صبح الأمانى....

[imported_أحمد عبدالوهاب على]

[frame="7 80"][align=center]صبح الأمانى


مانى قايل قلبى مِنِّك تانى بِرجع للأمانى
وترجع الأوتار حزينة وتبقى للألام أغانى

أصلو يوم طلانى صُبْحِك الظلام هَجَّ وجفانى
والدعاش المشتهيهو بى لذيذ الطّل غشانى
جانى فازع لىْ، يكفكف ،وبى رزاز الطَّل ملانى
كنتَ من قُبَّال أشوفِك زى عيون صيد الجنان
واسعة النون رمش أسود إلا مفقودة الجفان
وزى صلاةً سرمديّة سيدا قايم ليلو عانِ
يقرا لى آياتا كاملة إلا مافيها المثانى

فجأة والآمال مسافرة والقََدر بى خيرو دانى
جابك إنتِ قريبة منّى راحة لى روحى وكيانى
والسراب الكُت مِبارى عمرى كلو وقَفْ ِرجَانى
شالنى فى موجو المسافر وجنب رصيف الريد رمانى
لقيتك إنتى تشابى لىّ شايلا ليك كاساً ملانى
رَشفت منّو ولّا مِنِّك مانى عارف أصلى يانى

وسَِكَّتِك كانت حقيقتى وفيها كاس الحب غشانى
أصلك إنتى حلم حياتى والمنام منّو بيعانى
ولمّا فقت من الحقيقة وفى المنام غَطِّيت تانى
عرفت إنو ِلماتْنا كائن فى منام صُبح الأمانى
رجعت تانى أغنِّى وأعزف للوتر شايل كمانى

ومانى قايل قلبى منك تانى برجع للأمانى
وترجع الأوتار حزينة وتبقى للألام أغانى




أحمد الأحمدى
ليلة الأحد 26/4/2009[/align][/frame]

[imported_wadosman]

[align=center]وسَِكَّتِك كانت حقيقتى وفيها كاس الحب غشانى
أصلك إنتى حلم حياتى والمنام منّو بيعانى
ولمّا فقت من الحقيقة وفى المنام غَطِّيت تانى
عرفت إنو ِلماتْنا كائن فى منام صُبح الأمانى
رجعت تانى أغنِّى وأعزف للوتر شايل كمانى[/align]

[align=center]شكرا ابو احميد..

كلااام جميل...[/align]