اقتباس:
المشاركة الأصلية كتبت بواسطة ZEIN ABDALLA
سلام ودالخير
ياخي انا كنت معجب بتجربتك بتاعة زراعة البطاطس في منطقة الجزيرة
اسلانج. بعد سمعت فديو لعمر بشير قبل كم سنة قال انه مزرعته(٨ فدان)
في السليت بتصفي ليها ربح خالص مليار ونصف(حوالي ٤٠٠ الف دولار
في ذلك الوقت)، فقُلت ود الخير دا لابد يكون طلع ليهو بربح ٤٠ او ٥٠
الف دولار ونسأل الله ان يزيد ويبارك. سؤالي ليك هل ستعيد تجربة
زراعة البطاطس؟ اذا التجربة كانت موفقة هل تنصحني بان استثمر في
الزراعة وهل تقبل ان اشاركك واساهم معاك في الموضوع دا؟
زين العابدين عبد الله
(حفيد ترابلة)
|
مرحب بيك دكتور زين ومرحب بيك بعباءة
حفيد الترابلة
اذا استبعدنا أي غرض سياسي من المداخلة فهي محفزة جداً لمواصلة
ما وصلنا اليه في رحلتنا مع البطاطس,, اما اذا كان هناك غرض سياسي فالرسالة وصلت,
ودا حال السودانيين بما فيهم رئيسنا , فهو ماكان يدي اخره بالسرعة دي بخصوص
انتاج ال8 فدان... كما تعلم فالعين حق
,,
شكراً للاعجاب بالتجربة,,
واوعدك بالمواصلة وابشرك فالمشروع ناجح ولكن محتاج صبر
كما ذكرت في اول موضوع الزراعة فتقاوي البطاطس من هولندا, ميزتها ممكن تطلع منها تقاوي السنة التالية للزرعة الاولى, وهذا ما حدث معي اخذنا عدد 50 شوال بطاطس لانتاج السنة الجديدة فقلت تكلفة زراعة الاربعة فدان الى اكتر من النص,, اليومين ديل مبشرين بمحصول يقدر بي 600 شوال بطاطس كانت تكلفتها الملح وجاز الري..لل16 شربة,, والتقاوي طلعت من انتاج السنة الماضية,
التخزين في التلاجة بياخد مبلغ كبير,, واعمال الفلاحة اليدوية برضو غالية وبطئيه
فلنجاح المشروع لازم تكون مالك للتلاجة وعندك معدات زراعة, وقلع ,ورفع,وتنظيف البطاطس, وكل الاشياء دي متوفرة وممكن اذا الناس ختت الكورة واطة ممكن يملكو اي مزارع اليات الزراعة, والتخزين والتسويق, من غير اي اعلام ولا اي ضجة
لكن بيني وبينك امس لما شفت افتتاح عمارات العمال في سوبا جاني شعور باننا ماشين عكس الهدف,, لكن ما بتعرف!
