بعد السلام والتحية
يا اخوانا ممكن سؤال؟؟؟ هل الانسان البكتب في المنتديات دي ما عندو حياة خارجها؟؟
اكيد عندو صح؟؟
طيب الحياة دي فيها بالنسبة للبنات او النسوان من يشكمهن ويحرّج عليهن زيارة جاراتهن، مشي السوق، سواقة المواتر، دخول النت.. والقائمة متنوعة بحسب البيئة..
اهن الزول دا ممكن يكون ابو، اخو، جكس، زوج الخ الخ الخ
نجي بقى لي جيزابيل او جود او رشا.. اللي هو انا
وفي كل مرة بتكونوا عارفين دي منو من تاني مداخلة تقريبا.. فشنو.. ما تبرغتونا ساي بالله
اولن بالتبادي اي زول يخش بروفايلي حيلقى ايميلي الخاص بي اسمي الحقيقي قاعد في الصقيعة.. دي واحد
ثانيا.. اي زول اتداخل معاي او قرا لي من اول حرف كتبتو عرف انو دي نفس الزولة اللي هي انا.. ودا طبعا ما عشان كل الاعضاء هنا عبارة عن المفتش بوارو او المحقق كونان.. عشان انا بكل بساطة ما بذلت اي جهد لاخفاء نفسي لإني ما عاوزة اخفيها اصلن عن اعضاء المنتدى لانو مشكلتي ما داخل المنتدى انما خارجه..
ما عاوزين تحترموا الحاجة دي ليكم حق.. لاني انا ما احترمتها وفضلت اكتب بالدس لما فشلت كل محاولاتي لاقناع الطرف الاخر انو الكتابة في المنتديات دي حاجة كويسة وما فيها شي.. وهو كل مشكلتو انو بيعتبرها لمة وونسة ما ليها لزوم.. ودي وجهة نظرو طبعا وكل زول حر في لغاليغو
اها العاوز يقول اي شي بخصوص الموضوع دا.. بابكر عباس مثالا..
يتفضل يجيني بي جاي وانا جاهزة..
ولو سمحتوا ما عاوزة اي فنجطة في العام بلييييييييييز
