فـضـلآ..لا تـكـمـل "لـي" جـمـلـتي!! و لا تـفـسّــر موقـفـي عـنـّي!!

[الطيب بشير]

.

أشهرها (إنت عاوز تعلّمنا شغلنا)
و التانية "يعني قصدك أنا ما بفهم؟؟"
و غالبآ يكون قائلها موظّـف خدمة عامة، يعلم مسبقآ أنّـك بحاجة ماسّـة للختم، لأنّـك مسافر..أو مشغول..المهم أنّـها لحظة مواتية ليفرغ غضبه من
سيد اللبن
الباشكاتب
خالة زوجته
الألفا بتاع المتوسطة
و برع فيها ناس المطار..أمّـا حين يقولها شرطي، بكل أسى، فيصبح فيها ظلال تهمة..و قد يرفقها بتهديد:
تعطيل موظّـف دولة أثناء تأدية الواجــب!
و بالطبع لا حاجة لي لتذكيركم أن كلمتك القلتها لا عيب فيها و لا حرج..لكنّـها تظهر الموظّـف أمام نفسه بأنّـه لا يعرف!!
طبعآ دي أكبر مصيبة في السودان..
ليس الجهل
بل الإعتراف بوجوده..أو إكتشافه جهرة..حيث لا يعني ذلك أن التدريب ناقص..أو أنّ الإجراء المحدّد جديد على الموظّـف..لااااا
المسألة شخــصــيّـة "طوّالي"..و قد تمسّ القبيلة و العائلة..إلى آخـر متاهات الوهم الشخصي!!
و قد تمسّ شرف الدولة، لو كان جوازك القدّمتو للخدمة أجنبي، و لمن الموظّـف العام في السودان يأخذ الأمر شخصي ..إنت تعبت..
بالجد يعني..
ممكن يقفل الخزنة..و يشيل المفتاح و يمشي بيتو..حتى لو كان الموضوع دة بدري جدآ..طبعآ بعد ما يكون سـمّـعـك "فارغة" أشهرها أنّـك (تـتـفـلـفـس) في استهجان لمحاولات شرحك للموقف..أو إقتراحك الوجيه للمعضـلة.
نحن أمة نخاف من الفشـل بشكل، لا محالة، يورثنا الفشـــل..
و نطبع الرسمي و العام بالبعد الذاتي بشكل يضر بالموضوعي بوضوح..


.

[الطيب بشير]

لا أدري إجابة واحــدة شـافية
ربما كانت الشخصية السودانية (الحارّة)..أو الأجواء السودانية (الحارة)
أو الدماء السودانية (الحارة)..
لكننا أدمنّـا تحويل العام للخاص
و ضربت مثلآ بالخدمة العامة لأنها محايدة..عسكرية و مدنية
لا نجيد فــن الإبتسـام و اللطف في الكلام..و نحرص على التكشيرة بانتظام
الموظفات يحسبن اللطف ابتذالآ..و تحسب عليهن أنفاسهن في المعاملات العامة
إن تبسمت فهي فاسقة..و إن مشت خطوة زيادة لتسهيل الإجراء فهي "رجفت" ع شان الواد شديد!!
أنا ما قصدت أحرجك يا حضرة الظابط ..لكن واضح إنك ما بتقرا انقليزي!!و الجواز مكتوب بلغة واحدة..طيب مافيها حاجة لو قلت ليك "في الصفحة التانية يا جنابو"..
بعدين البت بتاعة الحسابات تقفل الشباك في وشنا الساعة اطناشر و نحن واقفين لينا نص ساعة؟؟كيف الكلام دة؟؟..ما كان من الأول تقول آخر واحد في الصف هو أبو طاقية حمرا دة و بعدو ما باخد زول تاني!! منو القال الساعة اطناشر دي قرآن؟؟
القصة، برأيي، فيها تحقيق شيء شخصي..
إنو أنا مهم و ممكن أنرفزك..و أجيب فيك قوووون
شوية تدريب ممكن يفيد..

.

[د.سيد عبدالقادر قنات]

سلام ود البشير

أت يا اللخو الحكاية دي من زمان

ولا شيتن جديد جا مع العولمة الأنقاذية ؟؟؟

ألم تكن خدمتنا المدنية مضرب المثل عربيا وأفريقيا ؟؟؟

وتيب الهسل شنو يا أهوانا ؟؟؟

التطهير واجب وطني !!!!!

الصالح العام !!!!

ألغاء الوظيفة !!!!

الولاء قبل الكفاءة !!!!!

شيلني وأشيلك !!!!!

الخصخصة !!!!!

النهب المصلح !!!!

وحكاية الرجل المناسب في المكان المناسب

دي حجوة قديمة من زمن حفرو البحر


يديكم الصحة والعافية

[معتصم الطاهر]

ود البشير

تعرف من أدخل الرشوة فى السودان؟

بوليس الحركة ؟

تعرف من أدخل الفشخرة فى الخدمة العامة

الشرطة


تعرف من أكثر الناس انضباطا ؟

الشرطة ..


متاكـــاة
مع البوليس أنا ما ماشى ..
صدقنى أنا يا جياشى

[haneena]

سلامات يا جنابو الطيب
خلينة كدة أقول رأيي
طيب ننظر للأسباب ليه؟

أولآ...
لو تلاحظ إن هذه التصرفات توجد في دول البطش..و لسنا وحدنا
مصر..(فوت علينا بكرة)
نيجيريا..(رائدة و أم الفساد)
و غالبية ....إن لم تكن كل أفريقيا

يجمعنا شئ مشترك واحد
أمم بطش بها حكامها و أهلها
الطفل من هو صغير...ملطشة
ينضرب من الوالدين..الإخوة الأكبر...الأعمام و الجيران
الأساتذة ( دة كان سابقآ)

يكبر مثل هذا الطفل و داخله عقدة أنه ينضرب لأنه لا يملك زمام أمره
أول ما يملك زمام أمره...و لو في وظيفة صغيرة
يبدأ بتفريغ كل العقد
و احيانآ يكون هذا التصرف تصرف منظم
فالجالسين الآن في زمن الإنقاذ في هذه الأماكن ناس مدربة تدريبآ متقدمآ
فأنت تعرف إن الإختيار لا يكون إلا بالولاء
فكما قاموا تدريبهم بالتعذيب في بيوت الأشباح
أروهم أيضآ كيف يعذبون خلق الله الآخرين الذين لا ذنب لهم
إلا حظهم العاثر

ذد على ذلك البطش من الحكومات
أين ستفرغ ذلك....
كل كبير يبطش بمن هو تحت رحمته
و حتى لو كان عسكري المرور
أو الغفير في باب المستشفى
و قد رأيت كثيرآ مناظر على أبواب المستشفيات كنت أضحك فيها
سيدات يحنسن الغفير عشان يدخلهم
مرات بيخشوا بالكلمة الحلوة
و مرات بالقروش عدييييل

الشئ الآخر....
هذا الموظف أو العسكري أو غيره
مثل تصرفه يكون أحيانآ ليلفتك إلى أن (تدفع المعلوم)
و عندها ينطرح الوجه بالإبتسامات
و يدوك كرسي تقعد فيه
و ربما أوهم من حوله إنك قريبه...
دة طبعآ قبل الآن عندما بقت الرشوة عيني عينك و من غير خجل
تخمش الفي جيبك و تمده عديل

..
أما عن الشق الآخر الذي يخص المرأة
كلامك صحيح 100% عن نظرة المجتمع لها
لا أنسى يا الطيب مرة كنا كل الأسرة في رحلة بالطائرة و نحن جد صغار
و كانت الطائرة سودانير...بها مضيفتين...
واحدة حازمة جدآ..لا تتكلم إلا بحساب
و الأخرى لطيفة و حبوبة
سمعت بأذني الشباب المهرجين السودانيين يقرقون على الحازمة بإنها ( ضابط بوليس)
و يتجنبونها
أما الأخرى اللطيفة..فكان نصيبها أن عاكسوها و حاولوا الإمساك بأيديها
شفت كيف ؟
they take advantage of the nice girls
لانه التربية في الشارع أدخلت في رؤوس الخلق هذه الصورة النمطية
لسلوك البنت
و إعطائك الحق في مشاغلة من تبتسم لك مجرد ابتسامة
حتى لو كانت إبتسامتها هذه طبيعية..جزء مكمل من ملامحها

تمامآ كما ذكر أحد أعضاء سودانيات في بوست ضيق الهدوم...
أن من لا ترتدي الحجاب تعطيه الحق فى النظر إليها
و لا تثريب عليه ..بل هي تتحمل ذنبهم الإثنين
عجبي...!!

أما إن أردنا أن نصلح الأوضاع
فيجب أن نبدأ بالتربية من أول جديد
ثم بعد ذلك التدريب و الكورسات
و قبل ذلك....
إدفع مرتبات كويسة حتى لا تخرج علينا حاقدين على شبابيك الخدمة العامة

تحياتي

[أبوجهينة]

أبو بشير

سلام كبير

أشهرها (إنت عاوز تعلّمنا شغلنا)
و التانية "يعني قصدك أنا ما بفهم؟؟"

ذات مرة في المطار عندما وجهت ملاحظة للشرطي عن جواز سفر إمرأة عجوز كانت سترافقني لزيارة إبنها بالرياض .. مجرد ملاحظة
فقال و هو يرميني بنظرة تنضح شرراً : تعال أقعد محلي ياخي ...

و بعد وقت وجيز إكتشف أن ملاحظتي سليمة ... فقال خجلاً : إنت إتسرعت بس.

فقلت له : و أنا كنت عاوزك تكسب الوقت عشان الزحمة دي

[الطيب بشير]

المشاركة الأصلية كتبت بواسطة د.سيد عبدالقادر قنات

سلام ود البشير

أت يا اللخو الحكاية دي من زمان

ولا شيتن جديد جا مع العولمة الأنقاذية ؟؟؟

ألم تكن خدمتنا المدنية مضرب المثل عربيا وأفريقيا ؟؟؟

يا مراحـب دكتور سـيّـد يا حبيب

و الله كلامك نصّـو صاح ..و نصّـو زعلان من اللنغاز

خدمتنا لمن كانت مضرب المثال ..كنّـا أيضـآ "سخيفين" و لا نعرف خدمة الزبون بمعناها المهني..و لا نتبسّـم..أبدآ..و من تفعل يعاكسها صفيق..أما من يفعل، كان الله في عونه، فلن تنتهي ألقابه!!
أظـن، و الله أعلم، أن القصة لها علاقة بشخصيتنا..كان صديقي أسامة عبدالعزيز يعتقد جازمآ أنها سخونة الجو..و أننا لو، بقدرة قادر أصبحنا في طرف السويد..نكون أحــســن ناس!!..هذه الكلامات برعاية أســامة..أنا "حاملها" فقط!!
تسلم يا عزيزي..

.

[الطيب بشير]

معتصم يا هندســة..إسـمـح لي، فضـلآ، أن أوضّـح أنّ ما نسـبته للشرطة، من شـرّ و خير، غير دقيق!!
كلاهما ....
و نراجع

تعرف من أدخل الرشوة فى السودان؟
بوليس الحركة ؟

أوّل المرتشـين في السـودان، قبل إنشاء "قـوّة بوليس السّـودان" و قبل أن تكون هنالك سيّارات تحتاج لمن ينظّم سيرها، هم قياداتنا السياسية آنــئــذ!!..ذلك أن جنينة السيد علي الميرغني..و حق التصرّف في الجزيرة أبا ليسا من عند الله..كما أنهما لم يكونا مكافأة عن نضال..كانت رشـــــــــــــــوة من المستعمر..تأخّـرت سـمايتها لأننا نطبطب على القادة في موضع صفعهم!

تعرف من أدخل الفشخرة فى الخدمة العامة
الشرطة

و هذه أيضــآ..
الذين ورثوا المستعمر..ورثوه بكل ما كان يفعل..الزي ..السلوك..حتّى أنّهم "سكنوا بمنازل الذين ظلموا"..و الفشخرة في الخدمة العامّة كان سلوك يميّزها..ورثناه عن المصريين "إن فاتك الميري ..إتمرّغ في ترابو"..و الوظيفة الحكومية، الميري، كانت تعطي صاحبها امتيازات عجيبة..من تساريح سفر مجانآ ..لخدمات إستراحات..لتعالي على العباد..نحن في مشروع الجزيرة كان "عمّال نظافة المشروع" يتسيّدون علينا نحن المزارعــين!! لأنّهم يرونّ المفتش صباح مساء و نراه نحن مرتين بالأسبوع..و بين المفتش و هؤلاء العمال جيش من الإداريين كلهم يشربون شايينا و " يكسرون كبابينا" الخ الخ في فشخرة مبالغ فيها..

تعرف من أكثر الناس انضباطا ؟
الشرطة

أمّـا هـذه ..فثالثة الأثافي!!
الضــبــط..و شقيقه الرّبــط..أصــلآ فلسفة جيش..و هما عند الشرطة بضاعة مزجااااااة!!..هذا رأينا نحن..ناس الشرطة ..و تفسيرنا لذلك أن الشرطة (قــوّة مـدنـيّــة) "Civil Force"..و هي تتعامل مع المواطن و إنفاذ القانون بشكل روتيني..إذن لاااااا يمكن أن تدير بيزنيسها بمفهوم الضبط و الربط الجااااااف..يبقى لازم نزيدو موية ع شان يناسب زبائننا الملكية..و التعامل مع الملكية بيقربك منهم..ع شان كدة نحن في الكلية بنقول "طالعين خميس"..و ناس الحربية بيقولوا "ماشين الملكية"!! هم يرون أن كل ما هو خارج أسوار الجيش حياة ملكية صارخة بما فيها البوليس!
نسخر نحن من ضبط الجيش الذي يقول "أقـتــل المظلوم..تنفيذآ للتعليمات..و حفاظآ على هيبة الضبط و الربط"..و نحن نقول "لكنّـه يا سعادتك أبدل قميصه المقدود من دبر"..و هنا يصنفنا (الدياشة) مع القانونيين المدنيين من محامين و قضاة و نيابة و هم الملكيّـة غير المنضــــبـطــين.
شكرآ

[رأفت ميلاد]

سلام يا الطيب بشير

طبعآ روتين الخدمة العامة فى السودان مؤلم . كلو كوم والبوليس كوم . الواحد لما يكون عندو مصلحة فى البوليس هم كبير ولازم تلقا ليك زول تدسى وراه .

الملاحظة الغريبة خارج السودان و بالتحديد فى الخليج من أكفأ العمالة السودانية منتسبى البوليس السابقين . همة وكفاءة فى الأداء عالية وفى السودان يقفل الاب فى وشك .

يكون الجو العام هو الذى يشكل الأداء . زى ما بقولوا ( خربانة من كبارا) وأنا أقصد الكلام دة .

ودى

[الطيب بشير]

المشاركة الأصلية كتبت بواسطة haneena

أولآ...
لو تلاحظ إن هذه التصرفات توجد في دول البطش..و لسنا وحدنا
مصر..(فوت علينا بكرة)
نيجيريا..(رائدة و أم الفساد)
و غالبية ....إن لم تكن كل أفريقيا

حبابك يا الحنينة
أظـن المصريين بيتفوقوا علينا بالنكتة
و عدم أخذ الأمور شخصيّـة
و استعدادهم للإعتذار متى تبين أن الموظف على خطأ (حـأّك "حقّـك".. علي يا سعادة الباشا)..
أنحن عندنا لوية بوز..و إصرار على الخطأ..مصيبة
كذلك المصري لمن رئيسو المباشر يجي ع شان يحل المشكلة بيتنازل و يصبح طرفآ في الحـــــــل..نحن يادووووب تحلى لينا "الرجالة"..أمشي جيب لي اللواء زاتو
و هكذا..

المشاركة الأصلية كتبت بواسطة haneena

ذد على ذلك البطش من الحكومات
أين ستفرغ ذلك....
كل كبير يبطش بمن هو تحت رحمته
و حتى لو كان عسكري المرور
أو الغفير في باب المستشفى

في العسكرية لمن تلقى رئيسك هاااايج..و تعرف إنو رئيسو "زفــتــو" قبل شويّـة..تكتفي بقول "المســمـار بيدقّـوهو من فوق !!"..طبعآ مفادها أن المسمار يؤذي الخشب بالغوص فيه كلما تمّ طرقه..و يأتي الطرق دائمآ من أعلى!!فعلآ البطش و التنكيل يتم تفريغه في الزبون..و البعض يكتفي بالزوجة و الأولاد لمن يكون ما عندو تعامل مع الجمهور..لووول.

المشاركة الأصلية كتبت بواسطة haneena

التربية في الشارع أدخلت في رؤوس الخلق هذه الصورة النمطية
لسلوك البنت
و إعطائك الحق في مشاغلة من تبتسم لك مجرد ابتسامة
حتى لو كانت إبتسامتها هذه طبيعية..جزء مكمل من ملامحها

طبعآ دي مصــيــبــة..و حـقـيــقــة!
جـهــل..و بعـد ثقافي للدين السمح..لأن عرب الجزيرة كانوا يدفنون البنات "خشية إملاق"..نحن مسكنا العصاية من النص..و عاوزين ندفنهم في صرّة الوش و التكمكم!
و يرجع أيضـآ لتبنينا الشخصية المكشّـرة لرجال كمرادف للشخصية المهابة أو على الأقل المقبولة!

المشاركة الأصلية كتبت بواسطة haneena

[

المشاركة الأصلية كتبت بواسطة haneena

color=#0000FF]أما إن أردنا أن نصلح الأوضاع
فيجب أن نبدأ بالتربية من أول جديد
ثم بعد ذلك التدريب و الكورسات
و قبل ذلك....
إدفع مرتبات كويسة حتى لا تخرج علينا حاقدين على شبابيك الخدمة العامة
[/color]

التربية..التربية..التربية
أفضــل كلمة قالها الصادق المهدي خلال حكمه الأخير!
كانت المزايدة على الشريعة الإسلامية..و هل يجب تطبيقها فورآ أم تأجيلها..و كانت أحلى الإجابات تبدو مرّة حنظل..فخرج من الكورنر الحشروهو فيهو، أبو كـلام، بأن قال:
التربـيــة ..هي الحــل..
"ينبغي" على الأحزاب التي تتبنى الطرح الإسلامي أن تقوم بتربية المجتمع ليصبح مجتمعآ إسلاميآ قبل أن تفرض عليه التطبيق من عــل.
برأيي كان ذلك خلاصـة كلامه طيلة سنوات حكمه.
و بعد ذلك، زي ما اتفضّـلت،..التدريب و شروط الخدمة و ما إليه.
تسلمي

[الطيب بشير]

المشاركة الأصلية كتبت بواسطة أبوجهينة

تعال أقعد محلي ياخي ...

أيــواااا..هـوّ دة يا جـلال..بـدّيــك العافية و الرضــا

جبتو لي طــب..

لو ما أخدها مسألة شخصية كان ممكن يكتشف إنك بتساعدو بالمجان!

الخواجات، الشارقيني ديل، بيقولواThanks for making my job easier

في معظم حالات ..تعال أقعد محلي ياخي ...

تســلم يا أبا جهينة يا المـلــك

.

[الطيب بشير]

المشاركة الأصلية كتبت بواسطة رأفت ميلاد

الملاحظة الغريبة خارج السودان و بالتحديد فى الخليج من أكفأ العمالة السودانية منتسبى البوليس السابقين . همة وكفاءة فى الأداء عالية وفى السودان يقفل الاب فى وشك .

العزيز رأفــت
مساء الخيرات..بتوقيت بلاد ما وراء السّــعـد..
عمل السودانيين المغتربين عمومآ أفضــل من أدائهم بالسـودان..و يقال إن العائد المادّي هو السبب..ذلك أن الحصول على الفيزا و تلتلتها و العمل بالعملة الحرة و حلاوتها..لا يساويان الرتب أو المااااهي؟What is it?
و التعامل مع البوليص في السودان يحتاج لسـاتر؟ ..دي ســخرية لا يمسحها إلا أن نجدك عاوز خدمة و نسـلّـط عليك شاويشآ لا يرحم يا رأفــت ..رغم انو كلامك صاح ..لكن كمان تقولو لي في وشي زي دة؟؟..و أنا لابس شرف الدولة؟؟ ..
بالمناسبة من وين جاء العسكر بحكاية أن الكاكي = شرف الدولة؟؟
لماذا لا يعادل شرف الدولة المنتجة للقطن عرّاقي المزارع؟
أو أبرول الصـنّـاع؟؟
لووول..أنا بتكلم زي الشويعيّـة..أظني قرّرّرّبت أبقى فاهم!

[الطيب بشير]

الجزء الثاني من المعاملة التجريمية للمتعامل
أو الزبون..
هي تكملة جملته بفهم تفسيري يراد منه تخطئته!
تقول للرجل: يا ترى ممكن أستلم الورق الليلة؟
يقول لزميله: ما سامع حاج شفقة دة قال ليك استعجل يا مأمون..
و يتضاحك زملاؤه باعتبار أنه قال طرفة..
أحيانآ يضاحكهم المغلوب على أمره لــ"يخلص"
و أكبر خطأ يقع فيه المتعامل هو أن يتذمّـر حين يرى محظوظآ برفقة مسؤول..يدخل ..و يشرب الشاي..تقضى معاملته..و يخرج ..بينما المعذّبون في الأرض يطاردون ظلآ يتناقص بجوار الشـبّـاك..و يلوذ بعضهم بظل المكيّـف ليؤكّـد دوره في الصّـف..
بعض الذين يقضون الخدمة برفقة مسؤول يتعمّـدون، و هم في طريق الخروج، تبيين ذلك للمنتظرين بالصّـف!! نظام أنا زول مهم و كــدة..إستشعار لنصـر متوهّـم!
أيّ إحتجاج بيزعّـل الزول القاعد ع شان يخدمك..كدة إنت بتكون خسرت..أو سمعت كلام يسم بدنك..طبعآ الشكوى و التقاضي ليسا من الرجالة السودانية في شيء..فقط تستمع بالدهـشــة!

[عماد بشير حامد]

العزيز الطـــــــــــــــــــــــــــــــــيب

والله لامست موضوع مهم جداً ويتعرض له الفرد فقط في العالم العربي ان لم يكن يومياً أقلها مرة في الاسبوع

بس لاحظ لاي زول مسافر عبر اي مطار في العالم العربي مدى توتره والخوف من تسلط اي موظف عليه ويؤدي بالتالى الى تأجيل سفر ده لو ما جابت ليها تفتيش شخصى ونزل بنطلونك!!

أما في السودان خليك من الشرطة اللى الناس عاوزة تعمل منها شماعة ، تعال امشي لاي مساح او جنزرجي عشان يمشى يحدد ليك قطعة ارض تملكها حـــــــــــــراً وليس حـــــــــكراً او قــــــــرعة ؟؟
المساح أوالجنزرجي يرقصوك على الحبل ولما اجازتك تقرب تنتهى حتى يمشوا معاك لانـــو ما قـــــــــــــــــادر تفهمهم من البداية!!!!!

ولو ما بتدفع رشوة اقلها يقولوا ليك طيب فطــــرنا سمك وجهز العربية بتاعتك وبعد داك نمشى معاك ( حكمة الله تاكسي ما يركبوا)

مع العلم انهم باعوا كل الاراضي للسماسرة وبمساعدة مهندسيهم بل هناك بيوت مكتملة وانت بداخلها يتم بيعها وانت لاتدري ؟؟
من اين اســــــتخرج شهادة البحث الاصلية والكروكي الاصلى وغيره ؟؟؟؟؟؟؟

يا اخي والله الشرطة لم تبتدر الرشوة كما قـــيل والشرطة لم تخرج عن اداء دورها المرسوم لها رغم العنت والظلم الذي حاق بها ابتداء من زمن النميري الى البشير!

الداخلية هي الوزارة الوحيدة في السودان التى لم يتبوأ مقعدها ضابط شرطة كوزير على الاقل منذ الاستقلال وحتى هذه اللحظة لذلك لم يسلموا الخبز لخبازه ابداً

لك الانحناءة والتجلة

موصول الود للجميع

[حمدي اب جقادو]

[align=center]( يا ايها الذين امنوا اذا جائكم فاسق بنبا فتبينوا ان تصيبو قوما بجهالة فتصبحوا على ما فعلتم نادمين )[/align]

[align=justify]ابوبشير

صباحنا فل ياغالي

بما انك منعته حكاية (بمشي وبجيك بعدين) الا ان اخوك الجقجق سيقولها وذلك نسبة لظروف (كتابية) حانقة
لكن جد موضوعك يستحق النقاش وليهو ضل ياود العم

اما الذي اتي بي رغم الجري الشديد هو رد الاخت (الفاضلة) حنينة , وبعد اذنك طبعا ياابو بشير عايز اوضح للاخت حنينة نقطتين رغم انو الكلام ما مفترض يكون هنا ,,, لكن نعمل شنو ؟؟؟ الواحد تناقشو في بلد يقوم يزوغ منك ويجي يلفق الكلام ويديهو البهارات في بلد تانية وهذا ان دل علي شي انما يدل علي (فراغ الاكياس) واعوذ بالله من فراغ الاكياس [/align]

المشاركة الأصلية كتبت بواسطة haneena

تمامآ كما ذكر أحد أعضاء سودانيات في بوست ضيق الهدوم...
أن من لا ترتدي الحجاب تعطيه الحق فى النظر إليها
و لا تثريب عليه ..بل هي تتحمل ذنبهم الإثنين
عجبي...!!

[align=justify]اولا- يادكتورة انا اشوف انه كان الاحري بك ان تقولي (حمدي اب جقادو) قال ,, وليس احد اعضا سودانيات (عشان هنا في اساتذة مايقومو يفتكرو انه ناس سودانيات ديل ما ممكن يكونو جاهلين في الدين للدرجه دي) وبالتالي تكوني اجرمتي في حق قمم علمية تكتب في هذا الصرح

ثانيا- اذا كنتي ترين انك علي حق (وشخصي الضعيف علي خطاء) لماذا لم تاتينا بما هو صواب من كتاب الله وسنة نبيه (صلي الله عليه وسلم) ؟؟؟ في الموقع الذي اخطات فيه بدلا من هذا الحديث الملفق (المحشي) في نص الكلام ؟؟

ثالثا- كل شي يادكتورة ممكن ان يكون التغيير فيه بالقوة والارتجال (وركوب الراس) الا ماانزله الله تعالي وسنّة حبيبه المصطفي عليه افضل الصلاة والتسليم

رابعا- ارجو من الاعزاء الاطلاع علي الاقتباس ادناه والذي يحتوي علي ما جاء علي لساني انا (حمدي اب جقادو)[/align]

المشاركة الأصلية كتبت بواسطة حمدي اب جقادو

[align=justify] وبالتالي النتيجه تكون ذنوب لا حدود لها تكال للطرفين علي اقل تقدير هذا ان لم تحدث مصائب اخري ؟؟؟؟؟؟؟؟؟؟؟
واولا واخيرا الجاني اذا لاسمح الله حصلت مصيبة من وراء البحلقه التي تحدثنا عنها في السطور السابقة سوف يكون الجاني والمجني عليه (المراءة) لانها (عورة) رضينا ام ابينا هي كذلك [/align]

[align=justify]قادر الله [/align]

[align=justify]شاكرين ومقدرين يا ابو بشير لاتاحتك لنا هذه السانحه ,,, واسفين للجوطه الحصلت

حمدي اب جقادو[/align]