في يوم الأمهات ... سلام لكل العظيمات

[حافظ حسين]

أماتي القبيل بحنهن لجني سلام عليكن في العالمين.... وثير المرقد للغاليات من أماتنا... و السعادة و السكون للحيات ....
أماتي يا أمات
أمي نورا و أمي أرض الجنان كيفكن و الضفة الأخري و يا موت يا نقاد
أمي قمر الدور الم تزالين تحكي للصغار القسد الناير حلال الضفاير
أمي حليمة كيفك و بنات أبنتك المراهقات بعنف .... خالده انشاء الله شعرها قام بعد صلغة لعينة ... و الصلعة في الخرطوم بقت مجان

كل من خبرت الأمومة بسودانيات سلام و محبة

[حافظ حسين]

http://www.youtube.com/watch?v=LGZ3YIwXa30

الي أمال الشيخ في شموخها

[حافظ حسين]

قوت القلوب
سارا
مواهب
سحر
و كل من خبرت الأمومة .... ليكن مارسيل و لنا الرماد

https://www.youtube.com/watch?v=yEiHlNpwLc4

[حافظ حسين]

إمراة الكنار و ابو عشرين
قروية من اقصي بقاع الدنيا أتت تسعي
و الان سيدة أعمال من الطراز الأول
باولينا التي قطعت ثديها كي تحكم إطلاق السهم في منتصف رأس العقلية الذكورية
و كم انا مفاخر بيك الأمم يا عفاف
و بكرة عازم نفسي عندك ويكاب و عارف بتعرفي المكرونة بالشملي ياصلدة الارداة و العزيمة
يا تاج النساء و رمزهم
فخور بك عن جد
و يديك لينا طولة العمر في الدنيا يوم ما يألمك

[سارة]

شكرا يا جميل
لامى وامك وكل امهات العالمين محبة وسلام
والرحمة والجنان لمن فارقن هذه الفانية

[حافظ حسين]

يا والدة يا مريم
يا عامرة حنية
أنا عندى زيك كم
يا طيبة النية
بشتاق وما بندم
إتصبرى شوية
يا والدة يا مريم
مانى الوليد العاق
لا خنت لا سراق
والعسكرى الفراق
بين قلبك الساساق
وبينى، هو البيندم
والدايرو ما بنتم
يا والدة يا مريم
عارف حنانك لى
راجيك تلولينى
دايماً تقلدينى
وفى العين تشيلينى
ألقاهو عز الليل
قلبك يدفينى
ضلك على مشرور
قَّيّلت فى سنينى
أنا لو تعرفينى
لو تعرفى الفينى
أنا كم بحبك كم
والعسكرى الفراق بين قلبك الساساق

.. وبينى، هو البيندم
والدايرو ما بنتم
يا والدة يا مريم
طول النهار والليل
فى عينى شايلك شيل
لكنى شادى الحيل
والخوف على داهم
هاك قلبى ليك منديل
الدمعة لما تسيل
قشيها يا مريم
صدقنى أنا لقيتو امبارح
ا بحلم كنت ولا سارح
كان باسم وشامخ كالعادة
نفس الخطوات البمشيها
نفس الكلمات الوقادة

محجوب شريف
و الله يا أمات المناضلين
و ااااخ من حملكن

[نبراس السيد الدمرداش]

كل عام وهن طيبات
عفيات ومتعافيات
اسالهن العفو والدعاء الصالح
واسال ليهن ربنا الرحمه في الدارين
امهاتي وامهات سودانيات

تحيه خاصه لامي حليمه

[أميرى]

قبل يومين بسمع أغنية لسودانيز باند إسمها يمة ما عارف لي جيت في بالي لحظتها يا ود حليمة
وسط دمعة كبيرة إبتسمت ودار حوار صغير جواي
والله ود حليمه ده بي (كفرو) ده الله راضي عنو لبره بي حليمه
طبعا كافر دي بقي عندي فيها شك بعد غزوة ذات الميراث تلك
المهم قامت أمي خشت في الحوار الجواي وقالت أريتو كفرك زي كفر ود حليمة كفرا يحن و يبر و يفرج هم

اللهم ود حليمه ده أبرنا بوالدته
فأكتبه مع من وعدتهم بجنة تحت الأقدام و بين حنايا القلوب

وأحرمه الحور العين
أصو حور عين شنو ليو كمان
...

اللهم نسألك رفقة أمهاتنا هنا و هناك و
اللهم يا سوا سوا يا ما دايرين

[مواهب عبد العزيز نقد الله]

يا سلاااااااااام ياحافظ, ليك وليهم التحية والتجلة وكللللللللللللل الوداد ............
لكل الأمهات أمنيات بحجم معنى الاتساع وطول مدى العمق ...........
لكل أمهات بلادى و لكل أمهات العالم امنيات بعام جميل يشبهكم, وعشم بتطييب الخواطر الكسيرة والافئدة المكلومة وكثثثثثثثير أمنيات خضراء كقلوبكم المعطاءة ....


شكراً حافظ لك المنى والتحيات النواضر ......

* رغد صغيرتى ذات الأربع أعوام لا تنفك تردد هذا السؤال كلما واتتها سانحة ماما , إنتى ليه ناس أمك ما بيجونا , قولى ليهم تعالوا لينا إحنا بنحبهم ),,, وما بلقى إجابة أقولا ليها غير الدموع ..........

أفتقدك حبييبتى وأحتاااااااااجك بشدة , ولكن لن أقلق بشأنك فأنتى فى ضيافة عزيز , وحق على المضيف إكرام ضيفه ........لك الدعاء بالرحمة ........

[حافظ حسين]

المشاركة الأصلية كتبت بواسطة أميرى

قبل يومين بسمع أغنية لسودانيز باند إسمها يمة ما عارف لي جيت في بالي لحظتها يا ود حليمة
وسط دمعة كبيرة إبتسمت ودار حوار صغير جواي
والله ود حليمه ده بي (كفرو) ده الله راضي عنو لبره بي حليمه
طبعا كافر دي بقي عندي فيها شك بعد غزوة ذات الميراث تلك
المهم قامت أمي خشت في الحوار الجواي وقالت أريتو كفرك زي كفر ود حليمة كفرا يحن و يبر و يفرج هم

اللهم ود حليمه ده أبرنا بوالدته
فأكتبه مع من وعدتهم بجنة تحت الأقدام و بين حنايا القلوب

وأحرمه الحور العين
أصو حور عين شنو ليو كمان
...

اللهم نسألك رفقة أمهاتنا هنا و هناك و
اللهم يا سوا سوا يا ما دايرين

هوي يا وهم الكفر سربع زمان
و ما ذات الميراث الا تجلي لذلك
و نبشرك الليله عاملين لي حولية علي شرف دخولي
قالوا لي أعزمك أصحابك لكن حكمة الله ما لقيت صاحب بتعزم
أو صاحب ممكن الزول يوديه لمثل هكذا مناسبات يا أميري
ناصر يوسف حردان و ما برد علي التلفون
غايتو في النهاية اتوكلت علي الحي الذي لا ينوم و بسوق معاي خال فاطنة و مصطفي ...
الأول ما عشان اسلامه مظبوط لكن ظابط خشمه و ما بفلت قدام الضيوف
أما مصطفي و الله دا من أصحابي الشدة ما مسلمين لدرجة صلاة الصبح حاضر

كيفك يا حبيب
و كل عام و أرقي الكائنات جميلات
ممري تحاياي و دعواتي للوالدة

[طارق صديق كانديك]

يا أميري قرأتك، فاقشعرّ بدني وتلألأ الدمع على العيون .

ياحافظ ممنونين


سلامٌ عليهن أجمعين، اللواتي رحلنّ واللواتي يزيّن حياتنا بأنفاسهن.

[حافظ حسين]

المشاركة الأصلية كتبت بواسطة سارة

شكرا يا جميل
لامى وامك وكل امهات العالمين محبة وسلام
والرحمة والجنان لمن فارقن هذه الفانية

سلامي للوالدة و ربنا يديها طولة العمر يا سارة

[وهاد ابراهيم محمد]

وليك يا ود حليمة سلام
ولأمهاتنا كل التحايا الطيبة لو تكفي
والأمنيات الطيبة لو تكفي

لأمهاتنا في المعسكرات
لأمهاتنا في المنافي
حين تُختزل الحياة كلها في كيف تحميهم الصغار, وكيف تعيشهم, ومبلغ أمانيها
ان يمهلها الرب ليوم يستطيعون.. واي يوم يا حافظ والعمر كله تقضيه لأجلهم وفي بالها
ان ليس بعد, مازالوا لا يستطيعون.
حين يكون العمر تذكرة في قطار عطاء لا محدود, ولا يعترف بالعطلات الرسمية والأعياد.

لأمهاتنا لأننا الآن هنا..

وعفواً جميلاً لأننا أبدا لن ندرك ما هن, ولما هن, وكيف هن.
ولا نخجل من اننا فقط نستمتع بهن.

فليمتّعهم الله بنا.
يحفظهن طيبات معافيات, ويحفظنا لهن طيبون ومعافون
وليدم لهن هناء البال, وليدم لنا جمال وجودهن لأجلنا. واقعاً او ذكرى.

[AMAL]

سلام ياحافظ
لامنا حليمة
ولامي فاطمة
الف رحمة ونور
اجمل الامهات واذكاهن
جميلة وقوية
كاملة الانسانية
وسريعة البديهة
امراة متحضرة فاقت قريناتها وسبقت زمنها بمراحل
اعطت بسخاء وكانت مثال الام
هي نموزجي في الحياة
رحلت باكرا جدا ولم تخلد في ذاكرة ابنائي صورة الحبوبة
الا بعض رؤي وحكايا حرصت ان تكون في اذهانهم
عن المرأة الاجمل والانبل والاهم في حياتي
اللهم اكرمها بوفادتك يارب العالمين
واجعلها مع الصديقين والشهداء
شكرا ياحافظ

[علاءالدين عبدالله الاحمر]

امي
رمانة الحياة
وغيمة هطول الحنان
معك واحن اليك
اشتاق ان أعود لحجرك
كل يوم
اشتاق ان اداعب ضفيرتيتك
وان اغفو كما كان قديما في ساعديك
ساهرع كلما ناديتني فاتحتا يديك
أحس بهذا السقم
يوجم شفتيك
قبليني بهما
ضميني اليك
أغسليني
بابتسامة
وأمسحي علي رأسي كلما
جئت اليك

أعزريني فاحرفي اليك لن تفي
ودعائي لك بالشفاء حاديه الأمل
كأنما أعيش لأجلك كل يوم
ربي سيستجيب
لذا لا يأس
تحت رحمة الاحد