ستبقي خالداً يا وطني
وطنا الكان حدادي مدادي .... سيبقي ما تبقي من ترابه خالداً ولست بنادم حين نال الآخرون حريتهم
هنا كم سؤال للسيد رئيس الجمهورية / عمر حسن أحمد البشير
يا سعادتك الي عهد قريب كنت حين ترقص علي ايقاع السيرة المصاحب لصوت الفنان قيقم
كنت حينها يا سيدي توعدنا بأن امريكا وروسيا قد دنا عذابها ... وما زلت علي المقولة حتي ظننت بأن جنيفر لوبيز ستكون ثبيتي ذات يوم
صحوت من حلمي علي صوت دويلة ما زالت في مهدها لم تفارقها البزازة ... تدك مدخراتكم الشخصية المتمثلة في حقل هجليج للنفط
اظنكم يا سيدي استعنتم بشركة الهدف الأمنية لحراسة المكان بدلاً عن الجيش المشغول في ابادات أهل الغرب من بلادي
وما تبقي من رجال الأمن بعضهم من انشغل باغتصاب حرائر البلد ... ومنهم من خارت قواه
الآن سيدي الرئيس لا اطالبكم برد حلمي الجميل فيما يختص بجنيفر لوبيز واعلم انك قد ترد الي حلمي في اقرب لمة قوم يهللون
لكن اتضح لي أن البتاع معمول من السلكون وما تبقي من اجزاءها لم تكن تهمني كثيراً
انا فقط اريد ان تنفض صفوف الوقود والتي قد تؤدي لتعطيل العامل عن عمله والطالب عن دراسته
وكنا قد تحملنا أزمة المريسة بعد ما آلت تلك الارض لأهلها وذهبوا ناسين ان يتركوا لنا سر الوصفة
يا سيدي الرئيس لا تبدلني حلمي الضائع بفكتوريا فقد كانت في متناول يدي استطيع نكاحها وقد تُزف الي رغم أنف الآخرين
وكنت سانجب منها من البنات لا يطرق علي بابهن خطيب من ابناء عمومتهن
ورغم ذلك لا استطيع تزويج بيتر الأخ الشقيق لفكتوريا ... لا استطيع تزويجه لاختي حتي لو جرب لحسة كوعو
شفت كيف يا ريس فنحن سلالة قوم لا يزوجو بناتهن الا لابناء العمومة ... وقد ورثنا هذا بالفطرة
ولا يزوجو بناتهن لذو أنف افطس ولون اسود وشعر قرقدي حتي اذا قال اشحد ان لا اله الا الله وأن مهمدٌ رسول الله
لكننا يا ريس في ظل الانفتاح الفكري وفي عهد المثقفاتية الذين نادو بعدم العنصرية آمنا باننا ... كلُنا ابناء تسعة
لكن البقنع الديك شنو ... وبرضو البقنع الخال شنو
ما عايز اطول عليك يا ريس بس عشان انا كمان ما فاضي ...
بس طقش اضاني قبال كم يوم كده انكم تزوجتم الثالثة ... فوجب علي أن اقول مبروك يا ريس
علماً بأني قاب قوسين او ادني من سن الاربعين ولم اتزوج بعد ... وما حاسدك وحاة الله
أنت بطبق شرع الله .... تكاثرو تناسلو
وانتو بتتعبو يا ريس فمن حقكم أن تسكنو لبيوت وجيهة ... والعندو قروش بحنن .....
وعدم عرسي يا ريس صراحة كده الميزانية ... اصبحت ككفن ابومحجن الثقفي
لو غطت الدهب بتقصر في الريحة واتا عارف العرس برا ريحة في سخانة البلد دي ما بنفع
تعرف لو كنت ساكن كافوري كان بقول ليك ممكن عشان لو جات السخانة ممكن استعين بالمكيف ... وكافوري بلد مرضية ما فيها كهرباء بتقطع
شفت حكمة الله يا ريس
لو كلامي ده قاسي عليك يا ريس ... عليك الله ما تزعل مني ... انا برضو زول الله ساي
|
