اقتباس:
المشاركة الأصلية كتبت بواسطة أسعد
عودة سودانيات دليل واضح ضد أوهام عمتنا أم كلثوم في استحالة الرجوع إلى الزمن الجميل. وهي أوهام ظللنا نستمع إليها بخشوع، إلى أن ظهر عكود ووضع المسألة برمتها أمام لجنة فنية.
«عاوزنا نرجع زي زمان؟ قول للزمان ارجع يا زمان».
اها… الجماعة قالوا ليهو، ورجع!
المشكلة، فيما يبدو، أن البشرية ظلت تخاطب الزمن من الجهة الخطأ. ناس يبكوا ليهو، وناس يغنوا ليهو، وناس يقيفوا فوق الأطلال… بينما المطلوب فريق خبراء، وخلفهم عكود يتأكد أن الماضي ما يتملص من مسؤولياته.
أي أن آلة الزمن التي شغلت خيال الإنسان طلعت محتاجة ناس فاهمين، وزول واقف وراهم يقول: يا جماعة شوفوا لينا الموضوع ده.
ولأن الزمن، في قراءتي اللاموضوعية، هو الناس البنعرفهم والكلام البنختلف حوله والأماكن البنمشي ليها من غير مواعيد… فإن استرجاع سودانيات هو استرجاع لجزء من أعمارنا. تدخل باسمك القديم، تلقى زولاً كنت مختلف معاه، فتفرح بيهو فرحة تخليك تشك في سلامة خلافك السابق.
عليك الله يا عكود انت وجماعتك الخبراء ديل حاولوا رجعوا لينا السودان القديم ما قبل 1989
وتكونوا كدة عملتو العليكم وزيادة
|
اقتباس:
|
استرجاع سودانيات هو استرجاع لجزء من تاريخنا
|
صدقت والله يا أسعد!
حروفك العميقة دايما تفرحنا وتطمنا أن سودانيات تستحق بذل الجهود.
أتمناك بخير يا أسعد، وعليك الله جيب معاك الشردوا واقرع الواقفين قنا.
لك مني كل الشكر والتقدير والمحبة
