني أسوارا
ألق الجمال .. الحب
وهاجة أقمارا
يا جنه في قلبي
بتغرد أطيارا
تمرق بوعد الغيم
عينه ودعاش وندى
ناديتا يا روحي
جاوب ندايا صدى
يا راشه عطر الفال
حالي وحلال شهدا
لا غيرا ساكن البال
ولأني اصطفيت بعدا
قبلي السحاب الشال
تهنا ويدوم سعدا
صداح أجيك
وحداني جيت
عابر مسافة ليل حزن
وزع نجيماتو البكن
نادني ترنيم الحروف
الليكي جن يتوسلن
خلتني تايه في الزحام
ووراكي منسي ولي زمن
... طواف أنا ...
قابض على جمر الظروف
مستني جياتك طيوف
شدو الغنيوات المني
صحو النسيمات الولوف
تلقيني كايسك في زحام
وراكي منسي ولي زمن
عابر متاهة ليل حزن ..
صداح أجيك
والليل سكن ..
تحت الشبابيك إندلق
صندل عطورك وإحترق
نجم المسافة البندهك
ميل على خدك بَرَق
وأنا بين قصائدي الحانه ليك
ولهانه تنزف في الورق
عابر متاهة ليل حزن
وراكي ضائع لي زمن
حنينات الكلام
حنينات الكلام والبوح
أخيات الجنا المدخور
يلاقنك بسيماتن
شعاع اللؤلؤ المنثور
حلاتن جنن حرفي
وزارن ليلي دفقة نور
بريدن وهن بريدني
وريدن فيني ليهو حضور
بشارات الربيع الجاي
يحاكن لي جموح الخيل
يلاقنك كما الغزلان
تهوش تركز تصد السيل
حلاتن جنن حرفي
وشدن فيني باقي الحيل
نسايماً جني من بلدي
وصحن روحي هجعة ليل
يضون فينا فينا اشراقات
تصحن إلفة الأيام
يلاقنك صباح أخضر
يعمنك أمان وسلام
أوصف وين الاقي كلام
عيون زرقة سماء السودان
موشح بي ظلال وغمام
عشق السفر
أدمنت فيك
عشق السفر
داخل مدارك يا قمر
كلمني مين البشبهك
في الدنيا زيك ما ندر
إنت البساطك أحمدي
وناس وورد الحد ندى
كل ما رحل عمري الشقي
جنبك سنينو بتبتدي
وأدمنت فيك
عشق السفر
سورني بالضي يا بهي
قطر عسل روحك شهي
أشهر صباحاتك وعد
صدق الزمان المزدهي
سافر قدر مكنون غناي
أنا تبت من سفري وشقاي
خليت أسى المجداف وراي
ورجعت والأشواق معاي
أدمنت فيك
عشق السفر
يبرق نجم وعدك وأجيك
غناي .. وصداحك أنا
داخل فضاءاتك محب
حلمان وغرقان في المنى
ما روحي إنت مجننا ..
سيد قولا أنت وفاتنا
وأدمنت فيك
عشق السفر ..
بوح العيون
مستني فيك لو يوم تحس
بوح العيون الما بتدس
يا حليلو نسامك يهش
يدخل هجيرنا وننتعش
والليلة وا خوف العيون
من ليلي نجماتك تطش
وأستنى فيك لو يوم تحس
بالقلتوا فيك قايل وأظن
صم الحجارة يلين ويحن
يا الوصفي في وصفك محن
جننت رقة حرفي جن
وأستنى فيك لو يوم تحس
بوح العيون الما بتدس
بنقول ظروف .. ونقول ظروف
وإحنا الظروف بنقدرا
ما إحنا دردرنا الزمن
والريده شفنا مخاطرا
البينا كان أسمى ونبيل
والذكرى بحفظ عاطرا
وإستنى فيك لو يوم تحس
بوح العيون الما بتدس
سمـــــــــــــــــــــارا
تطوف الروح سلامه
درر منثور كلاما
كظلاً من سحابه
محمل خير ترامى
يغطي الضو براحا
ولا بتغشاك ندامه
كوعد الطل نديه
تلْوح بالبشارة
بهى وفضاح نهارا
إذا مرساك توارى
بيندهلك فنارا
حبيبه شبيها مافي
يباهي اللون سمارا
صباحاً من صباحا
مبهرج بي دعاشا
زهراً في الحدائق
يراقص في الفراشة
تعتقك من همومك
تقابلك بي بشاشه
عبيرا الطاف ينادي
ولونا البرتكاني ..
صباحا العيد يفرح
يوزع في التهاني ..
طرفاً ليلو حالك
بسهموا أصاب رهاني
حبيبه شبيها مافي
عليها الغي رماني
تطوف الروح سلامه
درر منثور كلاما
صمت السور
مساءً
تومض الذكرى
على قلب الحجر عصفور
يكاتل قمرك الظلمة
يلم قلبك شتات النور
هواكي وشم
على قلب القلب محفور
أقرب وأحبس الأنفاس
أوسد روحي صمت السور
أنادي الشفع القاعدين
علي رملك يكوسو شليل
رجع مرتد صدى الندهه
كسر روعة وقار الليل
ظهر وجهك حزين باكي
مسيج بي غبار الويل
دفنت وشيا في ايدي
بكيت قدر البحر والسيل
مسيجة والحصار خاشيك
متل ما خشة قلبي هواك
يتاوق شوقي في الأسوار
على مرمى البصر مرساك
دخلتك ماشي فوق جمرك
وفي حد الكفاف ألقاك
دخلني زمانك الممقوت
خيوط الشمس تغشى بيوت
وتنسى بيوت
وشبح العارض الممدود
عارض فيك .. ومابي يفوت
هاك إيدي
عوافي سلام
وهاك إيدي
غني معاي
غناء العافية
البزيل البي
خلي قمر خديدك يطل
يرشرش في العتامي الضي
أحبسي الدمعة ما تنزل ..
وكتري من حنانك لي ..
قولي سلام
وهاك إيدي ..
أهلاً بالغنا الطول
يحن بالرجعة لي ناسو
ألف سلام علي وتراً
مقسم فينا إحساسو
وفجراً غنا عصفورو
وفاحت دفقة انفاسو
قولي سلام
وديل أيدي ..
سلام للنسمة لما تجيب
مواكب غيمه سواحه
وريد لي عيون وكت تضحك
تبوح أشواقا فضاحا
سلام للقمرا لما تطل
تلم العتمه وأشباحا
وقولي سلام
وهاك ايدي
أحبسي الدمعة ما تنزل
وكتري من حنانك لي
غني معاي ...
غنا العافية البزيل البي ...
قولي سلام ..
سيبني أهاجر
شيل أحلامك
مني وغادر
سيبني أجوب
الدنيا وأهاجر
يمكن ألقى عزاي
في الغربة ..
ويبسم لي
الحظ العاثر
أنا فضلت الغربة عليها
دنيا ريدك وفتها عابر
شيل أحلامك
مني وغادر
يا خيال وخيالك جامح
ترسم لي للجنه ملامح
تكتب لي في أحلى قصيده
فيها تعاند الموج الكاسح
وانا فضلت الغربه عليها
دنية ريدك وفتها عابر
كنت بحاول أصدق مره
إنك مرسى الريد
في الآخر ..
رغم مدى الأحلام
الفاصل ...
إنت الناهي وإنت الآمر
إلا معاك إنتهت الرحلة
وزوى نجم الأفراح الباهر
شيل أحلامك مني وغادر
زي نسمات العشم الفاتت
جفه رحيق الزهرة وماتت
لمه شعاعا الليل وطفاها
شمس الريد البينا إتلاشت
وأنا فضلت الغربه عليها
دنية ريدك وفتها عابر
شيل أحلامك مني
وغادر ..
سيبني أجوب الدنيا
وأهاجر ...
دندنة
مره بتدندن منتشي
تدفن همومك في الرسم
تسكب حنينك في الغنا
لو مره جرحك يلتئم
ماتزازي يا طير العشم
لامن نهارك ينقسم
أوعك تسلم
وتنحني
للريح تطاطي
وتنهزم
ما بشبهك ضهبي
ومشيت
أنده مواعيدك مدى
عديت مسافاتك حنين
ناداني من وعدك صدى
صمتك أوان الريح .. إتكلمي
غطي المواسم بالهديل .. إتقدمي
ماكي الرخو الدفرو الدمير
تتهدمي ..
أو بشبهك ضهبي
ومشيت ...
وصيتو قمريكي البطير
صباحي يطرب وينطرب ..
وصيتا شمس الذكرى ديك
قبال تقبل للغرب
كان شفتي في الغربه الحنين
في روحي منك بنسرْب
أحزاني ضون نجمتين
الليل وقع من طولو نام ..
يوم أشرقت شمس الحنين
من عصنو قام ...
فرا الحمام ...
شقشق صباح الدنيا بيك ...
بالإلفة والحب والسلام
ما ودرك ضهبي
ومشيت ...
أنده مواعيدك مدى ...
صهيل الريح
ناديتك
رده صهيل الريح
متنين يا عارفه حال الحال
حمامة الحِن تَرِكْ في البال
مطيرة الريد ترش الدار
يلاقي صباحنا فال الفال
عشق غنواتنا تتقاطر
زمن متعافي للأطفال
***
ناديتك ضو
والضو براق
قِبلي ومردوم
عطرتي الجو
والندى أشواق
شايلاهو غيوم
ناديتك مد
وظلال ونجوم
ناديتك أو ناداني
هواك
قاليا أقيف
ما بين ألقاك
والوعد الزيف
ما بين أطلال
ورصيف ورصيف
وهواك مسراي
لعوالم إلفه خرافيه
لصباح أيامي المنسيه
وسنابل عمري الموعوده
بالمطر الهاطل حنيه
ناديتك فال
يا بت في البال
والفرقة جدار
يا الدافقة الشوق
أمطار وبحار
أنا كيف ألقاك
والخطوة ودار
يا روح في الروح
بترد الروح ...
انا بين البين والبين
مشبوح ...
الكلمة عتاب والغنوه
تنوح ...
انا وين ألقاك وزماني
نزوح ...
أتعبني وراك سفر
المجهول ...
قلباً عزاك بهواك
مشغول ...
سماكي شروق فرحو
المأمول ...
ناداكي ورد صهيل
الريح ...
الليل عصفور
الليل عصفور
فضحو التغريد
رعش القنديل
والضو باقات
أنا عشت عذاب
الذكرى وراك
ونواصي القلب
تغني هواك
***
قال الغناي
لقوافي الشوق
إبه الوداك
لغناي وشقاك
إيه الخلاك
تستنى حبيب
في سكه ضباب
والدنيا مطر
يا وجه بشوش
أنا بستناك
لو غبت كتير
أنا قلبي حواك
الورد حبيب
لي كل شروق
ما أنت كمان
عارفني عشوق
راجيك أنا بس
خليها تروق ...
يا زاحمه غناي
إلفه وتغريد
يا إيد مشتاقه
تسالم إيد
لا وصلك منو
مليت الايد
لا عشقك منو قدرت أحيد
ما الليل عصفور
فضحو التغريد
رعش القنديل والضو باقات
وأنا عشت عذاب
الذكرى وراك
بشرى الغيم
واهم لو علمتك تنسى
أو سديت شرفاتك ناسي
عايني محل ما تعايني
بحاصرك ..
شبق الفكر الشدا حواسي
يا الساكناني هواجس ذاتك
شدر الروح
وحفيف أنفاسي ..
يا الدقيتي أبواب
الذكرى
رحب بيكي القلب
الحنه
دوا نداك الفات
أحزانو
دوبا قليب النوبة ورنه
شفتك رامية على الفرحه
طرحه مطرزه حب ومحنه
وابتديتي شروق الفكره
شقيت بيك الزحمة مرقت
راكز ضد الريح العاتي
انسليت خليت احزاني
في تابوت الوهم الذاتي
عطر النيم الفاح نساني
تعب الرحله ولمه شتاتي
وإتلاقينا حبايب ومرسى
يوم دقيتي أبواب الذكرى
زي غشاكي المطر العاول
ريحة النيم السكر فوحو
بلبل شوقنا الحلق فوقنا
حتحت ريش الغي من نوحو
غرد شدا خيوط الذكرى
نبض النبض الصادق بوحو
وإتلاقينا حبايب وفكره
قدرك قدر الموج الفاتح
بين المد والضفه حوار
أنا مطامن برك آمن
وواثق كيف زمنك دوار
أوعى يراودك فيني حنين
توهبي روحك للأسفار
أنا أودعتك سر العشره
بشرى الغيم وعد الأمطار
لو نتلاقى حبايب ومرسى
جناح الشوق
أبدا بيك القول
أغني ...
لما تسألي عني تلقي
الشوق يسافر لي بريدك
أحلم أظفر بي رضاك
أبقى في قلبك وحيدك
أبدا بيك القول
أغني ...
أحيا بيك فرحان وضاحك
أملأ بالتغريد صباحك
هامي بيك مشدوه وهايم
قلبي طاير بي جناحك
أعشق الحرف البريدك
وابدأ بيك القول
أغني ...
يا حبيبه الرحلة طالت
خطوة في سفر الهواجس
إشتهيت ليل نسمه جابت
صوتك النديان وهامس
يرنو ليك قلبي المعذب
في مدى الأحزان يكابس
ويبدأ بيك القول
أغني ...
يا أمان الزول وغيمه
جات تحلق في
الهجاير ...
لي مواعيدك مسافر
بي جناح اللهفة طاير
أبدأ بيك القول أغني
كلما لاحت بشاير
أشتات التمني
مره هايم فيك وحالم
غبت في نشوة ودادك
إختصرت شقا المسافه
بيني وإطلالة معادك
مره تايه فيك أغني
أحضن أشتات التمني
ناسي أيام التجني ...
ومرة ليك وداني خاطر
أسرج الخيل العنيده
صحا في روحي البيادر
والمشارق في القصيده
إحتواك فيني الترجي
وخاطر الفكرة الفريده
رحت هايم فيك وحالم
حاضن أشتات التمني
مره والكلمات بشوشه
كنت مفتكرك معايا
إنفتح شدو الأماني
وجنه فيك عينيك غنايا
في الشبابيك البتضوي
صغت صمت الليل روايه
فيها توجتك أميره
وملكه في عالم هوايا
عشت هايم ..
فيك وحالم ..
غبت في نشوة ودادك ..
مدن التعب
أسأل عليّ
أسأل عليّ مدن التعب
تلقاني في قلب الحروف
حس المعاني الإغترب
مسكونه بالعشق النبيل
وملانه الريد والطرب
أسأل عليّ ..
أسأل عليّ لمان تحس
بمشاعري والفيض الندى
أدخل مدارات الكلام
أسرح مع النغم الشجي
تلقاني بي صدقي المعاك
ورحابة الزمن البجي
مسكونه بالعشق الجميل
وملانه بالريد والطرب
منسيه في مدن التعب
أسأل عليّ
أسأل كتير
كل العناوين والمدن
كل المسافرين والسفن
ومشاعر الحب والحزن
ومواسم العمر البقيف
ما بين محطاتك ويطول
وبريق نجيمات الأماني
الساطعه في عز الأفول
وجسارة الأمل العنيد
بين التردد والوصول
تلقاني في مدن التعب
وقساوة الزمن الصعب
مسكونه بالعشق النبيل
وملانه بالريد والطرب
آيات الجمال
على العلي
وعلى العليك
يا قلبي تاني
مشيت تحب
لا أخذت راحه
من الشقا
لا درت من
ولهك تغب
وديتني لي أبعد
فصول
في قصه
نيرانا بتهب
وريتني آيات
الجمال
أشقيتني يا أصدق
محب
***
مالك قسمت
الريد معاي
تبكي وتحنن
في النجوم
هيجت فيني
جرح برا
وفتحت أبواب
الهموم
رجعت زي
ما كت لي
من ورده لي غيمه
بتحوم
رميتني في بحر
الغرام
مهدود وما بقدر
أعوم
***
صادقت يا قلبي
المحال
وعشقت آيات
الجمال
مزجت ألوان العشم
وجمعت أشتات
الظلال
من غير تحس
ودرتني
سافرت بي
مدن الخيال
حلقت
ما شاورتني
ووعدت
ما فرحتني
شلت المنام
سهرتني
وعلى العلي
وعلى العليك
يا قلبي تاني
جرحتني
وديتني لي أبعد
فصول
في قصة
نيرانا بتهب
عشقت أيات
الجمال
أشقيتني يا أصدق
محب
أحلم
أحلم ...أحلم
خلي بكره الجاي فالك
لا الرياح بتهز غصونك
لا الحزن يوصل مجالك
العمر زهراتو جفن
وانت رايح في انشغالك
الفرح منك معدي
زي جريكا وراء ظلالك
وإنت تحلم ..
***
الظروف ياها الظروف
شوق وهم وجري ومشاغل
زولك البتحبو والفو
ارضى بالمقسوم وحاصل
ما الحلم ضفه ومشاتل
والأمل رحله ومراحل
كم سنابل شوقا طايل
لي مطر هطال ونازل
وأنت تحلم .. برضك أحلم
أحلم .. أحلم
في خيالك سوي واقع
تلقي نجمك ضاوي بهجه
وكم قمر في سماكا طالع
تلقى نفسك زول خرافي
قادر يتخطى الموانع
تلقي بكره الجاي أخضر
جايب الأفراح ورايع
وأنت تحلم ..
برضك أحلم ..
خلي بكره الجاي
فالك
