يا أخي الكُبر دآ حاجة ثقيلة بشكل

[عبدالحكيم]

رحم الله عمك .. وأدخله الجنة ..

راسك مليان ذكريات .. ونتابعك ..

فلك هؤلاء الواحدين والواحدات ..
إن شاء الله يكونوا لك زادا في مقبل الأيام ..
يحفزوك ويمنومسوك ...

طه المنومسا ... للتأمل ...

https://www.youtube.com/watch?v=wuO0Xp4os0A

[بابكر مخير]

بنرجع للذكريات من تاني
بس البذكرني شنو:eek:


إتذكرتا أرجع من تاني هنانا
ما للذكريات لكن للواقع..
بتفرج أمس على تشيلسي وآرسنال "تهاني خاصة لي ناسي تشيلسي" وكان من بين المحللين الرياضين، لاعب كرة في فريق كنت معجب بيهو جدا أول أيامي في الهجرة لي لندن، يا زول يبرطع ويمسح ليك الميدان بس التقول نشاشة قزاز العربية القدامي.
أمس زولي إتكركب ووشه؟؟؟ لسانه يفضح حاله ويقول:
أنا كوة الشيب
أنا أخاديد الزمن..
في نفسي قلتا:
طيب يابا، إتا لمن هاجرت كنت في "سن النبوة" وهو كان في غمرة شبابه وربيع فتوته، آها إتا تبقى كيف حالك..
طبعا البديهي الزول يشوف ليهو مرآية في شان توكيد المقارنة، لكني لست بذآك الغباء..
بين الغباء والبلادة فرق بالمناسبة
الغبي دآ ممكن نقول ذي أنه مرمي الله، ما بيده لكنها خلل "خروموزومي" في وكت البلادة هي حفر الزول البغرق ليهو، يعني في المدرسة ما تجتهد وتحصل بشدة، تسقط في الإمتحانات وتبقى الطيش ودي البلادة..
نقول مثلن هي صنع الزول أو الإنسان براهو، يعني ذي موسسة الزوجية والعرس، ما هو برضه شغل بني آدمين سآآآكت، المولى ذكر لينا!!
شعوبا وقبائل لتعارفو والنكآح وأنه إتخلق من كل شئ زوجيين.............


يا أخي أنسى حكآية اللاعب وخلينا في موضوعنا دآ

يعني حسي فردة الجزمة لآآآآآآآآآآآآآآآآآآآآآآآآآآآزم تعرس الفردة التانية ولا شنهو:confused:
ما برضهو جوز جزم :eek: :eek:

[imported_الجيلى أحمد]

تكبر في العمر وبزيادة متطردة لا فيها رحمة ولا هوادة وبنفس النسبة في الزيادة عندك تصغر أشياء منها المهم الذي كان ليهو تأثير فعال في (الدنيا العيال) وعشان ما نمشي نفسر وننظر يا "كوكي" بالغلط!!

:D:D:D:D:D:D:D

لا حولاااا
دا بوست مبالغة.. مافي زول واحد يلكزنا يقول الكنتة كلها بي جاي؟

ياعم مخير انت انسان جميل ياخ

[عكــود]

سلام يا جيلي،

عمك مخير عندو باصات بينية ملعوبة بحرفنة في البوست ده.

[بابكر مخير]

:D:D:D:D:D:D:D

لا حولاااا
دا بوست مبالغة.. مافي زول واحد يلكزنا يقول الكنتة كلها بي جاي؟

ياعم مخير انت انسان جميل ياخ


سلام يا جيلي،

عمك مخير عندو باصات بينية ملعوبة بحرفنة في البوست ده.

اليوم وبس
شعرت بأنه البوست وصل:cool:
شنهو السعادة الأنا فيها دي...
الجميل أبو الجميل وأبو زر...
الواحد كان قرب يزرد البوست ويلفه وينساهو،،
الإتنين ديل ليهم محبة خاصة تجمعهم
غيرهم محبتهم عندي متنوعة لكل واحد وما داير أدخل في نقة وأقول "واحدة" وتبقى الحكاية بين الناس؟
زولك لسانه فآك وعديم شنهو وقليل منهو..
المحبة طبعا في ذاتها أنواع..
المحبة من محبة حب ومحبة من محبة خوة ومحبة من محبة مصالح
وبرضك في محبة آنية وأنانية ما فيها الحبة من المحبة ودي ذي (hit & run):eek::eek::eek::eek:

[بابكر مخير]

تشوف كدآ للملوك والأمراء والشيوخ، الرواساء والوزراء وحتى في أغلب الأحآيين الوكلاء والمدراء في حكومات العالم والعمد والمشايخ في المجتمعات. تلقى عمرهم فوق الأربعين بالتأكيد وأغلب الفوق في الحكومات فوق الستين والتقال جد من السبعين وأتا لآفوق...
المقاييس والمعايير التتفهم بيها الحكاية دي، أنه مع (الكُبر) ترتفع مكانتك. طبعا إن لقيت فرصة.
طيب سببهم شنهو ديك البيقول ليك، إحالة بسبب العمر ولا تفنيش عشان كبرتا ولا شنهو. كمان ديك؟؟؟
حتى ما بيعبروك وناسين "الشجر الكُبار فيهو الصمغ"..
أمس قريت عن واحد "زلمي" عمره فوق التسعين وزوجته فوق الأربعين (لسة عندها الطمس المطموسة) ولدو ليهم جنى.
عمك مبسوووووووووط.
غايتهو الزيتون دآ عنده فوايد...

[بابكر مخير]

إفتراضا الزول كل ما يكبر تكبر معاهو المعرفة نتيجية التجارب البيمر بيها
فعليا الزول كل ما يكبر ويشيخ، بيشيخ معاهو عطاهو. وبين الإفتراض والواقع وتقبل الزول الكِبِر للمعادلة دي البتعتبر أصلا ما لي صالحة.
تبدى المشكلة، ممكن الزول الكِبِر في قرارة نفسه شاعر بالحاصل عليهو وال damage البقى في شخصيته لكن هناك عنصر بيكبر مع الزول وهو عزوة النفس..
دي بقآ يا السيدات والسادة هي البتسوقه لي المكابرة والنكران..
صراع بين فسيلوجية الأعضاء الداخلية منها وغير مرئية والظاهرية منها ودي فيها إتنين، منها المرئية بالعين المجردة والغير مرئية حتى ولو نفخو فيها الروح بكل آلوان قوس قزح..
الصراع بينها وبين العوامل النفسية..
داير وما قادر
تعمل مثابر
ورفيقك صابر
وفسسسسسسسسسسسسسسسسسس
بالونة وبوزها مفتوح.....
وأتاريك بتغش روحك وتنكر الواقع وتتكبر في عنجهية ووقت الجد..
أمرك إنفضح..
مش أحسن تعترف بالحقيقة وبلا مكابرة ونكرآن:(

[imported_رأفت ميلاد]

الإعتراف سيد الأدلة الحبة ذاتا بقت تمر مرور الكرام:eek:

[بابكر مخير]

الإعتراف سيد الأدلة الحبة ذاتا بقت تمر مرور الكرام:eek:
روفي الحبيب
تعرف الحبة دي قصتها عجيبة
قالوا في أول ما إشتغلوها، كان علاج للقلب وخاصة للذبحة الصدرية، قال شنهو لأنها بتوسع الشرايين وتسهل سريان الدم في الأوعية لكن لقوا أن الدم دآ "بتكوم" في حتت معينة وييييييييين فيها الأوعية الدموية كتيرة وصغيرونيه..
تبلع الحبة ونخرينك يتقفلوا ورأسك "ينتح":eek: وظنيتهو البواسير ظاتهن يتضخمن..
آهاااااااااااااا ليقوا أنه حكاية القلب ما ظابتة لكن الأوعية الدموية التتملي دي بتساعد في أمور تانية...
يعني ناس يقولوا ليك قلبه وقف عشان بلع الحبة، قول خآلي من الصحة وأعراضها الجانبية سطحية، إلا مشكلتها بتعمل إنخفاض في ضغط الدم ويمكن دآ بيخلي الأضان تصن ;)
طبعا دي برضك نافعة للجنسين وذي ما بيقولوا (unisex)...
الحكمة المرأة والرجل متساوين في المواقع وين الأوعية الدموية بتتشحن بالدم.... :rolleyes::rolleyes::rolleyes::rolleyes:

[بابكر مخير]

من يوم السونامي هبا عليا، بقى نومي خزاز. وطبعا بي نومي دي المقصود بتاع بالليل الهو في الواقع وش الصباح والتاني بتاع بعد إنقضاء ساعات العمل وقبل ما الزول ياكل حاجة، ماهو لو أكلت الضهرية ونمتا بتصحى! بي حيرقان وتكون قرفان ومزاجك سجمان دآ كولهو كوم وأنه الزول أصلا طفشان فبتزيد البيك والعليك تعاسة بالأطنان.
التسونامي الهبا عليا هو. زيارة شقيقتي الحبيبة العزيزة عزيزة (قزقاز ودآ كان االإسم المدياهو ليها سميتها خالتنا عزيزة التي كانت دوما تكمل القولة على النحو التالي؛ قزقاز اللي البنات قياز) ومعاها الحبيبات أمنة ونفيسة وحضور مدينة وبنتها خديجة وإنتظار باكر، زيارة أمنة بتي وإبنها أحمد (حمدو).
رد قزقاز على قولتي بتاعت سونامي كان: سونامي عواطف ومحبة....
أجمل حاجة في زيارة قزقاز هو الغوص في أعماق الذكريات وإستخراج نفيس الحلو منها، عن الوالد والوالدة وشقيقنا شيخي قاسم.
نحكي وبناتها سرحوا معانا مع تداخل بين الفنية وتانيتها مستفسرين شرح وتوضيح ودآ الدفعنا عشان نحكي ليهم عن عايشتنا للعلاقة الكانت بين جدهم وحبوبتهم، حب، صداقة، مودة وأدى ذلك الي نهاية محتومة وهي مؤاخاة..
هو أصله الحكاية بتبتدي وذي ما قالوا:
نظرة وبسمة، لقاء وعناق.
بعد كدآ كتاب وصحف ومصحف وقران
وغرفة نوم وهدوم مزكرشة بالوان مميزة ورقة في الإختيار وفي نوع القماش بشفافية لا تخفي ولا تمنع......
وفرحة في الليالي وأوقات أخرى وولادة وعيال
مرض وفتر ولي المحتوم (المخاااااااااااااااااااااااااااااوااااااااااااااا اااااااات)...

آهاااااااااااا نرجع لي قصة النوم الخزاز من يوم هبت السونامي!!!
قلتا يلا يا صاحبي مدام أصلك بتصحى الدغشية مع الآذان، قضيها في وكتها الصلاة دي ويا مؤمن يا مصدق.
شوية معاناة كدآ في الوضوء، قولتن ترفع رجلك أعلى من 5 ولا 6 بوصة كانت موت، إتحايلت وشيء قاعد ومدنقر، ظنيتهو لو كان ممكن وراقد كان مارستو.
خلصنا من المهمة، تكبيرة وقال ليك، ركوع وظيييييييييييييييييييتك الضهر كرك، عآت آهااااا؛ قال ليك لسة فيها سجود. :(:(:( آهاااااااااااااااا، دي كييييييييييف يا بابكر... شوف بقآ مش بيقولوا وقفة خشية ووقار وتركيز وصفآ.
هنا أخدتا ليا سرحة ذي لمحة، جآتني فيها صورة سيد صادق وهو بيلعب تنس...
بالمناسبة بيناتنا يمكن عشر سنوات فارق عمر، طيب أنا أصغر وسجدة تجرسني كدآ...
والله دون حسد!!!
الزول دآ ما شاء الله عليهو..
يا ربي؟
هو في كلهو أنواع الرياضات متميز :eek::eek::eek::eek:

[بابكر مخير]

لمن خلقك يبقآ في رأس نخرتك وإتا لساتك شاب! بتجيب ليك المشاكل بأشكالها وألوانها، شئ كراهية من الناس وشئ مضاربة وشئ أمراض عضوية من ناس السكر والضغط، حسي إن بقت روحك ما في رأس نخرتك تكون فيك حاجة ما طبيعية.
بتذكر مرة كوريآ (أحمد أخوي) وأنا في بداية الهجرة في مصر، رسل اليا قصاصة من مجلة صباح الخير فيها رسمة كراكتيرية لي إتنين عجايز قاعدين في كنبة في منتزه وحواينهم زهور وورود وعصافير وبنية جسمها في الرسمة يرد الروح حتى إن أخدها عزرائيل.
واحد من العجايز ورأسه دلجة قال لي التاني:
يا أخي بالله بوص، عصافير تزآزآ وورود مفتحة وبنت تئلب والله حآقة تئرف.
حسي بالله عليك الواحد
تتوتر وتتهيج بدون أيتها سبب....
بس الجميلة، ما في زول بيرد بآي فعل جسدي أو نفسي...
تلعب كوتشينة، إن جآك ورق سمح ما ترتاح وإن كان مهبب لرضك ما ترتاح، تغلب تنق في زميلك! ليييييه ما رميت الكرت دآك، يعني هو إتا غلبتا شنهو تاني وحتى لو سيكتا برضك ما مرتاح، يعني كنتا عايز شنهو. لا ويومه زميلك أسود إن إتا سميت بعد ما هو صرخ بأعلى صوت وبي صيحة مجلجلة "بااااااااااااااااااااااااااااااااص". تشيل وترمي فيهو اللوم.
تحرد إن ما لعبوك حتى قبل دورك وتزعل إن لعبتا غلط وإتا متاكد بأنها ما صاح وواحد قاعد يعاين ويقول ليك "ما كدآ"
بالله عليكم دآ الحال الحاصل عليا..
يعني هي الحكاية دي الخلاص منها كيف..
طلقة رحمة ولا شنهو؟؟؟

[بابكر مخير]

كعادتي وأنا جالس دون مظاهر وخالع ملابس الزيف وبشفافية ونقاء "أصله عادتي بيت الراحة، بريح على الآخر". ولحظة الصفاء الذهني مع "تفريغ الدواخل" ومحادثة للنفس بأمور شتى متغمصا روح المفكر ورؤى العالم، ما أنا كِبرتا وبحق ليا.....
فكرت وينهو الأكثر إجلالا ومنهو الأقوى شكيمة وياتهو الأحق إحتراما..
المهاجر ولا اللآجئ؟؟؟؟
لقيت أنه وبعيد عن الروحانيات وتخاريف الدواعش وأمثالهم مثلا قالوا:
المهاجر هو البيمشي حتا تانية عشان ينشر تعاليم الدين مع أنه "الهجرة" كانت جراء إتهاض أهل مكة لهم وحتى عيسى بن مريم أمر أصدقائه بذلك تجنبا لظلم أهل روما وموسى من فرعون وكدآ يعني...
وهم قالوا: مهاجر هو الذي يهجر من نفسه خلقاً ذميماً أو عادة سيئة أو معاملة غير طيبة
وغيرهم قال: المهاجر هو الشخص الذي يترك مكانا ويذهب لآخر، لكي يعيش فيه وأنه في هناك واحدين بهاجروا عشان القراية أو الشغل أو اللحاق بأسرهم.
في وقت قالوا الناس التانيين من أهل الحضر والعلم العاااااااااادي (إجتماع، إقتصاد، فلسفة الخ) ما دآك بتاع الملل والقلل والكيزان أنه اللآجئ هو و عبارة عن شخص قد أجبر على ترك بلاده والغير قادر على العودة الى هناك في المستقبل المنظور وهو الشخص الذي يهرب من بلده إلى بلد آخر خوفً على حياته ، أو خوفا من السجن أو التعذيب...
يعني المعادلة متقاربة لكن برضك الفرق موجود وذي ما بيقولوا:
لو لا تباينت الآراء بارت السلع والأمم المتحدة بتبقى في حيرةلأنها ممكن تتفق ورؤية الأرهابين بس الحاصل أنه، كل يغني ليلاه..
العايز يضخمها وأصوله إسلامية التدين يقول ليك أنه مهاجر والزول العلماني يقول ليك أنه لآجئ وكله على كله مظلوم وربنا يكون في عونه.
إلا دآ بتاع الهجرة من النفس، ما دآ معناها زولن سك، وما شخصية قوية...
وهو ما سمع بي موتوا على دين أبائكم...
الزمها وخليك مع نفسك وإلا تُعرف بالمنفصم :(
نتلاقى في رؤية تانية إتلقفها في جلسة الشفافية وإخراج ما بالبطن :eek:
سمعتها منهو شخصيا أنه أحد أغانيهو كتبها شاعرها وهو في محل ذي التلقف فيهو الأفكار... والله بالجد وأسألوا الكابليgooodgooodgoood

[بابكر مخير]

هو حسن قسم السيد، بالنسبة للرفقاء فهو إسم قيادي قديم ومعروف، لينا إحنا جلاكين براتسلافا شاب صغير كله نشاط وحيوية. بتذكر مرة كنا لاعبين كورة ضد ناس براغ ومنهم كان شقيقي الراحل المقيم شنقيطي بدري ومن فريقنا بتاع براتسلافا كان ثلاثي والله بس ال MSN بتاعين برشلونة وهم غير حسن دوشة، إميل عزيز غبريال وأحمد ربيع.
شنقيطي لمن غلبناهم، قال: جايبننا نلعب ضد "فيسبات" (الفيسبا هي موترسيكل كان مشهور في السودان، لكنه باقي ليا يكون لساتهو مشهور في ايطاليا بلد صناعته، مش كدآ يا جيلينا)..
لقيت حسن في الفيسبوك وتواصلنا بالتلفون:
أنا: بالله لساتك في دبي
هو: قاعد عاصر الأولاد في الجامعات ما هو بقت صعبة هناك "السودان"
وإتكلمنا عن الماضي وعن حسي. حسن الكنتا شايفه طاقة بادرني بقول محبط!!!
إشتكى من الكُبر وكيييييييف الناس بقت تتعامل معاه بعنصرية.
قال طيف؟ بيقولوا ليهو يا حاج :D:D:D

قال مرة دخل المترو بتاع دبي، قام واحد شكله منتصف الاربعينات، قال ليهو أقعد يا حاج..
حسن قال ليا: إستفزتني الحكاية دي جداً وقمتا رقصة وقلت ليهو: لساتني برقص وشوف رجليا كيف بتحركن...
بس حسن برضك، إعترف ليا بأنه ليه يومين جسمه كله مواجعهو..
حسن مرة رجع السودان في إجازة بعد إنقلاب يوليو (هاشم العطا) وناس الأمن مسكهو عشان الإسم، قال ليهم: شوفوا يا أخونا الباسبورت، أنا عمري عشرين وزولكم في الأربعين...

http://sudanyat.net/vb/attachment.php?attachmentid=1270&stc=1&d=1487492026

شمال الحكم
أحمد ربيع، أنا وحسن دوشة..
الكابتن كان من اليمن :eek:

[بابكر مخير]

يا أخوانا والله حكاية عجيبة
خلق الله ديل يتشكلوا ويتلونوا وإتغيروا، بمناسبة ودون مناسبة..
بدايت الرد دي تكون خلت كل واحد يسرح في قصصه، بتذكر مرة كوريا الهو أحمد أخوي قال:
تكون قاعد ليك مع عشرة أنفار "سودانيين طبعا" تقوم تسرح في حاجة مقلقة بيك وعفويا بي صوت مسموع تقول (والله مشكلة) تلقاهم كلهم يردوا: (آآآي والله مشكلة) ولسان حالهم يقول: كل ديكن بيكوكي وكل حين طاعنهو شوكي، إلا حآرة التيئِ)......
حسي دحن يا ناس الدنيا دي، ما فيكم زولن كدي مرة مرة يقول يجاملني في بوستيي دآ..
مرة مرة تلقى دآ سطر ومن دآك سطرين.
يعني حسي أمانة في ظمتكم طه حسين دآ كان بيكون لو لا التشجيع ولا شيخ البرعي كان بيكون لو لا ليهو محبين ولا مارلين مونرو لو ما ليها معجبين ولا عمر البشير دآ كان بينعرف لو لا كثرت الكآرهينهو..
معليش غايتهو الواحد يرجاها في ميزان حسنات ورزق ولطف من الحسناوات...
يا أخوانا الواو دي نطت سآآآآآكت والمقصود هو جمع حسن وحسن ويحسن شوف الشايفين :cool:
عندي زول ظريف وعزيز، يقوم يضرب ليا تلفون وكلمة كلمتين وما في دقايق يضرب تاني آهاااااااا
أنا: خير:confused::confused:
يقول ليا: ما عندي حاجة :mad::mad:،
أها دي ذي مداخلتي دي،،،
ما عندي حاجة:rolleyes:

[بابكر مخير]

أسعد هبشني في موجع
ما هو إتكلم عن الفشل :(:(:(:(
الفشل مع الكُبر ملازم:confused::confused::confused:
الكلى = كثير الإحتمالات
وضوح الرؤية "العيون" = أمرها حتمي
السمع = أكيد
الإرادة "بكترة نقة الخلق أنك خلاص عجزت" = إنعدمت
الرغبة "آآآآآآآآآآآآآآآآآآآآآآآآآآآآآآآآآآآآآآآآآآآآآخ مع عدم القدرة و" (إن توفرت وأكيييييييد هي موجوووووووووودة أصلها عايشة في المخيخ لكن الله غالب) = فشل حقيق :mad::mad::mad::mad:

[imported_قرقاش]

يا أخوانا والله حكاية عجيبة
خلق الله ديل يتشكلوا ويتلونوا وإتغيروا، بمناسبة ودون مناسبة..
بدايت الرد دي تكون خلت كل واحد يسرح في قصصه، بتذكر مرة كوريا الهو أحمد أخوي قال:
تكون قاعد ليك مع عشرة أنفار "سودانيين طبعا" تقوم تسرح في حاجة مقلقة بيك وعفويا بي صوت مسموع تقول (والله مشكلة) تلقاهم كلهم يردوا: (آآآي والله مشكلة) ولسان حالهم يقول: كل ديكن بيكوكي وكل حين طاعنهو شوكي، إلا حآرة التيئِ)......
حسي دحن يا ناس الدنيا دي، ما فيكم زولن كدي مرة مرة يقول يجاملني في بوستيي دآ..
مرة مرة تلقى دآ سطر ومن دآك سطرين.
يعني حسي أمانة في ظمتكم طه حسين دآ كان بيكون لو لا التشجيع ولا شيخ البرعي كان بيكون لو لا ليهو محبين ولا مارلين مونرو لو ما ليها معجبين ولا عمر البشير دآ كان بينعرف لو لا كثرت الكآرهينهو..
معليش غايتهو الواحد يرجاها في ميزان حسنات ورزق ولطف من الحسناوات...
يا أخوانا الواو دي نطت سآآآآآكت والمقصود هو جمع حسن وحسن ويحسن شوف الشايفين :cool:
عندي زول ظريف وعزيز، يقوم يضرب ليا تلفون وكلمة كلمتين وما في دقايق يضرب تاني آهاااااااا
أنا: خير:confused::confused:
يقول ليا: ما عندي حاجة :mad::mad:،
أها دي ذي مداخلتي دي،،،
ما عندي حاجة:rolleyes:

الحبيب ومخير ..
ماهو الجماعه ديك لو فسبكو لينا المنتدى وختوا لينا الحته ديك بتاعت ..اعجبنى ..كنا ضغتنا عليها وعرفت اننا متابعين بى جد ..
واصل ياحبيب ..
هسه يجوا يقولوا قرقاش مصاب بافيروس الفيس بوك ..ودوه الكرنتينه

[بابكر مخير]

الحبيب ومخير ..
ماهو الجماعه ديك لو فسبكو لينا المنتدى وختوا لينا الحته ديك بتاعت ..اعجبنى .

:L
شكرا الحبيب
:cool::cool::cool:

[imported_أسعد]

أسعد هبشني في موجع
ما هو إتكلم عن الفشل :(:(:(:(
الفشل مع الكُبر ملازم:confused::confused::confused:
الكلى = كثير الإحتمالات
وضوح الرؤية "العيون" = أمرها حتمي
السمع = أكيد
الإرادة "بكترة نقة الخلق أنك خلاص عجزت" = إنعدمت
الرغبة "آآآآآآآآآآآآآآآآآآآآآآآآآآآآآآآآآآآآآآآآآآآآآخ مع عدم القدرة و" (إن توفرت وأكيييييييد هي موجوووووووووودة أصلها عايشة في المخيخ لكن الله غالب) = فشل حقيق :mad::mad::mad::mad:
:p:p:p:p:p
عندي صاحبي عندو الروماتيزم والضغط والسكر والعيون ووجع الركب، مرة قابلتو قلت ليهو كيف الصحة؟
قال لي: اهو غايتو بقينا زي حوض البرسيم، يحشو بي جاي، يقوم بي جايgap

تعرف يا حبيبنا واقسم بالله، اني كنت خاتي بوستك كنموذج حقيقي لمعنى التصالح مع الذات ومعايشة الفشل وبل الاستمتاع معه، بس خوفت انك تقوم تفهمني غلط وتزعل.

لكن قسما عظما، ان ما تمارسه في هذا البوست دا ياهو زاتو البقولو عليهم Self acceptance، وبتعمل فيهو شغل اجعص مونك في جبال التبت ما بقدر يشتغلو.

Keep it Up يا معلم...

[بابكر مخير]

:p:p:p:p:p
التصالح مع الذات ومعايشة الفشل وبل الاستمتاع معه، بس خوفت انك تقوم تفهمني غلط وتزعل.


أسعد يابا
لفتا نظري لي شئ ما كان خطر على بالي وعليه قمتا بعبشتا في شنهو القصد بي التصالح مع الذات..
لقيت أنها تعقيدة كدآ بتاعت حاجات وأنها شيتن كبيييييييير لمن تسمعه لكن لمن تقيسه تلقاهو ذي المنعدم.
الذات عرفوها بكمية هائلة من المفردات والتداخلات اللفظية بس هي ما شئ لأنهو تلقاها محتاجة نمرة واحد لي تنمية وبيئة توؤثر فيها عشان تتكون، يعني بالعربي ذيها وذي الأمبيا.
تعرف دي بتشابه ليا حكاية إستراتيجية، يقول ليك خطة وبرنامج وسياسة ومخاطر و"محسنات" مع أنه ما محتاجة لي دآ كله... وبرضك يقولوا ليك؛ إكتشاف،، مع أنه أغلب المكتشف هو شئ أصلن موجود بس الناس كانت بعيدة منهو... يعني أمريكا الجنوبية بي هنودا الحمر الما في شبيه ليهم غير الإنسان الأول، معقول يكون إكتشفهوم ذي التلفون والتلفزيون...
مسميات كبيييييرة بيستغلوها المتعلمين عشان يظهروا على حساب العامة..
إلا يابا
شكرا ليك كتييييييييييير
على دي :cool:
:p:p:p:p:p
Keep it Up يا معلم...

[بابكر مخير]

تنسى قدر ما تنسى
إلا شيتن إتجلدت فيها، صعب تب يتنسي!!
القرآن الكريم..
جداً لينا كان مدرس عربي ودين في الأحفاد "الكتاب" قال في واحد من أبناء الأسرة ضمن قصيدة عرض فيها حال تلاميذه أكاديمين (.... بدري قط ما بيحفظ القرآن) وشاء القدر أن أصبح هذا من أكثر العائلة تدينا وفقها وعلما "ربنا يديم عليه الصحة والعافية"...
بتذكر مرة "زنوبة" من الصباح مسكت بطنها، مقدمة لعذر أنها اليوم زوغة من المدرسة. قلت ليها: تتعذري يكون اليوم عندكم تسميع.. قالت: ما عشان كدآ يا أبوي (بناتي بيقولوا: أُمي وأبوي .... ما فيش بابا وماما ولا الإسم حاف،، ما بديهي يقولن أُمي وأبوي ما هن أسماهن، مدينة وزينب وأمنة;))
قالت كلامها وقبال تتمه، نطت مدون،، آي يا ابوي عندنا تسميع سورة "الإخلاص"، زنوبة بي ثقة قالت أنا حافظاها...
قلت طيب سمعيها ليا وإبتدت بقوة: أعوذ بالله من الشيطان الرجيم، بسم الله الرحمن الرحيم، قل هو الله آحد ....
هنا إتلفت لي أُمهن مستنجد، وهي تلك المرأة الذكية، النبيهة، الذاكرة، المصلية وحافظة بإشارة ما بينقشها إلا زولن رباطابي فطن، قالت أيوة أنقذتنا في وقت واحد، زنوبة أنها فعلا حافظة السورة وأنا ما إتفشلت قدام البنيات..
لكن بالله عليكم يا ناس حسن وشوقي وجعفر بدري، مش كان زمان في جزء "عم" بنعرفها بي "قل هو الله آحد" :rolleyes::rolleyes::rolleyes:
المهم نرجع لي قصة البتنجلد فيهو عمره ما بيتنسي، حسي أيتها آية تذكر و تلقاني من أول حروف، أسمعها حتى أني أسبق القارئ...
حسي يعني روفي دآ بيكون حافظ وهو ما إنجلد:rolleyes:
ما ذي البعرفه :o
ما عندهم جلد ولا ظنيتهو تسميع:cool::cool::cool:

[بابكر مخير]

http://www.bbc.com/news/world-us-canada-36000356
:eek::eek::eek:
:D:D:D
:mad::mad::mad:

[imported_Hassan Farah]

http://www.bbc.com/news/world-us-canada-36000356
:eek::eek::eek:
:D:D:D
:mad::mad::mad:
----------------------------------------------------------
خواجات ما عندهم شغلة
زمان فى البلد كان الناس يطلعوا الخلاء او يدسوا تحت خشة ويقضوا حاجتهم...اكان مرة اكان راجل....
جينا اوربا واكتشفنا اننا ما برانا...لقريب دى نسابتى ديل كانوا يفعلوا نفس الشئ

[بابكر مخير]

سبحان الله
يجيك شئ ما هو في الحسبان، بس باليد شنهو غير نحمده على كل أمر
في ما أعطى وفي ما أخذ...
بنت أخي حبيبتي "دينا" في الأمس تملى الدنيا ضياء واليوم تظلم دنياها وتظلم علينا دنيانا.
إنا لله وإنا اليه راجعون
وانتي وسطنا بي روحك جسدك أصلا ما إحتجت أفتش للكلام في مدحك ولا حوجتيني عشان أختزل الحروف الجميلة في وصفك ولا أرص السطور في غزلك.
لأنك كنتي الكمال في معناهو، ولي الخلق إتي مكملاهو وإن قلنا للوصف ما في شيتن ليهو إتي مخلياهو فيك الجمال والحلآ وكل مقومات الغزل ستهو وياكي برآآآآآآآآكي مالكاهو...
سيبنيا يما بالجسد وخلينا وراك بالحزن نتحرق بس برضك قدر ما بعدتي، القلوب حاضناكي وكل لحظة العقول ذآكراكي.
بتذكر بسمتك الديمة في الوشيش مرسومة وبتذكر فرحتك بالضيوف وقدومة، بتذكر صوتك لحن بنغمته المنظومة وبتذكرك سرحانة في حال الناس للسعيد مرتاحة وللحزين مهمومة.
بتذكرك وديمة بالباقي ليا بتذكرك
والي اللقاء

http://sudanyat.net/vb/attachment.php?attachmentid=1271&stc=1&d=1487920427

[عكــود]

رحمها الله رحمة واسعة وأحسن إليها.

أحسن الله عزاءكم يا بابكر

[imported_Hassan Farah]

رحهما الله رحمة واسعة وغفر لها وجعل الجنة مثواها ربى يصبركم ويجبر كسركم انا لله وانا اليه راجعون

[بابكر مخير]

بين الإتنين تنازع وإختلاف وفوائد
الحزن يستوجب مساحات وأحاسيس متقدة وقدرة جسدية والكُبر مختلف :(
فهو فراغ بلا مساحات وتبلد في الأحاسيس جراء زخم الجراح التي مرت مع السنين العديدة الغابرات والجسد تهالك، الظهر إنحنى حتى كادت الجباه تلامسس الأرض شئ ما بين الركوع والسجود "قسراً".
ويتنازع الإثنان في شدة وكبر الأمر. فالحزن يريد أن يستحوز على المشاعر ويبقى لي زمان حسب إرادته ويتسيد المستقبل كذاكرة دائمة. حين الكُبر كان قد أتى على كل كيان الإنسان من قدرة جسدية الي مقدرة ذهنية وصولً للهزال والنسيان والذهال فلا ذاكرة متقدة ولا وقت قادم ليستعاد الماضي كذاكرة حال أن بقي في العمر لحظات.
لكن فائدة الحزن كبيرة كونها نظرة بصورة واقعية للحياة وحتى أسلوب التعبير عنها فيه فائدة إن كان بكاء فهو إزالة لغم في القلوب وإن كان سرحان فهو تأمل في الذي حولك وحتى في حال الكِبر فهو تذكار بما أتي قريبا..
حزنت يومها وعشت لحظاته مع إختلافها بيني وبينه وتنازعت معه بشدة وغلبني وغلبته ولكني إستفدت كلما إستفادة! حين ذرفت من الدمع مدرارا وأزلة ما في قلبي من غم حين سخطت على هذه الفانية وضحكت من الموت وسذاجته في عدم توفيقة في الإختيار وجهله لأصول اللعبة في من هو الأحق ومن يليه.
كنت في السودان من قبل ثلاث سنوات في مناسبة فرح بنتي "أمونة" وكنت أرى الحزن في عيون الناس على البلد ومعاناة العيش واليوم ذهبت في مناسبة حزن كبير لنقبر بنتي "دينآ" ولم آرى الحزن لأنه كان غشاوة في عيني ولم أحسه لأنه كان مالك أحاسيسي..
لها الرحمة ولوالديها الصبر

[بابكر مخير]

سبب وبدون سبب بطن الواحد برآها أوركسترآ، شئ نحاسيات وشئ طبول وحتى المثلث حضور مرة مرة يديها رنة والمايسترو "الديرجنت" جزء من إحشاء الإنسان إسمه "القولون" بالله عليك ذي "طولون" المغني الأثيوبي، ماسك زمام الفرقة الموسيقية..قالوأ: السلطة لأنها مجموعة خضارات وهي كويسة وشافية، تصدق وتبقآ غذائك الأساسي والرئيسي.
آها الأيلاف الفي الخضار هي في ظاتها مشكلة، ما مبتتمسك وتسحلب من العضلات القابضة في نهاية الجهاز الهضمي وتسحب معاها بلاوي عقول المصريين "مدهولة"،، يعني الواحد يلبس "بامبرز" ولا شنهو.
غير دآ تلقى مركز بحوث في واحدة من الدول المتحضرة تبحر في أمور "السلطة" وقالوا أنها ربما ونسبة للخضار وموضوع السمادات فهناك إحتمالية وجود مواد "مسرطنة"..
وإتحيرنا:
السلطة كويسة ولا خطرة
بس قناعة كدي ونسبة لفقدان "الكونترول"
السلطة زفت :mad::mad::mad:

[بابكر مخير]

وقالوا أنها ربما ونسبة للخضار وموضوع السمادات فهناك إحتمالية وجود مواد "مسرطنة"..
وإتحيرنا:
:mad::mad::mad:
وذادوا الطينة بلة،
مع أخر تقليعة،
فوائد قشرة الخضار !! حتى البصل :eek:...
طيب دي كيف...
ما بعيد بكرآ يجوا يقولو، حتى الطيور والحيوانات والأسماك فوائدها الأكبر في جلدها، يعني حتى (القنفد) أبوشوك:rolleyes:
لا والمدهش ريش الطاوؤس يدخل من هنا ألوان قوس قزح ويطلع لون "الريش" أبيض.. طبعن اللون الأبيض هو مجموع الوآن والمكذب يمرر شعاع نور أبيض علي مثلث زجاجي "البريزم" ونظرية الإنكسار الضوئي(قلت ليكم شيتن يدقوك فيهو ما بيتمسح من الذاكرة ودي من زمن حصة العلوم وأستاذ وديع، بالله الزول دآ ما شاف الوداعة أصلن. وهو أصله لبناني لكنه في الحكاية الجلد بس تقول جعلي، ما هم الجعل أسياد المباطنة...
ما علنا نرجع لقصة الخضار وقشرته ونوادره لأنه الحكاية دي ذكرتني قصة تحكى عن ملك في يوم كدآ حكمت معاهو وحدد يوم قال أنه مخصص لتقبل الهدايا من شعبه.
شوف بقآ المنافقيين وقفوا صفوف وكل واحد شايل هديتهو..
واحد صاحبنا شايل ليهو قفة تمر ودخل بيها للملك وبعد ما غاب ليهو ذي نص ساعة جآ مارق وماسك "شيشتهو"... لقآ قدامهو واحد شايل ليهو شوال "عجور"gapgapgap....
ضحك وقال ليهو: ربنا يقويك لو تقدر تتحمل ..
واخد بالك يا كوكي:(:(:(:(
ودي ياها قصة قشر الخضار وفوايدو....
http://sudanyat.net/vb/attachment.php?attachmentid=1274&stc=1&d=1489300007

[بابكر مخير]

تقول ممكن يمر عليك صباح وتصحى فيهو بالبعض اليسير والكم القليل والوجع الشوية من آثار الكُبر.
لكن هيهات وقد وهن الجسد وإتكدست السنين فوق الكاهل "العجوز، الهرم"..
تقول ترتضي بالأمر الواقع وتتعامل مع المشكل بالأسلوب الذي يقلل المصيبة..
قبل ما تقوم تخاف "تتمقى"ما هو عضلة الضهر بتتأثر والرقبة يمكن تتشمط المهم تبدآ تلملم جسمك وحسب توجيهات ناس العلاج الطبيعي، تتكور في شكل الطفل في بطن أمه وبشويش بشويش تبدى بالرجل اليمين، ما الشمال حقت الشيطان؛ قال ليهو بي يدك البتأكل بيها ما البتتق.... بيها والإتا بتتق... دي طبعا حال لم يتوفر الماء وطبعا حين يتوفر الماء، يبطل التيمم والقش...
لمن تلامس رجل "اليمين" الواطة، تشعر بي سعادة ورجفة متعة،، يا أخوانا في حالة كدآ بتحصل تتبعها برضك رجفة متعة،، فعلن السموم لمن تطلع من الجسم بصورة محددة كسائل تبعث في الزول راحة وفرحة وهي مجسدات المتعة وذي ما الضحك يقاس بالصوت، المتعة تقاس بالرجفة..
وتقوم هوب تقيف وتبدى إجراءات التفريغ والتنظيف ولأنها بتأخد وقت طويل، تقول تخفف من عاملين أساسيين بالإستعانة بالراديو، أول هم لمن تدخل عشان تتأدب في البيت المخصص لي كدآ بيكون في فرقعات وأصوات صوت المذياع لمن يكون عالي بيغطي عليها..
تانيهو بعض مرات بتكون في أغاني أو مواضيع تساعد الزول في لحظات التجلي البتنبعث مع كل راحة وراحة...
آها الصباح دآ وأنا في الحالة دي وقلت أغير من المذياع للمسجلختيت بعض الأغاني الهابطة، ما هو هناك لزامن لازام يهبط السيئ ليتعوض بفطور شهي.
أول غنية عدت وكانت داعم حقيقي يعني هابطة بالجد. قمت ووقفت قدام المرية وبي حذر وبدون نضارة عشان يكون الشوف معمش وما توضح رؤية الكرمشة والترهل الفي الوش وفجاءة...
آآآآآآآآآآآآآآآآآآآآخ :eek::eek:
شد عصب الرقبة وبتوافق تام مع أغنية..
الوجع رجع:mad::mad::mad::mad:

[imported_عبدالله الشقليني]

الحمد لله على كل شيء

[imported_عبدالله الشقليني]

الوجعْ رجعْ
هلا يا بلا
الله
هلا يا بلا
الله
الوجعْ رجعْ
هلا يا بلا
الله
هلا يا بلا
الله
....
استغفر الله
:L

[بابكر مخير]

هلا يا بلا

أخويا الحبيب
"بلا" دا البيغنو ليهو، هو "منهو وأصله شنهو"
بعدين يعني إسم مجرد، لا لام الألف بتاعت التعريف ولا إسم أبو ولااا ذي ما العربان أبو منهو، قالوا مرة الدكتور الكبير أبو حسن أبو سافر الشام وضابط الجوازات في المطار مسك الباسبورت وسأله، ، أبو حسن أبو ميين...
نرجع لي "بلا" وال "الهو" مش بتاعت فرويد (الهو والأنا والأنا العليا) لكن بتاعت الزول دآ...
بعض الأحيان تلقى أنك ممكن تستغنى عن "الف لأم" التعريف حال أنه المراد "شخص، حيوان أو آيتها كائن ما كان، مشهور ومعروف وفي رأسه علم" مثلا أنا وإن لم يكن دائما ففي أغلب الأحيان؛ سيد صادق ودي بتكفي وبرضك ممكن تحذف الألقاب في حال مثلن! الرئيس، المدير ذي زمن نميري قل أن يسبقه ذكر إسمه الرئيس نميري، تلقاها حااافة نميري أو إستلطاف لي شخصة صفة أبعاج يعني تلقاها برضك ما "أبو" لكن برضك ممكن مش يعني يتسغنى عن لام الألف ولكن يتجرد منها المخلوق أو الكائن في حال أنه نكرة يعني مثلا ويبق الهوا دون (لا الف لام ولا إسم أب ولا قبيلة) ذي "بلا"
تعرف يا بيكاسو لأحظت أنه عند خيلنا المصريين، نلقى أنهم في بعض الأحيان للتحقير أو تقليل من شخص ما يقولوا ليهم يا عمر والغريبة أنها وافقت أمر "عمر"
ولمن خلاااااص عايز يخته في الواطة يقول ليهو: يا عمر يا بشير...
تعرف يا شقليني
يسعدني جدا يحفزني خاااالص نظرتك لي البوست دآ :cool:

[بابكر مخير]

http://sudanyat.net/vb/attachment.php?attachmentid=1275&stc=1&d=1489558747

الحمد لله
تذكر دوما
لكنها على شوفي أنها نهاية أشياء
فرحة، زعلة، قبضة، نكسة، تلاقي، فراق الخ.....
لكنها منها بداية جميل:rolleyes:
دي إلا أتوا الفنانيين والسريالين خاصة منكم البيشوفوا
ولا شنهو الحبيبgap

[imported_عبدالله الشقليني]

https://www.youtube.com/watch?v=K1BwhRULKJ8

أنا ما تغيرتَ

[بابكر مخير]

بيقول: حردان وبيقولوا: زايم وبيقولوا: زعلان
كلمات زمنا كانت معروفة ومنتشرة، حكاية زايم دي، ما ظنيتهو شابات وشباب اليوم بيعرفوها،،
زايم دي بيقولوها لمن الموضوع يكون متعلق بالعواطف، بين الأحباء والأسرة جواها، يقوموا مرة في عيد ميلاد الحبيبة وطبعا قبل ما يحصل الزواج في عيد ميلادها، ما تجيب ليها هدية، آها تقوم تمد بوزها وتزوم الأكل والمشرب والدعوة لي السينما...

الحردآ دي حاجة كدى على الماشي كدآ في أغلب الأحيان، مثلاً: في الأكل يكون صحن ملآآن مطايب وماخده زول ويقوم يلف على الناس كلها ويصهين ليك، آهااااا يقوم واحد من الحضور ينتبه وينبه الشايل الصحن ويقول ليهو: بابكر دآ ما مررت عليهو الصحن.
تقوم إتا تحرد في وقتها وتندم لي قدام، لمن الصحن يفضى :o

الزعلة
دي بخليها يشرحها لينا أبو رحيق "نصوري" لمن يرجع لينا بعد نداء (فتح العليم) البيرجع الزايم والحردان،، خليك من الزعلان ساكت :cool::cool:

[بابكر مخير]

التغيير والتغير والغيار
كله جديد في جديد
التغيير هو التجديد في عينه والتغير هو كما إلباس الشئ حلة أخرى وهو التجديد في المظهر والغيار ممكن يكون إبدال يغيير الشكل ويبقى لناظره جديد..
آهااااااااااا
وعكس ما يرادفها من أحرف وهي "الغيرة" التي هي لست برابط بالجديد أصلن ممكن تعريفها بأنها أقدم العواطف وكمائن القلوب في تأريخ الإنسان ويمكن مشاركتها ب "وحاسد إذا حسد" فالإتنين متطابقات غير أن الحسد مرض يصاب به الإنسان ولعنة تقرب من الشيطان حين الغيرة في وصفي الشخصي ليها؛ هي ضعف في الذات..
المثل بيقول وكما يقال في المعنى "الما بتلحقه جدعه" والعف دآ يترجم بأساليب عديدة، منها النميمية أو القذف المباشر أو المكايدة ويستجب إشباع الغيرة بيئة خاصة، مثلن زول مكجن بابكر، آها يقوم يلقى ليهو جماعة تتوافق معاهو وينزلوا ليك فيني تلفيق وخلق قصص وذي الكبتريا في لبة العيش التوست، تنتشر الروايات.
وإتا يا شقيقي الحبيب
شيتن ديمة متجدد
وآكيييييييييييييييد، "صادق"
لمن قلت:

أنا ما تغيرتَ

[بابكر مخير]

فكر كتير وتلقى شعرك إبيض قبل يومك.
إهتم بالأمور جميعها، من الصغير الهين الي الكبير المجلجل وتلقاها إتردمت وزن في كتفك، فينحني ظهرك وتكاد الذقن أن تُقبِل الركبة.
خاف من أيتها شئ "مرض، فلس أو حتى الموت" تلقآك مهموم ومنعزل عن الدنيا وحياتك كلها نكد وفقر.
آهااااااااااااااااا
دي حاجات أخير ليك تتجنبها ما هو أصلك الحكاية وما فيها. ما بتقدر تعمل شئ، سلم أمرك وأعقلها وتوكل..
حبيبي الصغير عبد الخالق مالك "عبدو" كل ما ألاقيه يذكرني بقولة قلتها يوم والغريبة أني ما متذكرها.
والقولة (على قوله): حاجة ما بتقدر تغيرها ولا حتى عندك القدرة أن تغلبها ما تنشغل بيها..
ونرجع للقصة دي والرابط بينها وبين الثقيل دآ :rolleyes:

[بابكر مخير]

ذي ما قلنا أنه الكُبر دآ بيهجم دون سابق إنذار، تصحى الصباح ويغلبك القوم من السرير، تمشي بدون مناسبة تتعتر، تكح "تبظبظ"، تشوف وعيونك تدمع...
وإن قلتا:confused:gooodlooool وحاتك أخير تنستر من فضحة بي جلاجل.
كله دآ وجوآك إتا لسة شايف نفسك ممكن تلبس محزق وتسرح شعرك وتعاين وتبصبص..
تلقآ ناس حلوة وترفع معنوياتك "والله ما شاء الله محافظ" "بالله ما إتغيرتا بس شوية شيب" "يا أخي والله يحسدوك علي الصحة والعافية" ودآ كلللللللللله والوقفة قدام المرآيا كوم.
الحقيقة تتجلى عيان بيان، كرمشة وعفيص.
بس برضك بيغلب الشكل والعمر... شنهو؟؟؟
الروح...
ممكن تكون شاب بي روحك... كيف؟؟
عليك بمن هموا أصغر منك عمر "بقول لي بعضهم خلوا علاقاتكم (المما جميعهو;)) - vampire درآكيولية - :rolleyes:
ما تشيل هم الدنيا
اعمل ما تريد وطظ فيها أم بنايتن قش، الناس أصلن لو إتبكمتا ولا طرشتا، بيغسبوك تتكلم وبسمعوك الدايرنه.
أبعد من الكلام في غيرك لأنه دآ بيجيب ليك كلام راجع والقيل والقال أبقى حلها :o
لو لقيت تكضب وتمدح الشيطان إن سئلت!! فأفعل.....
ما هو ما بضرك وإن نفعه دي إرادة الله وبقت...
حب كتيييييييييييير يعني قدر ما الله يقدرك، ما واحد ولا واحدة ... أربعة، خمسة حتى لو عشرة (طبعن لو بتقدر/ي). ما هو الحب مسكنه القلب وعشان يشيل الكتير دآ لابدن يوسع ودا بيفتح الشرايين..
الرياضة والتمارين، ما ناس جري وعقلة وترمبيلين، رياضة باللين واللطف لكن خلي بالك من المصنع والملون وكدآ:eek:
كووووووووووووووووووووووووكي:cool::cool::cool: سلام

[بابكر مخير]

بالله عليكم "البتاع" دآ إن ما قدرتا تتحكمه، بيرميك في شيتن لا يحمد عقباهو...
الواحد عااااااارف نفسه ما فيهو حيل وإن زول لطش في الهوا كف، رزازه يرميك.. شوقي بدري لمن كنا في تشكوسلوفاكيا كان بيصف واحد من أخوانا الطلبه هناك وصاحبنا دآ فعلا كان وشه عريض وتعليق شوقي كان أنه الزول لوفكآ بونية تقع في وش ...
المهم مع الكُبر بتفتكر كل الناس بتديك خاصية ومراعاة أنك ما فيك حيل ولا ليك حيلة في الشدائد وأنه نسمة لو هبت بترميك وآطة. بس ما تقع ليك في زولن قريب مربي ليهو دقن ويكون من ناس "تان" وتمشي تهابشه في شيتن ليهو علاقة بالدين...
أنا ومن صباحات الله، بعد الذي منه من معاناة السرير والقعاد والوقفة المحبطة بتاعت المريآ... آآآآآآآآآآخ من الجزمة وربطت الرباط، إن قلت تعملها وإتا قاعد؟! إتاكد أنك عايز ربع ساعة لمن تنعدل من القعاد وياها الطريقة الوحيدة الممكنة لمن هو فوق السبعين غايتهو عملناها وركبنا العربية وفي الإشارة على الشمال صاحبنا الذي لو لا أنه ربنا المغطي هو العارف أنه القصة هي الكُبر والشلاقة..
صاحبنا كان مدلي سبحة ذي فضة ولا حاجة غايتوا أنها بتلمع وآخرها دلايآ، أنا وقعت ليا كدآ في شكلها ذي سبحت المسيحيين..
آهااااااااااااااااااااا، قلتا ليهو (وإتنينتنا في عربياتنا): إتا مسلم ومعلق هادآ "ما هو لازمن تعوج خشمك عشان يفهمك".. بالله عليك الزول رغى وزبد ونتر جوا عربيتهو التي نهرت التقول (حكامة) تسخن من عزيمة زول ناس "تان"..
وإتذكرت بقدرة خاصية المخزون في المخيخ والذي لا ينسى لما تكون قد ضربت بسببه (دقتي من العربان في أسلوفاكيا وجيت شوقي بدري لهزيمة أولائك "العلوج")..
دست على البنزين ولا إستنيت حتى النور الأخضر... يابا العمر ماهوش بعزآ وبعدي رقاد بكسر مهام صغر مع هذا العمر، شئ إلتهابات وموية في الرئة وقرقرينا في الضهر... ما هي ما بتتحمل وخليها سآكت...
بس برضك حكاية السبحة دي محيراني..

اليهود والمسيحيين بيحاكونا ولا شنهو:confused::confused::confused::confused:..

منقول من منتدى "هديل"
(إستخدامات المسابح

أما استعمال السبحة لأغراض العبادة فهي ليست مقصورة فقط على المسلمين فقد استخدمها المسيحيون واليهود والهندوس والبوذيون وقد برزت بشكل أوسع بعد انتشار الدين المسيحي حيث كان الرهبان يذكرون صلواتهم بها واتخذها آخرون كمظهر من مظاهر الترهب والعبادة في الصوامع والمغار والكهوف وقد اختلفت عدد حبات المسبحة عند المسيحيين حسب طوائفهم فهي عند الارثوذكس مؤلفة من مائة حبه وعند جماعة (سانت دومينيك) وهي فرقة مسيحية تصل إلى مائة وخمسين حبة أما عند الهندوس عباد الإلهة شيقا فهي ما بين 32 و64 حبة وعند السيخ تتألف من 27 حبة توضع في المعصم على شكل سوار)


بس حلاتها و "so sexy" في يد لبناني ولا سعودي..... بالله لو تتابعهو يلعب بيها، تسخسخ بيك عدييييييييييل إلا تنومك مغنطسيآ،،:rolleyes::rolleyes:

[بابكر مخير]

مع الكُبر عند بعض الناس، تختلط الموازين،، هن الكرعين بتخلطن لمن الموازين،،، يعني مثلا، زولن هوين يلعن سلسفين خاشك "بحسن نية" تصهين وتقول: ما هو المسكين كفران من حالة، خليه يفش غِلو..
وزولن جتة وجهااااااامة يسبك نهارا جهارا وبدون سبب أو سبوبة، برضك تصهين "خوفاً"..
لكن كمان الغريبة عند ناس من الكُبآر، هم البيبادرو وبيختوا والعواقب بتكون على الطرف التاني، إن بقآ ود ناس، بصهين "بحسن نية" وإن بقآ مصيبة. دآ قطع شك ما بيخاف ومصيبتك مدهولة...
حسي مثلاً؛ زولي الأمس دآ لو كان لما فيني بالله عليك إلا أكون في المستشفى لو في أحسن الحالات...
الداير أقوله!!؟؟
للكبير والصغير..
الدنيا رحلة ممكن تكون ممتعة لو الزول قدر يطوعها على الشكل الدايرهو وممكن تكون نكد وبت ستين الف كلب لو شيلها أكتر من طبيعتها.
والدنيا ياها ضيافة، فترة زمن يقضها الزول والأحسن بيكون هو الضيف الخفيف، لا بيغلط على الناس ولا يضايقهم.. نلاحظ دايمن لمن زولن محبوب يتوفى يتقال أنه الكويسين دايمن بيمشوا بي سرعة منها الفانية..
آها وعلى أيتها حآل، صعب نقول فينا (بارك الله في من زآر وخف) لكن أريتنا نبقى من الضيوف الخفاف...
بتذكر زمان شيخي قاسم مخير كان ديمة يقول لمن يدور سجارة "أديني صباع سرطان" وكان قد هاجمه وغدره وكان من أولائك "خفاف الزوار" وهو مع مرضه دآك كان ديمة يردد قولة: تتمارضوا فتمرضوا وتموتوا....
آها علي أخويا مرة حكمت معاهو أنه يعمل قسطرة قلب، قلتا ليهو يا زول الشر لي بعده ما بتتذكر قاسم أخوك كان بيقول شنهو؟ تتمارضو..... وعثمان ود أخي فاروق ميرغني "الحبيبين" والمعروف بالكوتش كان حاضر وهو من أصحاب المزاج الهائل. قال ليا: دكتور علي دآ نوع الحتكبس معاهو ليييين المية "اللهم إستجب له ولعلي بطول العمر"
ويحفظكم الله ويديكم كلكم طول العمر وكامل الصحة ولاعافية

[imported_عبدالله الشقليني]

https://www.youtube.com/watch?v=2EpuVOgTYjc

نظرة باكية حزينة
يوم رحلت وشلت بهجته وأنواره
*
هكذا يا سيدي بابكر ، وجدت نفسي حزيناً دون سابق إنزار . كأن " دينا " من لحمي ودمي .
ولم أستطع كتابة الآن. العيون لورادوا ما بيعرفو يدارو . كان أبيها حبيبنا منذ طفولة العمر و
التقينا عند الشباب ، والتقيت به عند بدء المشيب ، هو وأم دينا . قرب كورنيش أبوظبي في جلسة
عائلية بين أسرتين .... لم أستطع أن أنسى .
*

[بابكر مخير]

.... لم أستطع أن أنسى . [/FONT][/SIZE][/RIGHT][/CENTER
*

النسيان والكُبر
بيناتهم سر عجيب
تنسى الحلو والفرح وما تنسى المؤلم والترح
مرة مرة تجيك ذكرى حلوة ناطة ذي السانتدوتش
ما هي بتكون جواها المر
الفيديو ذكرني ليلة في لندن وعصومي كان في زيارتي
آها يوم قال ليا: عاوز أغني لي بنياتي..
تم وكانت ليلة حلوة ممتعة وكانت (دندونة) كما يحلو ليا تسميتها..
كانت تلك الوردة وسط بوكيية جميل ساحر من الورود
..
قال ليك:
بس حلو مُر ولا حلو وحراق:(

[imported_عبدالله الشقليني]

ياه ..............
فعلاً الكُبر دة ثقيل ، بيخلي الواحد زي الدَخل الفلم مرتين .
أنا كنتَ يادوب بادي الشُغل ، وفي صاحبنا في العمل في السودان ،كان شغّال بالمُشاهرة :

قال لي :
عندنا صاحبنا في الإسكان .. كان ما بيمز ... عشان كِدة مات !! وإنتو يا أولادي لازم تمِزو ...
*
الكلام دة قبل الشريعة :confused:
*
بالمناسبة تذكرتك ،و قلتَ أخفف شوية ، لدي موضوع عن إبن البادية ومرتو
حأنزلو في سودانيات ...

[بابكر مخير]

ياه ..............
[FONT=Arial]فعلاً الكُبر دة ثقيل ، بيخلي الواحد زي الدَخل الفلم مرتين .

بيكاسو الحبيب
مع ثقالته دي، إلا فيهو ميزة...
تكبر!
بتترفع عن الصغاير
بتسامح
بتعفو وبي رضاء
ما بتكون بتاع قوالات ولا إضينة
صادق في قولك وتعاملك
شحيح كراهية وكريم محبة...
مليان أصالة
فارغ عنصرية
شبعان حنية
الأطفال ضياء في عتمة العيون
الشباب ذكرى تجترها ذي العسل
............
تعرف لمن الواحد يكبر في العمر بيبقآ حسااااااس وحساباتهو متميزة. تتجنب الخطاء في حق الناس، ما إتا برضك فيك الكعب،،، تحسن الثناء في ما هو أهل لذلك بتجرد وفي نفس الوقت، بتباشر بالنصيحة لمن تشوف ليك غلط، حتى لو كان بيجيب ليك هوآ..
الكُبر
ما بعرفه إلا العايشه..
والما ضاقهو لا بدن :confused::confused:
يتلذذ بيهو ولا "يحرقهو":eek::eek::eek::eek::eek:
[SIZE="6"][COLOR="Red"]ياااااااااا كوووووووووووووووووووووكيييييييييي :cool::cool::cool:

[بابكر مخير]

تقول تلبس بنطلون فيهو لمسة "إستايل" ويتسلط عليك زول: يا أخي البنطلون دآ ما مناسبك في العُمر دآ.
تتفرج ليك على حاجة وبي نية صافية "لله ما" وزول تقع عينهو عليك؛ بالعمر دآ!! دي شينة منك. ولزوم المقسة يضيف "دي شينة منك".
تمشي تقول تفرق، تسمع موسيقى، تشرب ليك "حاجة بآآآآآآآآآآآآآآآآآردة" في محل مخصص لي كدآ؛ تلقى واحد ويكون دفعة وبرضك جآ لي نفس الأهداف والمقاصد. بس مشكلته ظانه مليآن وخز ضمير (طيب يا ثقيل جآيي لييييييييه) يقوم يمسكك؛ تعرف والله شينة مننا، حسي لوشافنوآ هنا يقولوا شنهو.
طيب يا سخيف مدام عندك ضمير بيصحى متأخر. ما تترزي في بيتك ولا داير وخايف :eek:...
دي المشكلة ناس تعيش بالمظاهر ولي المظاهر ويدسو البيهم ويظهروا للناس وش تاني...
واحد صاحبنا هنانا "قصدي في الإمارات"؛ بالله العظيم عليك فارد لسانه في الخلق: دآ مفلس ودآ أصله وفصله وفعلته وتركته وعيييييييييييييك.
هو ظاتهو قاعد مخالف ولي طولت لسانه مخوف الناس ولامي ليك في الخلق شايل قروش وما بيرجعها، مأكل شارب وبرضك حتى وسط الحسان متمكن، ماخد مكان ومتحكر...
آها شينة دي ولا المن الله جآي!!!
الكُبر

[بابكر مخير]

مع الكُبر بتخت لي "نفسك" التزامات، إتا بي وهمك بتفتكر وتظن أنه واجب عليك،
مثلاً المناصحة؛ دي بتفتكر أنه مع كترت السنين معرفتك بتكتر وخبرتك بتوسع،،، أهآ تتشبر في البعنيك والما ليك فيهو...
تفلسف وتنط في كل أمر،،،
أنا بفتكر وأنا شايف والآدهى لمن خلاااااااااااص تقول: أنا عارف...
غير المناصحة كمان التطفل، ناس قاعدة ومرتاحة وتتونس برآها في أمورها، تسمع ليك طلاطيش كلمة وحسب اللافي في رأسك تقوم توووووشك داخل معاهم،،،
لآ هو الموضوع وأصله القصة وإتا ناقز برآ الطآر، بس مساكين لأنهم مؤدبيين يتحملوك...
كمان شيتن تاني،
فرضان النفس..
يعني حسي ذنبهم شنهو شباب سودانيات ديل، الصباح الصباح، شاغل حيز في سودانيات وخلاص يعني الولد "مُلتزم" تجاه سودانيات ومشارك..
مداخلة يوماتي ومشاركة أكيدة مرة في اليوم..
ياها دي الثقالة ظااااااااااتآ.
لكن كمان مع الكُبر، ما بتحس بأنك مزعج لكن متأكد أنك "مُلتزم"

[imported_عبدالله الشقليني]

بيبنا بابكر

[imported_عبدالله الشقليني]

حبيبنا بابكر
والله كلامك حلو .. وبِطمِّن

بس الكُبر مع الفلس كعب خالص ...
وعدم الشُغُل بخليك (عالة ) وعالة دي كعبة جداً.

العجب الزهايمر .!
دة داير مُمرضة تغسِل الواحد !!!!
أخير الواحد يكون " مؤتمر وطني " أفضل من الزهايمر

ولا شنو يا زعيم ... اللهم أخرب بيتنا

[بابكر مخير]

لو كان الفقر رجلا.....
بس إلآ:rolleyes:
الفلس حسب الأنا شايفة فيهو "عبادة"
الصوم عبادة وقمته أنهو الزول يحِس بي حُس الآخرين والفلس قمة هذه النعمة، مش الإحساس بس، لكن المعايشة والممارسة والأفعال... بتشارك بالطموحات والرغبات والأهداف...
دآ واحد..
تانيا في الفلس تتقوى الروابط الإجتماعية،،
تِدين من زول، بقيت إتا خاتيه في مكانه خاصة، إن عنده ترح أول المعزيين (التواصل) إن عنده فرح أول المهنئين (المشاركة)، إن مرض أول المراجعيين (أجر)، إن إترقى في وظيف أو كسب لوتري أيتها إن كانت (أمريكا ولا توتو كورة) تكون أكثر الناس تفائلا بأنه حيريش ويفكك من الدين (رآحة مرجوة أمل وقاد)...
بعدين الدين مالهو لوموه ليا...
مكونات الأحرف قمة الروحانية..
دين إسلامي، مسيحي وحتى البوذية ديانة.....
تعرف!!
لمن كنت في القاهرة في بداية الهجرة أو اللجوء أو الهروب أو نسميها كما يطيب للبعض تسميتها...
المفروض وحسب فهم الكتيثريين أنه المعارضة في الخارج، هوتيلات وما شابه.. لكني بالله عليك كنت في الفترة ديك في قمة "العبادة" وأقوي قدرا في (روابطي الإجتماعية) مع؛ من الأصدقاء، على رأسهم الحبيب عبد المنعم سعد الدين ياسين ومن الأقارب نصر الدين الهادي المهدي ومن الأهل محمد علي الجعلي (الغريبة رابطي الإجتماعي مع شوقي بدري كان منعدم مع أنه كان "ذَائِعُ الصِّيتِ وسط الحسان والعامة") ومن الأشقاء شيخي قاسم الله يرحمه وعلي ومحمد مخير....
الحبيب شقليني
بس إلا نحمد الله سآآآآآآآآآآآآآآآآآكت على أنه مكنا من عبادتنا وقوي روابطنا الإجتماعية;););)

[بابكر مخير]

تصحى من الصباح
والبرنامج معروف ممكن يتغير في التسلسل بس ياهو!؟
الحمام بكل الممارسات الفيهو، تلبس والمكتب. ترجع تأكل تنوم، تصحى لو فيها مرقة تمرق، ترجع تنوم (؟) ومن صباح اليوم التاني!
نفس الموال..
خلال هذا الروتين في رتوش..
ممكن وإتا في العربية للمكتب تكون عادتك تفتح الراديو تسمع الأخبار أو تشغل المسجل تسمع شوية غناء مع سجارة (في واحدات كدآ بقولوا ليها: الإصتباحية).
عندي صاحب ظريف، بيفتح محطة القرآن الكريم وهو في طريقة الصباح للمكتب "رأسه ناشفة وما بيتوب من قرصة المرة الواحدة".
في صباح ذات يوم وهو لساتهو فايق من آثار دمار فعله فيه "جون الماشي" وبعد ما لملم أطرافه ولبس هدومه بعد جهد جهيد والرأس تكاد أن تنفجر.
ذي زول الجد ركب العربية إنتبه أنه في صنة في المكان وإنتبه أنه الراديو ما مفتوح.
بي ثقل رفع يده اليمنى وداس بلمسة قدر السمحت ليهو بيها حالتهو.
وإنفجر صوت القآري بأية:
"يَا أَيُّهَا الَّذِينَ آمَنُواْ إِنَّمَا الْخَمْرُ وَالْمَيْسِرُ وَالأَنصَابُ وَالأَزْلاَمُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ"
صقع صاحبنا من هول القول ولكنه إستأنس بقولة "فَاجْتَنِبُوهُ لَعَلَّكُمْ تُفْلِحُونَ" وإعتبر أن الأمر تذكير وما "تكفير";)..
هدأت الامور معه لفترة ونسآ "أو تناسآ" وفي يوم كان نُذِر صعيب وقد أنجزه على "أجمل وجه وأكمل قوآم"..
لكن قالوا: الخلى عادتهو قلة سعادتهو.
ففي صباح اليوم التألي تكررت المأساة وهذه المرة كانت أقوى وعواقبها أشد..
فقد كانت الآية ومنها مقتطف"
(أما ................... رحمة:eek::eek::eek:)
ما علينا من صاحبنا..
لكن أنا اليوم وبرضك عندي عادة سماع قنوات الأخبار من الراديو في العربية، زمان كانت البي بي سي في الأف أم لكن عملت أكزت برضك ذي "البركزت" وهملونا لي سي ن ن العربية..
في الراديو جابو أخصائي أيئ أن تي (أنف وأذن وحنجرة) وإتكلم عن فقدآن السمع، زولنا طربق قدر ما الله أداهو وأخرت كلامه قال:
مع (الكِبر) الأنسجة تشيخ والأعصاب تضعف والشخص ما أن كْبِر في عمره فهو الأكثر إحتمالية لفقدان الحوآس دون وجود فرص لإستعادتها...
بالله عليك دآ دكتور جايبنهو قال: عشان يقول لينا شيتن جديد..
أبو علمك ومعرفتك ظاتهم
:mad::mad::mad::mad::mad::mad::mad:

[بابكر مخير]

بتذكر أولائل أيام الإنقلاب ووكتها كان حظر التجول من الساعة 6 مساء حصلت وفاة عند أهلنا وأحبائنا ناس الجريف وتحركنا من أمدرمان، العميد قاسم بدري (هذا الرجل ربنا يحفظه بجمال هيئته وجمال خُلِقه وجمال مصداقته وجلال رفقته ) وهو معتاد على التمام دواما كأول الحاضرين في الأفراح والمياتم ومعنا الخال عثمان بدري الذي ورث من والده جدنا عبد الكريم بدري "العم" الجدية في المواصلة والتواصل والمراحمة والكرم وشقيقي وهو صديقي الودو، ممتع المجالسة، حلو الملاطفة، كثير الموآنسة، قليل الغضب، كثير الحب أحمد كورية، حفظهم الله آجمعين وكان هناك شخصي المستفيد الأوحد بالوجود وسط هذه الكوكبة المتميزة (وعلى قول السوريين: ممتعة "بإمتياز". الكلمة دي ظهرت بشكل واسع عند معارضي بشار الأسد في الفترة الأخير.. غايتهو اللغة العربية دي وإحنا متحدثيها بنعظمها بشكل مبالغ ونقول: أنها غنية وهي من فقرها تلقى كلمة واااااااااااااحدة بس تشكلها تديك معنى مخالف يعني الألف تخت فيها همزة فوق ذيي أرضى بمعني رضيت الشئ غير إرتضى وهي رضيت بس عن غير رضاء بي قولت مغسوب:" بالله لو لا الإيراني دآك ما عارف كنت حتكون كيف، إلا إشارة سآآآآآآآآآآكت _ سيبوييه_")..
المهم بعد ما عزينا وخلااااااااااص وكت حظر التجول بقآ ذي "تبين الخط الأسود من الخط الأبيض، ما الإمساك يحين وقتها". كورية توسط مجموعة تقريبا عشرة من أهل العزاء الذين وهم مشكوريين، عظموا حضورنا. وخد يا طربقة وكلاااااااااام "هذه هواية كورية التي يعشقها"...
ونحن هنا خلاص وكم طلب قاسم منه الإستعجال وترجاه عثمان العطف باللحاق بنا في العربية لأنه الوكت ذي وقت صلاة العصر "ضيق"..
إتضرني الأمر الذاهب له وجره بقوة..
ركب العربية وهو غير رآضي وقال: يعني تحرموني متعة عشرين أضان كانوا بيسمعوني، عشان أجيكم ووكلها ستة إضنين....
هذا وكورية كان في أوائل الأربعين..
سبقني في هذه المقدرة والتي ياااااااااااااا دوبك بديت أتملكها...
بالله عليك.
في المكتب، الشارع، البيت حتى في الحلم،،، إسم أضان كدآ إلا وأجضمها ليك نضمي...
صديقي وهو في عمر بناتي، قال ليا:
تعرف إتا المندولا (كفتريتي) دي فتحتها عشان تملى الناس نضمي....
دي واحدة من القدرات التي لو لم تكن ملكك، قطعاً حتكتسبها في "الكِبر";)

[Abdullahi Gaafar]

العزيز بابكر

عارف كل فترة ادخل البوست دا وأقرا وبعد الاستمتاع بالقراية اضع نفسي في الميزان عشان اعرف أنا وصلت وين ... ماشي في الدرب كويس ..بس حكاية النضمي دي يخيل لي يا بدت يا حتبدا قريب عندي ... ربنا يديم عليك نعمة الصحة والعافية ان شاء الله
مودة وتحيات

[بابكر مخير]

عارف كل فترة ادخل البوست دا وأقرا وبعد الاستمتاع بالقراية اضع نفسي في الميزان عشان اعرف أنا وصلت وين ... ماشي في الدرب كويس

:cool::cool::cool::cool:
الحبيب
كدآ إتا أكدتا ليا بالتمام والكمال أنك ماشي في الدرب..
هو أصله بدايته شوية نسيان،،
يعني مثلن، مثلن:rolleyes::rolleyes:
أننا كنا مع بعض قبل فترة قصيرة .. أذكرك يوم شرفتنا ومعاك ولدك وأضيئت لنا سماء أبوظبي وعبِقت أرضها بالطيب...


بس حكاية النضمي دي يخيل لي يا بدت

بالله عليك لا هو ولا أنا ولمدة الثواني الكان فيها مع بعض !!! "هن كانن أكتر، لكن الحلو بيمشي بي سرعة" واحد مننا لحق يقول كلمة :confused::confused: ...



يا حتبدا قريب عندي


هيي كدي خليني أنا..
كدي النسأل ناس البيت:(:(
...........

تعرف مرة وأنا مع أم البنيات وأخوهن.
أخوك مستلم الميكرفون وأغلبه نصايح ونقد وكلام جيل دناصورات لي شباب في مقتبل العمر..
آهااا "زينب" أكثرهن جرأة قالت:
يا أبوي ما لك كلامك بقآ كتير ذي أمي.. (أمها دي المسكينة أصغر مني كتير)

[بابكر مخير]

أتذكر لمن كنا صغار (والله العظيم، كنا صغار... "مرة مع محمد ولدي وما متذكر المناسبة لكن قلت ليهو، يا صاحبي كل البتمر بيهو حسي، دآ فيلم دخلناهو وكنا في فترة في نفس عمرك دآ" فدحن بالجد كنا صغار وشباب ورجال +فينا فايدة+.. نسد ونقد;)"
المهم!!
كان جدودنا ديمة شايلين حاجة تفرح الصغار، يا حلاوة، يا تمر، يا فول مدمس وما بيحصل أصلن تمشي عند حبوباتك وما يكون عندهم ليك شيتن يبسطك،
حتى لو خلااااااااااص ما عندها شيء، تمسكك وتضمك بكمية من المحنة، تشبعك وترويك وتفرحك..
حبوبتنا نفيسة بت أحمد أصولها مصرية وأهلها إستشهدوا في سقوط الخرطوم على يد الثوار (في ناس بيقولوا فتح الخرطوم وناس بتقول سقوط، أنا من أنصار سقوط لأنها الخرطوم أصلن سودانية وإستعمرت لكنها من بعد كدآ سقطت في يد الثوار الوطنيين) وطبعا منتشر بين الناس الرابط بين الثورة المهدية وأنه دعامتها من غرب السودان.. في الوكت أنه الخرطوم سقطت وكانت القوات أغلبها وعلى قول أهلنا الغرابة (ناس البحر) الياهم ناس ود النجومي وجدنا أبقرجة (دناقلة سآهي)..
ما علينا وما نثير نزعات عنصرية نرجع لي حبوبتنا نفيسة مليجي،،،
كنا لمن نجي مع أمنا "مدينة" الله يرحمها تلك المرأة الجميلة، القوية والمكملة الكرم كله،، تقابلنا أولن تبادي بقولة: مدينة جابت "الجهآدية بتاعينآ" ولكن معا هذه المقابلة المحبطة إلا؟؟ ما كانت بتقصر ومن تحت المرتبة بتاعت سريرها تطلع لينا الحلاوة. كانت بتستمتع تشوف الزول يأكل الحلاوة. ما هي مسكينة كانت عندها سكري...
لمن أكون بكتب في موضوع وأقوم أسرح ليا في مداخلة ضمن موضوعي ذاتهو، بتذكر الحبايب الغائبين، أبو قاسم وأم قاسم..
آها الوالد عليه الرحمة كان ممتع لمن يحكي ليك قصة وكان عنده إسلوب عجيب في التشويق،،،
بيحكي ليك بصوت هآآآآآآآدي ومنخفض فتلقى نفسك مركز بشدة وقمة التمتع،، آها يقوم يدخل ليهو في موضوع جآنبي..
الوالدة عليها الرحمة؛
"هآ يا أبو قاسم ما تنطط لينا كدي، خلص لنا القصة بالأول"
حليلهم كانوا أحباء وأصدقاء بينهم ومع الناس كلهم.....

[معتصم الطاهر]

تقول تلبس بنطلون فيهو لمسة "إستايل" ويتسلط عليك زول: يا أخي البنطلون دآ ما مناسبك في العُمر دآ.
..
د فارد لسانه في الخلق:
الكُبر


أها انا البناطلين الما مناسباني دى كلها هدايا البنات و امهن ..
يكونوا دايرين يبهدلوني ؟؟؟

[بابكر مخير]

يا الجيلي
قاعد تقراني؟؟؟
تعرف إخترتك ليييييييييييييييييه!
ما عشان محبتي ليك وبس،
لكن
لأنك زول جآد في قرآياتك....
وإن أنا قدرتا في إثارت إهتمامك
بكون نجحت وممكن بعد كدآ
أوقف وأرتاح..
تعرف حكاية خلق مواضيع. شيتن صعب تب..
:cool::cool:

[معتصم الطاهر]

ب
صديقي وهو في عمر بناتي، قال ليا:
تعرف إتا المندولا (كفتريتي) دي فتحتها عشان تملى الناس نضمي....
دي واحدة من القدرات التي لو لم تكن ملكك، قطعاً حتكتسبها في "الكِبر";)

العزيز بابكر

عارف كل فترة ادخل البوست دا وأقرا وبعد الاستمتاع بالقراية اضع نفسي في الميزان عشان اعرف أنا وصلت وين ... ماشي في الدرب كويس ..بس حكاية النضمي دي يخيل لي يا بدت يا حتبدا قريب عندي ... ربنا يديم عليك نعمة الصحة والعافية ان شاء الله
مودة وتحيات

و فى درب الكبر ..

يبدأ بالكلام الكتير

ولا الحكاوى

ولا وجع *****"القلب/ركب/بتاع الخ ..." البتاع داك ما بيوجع فى العمر دا ..

[بابكر مخير]

و فى درب الكبر ..
يبدأ بالكلام الكتير
ولا الحكاوى
ولا وجع *****"القلب/ركب/بتاع الخ ..." البتاع داك ما بيوجع فى العمر دا ..

هندزآ الحبيب
سلااااااااااااااام وشوق،،
الكُبر لقيت أنهو شيتن جوآ الدماغ بس شوية حركة، حركتين كدآ ونتحل منهو
حتى "البتاع داك:confused:"
تعرف يابا، عزيزة أختي حكت ليا؛ أنها يوم مع أبوي وهو في الثمانيين من عمره (بالمناسبة الوكت دآك كان لساتهو بيمشي يوم الكلية ويحاضر في قاعة المحاضرات في الطابق الأرضي ويرجع مكتبه في الطابق الثالث "كلية الصيدلة ما فيها أسانسير")..
قالت، قال (تعرفي يا عزيزة، مش حسي أنا عمري فوق التمانيين لكن برضك لسة..)..
دحن يا أخوي؛ تفاؤلوا لتصيبوا ما ترغبون ;)
بهديك قصة إمراة،،،
بعد شاب دخلو الكتاب، نجح وظفر ولساته بعد التمانيين تعطي....
https://vimeo.com/17161388

[بابكر مخير]

يوم ذي دآ
زمان كان جدي بابكر بيكون على رأس القائمة
رحلة في يوم شم النسيم إستمرت، إتوارثناها..
شئ مشتل الخرطوم وشئ الجزيرة تحت الكبري..
بالله العظيم اليوم دآ كان ليهو نكهة وفرحة
كان عيد من أعياد السودانيين
ما عيد الأقباط براهم....
دي حالة شنهو؟؟؟
كل شئ وقبله تجي كلمة؛
كان زمان
وإن قلت تتونس ليك مع دفعة،،
كل إسم يتبعه؛؛
الله يرحمه...
حالة صعبة وحاجة تقرف
أبو الكُبر ظاتهو....

[عكــود]

هندزآ الحبيب
سلااااااااااااااام وشوق،،
الكُبر لقيت أنهو شيتن جوآ الدماغ بس شوية حركة، حركتين كدآ ونتحل منهو
حتى "البتاع داك:confused:"
تعرف يابا، عزيزة أختي حكت ليا؛ أنها يوم مع أبوي وهو في الثمانيين من عمره (بالمناسبة الوكت دآك كان لساتهو بيمشي يوم الكلية ويحاضر في قاعة المحاضرات في الطابق الأرضي ويرجع مكتبه في الطابق الثالث "كلية الصيدلة ما فيها أسانسير")..
قالت، قال (تعرفي يا عزيزة، مش حسي أنا عمري فوق التمانيين لكن برضك لسة..)..
دحن يا أخوي؛ تفاؤلوا لتصيبوا ما ترغبون ;)
بهديك قصة إمراة،،،
بعد شاب دخلو الكتاب، نجح وظفر ولساته بعد التمانيين تعطي....
https://vimeo.com/17161388
يا سلام علي الفنانة ستنا ..
وعليك، فمثلك لا يشيخ!

تحياتي

[بابكر مخير]

فمثلك لا يشيخ!

قالت الويكي أنه:
الشيخوخة أو التعمّر هي عملية الهرم والتقدم بالعمر والهرم عبارة عن اجتماع مجموعة عمليات خلل وظيفي (تلف)...
قلنا ما بنشيخ لكن واحد زايد واحد النجمع فيها يوماتي دي، مش ياها التقدم في العمر..
بالله لوكان الواحد يلدهو يوم وفاته ومن العمر الكان مات فيهو يبدآ بالتناقص
مش كان أحسن أقله ما بدل ما يحزن على الذي مضى، يفرح بما هو قادم...
يعني بعد دآ تبتدي السنون ترجع وتأكل اللحمة والشية والحاجات الطيبة، ترمي النضارات، تقوم من الصباح وتتراوى الخيمة منصوبة والفرح قائم ...
كووووووووكي..

[بابكر مخير]

تقول تشوف كورة قدم فيها فريقك البتشجعه مع فريق تاني وتعمل حسابك أنك ما تشوفها مع الناس عشان لو فريقك خسر، تتلقاها بي سترة حال. تقفل باب بيتك عليك وتقعد برآآآآآآآك مع الشيشة وطبعا الحذر يفرض عليك الإمتناع عن المنبهات. لكن الشكولاتة قالوا بتهدئ الأعصاب.. تخت ليك كم صباع بتاعت كيت كآت..
تلبس هدوم فضفاضة عشان ما تزنق :eek: والكرسي تعدل وضعه بمخدة بي جآي تريح فيها الرأس وواحدة تانية لزوم الإتكأة..
وثيرموس بتاعت هورليكس (بدون حليب لأنه بيعمل غازات، بالمناسبة أوصي القلة الممن هموا مثلي بالحليب خالي اللكتوز)، ما برضك الشعير بريح، بس مش كل شعير أصله المخمر دآك ربنا بي قدرته وقنا منه...
طبعاً يتخيل ليك أنك حضرت كل الذي منه إلا مشكلة وااااااااااحدة ما ليها حل وبتستوجب أنك تقوم من وكت لي وكت (هو برضك الكويسة أنه لي حسي والحمد لله ما ضربنا السلس).
إجمتعت كل العوامل والتلفزيون 50 بوصة على بعد أقل من ثلاثة أمتار (قال كيف: بينصحوا أنه الإشعاعات المرسلة من الجهاز خطرة)، let be إحنا ما خلاص المهم الواحد يشوف.
ضربت البداية والململة تبتدي، الدقيقة 7 تووووووووووووووش قول في مرمى فريقي بعد ما الفرثيق التاني كان نفروض يكون عليهو لمسة يد نتج عنها باصة وواحد صفر، آهاااااااااااا قول شنهو الما قلتهو؛ الحاجة الوحيدة أني ما سبيت ليهو دين. ما "له دينه ولي دين"..
نفس من الشيشة وجغمة والدقايق ما وصلن ربع الساعة وفريقي لساتهو مزنوق، قلتا أقوم للذي منه ما الخوف بيتسبب في "التبول".
شوتك الشيشة ودفق الموية والفحمات في الواطة، دنقرتا قلتا أنظم الحال. الضهر إنشمط، "أها السبة المرة دي كانت مقعدة".goood
َرب التلفون ولقيتهو واحد صاحبي، أكيد عايز يشمت، هو أنا قفلت بابي عليا عشان خوف من الشماتة،،
ختيت التلفون في الصمت، بالله عليك يادوبك إتذكرت أني خاتيهو صامت..
كدي النشوفه...
لا حول ولا قوة إلا بالله 12 محادثة فاتني و3 واتس آب...
كويسة أني واحد من الوتسابا فاتني وكتها.. كان من خديجة الحفيدة، قالت ليا اليوم وتشيلسي ومان يونايتد، بس u goina lose jedooh :mad::mad::mad:

[Abdullahi Gaafar]

العزيز جدا بابكر
تحيات ومودة
عارف الليلة من الصباح قررت انو ابدأ رحلة التقاعد عن العمل ايا كان ما يجلبه من مال والاتجاه لأقصى الشمال لي قرية صغيرونةعلي النيل اسمها الطريف
حبة زراعة وغنيمات والخلوة جنب البيت
أها ننتظر مراحل الكبر الخطيرة هناك وبنلقي الناس النملاهم نضمي لما يامنو
يعني يا بابكر لي آخر السنة دي كان ربنا مد في الايام بكون هناك ومرة مرة بادخل بوستك دا واحكي ليك بالمستجدات
تحياتي

[بابكر مخير]

العزيز جدا بابكر
تحيات ومودة
عارف الليلة من الصباح قررت انو ابدأ رحلة التقاعد عن العمل ايا كان ما يجلبه من مال والاتجاه لأقصى الشمال لي قرية صغيرونةعلي النيل اسمها الطريف
حبة زراعة وغنيمات والخلوة جنب البيت
أها ننتظر مراحل الكبر الخطيرة هناك وبنلقي الناس النملاهم نضمي لما يامنو


إن شاء الله ليك في كل خطوة بركة.
دكتور حاكم عبد الرحمن حاكم شقيقي الأكبر ورئيسي السابق وإن سمح ليا صديقي العزيز..
خلص من هنا وقال ماشي السودان نهائي، قلت ليهو يا سعادتك، مآك خايف من مشاكل الدنيا المؤدية الي ما لا يحمد عقباه،،
قال متل شنهو..
قلت ليهو الأسوء..
قال كيف..
قلت ليهو عندي عدد من خوالي كبرو في السن منهم من إختاروا الرضوخ للمعاش ومنهم من عصر نفسه وإستمر في العمل حتى لو بس عشان يشغل نفسه...
بابكر بدري قال؛ أكبر شغلة قلة الشغلة...
آها ديك الرضخوا، دبرسو وبقية أيامهم في عزلة حتى أخدهم الأسوء والتانيين، بالله عليك عاشو فوق عمر الكِبر المتعارف....
حسي أنا بتحايل على القصة دي،
نزول المعاش ذي النزلة البعدها الزول بين عاش وما عاش...
بتمنى ليك طولة العمر يابا
بس أشغل نفسك وما تبقى ناس قولة،
عنقريب هبابي
ولا ناس بس الفروة...
برضك بتجيب الخبر...
كيييييييييف.
في واقعة أمدرمان والإنجليز بدو في ضرب قبة سيد الإمام المهدي عليه السلام..
سيدي خليفة المهدي، فرش فروة صلاته وقعد وقابل القبلة وقال لي رفاقته؛ نستشهد هنا يعني رضخ للمصير، يابا ود مخير "أمير البادية" إعترض مسكه من كتفينه وقوموه وقال ليه؛ نمشى نغربوا ونتلم صاديين...
إتنينتهم جدودي واحد رضخ والتاني عزيمته قوية..
برضك المحتوم لما فيهم الإتنين في أم دبيكرات، سيدي خليفة المهدي أستشهد بعد رضخ وكرر قعدة الفروة وجدي يابا ودي مخير، عاش بعدها سنييين ورزق بي 3 بنات وولد بعد ولدياته ال3 وبنيته...
دحن يابا
هناك الغنيمات منهن رزق وإنشغالة، الخلوة تحمل معناها في إسمها والزراعة نشاط وحركة..
شوف الفيهن عمر وعافية وأبقآ عليهن عشرة...



يعني يا بابكر لي آخر السنة دي كان ربنا مد في الايام بكون هناك ومرة مرة بادخل بوستك دا واحكي ليك بالمستجدات
تحياتي

يديك العافية وإن شاء نتقابل في الأفراح وقطع شك طلتك ديمة بترد الروح
سامحنا على وكتك البنضيع ليك فيهو دآ:(
شئ هترشة وشئ حق عواجيز "ممحوق" :eek:
كووووكي (أبازر عكود) الحق.....
بالله ما تنقطع يابا
ومحبة :cool::cool::cool:

[بابكر مخير]

معايا هنا في العمل، شاب حلو وأصيل من أولاد العين.
قال بيسألني: عنده عربيتين واحدة رباعية الدفع وهي البيستعملها في البيت والتانية ألتيما وبيستعملها للترحل الي العمل وللعين في الويك أند وكان إشتراها بالتمويل، بس لقى ليها شاري بي ثمن بيغطي حق البنك ويطلع ليهو قرشين وهو حيكون عنده دورة لمدة 6 شهور، فهل يبيعها ولا يخليها عندهو..
قلت ليهو الخيارين صعبين لأنك لمن تخلص الدورة حتحتاج لي سيارة وكمان لو خليتها وبتستعملها لستة شهور وقفتها خسارة.
قال: إذن أشوف الوالد رأيه شنهو؟؟
هنا قلت ليهو:
الوالد وأنا في عمر مقارب حسب ما ديمة بتقول ليا وإن سألت الوالد ولو عندك مية سيارة (قوولت سيارة ما بحبها، لكن كمان العربان عندهم حساسية لمن تقول "عربية" والولد أنا بعزه وعشان كدآ نقول "سيارة") والدك قطع شك بيقول ليك ما تبيع ولا واحدة..
لييييه...
مع الكُبر السيكلوجية بتاعت الأنسان بتتغير تلقاهو مربوط بكل قديم، لو عندك مركوب أو ركوب ولا حتى مركب وخلاااااااص مضى الزمن عليهم، أكل نورهم وشرب رونقهم. برضك هم عزاز عليك.
كدي بالله كل واحد ممن هم لساتهم ما وصل العمر دآ، يشوف الحوالينه من ناس عمري وتمسكهم بي القديم.
طبعن ناس إحنا ما ياهو الكتب عنهم روفي "التاريخ مجرد كذبة متفق عليها (منقول)"
التأريح ما إحنا ظاتهو...
بس برضك ناكرين...
حبوباتنا تلقاها ململمة صرر صرر جدودنا عامل ليهو شنطة كدآ لو فتحتها تقول بس يمرق ليك منها "جن علاء الدين"..
حسي أنا، أمس القريبة دي، عندي بنطلون كوردروي أخضر، إشتريته يومين قبل أجي الإمارات 2007، لبسته المغربية، بالله عليك ظاتي إستغربت أنه لساتهو في..
______________
لا لا لا!!!!!
دي قوية ولازمن عليا بصدق البيكتب لي ناس بتقراني أحكيها...
بعد رجعت من المكتب، أكلت ليا وجبة كآآآآآربة (كوكي!! واخد بالك) لسة الواحد والحمد لله والشكر بي عافيته والبطن حوية، فطور وغدآ وعشاء ما تيسر.
آها بعدها حيلي أنبتا وحوالي ذي الدختا ورحت في نومة، صحيت ذي الساعة سبعة إلا ربع هي مساءا وأنا مفتكرها صباحا ومتذكر أنه مدون بتي جآية من لندن الساعة 2 صباحا...
قمت من السرير ومنزعج ليييه ما صحتني لمن وصلت ولساتي مفتكرها صباحا اليوم التالي، آها في كورة الريال مع البايرن وقافل أني حأشوفها، برضك حسب حساباتي أنها فاتتني..
مسكت التلفون عشان أضرب لي مدينة في تلفونها بتاع أبوظبي وأتاكد أنها وصلت وإذا مشت هوتيل لأني ما فتحت...
يا زول تلفونها مغلق ما هي في الطيارة..
طيب كدي النشوف نتيجة المبارة في موقع كورة دوت كوم..
يفتح معاي على أنه مباراة اليوم.. بعدم ثقتي في حق أهلنا العرب، قلتا يكونوا ما حدثو التأريخ...
البس وأتلبس أمرق علي العربية، وأضرب تلفون لي بتاع كفتيرية الشرطة عشان أمر أخد سندوتشاتي كالعادة وما في رد. يا زول برآ أشوف ليك الدنيا ما شكلها صباح. دآ شنهو الحاصل يا ربي..
تاني قلت أضرب للكفتيرية ومصر أنها الصباح، أنبهت لي التأريخ في التلفون واليوم 18...
لا يا بابكر
قصة مطرشقة وكدي روق وأحلى...
وبعدها عادت الحياة لطبيعتها وشفتا الكورة ومدون وصلت بالسلامة ويا دووووووبك اليوم هو 19 أبريل....
بس تاني يحرم عليا الوجبة كآآآآآربة بعدم المكتب...

[بابكر مخير]

ترجمتها "أولدو وفي أولادكم موتكم"، "جيبوا الجنآ البيجيب خبركم"
آهااااااااااااا
أمس وذي ما قلت مدون معايا من أمس الصباح. تعرف هو كان الواحد بيصلي الصبح ولا نقول الفجر حاضر، ما كان عليا الحصل مساء أول أمس المغرب لمن إختلط عليا، الأبيض مع الأسود..
مدون جات في مهمة عمل رسمية وهي دايما بتجي قبل رمضان تشيل كوتة "الحلو مر" ليهم في لندن..
كل مرة بتمشي برآها تجيب الكوتة من مصنع "الخيرات السودانية" في أبوظبي، المرة دي تطوع بتاع المصنع أنه يوصله للبيت، جآ ومرقتا أشيل معاهو الكوتة وكانت 40 كيلو في كرتونة.
الشقة قدامها اربعة عتبات، الأولى عدت وبعد التانية، حق الكُبر هجم بلا رحمة وبهوادة و"أُردلوب" خميت الدلجة بس الحمد لله ما أمس حضرتا كورة الريال مع البايرن وشفتا كيف بتاعين الكورة المحترفيين بيوقعوا متفادين الإصابة، الحمد لله وبقدرته، عملتها ةةقعت بالطريقة الحريفة دي وبرضك يكون ساعدني في النجاة طوق النحافة.
يعني نتصور كان "إدجيت" علي (صلبي) وإتهبش الحوض العضمته مسوسة ولا وقعت علي الكتف الخالي من لحمة تحميهو ولا عضلة تقويهو.
كان قطع شك الكسور تنوعت وتعددت والمشفى شرفه زولن وصفات مرضه أكتر من شعر رأسه..
كسر في الحوض، كسور متنوعة في الكتف، كسور في القفص الصدر "الكستليتة"، إهتراء الطوحال، إنشرط الحاجب، نفس في الرئتين "الفشفاش على قول ناس المرارة" تصدع في الجمجمة وخليك من كمية الأصابع الإتلولوت.
دآ كله يعني الرقاد في السرير
نتيجيته؛
قرقرينا، موية في الرئة، الإلتهابات، طفح جلدي..
المدة كمين يوم لمن الواحد يتفسجح...
دآ كلهو ناتج "الولادة"
العزاء بيكون وااااااااااااااااحد في حالته أنه!!!!!
تيم معالج من أوكرانيا :eek:

[Abdullahi Gaafar]

بابكر ياخوي
شي وزنو اكتر من خمسة كيلو ما تجازفو .. والخمسة كيلو دي زاتا بعد سنة ربنا يمد في أيامك نقصا لي اتنين كيلو ... أها لامن تصل نص كيلو... بعد داك بطل تشيل اي حاجة
وبعدين حكاية السلالم دي برضو لي قدام بتبقي خطرة ... السكن مع الواطة أخير
ياخوي ضلمت الصورة شديد الله لا جاب ليك عوجة

حمد لله علي السلامة

[بابكر مخير]

:cool::cool:

[بابكر مخير]

كل ما تكبر في العمر، يزداد إزعاجك للبشر، نأخد قولة:
الفتنة نائمة!!!
في النوم هدوء وسكينة،
قالوا واحد أمي مطرطش ومدعي المعرفة، سألهو عن الصلاة!؟
قال هي قفة خشبة وفآر....
"وقفة خِشية ووقار:("
ما علينا:p
"في سكون الليل" في المدن يعكر صفوه المكيفات والعربات وحاجات كتيرة بس تتحايل عليها كيف؟
أنك، تقفل منافذ مكان نومك وتستعمل تكييف مركزي وتستمتع بنومة هاااادية.
في الريف والبادية، أصلها الدنيا هادية وإن كان في أصوات حتى بتكون قليلة، ما الياهو إلا من الطبيعة، نسمة ولااا صوت ورق الشجر، ما هو حتى الطيور تروح في ثبات..
لكن إتحايل قدر ما تقدر، كان في المدن ولا الريف والبادية. شوقك في نومة هادية لو قريب منك أو في دائرة سمعك نايم زول عجوز...
سدسد قدر ما تقدر من مخارج الأصوات، بي فلينة ولا أستوبآ،،،، شئ شخير وشئ تاني من مكان تاني وحتى لو قدرتا يجيك الصوت من داخل اأحشاء..
عينة من معكرات صفو نوم البشر......

https://www.youtube.com/watch?v=4pjOIFkzWwU

[بابكر مخير]

حاجة تغيظ
عشت فيها وعايشتها وعشت بيها وعشت منها
وبعد دآ كلهووو
يجيك زولن
لا هو منها ولا فيها ولا بيها
ينظر...
حاجة تزعل وتوتر وتقول بس توصلك الموت...
مثلن..
أكتوبر، رجب/أبريل
الإنقاص، بيوت الأشباح
هجرة قسرية، تغرب بالغسب ولجوء بي رخاسآ...
وتلقى أسياد جدد للقضية
في الهمبريب وكت ناس متحرقة بلهيب الصيف
أعياد الآضحي والضبايح والضبان والأمراض المعوية وخاصة لو وقع في الخريف وهناك هم في عيد ميلاد وجليد ورأس سنة وزينة وبهرجة وبسموها ما معناهو "فترة الأعياد"
وبرضك بنظروا...
مثلن، يعني مثلن كدآ زول يقول ليك:
لو البشير يطير، يغور
حا أعرس تاني فرحة
واحد يقول لو يمشي. حا أعمل شيتن في حياتي ما عملته
ذي ما إتقال قبل: ما حأربي شعري لغاية الإنقاص يمشي...
هيئ!!!
لكان دآ كله دخله شنهو بالهم والغم العايشين فيهو دآ
وإتا أصلك ولا أصله ولا أصلهم
ما عاشوها لحظة
لا دي، لا ديك ولا ديل...
الله يحرق دمهم
ذي ما بيحروقا في دمنا
لا والمدهش
أنهم أغتربوا وهاجرو ولجئو
لمال مرغوب وعيش رغيد وحسانٌ وحور عين كأمثال اللؤلؤ المكنون
:mad::mad::mad::mad::mad:
شيتن يغيظ وأثقل من أبو الكُبر ظاتهو...

[بابكر مخير]

تصحى الصباح وتدخل الحمام، تغسل وشك،
بالله عليك دون مراعاة أنه إتا برآآآآآك في البيت ولا معاك ناس،
الناس دي نايمة ولا قايمة
ولا بتعمل شنهو حسي.
ما بيهمك!!!
لا ما إتا بقيت كبير ومزعج وعلى كيفك...
آآآآآآآآآآآخ، خووووووووخ، إتش إتشوم....
أصوات على دين كيفك
يعني ممكن زول بيأكل وإتصور!!!
الأصوات الخارجة من عملية إخراج الإفرازات من المنافذ العليا.
وليكن هو ما هو أيتها لون، أيتها كثافة....
قرف مش كدآ؟؟؟
وأنا أبدن ما شاعر بأنه كدآ!!
ليييييييييييييه
لأني بعملها بي عفوية تامةgoood.
ما أصلن الواحد بيكون مزعج "بإمتياز" في العمر دآ...
الخواجات ممكن يكون قاعد في طاولة الطعام وعآآآآآآآدي (يطلع منديله "إحنا دآ ما بنستعمله في وكتها، سآكت بس وسك) ويبقآ يتصرف وكأنه من جماعتنا، خوووووووخ، خوووووووخ.
بس في ثقافتهم ما فيش فيها حاجة وحتى ديك تلقاهو الواحد ينعدل بي جنبة تسهيلا لعملية والإطلاق وتفاديا لأيتها صوت "جهوري" مرافق لإخراج الصوت الطبيعي "ما في دآعي نكتبه بالحروف:) بس بتبدآ بي حرف "الطاء""..
بعدين في نحنحة كدآ ممكن تستمر وتتواصل وتيرتها لمدة من الزمن وفي أيتها وكت وما كان من مكان.
يا أخي دي مزعجة بشكل، لكن ناس إحنا ديل من كُتر ما بنستعملها، ما شايفين فيها حاجة...
ومع حقيقة أنها حاجة سخيفة، لكنها مريحة:(:(

[بابكر مخير]

ذي ما قلنا في أماكن وذي ما قالوا وعلى رأسهم ود خالي بلالي شوقي بدري وعلق عليها هندزة عمدتنا معتصم وكلنا أجمعنا عليها في الحقيقة،
أننا السودانيين مشاترين، اللبس فينا أشتر، مشينا في الواطة أشتر (بالمناسبة ليه شوووووق كتير "أشتر، أبو العقل") شوفنا أشتر كلامنا أشتر. إلا في حاجات كدآ لو تلاحظها تلقاها قدر ما هي شترآ لكنها برضك متوافقة..
أمسك أصوات أهلنا ناس الجزيرة (مجازاً؛ أهل العوض) تلقآ صوتهم متشابه عكس مثلأ، (ودون وجه شبه) الصعايدة..
أهل العوض حآآآآآد وعالي والصعايدة ملياااااااان وواطي.
شتر إحنا في أكلنا وطريقة أكلنا وصنعهو برضك. شتر درجة أنه الأوتكيت دآ في قاموسنا مافي..
يومتها كنا في مطعم وكان في الوجبة دجاج مشوي، طبعا إستعمال اليد في حالات كتيرة مسموح حتى في أرقى طاولات الدبلوماسية العالية "قالوا زمان خرتشوف وفي طاولة كنيدي، خمش الدجاجة وبيده فككها ولهطآ ومنها عرفت هذه الطريقة في الأكل بال (خرشفة)".
حتى هنا والمشهد مقبول نوعا، إلا الطبظة حصلت لمن تمسك طرف الفوطة المفروشة في الطاولة وتمسح بيها إيدينك، ما المطعم ما كان فيهو زولن بيلف بي طشت وإبريق موية لزول الغسيل...
بالله زمان دي كانت مؤزيانا بي شكل، عند المناسبات كانت دي مهمة الصغار ويومك أسود لمن يقع ليك في حظك زولن سآآآآآآآآآآآآآآآآآآآل. دايمن القصة تبدآ، ولد منهو وتختتم بي ترتيبك في الفصل،،، يا أخي ما خلاص أكلتا، غسل وإتوكل لزومه شنهو الأسئلة المحرجة دي :( ..
المهم
حكاية شترتنا دي بتزيييييييييييييد مع الكُبر....
المش الأشتر بيبقآ شين وضحكة
الأكل الأشتر بيبقآ مزعج ما الخشم خالي سنون واللعاب مع اللقمة والخلط صوتهم مقرف
والكلام مش أشتر لكنه مؤلم للمتحدث وبلوة للمتحدث اليعه، ما هو مع كل كلمة طرطشة ورزاز. بالله عليك إلا تعمل "وآقي":eek:

[imported_أمير الأمين]

بالله زمان دي كانت مؤزيانا بي شكل، عند المناسبات كانت دي مهمة الصغار ويومك أسود لمن يقع ليك في حظك زولن سآآآآآآآآآآآآآآآآآآآل. دايمن القصة تبدآ، ولد منهو وتختتم بي ترتيبك في الفصل،،، يا أخي ما خلاص أكلتا، غسل وإتوكل لزومه شنهو الأسئلة المحرجة دي


فى الابتدائية كنا شطار ..أها بنتكيف جدا للمواقف الذى دى
كنا بننداح لما السؤال يكون عن ترتيبك فى الفصل ؟ تقوم بعزة
ونفخة صغيرونة كده تقول ليهو ترتيبى كدا..!! تكون منتظر شلال
المديح ..داك .. ما اصلك ود فلان .. و خالك فلان وعمك علان

الله يطول لينا فى عمرك فى طاعته

[imported_نسايم]

عمو بابكر انا بقيت اصلي قاعدة
ولما اقيف فترة طويلة الا اخد لي مدة كدة

[بابكر مخير]

الله يطول لينا فى عمرك فى طاعته
في دي يابا
آميييييييييييييييين :cool:

تكون منتظر شلال
المديح ..داك .. ما اصلك ود فلان .. و خالك فلان وعمك علان


وفي دي برضك تقوم تقع ليك في زولن نبااااااااش ويفك ليك المكتوم من العلوم..
بالله خالك فلان دآك لمن كان معانا في الخلوة، كل يوم الفكي رابطه ومدينهو كم جلدة "أم فلقة" وعمك فلان، مش قلتا ليا أبوك فلان الفلاني الله يرحمه (ويكون أبوك معمبب بكل صحة وعافية) عمك دآ والله ما كنا قايلنهو ظاتهو يخلص الإبتدائي، من يوم دخلنا وهو الطيش لكن أهو عند ربه بعيش وحسي قروش. وإحنا البنستاهل ديل ظلمتنا.. غايتهو دنيا بس :mad::mad::mad:..
حسي في لزوم لي كلام الزول دآ، بس إلا ياهو حسد سآآآآآآكت....
قولتا قبل كدي عن الحبيب وقولو: ناسنا حاسدييييييين. ما عشان "الحسد" بي معناهو لكن لأننا من قبيلة (بنو حآسد) الهاجرت كلللها من الجزيرة العربي وإستوطنت السودان...
;);););)

[بابكر مخير]

عمو بابكر انا بقيت اصلي قاعدة
ولما اقيف فترة طويلة الا اخد لي مدة كدة

حقك دآ يما
ما بسموهو الكُبر goood
دآ يا هو الدلع..
عزة وغلاوة..
علو مكان وزيادة ميزان في الحسنات..
تقلة ومعزة..
كيييييييييييييفك
وطمنينا عليك...

[بابكر مخير]

قول كِبرتا، عجزتا أو حتى هِرمتا..
بس شباب الروح بيغلب الوهم ديل كلهم..
شوف مثلن،،
ترامب وهو طبعا دفعة (عُمر)، مرته عارضة أزياء،، ممشوقة القد، ملفوفة القوأم، بهية الطلعة، حسنة المنظر. تختال الهوينة في مشيتها "الورثتها من مشيت القط من زمن عرض الأزياء" تحسن المكياج، تتبرج بإحتراف (التبرج معناهو الميكآب، بالمناسبة فلا يساء الفهم). كانت إن عرضت ملابس بحر أو سهرة أو عوم في نهر...
تقهر.
زولن دآ!!!
الباقي من شعيرات بصفصفن في أغلى كوافير رجالي ويشد الوش عند أعتى جراح تجميل ما يفرق نسائي أو رجالي، أتذكر لمن شوفته يوم آداء القسم نط للمنصة ذي حمل الخريف "أنا متأكد أنه دفع التمن غآلي في نهاية اليوم مما أصابه من أوجاع وآلام"
لكنهو في كل حآل غلب الكُبر حتى ولو لحين... وهي دي نظرية الما بغلبك بقويك..
الكُبر ما غلبه وقواهو لمن حقق طموحه وبقآ رئيس أقوى دول العالم..
برضك أريكا دي تحير
ديمة بالجديد
أصول أفريقية ترأسها
مقدم بتاع منافسات رخيصة وفارغة (المصارعة الحرة) بقى رئيسها
ما تعرف بكرآ
منهو؟؟؟
أخاف "التون جون"
كوكي؛
طبعن اليوم إكتشفت أنه من بين البيقروا هنانا
عنصر "فخري"
فعليه إطمئن
لن يكون هناك من الذي منه
لكن برضك "do not take me for grant"
ما هي بعض مرات بتجي عفوية:eek:








أو عن قصد :cool::cool::cool:

[imported_أمير الأمين]

قول كِبرتا، عجزتا أو حتى هِرمتا..
بس شباب الروح بيغلب الوهم ديل كلهم..
شوف مثلن،،
ترامب وهو طبعا دفعة (عُمر)، مرته عارضة أزياء،، ممشوقة القد، ملفوفة القوأم، بهية الطلعة، حسنة المنظر. تختال الهوينة في مشيتها "الورثتها من مشيت القط من زمن عرض الأزياء" تحسن المكياج، تتبرج بإحتراف (التبرج معناهو الميكآب، بالمناسبة فلا يساء الفهم). كانت إن عرضت ملابس بحر أو سهرة أو عوم في نهر...
تقهر.
زولن دآ!!!
الباقي من شعيرات بصفصفن في أغلى كوافير رجالي ويشد الوش عند أعتى جراح تجميل ما يفرق نسائي أو رجالي، أتذكر لمن شوفته يوم آداء القسم نط للمنصة ذي حمل الخريف "أنا متأكد أنه دفع التمن غآلي في نهاية اليوم مما أصابه من أوجاع وآلام"
لكنهو في كل حآل غلب الكُبر حتى ولو لحين... وهي دي نظرية الما بغلبك بقويك..
الكُبر ما غلبه وقواهو لمن حقق طموحه وبقآ رئيس أقوى دول العالم..
برضك أريكا دي تحير
ديمة بالجديد
أصول أفريقية ترأسها
مقدم بتاع منافسات رخيصة وفارغة (المصارعة الحرة) بقى رئيسها
ما تعرف بكرآ
منهو؟؟؟
أخاف "التون جون"
كوكي؛
طبعن اليوم إكتشفت أنه من بين البيقروا هنانا
عنصر "فخري"
فعليه إطمئن
لن يكون هناك من الذي منه
لكن برضك "do not take me for grant"
ما هي بعض مرات بتجي عفوية:eek:








أو عن قصد :cool::cool::cool:

هههه بالله اديهو بالحتة الفيها الحديدة

[بابكر مخير]

صاحب مصلحة، تجامل وحتى ممكن تنافق
محتاج لي حاجة، تراضي وحتى تكلف نفسك بالغالي
شيتن عجبك، تكضب
خفتا من أمر، تنبرش في أم جاد الله (حكايتها شنهو أم جاد الله دي؟؟)
زعلت وما قادر تفكها، تكتمها لمن تجيب خبرك...
دآ كولهو،،،،
أيام زمان بس متبلين بيها حسي الأصغر سنا ومجازاً؛ الأجهل تجارب.....
حسي!!
ظُّز فيها
الواحد بايعها ...
شنهو يعني
إترفدتا، بتبقى زول معاش
ما لقيت العجبك، ترضى بالمتوفر، ما هو كله ما ليهو طعم
في الفينا دآ، ما بتدور شئ غير شوية صحة تمشي بيها الحال ودي والله ما تلقها إلا منه الباري، المتعالي...
خوف شنهو البتخافهو وإتا خلاث زول حصاد،
لكن المشكلة
أنه في ناس، تنسى أو تتناسى
وكأنها حقين الليلة وراجين بكرآ
طمع في الدنيا
وعمل للدنيا
نميمة وكضب وشتيمة وناسيييييييييييييين العملهو :(
وياهم؛
يا من جلست ذنوب الناس تحصيها
أتخفي ما اقترفت يداك أم نفسك تعزيها

[بابكر مخير]

تشوف حواليك
تلقى كتير من الأشياء، لونها غيرك الكان، ريحتها مختلفة من سابقتها، شكلها ما الياهو، طعمها مذاقه تاني.
تقول الحواس هي العندك إتغيرت، شاخت حتى إختلت مقاييسها ولا المعايير إتلخبطت وتبقى تحاول تصل لي تفكيك اللغز....
تلقى الحكاية؟
فعلا
طعم اللبن الحليب ما الياهو زمان لأنه دآك كان معروف حاليا ب "organic" والحسي الغريبة أنه ما نفس الكان زمان لكنه شوية أقرب، بس سعره أغلى وزمان كان المستورد من غير "الأورقنيك" هو الأغلى سعر..
ضوق ليك طماطماية من بتاعت حسي بشكلها الموحد، التقول من الصين، شكلها وااحد ولونها واااحد ودن نكهة ولا طعم، بالله بس التقول بتأكل ليك في خيار لونه أحمر وفيه بذرة،،
زمان كانت لمن تعشرق ليك مويتها لمن تسيل بجانبي خشمك ودآ طبعا الأحمر أما فرد عائلته من الطماطميات الأخرى نلقى البذنجان والشئ دآ زمان لو في تجويف خشمك فيه آيتها خدوش، تنصح بأنك تتجنبه لأنه ذي الشطة وخليك البذور التي لا يمكن أن تحصى ولا تعد وتلك أيضا لو دورتا تنعم بيها تمشي محل بيع الخضار "الأورقنيك" المتواجدة فقط في السوبرماركتات الكبيرة وثمنها اغلى، حسي تلقى البذنجانية أكبر من البطيخ "الأورقنيك" ولحمتها خالية البذر --- (العنب المصري فيهو نوع البعملوهو زبيب "بنقول ليهو؛ بناتي" وهو خالي البذر؛ بتذكر أحمد أخويا جاني متفقدا لوضعي الكان أيامها مزري في القاهرة (لجوء بي فلسهو) وكان كل يوم يمشي يشتري ليهو على أقل تقدير إتنين لي تلاتة كيلو من العنب دآ ويغسله بي الصابون، ظنيتهو كان غسله بالكلوركس خوفا من التلوث ويضربه بلا رحمة ولا هوادة، لمن رجع السودان جاته أعراض مرض مشى للدكتور وقال ليهو: عندك سكري بس نراقبه، بعد المراقبة والحمد لله طلع أنه سكري نتيجة أسباب عرضية (يا هو العنب البناتي المغسل بتاع مصر) ---
بتذكر في لندن وأنا شغال طباخ عند يوسف أخويا في مطعمه "المندولا" عملتا يوم الأكل كله من البذنجان،، لي الناس البتأكل لحم عملت "مصقعة" وللنباتيين (أوبرجين إسكلوب) والمقبلات كمية من سلطات البذنجان (شئ بالزبادي، شئ بالدكوة، شئ مع خلطة خضار ولسة نوعييين).
آها جاء موضوع التحلية "الديسرت" وحتى يوسف قال ليا؛ دي كييييف حتحلها يا دكتور (ديمة يطلق عليا هذا اللقب)..
آها حليتها أني عملتا بانكيك وحشيته بي ""مربة بذنجان"".
بس الحمد لله!!
أنه ما بذنجان زمان وإلا كان البذرة بشتنت المربة :rolleyes:

[بابكر مخير]

لمن تكبر والكضوم تدلدل والضراع يترهل وأطراف الجسم إلا تتلملم..
خلاص ما في شيتن بدس..
تقول تقدل في المشية، ركبتك تفضحك ودون مقدمة ترخي الرباط
تقول ترفع ليك قلم رصاص، رجفة اليد تفنهو ذي هناك
تقول شبعتا ، تهضم ليك بي ليموناضة ولا كولا؟؟؟
فرقة حسب الله، تزفك!! شئ نوبة وشئ بوق وبعض مرات حتى "الشيشة" لما تكون مخنوقة ويصعب (نفخها)!!!:eek::eek:
بس تقول كلارنيت..
تشوف ثمار قطوفها دانية في جنان عالية، يعني عصافير فوق الأغصان شادية وتقول تحاول.
تقول تأنس أو تتقرب في الله ما للشهوات...
الرزاز المنك يتطاير ذي رشق صواريخ بل من الراجمات
يفذذ الملآك من الجنة والشيطان من جهنم خليك حور عين..
خليك من دآ كله..
الحاجة نوعان، واحدة تنالها وواحدة تقضيها..
التنالها عايزة جهد وإجتهاد وحتى نقول؛ جهاد ;)
والتقضيها، برضك عايزة الجاهزية والأجهزة..
ديك الأولى مشكلتها أنه لكل مجتهد نصيب وإتا النظر، ما بيشوف يعني التنشين خفيف والرمي سجمان والتهديف ضعيف ويبقآ ما حتتم..
التانية البتقضيها، بالله عليك إلا تكون ملتزم بقواعد اللعبة، وتبعد من البطاطس واللحم الأحمر والرز وكل الممسكات والقابضات وتقفل على الملحات الويكتها لأيقوة ولزجة ذي زيت "توتال"..
بس:confused::confused::confused:
ما تكتر منها لأنه:
إن كبرتا قدها، بيصعب سدها...
باللون الأحمر، يعني الما بقدر، يبعد

[بابكر مخير]

في الكُبر نعمة وميزة ما بتتلقي بي هينة، ما هو المولى عز وجل،،
بيشيل منك أشياء ...
الجمال
الصحة
الفتوة والقوة
ويعوضك بي غيرها،،
أها "النعمة" المقصودة!؟
لو تقدر تصونها!! إنت سعيد
وإن إنفلتت منك؟ تبقى حياتك نكد...
هي في مضمونها ومعناها وحقيقتها..
الترفع عن الصغاير؛
المسامحة والتسامح؛
عدم الغلط؛ (دي بقى تتعارض مع واقع حياة العواجيز، ما كل زول منهم شايل خُلقهو في رأس نخرته،، بالله لو تعطس "تشو" تلقاها راحة... وهو أصله بيقول: العطسة هي وهلة من الموت، تتوقف فيها الحياة من جسم الإنسان وقولة إنسان دي يعني مش الجلكن :(:(:()
الكرم؛ قدر المتيسر (ودي مع الكُبر شوية صعبة، في الحقيقة ونسبة لنفسيات الناس الكِبرت بتسيطر عليها نوع كدآ من الرهبة والخوف تجاه الجآي "وهو أصله شوية، لكن التشبث بي القشة" أها تلقاهو زولك، عاض بالنواجز علي حاجاته، القرش دآ إن مرقه من جيبه، إلا يحكه ليك التقول بس يمسح الرسمة الفيهو، إن بقت بنكنوت يحركها لمن تبقآ أرقا من شاش الإسبتالآ..
قصدي الكرم بما تملك مما هو غير القرووووووووووووووووش،
مثل: النصيحة، المشورة الفكر والعلم إن كان متوفر :rolleyes: "يعني غير مادية no money"
الكُبر نعمته في تراكم السنين وزخم التجارب التي تحملها هذه السنين وإن ما شاركتها ونفستآ منها، كترتها وتخمها!!!
بكوفر بيك gooodgooodgoood....

[بابكر مخير]

إن كنت كذوبا، كن ذكورا.....
وأمس بسمع في سكاي نيوز العربية "مكره ولا راغب" كان الموضوع عن دراسة علمية خاصة بي ما معناهو الكضب وقول الصدق عديل كدآ وكعادة أهلنا العروب وحب تجميل الأشياء والزخرف المبالغ (دي بنلاحظها في الفن الإسلامي كما يحبون أن يسمونه وفي نفس الوكت متزمتي المسلمين من سنة وغيرهم وحتى دون الوصول لمرحلة الدواعش ما بيعترفو بالفن ظاتهو،،، كييييييييييييف ويكون إسلامي!؟ إذن:(:rolleyes:) سمو الحكاية بمسمى إلا الزول يسمع الدراسة حتى يفهم أنه القصد الكضب وقولت الحقيقة...
آها قالوا أنه قولت الصدق بتريح الزول نفسيا، عكس الكضاب البيكون تحت ضغوط...
زمان وكت الجسد شايلنه كرعين ومقوية قلب شباب وعدم خوف وجرآءة،،
كان الواحد ما هاميهو، يرمي الكضبة "والجمال ماشاية" بقصد القافلة تسير وإن راجعوك في الكضبة وإتا عارفها كضب، تحولها وتدورها وكمان عشان تقنع الآخرين بيها. تزيدها رتوش... ما وكتها الزول طبيعين مرتاح نسيا، لكن حسي بالله وإثبات للنظرية دي والإسترس الأصله الواحد عايشة من الهجيمة الإسمها الكُبر، لسانك ظاتهو ما بطاوعك غير تقول الحقيقة، دآ زيادة لي عامل أنك بايعها وطُز في الجعيص..
مرة مع خالي محمد الله يرحمه وهو في حالتي دي "عمر"، قال ليا: أكره ما أكره حسي الزول البيكضب، لأنه بقلل من قيمتك يعني يعمل عليك فهلوي، مع أني زمان كنت لي أبوي (شيخ بابكر بدري) ما قلت ليهو كلمة واحدة صدق وإتخيل ليا هو كان عارف كدآ، لأنه بيمرر ليا كل حاجة أقولها وبي ضحيكة تهكمية كدآ...
آها قالوا: في الدماغ في الحتت الممكن بالرسام تنكشف لمن القول حقيقي ولا كضب، يعني بعد شوية في المحاكم ممكن يستعملو الحكاية دي وبرضك في حتت خاصة تنشط بناء على الرضاء عن النفس والنغوشة والراحة لمن تقول الحقيقة،،،
يعني على كدآ؛ بدل الناس تصرف قروشها في الشراب لزوم النغوشة وتشتري الشدايد (السمسمية) لزوم الترويقة،،،
تصرف ليها يوميا ساعة ولا ساعتين حقيقة لزوم التمتع والرآآآآآآآحة.
يمكن ظاتهو يساعد في تحديد النسل:eek::eek:

الحق!!! يا كوووووووووووووووووووووووووووووووكي

[بابكر مخير]

وبرضك تقول تصهين تلقى بي عفوية، ينفضح أمرك..
بتذكر زمان جدودنا كلهم قوم (عوج الدرب) ولمن تبقى واحد من القوم دآ تعوج الدرب، معناها بقيت في عمر جدودنا....
لكن في الحقيقة شيتن سمح وواحدة من الخصال التي يحمد عليها الكُبر..
مرقتا الصباحية من البيت وعيني لي (الديسبن ) برميل "الزبالة" مفتوح وفي كيسن صغار واقعات في الواطة جمب البرميل الهم صلن إتنين، واحد للتدوير "أوراق ونايلون وقزاز"
بالله الصورة التي ما بتنمحي من ذاكرة الزول قدر ما كِبر هي لبتاع (المعآ قزاز) في حمارته وتنشينه الصائب لبيوت العزابة وديمة يكون صيده موفق في الفوارغ (شئ أرباع شري وشئ أبو جمل،،، ائيييييييييييييييه زمااااااااااااان)... .
المهم :o
بصورة عفوية ما عملتها من قبل، رفعتا الكيسين وفحصت المحتويات بصورة تراعي حفاظي على صحتي "الهي أصلها علي الحركروك" ودخلتهم البرميل المخصص لي التدوير بصورة تأكدت معاها أني سالقاهم مرة تانية لو ربنا كتب العمر بس في شكل تاني، ما هو في روايات تتكلم على الريسايكل للبشر، الليلة تموت بابكر بكرآ تقوم ؟؟؟؟ حسب عملك في دنياك،، ممكن نفر من البشر وممكن حتى ما إنسان !! يمكن نوع من الحيوان...
طبعا الفكرة دي بتاعت ريسايكل الإنسان ليها سبب في رفت "هوديل" المدرب الأسبق لفريق إنجلترا لكرة القدم...
برضك المهم:)
إتذكرت زمان جدودنا وهم طبعا كانوا الواحد فيهم ذي عقارب الساعة، يمشي في الشارع بي نفس عدد الخطوات وعلى نفس وقعها وفي نفس المكان، يعني لو الشارع مرصوف حديد، تلقى من بصمات خطواته الهي في نفس المكان حفر... لكن (بيعوج الدرب) لو شاف ليهو هناااااااااك شيتن واقع في الأرض،، تلقاهو يمشي ويرفع الشئ دآ ولو لقآ شيتن يرميهو فيهو بيختو فيهو ولو ما لقآ يخته في تحت الحيطة وفي بعض المرآت بيحفظو في جيبهو لمن يلقى حتة يرمي فيها الشئ دآ....
ودآ القصد!!
بيقنا نعوج الدرب عشان نحافظ على النظافة العامة ودي الدلالة على أننا وصلنا عمر الأجداد....
الظريف حكيت الحكاية دي لي البنات الشغالات في "المندولا" واحدة فيهن قالت بعد الترجمة: فعلنا الملاحظة دي حقيقة، إحنا في عمرنا لو ما تفاديناهو! بنشوتو ونلعب بيهو كرة قدم....;)

[بابكر مخير]

الغريبة زمان حاجات كدآ تاخدها على اللبادة،،،
تلعب كورة شراب وإتا عارف أنه بعدها علقة ساخنة، ما الكرعيين والتراب مغطيها أو الغبشة لو غسلتهم بيفضحوك..
تزوغ تمشي السينما وفي صباح اليوم التالي أسود لو أصلن قدرت بي حرفنة وطوالي دخلت السرير دون ما يعرفوك لكن الله يرحمه شيخي (قسيم الريد، كما كان أم قاسم تتمتع بمنادته هكذا) لابدن ويفضح القصة للتمتع بنوع العقاب الذي يوقع عليا "بكون وكتها في حرقة لكن هيهات أن يمنعني الأمر من تكرار الفعلة"
في أيام الدراسة وين ما تمشي،،، شرنوخ!! هي الإسم الذي عرفت به (ما برآي لكن كل ممن أنعم الله عليه ببشرة دآكن "بيقولوا أسود والحبر الأسود لونه أسود وبيقولوا أصفر والمنجة حتى المصوفرة ما بيكون صفاراها أصفر والأبيض دآ أصلن مستحيل زول يكون لونه أبيض، يعني زول لونه يكون لون الخلفية بتاعت المداخلة دي:rolleyes:") شرنوخ صفة من شيرني وشيرني يعني أسود ...
بيقولأ؛ حلبي وإتا حتى سورية ما مشيتها أبدن..
يا أخي حتى هنانا "السودان" زولن تلقاهو خالي وفاضي وجاهل وبعد دآ يفك لسانه، ود شنهو، دآ أصله شنهو، بت شنهو، ولد شنهو لا وكمان يقول ليك عبد، ود حرآم...
سبحان الله
سبحان الله
المهم في القصة....
ما حصل يوم حرقني لمن دمع بيآ،، ذي ما لما شفت المقطع دآ في اليوتيوب......

https://www.youtube.com/watch?v=cKyYtLA9ZOM



لعن الله العنصريين النكرات

[بابكر مخير]

أجمل ما في الكُبر هو لحظات إجترار الذكريات،،
تلقى نفسك قاعد برآك، مهموم حيث أنه الهم عنصر أساسي ورأس لمقومات "العُجز". شايل هم!؟ أنه بعد شوية صفحتك تنقزك وشايل هم أنه الليل بيجي وتكتر البتابت وهن عيب، تشيل هم صحيت الصباح وصعوبة القومة من السرير..
وفجاة تنط ليك ذكرة، زمان كان الواحد ذي المهرة ينقز هنا وهناك، كان ذي النسمة من دون وزن لكن تسيب آثر ولا ذي الجلة! لمن تصيب ورآك تسسيب خراب.
تتذكر أنك في طفولتك لا هم ولا نكد، الصغيرة تفرحك والظريفة تضحكك وحتى الثقيلة ما تهمك..
همومك كانت؛ بكرة المدرسة :mad: بس برضك عزآك في أنه بعد أيام بيجي الخميس "صفقة ورقيص" لكن!! تتذكر الجمعة بتاعت الشهر الفيهو الحلاقة وفيها شوية هم، الهو قطرة في محيط هم الكُبر (قياسا)،،
تتذكر زمان وأسماء الوزراء وأشكالهم وأزهري والمحجوب الغلب عدواة عبد الناصر والملك فيصل بحكمته وحنكته وإنتصر على البغضاء بينهما وبي عصاية موسى غيرها لوفاق وإتفاق،، حسي البشير بعد ما ملهو أمل ودعهو لي القمة غيرو ونصحهو بأنه ترامب دآ ما مضمون،،، وييييييييييييين ناس كينيدي القابل عمنا عبود بترحاب وفي أمريكا...
تتذكر أيام حلوة ذي طعم عدس عمي شريف اللونه برتقالي وطعمه وريحته برآهم يقولوا عدس وتتذكر أكلير الجي بي الكريمتهو تقول أيس كريم وتتذكر الدندورلامآ البيلفو بيها وسط الأحياء في الخمسينات وكتها لسة بدت عربيات الآيس كريم بدت بي شكلها البيكون في الأحياء في بريطانيا وأمريكا،، بالله عليك كنا في مصاف الدول دي وجنيهنا كان أغلى من الإسترليني ودون تضخم، لأنه مستوى المعيشة كان أعلى،، تتذكر غردون ميوسك هول وحتى فيهو إستربتيز وصالة التزحلق على أحذية بي كورات الحديد..
تتذك فرقة الآكروبات الصينية في المسرح القومي في أواخر الخمسينات وأوائل الستينات ومريم ماكيبا وفرقة التزحلق على الجليد الإستعراضية الأمريكية في المسرح القومي بأمدرمان وأم كلثوم وسهاي الرقاصة وحسن بيطري مرافقين لي أحمد المصطفى أبو العايلة وصديق منزول..
خليك من الكان زمااااااان دآك لمن كنا أطفال....
أكتوبر الأخضر ودار الأحزاب والليالي السياسية والأفراح اللمن تصبح الدنيا وتفطر بالليقمات...
أتذكر في زواجي من السيدة الفضلى حسب سيدها كان الفنان أبو عبيدة حسن والموسيقار العظيم الله يرحمه بدر الدين عجاج (بالله ظنيتهو كان شرب يومتها جالونين شاهي، ما هو ما كان بيشب الذي منهو) عزف وغنا وأمتعنا حتى أذن الصبح وبعدها فطرنا بي لقيمات طعمه ما زال يحلي خشمي..
الذكريات حسنتها فب عمرنا دآ!؟
أنها بتلطف الكُبر

[بابكر مخير]

كل يوم ومع كترت الأيام. إلا أنه ما بتكرر، بس برضك نفس الروتين!!
جرسة الصباحية في الصحيان. تلتلت الحمام فيما جميعه من الواقف لي قاعد.
ترفع رجل تدخلها في البطلون تقرب تنبهل علي وشيك، تقول تقعد تلبس البنطلون، عضلات ضهرك تنشمط غايتهو أخرتها بيتم.
المكتب، الكمبيوتر، سودانيات والعربية راجعا للبيت، نفس الروتين..
تمشي الكوشتينة تحرق دم وتحرق دمك وبعدها المندولا حجر شيشة والبيت تنوم ونص الليل تقوم، في البيت تحوم وآخرتها ترجع للسرير وتباصر ليك ساعة أو إتنين ويضرب المنبه وتصحى وتااااااااااااااااااااني من جديد نفس الروتين..
لكن برضك في الجديد حتى داخل الروتين نفسه، جرسة الصباحية بتتنوع!
مرة وجع عين ومرة الضرس، مرة وفجاءة وبدون مناسبة تصحى وتلقى نفسك :eek::eek::eek:
كيف دي بقت ما هو إلا له في خلقه شئون..
بعد شاب ودخله الكتاب...
نص الملاية في الأرض ونصها فوق السرير من تحتك..
غايتهو حكاية أنك تصحى وإتا في العمر دآ ومع الكُبر الثقيل دآ!!!
تقوم وتلقى نفسك كدآ..
إلا ياهو إعجاااااااااز ظاااااااااااااااااااااتهو
كوكي ولا تأخذنك الأفكار بعيد :rolleyes::rolleyes::rolleyes::rolleyes:
فجاءة ووبدون حبوب مسكنة ولا حاجة، تصحى وتلقى نفسك قمتا من السرير دون أوجاع أو آلآآم..
ودي ما بتتكرر كتير مع الثقيل دآ..
ياها فنة في الزمن;)

[بابكر مخير]

بين الشباب والشيب على قولتهم؛ بون شاسع
خفة روح وطاقة متأججة وهناك تقل دم وركلسة قسرية..
في مرات كدآ تشوف ليك شاب يفيض فتوة وقدرة، تفرح لي شوفته ومرات تكره سلسفيل جدوده ودآ طبعا وعلى قول شقيقي الحبيب عليه الرحمة شنقيطي بدري "حقد طبقي"....
قلتا شاب!! gooodgoood
لكن خليها تكون شابة، بالله عليك غير أنك تهلل أساريرك وتفرح كيانك وترفه علي غربتك وتأنس هجرتك،، أبدن أبد وبتن بتا،،،
ما بتكره سلسفيل أصلها، بل ابلعكس تشكرهم وتعزهم وتكرمهم لأنهم، أمتعوا ناظرك وأدخلوا السرور في روحك...
الجمال دآ حاجة جميلة بشكل....
الطاؤوس طائر فارغ وأجوف، لكن ربنا حباهو بي جمال مظهر....
https://www.youtube.com/watch?v=eQC5ZMrK4c8

[بابكر مخير]

الطاؤوس بيذكرني الحديقة الفي دار السيد عبد الرحمن في أمدرمان، كانوا إتنين بتذكر كيف يتبخترو وسط أهلي الغبش وما في زول بيزعجهم ولا ينشهم.
تناغم بين العليالات وجناح أم جكو وريش الطاؤوس بتنوع ألوانه..
التنوع لم يكن غائبا، فتجد قدح العصيدة وحوالينه أهلي الغرابة، عصيدته بوخها لاوي وملاحها التقول صاهرنو مع الحديد وقبل ما البخار ينقطع تلقى القدح فضى، (حبيبي الغالي دكتور فتح الرحمن وهو ختمي أب عن جد وود خليفة من خلفاء الميرغني في شرق السودان، مرة بنتغدى عنده ولا عندي ما متذكر وجات طاريت أنه أهلنا الختمية ما ناس حآرة. قال ليا: بالله عليك يا بابكر، زمان أهلنا لمن يجيبوا الفتة، ينشونا ويقولوا لينا، خلوها أول التبرد:o) والتنوع أنه في طرف الحديقة التاني تلقى ضيوف السيد عبد الرحمن منن زعماء ورؤساء يقدم ليهم آيس كريم....
بتذكر الحديقة دي شهدت زيارات جواهر لآل نهرو والإمبراطور هيلاسيلاسي "حضرناهم الإتنين، بروفسير قاسم بدري وشخصي، مرافقين لجدي بابكر"..
الطاؤوس بيذكري برضك جنينة الحيوانات "الكانت" كائنة في شارع النيل...
ليها عودة وذكريات جميلة...
قالوا: أنه والد الأستاذ علي عثمان طه كان يعمل فيها، ولا بدن الأستاذ ليهو ذكريات ليها أجمل...
بدون مناسبة ؟؟؟؟؟؟
وأنا بكتب بمعدل يوماتي، بقوم بالحكاية دي ذي إلتزام نحو سودانيات.
لكن كمان برضك بحس أني بفرض نفسي وما أكتر..
الكُبر من طباعه أنك تكون (حساس) :(

[بابكر مخير]

مع الكُبر!!
حاجات كتيرة بتزيد وأخرى بتقل..
حاجة عادية ومجارية للقدرة الإلآهية وللطبيعة...
كرويات الدم البيضاء بتزيد والحمراء بتقل، التركيز بقل والسهوان بزيد..
بس برضك في حاجات مخالفة لقانون الكُبر والكِبر "طبعا الإتنين ديل قريبات، فالكُبر لييه متتبعات، منها الصدق في القول وعدم مجارات أهواء الآخرين عشان ينبسطو ويطروك بإطراءات غير حقيقية فيك ولا تملك منها (فلس) ودآ بعض من كثير بيفقد الزول الكتير من القانون عاليه ويبقي الزول كبير عمر دون إستحقاق لمميزات الكُبر الهو أصلن كبرآ (كبرآ من كبير وهو ياهو الكِبر)"
يعني مثل زول كبير ذي حبيبنا شوقي بدري بي كُبره وكبَرته، تلقاهو ينجر في متاهات، أطرافها حقيقة وباطنها غير ذلك وجوانبها هراء وبدايتها عداء وختامها ؟
أهو غايتهو...
بتذكر مرة وهو ديمة بيذكرها أنه مع شيخي قاسم مخير كانوا يتحدثوا عن المناسبات من أفراح لي أتراح وأنه "الكُبار" هم الديمة على رأسها وقال أحدهم للأخر (للحقيقة ما متذكر ياتهو فيهم القال للتاني):
حسي إحنا الكُبار ديلآ...
قاسم توفي من سنيين وكان من الكُبار أصحاب الرأي السديد والقول الحق، بالله العظيم شبعني منهو..
كان صادق في قوله لا يحابي، أنا دآ كمين مرة إتجرعت كوؤس عدم محاباته، كان متأكد من قصصه، عنه وعن غيره.
كان وما زال مثلي الأعلى وغدوتي في الحياة ليتني أن أكون قربتا منها...
الكُبر يفرض علينا أمور للبعض حلوها مر وللأخرين هي مستساقة وسريعة الهضم ما تعاملو بما يفرضهو عليهم، من صدق في القول وعفة في اللسان وعدم الإنسياق بقصد مراضات نفوس وقلوب غير صافية...
قال فلان وقالوا عن فلان والقول السمعتهو عن فلان
دي بسموها نميمة في الشرع "حسب ظني" وبسموها كلام (مشطات) عندنا في السودان.
فلان كعب وفلان سئ وفرتكان شنهو المعارفوه، كمان دي بيقول عليها؟1
الما بتلحقهو جدعهو... ولا حسد (على قول أخي الحبيب شنقيطي) طبقي ولا على قول سيد صادق أنه دآ حق: قبيلة بنو حاسد.....
دي همسة في أضان ناس "الكِبر" القاصديين يبقوا "كُبآر"...

[imported_قرقاش]

ياحبيب اته الكبر ده برضه ليه علاقه بانه ادروب ولوووف..؟
ياخى بنستمتع بما تكتب ..لكن الخط ولون الخط ..بحتاجوا تعديل .
.. ياغيرهم يا قول لينا ادروب وولوف ..
واصل سردك الممتع ..

[imported_فيصل سعد]

ازييك يا دكتور يا كمندان
و رمضان كريم و ايامك طيبة..

[imported_Hassan Farah]

كيف تعرف نفسك كبرت
المصدر : http://sudaneseonline.com/board/490/msg/%d9%83%d9%8a%d9%81-%d8%aa%d8%b9%d8%b1%d9%81-%d9%86%d9%81%d8%b3%d9%83-%d9%83%d8%a8%d8%b1%d8%aa-%d8%9f%d8%9f%d8%9f%d8%9f%d8%9f-1496520131.html

[بابكر مخير]

ود خالي بلالي
ديك كُبرهم كُبر براهو
وكُبرنا كُبر براهو
والإتنين كُبار..
دي ذي
يقدر طبكم تطبق طبقنا ذي ما ......:cool:



وغيرنا اللون القديم عشان الناس الكُبار بيصعب ليهم اللون الفات
مع أنه كان لون "زينب" ;)

[بابكر مخير]

ازييك يا دكتور يا كمندان
و رمضان كريم و ايامك طيبة..

كان رغم المسافة
تلقينا دايم
ومع قرب البعد
بقى تلاقينا صعب..
يا أخي مستنينك بالفطور في رمضان
على قول ود فرح...
عصيدة وملاح
شغل ناس كُبار :cool::cool:

[بابكر مخير]

ياحبيب اته الكبر ده برضه ليه علاقه بانه ادروب ولوووف..؟
ياخى بنستمتع بما تكتب ..لكن الخط ولون الخط ..بحتاجوا تعديل .
.. ياغيرهم يا قول لينا ادروب وولوف ..
واصل سردك الممتع ..
قراقيشو
شرف كبير زولن كبير يقرآ، كتبات زولن كِبر..
أدينا عينة من من نوع الخط وحتة من اللون
وإحنا حاضرين..
نتعود عليهو لين
نبقى ولوفين:cool::cool::cool:

[بابكر مخير]

قالوا:
محل رهيفة بتنقد...
مع الكُبر الزول بيبقى الرهيفة القدها ساااااهل...
وذي ما قالوا: الزول لمن يكبر بيرجع يبقى ذي الطفل...
القولين ديل على وفاق تام
الشافع الصغير والزول العجوز، إتنينتهم "سنة ناااااااااااعمة" الهبشة يزعل والهبشة يفرح. بالله عليك الجلد طري، السنون ما فيشات، حتى في الكحة ما هي الياها الزمان حسي بقت متل الكتكوتة، الأكل يصعب لو قوي التكوين ومتجمع الكتل ويستحسن أنه مثل ما في خروجه سائل الوصف والسائل من الفم دائم "السيلان" لعاب ولا ريالة!! سيان. الحمى والوردآ تهجم حين كل تغيير فسيلوجي من عند التسنين وحتى إلتهاب السنين.
الكلام بعد كان واضح بقى لعثمة حقة رضيع....
ما هو !!
المقلب أنك بعد كِبرتا
ترجع شافع
قرقاش الحبيب
أئيه رأيك كدآ :cool:

[imported_قرقاش]

قالوا:
محل رهيفة بتنقد...
مع الكُبر الزول بيبقى الرهيفة القدها ساااااهل...
وذي ما قالوا: الزول لمن يكبر بيرجع يبقى ذي الطفل...
القولين ديل على وفاق تام
الشافع الصغير والزول العجوز، إتنينتهم "سنة ناااااااااااعمة" الهبشة يزعل والهبشة يفرح. بالله عليك الجلد طري، السنون ما فيشات، حتى في الكحة ما هي الياها الزمان حسي بقت متل الكتكوتة، الأكل يصعب لو قوي التكوين ومتجمع الكتل ويستحسن أنه مثل ما في خروجه سائل الوصف والسائل من الفم دائم "السيلان" لعاب ولا ريالة!! سيان. الحمى والوردآ تهجم حين كل تغيير فسيلوجي من عند التسنين وحتى إلتهاب السنين.
الكلام بعد كان واضح بقى لعثمة حقة رضيع....
ما هو !!
المقلب أنك بعد كِبرتا
ترجع شافع
قرقاش الحبيب
أئيه رأيك كدآ :cool:




ياربى ..الزول ده عارف انه نحنه بنقراء ..ونعيط ..؟
((وَاللَّهُ خَلَقَكُمْ ثُمَّ يَتَوَفَّاكُمْ وَمِنْكُمْ مَنْ يُرَدُّ إِلَى أَرْذَلِ الْعُمُرِ لِكَيْ لَا يَعْلَمَ بَعْدَ عِلْمٍ شَيْئًا إِنَّ اللَّهَ عَلِيمٌ قَدِيرٌ)
مش ده كمان زى الجهال ..
لكين رائك شنو فى الخط واللون ده ..
المهم انك تواصل ..

[بابكر مخير]

شوف بالله عليك!!
زمان كانن يهن نقط النخرين وبخاخ الأزمة
لابدن في الجيب قبل ما تمرق أيتها محل،،
بعدها بقت البطن مش علي حالها، بقآ مضاف لي الثنائي حبوب منع الإسهال، أصله أقلا بردة ولا أكله فيها شيتن بغلط والبطن يسبتها الشديد من اللومتيل أو الإميديوم.
آهاااااا
أضيف لاحقا لقائمة الشرف، حبوب الزنتاك أو نكسيوم ما مبادئ قرحة ظهرت ويجب التعامل معها وأخذت "البلاك لست" تتوسع، حبوب الضغط، مسكن الألام.
ذي ما قلنا زمان كانت القارورتين في الجيب مكانهن.
لكن مع النهضة الصناعية والتوسع العلاجي وكثرة المواد وجب إيجاد سبيل.
أولن إشتريت علبة كدآ قالوا: تخت فيها حبوب اليوم وتسع لي خمسة أنواع.
آهااااااااااااا المشكلة أنك في حبوب لازم تأخدها قبل التانيات ووحدات مرتين في اليوم وواحدات مرة في اليوم، طيب تتذكر الغلوتية دي كييييييف.
يا زول أخير إشتري ليك شنطة من البيربطوها السياح في وسطهم وتخت الأدوية فيها بعلبها وتأشيرت الصيدلي البتروي إستعمال الدواء كيف تعلمها بمظهر.
تم ذلك لكن بقت المشكلة، إن لبست جلابية حتى دي ممكن حلها لكن الما بتحلآ، خلق الله، بيتهكموا ويعلقوا ويخشوا ليك في نخرتك.
بتذكر زمان جدودنا كانوا طوالي شايلين صرة الأدوية والواحد كان قايلو أنه الحكاية إستدرار عطف أو على أحسن حال تباهي بكُبر العمر وأنه قيمتهو بتزيد مع الحكاية دي وللتأكيد عليها!!
أدويته كتيرة..
لكن حسي والمجرب خير من الف طبيب..
عرفتها وإتوكدتا أنها ظروف "الكُّبر"

[بابكر مخير]

ياربى ..الزول ده عارف انه نحنه بنقراء ..ونعيط ..؟
((وَاللَّهُ خَلَقَكُمْ ثُمَّ يَتَوَفَّاكُمْ وَمِنْكُمْ مَنْ يُرَدُّ إِلَى أَرْذَلِ الْعُمُرِ لِكَيْ لَا يَعْلَمَ بَعْدَ عِلْمٍ شَيْئًا إِنَّ اللَّهَ عَلِيمٌ قَدِيرٌ)
مش ده كمان زى الجهال ..
لكين رائك شنو فى الخط واللون ده ..
المهم انك تواصل ..

يا سيدي
يعني حسي دآ أرذل العمر
دآ ساهل أخرته شهقة....
الخوف من البعده :cool::cool::cool:

[بابكر مخير]

من غير سابق طآري أو إنذار، نط في ذاكرتي قولة وكان يخصني بها الوالد عليه الرحمة: الشهم لا يضام
والظريف في القصة وحسب الويكيبديا؛
"جاء في قاموس لسان العرب لإبن منظور أن كلمة زَوْلٌ تعني: (زول) من فصيح العربية ولها أكثر من سبعة عشر معنى، فالزول تعني :
(1) الكريم الجواد، أنشد السكيت المزرد: لقد أروح بالكرام الأزوال من بين عم وابن عم أو خال
(2) والزول : الخفيف الحركات، قال أبو منصور الثعالبي في حديثه عن الممادح والمحاسن، حين ذكر أطوار الإنسان : فإذا كان حركاً ظريفا متوقدا فهو : زول.
(3) والزول الفتى، قال محمد بن عبيد الله الكاتب المشهور بالمفجع يمدح علياً : أشبه الأنبياء كهلاً وزولاً وفطيماً وراضعاً وغذياً (4) والزّول : العجب، ألا ترى السوداني إذا استغرب شيئا قال : يازول ؟؟ يعني ياعجبي من هذا الشيء. قال الشاعر في وصف سير ناقة. مرفوعها زول وموضوعها كمر غيث لجب وسط ريح فمرفوعها زولٌ يعني سيرها إذا أسرعت عجب من العجائب. (5) والزول : الشجاع الذي يتزايل الناس من شجاعته. (6) والزول الخفيف الظريف الذي يعجب الناس من ظرفه. (7) والزول الغلام الظريف. (8) والزول : الداهية. (9) والزول الصقر. (10) والزول : معالجة الأمر كالمزاولة. (11) والزول : التظرف. (12) والزول : الحركة. (13) والزولة : المرأة الظريفة، قال الأصمعي : أنشدتني عشرقة المحاربية، وهي عجوز حيزبون زولة... قال أبو علي : الحيزبون التي فيها بقية من الشباب. والزولة الظريفة. (14) والزولة : المرأة البرزة (الجميلة) الفطنة الذكية، قال الطرماح بن حكيم : وأدت إليّ القول منهن زولة تلاحن أو ترنة لقول الملاحن والملاحنة هي الفطنة، فهذه تتكلم بما يخفى على الناس ولا يفهمها إلا الفطن. (15) والزولة : الفتية من الإبل أو النساء، قال رؤبة بن العجاج : قد عتق الأجدع بعد رق بقارح أو زولة معق (16) ووصيفة زولة : إذا كانت نافذة في الرسائل (17) ويقولون فلان رامي الزوائل : إذا كان خبيرا بالنساء، قال الشاعر :
وكنت امرأً أرمي الزوائل مرة فأصبحت قد ودعت رمي الزوائل"
من بين التصنيفات الفوق دي لقيت وتحت نمرة 6 أنها تتوافق مع صفة الشهامة ووقتي دآ كله كنت قايل أنه الحكاية مربوطة بالكرم قول ولا الشجاعة يعني حاجة من القبيل دآ لمن إتفاجئت بأنه؛
الشَّهامةُ : عِزةُ النفس وحرصُها على مباشرةِ أمور عظيمة تستَتبِعُ الذكرَ الجميلَ.
يعني فيها شوية غرور والغرور عندنا في السودان بيقول ليهو "تغآ" بتذكر مربية مدون بتي الأريترية الأصل كان بتقول ليها: بت جنابو التغيتنة ودآ معناهو مدون ورثت صفة والمسكينة ما ورثت من المال ولا الحلال "الإبل والأغنام"..
بتذكر في أول أيام الهجرة جيت دبي لشيخي المرحوم قاسم مخير وتابعت حينها علاج البواسير. في يوم إتصل شقيقي الحبيب يوسف من لندن يسأل عني فقال ليهو قاسم: بابكر في أبوظبي عشان موضوع البواسير وهنا قال يوسف وهو صاحب طرفة؛
إتا الناس أبواتهم بيورثوهم العمارات والشركات، أبوك ما يورثنا، إلا وجع ....... (عليه الرحمة كان يبدو لي يعاني منها وكلنا بي سلامتنا)
كوكي؛ واخد بالك من نمرة 17 :eek:
اللهم إنا في صوم فباركه لنا

[بابكر مخير]

أبواتنا زمان "على نغمة الأغنية النشيد الحماسية"
كانوا ملازمين الراديو وعلى وجه الخصوص (لندن) وتلقاهم مشدودين في وقت الأخبار والتي منها محور نقاشاتهم في ملتقياتهم.
وعلى درب أبائنا وحديثاً أضحت الئف أم موانيستنا وأنسينا..
"كتيرين من الأشقاء الأحباء وليدات سودانيات بيقولوا ليا كتابتك (عربيتها) ما مظبوطة وأنا رأيي أنه المهم تكتب بالعامية وبأحرف هجائيا هي نفسها الفي اللغة الصحيحة"
المهم القادني للموضوع دآ أني وفي (اللابريدها، لا بحمل بلاها) إسكاينيوز العربية بسمع نشرة الأخبار وكان الحديث فيهو شئ عن لغة الضآد (بالله كانها سميت على حقيقة أمر ناطيقيها وهم فعلا أهل المضاد والضد "خليك من حكاية أشدووووو ديكي") واللغات الأخرى.
فكرتا في اللغات التانية؟! ما هو على رأسها لغات المناطق القريبة من أهل الضآد ولقيت على رأسها؛
التقرآي والأكسوم والأمهرآ ولغة الأعجام ناس فارس أهل سيبويه...
قلتا سبحان اللغة
ما هو البحير أنه المذيعيين والمذيعات الحسان "جداً، جداً" لغة ضآدهم صآآآآآآآآآآآدمة، بس برضك حلوة ما أصلن نغمتها شامية وبرضك "شرط"...
سيبك من ده، قلتا أشوف شوية في أصلن لغة الضآآآآآآآآد أهلها منهو واليكيبديا ما بتقصر بالإفادة..
قالوا عرب عاربة وعرب مستعربة والخلق مستغربة...
لقيت أنه العرب
1 سياسيًا، العربي هو كل شخص لغته الأم العربية ووالده عربي.
2 ينسب العرب إلى النبي إسماعيل اللهو ولد أبراهيم (مسلما) وإبراهيم هو جد كل الأنبياء والرسل
3 فإن أقدم ذكر للفظ عرب يعود لنص آشوري من القرن التاسع قبل الميلاد، وحسب نظرية أكثرية الباحثين فإنه يعني أهل البادية، في اللغة الآشورية وعدد من اللغات السامية الأخرى "يعني الأشوريين كانوا أهل حضر"
وحكاية تسمية الزول، مختلف عليها وهي صفة أهل الضآد اللضدآد..
عرب وأعراب
الأعراب أو اليعاريب ومفردها أعرابي، هو الاسم الذي كان يطلق على أهل البادية من العرب
العرب معناها ديل هم الحضر "في قاموس لسان العرب: البدو هم ضد الحضر"
شفتوا الغلوتية دي كيف..
الأعراب هم من العرب والعرب هم الحضر من الأعراب
ودقي يا مزيكة وخليهم على كدآ
ما هم أشد ؟؟؟؟؟؟؟؟

[imported_قرقاش]

اى والله هم اشد....
ندعو الله انه يجى من هو قادر على ان يفرز بينهم وبين لغه القران ..
فمن الصعب التصديق با ن هولاء بشر ..ينزل القران بلغتهم ..
ولونسينا بنغلادش والصومال وكوليرا اليمن ودمار سوريا وعذابات مسسلمى افريقيا
تصور مثلا ديون السودان ..وهى ديون اربعين مليون مسلم ..تساوى كم برميل نفط
وكم منها حمله ..الكابوى الامريكى الاشقر ..وذهب به الى اهله يتمطى ..ولا حول ولاقوه الا بالله ..اللهم اهدنا واهديهم فيمن هديت
ملحوظه ...عينى عليك بارده ..خطك اتحسن ياعمو ..

[بابكر مخير]

تمرق من سكنك
تقول تفرق
ترجع مهموم
تقول تتونس برآ
ترجع بالع الجرآ
نكدان وناعل يوم مرقتك ذاتهو..
تطلع من بيتك حزين!!!
تلقى الفرح عند مين....
واحد والتقول قلتا ليهو أني "توم كروز ولا آلن ديلون" ولا حصل أني قدامهو إتباهيت بإمتلاكي لعيون المها ولا قدرت زرقاء اليمامة ولا عيون ناعسة..
"فديت العيون الناعسة و الجفون
الى تحمي العيون بظلالها
لا شفتها مدري أنا وين أكون
كني لوحدي وسط بحورها" شعر خليجي وكدآ ...
زولنا دآ وهو ما ليهو علاقة بالطب الباطني ولا الظاهري. قال ليا:
عيونك مصوفرات......
الله
لطفك يا كريم...
صدمة ولا حافلات إنجلترا النازلة في الناس تقتيل الأيام دي..
الليل ما نمته وكل شوية للمرآيا ومنتظر الساعة 9 صباحا عشان أهرول لي دكتور بابكر عربي (أجمل حاجة في بابكر، أنه قوله بلسم وكلامه رحيق وحسمه للإمور باتر وعادي قولة عادي عنده أنهو دآ عادي في العمر الدآ دآ)
آها بابكير (ما لازم أدلعه وهو ديمة البيرفع من معنوياتي مع إحباط الكُبر) بعيون الثاقبة وعقله الفاحص!؟ ما خيب ظني وقال ليا:
عيونك عادية لكن برضك نفحص البول عن الحاجات التانية...
وبعدها إنشرحت شوية وقلنا مع بعض عن إصفرار العيون ما لم ينزل حتى في البريتش ميديكآل ماجزين،،
ما هو الصفرآ، ذي إشارة المرور..
تولع قبل الحمراء، يعني قيس وعليها تقيف..
الكبد، اليرقان الساااااااااااااااهل دآك بالنسبة للحاجات التانية..
في الكُبر الثقيل دآ..
الصفراء
هي كرت أصفر قبل الأحمر والطرد..
فابقوا عشرة، العبو بي حذر :(:(:(

[بابكر مخير]

دائرة الأصدقاء والمعارف والأهل مع العمر تتأرجح بين الزيادة والنقصان
وإتا صغير الدائرة محدودة ومنحصرة بين الأسرة والأهل والجيران، مع بداية جقبة التعليم تبدى تتوسع بدء من محيط المدرسة من مدرسين وعامليين الي طلبة وتفيها يدخل عنصر جديد في الحياة. بتاع البوفية وتجربة بدء العلاقات المصلحية، لازم تكون حسب مزاجة من نواحي الخلق والهدوء وحجم الطلب حتى يتوصى بيك في صحن الفول من زيادة في زيت السمسم والجبنة وإضافات أخرى إن وجدت. علاقتك مع ست الفول والتسالي الجالسة خارج حوش المدرسة عشان لمن تبيع ليك ما بس تلتزم بالقرطاس لكن تتبرك عليك بخمشة من اليد وفي بعض الأحيان هذه تكون أكبر كمية مما هو بالقرطاس.
تتوسع العلاقات لتضم أبناء الحي الذي به المدرسة وهؤلاء لهم شأن كبير في حياتك. عداوتهم تجلب لك شر متطاير ومعرفتهم تضمن لك سير الي منزلك عن طريق حيهم أمن ورحلة تجد من يؤانسك خلالها حتى عبور منطقتهم وهذه الدروس الأولى التي يبداء بها الساسة طريقهم في كسب الأصوات"المهادنة والمحلسة وفي بعض الأحيان الوعود (مثلن نلعب كورة بين حلتهم وحلتنا) وأيضا شراية الذمم (تجيب ليك شكولاتة ولا فاكهة)"
تتوسع دائرة المعارف والأصدقاء على حسب الأسرة والأهل مع المحافظة على حكاية الجيران، ما هو بعض مرات تتدخل فيها يد القدر ويصبح لك منهم زوجة أو زوج لأختك أو أو أو (وبين هذه الأوات، حاجات). دائرة المعارف مع الكِّبر تذهب الي أعمار أكبر زملاء دراسات جامعية، زملاء عمل، روؤساء ومروؤسين.
نساء ورجال، عمار مختلفة وأجناس كُثر ومع هذا التوسع الذي هو علامة من علامات "الكُبر" تبرز واحدة من أكبر العلامات وهي "النسيان" يا ربي دآ أنا بعرفه من وين، الزول دآ من طريقة سلامهو شكله بيعرفني، بس هو منهو؟! من الأهل وال الزملاء زمان ويا ربي كيف علاقتي كانت بيهو كويسة ولا كعبة...
الكُبر مشاكله كتيرة لا تُعد :mad::mad::mad::mad:

[بابكر مخير]

بالله عليك
تغيب من سودانيات لأيتها سبب إن كان تخرم ليها، ولا السجارة في رمضان ولا الفرحة في السودان.
رجعنا والرجوع أصلن عادة، تغنى بيها الغنايين وتناجى بيها الحبان وحتى الأعداء ديمة طارينها، ما هو بيكون مستني متين عدهو يحتاج لأمرن عنده ويمسكها ليهو نجاضة...
المهم في حكاية الرجعة في رجعة تانية غير اللي سودانيات وهي الرجعة لقصة الكُبر....
في البتاع دآ!!
الونسة كلها،
لمن زمان
الله يرحمه فلان
هو ظاتهو السودان ما بقى ونسة وناسهو في النسيان..
تلاقي واحد دفعة أو حتى من الدفع الورآك!؟
ما تسأل عن زولة ولا زول وإلا: الترحم على روحهم، يا أخي الحكاية دي بقت فوضى بشكل :eek:..
في العشرينات ولا التلاتينات ويقولوا ليك، تتصور ما :(:(.
بتذكر أخي وشيخي العزيز دكتور حاكم أطال الله في عمره ليمتع كل ممن حوله وينير لهم طريق المعرفة ووساع العلم حكى ليا مرة: كان عنده مواعيد مع دكتوره في الساعة 11 صباح ومشى العيادة قبل نصف ساعة وإنتظر لييين 11وربع لمن ما نادهو سأل الممرضة المسئولة عن عيادة الدكتور وأنه لين حسي ما في زول نادهو عشان يقابل الدكتور..
قالت ليهو: أمس الدكتور إتوفى وما لحقنا نتصل بيك عشان المواعيد..
قام قال ليها:
كييييييييييييف دآ هو المفروض يعالجني
قالت ليهو بس هو مات..
قال ليها:
لكن دي فوضى، كيف يموت وهو المفروض يعالجني:eek::eek:
فعلن فوضى، شابات وشباب في مقتبل ومنتصف العمر، يموتوا وعمر البشير لساتهو:confused::confused::confused::confused:

[بابكر مخير]

ذي ما قلنا من قبل؛
مع الكُبر الأحاسيس تبقى نهر القاش وكت المطر "فياضة"، دمعتها في طرف العين وجرستها قدر شنهو وشنهو..
أمس جأني وليدي الصادق وهو إبن شيخي وشقيقي قاسم عليه الرحمة، جيته ألهبت فيني نار الشوق لكنها كمان بعثت فيني كمية من الرحمنة والطمنينة..
تحدثنا عن قاسم بأريحية وفرحة، إتكلمنا عن عظمته وعلمه وكل الوقت أنا بتصور محمد ولدي وأنه بكرآ لمن يمشي لي عمه أحمد وتجي طاريتي..
بتذكرني كيف؟؟
ما عارف لكن إن عملت ولا ما عملت لي جناك،، برضك تكون مقصر..
لأنك إتا السبب في أيتها من حاجة يتعرض ليها.
قال خطبت وعرست وزوجتك ولدت..
اهآ المسكين دآ جاء براهو ولا إنت السبب في أنه جآ الكون دآ...
ناس يقولوا ليك؛ دي قسمته..
عمل فيها شنهو قسمته دي، سألهو ولا قالوا ليهو لمن تطلع من بطن أمك حيحصل ويحصل، خيرهو بعدها ولا حتى شاوروهو داير منهو يكون أبوهو...
غايتهو ياهو كدي،،،
بدعة ولا غلطة ولا شهوة وقتية تتطور لي أمور تانية (سلبية وممكن في أحيان إيجابية) ولا هي شنهو بالظبط....
قالوا؛ تعارفوا وتناكحو وممكن نقول ونعترف بأنه رباط..
لكنه هو أصلن من فكر البشر...
وعشان كدآ الخواجات إتلاعبوا بيهو ولخصهو في أنه البينهو وبينها...
PARTNERSHIP
ما هو المقصود؟؟؟
العرس
:rolleyes::rolleyes::rolleyes:

[بابكر مخير]

مواصلة في الإحباط وذكر المحتوم،
ناس لمن تجي طاريت حبان مشوا من الفانية، تلقاهم يتنهفوا ويدمعوا وحتى بعضهم يجعر بي حرقة وكأنه الحصل ما محتوم وكل نفس ليهو ضايقة لمن شبعانة.
ناس تلقاها تتذكرهم بي حلاوة ويتونسوا بي طرائفهم وقفشاتهم ووأقوالهم.
عند بعض الأروبيين وبعد الجنازة يرجعوا بيت العزاء مجموعة لصيقة بالمتوفا أو المتوفي وبعض من المقربي وهناك تدور المناسبة لتاخد شكل مخالف، قدر الهدوء لحظة الدافنة والتركييز والسكات، يبدو بي كاسين في روح الفات أو الفاتت وأكل وونسة بس ماها قطيعة ولا نميمة لكنها عن الفاتت أو الفات وإجترار لأمور تخصهم بالتمجيد ولا القدح والزم... وهي أخف حالة من ديك بتاعت بعض الأفارقة (الإحنا ما منهم، لأنهم ناس فرح وبهجة حين نحنا ناس حزن ونكد) الأفارقة بيدوروها ليك على أخرهو...
آها إحنا كييييييييف:mad::mad::mad:
أولن تبادي
مراجعة قائمة الناس،،
كلمتوا ناس فلان، ديك وديكآ وديل وديلآ...
ناس المكتب ما تنسوهم
بالله عليك بس كانهم يوزعوا كروت دعاوي
....
قبل ما يمشوا يدفنو
بكاء وأثناء الدفن برضك بكاء وحتى لمن يرجعوا من الدفن بكاء..
بيت البكاء،،
يجسد قولة "ميتآ وخراب ديار"...
يا ولد شديتو الصيوان
يا بت أمك شافت الطباخين
أمشوا جيبوا الكراسي، التلج، الخرفان.
آهااااااااااااااا بعد دآ كله يتم..
تعال بقآ شوف..
صيوان الرجال،
العمة كريب وما أقل من 5 أمتار "غايتهو يا ترباس ما علمت الناس خير"، وبعض الحضور عيونهم محومرة من كترت النوم وديل ناس جيت المغرب والحليفة، أنهم ما سمعواإلا حسه وفي نوع البيجيك مع الصوآني وكان نزلوا (Alfred App) من القوقل بلآي وزرعهو في الصيوان..
ديل هينين، أمشي صيوان النسوان،
أولن تبادي في حركة غير عادية ولا كأنها حرب النجوم،،
تيبان أخر موضة، العطور الفرنسية مشكلتها أنها ما نفاذة وما تنشم من بعيد وعليه الإلتزام بتراثنا ليهو فوايد، شئ خمرة والحنة دي الواحد لو ما طبقتها بتلقى ليها عذر في أنها إتأخرت ما جات أول ما سمعت (ووصلها كرت الدعوى، ما هو كدآ الجيها لزومها شنهو لو ما أصله ذي العرس وبي دعوته)
بعدين بقآ الصينية بتكون في صيوان النسوان أشمل وأفضل، خوفتن يا بت من شيلت الحس......
بالله عليك دي حالة...
لا وتعااااااااااااااال شوف النقاشات في أمور السياسة ولارياضة وحتى الذي منه وما منه والبينقدر والما بينقدر عليهو (كوووووووووكي، يا أخي حاسب) والونسات المهمة والغير ذو فايدة والنميمة بالوانها والقطيعة المركزة..
ممكن تقنص ليك بي قطيعاية كدآ وما تفكها إلا مع حضور فوج من النسوان للعزاء وتلبد لغاية ما يختن يدهن في رأس المكلولة ويفكن الجعرة المصطنعة..
هنا بقآ ممكن تفكها قطيعة في القاعد شمالك، مع القاعد يمكينك وما حد بيسمع....
دي واحدة من فوائد بكآ الحريم أنه بتديك فرصة وفرص:rolleyes:

[عكــود]

ياخي القراية ليك متعة حقيقية!

عيدك مبارك حبيبو

[بابكر مخير]

:ياخي القراية ليك متعة حقيقية!

عيدك مبارك حبيبو

وعليك يتبارك :cool::cool::cool:
عارفك حنين ومن النوع دآك البحب كلام الحبوبات
وظنيته دآ منبع المتعة
ولأنه قولن عن ذاتي دآ البربطه بالحقيقة
وذي ما قال جدك بابكر بدري في ما معناهو؛ أصدق التاريخ يكتبه من عاصرهو "وعصرهو;)".....
العصرهم دآك،،، نخليهو لباشمهندز وجيلينا ورووووووووووووفي
:eek:loooollooool

[بابكر مخير]

مع الكُبر وذي ما قلنا قبيل؛
الذاكرة تنخنخ ليها حاجات كدآ وخاصة الحاجات لقلنا إتجلدنا فيها في المدرسة ولا نالنا من جرائها التنكيل في البيت.
أمسك مثلا، التسميع، الإملاء، جدول الضرب الذي إستحق إسمه لما يرافقه دوما ويصاحبه بإستمرار.
في المدرسة إن كنت ذي حال العبد لله فإن سوط الصول بيكون إتربط بيك وإرتبط بيه كانكم أسرة واحدة في بيت واحد تلتقيه يوماتي ما يفكك منهو إلا أيام الجمع والعطلات الرسمية وأيام الخريف لمن تصب المطر (ويا مطيرة صبي لينا في إيدينا) وتنهار المدارس وتتعطل الدراسة وينحرم سوط الصول من ملامست (كووووووووووووووووووووكي خلي بالك وفطور رمضان فات وأريته تاني راجع :cool:) رداء الكآكي.. كان في علاجات متنوعة لهذا السخف وخطط للتجنب المباشر من سوط الصول ونزواته التعسفية والسادية وهي معروفة بإسم "ردف"...
ومن أنواع: بدء من كتاب الأطلس وهذا يستعان به في أيام تسميع روابط الروحانيات من قرآن وأحاديث ودي طبعن كتييييييييييييييرة ومنها الفي مكة ومنها الفي المدينة ومنها المدسوس ودآ طبعا مرتاحين منه لأنه ما بنحفظه وكذلك يستعان به في أيام تسميع جدول "الضرب" وهذا النوع للحالة المفاجئة.
ارديف الملابس الداخلية، وهذا النوع لمن تجي من البيت وحاستك السادسة مكلماك أنك منجلد اليوم ومن دون محال لهذا القدر المحتوم، ما هو عندك واجب منزلي وصهينتا ليهو.
وهناك حالة تستوجب كم وكيف خاصيين، تبقى ولد ناس ميسورين حال أو أبوك ذو نفوذ وواسطته مقبولة وإنت قادر أن تكون وسيط خير وعند الصول أخوهو وكايس ليه شغل، بالله عليك في الحالتين ديل. بالله عليك سوط الصول يبقآ منديل حرير وحتى إن (دعا داعي) يستعين بالصوت ليسمع ممن بالفصول ومكاتب المدرسين وحتى ناظر المدرسة. به عاليا يقول الأعداد التي قررت من جلدات لك، إن كانن عشرة! بتجاوزات من الواحد يقفز الي الست وبعدها التسع...
بالله عليك مع إنتسابي لآل بدري الكرآم وأني حفيد الشيخ الجليل مؤسس المدرسة التي كنت أدرس فيها وصداقتي اللصيقة بإبن صول المدرسة عمنا محمد أحمد والد شقيقي الحبيبي "حسن"، لم يرحمني ذلك من التعسف الجسدي والإلآم النفسي...
بالله عليك لو حولوها عدد الجلدات ديك لي سنتات كان "ترامب" يتمنى يلحقني...
وكان كنتا بكون الملياردير بابكر مخير :(:(:(:(:(
هو أنا كنت عايز أكتب عن شنهو... بالله نسيت
لكن بيني بينكم بكرآ ولا بعده بتذكر وبجيهو رأجع :cool::cool::cool::cool:

[بابكر مخير]

مشكلة الكُبر أنه عقبة وأنه حيطة وأنه سد ومانع
تكون لساتك بي صحتك "نسبياً طبعا" وبي فكرك "الناضج من التجارب" وبرضك عندك طموح (طبيعة النفس البشرية) وفيك لسة شوية قدرة وحيل.
تكون في شغلك قايم بالذي منه ومطلوب منك وناوي تزيد.
ولكن لمن وصل مرحلة "الكِبر" يصف بأنه سن المعاش وخلاص كِبرتا..
(هل المقصود منها سبة؟ أكيد وإلا لا تقال إنها تقليل من الشخص في كل حاجة، صحة وعافية قدرة ومقدرة الخ)
عندنا ككل البشر فكر منكفيء ورؤى قصيرة نحو الكُبر.
نربط كل عوامل الحياة بمقاييس متوارثة منذ القِدم الغابر...
من حيث كان يعرف "الكُبر" بالعجز ويقال أنه؟!
عجوز
صفة مستقاة من العجز والعياز بالله منه، عجز في الصحة والحركة، عجز في الفكر والمعرفة، عجز في الحركة والقدرة
عجز في العطاء والعمل...
أمس شفتا الجيل الرابع من الشيخ بابكر بدري في قناة البي بي سي (زينب البدوي مالك) وهي حياة وفتوة في غياهب أفريقيا..
تحكي عن البشر وعن الحيوانات والطبيعة الغنآ والثقافات في تلك القارة الأم..
تتحدث عن القديم وهي نفسها لو لم يكن لها إرث وناس كُبار أخدت منهم لما كانت قد وصلت وها هي الأن في عمرها قد قاربت أو تجاوزت الستين..
كلها فُكر وإبداع، نشاط وترحال
ما زالت تبحث عن المعلومة والغرابة والإثارة في بواطن الحياة القديمة والتي هي أساس كل جديد...
قال ليك الشجر الكُبار

[بابكر مخير]

لو لا الكُبر كان فاتتني حاجات كتيييييييييييرة
تعاين تشوف، غلاء، عالم أخلاقه سك، بُخل، شح في المعروض في السوق... تقول تقارن بي الحسة والكان زمان....
الطماطم تقوم الصباح تمش بحري محل بجن لواري الخضار من شمال بحري حسي طبعن شرق النيل،،، تمن الصفيحة حسي يا دوبك يجيب طماطاياية.. والطماطم ظاتهو كان حصوة الكلى بتاعت الأوكسليت ضمان. نغمة بس نعمة..
تنشفهو لون يحمر وطعمته محافظة، حسي تخلي ساعتين تحت الشمس يطرشق ما هو كله كيماويات.....
أمشي جبل الأولياء الخزان ولا حتى قبل شجرة الماحي بيه، تملئ ضهر الهايلوكس سمك من الشلبة مرورا بالبلطي وخشم البنات وإنتهاء بي البياض الماخمج.. وكلها تمن ربع كيلو سمك من سوبرماركت فاروق الفي الخرطوم تلاتة.
وزراء زمان بالله عليكم، قيااااااااافة (مبارك زروق) فهم (المحجوب) أبوة (عمنا أزهري)، حتى الجيل الفي عمره قبلنا بي سنينات، إستايل (منصور خالد) فن ونكتة وخفة روح ودم (الزينكو)...
تجي حسي لي ناسن، شلاضيم وتقل دم وخفة يد...
كانوا ناس سيد خليفة وأبراهيم عوض يغنوا ليك لمن تشبع والبركة في دعوتك ليهم، تلى ذلك الدفع قبل "الغنا" ومساومة..
حسي ناس الملايين بقوا واحد من أسباب العزوف عن الزواج،،
فنان، صالة، صالون وييييييييييييييين يا السمحين، ما دي ملايين قربت من البلايييين "سنة يا ترامب، هنيالك"..
أها دآ كله والفرجة دي والأفلام الهندية دي ناس حكم الكيزان والمؤتمر الغير وطني وطه الدلاهة العينهو بي ...... و..... بي .....
كان الواحد شافهو وإتلذذ بيهو لو لا الكُبر....
قال ليك:
تعيش تشوف;)

[بابكر مخير]

هو أنا الجابرني علي دآ شنهو؟؟
قاعد في مكتبي الإترحلت ليهو بعد جاني المدير الجديد والذي ربنا ما فتح عليهو إلا يثير فيني شجون الحرقة والغضب العارم الذي ليا سنين وأنا أكابر بنكرانه..
يومه الجآ وزف ليا خبر الشؤم....
طبعن إتا وصلت من العمر ما يعني تقاعدك.
وإحنا نعتز بي عملك معانا ونشكر ليك العطاء الغير منقطع منك، لكن "أحب" أقول ليك أنه دي آخر سنة ليك معانا، ممكنك تدوام وقت ما تريد أو لا تداوم وما في حد حيسألك...
لكن أنا ما طبعن زول ما تعرف تقول، دمهو تقيل ولا لايوق ولا ممكن نفسرها لي صالحي، زولن شايف أنه لسة عنده رسالة ما إكتملت نحو بلد رادهو وعشقه ولصقتا وبداوم وكأني ما زولن (بحتضر)..
ولا ممكن من الحاجات المخلياني ألازم هو ملاقاتكم..
اليوم دي شعرتا بيها، يعني من الصباح ورغم الوعيد والطميمة الإتجرعتها لكن برضك أوكلت ليا مهمة عقد دورة للعاملين بالمكافحة وإنشغلتا عن حتى فنجان القهوة العربية البحبهو لكن الحآآآآآآآآآآآآآآآآآآآآآآآر أنه ضاعت عليا ملاقتكم...
آهاااااااا حسي الساعة 10 و50 دقيقة حلفتا وعزمتا إلا أطل عليكم، أشوفكم بي عيونكم البتقرآ شخابيتي دي...
دي حاجات دقاقة ما بيعرفها إلا زولن!!
الثقيل دآ عصره
رقق قلبهو وخلاهو يكوس في النتات عن زولن بيطراهو ذيكم كدي
وسواء طواعية ولا ياهو ذيي كدي،،،،،
أخنق فطس....
يا أخي الكُبر دآ سوداني جد وأصيل...
قول ليا كيف ؟؟؟؟
مش إحنا البقول؛
جيتك وما لقيتك
زولك بيتكلم سآآآآآآآآآآكت
قعدتا واقف ليك مستنيهو لمن جآ
يعني متناقضات
ذي "الثقيل" دآ
لأنه؟!
حقيقي :confused::confused:
حلو مر :eek::eek:

[بابكر مخير]

تتذكر أيام زمان لمن كنت صغير وتشوف ليك زول كان في حالتك الحسي الهي مرحلة "الكُبر" وكيف كانت نظرتك ليهو..
حسي ولمن زولن صغير يعاين ليك، قد تستاء لأنك شريط زمان اللمن إتا كنت الصغير إنقلب عليك.
أتذكر مدرسين كانو في الستينات من أعمارهم، تضحك علي كلامهم لأنه لغتهم غير، المواضيع البيطرحوها ما ذات إهتمام مقارب لي إهتماماتك...
في الروضة كانت مسز بتري في الخمسينات من عمرها، كان عندها لينا في الحصة بتاعتها نص ساعة "نوم"..
كانت فاطمة دكة، تحكي لينا حكاوي وقصص
كان شيخ ميرغني السنجك يدينا تعاليم دينية بلطف يجبرك أنك تند ليهو
كان بابكر بدري يجينا في الفصل وكانت شوفتهو حافز
ومع دآ كله بنشوفهم (خارج شبكتنا) والأمر زاد إفتراء من جانبنا نحو "الكُبار" لمن إحنا كمان زدنا في العمر وإنتقلنا لي مراحل تعليمية أعلى وأكثرها (عنظزة) كانت أيام الوسطي وهي بداية الإحساس بي فتوة الشباب، البعضهم بيقولوا أنها مرحلة النضوج وبداية الشباب.
آها كان مدرسينا فخامات وأعمارهم وبتذكر منهم علم وهو شيخ البنا الذي كان يحضر للمدرسة بحمارتهو البيضاء وعالية بي سرج أكاد أقول صادق أني شايفهو حسي، كمية من الوبر وتشعر بأنه سجادة فخمة.
كنا مع عظم هذه الشخصة ولأنها في العمر قد تجاوزت الستين، نتندر عليه وحتى في بعض الأحيان نجاوز حدود الأدب (في وكتها كنا بنحسبها، شيطنة) ونهمز الحمارة فتأتي بحركات. قطعن لو كان صاحبها على ظهرها، لكان سقط ومع عمره وجسمه الفاره!! قطع شك كان ممكن يكسر حاجة في جسمه...
قال ليك:
في أوقات (النخة) بينقلب السحر على الساحر :eek:
ودي ياها البقت علين
أبو الكُبر ظاتهو :mad::mad::mad:

[بابكر مخير]

حكاية الدم دي أقوى الوصال وأظنها الحاجة الأصلن ما بتروح.
طبعن كلامي دآ ما إجتهاد ولا هترشة كُبر لكنه شئ أكيد وأهو علم الجنات والوراثة بيؤكدو عليه..
قول فيك عرق رباطاب، بالله لو تبقى الظرف إتا سيدهو واللطف هو هيلك وخفة الدم إتا مالكها وحاضنها ومربيها وموزعها، إلا برضك إتا ياكا إتا.
سريع بديهة، لماح عندك الطرفة تطلع ولا رمشة طرفة عين..
أمس حمدتا الله أني فيني الدم دآ وخرموزمات مدينة بت بابكر عندي مخزونة،، قالوا أنه الذكاء معظمه من خرموزوم أكس وهو عند الأنثى دبل العند الراجل (اللغة العربية عااااااااااااااجزة في الكلمات لأنه عكس الأنثى هو ما خرج من كون أنه عضو :eek:،،،، يااااااااااااا كوووووووووووووووووكي)
بتذكر "مدون" (وهو اللقب الذي كان يطلقه علي مدينة كل ممن عايشها) والله يرحمها، كانت تقول كلام أخرته يبقى واقع، كانت لمن أجيب شهادة المدرسة في نهاية العام الدراسي وهي شهادة بينها وبين البيجيبوهو أخواني "مسااااااااااااافة" يعني إتصور بين الأول والتاني وحتى نقول العاشر وناس القبل الطيش بي أربعة ولا خمسة كيفها المسافة والفرق،، كانت تقول ليا:
أنا رقدتا ليك ماني بليييييدة..
هذه الكلمة كانت فايدتها أني لا أُعاقب بي شدة على ضعف المستوى الأكاديمي...
بس الغريبة أبوها كان عنده ليا تصور مشجع حين يصفني بأني "عيش الحقن البيجي ورآ" وبحكمة وقدرة المولى العزيز وتفاؤل شيخ بابكر لمصير سميهو، خلصنا القراية بقدر ميسور، يوفر الحد الأدنى للرزق الكريم:rolleyes:
ظنتني قولتها من قبل:
زميلن لينا قالوا درس صيدلة لمدة 12 سنوات (سنة لغة وخمسة صيدلة كل سنة مكررة) ويوم تخرجه قالوا: بي شهقة وزفرة وشحتفة صدرت منه قولة: يآآآآآآآآآآآآ، كلية لزقة بشكل...
يكون ورث من أبوهو خرموزومات ما أكس يمكن "ستة" in Englishgapgapgapgap

[بابكر مخير]

حاجات وحاجات، تمر عليك حسي بعد جلكنتا وتتحسر..
آآآآآآآآآآخ، لو كنتا بي عافتي وشبابي ولياقتي.
وليداتي الحلويين المتحملني "شئ خرخرة، شئ غلاط وكمييييييييية من الزعل" ناس (الوست) قالوا، نمشي دبي نساهر.
طبعا الواحد ما قلبه في باطنه، لساتهو مفعم بالحيوية ومغشوش بي كمية هايلة من النكران ومع أنه فعليا فات فيهو الفوات،،، قلتا ليهم بترجعوا بعد السهرة..
كعهدي بيهم شجعوني أمشي معاهم ومشينا...
جو هو ما جو لكن،
دبي دي بالمناسبة دنيا، لمن تجي داخل شارع زايد وكأنك في عالم الملينيوم القادم ناس يابان وأمريكا يستحوا بي وشيهم، بنايات تخفي شقاوة الصحراء وزرع على جوانب الشارع وكأنك في منتزهات فينا ونظام في الطريق وإنضباط ولا جنيف غالب الزحمة التتنافس مع شوارع روما..
تتلفت يمين شمال لمن فجاءة تلقى نفسك في وين السهر يحلو، سوهو طفل يحبو وهارلم تلميذ روضة في جامعة.
لا، المهم هو محل السهرة...
جسامين الحراس تخلعك بس بسمتهم ترحابا بيك تهدئ من الروع وتحفزك للدخول مطمئنا ومتطلع لما هو خلف هذا الباب.
تتلقفك أولن تبادي زهرة من وسط الخميلة ولكن الفراشات يجنك عليك منكبات وكأنك شايل رحيق الدنيا كله ويسيرنك... آآآآآآآآآآآخ يا أخي لو كان كمان يقالدنك.
وأخيرا يرسي بيك موكب الترحاب في بر الطاولة وحوالينك وليداتي وعلى وجهوهم إندهاشة وبأرواحهم حنق ومن عينوهم شرارات كراهية، ما أصله كم من الفراشات الكانن حايمات حوالينا ابدن إهتمام بيا أكتر من الموكب المرافق (شفت أنا بقيت سيد فكرة السهرة في دبي ودي واحدة من الخصائص الملازمة للكُبر "تفرض نفسك وولا يهمك"). لمن لقيت وليداتي في الحالة دي قلتا أخفف عليهم فقلت:
تعرفوا البنيات الحليونات ديل، يكونن فاقدات محنة الأبوة ما هن في غربة ويكونن منهن الشافت فيني شبه جدها وفيهن الشافت فيني أبوين ليها...
هدوؤ الشباب الحلويين وإنفرجت الأسارير وتبسموا وإسمتعنا بالسهرة..
بيني بينكم لو لقيت واحدة تاني
برجع شباب....
روفي وتوحة أنصحكم فتشوا ليكم ناسن ذي ناسي ديل
يتحملوك حتى لو على مضض
كوكي عارفك إتا ما بتاع كدآ
تمر ونخيل ساااااااااااااااااااااااكت:cool::cool:

[imported_زول الله]

حاجات وحاجات، تمر عليك حسي بعد جلكنتا وتتحسر..
آآآآآآآآآآخ، لو كنتا بي عافتي وشبابي ولياقتي.
وليداتي الحلويين المتحملني "شئ خرخرة، شئ غلاط وكمييييييييية من الزعل" ناس (الوست) قالوا، نمشي دبي نساهر.
طبعا الواحد ما قلبه في باطنه، لساتهو مفعم بالحيوية ومغشوش بي كمية هايلة من النكران ومع أنه فعليا فات فيهو الفوات،،، قلتا ليهم بترجعوا بعد السهرة..
كعهدي بيهم شجعوني أمشي معاهم ومشينا...
جو هو ما جو لكن،
دبي دي بالمناسبة دنيا، لمن تجي داخل شارع زايد وكأنك في عالم الملينيوم القادم ناس يابان وأمريكا يستحوا بي وشيهم، بنايات تخفي شقاوة الصحراء وزرع على جوانب الشارع وكأنك في منتزهات فينا ونظام في الطريق وإنضباط ولا جنيف غالب الزحمة التتنافس مع شوارع روما..
تتلفت يمين شمال لمن فجاءة تلقى نفسك في وين السهر يحلو، سوهو طفل يحبو وهارلم تلميذ روضة في جامعة.
لا، المهم هو محل السهرة...
جسامين الحراس تخلعك بس بسمتهم ترحابا بيك تهدئ من الروع وتحفزك للدخول مطمئنا ومتطلع لما هو خلف هذا الباب.
تتلقفك أولن تبادي زهرة من وسط الخميلة ولكن الفراشات يجنك عليك منكبات وكأنك شايل رحيق الدنيا كله ويسيرنك... آآآآآآآآآآآخ يا أخي لو كان كمان يقالدنك.
وأخيرا يرسي بيك موكب الترحاب في بر الطاولة وحوالينك وليداتي وعلى وجهوهم إندهاشة وبأرواحهم حنق ومن عينوهم شرارات كراهية، ما أصله كم من الفراشات الكانن حايمات حوالينا ابدن إهتمام بيا أكتر من الموكب المرافق (شفت أنا بقيت سيد فكرة السهرة في دبي ودي واحدة من الخصائص الملازمة للكُبر "تفرض نفسك وولا يهمك"). لمن لقيت وليداتي في الحالة دي قلتا أخفف عليهم فقلت:
تعرفوا البنيات الحليونات ديل، يكونن فاقدات محنة الأبوة ما هن في غربة ويكونن منهن الشافت فيني شبه جدها وفيهن الشافت فيني أبوين ليها...
هدوؤ الشباب الحلويين وإنفرجت الأسارير وتبسموا وإسمتعنا بالسهرة..
بيني بينكم لو لقيت واحدة تاني
برجع شباب....
روفي وتوحة أنصحكم فتشوا ليكم ناسن ذي ناسي ديل
يتحملوك حتى لو على مضض
كوكي عارفك إتا ما بتاع كدآ
تمر ونخيل ساااااااااااااااااااااااكت:cool::cool:
كدي النمشي نجرب الدواء الأخير دا يمكن ينفعنا قبلما يفوت فواتنا:D:D


عمنا وكبيرنا الطااااعم شوق كميات والله









اقول قولي هذا واستغفرالله لي.....................

[بابكر مخير]

الطااااعم
اقول قولي هذا واستغفرالله لي.....................


وليدي الحبيب
دي شوية كدي صعبة
ولا قولك شنهو يا جيلينا :cool::cool:

[بابكر مخير]

تقول وإتا صغير،
داير أكون ذي فلان، داير أكون ضابط، داير بعدين أعرس وأجيب جنون وداير وداير وتدور في الأحلام.
لمن يجيك الذي منه (اللهو الكٌبر. مشكلته ما تقدر تقول لابد منه ما هو لسة صغنونين وشباب ومتوسطي عمر بيروحوا منها الفانية قبل ما يلم فيهم الثقيل دآ. ما الأعمار بيد الله "واحد عزيز لدي مرة قال: المشكلة مع الموت أنه ما بيد غير المولى عز وجل، يعني ما في واسطة ولا بلصة، <إن أراد شيئا أن يكون قال له كن>) تبقى تنقلب وتقول: أريتني لو كنت ذي فلان ولا كنت هذا أو ذاك...
عم لي كان في الثمنينات من عمره ووكت غربة القاهرة كان بيجي زيارات، بالله عليك برامجنا كلها تتلخبت، البنعرفهم ينفضوا وبي هناك يتلموا، ليالينا تبقى جافة ونهرانا يبقى سلبة لا مؤنس ولا أنيس..
وما أكتفى بي دآ بس بل كان هو نفسه بتأريخ مشع في لندن، ما أن وصلنا وإلا كانت عصافير هايدبارك وزهور كوفنتري قاردنز وقوارير ولسدن وبرنت يتغنون بي أنسه ولطفه وكرمه..
بقى يا سادة طريق وإنسد ولست من حل إلا أن تتقرب من هذا الكنز العتيق وعلى القول والقولة وكما يقالل وكدآ: البغلبك تلاويهو! خاويهو..
وقد نجت لبعض الوقت قبل أن تتضارب المصالح، مع أنه كان بينها بون شاسع في المراد وتباين في المنافع..
حين كانت له المتعة في المؤانسة البريئة وذي ما بيقولوا عندنا "التقلة" والحضور بقصد الطمئنينة (يعني يكون وسط لناس) وكآسين من شراب باخوس لزوم القلب والحفاظ على دقاته وتوازن ريتمهو.
كانت لغيره مما يجري في عروقهم، شقاء ووحشة وشقوة مآرب أخر.
للبعض الحور حوله للمتعة. نظر وفرجة سلام وكلام (كلااااااااااااااااااااااااااااام)...
هو عاش والله لفوق المية،، عندي قريبن من طراز مقارب عمره فوق التمانين وبتمنى ليهو العمر لسة...
ديل لسة ما بقول أريتني لو كنت، ما هم لساتهم بدقلشهو...
لكن بهنيهم وبرجى عسى نبقآ من ناس ديل اللي حسي بي جوهم.....

[بابكر مخير]

التعامل مع الكُبر بحتاج لكمية من الحكمة وبعد سياسي وأسلوب دبلوماسي ومقدرة في التحكم على الذات.
إن غابن إلا تشيل شيلتك؟!
لو ما تكون حكيم ومتزن في قولك بتبقى مضحكة وتستحق ينقال عليك "مُخرف"، ما هو أصلن الحكمة مربوطة بوساع التجربة. لو تلاحظ في كل المقروءات من مجلات صغار ومصورات تلقى رسم الحكيم زولن ليه دقن أبيض كبير وإن ما إتحليت بي الحكمة تبقى فقدت صفة الكِبر.
قول السياسة هي شنها، ما اليها التعامل، الخطط، الإستراتيجيات وإدارة الأمور لزوم الإستمرارية والكُبر بيفرض عليك أنه يكون عندك بعد في التعامل مع كل أمور الحياة بي سياسة متكاملة، مثل بسيييييييييييييط، مشيك في الوآطة دي، بيستجب سياسة وخطة، خت رجلك براااااحة في مكانن ما تنزلق منه ولا تتعتر فيه، السياسة برضك في الأكل لابدن من إستراتيجية محكمة تراعي المخاطر المحتملة من الإفراط في أكل اللحوم الحمراء وصعوبة هضمها واللحوم البيضاء والجهد الكبير في مقاومة إغرائها ودي خير سبيل هو تجنبها لأن الإنجذاب اليها يستوجب تعاطي "ممكنات"....
وهناك عامل مهم جدا واجب مراعاته وهو الحس الديبلوماسي فمن باب القول: الشئ الجميل جذاب فممكن أن الشخص ينجذب لشئ جميل جدا وحلو وسمح بس حسب التحليل الإستراتيجي، هو يشكل خطورة ربما تؤدي بالحياة. والقدرة في التحكم واجبة ولابدن منها مع مراعاة عدم جرح شعور الجميل السمح. آها هنا حكمة الأسلوب الديبلوماسي تتجلى ومع وجوب تنفيذها بحنكة ومعرفة..
وإلا الزوقة الواجبة واللابدن منها:eek:
ما بتكون :(:(:(:(

[بابكر مخير]

الحب أمره متناهى التعقيد وفي نفس الوقت سهل، أطرافه محدده "بين إتنين" وبي ده كله ما أكيد (ممكن من طرف واحد)، طريقه هين أما الوصول ليهو صعب ولكنه كمان أجمل ما فيهو لمن يكون صادق وفي صدقه ضمان أنه متبادل.
كتيريين مننا نؤمن برب ديانتنا "الله" واخرين بربهم وحتى مما يعرفوا بأنهم لا دين لهم، عندهم ربهم البيؤمنوا بيهو، أكان شمس ولا ريح ولا أيتها من أشياء غير معقولة أو ممكنة، في ناس بتؤمن بالأعضاء كأساس لوجود البشرية وناس تعبد النار لقوتها في الدمار والي آخره...
الإنسان في الحب (وأنا ديمة بصفه بأنه تجسيد للأنانية)، بيبحث عن ما يحقق له رغباته ويحنو عليه عند الحاجة ويعطيه عن العوز ويغفر له الأخطاء ويسامحه..
دي كلها صعبة تتلقي عند بنوا آدم أو بنات حواء فعطاء دون مقابل وفقط من أجل الحب بلا مقابل لا يكون.
لكن الله حبه فقط بصدق يبادلك حبا بلا رجاء مقابل، فهو الذي خلقك وسواك. آها بيرجي منك شنهو غير محبة صادقة..
لاحظو معايا كم من أشياء ومرات وأحداث مرت وخلااااااااااااااص قلتا، ما في فايدة ولا طريقة ولا فرصة..
وجاء الفرج وسهل الشئ وتجاوزت تلك المرات وتحقق الحدث بيسر.
قطع شك هناك من أحببته بصدق فبادلك الحب حبا....
دآ كله ويييييييييييين وقت لساتنا كنا، أبوك وأمك حانين عليك وموفرين ليك، الحياة (رغد ومعيشة وحب صادق) لكن حسي كُبرنا في العمر وإنقطع عنا منبع ذآك الخير وبقى "ياهو"
العزيز الحبيب عز جلاله
الحمد لله بقت إن إنسدت ياهو فاتحها وإن ضاقت هو المفرجها وإن إنعدمت هو الموفرها

[بابكر مخير]

كيف تعرف نفسك كبرت
المصدر : [url]http://sudaneseonline.com/]

ود خالي بلالي :cool:
من المقتبس ومن قول درديري كباشي،
كيف تعرف نفسك كبرت ؟؟؟
أنا في رأيي أنه ناس زمان كان عندهم رؤية للمستقبل والحاجات الكنت بتكرها زمان. ما كنت ناقش معناها...
وعليه بفتكر مقياس الكُبر مربوط بي البتكرهو زمان وبقيت تحبهو حسي ما "رليفانت"
وبجيك مرة تانية لتحديد المؤشرات والعلامات والدلائل مرقمة بالفابيتيك والديجيتال والرومانية...
الحلومر:
زمان كان برغبوك فيهو عشان لمن تصوم وتفطر وتضوق حلاتهو، تبقى علي الصيام عشرة......
دآ طبعن برضهو تعرف أنهو ايامك لجاية فيها الحلو والمُر .... شباب وشيب
العصيدة:
عشان من حسي يعودوك عليها لأنها حتبقى ليك محببة في الكُبر والأكلة الوحيدة الما محتاجة لي سنون البتكون فقدتهم وغير كدآ، أنها سهلة دخول ومتيسرة خروج....
ملاح الشرموط:
دي تربية وتعليم :eek::eek: (تعرف أنهو في أوربا الناس ديل عندهم حصص تربية جنسية وما مشينا بعيد) وبرضك فيها حكمة أنه الكلمة دي قدر ما سيئة للسامعين إلا أنها "طاااااااعمة" gooodgooodgoood...
ملاح الروب الابيض:
العصدة ديمة ديرا ليها ملحوة والفكرة تتمحور في أنه هم قصدهم ليكم تتعود علي الروب (على قولة: من شب على شئ شاب عليه) الذي يعتبر من أخف الأكلات على المعدة لكنه حقيقة مع القولون والكُبر!! بس تقول نوبة حمد النيل.........
الرقاق
تقليد للكورن فلكس وهو بقصد تطوير النشء لتقبل ثقافات دول العالم المتحضر وهو يمثل بعد نظر متناهي القدرة من أهلنا الزمان. الذين إنكشف قدامهم مستقبل بلد نهاية أهله بين هجرة وإغتراب ولجوء...
اللوبا العفن:
في شان خشاشيمك تتعلم شم القرف وتبعد من العفن، بإختصار من أجل خلق ولادة آدم الصالحة غير الفاسدة،،، مش حسي مما تشوف ليك "كوز" تتذكر (اللوبا عفن):(....
الكوارع:
حسي ركبك ديل ما شالنك، ما شاء الله ذرية ;) وحوامة بالرجليين، تقول ليا الكوارع لو ما تحبها وما أكلتها زمان، كان بالله عليك تكون في كرسي ولا "ستيفن هوكينغ"...
المرارة، ام فتفت:
حسي كان بتلقى ليك فشفاش وين لوما أكلته من زماان. ما هو حسي مع ناس الإنقاص! إتحرق:mad:...
البصل، الفجل:
إتا قايل الويسكي والفودكآ والكونياااااك!؟ ذي النبيد بيعملهو من العنب،،،
لا يابا إكسير الحياة دآ ياهو من دآ ومن ديلا :):).....
واصلنا ووصلنا وللدلائل والعلامات
في الجآي :cool::cool::cool::cool:

[بابكر مخير]

اليدين ولا مرشوشات بالطرطشة ولا بالعامية مزبلات، تجرهم فوق القزاز يصرصرن.. والمصيبة أنه دي خاصية ملازمة للكُبر.
الجسم بينشف وفزلين شنهو ولا نيفيا بتاعت الساعة كم، بالله عليك إلا بدل دش الموية يبقى دش زيت زيتون وبرضك ما بيحوق لأنهو!! تقول تتنشف بالبشكير يتنسل ليك في يدك خيوط، خيوط....
كف اليد من النشاف يترسم ليك ولو تجيب أشطر قاري كف ما يقدر يقراهو لكن إن كان ياهو خط السعادة والقروش والحب وغيرهم حتى لو وصولوا لي مية، برضك كفك الفيهو يفوت عددهم وذي على ذلك ولزوم التعقيد الكرمشة.....
الوش وكل البارزين منهو ذي النخرة والإضنين أولن تبادي بيقوم فيهم شعر مع النشاف بيبقآ شكلهم مقزز والشلاليف!! والله لا قدر تقول تبوس (طبعا دآ إفتراض)، ما في شيتن عاقل بجازف لأنه بيبقى عليهو ذي ما التقول دخل شفافيهو في براية قلم الرصاص..
غير النشاف ملاحظة جانبية في الزول لمن يكبر، الأظافر التقول بنايات دول الخليج، "الليلة بالليل" تمر تلقى البناية قايمة، بكرة بالنهار تلقى هدوها، وبالليل من نفس اليوم محلها حفرة وتعال بآكر النهار تلقى بناية جديدة، آها الضفر تقصه حسي وبكرآ تلقى طوله قرب من البوصة...
ويا ود خالي بلالي، تقول "ملاح شرموط":eek:
:cool::cool::cool::cool:

[بابكر مخير]

شوية شعيرات ياهن الباقيات، تمسك فرشة الشعر المسكينة تقول ترقد بيها الشعيرات ديل، تلقاها تصرصر وتصرخ من شدة الوجع، كل شعرة واقفة ذي مسمار، يجرح..... أمسك شعر الحواجبين "يلاحظ أنه مع الكُبر يطول بسرعة تفوت نمو الأظافر" يبقى بس مظلة ويتادخل في إختصاصات الرموش لدرجة أنه يخمشها وتبقى في اليفك الإشتباك دآ والأدهش أنه بعض مرات "يطبزك" لمن عيونك تدمع..
آها كمان دي قصة تانية حكاية العيون، بيضربك فيها النشاف وتبقى لي قطرة الدموع الأصطناعية،، غايتهو الدنيا دي بقت كل شئ فيها إصطناعي، يا أخي الجنا بقى بصنعوهو في الأنابيب...
النشاف بيصيب كل شئ مع الكُبر والنشاف ياهو هو ظاتهو ما الجفاف،
الجفاف بتملكك بالكامل. جفاف في الفهم، في المعرفة، في القدرة والمقدرة، في الجيوب ولا قرش ولا ملين..

[بابكر مخير]

مع الكُبر بيحصل خلل في تناسب القياس والمقاسات بين المقاس في أمور الحجم والوسع.
مما يؤدي لتشويه بين قيمة الإنسان والمقاييس بين المعدل البيصغر ويضمر ويقرب ينعدم والقيمة المضافة البينطلب من الزول البيكبر أنه يوفيها لكن القدرة إنعدمت ويبقآ مسكين!
مكره على الفشل ومجبر على التخاذل...
العيون في حجمها بتصغر والإضنين في حجمها تكبر
العضلات بتصغر والرجفة بتكتر
لزوم الذي في مرات ما يلزم، بينهزم ويخسر ويقرب يفنى
المؤخرة بتضمر "ما عارف هل هي حقيقة علمية ولا ملاحظات زولن كِبر؟!" (عندي صديق، في هذا الموضوع عنده علاج؟؟؟ قال ليا: تعرف كتر من مليئ جيوب بنطلونك الورآ، عشان تدي إنطباع أنه لساتك ما عجزت والخلفية إترهلت).
للرأس! بنعدم التناسب مع الحاجات الملصقة فيهو؟
الشعر قلناهو قبل كدآ... بيحصل تدهور في كميته لمن يبقآ عدد شعيرات أو مرة واحدة ينعدم.
العيون قلنا حتى لو كانن حجم عين الغزال بيبقن قدر عروة زرارة القميص ومطمورات في موية "ما الدموع طوالي جاريات".
الشفايف بيطلشن ويزيد حجمهن ويتقلن لمن قفلتن تبقآ صعبة.
الإضنين يبقن درق
يعني خلل مبالغ في التناسب مما يؤدي الي التشويه في المنظر..
أبو يوم الكُبر ظاتهو :mad:

[imported_فيصل سعد]

سلامات يا عميد المحبة و التحنان، يا صاحب الماندولا، و عساك بالف خير و في نعيم و أمان..

[imported_فيصل سعد]

أسأل الله ... أن يبلغكم في هذا اليوم أسمى مراتب الدنيا و أعلى منازل الجنة. وأن يجعلكم ممن طال عمره وحسن عمله وبورك له في رزقه وماله، وكتبه الله من السعداء في الدنيا والاخرة..

صباح الخير..

[بابكر مخير]

أسأل الله ... أن يبلغكم في هذا اليوم أسمى مراتب الدنيا و أعلى منازل الجنة. وأن يجعلكم ممن طال عمره وحسن عمله وبورك له في رزقه وماله، وكتبه الله من السعداء في الدنيا والاخرة..

صباح الخير..

آميييييييييييييييييييييييييين
الحبيب النسيب
الكان رغم "المسافة" لقائنا ما صعيب
حسي وإتا هنانا بقآ الدآهي دآ
شيتن شبه المستحيل
ودآ هو الأمر الغريب....
كيفك وزياراتك لينا إنقطعت؟؟
ولا إنشغلت والجنون شرفوك

[بابكر مخير]

المزاج،
دآ حاجة مع الكُبر. كضاب البيقول بيقدر يتحكم فيهو،،
كان لمن مزاجك يكون معكنن، تشوف ليك حاجة تفرق عليك، شئ جغمة، شئ نفس، شئ ((كووووووووووكيgooodgoood، مش كويس الإتذكرتك قبل ما أقول:p)).
ون دآ حسي، الجغمة بقت في ما يعادل ربع والأعراض المتابعة تتساوى مع ما كان مقداره لتر والحسنة أنه ما بتقوم الصباح وشك يلعن قفاك من الهباب بتاع الأمس الفكيت بيهو زهجة وجبتا ليك "وجعة" وإن كان هو أصلن مع السنين وآثارها (مستحيل تقول بصمات لأنها تركت اثآر لكمات أقوى من بتاعت "تآيسون") خلت الوش يلعن أبو القفآ ظاتهو...
وحكاية النفس دي بقت صعبة تب، لأنك رأس مالك "كتمة" وتنكتم حوالينك الدنيا ولا إن قلتا بس سآكت تجرجر، رجفة اليد ما بتمكن بتظبيط الأمور و"السرحة" أكيدة والكبكبة في شأن تقول تلحق تساويها بتبقي القصة قولة عمنا شوقي بدري (ود خالي بلالي): الما بعرف... وإن كان الواحد في غابر الزمان!!!
متمكن:eek:...
المدهش أنه الرجفة ما بتأثر علي التظبيط بل تتعدى ذلك فتسهل فضح المكنون، لأنه الهباب قبل ما يصل الطفاية بيكون إختصر "المسافة" وخرم الهدوم وحرق أطراف السبابة والمؤشر.. ودي أكيدة لمن يبقى وداع (فككان الزهجة) """"" بوسة""""
والمصيبة إن قلتا في هذه الحالة؟ تستعين بالإبرة ما هو قطع شك مع الرجفة "شلوفتك" بتنقد...
يا زول فكينا آخرنا وبي حسن نية...
حسن النية: ميزة ولا نغمة ما تعرف لكنها بصمة الكُبر :(:(:(

[imported_فيصل سعد]

آميييييييييييييييييييييييييين
الحبيب النسيب
الكان رغم "المسافة" لقائنا ما صعيب
حسي وإتا هنانا بقآ الدآهي دآ
شيتن شبه المستحيل
ودآ هو الأمر الغريب....
كيفك وزياراتك لينا إنقطعت؟؟
ولا إنشغلت والجنون شرفوك

يا حبيبنا و يا قريبنا، انا رجعت كندا منذ مارس 2016 و ما جددت الكونتراكت في مصفح الصناعية نسبة لعدم وجود امتياز السكن المريح المناسب، فعدنا إلى ديارنا سالمين،، معقول ياخي أكون قاعد في الإمارات و ما اطل عليك كل هذه المدة،،، يديك العافية و ابقى طيب و لنا لقاء قريب إن شاء الله..

[بابكر مخير]

يا حبيبنا و يا قريبنا، انا رجعت كندا منذ مارس 2016 و ما جددت الكونتراكت في مصفح الصناعية نسبة لعدم وجود امتياز السكن المريح المناسب، فعدنا إلى ديارنا سالمين،، معقول ياخي أكون قاعد في الإمارات و ما اطل عليك كل هذه المدة،،، يديك العافية و ابقى طيب و لنا لقاء قريب إن شاء الله..

حمد لله على سلامة رجوعك لي وين الحضارة مؤصلة...
ما حاجتن مجملة.....
تعرف يا فيصل؟
ربنا يحفظ ليك صحة ويديم عليك عفوهو.. من الحاجات الحتلاقيك بعدين:o..
شيلة هم السفر.
سبية محل سكنك.
تستيف عفشك "دي شوية يعني كدآ وكدآ ومحتاجة لي كوكي، يصرح بي صرفها".
حجز التذكرة بي التكنلوجيا الصعبة كل شيتن في الدنيا، بالله عليك زمان تمشي وكالة السر عباس، يفتحو الدفتر يكتبو إسمك يضربو تلفون لي شركة الطيران وتمرق بعد بالكتير عشر دقايق وإتا شايل التذكرة، حسي دخول ومروق في النت والسيستم واقف والحجز من الموقع وwww دوق كوم وشيتن مفصل لي ناس الآي تي وناس إحنا ديك يوم سفرك يفوت وإتا لساتك تايه...
تبقى علينا قصة الزول البيقرآ في لستت الطيارات المسافرة ووسرحان لمن جاتهو رسالة "إتا أقعد إت... ليا كدي لمن طيارتك تفوت".
أنا دآك بالنسبة ليا دآ كلهو هين ووآ حلاتهو ما دام بفوتني الطيارة،
يابا بالله عليك لمن أكون راكب الطيارة، شريط كل المصايب العملتها يدور ليك قدامي وأقول خلاص ما اليهو حسي القصاص، حتى النملة الكتلتها في طفولتي "والله كنت طفل وبالتراكمية وصلنا لي اليهو حسي دآ (الكُبر)" أتذكرها وأطلب منها المسامحة والعفو...
زمان كان السجارة بتفشك شوية وتشغلك وخاصة في التيك آوف، حسي إلا بس ياهن يدين الكرسي، تخمشهن لمن حديدهن يطقطق وأكره ما أكره أنه يكون جمبي زول حتى لو زولتن الياها ديك ويعمل لطيف وما خايف ويقعد يطربق.. بالله عليك إلا تقول تخنقه ديييييييييييل..
حبيبنا شوقي بدري في أيام قرايتنا في تشكوسلوفاكيا، سافر السودان ومعاهو صديقن لينا "نسيت الإسم، ما الزمهرير هبانا وهبهب بينا".. لمن رجعوا حكى لينا أنه الطيارة في الجو وصابها عطب وإحتاج المهندس طيار أنه ينزل تحت للمنفذ التحت الكرسي "النايم" فيهو شوقي (والله بخت البيجيهم نوم في الحالة دي)، قال وعلى زمته أنه شوقي ولاااااا كأنه بس كل العمله زحآ رجليهو وتمت الصيانة الوقتية وشوقي ما صحآ إلا في التتش دآون...
4 سنين ونص ما سافرت لندن و3 سنين ونص ولو ما الشدييييييييييييييييييييييد القوي الوداني السودان ما كنت سافرت...
يا زول أنا دآ عندي مسلمات وأشياء متمسك بيها وعن قناعة ما هو قال ليك: الخواف ربآ عيالهو "ربنا يحفظهم ومشتاق ليهم لكن ما موضوع الطيران دآ معترس ليا في شوفتهم :rolleyes: :rolleyes: :rolleyes:

[بابكر مخير]

بين المطرقة والسندان
ياها دي الحالة مع "الثقيل" دآ...
تقول؛ ممكن دون تفكير مستفيض وتمحيص. بكرآ أعمل وأعمل،،،
والمدهش أكبر قولت السنة الجآي :o
وتنسى أنه القريب دآ (بكرآ) تكون وين وكيف وفي شنهو من حالات..
طبعن شهر 9 نهاية الخدمة بتاعتي وهم مفروض قبل شهرين يدوك خبر،،،
مرآ شهر يوليو ونص أغسطس وما جآني أيتها إشعار، قلتا برضك لزوم التأكيد نديهم طلة ناس الموارد، طلع أنه العقد "أوتماتيكي" إتجدد...
يا أخي حكاية الأوتماتيكي دي ياها حق العجايز بالظبط
حسي طبعن إتطور الأوتماتيكي وبقآ ما بين اللكتروني والديجيتال..
العربية البي تعشيقة دي قدرة ليها بقت مافي
الساعة البي الزمبلك أصابعين يتمكنو منه عجزن
والإبداع الأكبر اللكتورنيات من ناس رموت تلفزيون وديكتات الكمبيوتر ووسامة التلفونات والتلفزيونات (طبعن الوسامة ياها ال smart وبرضك ذكاء)..
من القصص الفي التلفزيون (يا ريت لوكانت بالوسامة التخليها تدبلج وترجم برآها) مرات تشوف الشافع الصغير وأبوهو بيلاعبهو يقوم يقول لي أبوهو "do not be silly" آها ناس أنيس عبيد بتاعين الترجمة الزمان بيقولوها عديييييييل "لا تكون أحمق" حسي بيوتات الترجمة كترن والمدهش ترجمتهم بقت عجيبة ما الدنيا بقت قيم إسلامية رفيعة..... لاحظت أنه كلمة "تبا" لي fu،،، تجي في محلن كُتر مع أنه ممكن تكون بالفصحى وقليلين البيعرفو معناها... وكلمة "بيتش" طوالي بيفوطوها ولا البيوتات المخلصة في تقديم خدماتها بأمانة يقولوا "حمقاء" ... طبعن الكلمة دي تعني أنثى الكلب...
آها يومتها الحبيب بيقول لي حبيبتهو جبت ليك "كلبة" ناس الترجمة طوالي زبطوها ليك "حمقاء" يعني الحبيبة آكييييييد لو كانت من متحدثي لغة الضاض، كان لفحته كف..
بس جات سليمة..

[بابكر مخير]

مريت علي طربقتي الفوق دي، لقيت أنها ولا كلام الطير في الباقير وإتسألت عن السبب في أني كتبت شيتن ذي دآ..
آها وحسب تفسيري البيراعي المصلحة الخاصة، ما كل زول ليهو مصلحة خاصة ومصلحة عامة، الأولى بتغلب عليها عنصرين وهم واحد بتاع أنانية صرفة والآخر بتاع "نكران وتكبر" يعني عنجهية صآرخة..
والتانية مصلحة عامة وهي بيغلب عليها تقديم مشاعر الناس وأحاسيهم على أنانيتك وعنجهيتك...
قمت لقيت أني كتبت الموضوع دآ عشان أسرح في البوست دآ وأنه يصل رقم (مصلحة خاصة)، لكن في نفس الوقت ونسبة للإستجابة النوعية وعدم ممانعة القراء على إستمرار البوست (المصلحة العامة) قلت أكتب..
لكن المزاج ما كان على أحسنه والنفسيات لم تكن في صفائها..
فطلعت الهترشة الفارغة..
وإن شاء الله ما تتكرر وتبقى المصلحة العامة هي الأغلبloooolloooollooool
عليهو؟؟؟
سمااااااااااااااااااااااح :cool::cool::cool::cool:

[بابكر مخير]

أربعين سنة
محقت وبشتنت القوارير...
آها إحنا (بنو السودان، جند الوطن)
مش أكيد إتبشتنا....

شوفهن كانن
سنة 1975
:)

http://sudanyat.net/vb/attachment.php?attachmentid=1277&stc=1&d=1503297191


http://sudanyat.net/vb/attachment.php?attachmentid=1278&stc=1&d=1503297272

حسي في سنة 2014
بقن :o

[بابكر مخير]

ذي ما قلنا قبل كدي!
مع الكُبر، قول الحق بيمرق برآآآآآآآآآهو ودي صفة تؤكد وتثبت أنك كِبرتا..
غير كدي وإن سنين عمرك كترن وبتكضب
تبقى إلا زولن كِبر بي جهله
جدنا "أجمعين" بابكر بدري في (تأريخ حياتي) كان إن قال شئ ولا حاجة ولا قصة، إلا يكون هو إما حاضرها أو شارك فيها أو بقت عليهو أو منه.....
قال الحقيقة حتى لو ذمته في نفسه.
ما كان إضينه يقول قول ناسن تقوله. مراعاة للتمسك بالحقيقة وحتى ما يوصف بنقل القيل والقال "عندنا في السودان البلد الذكوري بيقولوا <كلام نسوان>. دي صفة لصيقة ومتأصلة في جيناتهو الرباطابية..
عندي ود أختي وأخويا (النور إبراهيم مجذوب) الزول دآ غريب في معدنه بالنسبة للعديد من غير أهله الرباطاب وأصيل في إنتمائهو القبلي..
بعرفه طيلة أيام عمره وأكاد أجزم أنه الزول دآ ما كذب في حياته، بذكرني بي إتنين وهم نفس "النامونآ" خضر بدري وقاسم بدري...
أهلي الغرابة ديل كمان حقهم "كُتر" في أنهم كمان بي "إفتراء" ويكاد أنه الواحد إن خلاااااااااااااااص إنقسب وقال شيتن ما حقيقي، إلا بصر عليهو وعينك يا تاجر (طُز) في الكبير إن ما صدق..
ذي ما بيقولوا؟
أخنق فطس قول صآح...
وحسي دحن قولي:
أكثرهم كذبن وما عشان قالها القال:
إن شبعوا
لكن حقيقة
أصحاب السحن الدآكنة والفآآآآتحة..
كضاااااااااااااااااااابين "بإمتياز"
طيب!!!
سبب دآ شنهو؟؟؟؟
البدعي الإنتماء
يبقآ يلتزم بمبادئ جهته البينتمي ليها...
والبيحب جنآ غيره فاسد.....

[بابكر مخير]

تلعب مع الجريوات، يخربشنك
تلعب مع الطويرات، يطيرن يخلنك..
أها يا هي دي البقت علينا،،
تقول تماشي الشباب وتهظر معاهم، يقم واحد منهم يفكك بي كلمة (في زمنا مستحيل تنقال من وليد ولا شاب ولا حتى زولن كبير لي الأكبر منه) تشعر بأنها جارحة، ممكن هي ما تكون بي التقل الإديتو ليها وتكون متماشية مع متغيرات العصر، ما هو حكاية ستين سنة دي قربت من قرن والقرن حقبة زمنية طويلة وحسب البيمارس فيها ترتقي لي درجة عصر..
يعني ذي الإنقاذ دي قربت أو هي حقيقتن، عصر فساد مستشري وظلم غاشم وحتى ما تمت مية سنة لكنها أكيد دخلت موسوعة "جينس" للفترات الزمنية القصيرة المعتبرة عصر وهي ظنيتها فاتت عصر الجاهلية والقرون الوسطى.
نرجع نشوف جريواتنا..
تشوفهم بيناتهم بيقولوا كلام ظنيتهو زمنا كان الدم سال لين الركب ولا كيفن بيتماسكو..
على أيتها حال ياهو دآ عصر الآبل والسامسونج وييييييييييييين لي التلفون الزمان دآك،، بالله عليك كعة بي سماعتهو، إلا الطويرات البيطيرن يخلنك تلقانه لافات فوق راسك ذي تاج المللكة اليزابيث "التانية" وما أكون غلطآ ويعيدوا عليا إمتحان الجنسية البريطانية وآكيييييييييد حا أسقط...
بس المهم ترضى بيهم ذي ما هم وما تكن رجعيا فينفضوا من حولك:rolleyes:
آها وذي ما قلنا يا هم ديل "شباب العصر"
وليهم هدية في شان ما يخلونا...
https://www.youtube.com/watch?v=4aLu02R1M_0

[بابكر مخير]

تعرف في حاجة فاية الناس؟!
لمن هم صغار بينسوا أنه بيجي اليوم البيكونوا فيهو كُبار، دآ طبعن في حالة الناس العادية العاقلة، مش الواعش والدباتبين والإنتحاريين وما شاكل هؤلاء نآكري نعمة الله التي وهبهم وهي الحياة...
بيفوت أنه بكره بيكبر في العمر وتكبر معاهو حاجات وتصغر ليهو حاجات
بيفوت كمان أنه في برامج لو ما ختا ليها خطط وإستراتيجيات، بتلجآ بيهو
بيفوت عليه مسؤليات جسام في إنتظارهو، عرس، أولاد، تربيتهم، مدارسهم، أكلهم بي إختصار. عيشتهم ومعيشتهم مما جميعهو....
بيفوت عليهو الصرفه، بكره ما بيلقاهو تاني..
قصص في الطريق؟
المشي، بعد الهرولة بيبقى جرجرت الكرعين
الركب، ياهو ناس ("روفي" الزول دآ بحبه من جووووووووووووووو قلبي، بس هو بيتغالى:(:(:() إن ما بقت جراحات إلا ياهو ذي عيدان القصب لم يحرقوها، طقطقة ولا صفقت أهلنا الشوايقة..
قمت إتفلسفت ومشيت ليا مكتب فاضي في الدور الأول من مبنى المكافحة، أول يومين لمن بتطلع بيكون معآي الفراش شايل الكمبيوتر وما حاجات تانية وطبعن ما الحِمل خطوة خطوة، اليوم برآي والجو سآكن وأنا طالع السلم إلا أسمع ليك، طق، طق وأتلفت شمال يمين ما في شئ حواليني وبس بالله عليك إلا ألقى روحي رجل عديلة واقفة في العتبة الفوقانية متوهضة مكانها والتانية ركبتها في حافة العتبة ذاتها يعني بالله بس بتاعين سباق المية متل في وضع الإنطلاق لكن هيهآت لنا في دآ..
لا والمدهش أنها كيييييييف تنعدل، إنخمشت عديييييلز بس بي لطف وعناية المولى وبعد ربع ساعة إسترخاء تام ولا بتاعيين اليوجآ، إنحلت وسمحت لي الركبة بمواصلة الركب متجها الي الآعالي...
بس برضك ياني قاعد في الطابق العلوي بي إصرار، مش جدي بابكر بدري...
في حكاية ليهو أنه؛ طالع يقابل طه حسين عشان ينتدبوا ليهو مدرسيين وفي السلم صابه ما صاب حفيده من بعد. الرجل؛ ضرب رجله وقال ليها: لو تنقطعي طالعي بيك (المعنى ولست الكلمات نفسها)...
بس برضك قلبي علي الفراش، لأنه شوية كبير في العمر فلو نزلت من الآعالي فقد يكون ذلك، مراعاة له وخوفا من معاناته...
مش عشاني طبعن، بس عشان زولن حساس....


تعرفهو!!!!
فكرتا أنه تكون مدونة في الفيس، مش برضه في ناس ممكن تستفيد من معاناة زولن كِبر ويخلهو بالهم لما هو آت... "الثقيل دآ"
:cool::cool::cool::cool:

[بابكر مخير]

قالوا:
ديمة في نفس اليوم الإتولدتا فيهو (أنا قالوا ليا إني إتولدت يوم أحد) من كل أسبوع المزآج بيكون معكنن واليوم التاني الإحنا صنف الرجال بنكون فيهو بي حالة متل الشابات والسيدات "ملاحظ ما قلتا البنات لأنهن لساتهن، ما مفروضآ عليهن" يوم شهريتنا، ما هم قالوا برضك الرجال بيحصل ليهم تغيير هرموني بس الكويسة فيها أنه "كتامي"...
وعكننة المزآج يا أصحاب مع مشيان الأيام والشهور والسنين بتكتر وتبقآ نهج مستمر لا يتبدد ولا يتغير،،
نسمة تمر تعكننك، ريحة مجآري برضك بي نفس مستوى تأثير ريحة الفلير وبالمناسبة العطور البيدخل في تركيبها سبيرتو....
بتصل مرحلة كدآ أنها لا تطااااااااااااااق، يعني يمكن العطور الزيتية شوية تمشي، يعني مثلن زيت الصندل؟! بس ما تدخله في العطور ديك البتخلي الزول لمن يكبر:confused::confused::confused:
طآريها بيجيب ليهو الإكتئاب ما هو البيحصل،،
الذكريات ما بقت تنهض بي جيلها،،،
آآآآآآآآآآآآآآآآآآآخ :(:(:(
يا زمن......
https://www.youtube.com/watch?v=Y7KpcXVsMIU

[imported_Hassan Farah]

ود عمتى مدينة عيدكم مبارك وكل سنة انت واسرتكم الكريمة طيبين وفرحانين ومحتفلين
اها قولى ال Testosterone كيف؟؟

[بابكر مخير]

ود عمتى مدينة عيدكم مبارك وكل سنة انت واسرتكم الكريمة طيبين وفرحانين ومحتفلين
اها قولى ال Testosterone كيف؟؟

البروف الحبيب
الحمد لله الحال ماشي
الأهل بي خير العيد عدآ..
قبله فقدنا حبيب كان صلة الربط بين الإرث والحاضر، رجل أمتعنا قدر ما هو إستمتع بينا، عاش دنياهو في كل لحظة بالبسمة والفرحة، بالمحبة واللطف.
فاروق الطيب أحقانا جميعنا بورث جدنا بابكر بدري، قصته مع الحياة؛
أبوهو الطيب ميرغني شكاك وأمه عزيزة بت بابكر، توفي والده قبل ولادة شقيقه الطيب عليهم أجمعين الرحمة ومنها وهبت عزيزة حياتها لتربية إبنيها والإهتمام بأمور والدها، سكرتيرة خاصة، مربية لأبنائه وبناته، مسئولة ومشرفة أولى على "الحوش" بمن فيه من أفراد اسرة بابكر بدري وأسرته الأوسع (محمد خير البدوي) و"كبريت أخوان" وأهل بلده (ولاد الطيب بابكر "أخيان التجاني") وطلبة الأحفاد سودانيين وغيرهم (يمن وصومال "تنين وعبد الحميد علي يوسف")..
زولن أمه كدي، كيفن يكون غير فاروق الطيب ميرغني شكاك..
شب ضمن كوكبة رعتهم عزيزة وخصهم بابكر بدري بالتقرب منه؛ الوحيد الفي العيلة الممتدة الكان بيخاطب جدي بابكر بي: أبوي...
درس في السودان وإنجلترا ورغم أنه الأكاديمي دون الشهادات الرنانة ولكنه جعل من شهادة الهندسة قدرا يساوي أعلى الدراسات، تقلد منصب مدير البريد والبرق وهو في شبابه. واحد من آل بدري الذين يميلون للون الأحمر القاني. صعب أن أقول إشتراكي فهذه الأسرة روحها إشتراكية، ديمقراطية، ليبرالية مسلمة.....
في يوم كنت مع شيخي الحبيب قاسم مخير ونتكلم عن ماضي صيدليات الوالد الذي تركها ليكون موظف حكومة ومن بعدها خوجة بالجامعة... لفت إنتباهنا أن من بين أهلنا، غرابة ولا حلب ولا رباطاب!! أغنى إتنين هم فارروق ميرغني وكمال موسى بدري (طبعن شوقي بدري)، بس ظهر لي فترة وكسابقيه كلها ذي حقت موظفين الحيكومة، قرشين وسط المفلسين ثراء :)...
كان العيد هذا حاله.....
الحبيب البروف وإن تسألوا عن شئ يبدو ليكم "يحزنكم"
الTestosterone
لو فككناهو
وقلنا: test أكيد فيهو سقوط
وإن بالعربي فرتقناهو، وقلنا شبه "التيس" أكيد "سترون" ما لا يحمد عقباهو. ما هو إن نحنا "كِبرنا" هو (عجز) :eek::eek::eek:
إن شاء الله السنة دي، أبرك وأخير :cool::cool::cool::cool:

[imported_Hassan Farah]

الرحمة والمغفرة والجنة للمهندس فاروق ولوالده استاذنا المحبوب فى مدرسة الاحفاد الوسطى فى الخمسينات الطيب ميرغنى شكاك... تعازى الحارة للسيدة عزيزة ولكل الاهل ربنا يصبركم ويجبر كسركم
ابن العمة العزيز عيدكم مبارك وكل عام وانتم طيبين
امس كنت اتواصل فى الفيس بوك مع شقيقك المهندس احمد وسبحان الله الحديث كله دار عن الشباب السودانيين الذين التحقوا بداعش وقتلوا وقد ذكر لى اسم احدهم وهو الشاب محمود راشد سيد احمد وكذلك هناك ايضا ابن اخى لشوقى اسمه كمال بابكر ابراهيم بدرى...يا للأسف شباب فى عنفوان الشباب كان يرجى منهم الكثير ماتوا ميتة رخيصة

[بابكر مخير]

بمعاونة العم "قوقل" الكريمة وبواسطة معرفته الواسعة ودرايته الما ليها مثيل، لقيت البلوقات "المدونات" الأهداف منها شنهو. لقيت نفس الهدف الأنا فكرت فيهو متضمن، دآ ذكرني لأيام لندن الأولى والفتيشي عن الشغل، واحدة من الوظائف الحظيت بيها كان سكيورتي في مبنى جديد ودآ كان في الشتآ، بالله عليك أولن تبادي، المبنى لساتهو جابو الإسمنت والحديد والحتة نقعآ "إتو مش برضهو معناها، فراغ أو خلآ؟؟" المهم، كان الكلام دآ في شتآ أوربا البارد وعليهو كمان جو إنجلترا المطرته صععععععب تقيف..
يا زول الحكاية غلبتني تب، إتلفتا لقيت يوسف أخوي عامل ليهو مطعم وبخبرتي كصيدلي يعرف يعجن ويخلط الأمور بمقاييس وتوليفة، قدرتا أثبت نفسي وبقيت شيف مسائي "بارتايمر"، لكن برضك صيد الوظيفة كان هاجسي.
آها في مرة قلتا ألنشوف فكرة عمل خاص، لكن وين يا عنيا، راس مالي يا ها منحة حكومة جلالة الملكة.
فكرتا في العمل الطوعي وإحياء المجلس الوطني ضد المخدرات الكان عملته في السودان وطرحتا الفكرة للبنية ذات الأصول من جزر الهند الغربية وبالتحديد البهامز في ال job centre فقالت ليا دي بتعتبر وظيفة وإحنا بنساعدك، عملتا المجلس الأهلي العربي ضد الإدمان والمخدرات "انسان" وأول شغلانة كانت إصدار كتيب، السعوديين دفعوا ووزارة الداخلية دفعت (طبعن البريطانية) ومجالس وستمنستر وكينزينغتون وتشيلسي البلديات.. (يكون عشان أول قروش إستامتها من ناس مجلس بلدي تشيلسي بقيت بشجع الفريق دآ looool)...
برضك كان هدفي ممارسة شغلانة بعرفها (مكافحة بس ;)) وحسي لقيت فكرة المدونة، لكن بتاعت لندن جابت ليها قريشات ما ذي قصة المدونة.....

[بابكر مخير]

العواطف الجياشة، المحنة المفرطة وبنفس القدر من هناك الحزن العميق والآسى المبالغ..
دي سيكلوجية "الكُبآر"..
زمان، تحب وترتبط وقبلها سلام، فكلام، فميعاد ولقاء و لي آخر المسلسل وتفركش. لا تحزن على عشقن مضى ولا حبن إنجرح. طبعن دي ما هي الواقع المتطبق على كل زول، ما هو في شواذ :confused::confused:. ناسن يألهو الحب ويبالغو في تقديره وحتى لو تلاشى. فهناك الحزن والجراح التي لا تشفى ولا تندمل. كانت العواطف في قاموس فتوتنا! إسم فقط للعديد من الحسان والمحنة هي ترجمة للشئ الذي تحسه عند مقالدة حبوبتك ليك.
كان الحزن بس لمن ما تظبط معاك شغلة وتحزن على الوقت الإضعته عليها والآسى مما مضى دون مقابل..
حسي؟
على النسمة البتهب وتمشي والعصفورة الفوق الغصن وإنضربت بي نبلة،، وقعت وماتت وحتى لي دخان الشيشة ولا السيجارة والبيطلع وما يرجع.. تفقدهم وتشعر بي حزن لي فراقهم..
وكمان لمن تسمع طآري زولن كان لا قيته في سفرة وحتى ما متذكر متين ولا لي وين؛ قلبك يفر ودموعك ترقرق وتهتز العاطفة وتعرف معناها حقيق بأنها شعور وإحساس مبالغ ومتناهي..
ما إسم لواحدة من الحسان، الكان زمان

[بابكر مخير]

الخرف والحاسة السادسة نقيض عند الكِبر....
عادتي الإستماع صباح كل يوم للأفم أم بتاعت سكينيوز العربية،
سواء وأنا سايق ماشي الشغل أو حتى أيام العطل الرسمية والأعياد، عادة لصقت بيا من زماااااان، زمن صوت أمريكا ومونت كآرلو (الإذاعة مش بتاعت أخونا في الفيس) وبعدها ورثت العادة دي البي بي سي الي أن تراجت تاركة لينا يتامى وفي يد هذه التي لا ترحم، جنس آذى يعني والله لو لا شوية مع المذيعات ديل كان الواحد يقول يقموا عليهن الحد،،،
غايته أنا بقول عليها "ذي بلو الأف أم" ولا "Xxx fm" المذيعة بين الشقهة والزفرة تتطلع الكلمات sooooo sexy حتى لو كان الخبر عن الإعصار ولا إجرام داعش. الكلمات بلهجة لبنانية مميزة، شئ مو شئ.....
المهم تفتح الراديو وتشعر بأنك خلاص إتملكت الحاسة السادسة، مع أنه قالوا الحاسة السادسة دي في الحقيقة أنه الدماغ فيهو مكنة السفر في الزمن صغونية فالبحصل أنه قبل الحدث ما يحصل بجزيئ من الثانية يعني نقول الآتو ثانية تسبقه وتشوفه ويبقا كانه إتكرر ليك وتكون حاستك السادسة صادقة..
آها ناس الإذاعة دي، كل يوم وفي نفس الساعة والوقت يعيدوا شريط الأخبار فتعيش في وهم أنك الحدث دآ عشته أمس وتقوم تتلخبت وتقول يا ربي دي حقيقة ولا تخيلات خرف....
الله يجازيهم أكان في كُبرنا دآ عايزين يلجوا بينا.....
الحصل دآ خلاني إتذكرتا فيلم
Groundhog Day

[بابكر مخير]

كتب الحبيب دكتور صديق أمبدة موضوع ورسلته ليا مدينة بتي في الواتساب الفتحتة بعد كمين شهر كدآ. وإتكلمنا بعدها بالتلفون وحكيت ليها عن صبر ناس سودانيات وتحملهم ليا في بوست "الكُبر... ثقيل" وقلتا ليها مفكر أعملها مدونة وأكتب فيها عن تجاربي في الدنيا ولو قدرتا برضك أعكس خبرتي في آيتها مجال ممكن للناس تستفيد منهو..
قالت ليا "المسكينة" وبكل طيبة خاطر: رسل ليا اللنك عشان أقراآ :eek:
وبهت الذي سرح وإنبهل في ذكر الأمور الت سكتت عنها شهرذاد ونسى أنه كتاباته..
شيتن ما بيفهمو إلا "كوكي" وشيتن بين سطورهو بيفك طلاسمه "جيلينا الجميل" وشيتن أنا ظاتي لو لا بصمة اليد في الكيبورد وال DNA...
إلا بنكرهو بي شدة و
" أغالط نفسي في أصرار وأقول يمكن أنا الماجيت".
تقوم البت تقراهو بعدين :mad: و :(:(:(
علي أبوها ظاتهو ;)

[بابكر مخير]

بفي يتك
تسرح تمرح. تقول التدورهو وما تسمح الاما تدورهو..
وانا في بيتي هنانا بين احفاد وجنيات واخوة ودفعة بتصرف على كدآ؟....
دحن اشاركم الموضوع الكتبه اخويا (ود امبدة) .....
وبعدين الكتبهو فضيلي جماع في الكتبهو صديق انبدة والسطرين الكتبتهم انا...
....................

مدينة بابكر بدري:

"العميد" مُشترك



Inline images 1

د. صديق امبده



"وحات بابكر نعمة حياتي "اتغديتو؟".

كان هذا استفسارها المعتاد عندما يأتي معي الي منزلها العامر "رقم عشرة شارع الجمهورية" زملاء أو زميلات من الجامعة، وهو دأبها مع الكثيرين.

كان ذلك في نهاية الستينات وبداية السبعينات من القرن الماضي ، عندما كنت طالبا في جامعة الخرطوم ، وحتي نهاية السبعينات وبداية الثمانينات بعد أن أصبحت استاذا بها.

كان منزلهما ، وزوجها العم ابراهيم قاسم مخير، مفتوحا والباب الخارجي علي مصراعية لا يغلق "خالص". يا لذلك الزمن ويالهما من مثال. هذه السيدة أفضالها عليَّ وعلي غيري لاتُعد. "من شِدَّة " معاملتها لي وحنوِّها ، كنت ، ولا زلت، اعتبر نفسي مثل أبنائها (بابكر واحمد كوريا وعلي ويوسف وعزيزة وقاسم - عليه الرحمة).

وربما لست وحدي من يعتقد ذلك، فقد قالت لي آمنة محمد بدري - زوجة كوريا - ذات مرة (كنت قايلاك أخو ناس كوريا)، وعند زواجي وقبل سفري مليط والفاشر لإكمال مراسيم الزواج، فوجئت بالخالة مدينة "تعمل" لي حفل زواج في منزلها قبل سفري.

أتيت من بادية "الزَيَّادية" من شمال دارفور إلي جامعة الخرطوم ( إعرابي في المدينة ، كما جاء في احد كتب الاطفال في المدرسة الاولية أيامها) وكان منزلها ملاذا، وقد كنت الألصق به من بين أهل زوجها من شمال دارفور، لكنني لم اكن وحدي ، فقد عرف المنزل قبلي الاخوة الدكتور ادريس احمد الحاج، والعميد شرطة ابراهيم احمد الحاج، والاستاذ ابراهيم محمد عيسي رحمه الله ، وقد أسبغت عليهم جميعا من ترحابها وحسن معاملتها الكثير، إذ كان ذلك طبعها.

عندما "خربت" المهدية، قيل أن الناظر جمعة ود جادين وكان ناظر "الزيادية " حينها ، قال لمن بقي منهم بعد كرري: "يا عرب غرِّبو" ، فاستجاب الكثيرون ، وكانوا يبكون شوقا لديارهم، وبقي البعض مع الخليفة حتي موقعة "أم دبيكرات".

والمعلوم أن قبائل الغرب قد تم تهجيرهم قسرا لامدرمان ، وعند مقاومتهم مات منهم في دارفور"خلق كتير" علي يد عثمان أدم "عثمان جانو" الذي ارسله الخليفة ليهجِّر القبائل لامدرمان (لحماية حكمه) وكان شابا حدثا في العشرينات من عمره وذو قساوة بالغة.

بعد "الكَسرة" بقي مع الخليفة نوابه ومستشاروه ومنهم "ابراهيم ود مخيَّر" جد العم ابراهيم قاسم مخير، عميد كلية الصيدلة الأسبق بجامعة الخرطوم. وكان "ود مخير" من ضمن كبار قادة المهدية الذين تم نفيهم الي مصر، ثم سمح لهم بالعودة بعد حين، فكان من حظ أبنائه وأحفاده التعليم عن معرفة بقيمته ، ومن حسن حظ أمثالي أن لحقهم التعليم المجاني وبالصدفة قبل فوات الاوان. "كان ذلك في الأعصر البائدة" ، كما قال صلاح احمد ابراهيم في قصيدته التي يقول فيها "يحج مرار وللمسلم الحج في العمر مرة".

كان ابراهيم قاسم - حفيد ودمخير - زميلا وصديقا ليوسف بدري "العميد يوسف بدري لاحقا – عميد آل بدري وعميد الاحفاد" من أيام المدرسة الإبتدائية وحتي الدراسة الجامعية في بيروت. تلك العلاقة والصداقة التي ربطت بينهما سمحت لهما بتبادل الزيارات المنزلية.

وقد نتج عنها وعن تلك الزيارات أن تزوج ابراهيم بشقيقة صديقه يوسف بعد تخرجهما وشغل ابراهيم قاسم في صيدليته. ويجدر بالذكر أن العم ابراهيم قاسم كان صاحب أول صيدلية في السودان "إجزخانة أمدرمان" بالقرب من الجامع الكبير في ام درمان - السوق، في الثلاثينيات من القرن الماضي، لكنه عندما عيُّن "كبير الصيادلة" فيما تبقي من "السودنة" في العام 1958 اوقف عمله الخاص وأحضر كل الدفاتر للبيت و" تم رشها بالجازو حرقها" ، لتضارب المصالح (كما كان الحال حينها وحتي وقت قريب).

مدينة هي اصغر بنات نفيسة بت الريف (من اصول مصرية) وقيل أن والدتها كانت رافضة الزواج من أحد أبناء الانصار لأنها شاهدت مقتل بعض أهلها علي يد الانصار عند فتح الخرطوم. ولكن بعد أن تعرفت علي صهرها عن قرب بعد زواج إبنتها كانت علاقتها معه في غاية الود.

مدينة خريجة كلية المعلمات لكنها لم تعمل بالتدريس الا قليلا ثم تزوجت صغيرة. كان منزلهما المنزل رقم عشرة شارع الجمهورية (هو مكان كلية العلوم الادارية - جامعة الخرطوم حاليا) ويقابل مقر الاتحاد الاوربي حاليا (والذي كان مقرا لدار الثقافة السوفيتية وقتها). وكان المنزل "منتدي" أو "نادي" في الحقيقة ، وقد كان عامرا بالرواد - طيلة أيام الاسبوع - وغالبيتهم من آل بدري.

و كانت مدينة بشهادة الكثيرين من اكثر شخصيات اسرة (آل بدري وآل مخير) تواصلا وعلاقات اجتماعية. ومن رواد النادي الذين اذكرهم في "عشرة شارع الجمهورية" (صديق مخير- مساعد مدير البوليس الاسبق وزوجته زينب يحي الفضلي (وهو عم ابراهيم قاسم مخير)، محمد بدري وفاطمة بت العم (فاطمة عبدالكريم بدري) ، صالحة بدري وزوجها الاستاذ خالد موسي، عزيزة بدري و فاروق و الطيب شكاك (ابنيها) (واسرتيهما) ، احمد بدري وزوجته سلافة خالدموسي ، د. سلمان بدري وزوجته انيسة ، العميد يوسف بدري واسرته (ولكنه لم يكن مداوما).

ومن الشباب وقتها قاسم بدري وامنة ونفيسة الصادق بدري وحسب سيده بدري والشباب الاصغروالاصغر جدا الطيب فاروق (رحمه الله) وعثمان فاروق وابراهيم وعثمان (اولاد العم) واشرف وامنة وعديلة وايمن محمد بدري وبعض الذين كانوا صغارا أصبحوا الان جدودا .

ومن خارج الاسرة (احيانا) الدكتور احمدعبد العزير وزوجته الدكتورة سيدة الدرديري واخرين كثر(ما بنعد كتير الديش) ، رحم الله من غادر هذه الدنيا الفانية و اطال الله في اعمار الباقين.

ربما لأنها الاصغر، فقد حظيت بحرية اكثر، وقد تعلمت "السواقة" في حوالي عام 1960 وقد كان زوجها من اوائل من امتلك عربة من السودانيين (في اوائل الاربعينات). وقد كانت تقوم بشئون الصرف علي المنزل بتفويض كامل من عمك ابراهيم قاسم وتقوم بالتحويل لابنائها الذين يتلقون تعليمهم بالخارج. كانت تملأ المنزل بالمرح وتشعرك أنك في بيتك و تلعب الطاولة والويست مع ابنائها والضيوف من الاسرة. وتسبقها دائما ابتسامتها في الترحيب بالضيوف أيا كانوا.

يقول فاروق الطيب (الذي توفي الاسبوع قبل الماضي - رحمه الله ) إن مدينة هي مثل اخته الكبيرة إذ أنه تربي معها وعزيزة والدته هي أختها الكبري، وكانت تحبها كثيرا وحزنت حقيقة عندما سبقتها في الوفاة وكانت تتمني لو كانت هي الاسبق للدار الاخرة.

فاروق (الذي كان مديرا للبريد والبرق عند انقلاب هاشم العطا، وقيل انه كان مرشحا للوزارة (كان صديقا لعبد الخالق ، كما أكد ذلك مؤخرا محمد محجوب في مقاله عن عبد الخالق) يتذكر أنها كانت تقوم باستضافة ضيوفه من الخواجات مثل المديرالعام لشركة فيليب عند حضوره للسودان وكانت هي التي تقول له: "جيبهم أعزمهم عندي".

و يستدرك فارق قائلا: "لم تكن لتستطيع ذلك لو لم يكن ابراهيم قاسم نفسه كريما"، وقد صدق فاروق، فالبقارة أيضا يقولون: "الكريم بأم عيالة"- أي لو لم يكن هنالك توافق في الكرم من الزوجة أيضا لما ظهر كرم الرجل في منزله مهما كانت رغبته في ذلك وبذله لماله. ك

انت من الكرم بحيث يصدق فيها قول الشاعر طه ود الشلهمة في أحد شيوخ البطاحين: (الجود من فضايلك يستلف ويديَّن " الياء الاولي لاتنطق ") . ورغم علاقاتها ومعارفها الواسعة فقد كان لها شعار وهو أنه إذا اصبح أحد أصدقاء الاسرة ومعارفها وزيرا فإنها لاتزوره حتي يترك الوزارة.

أصيبت مدينة بسرطان الثدي في عام 1977 وهي في تشيكوسلوفاكيا، وهو الذي تسبب في وفاتها بعد نحو عشرة سنوات ، وكانت قد رفضت العلاج هناك وانتظرت حتي تاتي للسودان ليقوم بالعملية الدكتور احمدعبد العزيز (كبير الجراحين حينها وصديق العائلة).

وقد كانت في غاية الشجاعة إذ تحملت المرض في جلد وصبر شديدين. وهي علي فراش الموت استدعت أختها عزيزة و ستنا بدري (التشكيلية المعروفة) والدة بابي (بابكر محمد عبد الكريم بدري) والذي كان موعد زواجه علي الابواب، وقالت لهما:

"ماعافية ليكم لو اخرتوا العرس، حتي لو مت والعرس في نفس اليوم".

كانت عزيزة بدري شقيقتها الكبري، وكما ذكر فاروق، فقد كانت تحبها وتعتبرها مثل بنتها وقد كانت زعلانة/حزينة لوفاة مدينة قبلها. وعندما بتروا يدها (نتيجة مضاعفات سرطان الثدي)، أثر عن عزيزة أنها قالت: "ماطبعا يا شاطرة سايقة العربية ومطلعة إيدك ما لازم يسحروك".


في يوليو1971، وفي يوم فشل الانقلاب، كنا في البيت ونسمع صوت الدانات وفجأة ، والباب الخارجي فاتح علي مصراعيه كالعادة، دخلت عربة مسرعة المنزل (توش) ونزل منها صاحبها وكان قادما من جهة شارع القصر بشارع الجمهورية (الشارع كان مسارين)، وكنا جميعا تحت الشجرة، اتت العربة مندفعة حتي كادت أن تصطدم بالجالسين، ونزل السائق.

كان رجلا في حوالي الخمسين فنزل من العربة وجلس وتنفس بعمق (دون أن يلقي بالتحية حتي)، ثم بدأ يحكي أن الدانات قد هدت القصر، ولم يبقي فيه شئ وذلك من ضمن اشياء اخري كثيرة. كان ذلك حوالي الرابعة أو الخامسة مساء فيما اذكر، وبعد فترة و"جَمَّة نَفَس" غادر الرجل الي وجهته .

مكثنا تلك الليلة في المنزل، وفي الصباح الباكرعندما هدأت الاحوال، اقترحت الخالة مدينة ان نذهب ونشوف الحاصل. فاعتلينا عربة البيت الـ "كورسير" وكانت هي السائق. ذهبنا بشارع الجمهورية ولدهشتي شخصيا وجدنا القصر في حالو الا من "ترمات" في الجنبتين (أو الناحية الشرقية) إن لم تخني الذاكرة. ومن يومها قررت الا أصدق "قول قالو". إذ يمكنك ، قبل ان تستوثق أن تنشر كلاما من نسج الخيال او فيه من المبالغة اكثر مما فيه من الواقع. وقد قيل قديما: " الكضب من قِلَّة الأكيدة".

في يوم مظاهرة التأييد لانقلاب هاشم العطا، كانت مع ابنها احمد "كوريا" في الميدان الذي كان أمام مبني وزارة التجارة - مكان الحديقة الحالي - ورأت عبدالخالق محجوب، فقالت لاحمد: "داك عبد الخالق وديني اسلم عليه" - هي خالة نعمات مالك زوجة عبدالخالق - وبعد التحية قالت له " قلبتوها حمرا خلاص"، فاجاب عبد الخالق بكلمة واحدة : "أغبياء"، وذلك كما يتذكر كوريا بوضوح.

ككل النساء، كانت لها قصص في السنوات الاولي للزواج. فقد كتب بابكر مخير - في "سودانيات" في اغطس 2008 عن والدته - أنها روت لهم "حماقات" الزوجية في الايام الاولي للزواج، فقالت:

(أبوكم من أول أيام دلَّعني شديد ودا ما كنت عايشاهو في بيت أبوي، ما نحنا عشرين . وأنا أستمرأت الحكاية دي وزوًّدتها حبتين. مرة كنا زعلانيين مع بعض وأقول لي أبوكم، وديني بيت أبويا. وهو وحاتكم، سادي دي بي طينة ودي بعجينة، لمًّن سمعت السيدة بتول (بنت الامير يعقوب وجدتي من أبوي) جات تطيِّب في الإمور، لكن دون فايدة،. آها أبوكم إستنَّى لمن وصلني بيت أبويا كالعادة، وهو في طريقو للإجزخانة بدون ما يقول أي حاجة. وأنا كلمت أمي بأني زعلانة وما راجعه بيتي.

المساء مفروض يرجع أبوكم يسوقني نمشي البيت كالعادة. ما جاء .. وييييييييييييييين على الساعة تقريبا 11، جا يوسف أخوي، وسأل: وين أبو خليل لسة ما جا؟؟
ردت أمي: لا يا شاطر، ما هي زعلانة وما راجعا بيتها.
يوسف: يعني طلَّقوها ؟
وأنا أريتني ما رديت: لا بس أنا ماعاوزة أرجع.. 
المهم من حي الشيخ دفع الله لحدي حي الأمراء، يوسف قدَّامي وأنا أجري وراهو عشان ألحقو لمَّن وصلنا خشم الباب ... أبوكم فتح الباب وقال ليوسف: أدخل.
يوسف: لا أنا جيت أجيب ليك أمانتك راجعة. إحنا سرايرنا في الحوش عددنا، لو عاوز ترجعها لينا، جيبا ومعاها سرير. .. الإتنين ضحكو وأنا دخلت حزينة في وكتها، لكني حمدت الله أنو أهلي رجعوني وعشت لمن جيتو إنتو)

حتي الايام الاخيرة واليد مبتورة وريحة الموت حايمة ، لم تفقد روحها المرحة والضحكة المجلجلة، وكانت تكرر أمامنا وعمك ابراهيم قاسم موجود:

"انشالله يا بوقاسم اموت قبَّالك وتدفِنِّي. (صمت ثم تواصل) وتجي راجع تطُّقك عربية تدشدشك حِتَّة حِتَّة".

نم تطلق ضحكة عالية.

توفيت الخالة مدينة - رحمها الله - في نهاية يوليو 1985، وهذه ذكراها الثانية والثلاين تمر، وقد ظل هذا المقال معلقا علي انشوطة رغبتي في كتابته طيلة هذه المدة ، وها هو يخرج أخيرا دون أن يوفيها حقها ، فقد كانت "أنثي ولا دستة رجال" ، كما قال شاعر الشعب محجوب شريف.

رحم الله مدينة بابكر بدري رحمة واسعة، وأحسن إليها بقدر ما احسنت اليَّ، والي أمثالي، وبقدر ما أحبَّت وأكرمت واشاعت البهجة في أهلها وضيوفها الكثر،

وحقَّ لها أن أقول عنها "العميد مشترك"،

دون غمط لحق العميد يوسف بدري ،

رحمهما لله رحمة واسعة.

صديق امبده
سبتمبر 2

منقول من ( Abdinlist)

[عكــود]

سلام يا بابكر،
كتابة عظيمة عن إمرأة عظيمة، والعظمة وراثة وشفناها فيك.

رحم الله مدينة وأحسن إليها وجعل البركة فيكم وفي ذريتكم إلى يوم الدين.

تحياتي

[عبد المنعم حضيري]

فضيلي جمّاع:
شيخي صديق أمبدة.. وجب شكرك!
image

حملت لي رسائل هذا الصباح مقالاً لم أقرأ مثله قريبا في أدب الرثاء والإعتراف بالجميل لمن ذهبوا من هذه الفانية. المقال محل حديثي اليوم كتبه العالم ورئيس قسم الإقتصاد بجامعة الخرطوم سابقاً الدكتور صديق امبدة. وقد قلتها من قبل بأنّ صديق امبدة أديب ضل طريقه إلى الأرقام وعلوم الإقتصاد. ولعلي أضيف قبل الكلام عن المقال (الرثاء) وكاتبه ، أن كاتب هذه السطور كان في نيته منذ سنوات كتابة مقال عن الدكتور صديق امبدة والتعريف به للأجيال الجديدة - بل ولعامة السودانيين. حاولت وصرفتني الشواغل عن كتابة مقال أرد به ديوناً للرجل عندي مذ كنت طالباً بالثانوية حتى كبرت. لقد أردت بهذا المقال أن أزجي له الشكر أصالة عني وإنابة عن كثيرين، عملاً بقاعدة أن نشكر من قدم الصنيع وهو حي يرزق. أما أدب (الله لا جاب يوم شكرك) فذاك شيء لست من أنصاره!
أعود إلى ما لفت انتباهي في مقال رثاء الدكتور صديق للسيدة مدينة بابكر بدري - زوجة الراحل ابراهيم قاسم مخير أول عميد لكلية الصيدلة ووالد الصديق احمد الملقب بكوريا وآخرين. جاء الرثاء في الذكرى الثانية والثلاثين لرحيل هذه السيدة – بنت ام درمان التي حرصت وزوجها- أن يظل باب حوشهما مفتوحاً لكل طارق وزائر. ثم كيف أنها كانت تحلف عليهم وهم داخلون لبيتها بأبيها بابكر بدري نعمة حياتها كما كانت تقول إن تغدوا أم لا؟
المقال موضوع حديثي لكاتب من أقصى شمال دارفور – من مليط حاضرة عرب الزيادية - والذي كان في الستينات وأوائل السبعينات طالبا باقتصاد جامعة الخرطوم ثم اختير محاضرا بها. كانت صلة القربي مع إبراهيم قاسم مخير زوج مدينة بابكر بدري سببا كافيا أن تجعله زائراً للبيت في عطلة نهاية الأسبوع مع آخرين يتفقدهم إبراهيم مخير ويتفقدونه، في مدينة تبعد مئات الفراسخ من مسقط الرأس وتبعد بحساب الحنين للأسرة والوطن الأصغر آنذاك أطنانا من الشوق والوجد. يقول صديق بأن الراحلة مدينة احتوته كأم - بل إن آمنة زوجة احمد كوريا- حسبته آنذاك أحد أشقاء كوريا وقاسم. وإذ يكتب صديق هذا المقال المشحون بالذكريات العطرة عن سيدة سودانية فتحت قلبها وبيتها لأهل زوجها ولكل ضيف وعاملت طلبة قادمين من دار فور وكأنهم أبناؤها من صلبها، أن يقول صديق امبدة الذي أدعي أنني أعرفه وأعرف رفعة تفكيره الوطني وسموه الثقافي – أن يقول هذه الشهادة في حق مدينة بابكر بدري فكأنما يقول لنا: أين تلكم السيدة الرمز للوطن وتلاقح ثقافاته من آفة حلت بنا اليوم، تحمل السواطير والمدي لتغير على طلاب وطالبات دار فور العزل في حرم دار العلم! أين قلب مدينة بدري ينبوع الرحمة مثل كل قلوب الأمهات السودانيات من قلوب هؤلاء؟
في المقال اسقاطات إنسانية لا تخلو من روح الفكاهة التي تحلت بها الراحلة العظيمة حتى وهي على تعاني من المرض اللعين في أخريات أيامها. نقل صديق ذلك بأسلوب جعل من مقال الرثاء توثيقاً لسيرة حياة أمرأة سودانية نادرة المثال. لقد نبهني مقال الدكتور صديق امبدة إلى ما كنت نويت كتابته منذ عقود عن كاتب المقال وفضله علي شخصي الضعيف وعلى آخرين من تلامذته. وقد يسأل سائل : ما علاقة التلميذ والأستاذ بينك وبين الدكتور صديق امبدة حتى تحسب نفسك أحد تلامذته ، أنت خريج الآداب؟
استاذي في نظري هو من يعلوني علما ويعطيني دون انتظار عائد. أعترف اليوم أنّ حصة كبيرة من قراءتي للشعر وللأدب السوداني ومحاولة قراءة أنماط من المعرفة بأكثر من لغة كان ممن وقفوا خلفها آنذاك وشجعوني طالب الجامعة وقتها صديق امبدة رابح – زميل الدراسة وصديق العمر لشقيقي علي جماع. كان صديق أول من حبب إلى شخصي قراءة مصطفى سند وشعراء الحداثة وكتابات كامي وماركيوز ويوسف الخال والسياب. كان يعطيني من الرعاية والتشجيع في هذا الجانب ما رفع همتي وأشعرني أنّ ما كنت أكتبه من "شخبطات" له قيمة. وصديق امبدة - الذي يعرف أن شقيقي علي جمّاع كان يدخرني لدور يراه أهم من الإنشغال بالشعر والأدب- كان يرى أنني ولدت لدور غير دور الطبيب أو المهندس أو الموظف الناجح الذي يريده لي صديق عمره علي جمّاع – والذي كان مؤهلا له أكثر مني دون شك. فقد شغل شقيقي علي بنجاح يحسد عليه أهم وظائف الإدارة وتقاعد وهو خبير للأمم المتحدة – زاده الله خيرا وزادني محبة له. وقد تعلمت من علي جماع ومن صديق امبدة صحبة الكتاب.. فالرجلان يقرآن في شتى المعارف بغزارة يحسدان عليها !
صديق امبدة لمن لا يعرفونه هو كاتب المقال النادر، الذي يقول المحظور، وبلغة تجعل المقال مرافعة عالية المستوى ! كتب مقالاً بعد انتفاضة أبريل حول شهادة لندن وفضح أولى نوايا مثقفينا وغير مثقفينا من المقتدرين من المتعلمين في الصمت على حائط مائل لبنية التعليم في بلادنا. ضج البعض وسكتوا.. ثم إن صديق امبدة هو أول من أشار بإصبع غير راجف ولا واجف إلى (مثلث حمدي) أكثر نتوء عنصري في أطروحات نظام الإخوان المسلمين الذي أضاع هيبة ماضينا ونضارة حاضرنا. وصديق امبدة كتب الكثير الخطير ولكنه في زمن الزعانف ، تشهر في وجهه سيوف الجهلة والإمعات وأدعياء المعرفة.
يا دكتور صديق امبدة- وأعرف أنك تكره تلك الألقاب- ذكرني مقالك المترع بالوفاء للحاجة مدينة بابكر بدري بديونك على شخصي الضعيف فقلت أشكرك على رؤوس الأشهاد، فمن لا يشكر الناس لا يشكر رب الناس. لا شيء عندي لأهديك غير كلمات لا ترقى لمقامك أيها العالم الجليل والأديب الذي سرقته علوم الإقتصاد. وقديما قال الشاعر في حالة من هو مثلي:
لا خيْلَ عندَكَ تهديها ولا مالُ فليُسْعِدِ النُّطْقُ إنْ لم يُسْعِدِ الحالُ
أطال الله عمرك ونفعنا ونفع أجيالاً من بعدنا بعلمك وأدبك أيها الأديب والعالم كثير التواضع!


التوقيع / فضيلي جمّاع
أحد تلامذتك في حوش المعرفة

[عبد المنعم حضيري]

الكمندان وضيوفه الكرام لكم التحية

[بابكر مخير]

الكمندان وضيوفه الكرام لكم التحية

الحبيب منعم
شكرا لك فقد رفعت عني معاناة تنزيل مرافعة "فضيلي" وكلكعة التكنلوجيا؛ في حق صديق أمبدة وهو الذي كان جمع كبير من السودانين "خاصة المغتربين" يحملون عليه حنق عند ما تناول تقييم الشهادات الثانوية في ذآك الحين وكذلك فقد رحمت ويدذ سودانيات من زخم إضافة الموضوع..
شكرا ليك الحبيب.
تعرف أجمل الحاجات لمن تلقى زولك يمدح زولك ويجي زولك التاني، يمدح الزول المدح زولك :eek: غلوطية مش كدآ :D:D:D:D
أنا بدوري رسلت ليهم إتنينتهم:

(زاد فخري فوق فخري، فخرا
قلمين والقلم يكلم قلم
شكرا صديق وشكرا فضيلي
الأول جلب الصندل والثاني أضاف المجموع فصار بخور ليلة الجرتق لأمنا في ذكرى رحيلها.
عروس أعجبت أهلها ونسابتها وكل ممن عرفها. عن قرب أو من بعيد
شكرا لكيم الحبايب)

[بابكر مخير]

سؤال
هل شاخ بوستي ولحقني
أم كبُرَ وصار واقع أم شاب وطريقه ممتد
ولا لساتهو صغير وقدامه مستقبل
إجابتكم هي الحكم goood
بمناسبة عدد ال 400 ومرور سنتين إلا شوية

[عكــود]

سلام يا بابكر،
كتابة عظيمة عن إمرأة عظيمة، والعظمة وراثة وشفناها فيك.

رحم الله مدينة وأحسن إليها وجعل البركة فيكم وفي ذريتكم إلى يوم الدين.

تحياتي
يا حبيب مداخلتي دي ما ظنيتك شفتها،
ده دليل انو بوستك ما زال طفلا يحبو.

عن نفسي، مستمتع به غاية الإستمتاع.

تحياتي

[بابكر مخير]

يا حبيب مداخلتي دي ما ظنيتك شفتها،
ده دليل انو بوستك ما زال طفلا يحبو.

عن نفسي، مستمتع به غاية الإستمتاع.

تحياتي

كوكي الحبيب
في مسلمات وفي أمور محتاجة تمحيص وتقصي وتوكد؛ يعني مثلن قولة:
"شفناها فيك"
وتكون جآية من مصدر هو أصلن "محمص" وموثوق فيه ..
ما بيترد عليها عفويا وعشوائيا،
لا بدن الكلمات، تتمضغ وتنلاك وتتجتر مرات ومرات وليييييين كم يوم تنهضم حتى بعدين ينرد عليها...
قريتها الحبيب حينها لكن كنت مستني وخلينا على كدآ..
شكرن الحبيب، الطفل دآ بنعتني بيهو ونخليهو يبقآ زولن "فحل" :eek:
ليهو فايدة ومستقبل مشرق،،
بي بركاتك الحبيب :cool::cool::cool::cool:

[بابكر مخير]

تصحى الصباح
دون ألم مبرح ووجع شامل وحزن جامح وإكتئاب ضارب ومعنيات عادية بلا إحباط وإنهزام...
وإتا في العمر دآ:confused::confused::confused:
أكيييييييييد ولزامن؟
تقرص روحك لزوم التأكد بأنك لا زلت حيا...
بس برضك وبعد ما تقرص روحك وتطعنها بي دبوس وتتعرض لي لحسة نار وتشوف روحك في المرآية وتغمز وتفتح خشمك وتقفله وآكيييييييييييييييييد تأكدت وبلا شك أو هزيان أو زهال بأنك إتا ياكا إتا....
ما تعشم بأن الحال إتغير..
ما خلاص كِبرتا ودي ذي الأعراض العرضية، فجة وتزول...
بالله عليك بس قلتا أرفع يدي البس القميص وإلا
طآآآآآآآآآآآق
مفصل الكتف ذي الإتشال من محلهو...
بس نقول شنهو، ما ياهو دآ الكِبر وتوابعهو...
:(:(:(:(

[بابكر مخير]

بحضر ليا في دورة تدريبية عن الجرعة الزائدة وقمت إستعنت بالإبن العزيز قوقل (هو في الواقع ممكن يكون برضك حفيد حسب تأريخ الولادة) بحثا عن مسببات الوفاة بصورة شاملة، قام حولني للحفيدة "ويكيبديآ" وأفادتني بكمية من مسببات الوفاة ومن ضمنها موضوع لفت إنتباهي ما عشان جديد لكن بسبب أنه "الجمرة بتحرق واطيها"..
(الشاعر والأديب والكاتب دكتور عمر قدور، كان ضمن كوكبة ضباط كلية الشرطة ببري والتي كان يتوسط مباني الإدارة حديقة صغيرة وهو كرجل ذو إحساس رقيق ومحب للجمال والطبيعة، همه أمر الحديقة وأمر بتسويرها ووضع لآفتة تقول "لا تطئ الجمال" وبعد يومين أوزيلت والسبب كان أحد فطاحلة اللغة العربية إعترض على كلمة "تطئ" وقالوا: مهياش حلوة) دحن حسي تقبلوها كدآ حكاية "واطيها" دي :rolleyes:
نرجع للوفاة، قالوا من الأسباب مثلن (الشيخوخة) وعرفت بأنها نتيجة أمور فسيلوجية أو بالأحرى فيزيولوجيا، بس كمان الحفيدة أضافات من السطور ما يخفف القلب؛:
اضطرابات عوزية في تضاعف الدي أن إيه وإصلاحه وهي 10 أنواع "عينة كدآ موضوع الجفاف الكنا قلناهو من قبل...
يعني حقيقة كدآ بقيت بين خياريين،
إما أستمر في التحضير للدورة
أو أنفد بي جلدي وأستقيل وعنها أبوها دورة
ما هو ما معروف حتجر لينا شنهو تاني :mad:

[imported_زول الله]

صديق امبده
سبتمبر 2





التوقيع / فضيلي جمّاع
أحد تلامذتك في حوش المعرفة



سؤال
هل شاخ بوستي ولحقني
أم كبُرَ وصار واقع أم شاب وطريقه ممتد
ولا لساتهو صغير وقدامه مستقبل
إجابتكم هي الحكم
بمناسبة عدد ال 400 ومرور سنتين إلا شوية

دا سفر عظيم جداً وفخم ولايمكن تدنيسه بكتابات وردود فقيرة زي حروفنا دي
الصمت فعلاً هو قمة الجمال في حضرة النبع الأول لكل الجمال
لذلك تجدنا كـ الحيران يستمعون ويستمتعون في صمت لـ شيخ الطريقة
دمت فخراً وعزاً لكل من آنس في نفسه الكفائة لصداقتك
كللل الود عمنا بابكر








اقول قولي هذا واستغفرالله لي.....................

[imported_Hassan Farah]

أحد فطاحلة اللغة العربية إعترض على كلمة "تطئ" وقالوا: مهياش حلوة) دحن حسي تقبلوها كدآ حكاية "واطيها" دي
----------------------------------------------------------
ههههههه الكلمة دى لو جاءتك فرصة وسافرت تزور مسقط رأس اجدادك الرباطاب إياك ثم إياك ان تنطق بها....معناها كعب خلاس عندهم...: فلان وطأ فلانة معناتا....اعوذ بالله

[بابكر مخير]

دا سفر عظيم جداً وفخم ولايمكن تدنيسه بكتابات وردود فقيرة زي حروفنا دي
الصمت فعلاً هو قمة الجمال في حضرة النبع الأول لكل الجمال
لذلك تجدنا كـ الحيران يستمعون ويستمتعون في صمت لـ شيخ الطريقة
دمت فخراً وعزاً لكل من آنس في نفسه الكفائة لصداقتك
كللل الود عمنا بابكر
اقول قولي هذا واستغفرالله لي.....................


تعرف الحبيب
يجميل أن يمدح (حوار، شيخهه :cool::cool:)
لكن يابا الحقيقة أنه دآ؟!
ثناء
فوق قوامي
وإطراء
أعلى من مقامي
شكرا ليك

[بابكر مخير]

أحد فطاحلة اللغة العربية إعترض على كلمة "تطئ" وقالوا: مهياش حلوة) دحن حسي تقبلوها كدآ حكاية "واطيها" دي
----------------------------------------------------------
معناها كعب خلاس عندهم...

الكعب ما بكمل الوصف والساق الخلاس جماله عند بنات تلس. والقوام، شوايقة واللياقة بي هناك واللباقة،
ياها هناك في بلاد برآ:eek:


فلان وطأ فلانة معناتا....اعوذ بالله [/QUOTE]
ما الياهو دآ الغلبني قولهو
بس والحكاية نسبية وذي ما قلنا مع العُمر، اللسان بيبقى أطرش ولاااااااا بيهمو،،
أنا قلتها؛ متخفية بس إتا رميتها دلُب، تسلم يابا :cool:

بمناسبة السيقان والكُبر،،
بتذكر في مساء قبل سفري الصباح كان هناك تجمع كبير من الأهل للوداع وكان أغلبهم من كِبار السن وضمنهم عمنا خالد موسى خالد (الملحق الثقافي بشرق أوربا زمااان) وأنا كنت متوجه لي هناك، قال ليا موصياً،،،
بناتهم سمحااااااااات ولطيفات وسيقانهن غُلااااد، بس ما تعرس من هناك :confused::confused::confused::confused:
وفعلن كلامهو كله كان صآح وربنا لطف وما عرست من هناك...
حقيقتن لله ما عارف لييه. لكن بالجد كدآ وفي أغلب الظن أني ما كنت مهيئ بالبقاء في أروبا بعد نهاية الدراسة والإقامة الدائمة وكذلك ما كنت بفتكر أنه من العدل أنه زول عايش في بيئة أوربية تجرجره ويعيش هناك في بلدن







سبته فاضية عشان أترك للقارئ تصور الوصف اللاحق
بس أنا قاصد أقول بي كل بساطة "بلدن غير":o

[imported_Hassan Farah]

عمنا خالد موسى خالد عليه الرحمة اولاده الاثنين زملائى فى بورتسودان الثانوية...هسع اخبارهم شنو؟
كان نائب الناظر عمنا المرحوم الطيب شبيكة
ابنه الفاضل دفعتنا فى المدرسة هسع اظنو معاكم فى لندن سلم عليهو وعلى المدام والوليدات قضينا ايام جميلة فى الجزائر وكانت الاسر متواصلة

[بابكر مخير]

ود خالي بلالي ما التاني؛ (بالمناسبة وينهو التاني ليهو زماااااااان مع بدر الدين برضك)..
عمنا الطيب شبيكة كان مسمي شيخي قاسم مخير عليهم الرحمة ب"الكشاح" وقاسم طبعن أصغر عمرا منكم بالقليل وظنيتها سنة لكنه كان نابه وشاطر ولذا أطلق عليه اللقب. وبمناسبة الألقاب جدنا الخضر بدري (أخوانه كانوا ما يقولوا خضر حافي، لازم الخضر وأخوانه العايشناهم بابكر بدري والعم عبد الكريم) كان لقبه البرنجي لأنه دراستهو كلها كان الأول وهو كان خطاء يعاكس طبيعة فهو كان عليه الرحمة، الطيب، الجميل، العابد، المحترم والفنان "شارك في أثناء فترة إندابه كمهندس مساح، للعاصمة لندن عاصمة الإمبراطورية البريطانية في تشييد مطار هيثرو الشهير" لأنه الكلمة دي الإحنا بنستعمالها بمعنى الأول والأحسن حتى سجاير البرنجي المشهور بيحمل أيقونة كأس في علبته رمزا للتميز وأنه ما يعني كذلك الأول وبيقولوا وبنقول: طلع البرنجي وبرضك باقي ليا في سباق الخيل مستعملة في الواقع هي فارسية وتعني للأسف الشديد الوقح :eek:.
ما عارف كيييف مرة علينا ذي دي، هو كلمات كتيييييرة دخيلة علينا وبنرددها بدون تميز لي معناها الأصلي..
بتذكر مرة العميد (وهو لقب يطلق على من هو في رأس جسد عائلة بدري وقد توارثه يوسف عن أبيه بابكر والأن هو في يد من هو بين الرجال أعظمهم وأرحمهم قاسم "قسيم كما يحلو لي مناداته") وإحنا صغار ومن حظي أني دفعته وأني أحظى بإحترامه لي فانا أكبر منه سنا بي 18 يوم، قلت ليهو نمشي السينما يوم الخميس ورد عليا قائلا: واللهي دونت نو. فرددت عليه يا أخي خليها يس (ولا يفوت على فطنتكم أن قصده كان "know" وأنا أخذتها "no") ;)
يؤسفني يا بروف أنه إتنينتهم في مكان أرحب ونطلب لهم الرحمة والمغفرة من المكولى العزيز، الغفار

[بابكر مخير]

آآآآآآآآآآآآآآآخ فاتت علينا أيام ما كانت علبة السجاير بتراب القروش
الذكرني الموضوع دآ، زيارة صديق ليا في المكتب وأنه كل مبهجات الدنيا وصلت اليها رياح التغيير، أهو أخد عندك،،،
السجاير، نفس كدآ وإتا في زنقة بغير شوية من (مودك) نفسياتك، برنامج الشيشة الكان تمشي ليه وإتا قافل تاخد ليك فيهو ساعتين كدآ، تنفس فيها غلك مع الدخان البيطلع، بعدين (الليلة بالليل) البتغنى بيها الفنان شن طعمه أن بقآ (الجغمة) بي ثمن قنينة..
اللذيذة أنه صاحبي دآ قال: (كل ممن لا يتحمل هول الصدمة وقوة الكلمات، يعني ذي ما قبل الأفلام يقولوا: لا يتناسب مع ممن هموا دون الثامنة عشر،،، عليه أن لا يقراء الجآيي)..
برضك الهوتيلات لليلة واحدة حتبآ الزيادة فيها 100 في المية. يبآ دآ "إستنسصاد" في صالح أم العيال......
أنا بديت السجاير في عمر العشرين وأنا طالب فتشكسلوفاكيا مجاراة للدفعة وكنت إقتصادي جداً بدخن (إسبريتسا التمنها كرونة ونص يعني تقريبا العشر سجارات بي أقل من قرش وفي زمن الجنيه السوداني كان بي 3 دولار وما يعادل جنيه إسترليني ووتقريبا شلن) بتذكر أيامها كان شنقيطي (عليه الرحمة وله المغفرة) وشوقي بدري ديمة تقابلهم مشكلة لمن يمشوا البنك لإستلام التحويل، ما هو الإسم شنقيطي بدري وشوقي بدري ولكن حسب الجواز محمد صالح الشنقيطي ومحمد علي شوقي وخد بقآ وبروقراطية العمل المصرفي.
آها لمن رجعت السودان وقفت السجاير ما كنت ساكن مع الوالد وعييييييييب.
آهاااااااااااااا
برضك جآية القيمة المضافة لكن مهما يكون،
أجمل بلاد وآمن بلاد وأحسنها، ربنا حظانا بالعيشة فيها
الحمد لله على هذه النعمة

[بابكر مخير]

قالوا؛ إن العرق دساس
بالله عليك لقيت أني وشوقي بدري عندنا خصلة مشتركة وهي!؟
لا يحلو الكلام وإلا تدخل فيهو شيتن مكجنوه (أو مكشنهو وإن كان التانية دي تتداخل مع ال"كشنة" والكشنة عندنا في السودان هي البصل مع لحمة مفرومة مغلي في الزيت مع الصلصة "إذا رغب الشخص ذلك" وعليه البهارات ودي ممكن تكون الأساس للمصقعة ولا دي برضك ما عارفنهاlooool وكدآ. ويقال تاكلو كوشنة بالا بصل. أما في مصر الكشنة هي البصلة المغلية وتكون ناشفة مقرقشة (في وزير الدولة للخارجية إسمه ((قرقاش)) وتتختا آخر مرحلة في صحن الكشري).
المهم نرجع لي إبن خالي وجيناتنا المشتركة..
من الصباح قافل أنه اليوم أشاركم عن الإف أم وسكآي نيوز وكييييييييييييف حاجة تحرق الدم ولكني مجبور عليها ما هو البي بي سي السخفة ديل حرمونا من المتعة وسابونا للوجع، يا أخي ديل عديييييييييل كدي إذاعة مهببة ممكن تكون مقبولة لي حدن ما لكن مذيعينها، ولا تحتاج لي أيتها شئ.... خليهوم يزيدو المشروبات المقوية واللتبغ بأنواعه وحتى الأدوية التي منها بألوانها وجرعاتها.
أصوات كييييييييف والكلمة تطلع مع تنهيدة وتنزل بي خمة نفس يا "زلمي"...
آها لمن جيت أكتب المشاركة، لإتذكرت شوقي بدري وأنه لمن يحب يستفز الناس عشان يقروهو، يقوم يكتب عن سيد صادق (الكشنته البلا بصل)....
وإن العرق دساس

[بابكر مخير]

الدبرسة أنواع
في المفروضة وفي العفوية وفي العارضة وفي المزمنة وفي الحتمية،،
آها البدت معاي دي وحقتي الخاصة دي، هي الحتمية والشئ الحتمي يعني أن وقوعه لا مفر منه وإن خلاص بقت فيهو مخارجة بتكون هي الأسوء...
مع السنين وتراكمها. برضك بتتراكم حاجات وحاجات، أمسك مثلن مرض والغربية إسمه حنين (النقرس) لكنه سخيف وحاجة حقيقي مدبرسة وهو ياهو دآ "القاوت" الأصلن تراكم حمض البول. في السودان ياهو ناس كتييرة يقولوا ليك الرطوبة وخلاص البيعرفوا يقولوا ليك الروماتيزم وينسوا أو يتناسو أيام كانت الأعياد وخاصة عيد الضحية هي كثافة وجبات اللحم المشوي (أنا غايتهو ما ظنيتني ضوقتا أشهي من لشية السودانية) والمشهيات المرافقة(الشطة ببول الخروف) يعني بالله عليك في (أقول قرف بعضهم يزعل، أقول جهل والباقيين يزعلوا وعشان ولعدم الزعل، نقول) ضرر الإنسان بيجيبو لي نفسه قدر كدآ.
الدبرسة الحتمية تراكم السنين بيجيبها ذي تراكم بلورات؛ حامض البوليك وأملاحه والاوكسيلت لي حصوة الكلى والحالب..
آها الدبرسة الحتمية دي لا بينفعها دواء ولا جراحة، بس تسردب ليها والله يكون في عون الحوالينك... :(:(:(:(:(

[بابكر مخير]

الما كان في الحسبان مع الكُبر بيبقا....
هرمون التيسترون، بالله عليك بسبب "الثقيل" دآ يبقآ طشاش وعملية الكُبر تقول بس ترجع بيك لي مرحلة (النُّطْفَةَ). معركة شرسة بين التيسترون والأستروجين من تلك المرحلة تبتدي تميل نحو نصر للآخير على الأول..
يا زول تغيرات كتيييرة أظهرها في الصدر وكأن بروزات تلاحظ ونتوءات تبدو حاجات تتغيرlooool.
غايتهو الكُبر دآ بيلخبت الكيان جنس لخبتا :mad::mad:

[imported_فيصل سعد]

سلام يا دكتور يا كمندانا محبة و الفة و عساك بالف خير و عافية،، تعرف موضوع الدبرسة بأشكالها المتعددة التي تكرمت بسردها و تمحيصها، ما عندها أي علاقة بالكبر و ممكن تكابسك في أي مرحلة عمرية، و طبعا كما هو متفق عليه الفلس عامل رئيسي في أغلب الأحيان، و لما يجيك حبة كاش غير متوقع ممكن يفك اجعصها دبرسة و كدا :D:D و طبعا لا يخفى عليك و انت سيد العارفين انه مرات كدا تقابل و تصطبح ببعض الناس دبرستك تفك و تنمحق ، و العكس صحيح، و بعضهم يدبرسوا و يلغوا كل أسباب الفرح و السعادة و السرور، و الموضوع أعتقد يرتبط بالنفسيات و السايكولوجي في المقام الأول، لذلك انا احرص و اجتهد كثيرا لما المود و المزاج يكونوا ظابطين بحاول قدر الامكان اتجنب و اتحاشى مصادر القلق و النكد و التعاسة و البؤس و أولهم الموبايل لعنة الله عليه، كيفما استطعت لذلك سبيلا..

تجدنا متابعين هذا البوست اللطيف الظريف، و نزداد علما بنفحاته و ما تسكبه من غزير علم و معرفة و تجارب..

ارقد عافية و ابقى طيب..

[بابكر مخير]

و طبعا كما هو متفق عليه الفلس عامل رئيسي في أغلب الأحيان،
الحبيب النسيب،
جاء: المال والبنون زينة الحياة الدنيا،،
الدنيا بي مبهجاتا ومفرحاتا بتكون هي الباقية والأخرة بنعيما وجنانا هي الراجية....
والخيار موضوع نسبي،
بقيت مادي، ياكا مع الدنيا، بقيت حالم بترجى الأخرة..
جاء: عش لدنياك
طيب، تعليمات واضحة وهذه التعليمات ما ببقى تنفيذها إلا إذا توفر الكآآش.
عليه كلامك مليون في المية صآح...
المال فرض عين واجب الوفرة للقيام بواجب العيشة للدنيا..
ومش موضوع بتاع فرض كفاية، إذا ما توفر يبقى تمام وإن بقآ ما في تبقى ماشة....
وتبقى على قولك:
و لما يجيك حبة كاش غير متوقع ممكن يفك اجعصها دبرسة و كدا

[بابكر مخير]

في أيامنا كان التواصل بالهارد وير، جواب مدنكل فيهو معنى ومعاني، أولن تبادي الزول البيكتبه بحسن خطه والزول البيقراهو بيحس بأنه ماسك ليهو شيتن..
زمان كان التواصل مادي، جسدي ومعنوي...
الورقة هي المادة، الجسدي يوم تستلمه باليد ومعنوي أنه الزول الرسل ليك طاريك،،،،
أيامها وفي أيام الغربة الأولى للقراية، يوم تستلم جواب من البنك عشان تمشي تستلم دعم الوالد، فرحة ويوم تستلم جواب من أمك وأبوك، تفرح ويوم يجيك جواب من"الحب". الفرحة تملاك، تفيض وتملى الحوالينك..
بس حسي وين،
واتساب، مرض الله يمرضه... يملى ليك تلفون وووش الكتاب (فيسبوك)
يكرهك حياتك من كتر الرسايل وغيرهم هموم وباااااااااااااااردات لا لمسة ترد الروح ولا سطرن عبيروهو يفوح

https://www.youtube.com/watch?v=IlmMyGjCogE

[بابكر مخير]

اليوم والأمس تجمعهم حاجات وحاجات بتفرق ما بيناتم،،
مثلاً؛ الروتين في أنك تصحى في الصباح، أمس واليوم وكمان بآكر ودي تغلب عليها إفتراضية كبرى الا وهي أنك تحيا:(
تدخل الحمام، تستحمى ولا لا؛ سيان، تشوف روحك في المريآ، تنغما ولا تكون عادي ودآ ما بيفرق....
بيجتمعوا في أنه كل واحد فيهو حاجة جديدة، يوم أمس لي أول أمس بيجيب يوم جديد ويوم اليوم بالنسبة للأمس بيجيب يوم جديد وهلما جرآ..
بيختلفوا في أنه أمس آكيييييييييييييد أنك عشته لكن لمن كان هو اليوم الإتا مستني بكرتهو، ما بتكون عارف حي ولا ميت ودآ الإختلاف عن اليوم بالنسبة للأمس... أمس عشته وبكرتهو برضك عايش...
ناس تقول ليك نتلاقى الإسبوع الجآيي وناس تقول ليك عملتا خطة عشان أشتري شنهو وأبيع شنهو بعد ما أجمع ليا مليون دولار (مضرب مثل وبرئ)....
هو في ضمان....
حاجات ذي دي، الشباب ما بيفكروا فيها ما التفكير فيها حصري لي من تجاوز السبعين وعرف قيمة الأمس وخطورة الغد بما يحمله....
لكن برضك بيعجبني التفائل..... ولمن ناس إحنا ديل ومن صغر عنا قليل أو تجاوز مرحلتنا بقليل أو كبير يصر على أنه بكرآ يسرع....


https://www.youtube.com/watch?v=F6FgRMHqp5U

[بابكر مخير]

لو لاك !
ما كتا لقيت البعبروني
ولو لا إتا
وبعد عمري دا ما ظنيتني كنتا إتحفزتا عشان اكتب
ولو لا كرمك
ما كتا لقيت بيتن يلمني مع اخوات واخوان وبنات واولاد
عزيزي ساكن قلبي
إهدائي هذا بوصول العشرة الف
لك خلودي
طيب الله ثراك

[بابكر مخير]

مسلسل أو نسميهو برنامج، أنا واحد من الناس كنت بحبه،،
أثار في شجوني بوست الحبيب الباش الهاش بتاع الصور شئ جواني، فيهو جات صور ناس دفعة وكدآ...
بالمناسبة كلمة وكدآ دي كانت في أيام صغرتنا وشبابنا، مستعملة بي كترآ "وكِدآ"... وهو لي كل وكت تلقى كلمة تكاد تكون بطاقة هوية للجنس السوداني،، بعضهم بيستعمل كلمة
"آهااااا" حسي وبكثرة.... الأحباش عندهم كلمة تنطق كذى "كذآ" وهي تعني "وبعدين" أنا عندي حساسية بتقوم عليا لمن أسمعها والسبب؛ عندي واحدة من البنيات الشغالة معاي في "المندولا" تتكلم بالتلفون بكثرة غير معقولة، آها بقوم أقول ليها؛ خلاص التلفون شوفي شغلك، ترد على الطرف الأخر ما معناهو (خلاص يا بتي أمي بآآآآي) لكن لعذابي بتلحقها بي "كذآ" وتبداء تااااااني ترغي...
آها صور الباش الهاش نبهتني بصورة مباشرة أو غير مباشرة أنهو فينا ناس، باقية عليهم قصة "دكان ود البصير" وهم مخزن معلوماتي للقديم والآيل للزوال،، بيتعرض للقديم بسرد مسرحي من خلال المذياع بطابع جميل بقصد توثيق الماضي وتعريفهو للجديدين في دنيانا من شباب وصغار...
يعني ناس عمي حسن ود خالي بلالي وشوقي ود خالي التاني بلالي وجعفر بدري وأبو أماني و و و و و و..
ديل حقهم يفتحوا لينا فرع لدكان ود البصير حصري سودانيات ومنها داعم لي دعوة وليدنا نصوري في بوستيهو (الف مبروك) :cool::cool::cool:



https://www.youtube.com/watch?v=MZnpEkL0OlE

[بابكر مخير]

تشوف تلقى المسلسل حلقاته متكررة، أول أمس جدك كيف يقعدك جمبه ويبسط بي حاجة صغيرة يمرقها من جيبهو، أمس أبوك يجيب ينادي جناك ويقول ليهو: أمشي في العربية تلقى كيس جيبهو.. يجيب الكيس وأبوك يفضيهو والفيهو حاجات يديها لي جناك ويبسطهو، اليوم إتا وذريت جناك جمبك وتضرب تلفون تعمل طليبة حاجة يجيبها "الدليفري" وتقول لي جنا جناك، أمشي أفتح الباب والجايبنهو دآ عشانك ويستلم "البارسل" وينبسط بيهو....
والمسلسل يتكرر، يمشي جدك وتحزن لي فراقهو وتفقدهو هو والحاجات الكان بتتطلع من جيبهو. يمشي أبوك وجناك يحزن لي فراقهو وفراق الكيس البيجيبهو من العربية والحاجات الكانت بتبسطهو. وبكرآ تمشي إتا وجنا جناك يفتقد "البارسل" الكان بيجي ويمكن يستوحشك..
لكن برضك ولو حافظنا على التقاليد السمحة دي المسلسل ممكن يستمر...
ويييييييييييييييييييييييييييييين لينا منها الزايلة....

[عكــود]

متعة حقيقية قراية البوست ده والله؛
وفي شوق برضو و

كده:)

[imported_فيصل سعد]

سلام يا دكتور بابكر.. و انا في عزاء الوالدة في امدرمان بيت المال منتصف سبتمبر الماضي ، عندما جاء الأخ سعد بشير لأداء الواجب و مواساتنا، أتى معه زول بشبهك شبه شديد، و قاعدين معاى نشرب في الشاي و ندردش، قلت ليو يا ابن العم انت قريب الدكتور الكمندان بابكر مخير، قال لي بالحيل وصلت تب، بتعرفوا؟؟ قلت ليو نعم المعرفة و نعم الأخ و الصديق و الزميل العزيز، زول لطيف و وناس و كنز معلومات و زول واجب، اسمه "حيدر" طبعا انا اتحسست ما سألته الاسم كاملا و لا دققت معاو في تفاصيل قرابته معاك، لكن اكد لي و قال لي "نحن أهل و اسرة واحدة و أشقاء مع جدودك عثمان و ابراهيم على و المرحومة امك و خالاتك و خيلانك مواصلننا تب و أكثر من أهل، و انتوا شتتكم الغربة و منعرجاتها و لا بد من التواصل رد الله غربتكم سالمين" ، و أعتقد أنه من آل بدري الكرام لو ما أخاف الكذب، و جانا هو و معاو مجموعة طيبة من آل مخير و تكفلوا بفطور يوم كامل، جاء جاهزا مع ثرامس الشاي و القهوة من حي الأمراء، و ياهو دا السودان..

يديكم العافية..

[imported_نادر المهاجر]

الحبيب بابكر مخير لك خالص الود
بعد طول غياب عساك طيب .
هي سنه الحياه .. ألروح في اشراقها تحمل اجسادنا المنهكه وتريح الاقدام ..

[بابكر مخير]

متعة حقيقية قراية البوست ده والله؛
وفي شوق برضو و

كده:)

سلام يا دكتور بابكر.. و انا في عزاء الوالدة في امدرمان بيت المال منتصف سبتمبر الماضي ، عندما جاء الأخ سعد بشير لأداء الواجب و مواساتنا، أتى معه زول بشبهك شبه شديد، و قاعدين معاى نشرب في الشاي و ندردش، قلت ليو يا ابن العم انت قريب الدكتور الكمندان بابكر مخير، قال لي بالحيل وصلت تب، بتعرفوا؟؟ قلت ليو نعم المعرفة و نعم الأخ و الصديق و الزميل العزيز، زول لطيف و وناس و كنز معلومات و زول واجب، اسمه "حيدر" طبعا انا اتحسست ما سألته الاسم كاملا و لا دققت معاو في تفاصيل قرابته معاك، لكن اكد لي و قال لي "نحن أهل و اسرة واحدة و أشقاء مع جدودك عثمان و ابراهيم على و المرحومة امك و خالاتك و خيلانك مواصلننا تب و أكثر من أهل، و انتوا شتتكم الغربة و منعرجاتها و لا بد من التواصل رد الله غربتكم سالمين" ، و أعتقد أنه من آل بدري الكرام لو ما أخاف الكذب، و جانا هو و معاو مجموعة طيبة من آل مخير و تكفلوا بفطور يوم كامل، جاء جاهزا مع ثرامس الشاي و القهوة من حي الأمراء، و ياهو دا السودان..

يديكم العافية..

الحبيب بابكر مخير لك خالص الود
بعد طول غياب عساك طيب .
هي سنه الحياه .. ألروح في اشراقها تحمل اجسادنا المنهكه وتريح الاقدام ..

في زمنا الزمان كان إن زول مدحك، بتحفزك وتندفع عشان تاني يمدحوك، تعمل فوق طاقتك الما بتتأثر لأنك في عنفوان شبابك وهي متوفرة لكل الملمات والشدائد (حسي ملمات سآآآآآآآآآآآآآكت والشدائد ديك ما بتشدن لو شنهو دآك ودآك للشيب بيفهموهو كُتر مع أنه القصد منه أيتها حلل)
وإن شكروك تفرح وعواطفك تلتهب وهن أصلهن في الكت دآك علي الهبشة (حسي وييييين لو ملكة الحبشة ديك عواطفك بس لوح تلج)
والد ليهو كمين جنا من بيناتهم واحد في مظهره أنه بيكن لي أبوه أطنان من الإحترام والتقدير، ما سأله من رأي وإلا كان رده موافق لي رأي أبوهو لكنه في حقيقة أمره، أنه أناني وغير مبال وذي ما بيقولوا الإنجليز "ئن دفرنت" والوالد كان محبب له موقف إبنه دآ..
فكان لمن يسأل أبنائه التانيين والمهتمين حقيقة بالأمر في أغلب الأحيان يعارضوا رأي الأب..
فكانت للوالد قولة دوما عن إبنه "اللبيب بلإشارة يفهمو"..
لمن أمشي لي ...... ديمة يطبطب وكت أخوانهو قولهم يعذب....
آها حسي جآ القت البقت فيهو الأمور سيان..
لا مدحة تحفز ولا شكرآ تفرح...
إلا في حالة وااااااااااااااااااااااااااحدآ...
هي:
لمن تجيك من ناسن غاااااااااااااالية عليك، قرييييييييييييبة من قلبك، ساكنا فوؤادك ومالك مزاجك....
شكرن يا إنتم يا عسل....
نادر وحصر، ليك إتا إضافة،،
مرحب بيك "بعد طول غياب" وما تبقيها عادة..
خليك مواصل لأنه حضورك ثراء :cool:

[بابكر مخير]

في يوما ديك، بقراء في "الراكوبة" وفي مكان رئيسي موضوع عن الصحفي رئيس تحرير جريدة تصدر في السودان "خلي بالك جريدة وتصدر في السودان ولاقية قراء" أنه أعتقل (عاااااااااااااادي) عشان موضوع كتبه محمد زين "بكتب إسمه كدآ بدون اللقاب، لأنهو هو ظاتهو لقب وينسب ليه، كرم الأخلاق وطيبة المعشر وحلو الكلام وطرب الحديث".... ومحمد زين ظاتهو مسكهو...
القريته هجمة شرسة على الصحفي وأنه ما شنهو وما شنهو وأنه كدآ وكدآ والفعله وتركه وكلام مالك في الخمر وغيرهو كتير....
محمد زين والبعرفهو أنا، أكيد وافق على كلام الصحفي في أنه لو كان إطلع على الموضوع ما كان سمح بيهو. لييييييييييييه بقآ يا بابكر:confused::confused::confused::confused:
جدنا أجمعين بابكر بدري من أجل هدف سامي ووطني وغالي ويشهد به القاصي قبل الداني "جامعة الأحفاد"... هادن المستعمر وهو الأنصاري الحاربهم عن إيمان وعقيدة....
خليك من دآ؟!
صلح الحديبية
برضك إتفاقيات سلام وهدن أوقفت حروب طاحنة وأنقذت ملايين من الشعوب،،، كلام سيد صادق عن المعارضة السليمة البتحقن دماء أفراد وجماعات "ما هو موضوع الدواس بينقلب ضد، ذي حكاية 1976 ووصف المعارضة بالمرتزقة"...
في حاجات بيقولوا عليها "الجمرة بتحرق الواطيها" ودي بشبها بي مجموعة "الوست" بتاعتنا، الفراجة كل واحد ينظر ولمن يكون لاعب، نظرياتهو كلها تتغير والكان شايفة لمن هو برآ ونظر فيهو، لمن يطبقه "بسيكهو"...
دي بقآ هنا الإنجليز بيسموها "الماتيورتي" بتتجلى عند "الكُبر"، ما لأنه الزول عاطفته ببقآ دمها تقيل ومنحصرة في أمور محددة، ممكن تثيرهو شوفت حفيدته قدامهو وتلهب مشاعرهو قولة "جدو". وتقل الدم يتجلى في الأمور "الثورية"...
غايتهو أنا بستغرب من عواطف ناس "دفعة" ولساتها شغالة بأمور شبابية....
تلقى ود خالي بلالي شوقي ثائر حتى النخاع وهو ما "وطى الجمرة" أو على قولة تنقال وبيقولوا أنها لمولانا "يديهو العافية": أهو مدرسة السجن دخلناها... والتي هي مدرسة تخرج بي شهادة "سياسي وطني" مع أنه في المدرسة دي شتات من البشر وبرضك في السجن مظاليم......
في رأيي المتواضع أنه؛ عثمان ميرغني محق في حماية "طاقة الحرية" المتاحة والعمل على المحافظة على الحد الأدني المتاح من حرية صحافة والحبيب محمد زين يديم ليه صحته وعافيته

[بابكر مخير]

قولة وبقول تنطبق على حالي؛
يا كآفي البلا يا حايد المحن، ماااا في زول يقول الزول دآ وينهو....
طبعا ساكن هنا في أبوظبي برآي في الشقة،،، أول أيام كنت بنوم وبخلي باب الشقة ما مقفول بالمفتاح،، ما ما معروفآ الدنيا، يبقى عليا ياهو ذي دآ،،، تغيب الغيبة الياها والناس ممكن تهبشك بعد أياااااااااااام وتكون بقيت أربعة مرات من حجمك وحمامك الزمان كله ما بينش الريحة..
آها قمت عملتا ليا كمين نسخة كدآ من المفتاح ووزعتها على القاصي والداني مع التنبيه المتشدد، أنه لو ما رديت بعد 5 رنات على التلفون ولا ضربتين على جرس الباب!!
يجب الهجوم على الشقة وبسرعة قصوى حتى لا تمر الساعات وتبداء الغازات تتفاعل داخل الجسم ونبقى في البخور ورش العطور....
بس كمان في مشكلة تتبع العمل بهذا النظام وذي ما كل شئ ليه وشيين، الجميل والقبيح،،، هنا برضه ممكن...
مش ممكن يعني كدآ ممكن وهو أصله بقآ ما ممكن،،
يكون الزول مضيوف وتقوم الهجمة الشرسة لتفادي التأخير ووجوب العطور وتبقى على أقله جلد لو ما "طقيع الحجارة":eek::eek::eek::eek:
"كوووووووووووووووووووووووكي"
ويجيرنا ويجيركم الله...
بس الحمد لله
دآ بقآ لا في الحير والطير....
وبرضك فرضت نفسي عليكم من جديد;););)
"أخنق فطس" :cool::cool::cool::cool:

[imported_فيصل سعد]

سلامات يا دكتور و عساك طيب،، ممكن تديني نسخة من المفتاح "الشقة و السيارة " و ما تشيل هم..

ارقد عافية..

[ناصر يوسف]

قولة وبقول تنطبق على حالي؛
يا كآفي البلا يا حايد المحن، ماااا في زول يقول الزول دآ وينهو....
طبعا ساكن هنا في أبوظبي برآي في الشقة،،، أول أيام كنت بنوم وبخلي باب الشقة ما مقفول بالمفتاح،، ما ما معروفآ الدنيا، يبقى عليا ياهو ذي دآ،،، تغيب الغيبة الياها والناس ممكن تهبشك بعد أياااااااااااام وتكون بقيت أربعة مرات من حجمك وحمامك الزمان كله ما بينش الريحة..
آها قمت عملتا ليا كمين نسخة كدآ من المفتاح ووزعتها على القاصي والداني مع التنبيه المتشدد، أنه لو ما رديت بعد 5 رنات على التلفون ولا ضربتين على جرس الباب!!
يجب الهجوم على الشقة وبسرعة قصوى حتى لا تمر الساعات وتبداء الغازات تتفاعل داخل الجسم ونبقى في البخور ورش العطور....
بس كمان في مشكلة تتبع العمل بهذا النظام وذي ما كل شئ ليه وشيين، الجميل والقبيح،،، هنا برضه ممكن...
مش ممكن يعني كدآ ممكن وهو أصله بقآ ما ممكن،،
يكون الزول مضيوف وتقوم الهجمة الشرسة لتفادي التأخير ووجوب العطور وتبقى على أقله جلد لو ما "طقيع الحجارة":eek::eek::eek::eek:
"كوووووووووووووووووووووووكي"
ويجيرنا ويجيركم الله...
بس الحمد لله
دآ بقآ لا في الحير والطير....
وبرضك فرضت نفسي عليكم من جديد;););)
"أخنق فطس" :cool::cool::cool::cool:

حبيبنا الجميل

كبيرنا وتاج راسنا

د. بابكر مخير

تعرف يا حبوب أجمل ما فيك شنو ؟؟

جمال روحك الشابة دي ياخ

حقيقي مشتاق لي لي عشرة ونسة كااااااااااربة معاك

إن الله هون القواسي بصلك تـــــــــــــــب نهاية الشهر ده ولا نهاية الشهر الجاي

غايتو النية في ،، ربك يِيَسِر الأمر بـــــــــــــس

[بابكر مخير]

سلامات يا دكتور و عساك طيب،، ممكن تديني نسخة من المفتاح "الشقة و السيارة " و ما تشيل هم..

ارقد عافية..
الحبيب النسيب
إتا بتأخد ولا تستأذن
كله على كله هوُلك والعندي أصله مالك..
المفاتيح وسيدها تتهنى من حالك...
بس حكاية الرقاد عافية دي!!
بنأخدها بالعربي حقنا ونقول آمين..
بس خوفي من ديك البلعربي بتاع المغاربة..
أصله "العافية" عندهم معناها (النار)
أعوذ بها من رقدة...
كيفك يابا والأهل آجمعين :cool::cool:

[بابكر مخير]

إن الله هون القواسي بصلك تـــــــــــــــب نهاية الشهر ده ولا نهاية الشهر الجاي

غايتو النية في ،، ربك يِيَسِر الأمر بـــــــــــــس

بي نيتك الطيبة، كلهو بهون...
ومستنينك على (عافيةالمغاربة) الشوق
إن شاء الله لمن تصل بي السلامة
نتلاقى كل "السودانياتيين" في دآرك ودآرهم (المندولا) :cool::cool::cool:

[بابكر مخير]

زمنا كان في لعبة:
فات وفات وفي إيدينه "سبع" لفات...
دي حسي إتذكرتها في القول الكريم؛ سبع عجاف....
وطبعن السنين العجاف ما بس شرطن تكون سبعة، ممكن تمتد لي أكتر وبرضك عجاف، يعني الحسي ديل قربن من تلاتة عقود والخوف يبقن سبعة والتي إحنا قطع شك بحمده ما حنكون حاضرنها..
المهم الفات وفات دي البيحصل فيها أنه المشاركين بيكونوا قاعدين في أم جاد الله يعني مدفنين في التراب (مع التطور ممكن يكونوا في كرآسي) وواحد بيكون شايل ليهو خرقة وبيلف من حول الجلوس بصورة مستمرة أظن لفتين تلاتة أو أكتر عشان يصرف الإنتباه وبعدها بيرمي الخرقة خلف واحد ودآك المشارك لمن ينتبه بيشيلها ويبدآ يطارد الكان شايل الخلقة...
آها دي إتذكرتها مع حكايتنا في السودان مع العساكر، يشيلوا الخرقة ويلفوا بيها سنييييييييييين ويرموها ورآ واحد مسكين وعلي نياتهو وما يعرف أصول اللعبة وما يتمهل حتى يعود من جديد جالساً في أم جاد الله ويتملك عسكري تاني الخرقة ويلف بيها وبينا سنيييييييييييييييييييييييين...
إتذكرتا اللعبة دي وإتذكرت أيام زمان والطفولة والشباب والسودان وكان وين وكان الجنيه السوداني بي تقريبا تلاتآ دولار؛ حسي عييييييييييييك ما الدولار بي كذا جنيه، إتذكرتا مشروع الجزيرة ومصانع مانشستر وكسوة الكعبة وعلي دينار ونضارات البيرسول والبعثة التعليمية المصرية والباسبورت السوداني الكان إذن دخول للملكة المتحدة دون حرج وأنه السودانيين في المهجر بيتعدو في أصابع اليد بالله عليك حسي إذرع أخطبوتات الدنيا مجتمعة ما تحصل ذرة من عددهم...
إتذكرت اللعبة والفرح الكان بيملء القلوب لكني حزنت على حال،،
أطفالنا وشباببنا وشيبنا
المساكيين ما هو الفرح ما بيعرف طريقهو لي قلوبهم.. :(:(:(:(:(
يا ربي بيجن السبع نابل :confused::confused::confused:

[بابكر مخير]

https://www.youtube.com/watch?v=QdoG9dBVvv8

[بابكر مخير]

ما تعرف هي قلة شغلة ولا عزوة بالنفس ولا عدم ثقة في إتقان الاخرين ولا شنهو هو دآ؟؟؟
أتذكر زمان الوالد عليه الرحمة، يلم (ولا مؤاخذة) "حكاية ولا مؤاخذة دي عندنا في السودان، هويتها جايطة، تلقى واحد للأحذية يقولها ليك، للأكل بعضهم يقول ليك مثلن؛ فول ولا مؤاخذة والأهدش من دآ كله بعض البشر الربنا أداهم عقل وفهم يقول ليك: الأولاد ولا مؤاخذة وهو يقصد أم عياله يعني زوجته البيشاركها كل شئ بدايتن من غرفة نومة لي لقمة عيشهو لي أولادهو، غايتهو حاجة كلها مؤاخذة وبلد ولا مؤاخذة)...
نرجع لي قصة الوالد وأنه يلم (أحذيتهو) في الأسبوع مرة وخد يا ورنيش وتلميع، يعني بروفسر وعنده من البذورة والعاملين بالمنزل ويعمل كدآ،،،، ممكن تكون حاجة في الخرومازومات لأني حسي عندي نفس الحكاية وما بس مع "عدم المؤاخذة" لكن في حاجات كتيرة، يعني تلقاني بحشر نفسي مع (نميري) وهو الشف بتاع المندولا وأطاطر ليهو في شغلانتهو وبرضك للبنية البتزبط "الجبنة"،، لكن موضوع الجبنة دي ليها معاي قصة،، بتذكر زمان كنت أخضائي الجبنة في البيت وانا ما تجاوزت الاتناشر سنة، وأكيييييييد بتذكر زيارات خالي محمد البتكون بعد الثامنة مساء وأنا بسعد بيها لي سبب وااااااااااااااااااحد وهو أنه موضوع يبعدني من قصة المذاكرة...
من الذكريات البتنشط مع حدث ما وهو يمر عليك، زمان لمن يرسلوك السوق وتلحق تنسى حاجة ولا تتأخر..
تمشي الجزار وتلقى أولاد الحلة مدورين ليك "البلي" وتقيف إن ما شاركت برضك تتفرج ليك دقايق تنحسب عليك في البيت (العقاب بحمدك) دآ طبعن أمرهو هين على قول العميد بروفيسر قاسم بدري "دقة تفوت ولا حد يموت" الأمر الماهين هو أنه تكون "دقتين" (وتقرب تموت) وهي أنه الطريق بيمر بي حلة تانية وأولاد الحلة دي منتشرين قي الشارع وكاااان ليك معاهم سؤ تفاهم..
يومك يكون أسود، إن جريت فيهم بيكونو بعض أبطال مرثون وإن قلتا تتروجل وتلاوي،، أكيد فيهم واحدن "تايسون".. فأخير ليك تأخد علقتك الأولى بهدوء وفي إنتظار التانية بسبب التأخر...
وتبقى علقة وجلدة.....

[ناصر يوسف]

تمشي الجزار وتلقى أولاد الحلة مدورين ليك "البلي" وتقيف إن ما شاركت برضك تتفرج ليك دقايق تنحسب عليك في البيت (العقاب بحمدك) دآ طبعن أمرهو هين على قول العميد بروفيسر قاسم بدري "دقة تفوت ولا حد يموت" الأمر الماهين هو أنه تكون "دقتين" (وتقرب تموت) وهي أنه الطريق بيمر بي حلة تانية وأولاد الحلة دي منتشرين قي الشارع وكاااان ليك معاهم سؤ تفاهم..
يومك يكون أسود، إن جريت فيهم بيكونو بعض أبطال مرثون وإن قلتا تتروجل وتلاوي،، أكيد فيهم واحدن "تايسون".. فأخير ليك تأخد علقتك الأولى بهدوء وفي إنتظار التانية بسبب التأخر...
وتبقى علقة وجلدة.....

ههههههههههههه

العلقتين ديل كيفني فوق حناني ظاتو ياخ

يا سلام عليك يا دكتور وإنتَ بتحكي ياخ

واصل يا الحبيب

[بابكر مخير]

4 وقريب من الخمس سنين، سافرت مرة واحدة ولو ما الشديد القوي الحآآآآر ما ظنيتني كنت سافر، ياهو مشيت السودان ولي 12 ساعة بالتمام والكمال.
وإتا ماشي تركب الطايرة، كانك مجررينك يضبحوك.
من يومك التفكر فيهو في السفر، مكانك المفضل ياهو الحمام. إتا أصلن نفسك مسدودة وما بتاكل حاجة، لكن برضك تسجل زيارات غير منقطعة.
بالمناسبة الخوف حاجات كتيييييييييرة بترافقهو، حكاية الحمام واحدة، عدم النوم برضك. بالمناسبة عشان ما نمر مرور الكرآم على موضوع الحمام، محتاجين نعرف بالتحديد لأيها غرض،،،،
هم الإتنين مع بعض:eek: "كوكي لاحظ التغييير في في المقصودات :eek:ما الكانت الفي بالي بالك دي نوع مستحدث دآ ;)"....
مع الخوف، حاجات تضمر (:rolleyes::rolleyes:) وحاجات تتسمر (ذي الفهم) وحاجات تترهل (ذي العضلات من الديهايدريشن بسبب الحمام اللعين)..
خوفي، خوفي من الطيران وبستغرب ناس شغلانتها تطير...
احد الظرفاء (تعبير يرمى جزافا وما شرط يكون الزول ظريف، لكن ربما كلامهو يحمل نوع من الظرف، أسمحو ليا هنا أسرح شوية؟!
الزول البيسطل يعرف بأنه ظريف وصاحب روح فكهه والامر وما فيهو أنه ما كدآ، فهو يقول كلام أو يبدى ملاحظات غير مرتبطة بالواقعية، يعني الناس بتضحك من هترشته وبصورة عليهو أكتر من منهو وقع ليكم:confused::confused::confused:)
أها احد الظرفاء دآ ينطبق عليهو القول الفوقاني دآ..
قال شنهو؟؟
قال الواحد أصلن لو بيخاف من الطيارة، يضرب ليهو كآسيين :mad::mad::mad:
يعني بالله هو الواحد ماشي قرييييييييييييييييب هناك، يقوم يغلط..
يا أخي أنا بتذكر وأنا في الطيارة، اليوم الكتلتا فيهو ناموسة وبضرب ليك الخوف من أنها تكون دعت عليا وتستجاب دعوتها في هذا اليوم الأغبر الذي ركبت فيهو هذا الطائر اللعين...
قال يقول، شغلهو طيار ولا مضيفة..
بحسدكم والله علي رجالتكم دي looool

https://www.youtube.com/watch?v=VeB1fPhmvbg



آها شوفو جنس دآ، عينة هيييييييييييييينة:(:(

[بابكر مخير]

ههههههههههههه


نصوري
ما تأخد كلامي الفوق دآ بصورة تراجيديدة وتقوم تتعلم الخوف.....
والحمام :D:D:D....
طير يا زول بالطائر المئمون وتلقانا في إنتظارك...
شوق لغاية ما تجي :cool::cool:

[ناصر يوسف]

نصوري
ما تأخد كلامي الفوق دآ بصورة تراجيديدة وتقوم تتعلم الخوف.....
والحمام :D:D:D....
طير يا زول بالطائر المئمون وتلقانا في إنتظارك...
شوق لغاية ما تجي :cool::cool:

ههههههههههههههه

تسلم حبيبنا وربنا يدينا فرصة إننا نتلاقي طرفكم هناك

[بابكر مخير]

عندي علي أخوي، راجل بحر ما شاء الله.
قول شعر تلقاهو عارف، تقراء قرآن تلقاهو حافظهو، تسأل عن كلمة بلإنجليزي تلقاهو يقرب يقول ليك في الديكشنري في الصفحة الفلانية.
غير دآ اسأله عن أنواع الطعام والشراب، عن الفجان والأحلام..
ربنا يديم عليه الصحة والعافية..
إتذكرتهو اليوم من صباحات الله لأني حلمتا وكنت داير الفسر الحلمة. لمن لقيت الحل لازم برآي أتصرف، لجاءت للحبيب الهو طبعا ما بيبخل إتا اسأل وهو يقول مش إسمه قوقل عشان بيقول...
الحلمة كان فيها حصان وأنا دآك ركبت الحصان أيام كلية البوليس، بالله عليك الشئ دآ قريييييييب من ركوب الطيارة، هو كلهو ما أكتر من متر ونص إرتفاعهو لكن لمن تتسرجهو (ما الكلمة ديك شوية كدآ ما حلوة، ولا شنهو يا كوكي:o) تشوف الواطة دي بعييييييييييدة..
الحلمة كان فيها حصان وقوقل سرح ليا في التفسير في أنواع الحيوانات من ذكر وإناث، وذكر كل الوآن قوس قزح من الأحمر للقرمزي لي لون زينب (ليه سماهو لون زينب؟ يمكن شوقي يقدر يحكي لينا) ولو الحيوان حي ولا ميت، قاعد ولا واقف...
غايتهو دخلتا ومرقتا دون تفسير..
الفنجان والبيقروهو والحلم والبيفسرهو، تعتمد على علاقتك معاهم وصلتك بيهم وغير كدآ بيحسبوها، إذا كان شايف أنه بيطلع منك بي فايدة، فنجانك دآ بدل قهوة يقلبهو ليك لبن وإن حلمك هضربا يجملهو ليك..
عشان كدآ، بفتكر أنهو قولة: كذب المنجمون ولو صدقو.. حقيقة.
عشان كدآ !!
أخير ليا أصهين لي الحلمة وأعقلها وأتوكل....
أمشي أنوم نومي
مش غريبة حكاية أمشي وأنوم دي :confused::confused:
إلا ياهو "شغل سوداني أصيل" :cool::cool::cool:

[بابكر مخير]

ونرجع تااااااااااااااااااااااني لي معاناة ناس إحنا.
معاناة ماها قسرية بل إختيارية وماها إفتراضية بل واقع محتوم.. مثلها ومثل، الكرمشة في كل إنش أو سنتمتر من جلد الجسد وترهله، تقول ترفع يدك تاشرتلقى جلافيط الضراع يتلوحن (والله لو كنتا بضمن أنه ما في زول يقعد يتفلس وينصح وينتقد) كنت قلتا أنهن ما أسوء حالن من :eek::eek: هو شنهو البدلدل... كووووووووكي الحق أحذف....
ما علينا من الغيل والغال "ما هو إحنا السودانيين دي ياها الجيم البتنقال قآ ولا يا عند إخوتنا المتحاربين ديمة من شمال الوادي لييييييييييين ناس أصحاب دكان إبن علي؟ (لمن هم دون الستين عاما وغير قاطني أمدرمان، إبن علي دي كان تطلق لأهل اليمن المستوطنيين السودان ويمتهنون تجارة "الدكاكيين" يعني بالعربي الحديث "البقالات")
نرجع أخير لقصتنا مع المعاناة الحتمية وأنها متكررة ذي ما هنانا أنا بكررها وبنفس المسمى السابق؟
الا وهي الدبرسة بالمناسبة بين الدبرسة والإحباط صلة قربى شديدة (مفروض تنقال قوية، لكن عند السودانيين كله صهينا، ليييه يا أخونا إحنا كدآ!؟ نصهين لي كل شئ؛ الأناقة، الإلتزام، التصرف الحضاري، الصدق يا أخي هو شنهو ولا شنهو. لا كمان أديك من الشعر بيت، قرع ونزهيين والأكبر هآآآآآآآآم ما بنعرف نغرِف وعاملينن أسياد الغرِف.. أسؤ المهن نطبز فيها أوسخ الأخلاق ما بنعرف ليها وتلقانا سمعتنا تجلجل "يعني قصص دبي ديك ما بتروي أننا حتى المهنة دي ما بنعرف نجودها.....
(أقول المهنة شنهو!! ولا لآ ) ;););)
مستني ردكم..
وبعدين نشوف قصة الدبرسة مع الثقيل دآ "الكُبر"

[بابكر مخير]

الدبرسة وذي ما قلت؛ هي حتمية لأنه مع فقدان القوة الجسدية معناها العجز عن القيام ببعض الأمور وبالنظر لهذه الحقيقة يبدى الزول في التفكير مرات ومرات ويبدى كمان في تعديل الحسابات ونهايتها يتقوقع ويوكلها على القادرويبدآ يتملكه؟
التفكير السلبي. ودآ بيحز في النفس وهي علامات الدبرسة فالإحباط الدائم هو الهواء الذي البتتنفسو الدبرسة وبديهي أنه التفكير السلبي بيغذي الدبرسة وعدم القدرة الجسدية الهادة الجسم هي القدرة البتتمكن الدبرسة من فرض نفسها على الذييي كدآ.
مثلا: كنت في إجازة سنوية لمدة شهر، لمن رجعت للشغل كان السؤال الجامع من العامليين! وين رحت أو كيف قضيت الإجازة وبعضهم كان متفائل وعشمان في أني صاحب قدرات وأنشطة. وكان ردي؛ أبداً ما رحت مكان بس في البيت نوم وكتشينة بعضهم نطط عيونه وفتح خشمهو :eek:. كتشينة...
طبعن يكونو قايلنها قمار.
دي الحاجة الما عرفتها أ بالأصح ما مارستها وما عارف ليييه مع أنه الواحد ممكن يكون ليهو باع في الأمور الأقل ضرر.
عندنا خالتنا كانت مسمياهو "أجردك، أجردك" وهو في رأيي واقع ما يحدث في ممارسة هذه الآفة، يعني إتصور زول محظوظ يقلع ليك المعاهو من قروشهم والحكمة أنهم يكونو صحبان. يحكى أنه مجموعة كانوا بيلعبوا قمار واحد منهم خسر حتى عربيته ولمن طلب قرشين تلاتة لزوم دفع أجرة التكسي لبيتهو، قيل له: بتكسر حظنا لو طلعنا من القروش دي "عجب" لا ويحكى أنه أحدهم قامر بزوجته...
لين زولن كدي، بسبب القمار وخسارته لكل ما يملك قامر بجزائه عند ربه فقتل نفسه...
ما قلتو ليا؟
(أقول المهنة شنهو!! ولا لآ )
وبرضك مستني ردكم..

[imported_فيصل سعد]

سلامات يا دكتور و متابعين معاك،،، و بالله عليك المهنة جليها تب و أنساها و ما تجيب طاريها..

يديك العافية..

[بابكر مخير]

بالله عليك المهنة جليها تب و أنساها و ما تجيب طاريها..
يديك العافية..

ههههه
لحقتني في الوقت المناسب،
خلااااااااااص قلت أفكها ولا أحمد عقباها، إلا لحقتني...
لكن برضك ناسنا حتى دي ما بجيهوها..
ناس شئ ميك آب وناس بواريك وناس إحنا إن خلاااااااث
ياهو الشوشوة وكترابة تجيب الحساسية....
ونزهيتنا في قولنا،،،
يا زول والله ......
أقول قولي هذا وأستغفره..
تعرف الحبيب النسيب، ذي ناس عمرنا دآ.....
ما تهابشوهو لأنه ممكن ينساح لييين حد الرواح.....

[بابكر مخير]

مع الكُبر بتكتر قلة الشغلة والإهتمامات يغلب عليها أمور سطحية لكنها كمان في أغلب الأحيان بتكون مثيرة وجديدة "يعني شوف التناقض دآ؛ عتيقة للكُبر وجديدة :rolleyes:". يعني مثلن تقوم تلاحظ ليك حاجات الناس العادية الفي اعمار أقل، تفوت عليهم (ما هم بيكون مشغولين بأمور هامة) نقول وعلى سبيل المثال؛ في أشياء تغيب على الأصغر عمرا، يعني شوف في رابط وتشابه ملاحظ وغير ملاحظ بين الأشياء والبشر، الحيوانات والإنسان...
تلقى زول عنده عربية لو تتوكد الشوف كدآ تلقى ملامح بين الإتنين، دي زماااان كان واحد عندهو عربية "فيات" نوع البابها بينفتح عكسي، الزول دآ التقول صمموا العربية على شكله.
أمسك مثلن الكلاب وشوف في الصور دي "مع الإحترام للإنساسية ودون إساءة للخلق"

http://sudanyat.net/vb/attachment.php?attachmentid=1285&stc=1&d=1513059004
http://sudanyat.net/vb/attachment.php?attachmentid=1286&stc=1&d=1513059019

[بابكر مخير]

ما تعرفه، هل هو الكُبر وإسترجاع مرارات الماضي ولا هو عامل نفسي بيجي مع الكُبر ولا عدم الشعور بالطمانينة نحو تعامل الناس معاك وأنك باقي ليك أيام وأحسن كل العندك تبقى عليهو عشرة ولا حاجة ما تعرف سببها ومسبباتها.
المهم أنه الواحد حتى لو كان يوصفوا بيهو الكرم وفايت حاتم الطائي مرات ومرات، البيحصل أنه بيبقى باقي عشرة علي كل مليم عنده...
(طبعن المليم حسي ولادنا ما بيعرفهو مع أنه في زمنا كان شئ وكل شئ، يعني بالله عليك حتى لمن إتوظفنا يقولوا ليك الماهية سبعة وتلاتين جنيه ووستين قرش ووخمستاشر مليم، لا والأدهش تستنى العلاوة بعد ما تقاتل في عشانها ويومهو التستلم جواب بموافقة العلاوة من وزارة الخدمة وبعد ما يكون واحد صاحبك هناك إستعجلو ليك حتى وصل ركبه الميمون لي حسابات وزارة الصحة التي كان لزاما على كل من يعمل بيها، أن يكون ودود ومجامل لمن يعمل في حسابتها والله بتذكر صديقي ود الخولي كيف كان ديمة سند ليا في هذه الأمور،، كنا يكاد كل يوم بنمشي دار الرياضة أمدرمان معاهو، مجموعة كانت متميزة منهم ود (النخيل، الخولي) ومنهم عيسى دهب والشنقيطي بدري وعثمان طلق النار والسر "السفيه" والطيب...وكتها كان التسالي بي قرش منه التسالي ومنه "الجرم")
يعني لو طلعت ليك عملة نقدية، تقعد تفرك فيها لمن تجيب الزيت قبل ما تفكها وإن بقت عملة ورقية ياهو ما في زول بقبلها، لأنك "بي حكها" تشيل كل لون ورسمة ورقم مكتوب فيها..
حسي حالتي كدي..
حالة الكُبر ديمة فيها الجديد مع أنه الزول بيقدم :(

[بابكر مخير]

وذي ما قلنا قبل كدآ؛
إهتمامات الكُبر تشيخ وتخرف حتى..
زمان عايز تعمل شنهو وشنهو دآك، تدافر وتعاتل وبإصرار تصر على قضاء أمر أنت عزمت تنجزه، لا نفس يقوم، لا عضلات تتشمط، لايدن ترجف ولا نظراً ينخ..
همة وإهتمام..
حسي وين!
ما بيك إنعرفت، كل الإهتمامات إنحصرت بقن خرم الإبرة أوسع من الطموحات العندك، والهمة بقت نتيشة؛ ما خمة النفس وشحتفت الروح واقفين ليها بالمرصاد، تصرف شوية طاقة، ديل ينجن هاجمات ويخلنك ندمان على اللحظة الفكرت فيها ساكت تعمل ليك همة.
بقت حسي الطاقة قدر لملمت السبيبات ولصيقن.
قدر خطوتين والتالتة! إلا جبرية ساكت تحتم القيام بيها وإستعد للعواقب الما فيها مسرات.....
شوف قالوا شنهو،،،
لمن تجي تطبع كروت الدعوة للعرس "زمان" عليك إختيار خاتمة الدعوة. في كروت بينكتب فيها "يسعدنا، نتشرف" والكلمات حلوة دي. تشجعك تمشي وتستجيب بحماسة وبقوة تقبل هذا النوع من الدعوات.
آها التانية ديك، عديييييييييل كدآ تخوف..
يقولوا ليك: "والعاقبة لكم في المسرآت".
آهاااااااااااا دي يعني يا صاحبنا (قدم السبت عشان تلقى الأحد)..
وهي ذي ما قلنا، إن ما جايب شيتن في يدك، الحق ليك كشف.
والكشف دآ برضك "بدعة" غير حميدة... فلان أخت أمه بنتها الكبيرة حتعرس، يلا يا صحبان الهنآ حضرو الكشف... يا لهويي :eek: (نان أخت أمه دي عندها أربعة بنات لسة وعلى وش عرس:(:( يعني ليها بس تاني عندنا أربع كشف)..
لا والذي دآ، بناته الحمد لله عرسن ومحمد دآك لساتهو...
العاقبة ليا في ياتهو مسرات.. لا!! وإحنا السودانيين طبعن أكرم ناس خصماً على جيوب الأخريين.
زول تكون لاقيته مرة واااااااااااااااااااحدة مع زولن تاني إتا بتعرفه، بعد كمين يوم البتعرفهو دآ، يقولوا ليك؛ عامليين كشف لي فلان وفلانه دآ إتا لاقيتهو مرة في العمر المديد دآ.. آها لزومهو شنهو أشارك في الكشف، ما الياهو، كرم سوداني خصمن على جيب الأخريين...

[بابكر مخير]

لمن يقطع فجاءة وبروح منك.
أول أمس كنت مع الحبيب "كوكي" بتكلم ومن ضمنها عرضا سألته وفي شكل قصة..
القصة كانت عن (النت) وأنه زحلقني وبدون مقدمات.. بكتب في بوست (طبعن صفيت ليك أبوهو ظاتهو، أنه كان عن شنهو) وفجاءة النت قطع ولمن رجع السطور إنمحت والعبارات عبرت من شاطئ الخواطر لي مذبلة التأريخ والفكرة إندثرت رماداً في صحراء وأغفرت في رمالها..
قال ليا صاحبي: إتا أحسن شئ تكتب البوست في ال "word" (وكوبي بيست أو ممكن كت بيست)..
وافقت في لحظتها وقلتا دي نصيحة من خبير في أمور الحاسوب وحسبت أنها محسوبة العواقب..
بس إتذكرت أنه الحكاية مية في المية متكاملة النواحي ولكن في زاوية خفية فاتت على صديقي الودود!!؟؟؟
الا وهي "الكًبر"
يابا حتى في الورد بتحتاج تتذكر تسيف والسيف أصدق أنباء من الكتب..
البذكرني أسيف شنهو؟
ما هو ممكن أعمل "كت" وأقووووووووووو م كدي علي، مثلن مثلن الحمام وقبل ما "ابستتها" من paste الكهرباء تنقطع.. بالمناسبة قطعان الكهرباء دون سبب معقول ما بس حصري على السودان ...
حقيقة لله الموضوع كله على كله..
الكُبر هو البلخبت كيان الأشياء...
آآآآآآآآآآآآآآآآآآآآآآآخ منهو دآ :mad::mad::mad:

[بابكر مخير]

اليوم بيذكرني بي سودان زمان، كيييييييييف وكيييييييييييف حاجات وأمور كم كانت جميلة،
يا أخي بالله العظيم نقول من الخواجات والإستعمار الكريسمس دآ يحتفل بيهو مع الحفاظ التام على الهوية المسلمة وفاق بين القبطة والمسلمين (وما كان في حاجة إسمها سنة وشيعة) والأنجليكيين والهندوس واليهود وحتى النصارى..
طيب هم منو هم النصارى وفي رأي الأصلن ما عارف شنهو، بفتكر هم الرافضيين لمما هو قبلهم أو بعدهم من رسالات سماوية، المسيحيين رفضوا اليهودية واليهود رفضوا المسيحية الجات بعدهم وإتنينتهم رفضوا الإسلام آخر الرسالات والإسلام "بي تحفظ شديييييييييييييد وبي خوف وجرسة مني" رفض الإتنين حسب رؤى المتطرفيين والمتشددين، مع العلم أنهما كدآ إلا أنه غلطانيين فحتى "الكتاب" بيذكر موسى وعيسى وكل الأنبياء بخير وعرفان..
النصرتنية عنها (http://www.massi7e.com/books/Who-are-the-Nasara-in-the-Quran)
آها في زمن الإنجليز الكريسمس كان متعة، ما موضوع حفلات وكدآ لكن الأجواء تشعرك بأنه في عيد حاله وحال أعياد المسلمين، الجنوبيين كان عندهم سيرة فرح تجوب الشوارع وأتذكر كنا بنقيف على شواطئ الطرقات متجاوبين وبروح تسامح عالية، بعدها كمان جات موضة الإحتفالات في عيد الميلاد سهر وغناء وطرب، شئ فرقة العقارب ووليم أندرية والنادي القبطي والنادي الأمريكي..
عيد إعترفت بيهو كل الحكومات السابقة وإحتفل بيهو كل الناس، إلا لمن جو الوهم ديل، إتلخبتت الدنيا والأفراح بقت أتراح والأحزان بقت عنوان
المهم
للكاثوليك والأنجليكان والبروتستانت والمورمورز وكل من يحتفل اليوم بعيد ميلاد المسيح..
كل عام وأنتم بخير...
إتو تعالوا،،
موسى عليه السلام عيد ميلادو متين :confused::confused:

[بابكر مخير]

النضوج دآ مرحلة بالجد سخيفة...
شوف بقا، نطفة وعلقة.. بذرة وشجرة... طوبة وحيطة....
دآ كلهو مع الزمن بيودي لي حاجة وااااااااااااااااااااحدة وهي قرب النهاية.....
النطفة لي بني آدم والتسلسل إياهو، رضيع وطفل ثم شاب وشيب
البذرة شجرة وثمرة والواطآ وإن ما وقعت ودخلت في سلسلة النيتروجين بهدوء، يا هو بيأكلها زول وسفرتها للسلسلة بتطول، لمن تنهضم والمعدة والمرئ والمستقيم و.... نقيف هنا وكفآ...
الطوبة، حيطة وغرفة وبيت وزلزال ولا تبقآ أثآر وإن خلاص تنحظى وتبقى أطلال ويشعرها إمروء القيس...
قفا نبك من ذِكرى حبيب ومنزل بسِقطِ اللِّوى بينَ الدَّخول فحَوْملِ.....
لكن كمان النضوج وحسب علم النفس والتربية، هو "نعمة" فهي المرحلة التي تكتمل فيها الحلقة بعد أن تكون قد إكتسبت جهد في حالة الحيطة ولا القيمة للحياة في حالة الثمرة أو الفهم والوعي في حالة بنو بشر..
تعرف الغريبة مع الكُبر وقيمة النضوج، إلا أنه الانسان مع أنه بقآ كدآ، إلا أنه في بعض الأحيان في دواخله تعشعش المراهقة، تلقاهو خلاص قرب "يبوس" قدمه من الإنحنائة وبرضك يتلبس "بالمحزق" ونمق السبيبات البقن وما بعيد "يعاكس" القوارير الحسان....
النضوج النص إستوآ دآ، ياهو العيب:(:(:(:(

[بابكر مخير]

سنة جديدة
يعني تقليل ويعني زيادة في الأوجاع ؟؟
ذكريات للذي مضى وإنتظار لمزيد المعاناة...
آخر الفاتت لاحظت أننا السودانيين غير الفينا من نواقص ومما نوصف به على غير الواقع، بقينا نستجيب بي قوة وبغير عزوة للإستفزاز...
كييييييييييييف الناس إتعاملت مع التويتر الفي رأيي الشخصي مدسوس (بتاع محمد نجيب الإعلامي الإماراتي)..
طيب أنا أقول ليكم حاجة...
قريت الكلام وأثناء ذلك تجيني مقاطع لي فدييو طوله خمسة سنوات سابقات في ثمانينات القرن الماضي..
عجمان وآل العوضي، أمهم وكيييييف تمسك مدون وزنوبة وتقبل كل قطعة من جسمهم..
أختهم الشابة المفعهمة بالجمال ومليئة بكريم الخلق..
والمقاطع تحدثكم عن خالهم ذلك الرجل الطيب حلو المجلس أديب الحديث وأبنائه الذين إختاروا ان يكونوا أشقاء لي بناتي..
بيتهم في حي من أحياء عجمان يذكرني ببيت خيلاني من آل خاطر..
من بين أهلهم الذي كانوا يحضرون خصيصا لملاقتنا في أيام الجمع، أحدهم كنت آرى فيه خالي سيف الدين خاطر وجمع من أولائك كانوا في شبههم الي جدي التوم خاطر الذي كان يتميز بملامح مرصية قاطعة إلا أنه كان طويل القامة على غير أهلنا من شمال الوادي وإبنه صلاح الذ كان على نقيض من أبيه بقصر قامته وخطواته المتقاربة مما يتميز به أهلنا "النقادة" وعليه كنا نلقبه بذلك..
أذكر أيام الجمع التي كنا لزاما علينا الذهاب لعجمان لزيارة أهل محمد وأحمد وإن لم،،،
فويلنا من غضب والدتهم..
شو فيكم، إتم ما وليداتي، ما بتييو تشوف أمكم..
إن زين، السبوع الياي...
كانت هذه كلماتها بغضب وقت تأخرنا من زيارتها...
كان أحمد حسن العوض، شاب يافع، حلو المظهر، جميل الخلق، أديب الحديث "يمكن أن يسأل دكتور حاكم عبد الرحمن حاكم ودكتور سعيد الأمير شوقي وكل ممن عرفه من سوداني الأدلة الجنائية بأبوظبي" وكان لي وخالته حسب سيدها في مقام الإبن، لا يحتاج لدعوته لسكننا وحتى حين كان عيد ميلاده إحتفلنا له عندنا. صادق أحمد من شقيقي يوسف وصديقه يوسف الأخضر وكان إنسجام الأعمار المتقاربة..
في الشقة التي كنا نسكن بها مع السيدة الفضلى حسب سيدها، قابلتنا الشقة التي كان يسكنها الفنان والمخرج التلفزيوني "النعيمي" وكانت تلك الشقة بمثابة ملتقى لأهل تلفزيون أبوظبي من ممثلين ومخرجيين، مواطنيين ووافدين،، كم كانت جميلة تلك الأيام وخاصة حين تعد لهم السيدة حسب سيدها بعض من طعامها المتميز ومقابله نحصل على طعام أهل الإمارات الطعِم..
من بين تلك الكوكبة كان صديقي "محمد نجيب" الرياضي الموهوب والشاب الخلوق.. المحب للحياة وللجمال واللحظات الممتعة..
عرفته كما عرفت أهله وحببته كما أحببت شقيقه "أحمد العوضي"...
لا أقول مدافعا لكن الذي في قلبي يحدثني بأن "محمد نجيب" لا يعرف إهانة شخص أو جرح شعور بشر أو التعدي لإنسان فهو إنسان مرهف وفنان...
الذي أريد أن أقوله لأهلي:
نحن السودانيون بقيمنا وعزتنا، عزو لغيرنا وأرفع من أن نثار بواسطة جانب لنثائر من جانب أخر..
قد يكون هناك من لا يعرفنا فيتجنى علينا وله نرد بإظهار جل مكارمنا بأن نسامح ونتسامح ونجد له العذر بأنه لا يعرفنا...
نحن فلذات أكباد قوم كريم من ظهر رجال عظام ومن رحم إناث شريفات..
فل ندع الكلاب تعوى وقافلتنا سائرة برضاء الله علينا وقناعتنا بأنفسنا......
بحبكم بنو وطني الآزلي :cool::cool::cool::cool:

[بابكر مخير]

السنة الجديدة دي بدت معايا.
بميلاد جديد..
بالله عليكم الساعة خمسة ونص، دغش أول أيام العام 2018،
بس التقول متا..
لا شئ فيني بيتحرك وشعرت بأنه أنا خلاص....
لا حركة لا عقل....
شعور عجيييييب ما بتمناهو حتى لي عدو...
وبقدرة القادر ونعمة العزيز الغالي، المنجي، الرحيم...
تجاوزت تلك وبعدها بلحظات لم تصل لدقائق..
عاد نفسي وشعوري وجسدي لي حالتهم القديمة..
هل يا ترى هو إنذار أم بداية لحقبة قصيرة قادمة تستوجب عليا إعادة حسابتي..
الله هو الأعلم

[بابكر مخير]

الإنسان آلة ولا "الربوت" إنسان...
يعني بالله عليك الواحد يوقل يظبط المنبه عشان يصحى الصباح للشغل؛ أول أيام يكون الإعتماد تام علي المنبه، أديها فترة زمنية وتلقائيا قبل ثوان أو دقائق قلائل تكون صحيت، يعني برمجة... تجي داخل الشقة وعشان تفتح الباب في الأول تولع نور الممشى عشان تشوف "خرم" المفتاح :rolleyes:
بعد مدة، توووووشك المفتاح بشكل تلقائي تلقاهو "دخل"
كوووووووووووووووووووووووكي؛ الحق........
ما علينا الأيام دي مع الكُبر ورجفة اليد، ولا بحتاج طوالي مفتاح العربية في الإستارتر يعني الحياة كلها بقت ذي الربوت ودآ حسي كل ما ليهم بيضيفوا فيهو حاجات، كل الشغل البيعمله الإنسان هو قادر عليهو، لكن قالوا في مشكلة!!
الإحساس والمشاعر البتميز بها الإنسان التي هي بدت نخبو من سماء الإنسانية، إحساس شنهو وترامب رئيس وعمر البشير عايز يترشح تاني :mad:
يومتها وبسمع ليا في حاجة إتفك طلسم ما كان شاغلني خالص ولكن أخد بعض من وقتي في أحيان وهو حكاية "روبت" لييييييه ما إتعرب ذي ما عادتنا نحن أهل لغة الضآد "اللي روحه مضاد" مش الساندوتش وأصل الكلمة إنجليزي قح ما هو جآي مسمى على موطن أول ساندوتش إتعمل وقلنا "شطيرة" والكمبيوتر سميناهو حاسوب وكلمة الإف قلنا سحقا...
لييييييييييييه ما قلنا للروبت (عامل) ذي ما أصل الكلمة سلافيية من كلمة robota وهي تعني العمل أو الشغل (ناس المغرب العربي بيقول وزارة الشغل لي وزارة العمل ودقي يا مزيكة وكل مضاد على هواه يسمي)...
معليش "شغلتكم" بي هترشة :cool::cool::cool::cool:

[بابكر مخير]

بقولوا أنه الزول بي ذاته أكثرهم معرفة بأنه خلاص.... المدهش أنه بيقول "خلاص" دي للمفطس أو المُتوفى وهي حقيقة ما معناها وما تعني، لأنه بتكون أيامه خلصت والخلاص دآ ما بيكون منه نفع. لكن مثلن ذي العلماء والمكتشفين والكرماء وبرضك الظلمآ ما بيكونوا خلاص لأنه أعمالهم بتكون دايرآ ولافآ...
لكن ناس قريحتي راحت بنكون يانا خلاص، يومك التروح بتكون ريحتا وممكن لو في حالة صعبة ذيي كدآ بتكون إرتحتا...
الخلاص في بعض الديانات تعني إزالة لي للذنوب شوف عندك المسيحين.
وديل ناس لذيذين جداً! الواحد يمشي الكنيسة وفي إويضه صغيرونية، يقعد ليه في كرسي وجمبه شباك شبك وتبقى عليهو قصة الشبكنا "يخلصنا" ويطرش ليك كمية مهولة من المصايب العملها ومن الناحية التانية يكون رجل الدين البيعترف ليهو زولنا ودآك يسمعهو وبعدها يديهو "الخلاص" .......... عظمة والله ...
الخلاص برضك بيكون في حالات كتيييييييييييييييييرة. منها المؤلم ومنها المفرح ومنها الممتع.....
خلاص المؤلم شيتن كويس وحق المفرح هو محزن بس حق الممتع، دآ ياهو الثقيل.....
آآآآآآآآآآآآآآآآآخ يا كوكي لو ما بتذكرك أكيد كان بسرح وهو ما لا يحمد عقباه :o:o:o:o

[ناصر يوسف]

السنة الجديدة دي بدت معايا.
بميلاد جديد..
بالله عليكم الساعة خمسة ونص، دغش أول أيام العام 2018،
بس التقول متا..
لا شئ فيني بيتحرك وشعرت بأنه أنا خلاص....
لا حركة لا عقل....
شعور عجيييييب ما بتمناهو حتى لي عدو...
وبقدرة القادر ونعمة العزيز الغالي، المنجي، الرحيم...
تجاوزت تلك وبعدها بلحظات لم تصل لدقائق..
عاد نفسي وشعوري وجسدي لي حالتهم القديمة..
هل يا ترى هو إنذار أم بداية لحقبة قصيرة قادمة تستوجب عليا إعادة حسابتي..
الله هو الأعلم

طولة العُمر يا حبوب ودوام الصحة والعافية

[بابكر مخير]

طولة العُمر يا حبوب ودوام الصحة والعافية

نصوري شكرن ................

لكن يابا ثقالة الشئ دآ "الكُبر"،
أنها بتقربك من دآك "الخلاص"..
وبجي الوكت الفيهو، "لبيد إبن ربيعة" بيبقى مثلنا الأعلى....
وببقى أخير المخارجة!
قبل ما يصيبه من هذه الدنيا الراجي ما سيصيب "نبي الله أيوب" عليه السلام وينال عاقبة "فرْعَوْنَ وَهَامَانَ وَقَارُونَ"...
gooodgooodgooodgoood

[بابكر مخير]

الكُبر صفة للكبير والكبير صفة لا تعني بأيتها حالة كمال الحكمة
ما مرا بنا الزمان وإلا خبرنا فيهو من الأهوال
وما زادت بنا السنين وإلا كثرت علينا الأحزان
وما شاخت طباعنا وإلا إنهزمنا في تعاملنا
العقل يصيبه بطء والفهم يغلب عليه الخمول وردة الأفعال يغلب عليها عكس حالتنا الجسدية، حركتنا بتتقل لكن مشاعرنا تتسارع...
الكُبر مصيبة وداء
ربنا يغتيكم منه
والسلام

[بابكر مخير]

تتزامن الآحداث، شرها والأشر منها ووتفق وتتلملم ويجنك ذي الصاقعة في رأسك واقعات...
في زمن الناس "قصدي وقت الشباب وكل ما هو قبل المشيب" همها فاضي. درجة تحملها عالية وتجاوبها إيجابي والإنعكاسات علي جسدها ونفسها وقلبها سلبية.
حسي الحسابات تغيرت، إلتهاب سريع ولا غاز البوتين قدام وميض قداحة "دي حلوة مش كدآ" إنفجار يأتي على الأخضر (هو حقيقة لو وجد بيكون أبيض والمقصود الشعر) واليابس (ناشف وعديم فايدة ومنعدم النفع وكثير النوم وقليل الصحيان ومشاهدته متكررة لكن دون جدوى،، أقول شنهو ولا هو منهو لأنه المقصود عليه الباب موصد :eek:)
المهم...
الآمثال فيها حِكم ومشروعيات، أخذها في عين الإعتبار ذو قيمة عالية وتجاوزها بعض مرات ظلم للنفس والذات..
بيقولوا:
باب بيجيك منهو الريح سدهو وإستريح...
آهاااااااااااااااااااااااااا
سديناهو وبعد السونامي عدآ...
فتحناهو ويا هلا

[بابكر مخير]

بالمناسبة والمناسبتها عدم المناسبة؟؟؟
اتفنشت::rolleyes::eek:
وابدن ما :mad:
بل :cool::cool:

[imported_فيصل سعد]

الخير فيما اختاره الله لك، نسأله جل و علا ان يديم عليك نعمة الصحة و العافية، و أن يرزقك خيرا فيما تختار من بديل للوظيفة، و يوفقك أينما حللت أيها الرجل الجميل المفخرة علما و أدبا و ذوقا و نخوة..

[بابكر مخير]

الخير فيما اختاره الله لك، نسأله جل و علا ان يديم عليك نعمة الصحة و العافية، و أن يرزقك خيرا فيما تختار من بديل للوظيفة، و يوفقك أينما حللت أيها الرجل الجميل المفخرة علما و أدبا و ذوقا و نخوة..

شكراً :cool:
تعرف يا الحبوب
تقول خلاص والحمد لله الجات من عند مقدر الأمور مانح السرور، كاشف المستور... ووقتها جآ عشان نستريح..
لكن كمان الراحة هي أبعد حاجة من قعاد سآكت...
جدك بابكر بدري نقل عنه وما بقول هو صاحب القولة لأنها ممكن تكون من الأقوال والأمثلة المضروبة:
أكبر شغلة، قلة الشغلة...
وأنا دآك في رأي، أنه قعاد ساكت بيجيب الدبرسة ومحل الشغلة بيفضآ وبدله ينملي أشياء فارغة.
لكن أهو خوفتن من دآ بقينا علي "المندولا"، ننشغل بيها ونشتغل ليها وربك يهون...
أتذكر شيخي وأستاذي وأخي الأكبر الدكتور العالم الجليل حاكم عبد الرحمن، قال ليا لمن خلاص إنتها من هنا؛ خلاص أنا ماشي السودان وأرتااااااااااح..
قلت ليهو؛ سعادتك يا دووووووووبك حتتعب لأنك بدون عمل بدبرس. وبي روحه الحلوة وكلمته التي لا تفارقها الطرافة رد،، تنعكس عليا قولة، سلام فكلام ولقاء .... وتبقى؛ رجعة ووجعة وموته....
ربنا يديم ليهو الصحة والعافية

[imported_فيصل سعد]

ما تخلي الماندولا تشغلك عن "انسان " تحتاج منك رعاية و إعادة تجديد و انطلاق و كدا،، ما داير اقوليك خلى كراع في ابوظبي و كراع في لندن، و انت عارف ليه :D:D فشنو خليك زينا كدة، "دور قرب و دور مزازيك " و خليك مع الزمن يا سعادتو :D:D

يديك العافية..

[بابكر مخير]

الحبيب النسيب؛
من يوم الفيديو والقيل والقال ولمدة أسبوع وبين محق ومن ظالم جهول..
إتذكرت قصص اللذين غادرونا مكتشفين لما سيصيبنا عن قريب وقولتهم لمن يجيهم خبر زميل أو رفيق "يعني زول من عمرهم" توفاه الأجل المحتوم يقوم يقولوا ليك وبعد الترحم عليه: بختهو والله ربنا ريحهو..
زمان ما كنا عارفناها لكن حسي عشناها..
لقينا أنهم كانوا شايفين بيجي فيهو اليوم الذي يسود فيه الجهل والظلم، يتمكن منا شذاذ آفاق ويتحكم في أمرنا ضعفاء وأزلاء...
تبقى الكلمة الشينة حلاتها والكلمة الزينة القبيح ملء محلاتها...
والله أريتنا نمشي قبل "سودانياتنا وإنسانا" يغطيهم الظلام..
ما هو بقينا وبعد كنا "تواصل" بقينا إنقطاع وتقاطع....
على قول سآخر سبيل؛
كسرة: إتو مجلس إدراة ولا أمناء ولا منهو
الحصل فيهو شنهو :eek:

[بابكر مخير]

حلقة الحياة التي تبدآ من حيوان لي نطفة ومن ثم جنين (ما بين الجنسين وكلها إماتن صليب في الدورية فوقاني ولا سهم نازل لي تحت من الدورية) لين زول وتبدى ترجع والحيوان يتلاشى وما يبقى ليهو طآري "ذكر"...
كذلك الموال في العمل، تقرى وتدرس وتتخرج وتشتغل وتنزل المعاش وإن ربنا وفق تلقى شغل بالمشاهرة وتترفد وتعطل وتبقى جاهل، محو أمية ظاتهو ما بيلحق ما أنسجة الدماغ بتضمر والخلايا بتموت والخيران بتضيق "ما هو الدماغ كله خيران"..
يلا الحمد لله إجتزنا كل عذع المراحل ونرجى الباقي...
قالوا قشر البصل؛ مبارتهو والواحد بصل...
يلا بلا أزرق ولا بنسج ;););)

[بابكر مخير]

قلنا كمين مرة كدآ، مع الكُبر التعب بيحصل.
بس ما تعب الجسد البيهرم وتضعف عضلاته وتتشتت الإرادة التلقائية والعفوية في تحريك أجزاهو..
لا التعب من المعافرة وبرضك ما المعافرة الجسدية بأيتها من أنواعها. قصدي المعافرة النفسية والذهنية...
كيييييييييييييييييف بقآ وبقولها هنا بصراحة زولن كلامه ممكن يتفسر سلبي أو أيجابي..
سلبي بمعنى أنه "خرف" وبيرمي الكلام على هواه أو عفويته أو إيجابي بأنه حديث شخص مع الكِبر ذاد فهما ووسع تجربة ولا يمكن أن يؤخذ على هوان....
أها بعض مرات تلقى نفسك في وسط معركة بلا معترك أو مشكلة رمت نفسها عليك أو وسط حوار وتبقى ذي وسط حلقة ذي الدرويش في الذكر، تلف وتدور بسبب إيقاعات مبهمة وتنجذب لي فراغ..
تلقى الأمور حواليك مرسومة وإتا بي عفوية في خضم ثورانها دون أن تدري...
أها تعمل شنهو؟؟
بقول؟؟
أخير الواحد يجرجر أطرافه ويشوف ليهو طريقة تبعده من المعافرة دي..
بالإعتذار، بالنفاق، بالتلطف. يعني إستغل تجاربك وإختار الصاح البيقفل الباب......
ولا أبقى قدرها. ذي ود خالي بلالي "شوقي" وبدل "ما ما تعافر" "دافر"

[بابكر مخير]

ذي ما كمين مرة إتكلمنا عن الكُبر وجياش العاطفة...الغريبة بين الحالة دي وحالتين أخريين لهما رابط قوي في القمة ثوران داخلي....
يعني شئ يفرحك تتلذلذ قمة ومتعة للطيش، شئ يزعلك الرجفة وشحتفت روح...
بس ذي ما شنهو !:rolleyes: ما علينا يا "كوكي".....
ما هو برضك متعة في لحظات القوة بس شحتافة لمن تقول طلاع الروح في الكِبر...
قبل كم يوم صقعت بجيوش العاطفة تجيش بمشاعري وجاشت حين كان في الهاتف صوت هادئ لم أخبر سماع مثله من قبل. أين لي وانا لم التقى الملوك والأمراء. كان صوت صادق من نبراته، قوي في إنتقاء لغته وأمين في إيصال قصده.
كان المتحدث "الأمير الأمين"..
تمتعت حتى الثمالة وبعدها...
جلست جمعت أنفاسي حتى لا تهجمني الشحتافة وأقع ميت من التخمة فقد ثَمَأَني ثَمْأً أو كما يقال...
شكرا ليك أمينا الأمين...
على ردك على رسالتي بما هو أقيم....
تعرف يابا،
بين السطور طلاسم!!!
راجع عكود "كوكي" وهو الماسك بحقيبة الشفرات السرية ;)

[بابكر مخير]

ظنيتني في بوست من قبل إتعرضت لي حادثة زيارة الوالدة للنميري في بيتهم في ود نوباوي عشان توصل ليه رسالة وفي كلماتها: البيهين الرجال، ربنا بيهينو.......
اليوم ولمن سمعت قصة الخالة ستنا بدري يحفظ ليها صحتها وجمالها، إتذكرت القصة دي وبيني وبين نفسي قلتا، بنات بابكر بدري ديل ورثن أبوهن تب..
الحصل أنه البشير مشى يكرم السيدة وتحدثت معه وختمت لقاءها معاهو بي قولة:
إتا ذي الراكب ليك ضهر أسد...
المعروف عن هذه القولة، أن الراكب ضهر الأسد بيكون في حالة دائمة من الخوف ولا يكون مرتاح أبدن، ما هو إن وقع الأسد بينقلب عليهو وبيأكله......
هذه من إبداعات الكُبر وقيمهو الفذة...
ما في خوف، ما هو تاني في شنهو...
يعني الموت؟
أصلن قرب وبقآ قاب قوسين وأكيد أدنى.....
الكُبر الجميله فيهو في حالة الفلس بتكون متيقن وفي حالة المرض بتكون عارف البيبقآ وفي أيتها حالة إن كانت؟؟
أكييييييييييييييييييييد الجآي أحلآ منهو الفات......
وحافظ عليها يا فتى تسمو على الأجيالgooodgooodgooodgoood

[بابكر مخير]

الكُبر إحساس داخلي وتفاعلات داخلية، إنعكاساتها ظاهرة عيان بيان.. بس في جوانب صعب الزول يفصح بيها حتى لو بلغ من العمر عتية إلا كان من طبعه الشفافية وزولن بايعها، لا بدس لا بحابي، يعني عديل حلبي رداح ورباطابي ممصمص وغرابي عاجبهو روحهو وسوداني ، أقرع ونزهي وأفريقي أصل البشرية "مش كل الإكتشافات بتصب في أنه الإنسان الأول (دآك الأصله قرد)
إتو كدي تعالوا النسأل أبو الوليدات واختهم، راجل المراة في الكتب والقصص والحكاوي ويييييين كانو...
الغريبة أنه المرآة الأفريقية تتميز بجمال الجسد لكن الوشيش ما دايمن الياهو إلا قوم واحديييييييييييييين...
هنا يبقى الجذب الأخوين لإختهم إذا كان جمال الوجه تبقى إحتمالية أصولهم أفريقية ضعيف إلا إن كانو من ديك.
المهم نرجع للكُبر وأنه الزول بيتملي وهم بأنه مهم. ذي حسي غبتا شهور وعلى عشم زول يهببوا لكن ويييييييييييييييييين..
غايتهو عارف في البيقول، إنفكينا منهو وفي البيقول إتحلينا منهو..
لكن شوووووووووووووووقكم..
الورثة دي ما بنمحقها غياب وعتاب..
ونرجع تاني ونشوف بقآ :cool:

[عكــود]

اتحلينا منهو!!!
والله حكاية!

كدي أسمع الكلام ده:

الحمام الفي الدر يرك
حبو زاد القليب فرك
ديسك التايق ومنشبك
وصفو في خشمي آبينترك
جازمي جيلك ومالكي عصرك
وفي الملم يعجب منظرك
وجهك الناير غير دعك
خوفي يم شلاخ اسحرك
لهجك الرطب المتعجك
وسنك البراق البرك
خدرتا الفي جنينة الملك
ان شاء الله بعد العسرة يسرك


الظريف مسواك الاراك
دايري اقيف واتحدث معاك
وما بيطيقلي المجلس بلاك
ربي يعلم اني رايداك
وفي وليد العين مسوَّاك
وين لقيتك لامن آباك
راقدي في سدرك ومشتهاك



نسخة:
ع المنعم حضيري
أمير اللمين

[بابكر مخير]

الحمام الفي الدر يرك

ديسك التايق ومنشبك

لهجك الرطب المتعجك

راقدي في سدرك ومشتهاك


دآ عربي يا


عبمنعم حضيري
أمير اللمين

:cool::cool::cool::cool::cool::cool::cool::cool::c ool:

[بابكر مخير]

دنا الشَّيءُ: قَرُب من الشئ... وهو دان.....
آها لمن تقول "حردان" وهي صفة من جماليات الكُبر تعني حق الأمر المعني..
شوف الكلمة من إسم وفعل ودي جماليات اللغة العربية، جمع الإتنين مع بعض..
الحر وهي السخونة يعني بالعربي العامي والأفصح الشئ البيحرق، النار حارة والشوق حار والحب بيحرق في القلب وعدمه والغريبة أنه برضك بيحرق..
طيب نشوف قولة "حردان" دي شنها...
الحر + دان،،،
يعني ذي ما قلتا لصديقي الحبيب الهاش "الباش" أنه "كوكي" أقام مأدوبة غذاء فاخرة على شرف ضيفيه أصدقائي كذلك (عمك جعفر بدري وجنابهو النور) هنانا فيييييييييييي أبوظبي وأنا دآك لا في الحير ولا في الطير (طير جآية من طآري يعني متذكر، مش الطير بأنوعه الإتملت بيهو مائدة "كوكي" التي حرمني منها (الحردان)"...
آها حردة ذي دي بتجي في لحظة لكن إرتداداتها بتحس بيها "عُقُب" لمن بطنك تقرصك :(...
دي مشكلة الكُبر الحسابات كلها بتخطلت..
تنسى أنه اليوم البيمشي قدر ما فيهو من إزعاج، بآكر بيكون أكتر إزعاجن.. وكل السلبيات بآكر بتتضاعف والإيجابيات تتناقص...
يعني نظرية أرخميدس تتجلى، حجم الجميل ينزاح عشان يفضي مكان للوجع ...
هههههه..
أبو مولانا (ما وليد جعفر بدري محامي وعندنا يا هو بيقولوا للمحامي مولانا) قلتا ليهو جيت لي مولانا...
قال ليا لا جيت لي ولدي، قلتا ليهو ما الياهو المحامي.. قال ليا أيوة..
طيب كيييييييييف يا دفعة،، ضحك وقال: ما زمان مولانا دي بقولوها للمحاميين الكُبار "أكيد بيقصد كِبار السن" وولدي لساتهو صغير...
وبرضكم تقولو ليا الكُبر ما بيلخبت...
قال ليا يا أخي ما الزهايمر وجعفر راجل حبيب ورقيق. فقمت تلطيفن للأمر، بعت ليهو نظرية أرخميدس وأنهو الحكاية ما زهايمر ونسيان قدر ما أنها إزاحة أحداث من الذاكرة لإستيعاب الجديد من حكاوي...
يعني تتحول للإرشيف، بس لي سؤ الحظ؟؟
الباشكاتب المسئول لحق الباشكاتب دآك...
:eek::eek::eek:
(كوكي وقع ليك)...........
آآآآآآآآآآآآآآآآآآآآآآآآآآآآخ يا زمان لمن كنا ذاكرتنا ديمة على أهبة الإستعداد :cool::cool::cool:
"حسين أبراهيم مالك، إبن خالتي وصديقي وحبيبي، عندهو قولة للذينا عشان يخفف بيها حالنا (ما في أجمل من الكلمة الهوينة والقبلة اللوينة)gapgapgapgapgap

ويا ها دي الباقية لينا gooodgooodgoood

[بابكر مخير]

وذي ما قلنا كمين مرة ومرة كدآ...
لمن تكبر، تغتر، تتصور، تتخيل وتعيش في وهم كبيييييييييييييير..
أنك الفاهم والبتقوله كامل ومتكامل...
يعني بس خلوها علي الله...
المهم وبناء على هذه الوهمة بقول وكل زولن بفتكر أنه بيقدر ظروفي ويأخدني علي عقلي..
لكن والله بالجد وبعد هذه التجربة السخيفة (الكُبر) عندي ليكم قولة وختوها حلق في إضنينك/ن/م.....




ما تعجزو، تصحو

[بابكر مخير]

القلم ما بزيل البلم، بالله عليك القولة دي في حياتك اليومية تقابلك كمين مرة..
الألقاب والمسميات بعضها يطلق كدى دون إستحقاق وبعضها يقال عفويا. يعني خيلاني ولاد بمبآ يعجبوك بقآ في التفخيم وإحنا بقينا ذيهم.. تلقاهو شغال في ورشة تصليح عربيات وراس ماله ذكريات ميكانيكي لماهو في أيام طفولته ولا صبي العجلاتي الذي يشاطره نفس الذكريات (كوكي الحق) والناس تناديهو "باشمهندس" ولا خفير في شفخانة البلدة ومعمبب بي (دكتور فلان) وإن ما قلتها ليهو بيزعل ويشعر بأنك منعته حق شرعي وقانوني ووضعي...
ودآ ظنيتهو السبب الخلى قصة "القلم ما بزيل بلم" تبقى حقيقة سببها ضرب الخيال.. ما هو لو كان الألقاب والمسميات تتطابق والإستحقاق ما كان الجاهل يستشار أو الغافل يسأل ولا المغفل يستفتاى...
انا قصتي مع الحكاية دي بتحسس منها ولمن زول يقول ليا "دكتور" بستغربه وإن كان الصيدلي برضك وعندنا بيقولوا ليهو "دكتور" لكنها ما صاح لأنه الدكتور حتى لو لي الطبيب ما اليها، لأنها درجة أكاديمية وإن كان في زمنا دآ فاقدة قيمتها... ما هو كتير ممن هبآ ودبآ بقى دكتور وزيادة لي تهميشها بقت إكراميية...
ما علينا نرجع لي قصة القلم والبلم!؟
القلم وجآ في القرآن ما بفتكر هو الآداة دي ناس التروبن والباركر والبيق، كان رصاص ولا كوبيآ وناشف ولا حبر لين.. (آكيييد في أسماء هنا بتكون طلاسم لي ناس ما عاشو تلك الأيام الجميلة "أيام شبابنا ودفعتنا;)")
لا بفتكر أنه العلامة والعلم، قمتها القيم والأخلاق وذي ما قالوا:
الأمم الأخلاق ...... (أتموها أنتم، ما أنا راحت مني :D:D)
(طبعن النسيان من محاسن الكِبر. إن كان واقعا فلك العذر وإن كان مقصود وإتا بتتحايل بيهو، برضك بتلقى العذر)
السبب في دآ كلهو؛
زعلآ كدآ من واحد جامع ليهو كم من المسميات (مهندس لأنه خريج هندسة وأستاذ لأنه يعمل في الإعلام ودكتور لأنه بيقول عنده دكتوراة "ما عارف في الهندسة ولا الإعلام" برضك كمان مولانا "بتاعت ناس الدين، لأنه كثير الفتاوى في أمور الدين وراسماله في الحكاية دي <عمرة> :("
آها ما شيتن يحرق الدم :mad::mad::mad:

[بابكر مخير]

بل السنفجة في شبر موية تنشفه ولا رش الطرحة بي بخاخ موية تنبلآ..
لكن شوف ناس إحنا ديل (العواجيز، جلآكين، معمرين، مخرفين وسمهم ما شئت).
بالله عليك الطابعة في خشمهم ما تنبلآ والحكمة الريق طوالي جآري... يشفط فيهو ذي الفاكيم كلينر (vacum cleaner) وبرضك ذي شلالات نياجرا ليها خورآ..
القصد ومضمونه أنه ناس إحنا ديل أديهم (القوالة) بس والله ما بتكون بقصد سيئ ولا حتى أقل درجات في منظومة "الشمار" لكنه عفوية..
يعني أمسك أمس شرفني "كوكي" في المندولا (ما هو خلاص يا جيلينا بعد الذي منه والذي وعد جنابهو النور بتنزيله looool، وضح أنه فيه حوافز وكوكي جميل ويحب الطعم الجميل "أمشو أقروها غلط")...
إتونسنا وذكريات القرآية في أوربا "طبعن مع فارق الزمن من العتيق للعتيد ومن الستينات لي التمنينات... لكن أوربا القارة العجوز ياها ظاتها أمشي ليها حسي وتلاقي جلكن كان فيها في الخمسينات مشاركك نفس الحصل والحاصل والحيحصل...
ناس شغالة بي سيستم...
إتكلمنا في الطبيخ والطعام (دي برآها وديك التحتها خط برآهو، مش قلتا ليكم لساتنا ما خرفنا :rolleyes::rolleyes:) وأنه كل مننا طبخ ومننا من يدهو حلوة ومننا من يدهو آحلى...
يعني لغاية القراصة ومفروكة البامية والكريم كرملة والليقيمات، ده كله تناولنا قدراتنا المطبخية فيهو وفلفلنا حكاية مفهوم اليد الطاعمة و(الطعامة) ظاتها ويبدو أنه الحديث وشجونه أسكرنا وتفاوتت حدود السكر بيننا...
ويا جيلينا الجميل..
رآحت السكرة وجآت الف ومليون فكرآ..
لمن تناولنا موضوع ال آل أييه
"الكمونية".
المصران وقلم الرصاص..
أهلنا الرباطاب إشتهروا بفتل الحبال
الحاجات بالمشاط
وبي دآ كله ما أظنهم الإتنين شطار في ضفير المصارين....
جدكم بابكر بدري كان بيقول:
الصراحة هجمتني
لكن أنا بقول؛ القوالة حرقتني ..
واللبيب بالإشارة يهضم "الكمونية" :eek::eek::eek::eek:


وعشان تعم الفائدة وما يبقى صنعها حصري،،

منقول وعن الكمونية::
_________________________
من الأكلات السودانية المشهورة وتتكون من الكرشة و الكبدة والطحال والرئتين وقطع من اللحم

طريقة تنظيف مكونات الكمونية
لتنظيف الكرشة تكشط الأجزاء القاتمة اللون وتزال القطع الدهنية وتشطف مرارا بالماء البارد وتغسل جيدا بالليفة والصابون وتشطف جيدا، ثم تدعك بالدقيق وتشطف بالماء . تقطع حسب الرغبة وتوضع في ماء بارد وترفع على النار لتغلي ثم يصفى الماء ويستبدل بآخر وتكرر مرة أخرى حتى تنظف جيدا

لتنظيف الطحال يغسل بالدقيق وينظف جيدا
تدعك الرئتين (الفشفاش) بالملح وتغسل ثم تدعك بالدقيق وتشطف جيدا

لنظافة الإمعاء

يزال منها الشحم بقدر المستطاع ثم تغسل جيدا وتقلب باليد أو بوضعها في طرف صنبور المياه (الحنفية) وتفتح ليساعد اندفاع الماء على قلبها بسهولة بعد قلبها توضع في مصفاة وترش بكمية من الملح ويضغط عليها للتخلص من المادة المخاطية . تشطف وتدعك بالملح والدقيق ثم بالصابون ثم تشطف جيدا لتزول آثار الصابون تماما . تقلب ُانية وتكرر عملية إزالة المخاط حتى تنظف تماما ثم تقطع أو تضفر وتقطع
(إ(ضافة مني، ما تنسوا قلم الرصاص;);)))


طريقة عمل الكمونية



خلطة من الأحشاء السابقة
2 بصلة كبيرة
جزرتين
ثوم
سمن أو زيت
طماطم أو صلصة


يقطع البصل ناعما ويقطع الجزر حلقات

تقطع الأحشاء بعد نظافتها إلى قطع صغيرة وتضاف إلى البصل والجزر والسمن وتتبل وترفع على النار وتقلب حتى يجف الماء

يضاف عصير الطماطم أو الصلصة ويقلب الجميع حتى ينضج الطماطم ويضاف قليل من الماء حتى تنضج الكمونية

تغرف بدمعتها وتقدم ساخنة

ملحوظة : يستحسن سلق الكرشة أولا ثم تخلط مع باقي الأحشاء حتى لا يتأخر النضج مع بقية الأحشاء السريعة النضج

[بابكر مخير]

تزيد في العمر
تزيد شكوكك
طبعن الشك ما هو لزمتن مرتبط بالمؤامرة ولا سؤ قصد طرف تاني، ممكن تشك أنك لبست سروالك تحت الجلابية ولاك منطلق أم فكو، تشك في بلعت حبوب السكر والضغط والروماتيزم الأوميغا 3، قالوا كويسة عشان الزهايمر..
تشك في أنك إتغيرت بعد ما الكرعييين بقن مولوووووووس وبقيت زول كلمتن هوينة وما ليك "الآخر" حتى لو بلعت وإتحقنت،،
زمان كانو يقولوا لي الواحد في سن التاشرات الأولى ويكون "ليلهو مقطع"؛ إتحصن يبعد منك الهواجيس والكوابيس وإبليس وأتباعهو وأولادهو وجناهو وبناتهو والشيطان...
حسي جنس دآ ما منهو خوف، ما هو خلاااااااااااااااااااااااااااص..
الشك وإتا زول كبرتا وفهمتا وعرفتا وإتعلمتا، يقوم زول يقول ليك كلامن لا في الطير لا في الحير. آها زمان كان الواحد عدييييييييييل موقفهو واضح، لكن ما حسي بقيت ذي الأسد لمن كِبر الفار لعب ليهو في "حنايهو"...تشك في الكلام وبين الحقيقة والخيال....
يعني ممكن تشك في قرارات مجلس الأمن
لكن ما تشك في أنه "الحراية حرقت جبل دهب الشرق لمن إتبخر في السمآ" :rolleyes::rolleyes:

[imported_فيصل سعد]

يشهد الله يا دكتور بابكر،، اتا لزيز :D:D:Dلويزو، دبلكولا،
بزيانوس :D:D:D

[بابكر مخير]

يشهد الله يا دكتور بابكر،، اتا لزيز :D:D:Dلويزو، دبلكولا،
بزيانوس :D:D:D

الحبيب النسيب
الموضة ما إتغيرت مع أهوال الزمان،،
اللزازة بقت بيطعمهو ما بيشربوها..
أمسك عندك من سبيل المثآل؟؟
وشوف الي قال؛
"الكمونية" ما شغل جهال
البعرفو يضفرو ليها المصارين ذي وبر الجمال....

(عند كوكي حل الطلآسم)

[imported_فيصل سعد]

و الله كوكي الأيام دي عيني باردة،، ما شاء الله عليه بالبدلة "الرويال بلو Royal Blue" ما أظنه يحل لينا طلاسم و كدا :D:D

أرقدوا عافية..

[imported_فيصل سعد]

وشوف الي قال؛
"الكمونية" ما شغل جهال
البعرفو يضفرو ليها المصارين ذي وبر الجمال....

(عند كوكي حل الطلآسم)


أو على قول سيد الحبايب،، في إحدى تجلياته و قفشاته المحببة " الما بيعرف ما تدوهوا يغرف،، بيكسر الكأس و بعطش الناس "

ابقى طيب يا رجل يا حبوب..

[imported_بدور التركي]

أخي الحبيب الدبلوماسي جداً، إبراهيم عبد المنعم
هو يشكي وأنا أشكي من؛
الوجع والآلام والفتر
الأمنيزيا
الزهج...
بعفوية شديدة قال ليا:
يا أخي دآ كان مستخبي لينا وين؟؟
وهو يقصد الكُبر....
مدخل لموضوع!!
معايش من العديدين ومستغرب من التانيين
والتالتيين أخير ليهم يفتحوا عيونهم..
ما الفنانة قالت:
الما ضاقهو
وأنا أقول:
أكييييييييييييد بيضوقهو...
:cool::cool::cool:

ما عايزين نضوقو
نضوق السمح نحن 😁

[imported_فيصل سعد]

ازييك يا بدور و عساك طيبة،،
و مرحب بعودتك و ايابك الجميل..

[بابكر مخير]

ما عايزين نضوقو
نضوق السمح نحن 😁
الإفراط هو نوع من المبالغة في أيتها شئ، مثلن المحبة ممكن تزيد وتكتر بي مبالغة لمن تزهج، العواطف لمن تكتر بتغلبك، الشوق لمن يتراكم بيطويهو النسيان، الزعل الشديد بوصل لي مرحلة عدم الإكتراث...
لكن جنس فرحتي الليلة دي (طبعن في السودان الليلة دي عدييييل كدآ بتعني اليوم وما شغالين بي صباح ولا نهار ولا مغرب ولا مساء،، لمن يقول ليك واصل الليلة بس رابط في المطار لمن الطيارة ترك:()
آها فرحتي الليلة دي. إفراط في المبالغة ظاتها ومبالغة بإفراط..
ظهر القمر في شأن يجمل "الكُبر" وبي لمسة متل مايدس فورة الشباب هجمت.
رد الشباب وإتملى المشيب بالروح...
كدآ ولا بلاش
يلا!!
بلا كُبر بلا مشيخ
مرحب بنيتي وليك شوق:cool:

[بابكر مخير]

ازييك يا بدور و عساك طيبة،،
و مرحب بعودتك و ايابك الجميل..

مش كدآ بالله يا الحبيب النسيب.
بعد دآ! الثقيل دآ "الكُبُر"، إن ما هو ختانا.
إحنا بنملصه ونرميهو في المالح :o

المالح، تطلق على البحر أيتها إن كان وتنسب لمائه المالح

[imported_فيصل سعد]

المالح بعد خجة غريق :D:D
اعمل حسابك، الملح الكثير، بيرفع الضغط و كدا :D:D

[بابكر مخير]

شوف بقآ بيقولوا: شنهو ما عارف هنآي الكدآ
ما يعادل الكٌبر هو طلاق المتع والأمل...
الدبرسة بالنسبة ليهو، صف أول
الهم بيغنوا ليهو وينقال: يوماتي.....
الزهج لزقة سلانبس يحرق الجلد ،، طبعن المدهش في لزقة السلانبس وأغلب لزق ودهانات "الرطوبة" فيها مستخلص "الشطة" الحارة الهندية الأصلية، يعني الزهج حار وبيحرق الملازمة.
الحزن فيهو جد.....
الحزن على اللذي مضىو.. ممكن يكون شئ ملموس أو أمر محسوس لكن الحزن الحآآآآآآآآآآآآآآآر بيكون لفقد شخص لك ولي غيرك معناهو وحقيقتهو كبير وكبيرة وحتى لو كان أو كانت كبير أو كبيرة في العمر...
حزنت بفقد الخالة "ستنا بدري" الجميلة والفنانة. إفتقدتها مع أني سنين ما لاقيتها لوقت يشبعني منها ونسة وحكاوي...
حزنت لرحيل عميدة آل بدري الرابط بين الأجيال العظيمة وحملة الإرث..
عليها الرحمة


https://www.youtube.com/watch?v=m-SqUvlblwQ

[imported_بدور التركي]

ازييك يا بدور و عساك طيبة،،
و مرحب بعودتك و ايابك الجميل..

دائما ببالي
انا ما نسيتك بس ضاعت احلام الطفولة
يسعد صباحك يا جميل

[imported_بدور التركي]

الإفراط هو نوع من المبالغة في أيتها شئ، مثلن المحبة ممكن تزيد وتكتر بي مبالغة لمن تزهج، العواطف لمن تكتر بتغلبك، الشوق لمن يتراكم بيطويهو النسيان، الزعل الشديد بوصل لي مرحلة عدم الإكتراث...
لكن جنس فرحتي الليلة دي (طبعن في السودان الليلة دي عدييييل كدآ بتعني اليوم وما شغالين بي صباح ولا نهار ولا مغرب ولا مساء،، لمن يقول ليك واصل الليلة بس رابط في المطار لمن الطيارة ترك:()
آها فرحتي الليلة دي. إفراط في المبالغة ظاتها ومبالغة بإفراط..
ظهر القمر في شأن يجمل "الكُبر" وبي لمسة متل مايدس فورة الشباب هجمت.
رد الشباب وإتملى المشيب بالروح...
كدآ ولا بلاش
يلا!!
بلا كُبر بلا مشيخ
مرحب بنيتي وليك شوق:cool:

اولا
من قال عنك كبير
انت كبير بعقلك وذوقك وأخلاقك السودانية الأصيلة
وطفل بقلبك البريء الجميل
ومشتاقة لك كثير
أتوقع مني زيارة قريبا 😘
احبك يا ابوي

[ناصر يوسف]

ربنا يرحمها ويغفر ليها يا دكتور بابكر

[imported_شبارقة]

المالح بعد خجة غريق :D:D
:D:D

خجة غريق ومنار بيرجّع التايهين 😜

[imported_فيصل سعد]

دائما ببالي
انا ما نسيتك بس ضاعت احلام الطفولة
يسعد صباحك يا جميل

من جديد جيت تاني تكسر
صمتي بالنظرة الخجولة

يديك العافية..

[imported_فيصل سعد]

خجة غريق ومنار بيرجّع التايهين 😜

انت يا عاصم مالك بقيت تجلي و تنسى، نجدة غريق و منار بيرجع التايهين، زورق الالحان للباشكاتب "ماهو يا تغنوا انتوا " :D:D
اما ،خجة غريق تلقاها في قصيدة حميد في رثاء مصطفى سيد احمد :

عين الشمش زي التقول متشوشة
أو مرشوشة بي حمرة غضب..
زبد الحَمار زي رغبة المالح
بعد خجة غريق
والليل دخل كبت الفريق
قنعت نصيرة من البلد
قنعت نصيرة من الدقيق

ارقد عافية..

[imported_فيصل سعد]

البركة فيكم يا دكتور بابكر، رحم الله الفقيدة و اسكنها عالي الجنان، و جملكم بالصبر، احبابها و اهلها و ذويها.. انا لله و انا اليه راجعون..

[بابكر مخير]

(sentimentality)
كلمة جميلة بالإنجليزي وترجموها بالعربي؛
العاطفية
حساسية
الانفعالية
مفهوم عاطفي
والبيحصل مع الكُبر شنو؟؟
دموع ترقرق لو حتى حرف من كلمة سمحة سمعتهو
شعرة جلدك تكلب لمن زولن دفعة يجيك ناطي في الواتساب
تجعر عديل لو طراطيش شكرن ليك نسمت عليك...
القصة وما فيها؟!
دخل عليا في الواتساب أخي الحبيب (بروفسير) محمد زين في الواتساب من لندن، بيسأل، يتفقدني وأنه متواصل مع بنتي وأحفادي في لندن..
زول قمة في الإحساس الجد، يعني sentimentality..
ديمة شيته بي عاطفة جياشة
حبه للناس بعاطفة
صداقته بي عاطفة
حتى معارضته بقمة ما يمكن أن توصف بيهو العاطفة...

https://www.youtube.com/watch?v=ttVAhJ1h7z4

[imported_الجيلى أحمد]

الإفراط هو نوع من المبالغة في أيتها شئ، مثلن المحبة ممكن تزيد وتكتر بي مبالغة لمن تزهج، العواطف لمن تكتر بتغلبك، الشوق لمن يتراكم بيطويهو النسيان، الزعل الشديد بوصل لي مرحلة عدم الإكتراث...
لكن جنس فرحتي الليلة دي (طبعن في السودان الليلة دي عدييييل كدآ بتعني اليوم وما شغالين بي صباح ولا نهار ولا مغرب ولا مساء،، لمن يقول ليك واصل الليلة بس رابط في المطار لمن الطيارة ترك:()
آها فرحتي الليلة دي. إفراط في المبالغة ظاتها ومبالغة بإفراط..
ظهر القمر في شأن يجمل "الكُبر" وبي لمسة متل مايدس فورة الشباب هجمت.
رد الشباب وإتملى المشيب بالروح...
كدآ ولا بلاش
يلا!!
بلا كُبر بلا مشيخ
مرحب بنيتي وليك شوق:cool:

:D:D:D:D:D:D:D:D
يامساء الوورد

[imported_الجيلى أحمد]

احبك انت وبدور :cool:

[imported_فيصل سعد]

احبك انت وبدور :cool:

و احبك انت و الشال و الطاقية :D:D

[imported_فيصل سعد]

و نظارة النظر أو عدسة لاصقة،، أيهما تحب :D:D

[imported_فيصل سعد]

كاتب،، و روائي..
و ما خفي كان أعظم،، أيها الرجل الجميل،، قلبا و قالبا،، كما يردد ود الحاج، طيب الله ثراه، و اكرمه بالرضا و الرضوان..

[imported_الجيلى أحمد]

زي ماقال عم مخير،

الكبر دا حاجة ثقيلة..
بقينا رُهاف، ارهف من طرقة الكسرة..

ياجماعة شوفو لينا طريقة لمّة بتاعت سودانيات،
في السودان أو أبوظبيت:)
وياريت في السودان..

عشان أكون عملي بقترح بعد خمسة شهور..
يلا أدونا اقتراحاتكم ونشوف الزمن البناسب أغلب الناس متين