سلام يا عبدالله و عذرا على تأخير الرد
اقتباس:
المشاركة الأصلية كتبت بواسطة عبدالله علي موسى
اسمح لي اعترض على إنه إتهامي بالتشيع ليس مسيئاً.
يا بروف أصلاً ليه الإتهامات والمحولات المستميتة دي لتجاوز الحوار للشخصنة! أنا ملاحظ الإسلوب دة كتير مع الجماعة ديل! بدل ما الواحد يمسك في كلامك و يفنده يبدا يلف و يدور و بس يحاول يصل للإساءة للشخص الذي يختلف معه و ينال منه بدل ما يركز في الكلام؟ ده دليل ضعف حجة و جهل شديد و مثل هذا لا يليق في أي حوار محترم في الدنيا دي.
إنت يا بروف أسي أنا أجي اتهمك بأنك أخو مسلم و كوز بس لأنه كلامك فيو نبرة دنية و أصر على هذا الإتهام و أكرره ده شئ مسيء أم لا ؟ أنا مستاء جداً من هذه التهم و لن أسكت عليها، سأقدم هنا شكوى و بخلي الناس دي لله يجيب لي حقي.
أيضاً ده كلام عام ساي يا بروف، ياتو امور الفهمي فيها أقرب للشيعة دي ؟ و هل إنته بتفترض أن كل ما يقوله الشيعة خطأ؟ ما أهو مدارس السنه دي مليانة كفر و كذب ؟ هل نعتبر العوام كفار و كاذبين لأن كلامهم يتفق مع مدارس النصب والكذب؟
ما تزعل مني إنته أيضاً لكن يا بروف أنا لا اتحمل جريرة فهم العوام للدين، و ده شئ متجذر و متوقع للأسف لأنه التدين الاسلامي كما نعرفه اليوم جزء كبير جداً منه خرج من مدارس في زمانها كانت تسمى مدارس العوام، لكني اتحمل جريرة اني أناقش العوام في الدين و أفتح مواضيع معقدة يأتي العوام و يقفزون فيها، لن أتوقف عن فتح مواضيعي دي لكن بديت أتعلم تحاشي العوام في النقاش. بجيك لي باقي المداخلات و مستني تفنيد كلامي الأخير داك
|
أنا ضد إنو زول يتهم زول بمذهب هو ينكره ... تماما مثل ما أنا ضد الشتائم المتبادلة في حوار و نقاش ديني ...لكن زي ما وضحت ليك و وضحو ليك اخوان تانيين - بكل أدب - إنو الكتير مما تتبنى من أراء لا يقول بها إلا الشيعة ... و ده - في تقديري - ما سوء فهم من الناس أو فهم عوام كما تقول ... لكنها حقائق يمكن التدليل عليها ... و ده ذاتو - بالنسبة لي - ما بيعني انك شيعي ...ببساطة لانك قلت انك ما شيعي و ده بيكفيني لانو ما شايف سبب انك تكذب في معتقدك و الأهم من ده ما شايف في زول عندو عندك حاجة عشان تكذب في معتقدك ... فهمت الموضوع على أساس إنك متبني رأي الشيعة في أشياء معينة و لكنك لست بشيعي !!
بالنسبة لهل كل ما يعتقده الشيعة خطأ أم لا ... اختصر ليك طريق طويل و اوريك أنا فهمي شنو ...أنا بفتكر إنو الشيعة الان دين مختلف تماما عما نحن عليه بعد لا إله إلا الله محمدا رسول الله ...و في نقاش سابق مع اخوان شيعة في س. أونلاين قلت ليهم أنا حقيقة بعتقد إنو الشيعة - تحت تحت - معتقدين إنو القران الذي بين يدينا الان محرف و إنو النسخة الصاح عندهم ... لانو ما ممكن و لا من المنطق و العقل أن تتبنى ردة الصحابة و آيات الله عنهم و عن فضلهم كان جبناها المحل ده ما بشيلها ...و ما ممكن تتبنى الوصية لسيدنا علي و الامامة و الأئمة بالفهم الشيعي ما لم تقول إنو في قران تاني فيهو هذه الأشياء واضحة جليه .... و أنا أعلم إنو في صحاح كتب الشيعة توجد نصوص منسوبة لآل البيت بتقول إنو القران محرف ...لمن تجيبها ليهم ...بقولو ليك الكلام ده ما صاح رغم إنو في الكافي للكليني مثلا و هو - كما تعلم - زي صحيح البخاري عند السنة ... هنا بتجي قصة التقية و تبقى ما عارف هل الكلام ده تقية ولا فعلا مقتنعين بانو القران ما محرف !!!
المهم النقاش ده متشعب و شايفك إنت و صديق مشيتو فيه كتير ... فقط رجاء رجاء أبعدو من الشتائم و خلونا كلنا نستفيد .
