قصة الوعد المحال

[jezabell]

جيت عليك
جارية مشتاقة لعينيك
ولحظة بس اشواقي دفقت
لما شفتك انت مافي
رجعت البسمات وحرنت
انت يا مصدر وجودي
وانت يا كاتب وعودي
ابقى اكتب عني فيك
عن زماني المشتهيك
عن محطات انتظارك
وعن ملامح من وصالك
عن معالمي ودنيتك
يا محنن بالهوى
ويا مجرتق باكتمال
لبن السعادة في نيتك
يا ود بشيل منك حروف
وبخت عليك احساس ولوف
انا حرفي عاشق قصتك
شاري النهاية في دنيتك
دافق عليك رغم الظروف

يا قصة الوعد المحال
لمن فتحت الريدة بابك
ولما ليا حنيني جابك
قلب عاشق للجمال
ويا جمالها حدود بلادي
لما تنزل فيها وادي
ولما تطلع في الجبال
ولما بين الشوق اشوفك
نخلة بتغازل طيوفك
حتة بتناديك وصال
انت يا نبع المحنة
وانت يا زلزال سكوني
وانت يا بركان خيال
فيني اتفجر وجودك
وبلت الدمعات خدودك
لما ليك دكيت حصوني
ولما بيك بستاني شال
كل ورود اشجاري لحنك
وكل جذور اشواقي بحرك
وليك بس انت المنال

[jezabell]

هذا وللأمانة الشعرية فقد كتبت هذه الابيات اثناء مجادعات لا علاقة لها بالعنوان اعلاه

[jezabell]

وكم رجيتك..
وعد خريف متوسد صيفو
وماسك مطر الوصل عناد
كل ما يزيد في بعدو جفافي
كل ما ليهو الشوق يزداد
وكم وسدت الاحلام طيفو
وكم ناجيتو
وكم حنست الماضي يٌعاد
وكم دغدغت الذكرى سنينو
وكم في حنينو
شال النوم من عيني سهاد
وكم ونستو
داخل مارق جوة الخاطر
زارع فيني خصوبتو سماد
واتوهطت التربة ثمارو
وحصد الريد في قلبي ديارو
وكتب اللقيا بدون ميعاد
واتلفحتو
مطر الخير في القبلي بروقو
وقوس احلامي ملون شوقو
وكل الكون من بعدو سواد


________
للناقشين التعديل..
موش قصيدتي؟ الخبتها زي ما دايرة

[قمر دورين]

[align=center]رشا صباحك جميل....

غايتوا القريتو ده قصص ما قصّة واحدة....

يا زولة يا كتّابة...
ربنا يحفظك...[/align]

[jezabell]

المشاركة الأصلية كتبت بواسطة قمر دورين

[align=center]
رشا صباحك جميل....

غايتوا القريتو ده قصص ما قصّة واحدة....

يا زولة يا كتّابة...
ربنا يحفظك...[/align]

صباحك اجمل يا وردة
بمناسبة كتّابة دي، تعرفي يا قمورة اني بحب كتاباتك جدننننن
حيث انها تأتي ممخمخة وبي مزاااااااج منقطع النظير فبتهبشني من جوة وبتفرحني بالجد..

اما فيما يختص بالقصص فاسكتي ساااي بس حمدو في بطنو

[قمر دورين]

المشاركة الأصلية كتبت بواسطة رشا حاتم

صباحك اجمل يا وردة
بمناسبة كتّابة دي، تعرفي يا قمورة اني بحب كتاباتك جدننننن
حيث انها تأتي ممخمخة وبي مزاااااااج منقطع النظير فبتهبشني من جوة وبتفرحني بالجد..

[align=center]انت قمورة دي من عيش مقمّر...
سعيدة بقرائتك لحرفي يا رشا...
وإن كانت خربشات تخربشنا ونخربشها ثم نقعد نعاين لي بعض... بس!!
[/align]

[jezabell]

المشاركة الأصلية كتبت بواسطة قمر دورين

[align=center]انت قمورة دي من عيش مقمّر...
سعيدة بقرائتك لحرفي يا رشا...
وإن كانت خربشات تخربشنا ونخربشها ثم نقعد نعاين لي بعض... بس!!
[/align]

قمورة دي ياااخ من قمرية البت قوقي
بس وكت ابيتي المقمر خليناهو محمص
امورة حلوة؟

[بدور التركي]

المشاركة الأصلية كتبت بواسطة رشا حاتم

وكم رجيتك..
وعد خريف متوسد صيفو
وماسك مطر الوصل عناد
كل ما يزيد في بعدو جفافي
كل ما ليهو الشوق يزداد
وكم وسدت الاحلام طيفو
وكم ناجيتو
وكم حنست الماضي يٌعاد
وكم دغدغت الذكرى سنينو
وكم في حنينو
شال النوم من عيني سهاد
وكم ونستو
داخل مارق جوة الخاطر
زارع فيني خصوبتو سماد
واتوهطت التربة ثمارو
وحصد الريد في قلبي ديارو
وكتب اللقيا بدون ميعاد
واتلفحتو
مطر الخير في القبلي بروقو
وقوس احلامي ملون شوقو
وكل الكون من بعدو سواد


________
للناقشين التعديل..
موش قصيدتي؟ الخبتها زي ما دايرة

حتى اللخبطة مفعمة بالحب والوداد
صباحك اجمل وعد
يا ازكى ورد...........

جمييييييل يا رشا
مبدعة بحق وحقيقة

[منال]

المشاركة الأصلية كتبت بواسطة رشا حاتم

وكم رجيتك..
وعد خريف متوسد صيفو
وماسك مطر الوصل عناد
كل ما يزيد في بعدو جفافي
كل ما ليهو الشوق يزداد
وكم وسدت الاحلام طيفو
وكم ناجيتو
وكم حنست الماضي يٌعاد
وكم دغدغت الذكرى سنينو
وكم في حنينو
شال النوم من عيني سهاد
وكم ونستو
داخل مارق جوة الخاطر
زارع فيني خصوبتو سماد
واتوهطت التربة ثمارو
وحصد الريد في قلبي ديارو
وكتب اللقيا بدون ميعاد
واتلفحتو
مطر الخير في القبلي بروقو
وقوس احلامي ملون شوقو
وكل الكون من بعدو سواد

وهنا برضو خالد شقورى
غيم الوداد

[align=center]نزل غيم الوداد صبا غمر وديان غناي عبا
سرى الفرح الحنين تبا حضر وفد الولف سايق بشاشات المطر لبى
تعال يا العمرو ما غبا تعال انا وانت في عينيك من عينيك نتخبى
تعال اشواقي ما قدرت تقاوم نسمك الهبا
كان جيتك تكون اروع زمن دابو الحرف تبا
زاهية الدنيا بالافراح لسة اساي ما تبا
وكنت دخرتلك غنوات عشان احلامنا تتربى
كفاك طول الامل يا ليل اخير تديني باقي الحيل
قبل يجرف هواي السيل والم في العمرو ما غبى
معاك ببني المشاعر بيت معاك بحلف بقول غنيت
ولا بقدل بقول يا ليت ولا بالجاي نتنبى
نزل غيم الوداد صبا غمر وديان غناي عبا
سرى الفرح الحنين تبا حضر وفد الولف سايق بشاشات المطر لبى
وكان حبل العمر ساكن حقيقة زولة تتحبى[/align]

[قمر دورين]

المشاركة الأصلية كتبت بواسطة رشا حاتم

قمورة دي ياااخ من قمرية البت قوقي
بس وكت ابيتي المقمر خليناهو محمص
امورة حلوة؟

[align=center]
خلّيها قمّورة... لشئ في نفس قمّورة.....

[/align]

[elle]

انا حرفي عاشق قصتك

هذه حقيقة...نحسها عندما نمسك القلم ونكتب باللون الوردي.






كومون سافا؟

[عثمان]

إبداااااااع يا رشا والله بتمنى إنو الإبداعات
دي ما تضيع كدة سداً "حرام"تكتبي
في المنتدى وفي الورق وبس ياريت يكون ليها مؤلف (ديوان مثلا)
وبتمنى اسمع قريب كدة أداء الفنان فلان وكلمات (رشا حاتم)

تحياتي/ عثمان الطيب