في اثناء ما انا قاعد مع ست الشاي جا لوري فحم ماري نفس لوري الفحم المر جمب بيتنا ولو مغالطتنا اسال السواق المهم وقف جمب ست الشاي ونزل (اتبنبر) وشرب داك يا الشاي الما خمج اها وبعدين لم قام مشي قالت ليو النبي في حواك كان رميت لي شوال (بغنج ستات الشاي الشين داك) فاخونا ساح وكلم الكمساري الذي لم يتوان في رمي شوال من طرف ... وطلع شوال شاف ... شاف كل حاجة وعمل نايم كيتن للسواق الما سقاوو شاي وبرضو عشان (يبيت وخشمو ملح ملح)
ومن هذا المنطلق ادعو جميع الموجات العاملة نايمه للوقوف صفا واحدا خلف اف امهاتهم ويدوها لزة فنحن بقدر ما مستمعون جيدون ... نقناقين شديد معليش ياخ ست الشاي نست الكفتيرة وفارت والفورة كانت واحد وتلين من اغسطس الجري قبل كده والفحم مات بشبابو هذا في الوقت الذي يشهد فيه سوق االقروش فلس شديد وناس داك ونيكي ضربو الدلجة وما كنت قايل من عتاب تحكم علي بالوحدة والشوق والعذاب اها وواحد اخوانا كان قاعد جمبي قام قال مع الاخذ في الاعتبار هو لسه قاعد وما قال اي حاجة بنفس طريقتي دي والرزق بجي بالتلاقيط لقطة لقطة لحدي ما يخلص الفلم ويجيبو دعاية سيجنال واولويز... اولويز في المقدمة وبلغو تحياتي لعشه كفتيرة وفتحية قرض وعبدو الكمساري والتحية موصولة لكل من ساهم في اثراء الساحة ولتق اواصر الاخوة ومد جسور القربي لجبر كسور الغربة البطالة... في ظل سعينا الدؤوب نحو غد افضل وكلمة سواء ... سواء انذرتهم ام لم تنذرهم ... والعبرة في الكلاكلة اللفه حيث مفترق الطرق والجهجهة ... وقبيل لما جينا ما كنا عارفين انو المعضلة بتتحل بالطريقة دي ... وبصراحة ما كانت طريقة عندنا ليها طريقة ... فقمنا عملنا رايحين بدون سبب .
ملحوظة
عشة كفتيره سالفة الذكر ... وشها ديناري والباقي هارت وما عندها الا الفحم الاسود وكبايتن شيريا وبت جليك بت جليك بس لو ما الظروف كعبة ... والحال شلش ... والناس ورقا تعبان... ما كان فتحت
ناصية .
