مالو زي التقول فيهو عرق؟!

[أبوبكر عباس]

المشاركة الأصلية كتبت بواسطة وهاد ابراهيم محمد

ولا شنو يا بابكر.

انتي كمان بتقولي شئ غلط!

[حافظ اسماعيل احمد]

المشاركة الأصلية كتبت بواسطة خالد الصائغ

* من أين يجب أن نبدأ في إتجاه بناء سودان متماسك يحترم كل مكوناته الإنسانية

* هل الديمقراطية هي ما يجب أن تكون سابقة للتغيير الإجتماعي أم العكس

إذا كنا سنبدأ بالتغيير الإجتماعي

* فهل من آليات فاعلة و ناجعة يمكن أن تقود إلي عملية التغيير الإجتماعي

بما أن هذا الوضع ينبني في الأساس علي إعتقادات متوهمة تماما و ليس لها أي سند موضوعي بوجود نقاء ما يميز بعض القوميات عن غيرها فهل من آليات ناجعة لتغيير هذه البنية العقلية المشوهة و هذا الشكل المتوهم من الوعي

ماذا عن المناهج التعليمية الأساسية للدولة و ما الذي يمنع من إستغلالها في إتجاه تغيير وعي الناشئة إيجابا تجاه هذه القضية ثم الإصطبار علي ذلك و سيأتي التغيير حتما بفعل تعاقب الاجيال

ما ذا عن دور التنظيمات السياسية و منظمات المجتمع المدني و أئمة المساجد و الخطباء و الفنانين و الطبقة المستنيرة ... الخ ...

مخطئة تماما هي حكومتنا ... ما تعاقب منها و ما سيتعاقب علينا لو ظنت أن الإهتمام بالوجه السياسي للقضية و إهمال وجهها الإجتماعي هو ما سيقي هذا الوطن من التفتت.

و قبلا و بعدا فالنقطة الأولي و الأساسية قبل طرح أي حل و التي بدونها لن تجدي كل الحلول هي تناول هذه المسألة و بكثافة مخطط لها عبر كل القنوات السياسية و الإجتماعية و بكل وضوح و شفافية بدلا من المواربة و دفن الرؤوس في الرمال

يعني الشغلانة محتاجة قبل كل شئ لي Commitment واضح و شجاع من قبل الجميع قبل الشروع في أي حل.

تسلم الاستاذ خالد الصائغ
ايجاد الحل والالتزام به
ليس هنالك من يدعو الي انصهاركامل رغم امكانية
حدوثه
لكن البحث عن التساوي والقبول الكامل كعتبة اولي
للقادم وتفريق الشحن الاستعلائية والشعور
بالدونية

[حافظ اسماعيل احمد]

المشاركة الأصلية كتبت بواسطة بابكر عباس

و داير نلقى مع بعض حلول للمسألة دي يا صائغ توصلنا للشئ الحصل في أمريكا،
الزنوج إتصالحوا مع الماضي و تجاوزوهو و البيض كانوا أعظم منهم حينما صوتوا لكفاءة أوباما بغض النظر عن لونو..

السلام عليكم بابكر عباس
كلنا بنحلم بي كــــدة مع الاخوة الجنوبيون قالنا ليهم الانفصال دا انهزام في رؤية التحرير
لانو التحرير التام هو وجودك في قمة المنطقة الانت مضطهد فيها وشددنا علي انا الزنوج في امريكا ليسوا سكان اصليين رغم ذلك الامثلة امامنا _( كونزليزاريس _ اوباما _ وكولن باول ) لكن انتم في السودان اصل وكل والمدعين العروبة هم النازحون اليكم

[أبوبكر عباس]

المشاركة الأصلية كتبت بواسطة وجدي الأسعد الأسعد

يا الرشيد غايتو عصرة الشغل جبيل* خلتني اصرف لصاحبك مُبر عدد واحد هاق ساكت

أوعة كمان تشيل منو المشاركة في المركز الثقافي!
ما عندك وظيفة غفير فاضية في المركز؟ كايس القرب

الهق في السعودية يستحق الحسبة دي

* جبيل بكلام ناس الخليج تعني قبيل

[خالد الصائغ]

مبدئيا لازم نفرق بين مفهومين أساسيين كثيرا ما يتم الخلط بينهما

بين الزنوجة و العبودية ... فالتفريق بينهما جوهري و مهم تماما

الزنوجة حالة أولية تولد مع الإنسان وترتبط أساسا باللون الأسود و هي ليست نقيصة في ذاتها و فطريا لا تستدعي الإستعلاء عليها ( يا أيها الناس ألا إن ربكم واحد و إن أباكم واحد لا فضل لعربي علي أعجمي ولا لعجمي علي عربي و لا لأحمر علي أسود و لا لأسود علي أحمر إلا بالتقوي)

بينما العبودية حالة مكتسبة بفعل ظروف موضوعية محددة كالحروب مثلا و هي لا ترتبط بجنس محدد و لا تتعلق بالسواد أو بغيره من الألوان فالعبودية يمكنها أن تطال مختلف الأجناس و الأعراق ... صهيب الرومي ... سلمان الفارسي ... بلال الحبشي ... شجرة الدر ... كل هؤلاء كانو عبيدا رغم إختلاف أعراقهم

نحن في السودان لا نفرق بين المفهومين و نخلط بينهما دائما

فكل زنجي في نظرنا هو بالضرورة عبد

و بالتالي فنحن نمارس استعلاءنا إبتداءا من مرتكز خاطئ

و من هنا فأول الطريق إلي الحل هو العمل علي تفكيك مركزية هذا الإستعلاء و تقويض مرجعياته

بالتركيز بشكل أساسي و مدروس علي الوعي البكر للناشئة من خلال المناهج الدراسية و استغلال كل الوسائط التي تخاطبهم و العمل علي إكسابهم بنية مفهومية واعية بحقيقة الأمر تنأي بهم عن الأخري المتوهمة بلا مرتكزات موضوعية

و بالتأكيد المسألة ليست بالسهلة و معقدة تماما و تحتاج إلي جهد و صبر و تعاهد


و المثال بتاع أمريكا ماثل أمامنا كما تفضل الأحباب بابكر و حافظ

و الحاصل في أمريكا بالتأكيد ما وليد يوم و ليلة

ده ثمرة السير طويلا في طريق كان وعر جدا بداهو إبراهام لنكولن قبل اكثر من مية و ثلاثين سنة.

[سمراء]

بالجد موضوع "قمة " ويستحق المتابعة
التحية لبابكر عباس ولكل المتداخلين
اعجبنى النقاش من الجميع وفتح مداخل لكثير من التساؤلات ..

فى نقطتين لفتو انتباهى
الاولى ذكره وجدى الاسعد واعتبره "خلاصة" الفكرة :
ا

عزيزي المشكلة ما في نظرة الأبيض
المشكلة فينا نحن كمتلقيين لنظرة الأبيض
احتقار الابيض لنا لا تسوي شيئاً بقدر احتقارنا أو تعظيمنا لانفسنا
يعني بالظبط كدة روحك هي البتديك هيبة أو دونية على حسب روحك

التانية فتحت مدخل لتساؤل جواى ذكره العزيز خالد الصائغ :

نحن في السودان لا نفرق بين المفهومين و نخلط بينهما دائما
فكل زنجي في نظرنا هو بالضرورة عبد
و بالتالي فنحن نمارس استعلاءنا إبتداءا من مرتكز خاطئ
و من هنا فأول الطريق إلي الحل هو العمل علي تفكيك مركزية هذا الإستعلاء و تقويض مرجعياته

من أين نبع مفهوم العبودية فى السودان والاصول الذهنية للفكرة ؟؟

وليه الذين وقع عليهم الفهم ده "استكانو للفكرة" بدليل ان بعضهم ارتضاهو فى شكل
اسلوب تقريرى ، واعترف بيها كوضع " مسلم بيهو " والامثلة كتيرة ...

[أسعد]

ما عندك وظيفة غفير فاضية في المركز؟ كايس القرب

لا في وظيفة ست شاي
فإذا كنت تأنس في نفسك الكفاءة والتميز والمؤهلات للعمل بالوظيفة ، عليك مراجعة مكتب التوظيف
يا بابكر ياخ أنا ألقاها منك ولا من محسن
أها سيد الشيء زاتو كشحها لي في وشي وقال ماشي يضوي في حتة اساسا مضوية عشان ما تستهلك منه طاقة في الإنارة

بعدين انت ياخ ما ختيت قدحك معانا بهناك ولا ابديت رأيك
مع إنه قدحك مهم ... حاجة غريبة موش
همتك معانا شوية ياخ
اقنع لينا صاحبك مبر يقعد قبلو ينتظر ابوهو محسن
ونحن من هنا ندعمهم مادياً بفرض رسوم اشتراك

[احمد هارون فوراوي]

المشاركة الأصلية كتبت بواسطة بابكر عباس

محاضر بالجامعة خطب بت عمي و مشينا الخطوبة و بعد طلعنا من بيت عمي
أمي سألتني: مالو التقول العريس دا فوقو عرق؟
قلت ليها أبدا ما فيهو عرق غريب خالص، الراجل أصيل من قبيلة الزغاوة
نحن إحتمال يكون فينا عرق عرب
هسع انتي يمة لونك الأسود دا جاي من وين؟ أوعة تقولي لي حبوبتك العباسية إتمسحت بالسكن... و الله يمة لو الدكتور دا عب، انتي ذاتك خادم عديل
قالت لي: هوي يا ولد نحن وديناك الجامعة عشان تجي تتفلسف علينا (الغريبة تتفلسف دي نطقتها دون العادة بشكل صحيح)؟
قلت ليها: أيوه، المدرسة بتعلمك منطق الاشياء، و أنا لازم أعرف الخلى لونك الأسود دا لون أسياد وسواد التانين لون عبيد شنو؟

السلام عليكم
الفهم دا موجود في السودان بصورة عامة وبدون تخصيص وخاصة عند اجدادنا وآبائنا كبار السن وهم مابتحرجو ولا بخجلو او بترددوا في قول الكلام الزي دا
لأسباب عديدة كلنا يعلمها ولكن يبقي دور الجيل الحالي واسلوب تعامله وهل لديه الوعي الكافي للتعامل مع هذه المشكلة الاجتماعية الخطيرة؟

[مبر محمود]

يازول ده تهويم فلسفي منك ساي ومحاولة إلتفاف وتشعُّب.
موضوع البوست بيتكلم عن التمييز اللوني وليس العنصري..
راجع متن البوست بالله.(مداخلة 1 و2)..
اخيرا:
الإنسان الأسود ده، صنفوهو إنسان أسود لي شنو..؟؟
عشان قلبو أسود..؟؟
ولا عشان تصرفاتو سوداء مثلاً..؟؟؟

سلام غليد يا رشيد ..
لا "فلسفة" مطلقاً في حديثي الذي فرّقت فيه بين اللون الأسود والإنسان الأسود داخل مسألة التمييز العنصري، ولكن قد يكون الإختصار الذي صاحب عبارتي خلق بعض الغموض فيها، مما جعلك تسوق تفسيرك لها على هذا النحو ..
عموماً، وتفسيراً لما إلتبس عليك ، أقول:
إنني أعتقد إن الإنسان الأسود هو الذي جلب الدونية للون الأسود وليس العكس، بمعنى إن المنطلق الذي تنطلق منه مسألة التمييز العنصري، هو منطلق بيئي، جغرافي في المقام الأول، يتعلق بإسقاطات الجغرافيا والمناخ علي شكل الإنسان وسلوكه، وما يترتب علي ذلك من تمركز حضاري ونضوج سياسي وفكري .. يعني يا الرشيد المنطقة السوداء من كوكب الأرض، ونسبةً لقسوة المناخ، و وعورة التضاريس، تأخرت حضارياً وتنظيمياً، مما جعل إنسانها هو الطرف الأضعف في سلسلة الصراع الكوني العظيم. وهو الصراع الذي كتب فيه الطرف الأقوى كل قوانين الكوكب، السياسية منها والإجتماعية ..
ختاماً لكل هذا يا الرشيد، يمكننا القول أن قوانيين الكوكب كانت ستتغير كثيراً، وربما صارت لصالح اللون الأسود وخصماً علي اللون الأبيض، لو كان الإنسان الأسود هو الطرف الأقوى المنتصر .

ملاحظه: راجعت الفقرتين، و وجدت موضوع البوست فيهما عن التمييز العرقي وليس اللوني

[أسعد]

أحييييييييييييييييييي أنا يا مبر
أسي دا ما كلامي أنا البقول فيهو من أول أمس



بعدين يا أخينا حالياً التمييز العنصري أصبح هو التمييز اللوني
فالحكاية يا أبيض يا أسود
زمان كانت العنصرية السامية اتجاه اليهود
لكن لانهم امتلكوا العالم فانعدمت العنصرية دي
وكذلك العنصرية الشكلية بالنسبة للشرق أسيويين برضو انعدمت العنصرية اتجاهم

فضلت عنصرية واحدة وهي عنصرية اللون
ولحدي ما افريقيا تمتلك العالم
بعدها ح تنعدم العنصرية اتجاه اللون الاسود

فيا عزيزي التمييز العنصري حاليا قائم على التمييز اللوني بين الابيض والاسود

[سمراء]

المشاركة الأصلية كتبت بواسطة وجدي الأسعد الأسعد

فيا عزيزي التمييز العنصري حاليا قائم على التمييز اللوني بين الابيض والاسود

هو فى لون " تالت " !!

الشكية لى الله ..اها نحن ناس اللون القرمبعى ديل "والبيجى " موقعنا
شنو من الاعراب !!؟

[طارق صديق كانديك]

المشاركة الأصلية كتبت بواسطة خالد الصائغ

مبدئيا لازم نفرق بين مفهومين أساسيين كثيرا ما يتم الخلط بينهما

بين الزنوجة و العبودية ... فالتفريق بينهما جوهري و مهم تماما

الزنوجة حالة أولية تولد مع الإنسان وترتبط أساسا باللون الأسود و هي ليست نقيصة في ذاتها و فطريا لا تستدعي الإستعلاء عليها ( يا أيها الناس ألا إن ربكم واحد و إن أباكم واحد لا فضل لعربي علي أعجمي ولا لعجمي علي عربي و لا لأحمر علي أسود و لا لأسود علي أحمر إلا بالتقوي)

بينما العبودية حالة مكتسبة بفعل ظروف موضوعية محددة كالحروب مثلا و هي لا ترتبط بجنس محدد و لا تتعلق بالسواد أو بغيره من الألوان فالعبودية يمكنها أن تطال مختلف الأجناس و الأعراق ... صهيب الرومي ... سلمان الفارسي ... بلال الحبشي ... شجرة الدر ... كل هؤلاء كانو عبيدا رغم إختلاف أعراقهم

نحن في السودان لا نفرق بين المفهومين و نخلط بينهما دائما

فكل زنجي في نظرنا هو بالضرورة عبد

و بالتالي فنحن نمارس استعلاءنا إبتداءا من مرتكز خاطئ

و من هنا فأول الطريق إلي الحل هو العمل علي تفكيك مركزية هذا الإستعلاء و تقويض مرجعياته

بالتركيز بشكل أساسي و مدروس علي الوعي البكر للناشئة من خلال المناهج الدراسية و استغلال كل الوسائط التي تخاطبهم و العمل علي إكسابهم بنية مفهومية واعية بحقيقة الأمر تنأي بهم عن الأخري المتوهمة بلا مرتكزات موضوعية

و بالتأكيد المسألة ليست بالسهولة و معقدة تماما و تحتاج إلي جهد و صبر و تعاهد


و المثال بتاع أمريكا ماثل أمامنا كما تفضل الأحباب بابكر و حافظ

و الحاصل في أمريكا بالتأكيد ما وليد يوم و ليلة

ده ثمرة السير طويلا في طريق كان وعر جدا بداهو إبراهام لنكولن قبل اكثر من مية و ثلاثين سنة.

مداخلة مهمة وقد حوت الكثير مما يمكن أن يقال .. !!

شكرا خالد الصائغ

----

التحية لبابكر وهو يضع اصبعه على مآسينا

[مبر محمود]

وبعدين ياسيدي حكاية دلالة الألوان المتشابكة في القرآن القلت انت عليها دي ما موضوعنا هنا..أنا جبت آيات محددة بتقرن السعادة باللون الأبيض
والشقاء بالأسود، والإشارة كانت أنو حتي القرآن لم ينف مسألة متجذرة وليست مستحدثة ووليدة قرن قريب.

كيفن يا الرشيد دلالات الألوان في القران ما موضوعنا؟
ياخي دا صلب موضوعنا، ويجب أن تنبني عليه كل الطعونات والمرافعات التي تتناول هذه المسأله .. يعني لو قلت لي القران ربط اللون الأسود بالشقاء وسوء الحال، وأردت أن تبني علي ذلك موقفاً، فضروري نقول ليك، تمهل، فهنالك لون أخر ورد في القران يدل علي الشقاء وسوء الحال. ولو قلت لينا اللون الأبيض مقرون بالسعادة، برضو ح نوقفك ونقول ليك: ليس وحده اللون الأبيض فهنالك ألوان أخرى إرتبطت في القران بالسعادة والنعيم...

كما إن هنالك أيضاً نقطة جوهرية يا الرشيد تحتاج منا لتمحيص وعدم إغفال وهي إن القران لم يربط إطلاقاً السعادة باللون الأبيض ولا الشقاء باللون الأسود بهذه الصورة العموميه والمطلقة .. فسواد الوجه في القران دليل تعاسه نعم، ولكن سواد العين دليل صحة وجمال، وسواد الشعر دليل شباب وقوه، وهنالك أيضاً مدح القران للنوق السود ..

ثم هنالك سؤال يا الرشيد : لماذا ينفي القران رمزية الألوان؟ وما المشكله فيها؟

[مبر محمود]

المشاركة الأصلية كتبت بواسطة وجدي الأسعد الأسعد

ويا وهاد ياخي زمان العرب كانو بنظروا لي أي جنس غير عربي على اساس انه عبد سواء كان مجوسي أو رومي أو مغولي
لكن حالياً العبودية بقت مرتبطة باللون الاسود
عشان كدة ركزنا علي اللون

وجدي يا صاحب سلام ..
مافي أي عبودية حالياً، الزمن دا مافي زول بيخدم ليهو زول إلا بمقابل معلوم،ووفقاً لقانون مدني معلوم أيضاً يتساوى فيه الابيض والأسود والملون .. ودا طبعاً ثمره لمجهودات تنويريه عظيمة ..

أما مانحن بصدده الأن فهو العنصريه الإثنية، أو نظرية النقاء العرقي.. وللأسف هي عندنا في السودان مشاتره شتارة عجيبة، ولا تشبه أي عنصرية في العالم، إذ لا يحكمها قانون محدد يمكن أن تفهم من خلاله .. خذ الحلبه في السودان كمثال وأنظر وضعهم الإجتماعي وموقف الناس منهم! وخذ قبائل الشرق أيضاً وخذ وخذ ..

للدكتور جون قرنق حديث ناضج في عنصريتنا المشاترة دي سأبحث عنه وأجلبه .

[طارق صديق كانديك]

متعة كبيرة أجدها في حوار مبر والرشيد ..

ان تناول القرآن الكريم لدلالات الألوان .. تناولا وفقا للذي كان يسود في العقل الجمعي للناس وقتذاك والذي ( أظنه ) أنه لم يستحدث دلالات للألوان التي استخدمها وربما اطلالة على الشعر الجاهلي الذي حفل بكثير من الشعر متناولا دلالاة الألوان وتوظيفها وفقاً للقيم السائدة لإيصال فكرته تذهب بنا الى ذلك .. !!



تحياتي