ام ضرع خرّفت وطلقت ( الجزء الأول )
بشرى سارة لمن فاتته... الاجزاء الاولى من ام ضرع..
طريحة الفراش...تهمهم وتردد كلمات وأغانى..تحدث نفسها...تجتر واحدة وتبتسم..فقد تذكرت الليالي الجميلة..وآآه من تلك الليلة القمرية..الهادئة.. الدافئة ال..ال..وآآآآي صرخت بصوت مسموع..تهرع اليها(الضحاية)-ولدتا في نفس اليوم والساعة( الثلاثين من يونيو)-تركع بجوارها وتصرخ في أذنها:
مالك آ(أم ضرع) الواجعك شنو ?
أم ضرع:
ياريت الوجع كان كلو زي دا..وجع شنو آ خرابة.. دي مغصي ولوية مصران علي ال....بري بري دا مابقدر أقولو ليكي ..ووحاتك آ كاتمة سري..كان الجنة فيها زى دا ..كان خليت (ود عشرة)قطع رقبتي وبقيت شهيدي
(الضحاية) تجتر وتغير مجري الحديث:
السنون عدمن الحبة..بعد دا علا كان يهرسو ويدونا ليهو..وتسأل بغتة - وفي نفسها تأمل أن تكون(أم ضرع) نسيت أنها لن تحكي - قلتي الحصل شنو في الليلي ديك?
ترد( أم ضرع)وكأنها كانت تنتظر هذا السؤال:
أماني ماك نجيضي..إلا يوم يكون فيهو مزاجي رايق..وبعين مغمضة همهمت..يا حليلك آ(أب سنكيت)..
(أم ضرع) في عراك مع والدتها كلما كبرت عاما..فهي لا تستطيع الإحتفال بعيد ميلادها لمصادفته اليوم الشؤم_الثلاثين من يونيو_كان يوم ولادتها حدث غطي علي ولادة(الضحاية)..الفرحة كانت أكبر بقدومها..حتي أن الأخيرة كانت تقول ..(أنا يايمة مافي زول جاب خبري..الناس كلها( أم ضرع) جات.. مشت..نسوي شنو..قسمة..لكن الله يخلي(أب قرون) هو وين الليلي طافش?
تنزوي(الضحاية) في أحد الأركان إلي جوار ثلاثة من أعز صديقاتها وتهمس:
أماني الليلي عندي ليكن جنس حكي..أصلي مغيوظة من(أم ضرع) عشان أبت تكلمني وأناالبومة أشيل وأحكيلا..(أب قرون) عمل..فعل.. وترك..ما خليت شئ ..السويناهو بالليل والنهار..وتضيف بصوت عال مخاطبة جليساتها:
أخدن راحتكن اللجيبلكن شيتا تشربنو..دوبنها ديك نايمي..ومع النوم الطرش قاديها..
تعود(الضحاية) ومجئ(أم ضرع) يقطع الحديث..
(الحسوني) يقدس ويمجد الإناث..كانت فرحته لا توصف بقدوم(أم ضرع)و(الضحاية)برم شنبه في ذاك اليوم..توضأمن غير غسل ليصلي..ليس حامدا..شاكرا.. بل ليخبر جمع المصلين بقدوم المبروكتين..صلي العصر بخلوة الشيخ عطية وحكي
والمغرب بخلوة الشيخ ود الزاكي وأنبأ..والعشاء بجامع الطرف وخطب..وختم صلواته وترا بالجامع القديم حيث لا أحد..وكلها بوضوء واحد لم يكن مكتمل
محبته ل(أم ضرع) كانت أكبر من مثيلتها ل(الضحاية)..وبإيمانه الضعيف يدعو:اللهم لمني فيما أملك وتملك ولا تلمني فيما تملك ولا أملك..
(أم ضرع) تفحص الجالسات جيدا وهي تقول:
مويتي وينا آ(الضحاية).. أديني شويي أنزلبها اللقمة دي..وإنتن آ خرابات متلمات كدي نعلكن عافي..وتواصل بنغم:
يا تور الرجال من جم
ويا مقنع بنات العم
الله يزكرني الباقي مالي تقول نسيت.. كلو منك آ(الضحاية) لخمتيني بي مويتك الجبتيها دي..مالا تقول علي حارة..وتواصل بعد البلع والتفكير:
أب سنكيت تعال لي عود
نبني نحقق المقصود
أب سنكيت تعال لي صاد
نوم فوقي نسوي الكيي للحساد
قالت البيت الأخير وهي تشير بلسانها إلي (الضحاية)
ونواصل...
التعديل الأخير تم بواسطة mohamed hemaid ; 02-10-2006 الساعة 09:34 PM.
|
