يا أخي الكُبر دآ حاجة ثقيلة بشكل

[بابكر مخير]

ذي ما قلتا قبل كدي ورددتها كمين مرة..
مع الكُبر ما موضوع الذكراة بس براها البتروح. أبدن!؟
خوفي أنهو طعم الحياة ذاتهو بينطمس. (نلاحظ من كلام ناس زمان يعني حبوباتنا وجدودنا ظاتهم "لك أن تتصور زمان دي قدر كيف يعني" أنهم يقولوا زول مطموس.
تشوف الكلمة دي كدآ وتقول أنها عامية سودانية وحقت ناسن مستعربة ما شئ حق عرب عاربة، لكن بالرجوع للمعاجم نلقى أنها في الأصل لغة الضآد القحة بالجد. فمطموس العين هو الزول المعمي وممكن نقول المغيب ودي هي الحالة البكون عليها الشخص المطموس فهو غير مبالي في تصرفاته مما يثير سخط الناس عليه "وبرضك طمس تعني أخفى أو محى". وهنا تبين فطنة الزول في إتقان المجازات مشتق حقيقي من الفعل في اللغة ليكون الإسم وهو تعبير مجازي بقصد التشبيه
loooollooool.
الخواجات بأصابعينهم باليدين الإتنين " الوسط ولإبهام" وأثناء ما بيتحدثوا ويكونوا دايرين ياخدوا تخريمة عن الموضوع ولتنبيه المستمع بأنها تحويلة صغيرونية وحيرجعوا من تاني للموضع. بيطقطقوهم الأصبعين في نفس الوقت بين اليدين الإتنين.. خلاصتهو يعني كلام بين قوسين (between brackets). فدحن نواصل في موضوعنا بتاع طعم الحياة البروح وكيفن الكلام دآ؟؟
في ذات نفسك تبقى غير مهتم بالهندام يعني عموم المظهر الخارجين تبقى ما بتضوق للحو طعم وممكن أكيد يتساوى مع المالح أو الشئ المن غير طعم، تبقى الذكريات هي المستحوزة على واقعك وإجترارها هو برنامجك وهي حصرية على إستساغة المر من أحداث وتفضيلها على الطاعم المفرح، تبقى الكآبة شمسك وإن جاء البفرحك ما بتعدى كون إنهو سحابة في حجم نملة غطت شمس الكآبة الحارقة..
خالتنا الحبيبة أم الفاروق عليها الرحمة كانت عندها قولة؛ حياة بايخة.. في وكتها كنا نتهكم لكن وعلى قول مدينة أم قاسم رحمة الله تظلها وتأنسها في وحشتها لمن ننظر لأمور كبار السن ونعلق عليها؛ هئي بكرآ بتشوفوهو برآكم. وفعلن حصل :(:(:(

[بابكر مخير]

أيام الدراسة في الجامعة.. كان الأسلوفاك يقولوا لينا نحن الشباب المسلمين؛ (محمدان) وهم يقصدونا بيها نحن المسلمين..
وكتها الواحد ما كان خاتي الكلام دآ في مفهومهو وبفتكر أنهو جهل منهم ساكت لكن الواحد إبتدى يفهم شنهو هو المقصود بي "محمدان"..
هم مسيحيون وحسب فهمهم أن ذلك لإرتباطهم بالمسيح عيسى بن مريم ويبقآ بما أننا نجل نبي الله محمد عليه الصلاة والتسليم. فنحن "محمدان" بنفس الرابط الذي يربط بينهم وبين عيسى عليه السلام دون أن يعلموا أننا لا نعبد محمد ولكننا نؤمن به رسول للمولى عز وجل ومع ذلك لا نسمي أنفسنا "اللهويين" أو نصارح ونجاهر بأننا لله وحده نعبد وهو خالقنا وهو ربنا وأن محمدا عليه الصلاة عبده ورسوله.
نحن بين أنفسنا أطلقنا علينا إسم مسلميين وهو الأسم الجليل الذي حظي به أول المرسلين وأبو الأنبياء أجمعين سيدنا إبراهيم الخليل.
وكما جاء في قوله أجل من قائل "مَا كَانَ إِبْرَٰهِيمُ يَهُودِيًّا وَلَا نَصْرَانِيًّا وَلَٰكِن كَانَ حَنِيفًا مُّسْلِمًا وَمَا كَانَ مِنَ ٱلْمُشْرِكِينَ"
لكن كمان لمن تشوف في وسطنا المسلميين توجهنا والربط بيننا وبين نبينا عليه الصلاة والسلام. تلقى نزعة قوية تتقارب وما ذهب اليه أولائك المسيحيين نحو رسولهم وتسميتهم لينا "محمدان" فيهو شئ من الحقيقة..
سؤال محير لو قدرتا أسأله دون أن أصنف أو أوصف!!!
هل نحن في طريقنا القويم في عبادتنا لله عز وجل ودون أن نكون قد حدنا عن سيرنا.
كما هو حال النصارى الذين يرون في نبي الله عيسى أنه هو الرب. والعياز بالله الواحد الأحد الحق...
على أي حال والحمد لله.
أني أشهد أن لا إله إلا الله وأن محمدا عبد ورسوله..

[بابكر مخير]

يعني مع عمرنا دآ..
نتخما من الإنجليز ويغشونا؟؟
يا مؤمن يا مصدق، تشوف درجة الحرارة في التلفون بالسلسيوس 15 درجة. تفرح وما تلاحظ لي أنهو تحت مكتوب بالحروف الصغيرة ذي في الإتفاقيات (خاصة مع البنك الما بتتقري ديك وتلقى كل قروشك مشت البنك أرباح حسب الإتفاق) feels like 7.
أها دآ البيحصل بالضبط في الشتاء، يقولوا ليك الساعة تلاتة ونص بعد الظهر وإتا عينك لي إنارة الشارع مضوية والبيوت شبابيكها ساطعة بالنور والدنيا من حوالينك مضلمة..
تتسأل تقول هو انا الغلطان ولا ديل الخواجات نظامهم كدي، يشوفوا في الفيل ويطعنوا في ضلهو..
يعني حسي لو من الأول قالوا درجة الحرارة تمانية سلسيوس وأنهو الساعة بدل تلاتة ونص تمانية باليل ربنا مش بيرضى عليهم من رضانا عليهم..
لكن القصة كلها الإمبريالية 🧐 الرأسمالية وأنهو القرش وجمعهو ليزداد هو سنة الحياة هنا.
القصة أصلن وفصلا مربوطة بالسياحة، أهلنا من العرب العاربة (وهم حقيقتن مستعربة لمن مستغربة ظاتهو) لو عرفوا أنهو درجة الحرارة لساتها تمانية ما بيجوا وأكسفورد إستريت يضبلن وبارك لين هوتيلاتهو تفضى وحتى المستعربة الهنا بيزنسهم بينخ..
بالإنجليزي كدآ... السطور التلاتة الكتبتها دي (looks like 20) إن شاء الله تكون خفيفة على القلب 🥰🥰

[فيصل سعد]

السلام و التحايا الطيبة الاعزاء الدكتور بابكر مخير و البروف حسن فرح، رمضان كريم، تصوموا و تفطروا على خير 💚💚 ارجو شاكرا تنويري كيفية تنزيل فيديو يوتيوب في المنبر، باقي طولنا و كدا 😅😅

[بابكر مخير]

السلام و التحايا الطيبة الاعزاء الدكتور بابكر مخير و البروف حسن فرح، رمضان كريم، تصوموا و تفطروا على خير 💚💚 ارجو شاكرا تنويري كيفية تنزيل فيديو يوتيوب في المنبر، باقي طولنا و كدا 😅😅
ذي دي كدآ :cool:

https://www.youtube.com/watch?v=pqMz4z3pvRY

أنا الحبيب بجيبها من اليوتيوب وبنزلها على "أدخل رابط" وغايتهو لي حظي،، ظبتت looool

[فيصل سعد]

ذي دي كدآ :cool:

https://www.youtube.com/watch?v=pqMz4z3pvRY

أنا الحبيب بجيبها من اليوتيوب وبنزلها على "أدخل رابط" وغايتهو لي حظي،، ظبتت looool



👍👍

[بابكر مخير]

👍👍

ظبطت ؟؟

[بابكر مخير]

مع الكُبر النوم مشكلة..
تنوم ساعة وتصحى. يومك كلهو تكون نمتا فيهو ساعات معدودة.
والأنا مستغرب ليها أنهو يقولوا ليك: الزول لمن يكبر بيرجع ذي الطفل أغلب ساعات يومهو نايم..
بما أنهو هذا بالواقع المعايش والحاصل بالظبط عكس المعايا وفيني.. يبقآ أني أعتبر نفسي ما كِبرتا..
النوم قلتهو مشكلة وكترتهو مشكلة لكن في نومتين هن ياهن محور مشكلتنا في السودان ؟؟
أبو البرهان يومتها ما كان نام عشان يحلم
وأبو حميدتي يومتها كان نااااام:(:(:(

[بابكر مخير]

الكُبر سماحتهو أنهو قولك؟ تفاسيرهو قدر ما هي كتيرة!
إلا ياها في كل الأحيان تحسب لي صالحك..
دحن أنا!! ود خالي بلالي بروفسير حسن فرح إلا سبقني وبي هدوء الناس الرزينة، العالمة وفاهمة وتقيلة.
وأكيد قوله ما حيحسب ذي قول الجنون (الشباب) أنهو غزل ولا حتى شيتن يتعارض مع ثقة زوجته فيهو بأن زوجها عينهو زايقة.

ماسكة الجو وتجدد الشباب
حياك الغمام عمنا ود فرح
--------------------
اى والله زين صدقت يا ود اخوى
هاك يا امير جرب عسل الجبال دا


لكن عات أنا وبي طراشتي وشلاقتي. إلا ماسك روحي ساكت. إقوم أفلت ولا أطربق.. لكن ما النعمنها البنية بالجد تستاهل المدح وحتى المديح والشكر والوصف الجميل.. وعشان كدي كتمتها في دواخل حشاي وفي غياهب حناني..
بس الناس البفهما شنهو إن قولنا قولن من طرف اللسان فأكيد... ذي ما قالوا: ما لبنت التلاتين أو أقل من صاحب فوق الخمسة وسبعين.. وإحنا ياهو بقينا رأس مالنا....
"ماذا عليك إذا نظرنا"..
كدي نرجع لي قصة سماحة الكُبر ...
ما هو بي سماحتهو وبي براءته وحسن نيتهو..
إلا أنهو شناتهو كُتُر.
ولمن يقصدك؟ بيهزمك..
إتصور الكُبر لمن دور يحقرك؟؟
يخلي ضبانة تجيبك آطة :eek::eek:
دآ الحصل.. مساء اليوم وبتفرج في قنوات السودان المتنوعة وضبانة لافة حولي وأنا أصلن ما شيتن بس ليا برآي لكنهو معروف مع الكُبر، خلقك في بيكون رأس نخرتك ومع الكُبر عقلك بيصغر لمن شيتن يضايقك. أها الحصل؟؟
أصلن قلتا ما بخليها بت الكلب وبإصرار مع أنها هي بعدت مني وحسب حساباتي (المختلة وشيتن بتاع جلاكين) أني بقدر ألفخها بي شيتن عشان أجيب خبرها. براااااااااحة إتناولت الشبشب وقمت علي حيلي الما شايلني وهويت عليها والولد يعني ندآل (لاعب التنس العالمي) وعلى قول كابتن لطيف رحمه الله المعلق المصري الرياضي الشهير (ألشت) الشوتة وفقدت التوازن وكان (هبوط ناعم:075:).. وأنا مسجي على الأرض، نابتني موجة ضحك؟
ما (شر البلية ما يضحك) وبيني وبين نفسي..
أعجبت بي ود خالي بلالي أنهو يتذوق في الجمال وصاحبت الغناء وبشغف قلب شاب في عنفوان قوته وأنا طموحي كان أتخلص من الضيبيبينة الجابتني واطة..

[بابكر مخير]

يا أخي اليوم وبعد غياب من 1985 لحدي شهر اربعة من السنة دي.
ما مسكتا ليا ورقة بتاعت إنتخابات ولا حتى الجالية السودانية.
أها من يومي الرجعتا وخرمة الإستمتاع بممارسة الحق الديمقراطي وهي شاغلاني. أول ما أدوني السكن (أويضة ياها للنوم والجلوس وحاجة كدآ يا دوبك شايلة مكتب الكمبيوتر وحمام ومطبخ) راسي عديل تواصلت مع الرجيسترار بتاع المنطقة وسجلتا كمواطن بريطاني يمكن أن يترشح وينتخب.
اليوم كانت جولة إنتخابات المجالس البلدية ومشيت صوتا..
طبعا نوع العارف أنهو صوتي ما حيكون خلاص البيحدد الفايز وعشان كدآ. لا صوتا محافظين ولا عمال وإخترتا الديمقراطيين الاحرار. منها أني مارستا حقي بالكامل ومنها أني ما صوتا للحزبين ديلا..
المحافظيين طبعا مواقفهم تقرف وخاصة مع العوير الإسمهو بوريس جونسن دآ وموقفه الحسي بتاع المديدة حرقتني وبزيد في التوتر بين أوكرانيا وروسيا وهو والروبت بتاع أمريكا بهايم لأنهو بكرروا في نفس غلطتهم مع الإتحاد السوفيتي لمن كبوا السلاح بي هبل للحركات المسلحة هناك وكلها مشت للإرهابيين من طالبان والقاعدة. حسي تاني كبوا السلاح لي الأوكران وطبعا ناس شرق أوربا ديل فاتوا الانجليز في الكروبشن فأكيد السلاح دآ كلهو حينباع في مركاتو السلاح ويقع في يد الإرهابيين الجدد وهم الحسي بيتكلم عنهم بوتين ووصفهم أنهم نازيين وناشولنست..
وهناك العمال الهم مفروض يكونوا أقرب لليسار والفكر التحرري في العالم شاتو كيلبورن وجابوا محلهو شيتن أقرب لي توني بلير وهو محافظ في توب عمال وأكيد ما بيستاهلوا أصوت ليهم..
المهم أنهو المحافظيين إضربوا في موجع وهو تلات مجالس رئيسية في لندن ولساتهو جونسون الكضاب بيقول أنهو لسة عندهم فرصة...

[بابكر مخير]

كله جيل ليهو شيتهو الخاصي بيهو؟!
زمنا وحتى لساتنا صغار. كنا بي شوق ولهفة ونهم، نحضر الليالي السياسية. كانت بالنسبة لينا فرصة نشوف فيها ناسن كُبار في الفهم والوعي ونسمع ليهم ومنهم نلفح لينا كلمة وإتنين وتوسع مداركنا ودرايتنا.
بالنسبة ليا وحتى إحنا صغار كنا بنرافق جدي بابكر في زيارتهو للقبة وهناك كانت لقاءات السيد عبد الرحمن بجماهير الأنصار وقادة حزب الأمة، بعدها كمان شوية وكبرنا فكنا بنمشي للمولد في جامع الخليفة وهو طبعا كان مشوار بتاع دقايق من بيتنا في شارع الأربعين وهناك نعيش في وسط الخيم وهي كانت بتغذينا بي البعد الديني وبرضك بنشوف رموز من القيادات السياسية السودانية من أهلنا الختمية وقيادات حزب الشعب الديمقراطي اصحاب الإرتباط الختمي وغيرهم ناس الطرق الصوفية والذين ليهم إرتباط خفيف بالحياة السياسية لكن برضهو كانت شوفتهم إضافة لتوسع الأفق الإجتماعي والهو مربوط بوثاق نوعي مع السياسة..
كانت الحياة دي لي جيلنا دافع في أننا كونا فهم سياسي وقناعة بالحياة الديمقراطية وقوي فينا الحس الوطني والقومي.
عشناها أيام جميلة إلا أن بعدما كبرنا حياتنا السياسية خلت من الحاجات دي نسبة لنوع الحياة الكان مخيم على البلاد من تعاقب الحكومات العسكرية الشمولية والدكتاتورية وموت الحياة الديمقراطية.
دآ بالنسبة لجيلنا ونقول لغاية السبعينات. أما للأجيال الجات بعد كدآ.
ديل لا يلاموا فهم عاشوا حياة. ممارسة السياسة فيها محظورة وممنوعة وحتى ممكن تصل لي درجة التجريم وغير ذلك فإن الديمقراطية هي خارج معادلة نوع الحياة العاشوها..
كلامي دآ سببهو.
الحاصل في البلد من تاريخ ثورة ديسمبر الي الأن.
مفاهيم الحياة السياسية بصورتها الزمان إتلاشت وفهم الديمقراطية إنعدم والحرية أخد فهمها بعد مغاير. (ممكن جدا زول يقول، زمان غير وحسي غير.. لكن الرد أنهو الحياة السياسية والمرتبطة بالديمقراطية لا تقدم ولا تشيب أو تشيخ ومثال لي كدآ نشوف البلدان الفيها حكم ديمقراطي من ناس بريطانيا وفرنسا والهند)..
نلاحظ أنهو السياسة وممارستها غلب عليها طابع الأيدلوجيين فهم عندهم موضوع تقبل الرأي الأخر محلهو شيطنة الرأي الأخر وأنهو التمكين هو أسلوب ممارسة الحكم ولست أمر متداول..
حقيقة الحاصل في البلد الأن من جانب العسكر وتمسكهم بالحكم رغم شعاراتهم الزائفة في رغبتهم مدنية الدولة ومن جانب الأحزاب السياسة الما قادرة تعمل بمسئولية لإستلام الفترة الإنتقالية والتفويت على العسكر حججهم والأهم من دآ كلهو اللجان المقاومة والإنسداد الممارساهو في رفضها العمل مع الأحزاب و(ركوب الرأس) والأنا بعزيهو لي أنهم جيل ممارسة السياسة عندهو أن يعارض "وهو أمر فرضه عليهم حكم الإنقاذ ومايو" ..
ففعلن السودان عايش مشكلة صعبة، ممكن الحل الوحيد الخروج من حكاية ؟؟
النجار عايز عروس والعروس عايزة منديل والمنديل عند الخياط والخياط عايز فلوس والفلوس عند وووووو.
فهل ممكن أن تتنازل الأحزاب عن خصوماتها بينها ولو لحين وأن لجان المقاومة يفهموا أن ركوب الرأس لست مخرجا وأنهو العسكر يصدقوا القول في رغبتهم تسليم السلطة..

[بابكر مخير]

الزول يقول ليك لمن يقع ليهو في ورطة:..
بالله أطلع منها وتاني دربها دآ ظاتهو ما بحوم حوالينهو...
أها ورطة الكُبر دي زنقة برآآآآها..
نوع الزنقة الياها مرة وااحدة وما في مروق منها مخارجة إلا بي درباً واحد؟؟
تفطس :(
صاحبي في أنهو الكُبر بيبعد الزول عن الحياة الواقعية ويخليهو إفتراضي ولتيق سااااااكت. فقال ليا: مع الكٌبر لو حصلت ليك حاجة ما عندك طريقة تتعوض براها بي genuine replacments.
وكلامهو صاح لأنهو السنون لمن يتساقطن إلا تشوف ليك عضمن قويي شريطة ما يكون من ضلع أعوج لي تور وتفتش لينك بناين ماهر يعمل ليك صبة بتاعت أسمنت ولو كنت مريش بتعملهو دهب والمشكلة أنهو لابدن يكون عيارن عالي وإلا يصدي وتدخل في برامج السبتسميا والغرغرينة والإلتهابات المزمنة ويبقى ليك في المخارجة من زنقة الكُبر. بعضهم لمن الركبة تفوت (دآ تعبير مستعار من مجتمع المنطقة الصناعية وبالتحديد بتاعين العربات المتخصصين في طارات الكلتش) والبحصل بالظبط أنهو شحم البلالي "إستعارة تانية من نفس المجتمع" ينشف عدييييييل كدآ فيقوم يشوف ليهو قطعة من البلاستيك المقوى ويلزوقها ليهو.
ياها دي الورطة والواحد زمنهو في صغرتهو وشبابه وكبرهو (نسبيا) معبب في الدنيا سااااااكت وما خاتي ليها حساب...
اللهم لك الحمد والشكر علي الأيام العشناها ودي الحسي عايشنها..
اللهم سهلآ علينا وأرحمنا ما كمان مع ورطة الكُبر دي تتصعب علينا أكتر بي ناس البرهان وبوريس جونسون كمان..

[بابكر مخير]

لمن تتقلب وتتغير ببقآ شترآ ما بعدها شترآ. وتبقى ذي فوضى كدآ ولا تغيير الزول ما كان خاتيهو في الحسبان..
يعني لغيات حكم النميري وكان الوظائف الدستورية والتنفيذية ماسكينها ناس تكبر عننا في العمر. وما كان الواحد فينا بشعر بأنهو وذي ما بتقال: زرزور وفي يد جهال. لغاية ما جات الإنقاذ وبقوا الفي المناصب دي إن ما أصغر هم قدرنا في العمر. نعترف بأنهو كان فيهم الأكبر مننا بسيط يعني دفعة ولا إتنين كدآ. بس برضهو كان في من هم شغالين وراء الكواليس وهم مننا ناس الترابي وقرناءه وديل ظنيتهم المقصودين بي "ومن يكن الشيطان له قرينا فساء قرينا".
الشاهد أنها قامت وإبتدت تتقلب وتتشقلب وبقأ التنفيذين هم أصغر سنا "وديل هم الكانت الخالة الحبيبة عزيزة بدري عليها الرحمة بتسميهم (الوعوع). من المدهش في القصة أنهو الوعوع ديل هم دفعة فاروق ولدها ومنهم على سبيل المثال أخصائي الباطنية "القلب" دكتور النور عبد المجيد المخضرم" الجوطة دي ما بس في مجال الحكم. لا كمان برضك في كل أوجه الحياة. يعني الدكاترة ياهم الوعوع وهذا في كل حال من الأحوال لا يفقدهم قيمتهم العلمية وحتى التجارب الطويلة، ما شنهو يعني إتصور معاي دكتور/ة خريج نقول خمسة وتمانين وإتخصص في تسعين يعني حسي خبرة في مجال تخصصه تصل لي 32 سنة ولا شنهو حسابي دآ صاح كدآ؟؟ والمهندسين والمحاميين والقضاء برضهم وعوع عمر.
في الشقلبة والقليبي دآ كلهو لحدي هنا معقول لمن يكون فيهو دعامة أكاديمية للوعوع فبتخفف من صدمة الزرزرة في يد الجهال وتبقآ تتقبل الأمر برضاء وقناعة وخاصة لمن تقع ليك في يد دكتور يكون في عمر أصغر جناك ودي حسي الأنا عايشها مع طبيب الأسنان وشطور الحكمة :075:.
أها بتكون شينة تب وما مقبولة بتاتن أنك تتزرزر ويكون راس الدولة أصغر منك في العمر. يعني أهو البشير رغم سوءه وكعوبيتهو وفشلهو الله يلعنهو كان أكبر مننا بي سنة (تسنين طبعا) لكن البرهان دآ الواحد يقدر يتعايش مع الأمر دآ كيفن والأدهش حميدتي. حمدوك دآ رغم أني ما كنت شايفهو قدرها وكتر خيرهو ما فشل نظرتي فيهو لكن كان الحال أنهو الواحد مكره وما بطل فقحت جابتهو وهي كنت بتمثل الثورة وأني بي طبيعة الحال مع الثورة وكل البتجيبهو.
لكن الوعوع بتاعين الحكم ديل شتروها لمن روحنا إتخنقت وبقينا الجاهل الفي يد "الدبابير"
http://sudanyat.org/vb/attachment.php?attachmentid=2330&stc=1&d=1653086882

[بابكر مخير]

من أيام الكرونا وسياسات الصحة هنا بقت، مقابلة دكتور إلا ياهو بالتلفون ولمن خلااااص تبقأ في إنآ.. تلاقيك الممرضة وتاخد عينة دم..
وتستنى لمن النتيجة تطلع ويتكرموا عليك بمقابلة الدكتور.
أها القصة أنك تفتكر المقابلة وعلى قولهم F2F (وجه لوجه) لكن الحقيقة أنها مقابلة بالتلفون.
هو يكون فاتح ملفك وعارف أنهو الإتصال هو نتيجة الفحص ورغم ذلك يسألك.
ممكن أساعدك في شنهو اليوم.
المهم مع وجع الكتف قام الدكتور حولني لي أخصائي القلب قال يمكن حاجة (سيريوس) وإتحددت المواعيد بعد 6 شهور. بس الكويسة فيهم بيضربوا ليك تلفون اليوم القبلهو عشان يتأكدوا أنك متذكر المقابلة..
إستعديت وقلتا اليوم حأقابل طبيب القلب ولمن وصلت المستشفى لقيت أنهو مواعيدي مع الممرض المختص، فحص وإتونسنا ومن وين وطق حنك. ما هو مع الكُبر الواحد بيبقآ ثرثار ولقيت نفسي غير أنهو طقطق ليهو سطرين في اللاب توب القدامهو ما عملنا حاجة لكنهو قال ليا بعد 3 أسابيع تجي لي جهاز الصداء قمتا قلتا ليهو (وأنا بالجد خفتا ما موضع إنزعجتا الهينة ديك، خووووووووووف) يعني في حاجة. ردآ عليا وقال... لو في حاجة كان حسي بيكونوا معاك كم نفر من الإخصائصي للرجيسترار لغاية أصغر طبيب. كلامهو طمئني لكن بين السطور فهمتا أني إنتظار الشهور حيكون من نصيبي. عملتا الإكو (الصداء) وإتصل بيها الأخصايئ ونفس السؤال مع أنهو هو الحدد ليا مواعيد الإتصال، how can i help you today قلتا ليهو لكن إتا العملتا ليا المواعيد.. فقال ليا.. أها كنت عايوز أقول ليك نتواصل تاني بعد 3 سنيين..
بيني وبين نفسي ضحكتا وقلتا في سري..
نبقآ نتلاقى يا صاحبي
تلات سنين دي، إلا أبقآ كويين اليزابيث

[عكــود]

من أيام الكرونا وسياسات الصحة هنا بقت، مقابلة دكتور إلا ياهو بالتلفون ولمن خلااااص تبقأ في إنآ.. تلاقيك الممرضة وتاخد عينة دم..
وتستنى لمن النتيجة تطلع ويتكرموا عليك بمقابلة الدكتور.
أها القصة أنك تفتكر المقابلة وعلى قولهم F2F (وجه لوجه) لكن الحقيقة أنها مقابلة بالتلفون.
هو يكون فاتح ملفك وعارف أنهو الإتصال هو نتيجة الفحص ورغم ذلك يسألك.
ممكن أساعدك في شنهو اليوم.
المهم مع وجع الكتف قام الدكتور حولني لي أخصائي القلب قال يمكن حاجة (سيريوس) وإتحددت المواعيد بعد 6 شهور. بس الكويسة فيهم بيضربوا ليك تلفون اليوم القبلهو عشان يتأكدوا أنك متذكر المقابلة..
إستعديت وقلتا اليوم حأقابل طبيب القلب ولمن وصلت المستشفى لقيت أنهو مواعيدي مع الممرض المختص، فحص وإتونسنا ومن وين وطق حنك. ما هو مع الكُبر الواحد بيبقآ ثرثار ولقيت نفسي غير أنهو طقطق ليهو سطرين في اللاب توب القدامهو ما عملنا حاجة لكنهو قال ليا بعد 3 أسابيع تجي لي جهاز الصداء قمتا قلتا ليهو (وأنا بالجد خفتا ما موضع إنزعجتا الهينة ديك، خووووووووووف) يعني في حاجة. ردآ عليا وقال... لو في حاجة كان حسي بيكونوا معاك كم نفر من الإخصائصي للرجيسترار لغاية أصغر طبيب. كلامهو طمئني لكن بين السطور فهمتا أني إنتظار الشهور حيكون من نصيبي. عملتا الإكو (الصداء) وإتصل بيها الأخصايئ ونفس السؤال مع أنهو هو الحدد ليا مواعيد الإتصال، how can i help you today قلتا ليهو لكن إتا العملتا ليا المواعيد.. فقال ليا.. أها كنت عايوز أقول ليك نتواصل تاني بعد 3 سنيين..
بيني وبين نفسي ضحكتا وقلتا في سري..
نبقآ نتلاقى يا صاحبي
تلات سنين دي، إلا أبقآ كويين اليزابيث

ياخي الله يديك الصحة وطولة العمر في الطاعة وما تحتاجلو لا بعد 3 سنين ولا بعدها.

مشتاقين يا حبيب

[بابكر مخير]

الأولويات مع الكُبر تتشكل حسب الأهمية
كان زمان الواحد يهموا وين الونسة والترطيب،
بعديييييييين نتذكر، ناس حكاية تأبين والعزاء وزيارة المرضى...
حسي بقينا في حالة نكد ثلاثية الدرجات وسنتناولها لاحقا....
مع هذا العمر تشعر بأنك على لحاق مع النكد.
أولن تبادي الدافنة ثم التمام في كشوفات الحضور في بيت العزاء.
ولو في تأبين كمان يعتبر في تسلسل الأولويات بعد العزاء.
وإن بقآ في زول جاء من السفر فبتدي الاولوية للزول العندهو زول إتوفى وتمشي عشان تعزيهو..
وهذا هو النكد الأكبر.
بعده الاولويات تنزل مرحلة لي زيارة المرضى ونمرة واحد المريض الخلاص "ترمينال" ومن بعد الأقل منهو مرحلة مع مراعاة عامل السن، فممكن يكون ما المريض "ترمينال" لكنهو كبير في السن وهذا عرضة أن يقفز الي مصاف أصحاب الأولويات المتقدمة من دافنة الي عزاء وهلما جرآ..
ولما كان الأقربون أولى بالمعروف فأنك في قائمة المرضى تقدمهم على الاخرين مع المحافظة التامة على نهج من كان أكبر في العمر فهو الأجدر بالتصنيف المتقدم..
وهذا هو النكد الأوسط..
أما النكد الأصغر فهو خارج إطار النكد الأكبر ومتلازماته من دافنة وعزاء وغير النكد الأوسط، معاودة المرضى حسب التسلسل السابق. يتمحور النكد الأصغر أنك في حال النكدين الأكبر والأوسط! لا تلتقي إلا بمن هموا في عمرك وفي أشخاصهم ترى أي منقلب أنت صرت عيه، من حيث الشكل والتصرف والحركة والقدرة الإيستيعابية وحتى إنخفاض الآي كيوو..
خارج إطار الثلاثية هذه.
فالعمر غيرها لا يوفقك. كما أنهو لا يوافقك فيعمل جاد أن يسد أمامك كل سبل العيش "الكريم" كإنسان حياته متقاسمة إن لم تكن مناصفة بين الفرح والترح فأقله تكون مع فيها مجال فرح، لكن مع الكُبر فلست هناك حتى لو دقائق في اليوم خارج ساعات النوم..
حذاري ثم حذاري من هذا الثقيل البعصر العايشنهو ويتمناهو الأخريين..
قال يقولوا ليك في أعياد الميلاد..
إن شاء الله تعيش مية سنة..
هههه، عات أرجو جنس دآ ;);)

[عبدالحكيم]

وسألت اهل الحي .. ماسمعت عنهم شي

وجيت يا سُمّار .. جيت يا سمار .. تكفون دلوني

جيت القمر أسال ... قالي القمر مادري

رُوح اسألِ السمار ... اهل الهوى العذرى

وأسمح لي فيّ اسرار ... وأقبل ياخيّ عذري

وجيت يا سمار .. جيت يا سمار .. تكفون دلوني

جيت البحر بدري ... سألته عن بدري

جاوبني موجه قال ... داعبته فوق صدري

راح مع السمار... أهل الهوى العذري

وجيت يا سمار .. جيت يا سمار .. تكفون دلوني



افتقدناك والله يا دكتـور/ بابكر مخير ... علك بخير وعافية .

[بابكر مخير]

افتقدناك والله يا دكتـور/ بابكر مخير ... علك بخير وعافية .

حكومي الجميل..
يابا إتا سألت عن حال مفترع البوست؟ والقالها من قبال سنيييييييين "يا أخي الكُبر دآ حاجة ثقيلة بشكل".
وتقول يابا: الحااااااال
ما هو العنوان يكفي عن السؤال..
أولن تبادي ليك شكري وما بس شكر. لكن كمية غير محدودة من المحبة ولإجلال.
تاني هام كما يقولوا خيلاني الريافة...
أحكي ليك طرفة قصة غيابي عن محبوبتي سودانيات وأكيييييييييييد "الثقيل" ليهو اليد الطولى في هذا..
بفتح الصفة في اللابتوب والقى ليك الحروف مع نضارتي ال 3.5 من شدة ما صغيرونية لمن إتطرتني مشيت لي دكتور العيون لكني طلعت منهو دون فايدة. فحسب التحاليل أنهو نظري مع النضارة دي تمام..
رجعت البيت وإستعنت بصديق (مدينة بتي وهي خريجة IT) مسكينة جات من بيتها وفحصت اللابتوب ولقت أنهو بس صفحة سودانيات هي الوحيدة حروفها صغيرة. قامت بعصاة (هاري بوتر الحرية) داست ليها في مفتاح ووجدت أن الصفحة كلها مصغرة لي 30% وعدلتها الي الحجم الكامل. وأعادت لي معشوقتي سودانيات حضورها الباهي في اللابتوب واليوم دخلت ولقيتك. فما أجمل أن تدخل وتلقى جنس قولك الفوق.. وبه إنتهى الهم التاني..
أما الهم الاكبر فستجده في الرد التالي..
من تاني ودون هام شكرا ليك الحبيب

[بابكر مخير]

هي رحمة خالية من القسوة. وقسوة فيها رحمة ..
في أولن تبادي نذكر الفارق بين الممرضات والممضريين وسنايرهم وبين الأطباء..
هؤلاء الذين أتى ذكرهم في الاول، حين تقع في أيديهم البيضاء، يبدون لك من الرحمة سيل مدرار.
فقصتي لمن مشيت للقسطرة، أنهو الممرضة أرادت أن تأخذ عينة من الدم لفحصها قبل الاجراء (هم بيقولوا ليهو إجراء وإحنا بنقول دخيل قسطرة وهم بيقولوا ليهو المعمل وإحنا بنقول "غرفة العمليات"، بقولوها تخفيف وقع الامر فالقصة هي أنهم بدخلوا منظار وبس، لا مشرط ولا زردية). حين وخزتني بالابرة وفيني عرق ولاد ريف. جفلتا ذي المها لمن تمر جمبها رصاصة وقومي يا الانسة إنخلعي وجري الابرة والدم دشر. وييييين يا إعتذارات وطلب العفو والمغفرة والمسامحة وبأدب جم طلبت أنهو رفيقها حيستبدلها في أخذ الدم وكان أن جاء شاب، مظهرا بسمة لطيف ومطمئنة وبلطف إستأذنني أنهو يبدل زميلتهو التي أزعجها أنها المتني وكان هذا هو السبب في أنها إتخلعت ("وحدث ما حدث" وذلك بسبب ألم بسيط أشعرتني به... ويييين من المجرميين الكتلوا المئات في أمام القوات المسلحة وبدم بارد وقلة حيآ.. هذه القولة منهم بس بطريقة "وقحة وممجوجة وسخيفة:o:o).. الممرض بلطف وأكدا أقول صادق أني لم أحس بالم الابرة وهي تنغرس في عروقي اليابسات وبعد إنتهي إعتذر بأنهو يكون سبب ليا ألم..
أدخلوني المعمل وهناك إستطف عدد من البشر وكل له مهمة، مسك الدكتور يدي وقلتا خلاص، بيكون بنفس لطف الممرض الفي العنبر، خاصة وأنهو قال ليا حأديك مخدر موضعي عشان ما تحس بالم.. لكنهو لم يكن صادقا.. نعم أعطني المخدر كما قال ولكن بداء الألم مع غرست المخدر فكان ذي الدلق فيني كفتيرة موية سخنة وأمسك يا مدافرة عشان يدخل خرطوش القسطرة وعروقي هي مني وأنا منها، صغيرة وحنينة ورهيفة وحساسة. لكن صاحبنا ما راعي كل ذلك وحينها ذكرني بتأريخ شعبينا.. هو بآلته وأنا بضعفي فكان الدواس غير متكآفي (موقعة كرري)... لكن ما خادم الفكي مجبورة علي الصلاة.. إن درتا تمرق من زنقة الكبرى.. أرضى بي الزنقة دي الوقتها كلهو 45 دقيق..
كان جهاز التمريض نصيري ولكن كان فريق الاطباء منقذي. فلكل منهم شكري ولي بنياتي وأخوهن وأمهن وأهلي الاقارب وأهلي عموم الشكر في أني مرحليا تجاوزت هذه المحنة والتي خلالها عرفت الفرق بين الضيق في الشريان التاجي وهو ما كان بعروقي وبين الانسداد وكان الله بعون المصاب به...
وللقصة بقية

[بابكر مخير]

نعود للشريان التاجي والإنسداد..
كان قرار الطبيب نتيجة فسحتهو الإستمرت 45 دقيقة في داخلي. أني محتاج لتوسيع هذا الشريان وذلك بدعامة لتساعد في الحل. وبما أني في بلد فيهو للإنسان له قيمة، صغر أو كبر عمره أو مكانته.
فكان القرار أن يكون الاجراء بعد ستة اسابيع..
ما مهلوني أن عروقي تكتسب عافية وتستعد بأن تشد من قواها وعزيمتها وأني إتحلحل شوية من جرسة أولاد الريف. إلا وإتصلوا بيا؟؟ أنهو تقرر الإجراء بعد 28 وعشرون يوما فقط..
أها عات يا نوم إلا يونسوني بيهو ويالرجفة والجرسة من كترتهن لمن بقن عاديات وبقيت ما بحس بيهن...
لكني عزمت على أمري وتشجعت وإتذكرت أني حفيد أمراء المهدية من الغرابة، يابا ود مخير وجراب الرأي يعقوب التعايشي وتنكرت لي شيخي وتاج راسي جدي بابكر بدري "للذين قرو كتاب تأريخ حياتي الجزء الاول. أكيد بيكون مرا على قصتهو في واقعة كرري وكيف أنهو مع قريبهو، بللو عممهم بي دم المصابين الجمبهم ورقدوا ساكنيين كأنهم من الموتى حى إنتهت المعركة وعادوا لي أهلهم بسلام"
مشيت ولقيت الممضة نفسها ديك وطوالي ودون لكلكة نادت لي واحدة تانية وهذه كانت أفريقية الاصل وما شاء الله صحتها تمام، أنا مما شفتها شعرت جلدي كلبت وعيوني جحظت ومن حسن الحظ أن العروق نفرت حتى كادت أن تخرج من برا الجلد، فسهل الامر ولكن في المعمل، تكررت الماساءة ولكن ربي اللطيف بعباده والفراج وقت الضيق. أرسل لي ملاك فإستلم الامر وقام بالاجراء على وجه سلس وأسكن الدعامة في مكانها ومستقرها في الشريان فبعد أن كان الإنسداد 80% سلك الدرب وبقآ 0%..
الحمد لله ودي واحدة عدت على خير قبل ما الإنسداد يبقآ "صبة" وحاويات ذي البختوها ناس برهان وكباشي في الكباري...
ولا زال السؤال قائما مع هذا "الثقيل" وما يخبئه لي ولازلت في إنتظار حلقات المتلازمات إن كانن حيخلصن قبل ما يخلصن ولا بيخلصن دون ما يخلصن:confused::confused:

[بابكر مخير]

من أقوال شيخ زايد الله يرحمه،
الإستثمار الحقيقي هو في الإنسان..
الإنسان هو المكون الأساسي للشعوب وهو فرد في هذه التشكيلة أو التركيبة الحياتية ودآ ينطبق على أعضاء جسم الإنسان. يعني ممكن تستثمر عضو في جسمك لمنفعة تعود على كل الجسم..
دحن أنا نتيجة لي لخبتت الدكتور الأطرش الحاول في الاول يخل الخرطوش في الاورطة عشان يعمل الدعامة وقسوته المبالغة في التعامل مع جسدي الذي هده الشيب وأرهقته الحياة ووهن، فضعف وبقى إن جريت فيهو الحرير بينزف وأن هبة النسمة من طولهو بيقع وإن وقعت إبرة في الواطة طبلة أضانهو بتنقد.
هذا الطبيب يبدو في أن طلاشتهو دفعتهو بأن هبش ليهو "وتر" عصبة في الرسغ وكتها بتذكر أني شعرت بي ذي كهربة ضربتني وأتاريها دي كانت الهبشة على الوتر. فحسي أن صباع الصغيربقى لمن أحركهو أشعر بي هبشة الكهرباء فيهو وفي الطرف من الكف..
طيب يا بابكر، إتا في بلد القانون والإنسان قيمتهو عالية فشفتا أني ومن حقي أستثمر هذه الحالة وأتقدم بدعوة مطالبا بتعويض مالي سخي وأشتكي فيها ال NHS على الاهمال المؤدي لي الاعاقة وما تكون الشكوى على الدكتور بس، لأنهو بيصغر ليا من حجم التعويض. ما هو الشكوى على الحكومة بتتقدم على أن لا تقل عن الملايين
ما هو ميزانية NHS بالمليارات...
فكرة جهنمية وأنا متأكد لو شاورتا ليا سوداني طوالي يمشي ويقول ليا؛ يا زول قول الحمد لله حسي الشريان التاجي سلك، يا أخي الناس ديل عالجوك ما تسيئ ليهم وتشتكيهم...
لكن في نفس الوكت لو قلتها لي خواجة نجيض حيقول ليك؛ دآ حقك ودآ إهمال لازم يتحاسبوا عليهو وطالبهم بمبلغ يضمن ليك مستقبلك لي قدام (دي شوية بتكون بالنسبة ليا شينة:(:()
أهو لمن أباشر في القصة دي والتي ما عليها حرج بالمفهوم الاوربي الغربي، بكون ذي اللعبتا اللوتريآ وراجي أربح الملايين ;);)

[ناصر يوسف]

من أقوال شيخ زايد الله يرحمه،
الإستثمار الحقيقي هو في الإنسان..
الإنسان هو المكون الأساسي للشعوب وهو فرد في هذه التشكيلة أو التركيبة الحياتية ودآ ينطبق على أعضاء جسم الإنسان. يعني ممكن تستثمر عضو في جسمك لمنفعة تعود على كل الجسم..
دحن أنا نتيجة لي لخبتت الدكتور الأطرش الحاول في الاول يخل الخرطوش في الاورطة عشان يعمل الدعامة وقسوته المبالغة في التعامل مع جسدي الذي هده الشيب وأرهقته الحياة ووهن، فضعف وبقى إن جريت فيهو الحرير بينزف وأن هبة النسمة من طولهو بيقع وإن وقعت إبرة في الواطة طبلة أضانهو بتنقد.
هذا الطبيب يبدو في أن طلاشتهو دفعتهو بأن هبش ليهو "وتر" عصبة في الرسغ وكتها بتذكر أني شعرت بي ذي كهربة ضربتني وأتاريها دي كانت الهبشة على الوتر. فحسي أن صباع الصغيربقى لمن أحركهو أشعر بي هبشة الكهرباء فيهو وفي الطرف من الكف..
طيب يا بابكر، إتا في بلد القانون والإنسان قيمتهو عالية فشفتا أني ومن حقي أستثمر هذه الحالة وأتقدم بدعوة مطالبا بتعويض مالي سخي وأشتكي فيها ال NHS على الاهمال المؤدي لي الاعاقة وما تكون الشكوى على الدكتور بس، لأنهو بيصغر ليا من حجم التعويض. ما هو الشكوى على الحكومة بتتقدم على أن لا تقل عن الملايين
ما هو ميزانية NHS بالمليارات...
فكرة جهنمية وأنا متأكد لو شاورتا ليا سوداني طوالي يمشي ويقول ليا؛ يا زول قول الحمد لله حسي الشريان التاجي سلك، يا أخي الناس ديل عالجوك ما تسيئ ليهم وتشتكيهم...
لكن في نفس الوكت لو قلتها لي خواجة نجيض حيقول ليك؛ دآ حقك ودآ إهمال لازم يتحاسبوا عليهو وطالبهم بمبلغ يضمن ليك مستقبلك لي قدام (دي شوية بتكون بالنسبة ليا شينة:(:()
أهو لمن أباشر في القصة دي والتي ما عليها حرج بالمفهوم الاوربي الغربي، بكون ذي اللعبتا اللوتريآ وراجي أربح الملايين ;);)


حبيبنا و كبيرنا و تاج راسنا


تحية و احتراما


أول شئ ألف لا بأس عليك


العافية تبراك غطاء و توب علي الدوام يا رب


انا من أ،صار إنك ترفع دعوي قضائية ضد حكومة الخواجات ديل



حقك تلاوي بإيدك و تقلعوا قلع



طمنا عليك

[بابكر مخير]

[QUOTE=ناصر يوسف;1195701]
العافية تبراك غطاء و توب علي الدوام يا رب
أبو البنيات، يابا..
يتمنى ليك السعادة ووفرة العيش و ووساع الرزق وقروشن تعيشك مليونير ولي جنا، جنا العروسات يترعرع في خيرها...
لكن يابا التوب بالغطي دآ بقا؟
شاش الإسبيتالية يستر ويغطى أكتر منهو والعافية ديك من يوم ما تدق باب السبعين وينقالك أبقآ داخل..
أعرف أنهو دخولك بيكون ليك برآآآآآآآك وبعد تدخل؟ العافية بيحجزوها برآ...
قال شنهو؟
قالوا ليا تعال عشان إعادة التأهيل بعد الاجراء الإتعمل ليا والجواب الفيهو ناغمني دآ يا زول من أربع ورقات يعني مش صفحات وأنهو مقابلة مع أربع أشخاص تخصصات مختلفة.. ويا مؤمن يا مصدق بما أنهو الموضوع دآ اليوم الساعة واحدة ونص نهار..
أنا نسياتي تحت الإنحطاط ومما زاد الطينة بلة، قلتا أمس أمشي والعب ليا وست أرفه وأرجع البيت أنخمد وصباحات الله بيضآ.. بين قوسين وبراحة كدآ ذي وسوسة!! "إتسيكتا" وزاد البيا والعليا ورجعت البيت كدان والنوم جافني وسابني هماني..
إتنهزتا ووصلت المستشفى ساعتين قبل الميعاد وإنتظار لمن جاء دوري.. أها قولي ليا الاربعة منو "هن" واحدة أخصائية أمراض القلب والتانية علاج طبيعي والتالتة أغذية وقال ليك الرابعة علاج نفسي.. الظريفة بتاعت العلاج الطبيعي وهي برضه "للجهد" بعدين ما تفتكر ظريفة يعني شيتن تتغزل فيهو أبدن، معصعصة ونشفانا من لحم الدنيا وظنيتها في وش الخمسينات.. قالت التمارين شنهو وكيف وإستمرت أنهو الرياضة تكون محدودة وما أجهد نفسي شديد وأنهو ..................... ولو بستعمل الازرق :eek::eek:... وفي دي قلتا ليها... يما ما يحتاج الموضوع دآ تفتحي ليا جراحهو..
طبعا تكون أكييييييييد مرت عليك قصة البقآ ذي ساعة الجيب :075: وحسي إحنا ظاتهو الساعة ضمرت الي أن تلاشت ولا دابت ما تعرف.....;););)
قالت كيف المرحومة حاجة حوآ الطقطاقة...
العرس أمرن لابدن منهو
والما ضاقهو، إن شاء الله يضوقهو وياها سنة الحياة:eek::eek::eek:

ودي ياها حتكون حالتي لو دخلتا الجيم للفيزيو:011::011:
https://www.youtube.com/watch?v=2Mko_DNakww

[بابكر مخير]

الكُبر دآ ذي مرتك وكمان عرس مسيحي "حتى يفرقنا الموت" (Till Death Us Do Part) ..
أول ماتصحى الصباح ياهو في السرير معاك ومما تمسح عيونك إن ما بتشوفهو إلا ياهو إحساس الرفقة من الذي هو.
وذي ما في بعض سيدات بعد العرس وزنهن يزيد، أها مشاكل الكُبر بعد ما تدخل حوشهو كل يوم بتزيد.
والعروس عندها متطلبات، إن قلتا تعدهن ما بتخلص لمن تخش القبر..
بي جآي برضك "الثقيل" دآ متطلباتهو ما بتخلص. في الشتاء هدوم أدفء، في الصيف مبردات هواء، الاكل ما داك بتاع أولاد الناس (خاصة الملح والسكر الاكل بدونهم يعني شيتن يمسخ الاكل).
لا كمان ما تنسى أنهو المرض واجب توفر الادوية يعني ذي أدوات التجميل لازم تكون في البيت متوفرة وإلا برضهو ذي ما السيدة العروس ملامحها بتتغير لو ما إتمكيجت، إتا عدم الادوية ممكن يتسبب ليك في لحسة وتلحق أُمات طه.
أها متلازمات الكُبر الثقيلات والما بيخلصن، يوم وجع رجليين، يوم رجفة والنظر يطش والسكر يرتفع. حالهن ذي صاحبات المدام، بنقضوا ليك حياتك؛
فلانة ديك راجلها جاب ليه توب شفون وعلناة ديك إشتروا ليهم شقة في الرحاب في مصر وهناية ديك مسافرين أمريكا يولدوا بتهم "وهو التقول الفيزا لي أميريكا شيتن في متناول اليد".
أهااااااااا خوفي أنهو الإتنين من الممكن يتسببوا في الموت :eek:
إلا الكُبر دآك أكيد فهو عرس مسيحي ما بحلك منهو الا الموت لكن العرس حق المسلمين دآ ما فيهو بند "سرحهن بمعروف".
إلا في نوع كُبر الذي العرس الأشتر نوع، مثنى وثلاث ورباع ودآ موتهو بتكون شيتنة لأنهو ذي السعى ليها برااااااااااااهو بهبلهو وطلاشتهو جابت خبرهو.
كبرن واحد وعرسن واحد. أكتر من كفى..
لزومهو شنهو تكبر زيادة لمن تبقى عالة وما تقدر على المسئوليات...
نرجع لي غنية الفنانة الطقطاقة وقولت؟
الما ضاقهو، يضوقوا..
أتاريها حكمة ربطت بين الاتنين (العرس والكُبر) من زماااااااان وما شيتن جديد أنا كشفت طلاسمهو:cool:

[بابكر مخير]

شئ من الكُبر..
التشكك.
الواحد ظنيتهو لمن يكبر بتتملك كل تفكيرهو بإستحواز تام؟؟
نظرية المؤامرة
هذه متلازمة الكُبر في أحيان بتكون صايبة وفي مرات ومرات كتيرة بتكون خايبة.
الايام دي وتصفيات كأس العالم في كرة القدم مدورة، تلاقني دوام كامل وظنيتهو لو كان نقلوا التمارين بتاعت الفرق، برضك كنت حأقعد اصاقرها. أها وهذه المتابعة أغلبها بتكون لتأكيد نظرياتي في أنهو في خيانة في الامر..
أمسك عندك واحدة من "إستغراباتي" وكنت نزلتها في حيطتي بتاعت الفيسبوك؛
(بشوف في واحدة من اكبر مهازل الغرب وسطوته وفرض نفسه على العالم.. مجموعة في كاس العالم تضم وييلس وانجلترا ودولة لغتها الانجليزية وحكامها المتعاقبين ايرلنديين عدا قلة (USA) طبعن جنبتا استراليا ونيوزيلندا وجبل طارق و"هونقكونق الزمان كانت تابعة" .
بشوف في الحكاية دي وانهو تصفيات كاس العالم لأوربا، شارك فيها من الجزيرة البريطانية والجزيرة الصغيرة الجمبها (ايرلندا) خمسة فرق وبما انهو اوربا لها عدد كافي من الفرق في نهائيات كاس العالم فمن الممكن ان يتاهل الخمسة فرق من هذه الجزيرة الاستعمارية بامتياز للنهائي. بس المدهش انهو افريقيا بكبرها والكم الكبير من دولها بتعدد لغاتها.. يمثلها نفس عدد البريطانيين (مع ايرلندا الشمالية) ودولة ايرلندا..
اهااا وحتى تقتلني الاندهاشة؟؟
انهو نهائي كاس العالم يكون في انجلترا ونصف النهائي، يكون على النحو التالي؟
انجلترا v ايرلندا الشمالية واسكتلندا v وييلس....
يا اخي دا معقول اصلهو يا الانجلوساكسون🤐🤐🤐)..
أمس وبشوف في مبارة إسبانيا والمانيا ومتابع للتحاليل بتاعت الانجليز وناسهم الجايبنهم من أوربيين تانيين أو غيرهم في قبل المبارة والإفتراضات وكأنهو هم ما عارفيين الحيحصل شنهو وأنهو كييييييف الالمان حيعيدوا سناريو كاس العالم الكان فيهو إتفاق عدييييل وما خافي على زول في أن التعادل مع النمسا سيقصي ظنيتها الجزائر من دخول دور الستاشر وتتأهل النمسا وكانت النتيجة كما خطط لها، أها أمس والتاريخ يعيد نفسهو والمانيا طرف فيهو مع إسبانيا وأنهو نتيجة التعادل حتدي فرصة كبييرة لألمانيا التأهل حال الفوز على كوستريكا وهو وارد سواء عن حق أو شراية "المانيا غنية وكوستريكا ذي حال السودان كدآ" ويا اليابان رغم فوزك على المانيا لكن تشمي الادوار المقبلة قدحة "سوشي"...
التشكك
عودة الميرغني؟؟
تصريح حميدتي؟؟
التقارب في العمل على عدم الوصول الي حكم ديمقراطي. شكلهو ذي في تنسيق لي تحالف كيزاني شيوعي وحيجروا البعث ونهايتها إنقلاب عسكري :eek:
وخوفي ما يكون تشكك لكنه الإفتراضي البيبقا واقع :cool::cool::cool:

[بابكر مخير]

في جنس أيامنا دي، المتعة في التذكر..
حاجات زمان تطلع منك بصورة عفوية أو رغبة أكيد وتتم..
عايز ساهر تنبسط، عاااااادي، كل التعمله تتلبس وتتهندم ويلا على البص ولا العربية.. بتصل على أيتها حال وتستمتع بوقت، كان ساعات أو أيام. وعااادي ترجع لي حياتك دون خشائر جسدية أو نفسية ولكن مادية! نعم لكن تتعوض ما دام في روح وحياة وقدرة، تتكرب شوية وتطلع ليك قرشين تلاتة تعوض بيهم الانصراف وتخت منهم خمارة، تفور بيها عجنة الليلة القادمة أو الاوقات..
أها حسي يكاد الواحد يرهق جسيداً حتى في إجترار تلك اللحظات الجميلة ويتعذب عذاب قبورة لمن يتذكر أنهو كان بينقز وينطط ذي حمل الخريف..
دآ الكان عليا أمس، قالوا إعادة تأهيل للناس البيكونوا عملوا ليهم جراحة كاملة أو قسطرة في القلب والتأهيل جوانبه أربعة، ممرضة متخصصة متواجدة لمد 8 أسابيع في يوم برنامج إعادة التأهيل وكذلك مدرب رياضب ومشرفة تغذية وأخصائية نفسية (الحكمة كلهن نسوان ومن جنسيات مختلفة)..
في حركات رياضية كدا تشابه الرقص مع الموسيقى الغربية وهذا الامر. كان نشاط نمارسه كل نهاية إسبوع في الديسكو وننبسط وبعدها ربما كان برنامج أخر وربما يستمر السمر حتى صباح اليوم التالي وأتذكر أني كنت أجيد الرقص الغربي وحتى قبل مايكل جاكسون كنا نحرك الارجل بفن وإتقان..
أها أمس؟؟؟
شئ عجيب كان ممسك بكرعيا في الارضى وحالف ما يفكهن، حسب إرشادات المدربة الرياضية. نجحت في تحريك الارجل وبدأت أحاول الاستجابة للأحان التي كانت تصدر من ذاك المسجل القدام عيناي وما قدرت أتجاوب معاه مع أنهو زمان يكفي أن تسمع صوت الموسيقى وتنطلق..
غير دآ شيء غريب أخر، ما كان من تصرفاتي ولا حاجة تذكر عني وهي (الشترآ).. بالله يعني كلها أربع خطوات إتنيين للشمال وإتنين لي اليمين..
حاول يا بابكر أن تنجح في هذا الفرض البسيط (هنا تذكرت فعلن قولة أنهو الصلاة صعبة إلا على المؤمنين) يعني مثل هذا الفرض الصغير تفشل فيهو، ماذا في تلك الفروض الأعظم، ربنا يرحمنا غايتهو ويعفو عنا..
والذاكرة ساقتني لي أيام زمان وأنا طالب في تشكسلوفاكيا وكنت ما بشرب لا بيرة ولا ونبيذ بس كنت بشرب كوفلا "وهو مشروب غازي، من إسمه ينعرف أنهو مماثل لي الكولا" وكان هذا الاسم هو لقبي بين المقربين. كنت يومتها في نادي ليلي خاص بطلبة الجامعات ويرتادهو الخاصة من لاعبي كرة القدم والهوكي الجليدي وكنت من مشجعي فريق سلوفان براتسلافا لكرة القدم والهوكي الجليدي وكان ناديهم مقابل لكلية الصيدلة وحتى الاستاد بتاع الهوكي الجليد بالظبط في وش كليتنا فكنت أرتاد المقهى الملحق وصادقت بعد من لاعبيي الهوكي والناس ديل عندهم أجسام ما شاء الله وأعتاهم أتذكر التشيكي نيدومانسكي وكان يحب دايمن أن يناديني بي كوفلا.. أها اليوم دآك وذي ما ذكرت أني راقص مميز فهناك قطع شك معجبات ولسوء حظي يومتها كان من بينهن صديقة طالب من الاقتصاد وهؤلاء يشاركونا الداخلية في السكن وهو ما شاء اللله صحته تمامة ورياضي نشط وله أصدقاء من أولاد الحلة وأصحاب نزعة عنصرية. شاف أن زولته ترقص معاي ومع صوت مسيقى الديسكو العالية وأسمع صوت يقول شرنوخ "وهي تعني الاسود".... يا الله!!
أظلمت الدنيا أمامي ورغم أننا كنا مجموعة من الطلاب الاجانب، إلا أن لو حدثت معركة فظاكيد نحن الخاسرون. أكفهر الجو وسخن المكان وكادت أن تشتعل المواجهة. إلا أن الرب روؤف بعباد المؤمنيين ورحيم بالفقراء الضعفاء المساكين، فسخر لنا مخرجا..
دخل في تلك اللحظة نيدومانسكي ومعه لفيف من زملاءه. حقيقة ما متذكر لكن في الغالب أني أشرت ليهو لو ما أكون جريت ليهو. المهم وجدت نفسي أصافحه وأقالدهو وكانت أول مرة أفرح بأن شخص يناديني .... كوفلا

[بابكر مخير]

http://sudanyat.org/vb/attachment.php?attachmentid=2333&stc=1&d=1670813353
ذي الايام دي وإحنا طلبة أجانب في براتسلافا..
الجامعة بتجمعنا كلنا ونسكن في داخلية حيث تتوفر فيها التدفئة والموية الحارة. ما كان إلزامي لكن لو بقت الداخلية المختارة ما هي الإنت أصلن ساكن فيها فتخير أن تبقى في سكنك ولكن دون تدفئة وموية حارة.
يمكن ذي مرتين أو كريسمسين إتحظيت أنهو الداخلية كانت هي الأنا ساكن فيها. أما غير ذلك فكنت بختار أني أستمر في سكني رغم عدم التدفئة وهناك وعامة في أواسط أوربا درجة الحرارة في الشتاء تصل ما دون العشرين تحت الصفر سلسياز.
كنت في مثل هذه الاوقات أستعين بسخان كهربائي والحمام سبحان الله عااااااااادي تحت الدش والغريبة أنك ذي البتتشوشو من برودة الموية وطبعن الوكت دآك كان عندي شعر، أها دآ يبقآ ليك ذي ليفة الحديد البيغسلوا بيها الاواني في المطبخ..
مرة وأنا مشغل ال(الهيتر) السخان الكهربائي ونايم بي مزاج. أها يا زول إتخنقتا وأنا أصلن زول أزمة خلاص إنقطع النفس وبقدرة قادر جمعت قواي وفتحت عيوني وألقأ نفسي التقول تحت شملة ووسط حفرة دخان، أتاريهو اللحاف وقع في الهيتر وبدآ يتحرق.
اليوم دآك كان حيكون واحد من أخبار الونسة في السودان.
ما سمعتوا بالطالب الاتحرق في تشكسلوفاكيا وواحدين طبعن قولة تشكسلوفاكيا ديمن يلخبتوها مع يوغسلافيا ويبداء الخلط واحدين يسرحوا ليك في القصة والواقعة ووصفها، شيء يثولوا ليك في مطبخ وواحدين يقولوا ليك إنتحر وونسة وهي القصة ما أكتر من لحاف إتحرق.
زمان الوالدة عليها الرحمة في مثل حالة تناقل الكلام بتقول؛ شيلهو ساطور ولبسهو طرطور.
الزكرني القصة دي هي الصورة الفوق. وهي مأخوذة بالهاتف من قدام السكن في لندن.

[بابكر مخير]

ذي ما قلتا عن الزول لمن يكبر في العمر، بيفتكر أنهو صاحب تجارب واسعة تديهو حق الإدلاء برأيه من منطلق المعرفة التي كسبها كما أنه هناك نقطة هامة في سودان الامس (اليوم أمور كتيرة إتغيرت). الزول الكبير عندهو إحترام متوارث وهو البيديهو الأحقية في التحشري في كل الامور الحياتية من إجتماعية، إقتصادية، أدبية وسياسية ودآ هو المقصود بالمقدمة دي...
أنا (كتيرين من الناس وحسب تربيتنا "الاسلامية" يرفضوا قولة أنا ويقوموا يقولوا ليك؛ والعياز من قولة أنا.. طيب أها أقول شنهو؟؟ هذا المتحدث ولا بابكر المتكلم ولا الشخص هذا) والذي بإعتبار تراكم السنيين "اغلب الاحيان يتبع هذا مشروع أو حقيقة السكري التراكمي" بفتكر أنهو من حقي أن أقول رأيئ وما بس من باب مشاركة لكن من منطلق الحق العمري المكتسب وأنهو قول؟؟ مية في المية صاح...
الحاصل في البلد..
قامت ثورة ديسمبر وهي بالتمام والكمال من قبل الشعب السوداني قاطبة. شيبه وشبابه، نسائه رجاله وحتى صغارهو ودي يشهد عليها موقع الإعتصام قدام القيادة العامة، الثورة دي شاركة فيها كل قطاعات الشعب من مهنية لي مدنية لي سياسية وحتى عسكرية، ستات البيوت وبائعات الشاي، السودانيين من شمال البلاد وشرقها وغربها وجنوبها وحتى المقيميين ممن لا يحمل الجنسية ولكنهم سوداني بالمود والاحساس والشعور شارك في معانة التلاتين سنة كيزانية.
الثورة دي شبابها قاموا بدور دافعهم الحماسة والطاقة، كبارها من نساء ورجال بقدر قدرتهم. أستشهد من العنصر الشبابي الغالبية ولكن هناك أيضاءً غيرهم..
بالنظر الي الوضع الان نلقى أنهو الشباب كمن تمكن من هذه الثورة، فرفضوا وغضبوا وواجهوا وشكلوا من تنظيمات خرجت من الدعوة الاولى التي نادت بها الثورة وأنجحت الثورة وهي السلمية ولم يكتفوا بذلك بل كانوا يأخذون الأطفال معهم في ممارساتهم اللا سلمية، فتعرض منهم من تعرض للقمع والتعدي الغير مقبول وهذا ما يحزن حقيقة.
خلال سنين عمري، حضرت وشهدت وشاركت في ثورات ومظاهرات كان بتذكر وقتها سلميتنا رغم مواجهاتنا وتعرضنا لعنف الشرطة (وذلك أكيد بفارق الزمان والحسي) إلا أننا تسلحنا بأغصان شجر النيم وما كان بيناتنا لا ملوك إشتباك ولا غاضبون ورغم ذلك نجحت تلك الثورات في أن أزاحت العسكر ولكن عواقبها لم تكن لتنجح لأن دعاة التغيير الجذري سواء كانوا يساريين أو قوميين ولا إسلامويين لم تكن صدورهم رحبة لتقبل حكم الاخر ولا يتقبلوا نظم الديمقراطية فهم ما بين فاشيين وبلشفيين..
خلاصة القول وبحق أقول؟
الخلاص للسودان هو في الرضاء بالاخر ونبذ التشرزم والمغالة في الكره. الصدق في القول والترجمته لأفعال..
فيا كباشي وأنت المقصود الاول من بين العسكر لأنك خميرة عكننة وكاذب وفي هذا مثلك مثل الجذريين ويا كيزان رغم سؤكم ويا التغيير بشقيه والحركات المسلحة ويا من يشحن في هؤلاء الشباب الذين تضللونهم لمآربكم..
كلكم كدآ ما بتساو حاجة في بلد فقير، جائع، رخيص ومرهون لمن يععطي..
حسوا شوية. وما بقول باركوها لأنهو ما فيكم بركة أصلن لكن خافو الله في حق البلد..
دآ كلامي "أنا" زولن كبير في العمر وبحق العمر بنصحكم.. أنفضو غبار الفتنة والاختلاف وتوافقوا على الحد الأدنى، جاي من الثلاثية ولا الربعية ولا شيطانية الحمرة. مشوا البلد بفترة إنتقالية وبعدها إحتكموا للصندوق وأحكموا بيناتكم ديمقراطيين وإن كان أولاد الحرام ما بريحوا...

[بابكر مخير]

شايف الخلق يختلف جراها ويختصموا وكل يفتي وطبعا ياهو دا حالنا السودانيين. كل شيء عارفينهو ومنجضينهو... الموضة الايام دي الآيس وشوف بقآ كم زول هو ياهو العالم والباحث..
طيب؟؟؟
من 1975 لين قبل تلاتا سنين. ما إشتغلتا إلا في مجال مكافحة المخدرات بشقيها، الضبطي والتوعوي. يعني ذي ما تقول 48 سنة، صباحي ومساي في البلوة دي. بديتها رسميا في السودان وإن كان قبل كدي ملم بالأمر على نطاق معلومات وتجارب ودراسة في كلية الصيدلة أقسام النبات والتسمم والالدوية وتركيبها والجرعات والفارموكولجي والفارماكوقنزي "النباتات العلاجية من زهور لي أشجار وغيرهو). عندي بحث أو دراسة سمها ما شئت عن ظاهرة تعاطي البنقو وسط شاب العاصمة في سنة 1977 وتشرفت بأن شيخي دكتور حاكم عليه كل وساع الرحمة أخذه واحد من مراجع بحث الدكتوراة بتاعهو، عملتا المجلس الوطني ضد المخدرات 1988 في السودان وقدمت دراسة لأمانة الشئون الاجتماعيةبجامعة الدول العربية عن دور المنظمات الطوعية في مكافحة المخدرات وعملت خبير في دولة الامارت في مجال مكافحة المحدرات وكان عندي مشاركات عن الوفاة نتيجة الجرعات الزائدة أو المختلطة من المخدرات عملت في مجال التوعية وبمنظمة هنا في لندن وحصلت على عضوية الجمعيات التطوعية في مجال مكافحة المخدرات تحت الامم المتحدة...
لي حسي ما بدعي بأني خبير في المجال وما بحاول أبدن أفتي في هذا الامر لوساع معاونه وتعدد أنواعه وكترت الانواع والمواد المدرجة تحت قوانينهو...
الكلام دآ الخلاني أقولهو أني في هذه الايام بسمع في تسجيلات لأناس يفتوا ويبالغوا في الحديث عن المخدرات وهم منقادون بجهالة مع الموضة. قالوا الآيس. يا أخي سوسة التسوس عضامكم، هل هم متأكدين؟؟؟؟؟ . دآك طبيب قال أنهو جابوا ليهو شاب انه بين الانس والجن، كيف عضلاتهو وطولهو وعرضهو وخد يا كلام وكمان حايم تسجيل صوتي لواحد أخر ظنيتهو برضهو طبيب قال أنهو الشئ دآ ممكن يتعمل في أوضة في البيت وخلال حديثه بيتكلم أن هذا السم بيصدر لي السودان في كونترنات بالاطنان وأنه من مرة واحدة الزول بيكون أدمن... يعني كدي بيلوجيين ونفسيا الحكاية دي ممكنة وما هو تعريف الادمان وهل هو ذي ما قالوا عن السودان ليهو وصفة بهذه السذاجة والسهولة يعني ذي اليوم تنوم تخلي الاسعار كيف وبكرا تصحى تلقاها كيف.. يا ناس كدى بتخلوا الناس تضحك عليكم.
أنا وحسب رأيي المتواضع بفتكر أنهو مثل هؤلاء حقوا ينقطونا بي سكاتهم وأنهو خبراء الادلة الجنائية والعلماء الحقيقين في كليات الصيدلة والطب يدلوا لنا بدلو علمي وموثق.. أنا غايتهو شاكي في الامر برمته وبفتكر أنها خلطة وضيعة من مواد تخليقية لكنها شنو؟؟ دآ ياهو البيفيدونا فيهو العلماء الاجلاء في الشرطة والصيدلة والطب.. يا أخوانا وبدون زعل وردم في الفارغة.. الانا شايفهو في الشارع من شباب يعيش وسط أجواء ملؤها البمبان ودون ملابس تقي شر الحر أو المطر أو البرد وإنفعالاتهم وروحهم العدائية.. ظاهرة تحتاج للدراسة فهم أقرب لأولائك من مستنشقي المواد الطيارة. (الشماشة).
هذا دلوي وأتمنى أن يؤخذ بعقل.

[عكــود]

تحياتي يا دكتور،

والله دي معلومات مهمة جداً ويا ريت لو قامت حملة توعوية تعتمد على الحقائق العلمية، لأنو زي ما تفضلت، كل من هب ودب صار يفتي وخلقوا هلع بين الناس.

الوسائط مليانة بفتاوى لا تدخل العقل أبداً، مثل ينزلوا صورة فيها قطع تشبه الشكولاتة قالوا ده آيس بيتم توزيعها في المدارس للأطفال عشان يدمنوا، مع إنو من ناحية تانية بيقولوا سعر الجرام 17 ألف!
يعني كلام ما يدخل العقل أبداً.

نعم، في خطر من انتشاره لكن حجم الخطر شنو؟
الله أعلم.

على جنب:
مشتاقين

[بابكر مخير]

تحياتي
على جنب:
مشتاقين
والله وأشهده الشاهد الحق، شوقي أكتر.. يعني فعلا الواحد مشتاق ليك ولي الحبيب عبد الله الشقليني، يا من أسعدتم وجودي في أبوظبي بنفسكم الكنت بتنسمه...



الوسائط مليانة بفتاوى لا تدخل العقل أبداً، مثل ينزلوا صورة فيها قطع تشبه الشكولاتة قالوا ده آيس بيتم توزيعها في المدارس للأطفال عشان يدمنوا، مع إنو من ناحية تانية بيقولوا سعر الجرام 17 ألف!
يعني كلام ما يدخل العقل أبداً.

يابا إحنا يانا كدي، ناس إنصرافيين ومن السهل شغلنا بالفارغة. يعني البيعرف ركب الموجة والما بعرف بقآ هو العالم العلامة، نفس حكاية الخبراء الاستراتيجيين الكان فقرونا في قنوات الجزيرة والعربية..
أنا بالجد المحزني أنهو شباب علماء ذي دكتور الجمل خبير وعالم وساكت والشباب المتخصصين في فحص المخدرات في المعمل الجنائي (الأدلة الجنائية) ربنا ما فتح عليهم بتنوير الناس عن الحاصل والمادة دي هي شنهو... حسي مثلن في التلفزيون برنامج عن المطبخ في قنوات سودانية وتتكلم ليك عن سلطة الافوكادو والفطير بالشكلاتة والإستيك بالبير سوس والكعك مكسي بالكريم شانتي،، دآ في السودان وين صحن الفول بالالاف ...
شعب ملعون وبلد ملعون وملعون أبوهم الفلاسفة ديل ظاتهو....

[بابكر مخير]

ما آلت شمس يوم الخميس الي الغياب وإلا إمتلئت وسائط التواصل مع فوارق الوقت. أن إمتلئت بالتهاني والدعاوي والتمنيات بيوم جمعة، شنهوو دآك الماعارف شنهو والبيجيب معها شنهو وهلما جرآ..
هذا يكاد أن يكون أكثر إنتشاراً بين المسلمين إن لم يكن حصريا.
أنا ما عارف ليييييييه الناس إختارات يوم الجمعة من بين أيام الله الأخر "الايام كلها لله لافرق بين يوم ويوم الا ماحدده الله في كتابة" مثلا أيهما أبرك الجمعة العاديييييييية دي البتجي في الشهر أربع مرات ولا يوم عرفة ولا يوم العيد والذي أحدهم له فرحتان..
إن يوم الجمعة ربطه بالمسيحية والإسلام يجمعهما القيام والقيامة، فللمسيحيين يوم الجمعة هو يوم صلب السيد المسيح ورفع الي السماء ويوم الجمعة عند المسلمين يقال بأن القيامة ستقوم في هذا اليوم..
الجمعة كذلك اليهود لهم فيه حظوة؛ لأن احتفالات السبت المقدس عندهم تبدى من مغيب الشمس يوم الجمعة...
دي كدآ ذي رسالة مبطنة لي الناس البتجهجه ليك الدآتا بتاعت تلفونك وهم قايلينها الجمعة دي حصري مسلمة..
غير ذلك في ناس (إن الله وملائكته يصلون علي النبي) وكأنما يربطون هذا اليوم الذي له رابطه بالديانات الثلاثة حجرا على الرسول صلى الله عليه وسلم...

[بابكر مخير]

Plan B واضعي الاستارتيجيات وحتى الطبيعة دوما لها هذه الخطة حال فشلت الخطة الأصلية ورغم وضع الخطة الثانية فدوما هناك خطط أخرى حال بعض الأحزاب السياسية وتحضير قيادات صف أول وتاني وتالت والتي هي غالبن ما تكون في المعارضة سواء دفعت لذلك أو من عقيدتها مثلن ناخد الحزب الشيوعي والبعث الهم الشريك المخالف (شريك رضينا أم أبينا هو رقم موجود في العمل السياسي داخليا أوإقليما وعالميا)..
نحنا هؤلاء وما بتكلم عن روحي برآيي لكن، حتى من هم دون عمري بعشرات السنين! Plan B دي ما ناااااااااااافعة تب، ما هو أيام الطفولة، إن وقعت سن بكرا بتقوم غيرها. وفي أيام الطفولة إن ما نجحت في الإمتحان، باكر قدامك سنين تجتهد وتنجح. وفي أيام الشباب إن إتشوكشتا، بالإصرار والعزيمة ممكن تكسب ولا تشوف غيرها وتتوفق. هاك عمر العطاء من بعد التخرج والبدء في حياة العمل والإجتهاد، تغير في الوظائف ذي القمصان لمن تلقى الوظيفة الهي..
حسي ناس أنا وإحنا بدون Plan B فلا مجال للتبديل حال إن سقط سن بصورة ذاتية وطبيعية بشرية، إلا ياهو طقم ولا زرع وهنا مشكة كبيروألياها مع الطقم ذاتهو؟؟ بما أنه غير طبيعي ومن خارج المعادلة الطبيعية التي تقول (خلق الإنسان في أحسن تقويم) فسيتعامل معه الجسد بأنه دخيل؟ اللثة ربما تضيق عليه الخناق بأن تتسع وتضغط عليه فيصبح آفة ما معافاة على الجلك أو أنه الفك يعوفه ويسيب ليهو المحل ويبدا الطقم في اللولوحي ويبقآ نغمة ما نعمة وهناك Plan B عمليا وهي الزرع ومشكلتها أنها تتناقض مع طبيعة بنية الانسان فمن متلازمات الكِبر.. هشاشة العظام يعني حكاية زرع السنون هي في الأصل إجراء تخريم في الفك لتركيب مسامير ويركب فيها طاقية السن، عضم كانت ولا حتى بلاتيين. تكاد تكون شبه المستحيل مع فك بقآ ذي صفيحة كريستال، ذكرني الكريستال دآ الجاري حسي في السودان وأنهو كييييف الناس دي فارغة ووهم وإنصرفت من واقعها السياسي السيئ لي مشكلة "الآيس" وهو نفسهو مادة الكريستال والتي تعرف أيضا بالشب والميتا..
ما علينا النرجع لي Plan B المعا الكُبر هي تكاد تكون ضرب من المستحيل.
ونمسك في خطتنا ديييييييك الواحدة والاولى والاصلية ودون زحم رأسنا بي إستراتيجيات ونصبر ونصابر ونوكل أمرنا لله القادر، القدير ...

[بابكر مخير]

بيقولوا؛ محل رهيفة بتنقد..
أها ياهو دآ الكُبر تاريهو المقصود بالرهيفة.
يوم شنهو دآك ما عارف وتاني يوم شنهو وأمرا من الفات وكل يوم تاريهو أسوء من القبلهو، بس التقول السودان!!
شفتا من ما تبتدي الأمراض تكون أساميها إلا كتا بتسمع بيها سماع ساكت وعند اللناس الكُبار من الجنسين. تبقآ إت عايشها، أعرف أنهو رهفت وجااااااااااهزة تنقدآ..
زمان نشوف الكُبار وين ما يمشوا شايلين ليهم كيس ويا ولد، أديني كباية موية النبلع حبوب السكر. أنا كنت بشوفهم وبفتكر على أنهو نوع من التباهي ولوزم قشرة الكُبر أو أنهو إستدرار لي العطف بأنهو مريض ومن واجب الناس يعاملوهو بخصوصية.
لكن تاريهو الشئ مسألة حياة أو موت.. فالحبوب دي أن ما إتاخدت في وكتها بيلحق السمحين التحت التراب راقدين..
بتذكر بعضهم يحكي، عندي "دغت" والتاني بي هناك يقول ليهو والله البروستاتا الدكتور قال ليا إضخمت، وتالت يعدل في نضارتهو ويقول غايتهو السكر ضعف ليا نظري وكمان العيون مستني لمن الموية تتجمع عشان يعملوا ليا عملية. ديل غير ديك ناس الركب بقن ما شايلتني واليقول ليك المصران الاعور والشريان التاجي مسدود وعرق النسآ وهو يكون راجل لكن الموضوع دآ ما عندهو تفرقة وأكيييييييد ناسات الجندر بيكونن شمتانات أنهو الوجع دآ بيضرب الرجال؟ ضوقوهو كيفنهو حار.....
يومتها الدكتور كتر خيرهو خصاني بي 10 دقايق كاملات (F2F) ودي معناها وش في وش وقال عشان يشوف بشكي من شنهو.. بديت ليهو من الصداع ووجع الكتف ونازل لي زمة النفس وعشرقة الحلقوم ووجع الكلى.
وقفني قال ليا: طبعا في عمرك دآ..
آها ياها دي الكلمة البتجرح الشعور وتحبط الهمة وتعككن قلب أبو المزاج ظاتهو.
قمتا شكرتهو ومرقت...
أول أمس جاني جواب منهو بقول ليا فيهو أنهو حولني لي للأنف والأذن والحنجرة، لأنهو ما فهم مني حاجة، صوتي كان بتقطع وبفتكر أحسن أمس هناك..
إتصور مشيت لأني فعلن من يوم ما ضربتني الكرونة، صوتي ما الياهو.. قلتا الواحد فعلن يشوف..
وبي كرعيا مشيت وعملوا المنظار وطلع أنهو الحبال الصوتية دايسة عليها كرضمة كدآ هي العاملة الحكاية دي، والاحسن يشيلوا من الكرضمة دي عينة عشان يعرفوها ... أهآآآآآآآآآآآآآآآ حفر إيدك يغرق بيك:eek:
هو أنا ظاتي، الصوت ما ينبحا ولا يكرر، يعني حأغني بيهو ولا بمدح بيهو، ما تخليهو في شناتهو..
قالوا: مش يتفولح، جاب ضقلا يتلولح وما صدقنا إتحلينا من الدعامة بتاعت الشريان التاجي، كمان جايبا ليها شنهو. الله أعلم..
ياها دي الرهيفة يظهر، كل يوم وحيكون فيها جديد لمن :(:(؟؟؟؟....

[عكــود]

السلام عليك حبيبو،

ياخي ألف لا بأس عليك وبإذن الله النتيجة تطلع سلبية خالص.
ربنا يمتعك بالصحة والعافية وطولة العمر في طاعته.

طمّنا عليك بعد طلوع النتيجة.

[Abdullahi Gaafar]

حبيبنا بابكر

ربنا يمتعك بالصحة والعافية وطول العمر ..
ههه الكرونا ضربتنا مرتين ولا زلنا والحمد لله بخير رغم الكبر

تحيات وتمنيات

[بابكر مخير]

الحمد لله بخير رغم الكبر


الحبيب
رفع معنويات في ما يلحق.. أنا ذاتي جاتني لرفع المعنويات...محبة

((بشري لمن تجاوز عمره ال٦٠ وال٧٠ عاما
كتب د. محمد عوض (شيكاغو):
الاماني الضائعه.
دماغ ما فوق الستين.
حقائق مدهشة يكشفها الطب الحديث.
المجتمعات المتخلفة هى التى تفقد طموح و إبداع الذين تجاوزوا الستين والسبعين... للتخلص من المنافسين الأشد علما وخبرة و تعقلا
👇اقرا👇.
يقول عميد كلية الطب بجامعة جورج واشنطن بأن دماغ الشخص الأكبر سنًا هو أكثر نضجا مما يُعتقد عمومًا.
وللأسف في بعض الدول يحال الشخص الى التقاعد فى هذا العمر بحجة انتهاء دوره فى الحياة ويستبدل بشخص اقل عمرا .
وفى الحقيقة ان الانسان فى عمر الستين الى الثمانين يصبح تفاعل نصفي الدماغ الأيمن والأيسر عنده متناغمًا ،
مما يوسع إمكانياته الإبداعية.
هذا هو السبب في أنه من بين الأشخاص الذين تزيد أعمارهم عن 60 عامًا ، يمكنك العثور على العديد من الشخصيات التي بدأت للتو أنشطتها الإبداعية.
بالطبع ، لم يعد الدماغ بالسرعة التي كان عليها في الشباب.
ومع ذلك ،
فإنه يكتسب المرونة. لذلك ، مع تقدمنا ​​في العمر ،
من المرجح أن نتخذ القرارات الصحيحة ونكون أقل تعرضًا للمشاعر السلبية.
حيث تحدث ذروة النشاط الفكري البشري حول سن السبعين ،
عندما يبدأ الدماغ في العمل بكامل قوته.
بمرور الوقت ،
تزداد كمية (المايلين)
في الدماغ ،
وهي مادة تسهل المرور السريع للإشارات بين الخلايا العصبية.
ونتيجة لذلك
تزداد القدرات الفكرية بنسبة 300٪
مقارنة بالمتوسط.
ومن المثير للاهتمام أيضًا حقيقة أنه بعد 60 عامًا ، يمكن لأي شخص
استخدام نصفي دماغه
في نفس الوقت.
هذا يسمح لك بحل مشاكل أكثر تعقيدًا.
يعتقد البروفيسور مونشي أوري ،من جامعة مونتريال ،
أن دماغ الرجل العجوز يختار المسار الذي يستهلك طاقة أقل ويزيل ما هو غير ضروري ولا يترك سوى الخيارات الصحيحة لحل المشكلة. أجريت دراسة شملت مختلف الفئات العمرية. كان الشباب مرتبكين للغاية عند اجتياز الاختبارات ، بينما اتخذ من تجاوزوا الستين من العمر القرارات الصحيحة.
الآن ، دعونا نلقي نظرة على خصائص الدماغ
للذين تتراوح أعمارهم بين 60 و 80. انها حقا وردية.
خصائص دماغ الشخص المسن. *
1. الخلايا العصبية في الدماغ لا تموت ،
كما يقول كل من حولك. بل تختفي الروابط بينهما ببساطة إذا لم ينخرط المرء في عمل عقلي.
2. ينشأ الإلهاء والنسيان بسبب كثرة المعلومات. لذلك ، ليس من الضروري أن تركز حياتك كلها على تفاهات غير ضرورية.
3. من سن 60 ، لا يستخدم الشخص عند اتخاذ القرارات
احد فصي دماغه في نفس الوقت ، مثل الشباب ، ولكن كليهما.

4. الخلاصة: إذا كان الشخص يعيش حياة صحية ،
ويتحرك ،
ولديه نشاط بدني
قابل للحياة
ونشط عقليًا بالكامل ،
فإن القدرات الذهنية لا تنخفض مع تقدم العمر ، فهي ببساطة تنمو ، وتصل إلى ذروتها في سن 80-90 عامًا.

لذلك لا تخافوا من الشيخوخة.
اسعَ جاهدا لتطوير فكرك .
تعلم الحروف الجديدة ، وصنع الاشياء ،
وتعلم فنون جديدة ، ورسم الطبيعة !
اهتم بالحياة ،
التقِ بالأصدقاء
وتواصل معهم ، خطط للمستقبل ،
سافر بأفضل ما يمكنك.
لا تنس الذهاب إلى المحلات التجارية والعروض.
لا تصمت وحدك ،
إنه مدمر لأي شخص.
عش مع الفكر:
كل الأشياء الجيدة لا تزال أمامك!
أبشروا ياشباب السبعين والثمانين بالخير..))

[عبدالحكيم]

الحبيب
رفع معنويات في ما يلحق.. أنا ذاتي جاتني لرفع المعنويات...محبة

((بشري لمن تجاوز عمره ال٦٠ وال٧٠ عاما
كتب د. محمد عوض (شيكاغو):
الاماني الضائعه.
دماغ ما فوق الستين.

كل الأشياء الجيدة لا تزال أمامك!
أبشروا ياشباب السبعين والثمانين بالخير..))

متعك الله د. بابكر مخير بالصحة والعافية دايما وجعل ما اصابك كفارة لك وزكاة لبدنك ومنحك قوة من عنده ...

ونقول لي د. محمد عوض شيكاغو الذي يبشرنا :
(قَالَ أَبَشَّرْتُمُونِي عَلَىٰ أَنْ مَسَّنِيَ الْكِبَرُ فَبِمَ تُبَشِّرُونَ ) ...

ورغم الذي مسنا تشكر على البشارة وبشرك الله بالخـــــــــــير .

[بابكر مخير]

بيقولوا؛ محل رهيفة بتنقد..

وتاني ساقتني رجليا للمستشفى ويظهر أنهن بقن "متعودة دايمن" قال المرة دي أخد عينة، طبعا الدكتورة كانت قالت ليا أمشي عشان يعملوا ليا عملية، أها أثناء الحديث طلع أنها أقرب الي المنظار منها العملية لكن الفارق أنه التدخير كامل، متعة لم أُحظى بها قبلا في حياتي، يعني ينوموك ويعملوا في الدايرنهو، ممكن تصحى تلقى رجل الشمال محل يديك اليمن وما تعرف الحكاية دي إلا لمن يكلمك الممرض القاعد ليك في رأسك في غرفة الانعاش (دآ طبعن إن عشتا).. المهم أولن سخسخوني كدآ بي حقنة والدكتور والانا المستغرب فيها أنهو صوتهو صوت الانجليز دآك القليييد، يعني في قياس ريختر مقارنة ليا هو في 9 وأنا في ستة.. المهم، صحيت والحلق ما بيطاوع، تقول تبصق، كأنهو أبو الشوك ماخد ليهو فيهو نزهة وحتى اللعاب الذي يمتاز العجاجز دوما بالكرم فيه، سواء قفل الفم أو هو فاتح، تجده سائل متسرسب كمياه شلالات نيجارآ، بخلا عليا بقطرات وهم المشرفين من ممرضين وأطباء علماء في مجالهم فيلحقوك بكوب من الماء وبعده الاخر سريعا، لكن شراب الموية مع أبو الشوك الحايم والجفاف المستعر، يبقآ ذي شراب الذقوم الموعودين بيهو الكفار في النار.. الحمد لله اصبحنا بما اختاره لنا وابتغاه، راضيين، سعداء بذكره لنا، يبتلينا ويختبرنا بما شاء وكما ابتغى. نشكره على نعمه الدائمة والتي منها. بعد الكبر، زدنا علما، فاتقنا الحديث بالاشارة لنستعيض حجة اللسان وتملكنا القلم جيدا فصرنا نضاهي الطيب صالح حكيا وعبد الله الطيب بفصاحة وعذوبة لسانه وقلمه، بسطور نكتبها واذكى من صوت البلابل بسكاتنا وعدم اسماع الناس اصوات تشاذ.. الحمد لله في باقي طشاش النظر وخفة السمع ورهافة الذكرى وعلى ما تبقى فينا من لحم وعظم. ونشكره على حبنا الكبير للناس فوهو الذي لايضعف ولا يهون بل يزيد مع العمر ويقوى. لا يضاهيه في خيره هذا؟ الا الايمان بالواحد الاحد، الغفور الرحيم، الملك القدوس، الحق العدل، العزيز النصير، كما هو المحي والمميت كما انه لم يلد ولم يولد (الاما هو سر زول)💗💗.

[بابكر مخير]

في الكُبر؟
ما بنعرف نكره لكننا بنكجن..
ففي الكِبر تتغير الأحاسيس والمشاعر وقد ذكرت ذلك من قبل، بمقارنة أمرين بيتحولوا في البشر مع الكُبر. المشي يتقل والعاطفة تخف. فالإنسان في شبابه يخبو في سيره بأرجل قوية مملوءة بالحيوية وحين يشيب؟ ينعكس الأمر فيصبح وكأن الأرجل مربوطة بجلة تزيد في الوزن قياس جسم الإنسان ذاته وتثقل حركته.
حين تكون عاطفته مهزوزة وواهنة ضعيفة عكس تلك المملوكة للشباب. فهموا لا يكترسون للعديد من الأمور ويتعاملون مع الشدائد بكل ثقة وحزم..
القصد أن الكُرْه هو مشاعر توصف بأنها إنسحابية يصاحبها عدم التعاطف وهو عكس ما ذكرناه عن جياشُ العاطفة عند الذينا..
كما أن مع الكُبر يصبح الحال في البشر وكل شيء حي هو ما نراه ونعايشه في كل شئ يصيبه القِدم عند المواد والأشياء ونضرب أمثلة؛ العربية تلقى العادن إنخرم كما الإحتماليات الكبيرة بالنسبة للكِبار من البشر وأمراض الرئة والصدر، الشاسي إنحلج فكثير ممن يكبر في العمر يصيبه هشاشة العظام، صرف السوائل المساعدة في التسيير يزيد إستهلاكها وهو حالنا مع العقاقير والأدوات التي تزرع في الشرايين والقلب لتساعد في الإستمرار في العيش وغيره كثير مما يعني أن في مثل هذه الحالة الواهنة يصعب على الزول لمن يكبر بيضعف وأنه حين يكره يتولد الشعور بالنزاع والإحساس بالرغبة في التصادم وذي دآ الحال مثل ما يقول المثل؛ الما عندها شعر ما بتقيف في الثباتة..
فيبقى كيف يعبر الزول لمن يكبر عن مشاعره الانسحابية تجاه الإشمئزاز والنفور والوصول لتغييره "رينيه ديكارت رأى إن الكراهية هي إدراك أن هناك شيء سيئ (رغم أنه عمم الأمر ليكون المقصود المجتمع إلا أني إختصرته لفرد أو أفراد معينيين من المجتمع الكلي)". الأمر الوحيد الذي يتبقى للناس الذينا هو أضعف الإيمان وهو أن يكجن وهو حالي تجاه أفراد . من كترت ما مكجنهم ما بيمروا في زوري وظنيتهو هم السبب في الإحتقن الفي حلقي الذي أثر على حشرجة صوتي..
ما بدس عليكم سر وسأذكر البعض، أحمد طه، أردول، التجاني سيسي، مجدي دآك بتاع البعث وسبدرات :o:o:o

[عبدالمنعم الطيب حسن]

هلا حبيبنا
متابع البوست الشيق والممتع..
وبالمناسبة بوستي بتاع الذكريات هنا الصفحة الاولى
اصلا فكرتو استلهمتها من بوستيك دا
انها فكرة عظيمة
ساعدتني في تجميع كتاباتي التي ارى انها ممكن ان تحدث فرقا
وتسعد انسان؛ اذن انا لسعيد
لذلك حتى استمرارية البوست بتاعي اخدتها من مقدرتك الفائقة على مد البوست دا
بكتابات متنوعة وجزلة..
دمت استاذا وملهما وحبيبا يا دكتور بابكر...

[بابكر مخير]

هلا حبيبنا
متابع البوست الشيق والممتع..
وبالمناسبة بوستي بتاع الذكريات هنا الصفحة الاولى
اصلا فكرتو استلهمتها من بوستيك دا
انها فكرة عظيمة
ساعدتني في تجميع كتاباتي التي ارى انها ممكن ان تحدث فرقا
وتسعد انسان؛ اذن انا لسعيد
لذلك حتى استمرارية البوست بتاعي اخدتها من مقدرتك الفائقة على مد البوست دا
بكتابات متنوعة وجزلة..
دمت استاذا وملهما وحبيبا يا دكتور بابكر...
نعمي الحبيب
كبرتا ليا رأسي، أبقآ عات قدرها.. لأني أيتها زول يقول ليا بغم،، حا أقول ليهو يا أخي هو عبد المنعم الطيب بي ظاتهو، مدح بوستي..
شكرا ليك عزيزي
بس يابا بوستيك ميزتهو أنهو ذكريات وحكاوي إتا سيدها ودآ مشروع كتاب ذي بتاع جدك بابكر بدري "تأريخ حياتي"..
مشكلة الكتابات الذي دي، الزول مفروض يكون فيها صريييييييييييح لكن بعض مرات تلقى روحك دخلتا ليك في ماسورة والخلق ما بتريح..
طبعن عكود "كوكي" الحبيب قال ليا أكتب عن ذكرياتي. أها دي إلا بس الناس تغمض عيونها وتقرآ loooollooool لكن إتا ما شاء الله قادر توافق بين العصر والأصل بي إنضباط :cool:
ولي قدام يابا

[بابكر مخير]

أمس القريييييب دآ وإحنا لاحظو في لندن "الغرب الإستعماري الرأسمالي، بلد الكفار" قاعديين لينا في مقهى سوداني وبقدرة قادرإتحول لي مسجد وفي هذا الشارع الفيهو المقهي في ذي 12 محل صلاة مخصص لذلك.. أها قاموا يصلوا التراويح وأنا قاعد ليا مع شاب حصل بيني وبينه رابط والحصل أنهو مقيم في الامارات مما أثار فيني حنين وبنتونس بي سكوت وهدوء هم في تراويحهم بعد السلام من الركعات الأوائل وأحد إنبرى، يا أخي إحنا بنصلي، أسكتوا خلونا نركز..
قالوا في واحد سألوهو ما عن الصلاة، رد قائلا.. قفة خشب وفار.. والمقصود طبعا وقف خشية ووقار.. فصاحبنا الهاجمني دآ ظنيتهو فاهم الحكاية ذي فهم بتاع القفة والخشبة والفار:075::075:، يعني ما مركز في صلاتهو..
ودآ الخلاني أكتب في صفحتي في الفيسبوك .........
https://www.facebook.com/babiker.mukhayer.1/posts/pfbid0UPFvUujL32nzDmMNL7JHkd6kn3sHE1VGEFkH6hzS5kXJ Yaww6zgoH1Wq1xmLyNT8l?notif_id=1680034932295287&notif_t=feedback_reaction_generic&ref=notif

[عبدالمنعم الطيب حسن]

نعمي الحبيب
كبرتا ليا رأسي، أبقآ عات قدرها.. لأني أيتها زول يقول ليا بغم،، حا أقول ليهو يا أخي هو عبد المنعم الطيب بي ظاتهو، مدح بوستي..
شكرا ليك عزيزي
بس يابا بوستيك ميزتهو أنهو ذكريات وحكاوي إتا سيدها ودآ مشروع كتاب ذي بتاع جدك بابكر بدري "تأريخ حياتي"..
مشكلة الكتابات الذي دي، الزول مفروض يكون فيها صريييييييييييح لكن بعض مرات تلقى روحك دخلتا ليك في ماسورة والخلق ما بتريح..
طبعن عكود "كوكي" الحبيب قال ليا أكتب عن ذكرياتي. أها دي إلا بس الناس تغمض عيونها وتقرآ loooollooool لكن إتا ما شاء الله قادر توافق بين العصر والأصل بي إنضباط :cool:
ولي قدام يابا

تسلم حبيبنا الدكتور بابكر...
بصراحة احاول ما استطعت ان اكتب الحكاية كما حصلت لما كما اتمنى؛ خاصة وان معظم ابطال القصص في مجال النت او قريبين؛ يعني كدة ول كدة بتأفش بتأفش هههههه
زمان ايام المنتديات كنت بديها موية شوية شديد؛ بحيث لا يغير من السياق العام؛ محفظا على بيئة الحكوة واتساقها؛
وكما قال عبدالوهاب صاحبي ذات زنقة انو منعم دا كاتب يعني بِزَوِّد..
بس هسا مع الفيس تراجعنا من الموية وبقينا نبيع صافي نبع لحظتو غالباً..
وبحاول اعيش لحظة الحكاية تاني وانقل تفاصيلها دون تدخل من جانبي؛
فانا اقرب لاكون راوي اتحين دوما واحاول ما استطعت ان اروي بصدق مهما جنح؛ اوغل مسافرا مع الاصيل...
واعتقد دوما ان الواقع اكثر ابهارا من اي خيال..
..
لا اكذب عليك هنالك الكتير من المسكوت عنه؛
احاول ان اتجاوزه لانو في حاجات كدة تموتها بيها بس..
لا تحكيها لاي كائن؛ كان عند اي منا؛
وسبب تاني يجعلني لا اركز على المسكوت عنه لاعتبارات انو الممكن كتابتو
وحكايتو كتير..
وتسعفني ذاكرتي بتفاصيل التفاصيل؛
وفي اخراجها لحيز التدوين راحة لي؛ وسلوى ونشوة..
تماما زي الرسام تكون اللوحة مرتشة بالضباب في مخيلته؛
وما ان يفرغها على الورق حتى تستعيد زاكرته نضارها وقد خفَّت الحمول..
فالذكرى للانسان عمر ثان؛ وكنت اري وجه ابي وقد تهلل واشرق بالبريق وعاد اكثر شبابا ووسامة وسعادة؛
وهو يسترجع ذكرياته مع اخوانه واصدقائه على حافة حدود البطانة حتى عمقها ونواحي الهوج..
تسلم يابا..

[بابكر مخير]

وكنت اري وجه ابي وقد تهلل واشرق بالبريق وعاد اكثر شبابا ووسامة وسعادة؛
وهو يسترجع ذكرياته مع اخوانه واصدقائه على حافة حدود البطانة حتى عمقها ونواحي الهوج..
تسلم يابا..
من الأشياء الديمة تراودني؟؟
هي سؤال كبييييييير ليا..
هل نحنا عملنا شيء من الكان أبواتنا عملوهو لينا...
الناس ديك المسئولية عندهم عبادة، ليها النفس والنفيس ودون تردد يدوها.. الإحترام بين بعضهم وحتى لمن هو أقل منهم عمرا أو علما. العطف على الغريب كما هي للقريب، قولة الحق حتى ولو لم يحمد عقباها، متسامحين مع أنفسهم مسامحين لغيرهم إن شاء الله لو أخطؤا في حقهم، مسالمين في في تعاملهم وجانحين دوما للإتفاق والتوافق وحتى الموافقة بقصد المراضاة وعدم التشدد والتعنت والإغواء الجاهل بسبب، الجهوية أو العنصرية أو دون ذلك أو غيره..
الناس ديك سكنوان في بيتن وسط مربع؛ جارك الشمالك من الشمالية والفي قفاك من الشرق والفي يمينك من الجنوب والبابوه فاتح قدام بيتكم من الغرب، وهكذا ضمنوا حمايتنا فظهرنا محمي وأجنحتنا حافظة لأمننا وفي مواجهتنا أعين ساهرة..
لم نعمل لأبنائنا ولا حتى ذرة من الذي فعله أبائنا لنا..
البلد قسمناها، الذات هناها،الخزنة فضيناها، الكرامة ضيعناها، النخوة فقدناها، الرجولة شوهناها..
أريتنا نتذكر، كم أبنائنا عظماء وأنه علينا أن نحسن البلاء ونحاول أن نصل الي حسن أعمالهموا "وَذَكِّرْ فَإِنَّ الذِّكْرَىٰ تَنفَعُ الْمُؤْمِنِينَ"
اللهم أعفو عنا في دنيانا قبل أن ننزلق ولا تجعلنا مثل من أنزلت فيهم قولك الكريم؛
(وَأَمَّا ثَمُودُ فَهَدَيْنَاهُمْ فَاسْتَحَبُّوا الْعَمَىٰ عَلَى الْهُدَىٰ فَأَخَذَتْهُمْ صَاعِقَةُ الْعَذَابِ الْهُونِ بِمَا كَانُوا يَكْسِبُونَ)..
هذه رسالة في قصدها ومضمونها، إيضاح عن عظمة أبائنا وعرفان وإحقاق لتقصرينا، أننا لم نصل الي ذلك.
عليه فهي موجهة الي الأجيال القادمة..
اللهم هدئ ما في القلوب وأرفع من هاماتهم ليصلوا لتلك السيرة العطرة لأبائنا نحن وأجدادهموا....

[بابكر مخير]

هلا حبيبنا
متابع البوست الشيق والممتع..
وبالمناسبة بوستي بتاع الذكريات هنا الصفحة الاولى
اصلا فكرتو استلهمتها من بوستيك دا


يابا
شن جاب لي جاب...
ما شاء الله شوف شعبية بوستيك وبس في خلال تلاتة سنيين وعمك بابكر دآ بيحك فيها من 2015 قرب العشر سنيين
لكن ما ياهو بيك إتا والذيك دافرين البوست لا قدام،، شكر

[بابكر مخير]

ظنيتني كررتها كمين مرة..
جدكم بابكر بدري، قال يعمل ليهو كتاب يجمع فيهو الامثال السودانية وإختار شيخ البطانة أبو سن ليكون فاتحت الكتاب بحكيهو عن مثل ياتي منه. فمشى للشيخ وقال ليهو ما بنفسه. ورد الشيخ على جدكم: أكتب يا ود بدري، كل زول بي همو والفايق يهمز أمه. وما يعني أنهو دي شغلانة "مهببة" البتعمل فيها. المهم طبع الكتاب ويا ريت الحبيب elmhasi لو لقاهو ينزلهو لينا في بوستيهو المشهود (ملخصات كتب سودانية ’’ببلوغرافيا‘‘)..
أها أنا جيت بي جآي المرة دي كمان وأنزل حاجة من حيطتي في الFaceBook وما أبقى ثقيل عليكم، لكن ما ياهو الحال من المحال والبوست مذكور فيهو الثقالة الأكبر والهي الكُبر...
https://www.facebook.com/babiker.mukhayer.1/posts/pfbid0uDJdKTs4iJXQqxH7iB6diowyuAtp28z29mrP6qhxHqSC FdPwA2E8fwJXUcXDhaeZl?notif_id=1680336302506551&notif_t=feedback_reaction_generic&ref=notif

[عبدالمنعم الطيب حسن]

الناس ديك المسئولية عندهم عبادة، ليها النفس والنفيس ودون تردد يدوها.. الإحترام بين بعضهم وحتى لمن هو أقل منهم عمرا أو علما. العطف على الغريب كما هي للقريب، قولة الحق حتى ولو لم يحمد عقباها، متسامحين مع أنفسهم مسامحين لغيرهم إن شاء الله لو أخطؤا في حقهم، مسالمين في في تعاملهم وجانحين دوما للإتفاق والتوافق وحتى الموافقة بقصد المراضاة وعدم التشدد والتعنت والإغواء الجاهل بسبب، الجهوية أو العنصرية أو دون ذلك أو غيره..
الناس ديك سكنوان في بيتن وسط مربع؛ جارك الشمالك من الشمالية والفي قفاك من الشرق والفي يمينك من الجنوب والبابوه فاتح قدام بيتكم من الغرب، وهكذا ضمنوا حمايتنا فظهرنا محمي


ولله يا بابكر كنت بزعل شديد من مقدرة ابوي الكبيرة على التسامي؛
مهما حصل من نقاش او حدة من طرف معاه..
يقول رايه بكل احترام مهما جنح الطرف الاخر ومهما تجاوز
تجد ابوي يقول كلمته ويمشي..
لم يحرح احدا على الاقل في حياتي معه
ولم يخاصم احدا
وليس له زمنا لاي ايقاع اشتر خارج اطار اسرته الكبيرة..
حياته بين الشغل والبيت والمسجد..
يصلي بلسان ويغني بلسان
وكان شاعرا حكيما حفظ معظم اشعاره اهل المنطقة
واصحابه ومعظم اهلنا..
لما يمتاز به شعره من حكمة ولطف وفكاهة ورصد
جيل اباءنا قال عنهم الاديب الطيب صالح
فيما مغناه:
انهم يعيشون طويلا
ويعمرون كما اشجار السيال والسلمفي بوادي السودان
يعمرون طويلا لانهم لا يسرفون في الحياة
رغم جور الحكام وظلم الطبيعة..

[بابكر مخير]

ولله يا بابكر كنت بزعل شديد من مقدرة ابوي الكبيرة على التسامي؛
انهم يعيشون طويلا
ويعمرون كما اشجار السيال والسلم في بوادي السودان
يعمرون طويلا لانهم لا يسرفون في الحياة
رغم جور الحكام وظلم الطبيعة..
جدنا الخضر بدري والذكر الأصغر بين ولاد محمد (والمعروف بود بدري) ود حاج الصادق.
كان رجل جميل، عالم (مهندس مدني وقد شارك في في بناية هيثرو وكبري أمدرمان) وصالح يكاد لا يكون قد فوت فريضة واحدة في حياته، أدكاديميا لامع وكان يعرف بالبرنجي، طاهر حتى أن البعض يبالغ ويقول ظنيتهو إتولد "مطهر". كان يعمل في الأشغال ويوم من الأيام وهي من بعض الطباع السيئة التي نملكها وهي إشانة سمعة الأخرين بقصد أو دونه، بعدم أو قصد التجريح والتلذذ فقط. المهم؛ سرت إشاعة بأنه قد وضع يده بصورة التملك الشخصي على بعض المواد الخاصة للوزارة وحولها لمنفعة شخصية.
جاهو جواب بهذا المعنى وأن عليه مقابلة لجنة التحقيق..
حين مثل أمام اللجنة قيل له أن فلان بلغ عنك وإتهمك بتملك مواد خاص بالوزارة. فما هو ردك على هذا..
قال وبطيبته العفوية..
لكن فلان دآ ما كضب والبكضب بخش النار، ربنا يعفو عنه ويتوب عليه وأن ليا انا دآك والله عافي ليهو حقي، دنيا وأخرة....
أتذكر ورواية حكاها الوالد نفسه والذي كان وقتها (مع عدم التأكد التام لكن بفتكر أنه كان عميد كلية الصيدلة) في حينها كان مدير جامعة الخرطوم على ما أعتقد (الوالد يوسف فضل) وهذا لن يغير في القصة.. المدير طلب من الوالد أن يحضر لمقابلته في الرئاسة وحين ذهب، قال له: في دكتور من الإستاف بتاعكم، قال أنك أخدتا خلاط خاص بالكلية لي بيتك. كان رد الوالد وبقولته التي كثيرا ما يستعملها لنا في البيت حين يخطئ أحدنا: ربنا يهديهو يا أخي. طبعا ما حصل الكلام دآ وعلى أي حال. ما عندي مانع تعملوا لجنة للتحقيق، بس لمن يطلع أنهو الكلام دا ما صاح.. أكتلو القصة هنا في محلها، عشان ما تخلق حساسات لي إبني الدكتور "....."
وصدق قول الأديب الطيب صالح...
أنا بتخي ليا دي هي الحاجات البتقال عليها جالبات الطاقة والتي تمد في العمر.. جدي خضر توفي عن كم وتسعين والوالد عن كم وتمانيين عليه الرحمة

[عبدالمنعم الطيب حسن]

الدكتور بابكر
طالما مرتبطين بكلية الصيدلة واسرتكم الكريمة
فلابد انك تعرف البروفسير محمد رملي احمد
عالم الكيمياء الكبير
والذي ظل يعمل استاذا للصيدلة بجامعة الخرطوم والجامعات السودانية
لحوالي نصف قرن..
وتوفي بواوسي قبل 3 شهور من الان؛
الرجل ابن خالي وخالتي وجاري
واخوي الكبير..
له الرحمة بقدر انسانيته ولطفه..

[بابكر مخير]

الدكتور بابكر
طالما مرتبطين بكلية الصيدلة واسرتكم الكريمة
فلابد انك تعرف البروفسير محمد رملي احمد
عالم الكيمياء الكبير
والذي ظل يعمل استاذا للصيدلة بجامعة الخرطوم والجامعات السودانية
لحوالي نصف قرن..
وتوفي بواوسي قبل 3 شهور من الان؛
الرجل ابن خالي وخالتي وجاري
واخوي الكبير..
له الرحمة بقدر انسانيته ولطفه..
عليه الرحمة والمغفرة.
كان للوالد كالإبن الوسط، بيني وبين شقيقنا الراحل قاسم.
أذكره كما يذكره إخوته المحاضرين والمساعدين والموظفين والعمال وطلبته النجباء.
أذكره كما تذكره دوما صالات المحاضرات وبوفيه كلية الطب المجاورة لكلية الصيدلة من حيث ما كان دوما يكرم ضيوفه بشاي منعنع. أذكره للطفه وحلو حديثه وصوته الهادئ، الهامس. كنت بقول ليهو ديمة، إتا وأبوي إلا الواحد يجيب ليهو سماعات عشان يسمعكم..
اللهم يتقبله قبولا بقدر عظمته ولكم العزيز منعم ولأسرته ولجميع ألأهل الكرام وعموم أهل واوسي بالغ التعازي...

[بابكر مخير]

كتيرين مننا يقولوا ليك؛ زمان..
زمان كان الناس شنهو ما عارف (بقصد المدح) وزمان كانت الحياة رغدة، زمان كانت البلد نضيفة، زمان الرجالة فاية الحد، والكلام صدق..
زمان أماتنا كانن حاكمات وأبوتنا ليهم بكل الإحترام حبانهم.
تعاين تشوف؟؟
تلقى أنه فعلا زمان في حاجات عظيمة خلاص لكن برضك حسي في حاجات سمحة..
بس للأسف سماحة الحسي، ما منضبطة..
من بين الأمثلة؛ زمان الجهوية كانت صارخة والقبلية كانت مهيمنة، الخلق والإخلاق إتجهجهت بين سايبة وما قويمة..
سماحة زمان كان ظنيتهو الصاينة مصدر المعلومة، ياهن جريدتين وإذاعة فوق رأسها ناسن عظماء وسمحيين، أكيد بالنسبة لي ناس حسي وحسب المفروض أنهم أسمح، ما هو زادوا في العلم والمعرفة لكن برضه أرجع أقول: القلم ما بزيل بلم..
ناس زمان رؤساء التحرير إن خلاص ياهو المعهد وأحسن المذيعيين شهادة الثانوية وإتقان اللغة العربية، ناس حسي دكتور وإستراتيجي وباحث ومحلل ورابط وفاكي ورباط معلق من لسانه بإنتماء، فكري، عقائدي، إقتصادي أو مصلحي..
زمان كان زولن فوق الخمسين/ ما بيعرف يكضب وإن قال كلام، بكون أكيد واثق منه وأكيد موثق مصدرهو..
حسي والله لمن من شدة بتحز في قلبي لمن أقول أستفرغ، قرفة وصدمة وزعلة..
يكون زولك وبتحترمهو ومديهو مكانة عالية، ما هو جامعي وعاش في حضارة أوربية أو شرق أوسطية أو حتى لو محلية، ياها جامعة الخرطوم هي الشفاعة، شهادة أكاديمية أو فنية أو أقلهو نقول تجارب الدنيا أهلتو وبقى زولن بي مكانة..
أها زولن بالمواصفات دي كلها، ينقل ليك كلامن عربجي (لست تقليلا للعربجي ولكن بقصد إظهار الفارق العلمي بين الحسي والزمان) يترفع أن يتناقلهو..
قبل كم يوم وقباله بي شهور وقبل كدآ بسنيين
في الواتساب والفيسبوك والتيك توك..
تلقى العالم منشغل بي صور وفيديوهات معلوماتها كلها غلط وتواريخها سبق عليها الزمن حتى تأكلت وأصبحت مومياء كحال عقول الذين يتناقلوها...
فيديو المبارة وهتافات المصريين، كانت قبل مدة طويلة من مبارة بين الاهلي والبورسعيدي وحصلت في مذبحة، إستغلاها كيزان "مصر" وصدر منهم!!! قال عصام العريان متحدثاً باسم الجماعة أنّ «أحداث بورسعيد مدبرة ورسالة من فلول النظام البائد... هذه المأساة سببها إهمال وغياب متعمد من الجيش والشرطة لإيصال إشارات ورسائل محددة يتحمل مسؤوليتها المسؤولون حاليا عن إدارة البلاد... الانهيار لم يكن في منشآت رياضية، ولكن في المنظومة الأمنية، كانتقام ضدنا من الدعوة لإلغاء حالة الطوارئ وتخريب متعمد للبلد في ذكرى الثورة... هناك من يريد عن عمد إثارة الفوضى في مصر وعرقلة أي مسار للانتقال السلمي السلطة».
يومتها برضهو جابوا صور لقتلى في أحد الدول الأفريقية وتم تناقله بأنه حدث في السودان..
حسي الجهلاء بقدر كِّبر أعمارهم وعظمة تأهليلهم الأكاديمي يعملوا في هبل حتى شفع زمان ما كانوا بيعملوهو...
بتذكر أنهو مرة الإبنة زينب بدوي وهي الرباط بين الزمان والحسي لفهما ونضاجتها وعلمها وأصلاتها. كانت قد كتبت عن المعلومات المغلوطة التي تتناقل في الميديا (يا ريت لو زول عندهو الموضوع دآ، يعيد نشره)..
خلاصة لفي ودوراني دآ؟؟
نمرة واحد؛ أنهو الناس وخصوصا الكبار العندها مقام، ما يصغروا أنفسهم وينقلوا أيتها كلام ودون التوثق من مصداقيتهو.
أنهو قولة زمان أحسن دي ما لازمتن تكون صاح لأنهو
فلكل زمن ما يناسبه على شاكلته...
بمعنى؛ لكل زمان دولة ورجال. ذي ما؟؟ لكل حدث حديث..
القصد من دآ كلهو تذكير الناس بي عام 1969 لمن خاضت السلفادور وهندوراس حربا ..
إيه رأيكم يا ناس القوالات والفلول.. نعمل حرب ونخسر ونرتاح..
تبا وتف

[بابكر مخير]

ويومتها واحد إتفلسف وبتكل عن الهوية بالنسبة لينا وطبعا طوالي رجع بالكلام المكرر البايخ بتاع أننا كوشيين وإحنا الأقدم حضارة في العالم والسودان الياهو من مرتفعات أثيوبيا ناس "لوسي" أقدم هيكل عظمي في العالم ومرورا بمناطق الزغاوة التي أثبت أنهو الإنديء أنهو حتى الاوربيين متطابقين مع الزغاوة..
سؤالي ليهو؟؟
حسي إحنا وين في الخارطة البيوسياسيجوغرافية...
إلا ياهو؟؟
ولساتهو القلم ما بزيل بلم. دا واحد بتكلم عن الهوية واحنا في القرن الواحد وعشرناوي واننا اقدم حضارة في العالم. بتكلم عن سبع الف سنة، كانت وراحت وبادت وانقرضت وجات بعدها حضارات، كسحت وانتظمت وطورت ومشت وماشة لي قدام. احنا هويتنا ياها؛ الهواية الزائفة في تمجيد شيء زال وانمحى وما بقى منه الا إهرامات ومومياويات وتاريخ لو لا الحضارات اللاحقة والحالية لم إهتم به احد
.
هويتنا قالها، الجد (السيد عبد الرحمن) في انهو وطنا السودان "الحالي والاني" وجاء الحفيد (سيد صادق) وشرحها باننا، افارقة ناطقي العربية وخلينا نبقا على كدا ونعيش الحاضر والواقع..
هوية ما هي بس الماضي لكنها، حالية ومستقبلية ببصماتها الآنية ولي قدام..
قال؟
تقول لي منو، قول انا سوداني. تقول لي شنو، قول انا الأن، أمهاتي وابائي مضوا بهويتهم. بناتي وابنائي هموا اصحاب هوية يختاروها وهكذا ذرياتهم من بعدهم..

[بابكر مخير]

الفاتوا؟؟
إرتاحوا..
بشوف في الحاصل بينا الايام دي، كان داخليا (السودان) أو إقليميا وحتى عالميا.. وبتذكر أبواتنا وجدودنا. لو عايشين معانا حسي! بيكون شوفهم شنهو لي جنس دآ..
بتذكر يوم الإنقلاب، مشيت دار حزب الأمة وصدمت بخال حبيب يمسك الباب ويجهش بالبكاء. إتخلعتا ولمعرفتي بحبه الخالص لسيد صادق، سألته هل صاب سيد صادق مكروه. ردآ عليا أبدن أنا ببكي على الديمقراطية وحال البلد الحتروح...
هذا واحد من أولائك، يبكي حال البلد وقبل أن يعيش حالتها التي ألت اليها من فساد وإنحطاط، سرقة وأكل السحت علنا ودون مدسة أو خجلة..
إن فات؟؟
يرتاح..
هذه بعض الأحيان يقولها القريبين من شخص وهو يعاني من مرض عضال، موجع ولا علاج له. يعيشون ويرون مريضهم كم يتعذب من الألم وكم يعاني من شقاء وصعوبة في الحياة.
هذا هو حالنا الأن ونحن عاجزين نجلس حول مريضنا "السودان". نشوف في عيونه يستنجد بينا ونحس أنفاسه تتسارع وتقرب تطلع. وفي الحالة دي أريتهو لو كان في طبيب، يقول أشوفهو يمكن لو أديتهو حقنة يطيب أو سمعتهو كلمة يستجيب أو أفكر في بلسمن يشفي ويصيب..
لكن لآ..
اولاد الكولاب كل زولن بس لي حلقوما يهاتي، لا بلد تهمو ولي ناسها ديك أريتهم ينعدمو...
لعنة الله تغشاك يا كباشي السجم وبرهان الرماد وعليكم يا ضباط الجيش المنفدعين وناسيين النخوة والرجولة وسايبنها لي النيين الخبراء الإستراتيجين...
أها ؟؟
إن فتوا؟؟
بنرتاحو....

[بابكر مخير]

خاطرة وما أكثرهن حين تكون قليل شغلة ومعاشي تعاني من أوجاع النقلة..

قصة قصيرة
في رحلة لرئيس مجلس الوزراء البريطاني ريشي سوناك الي فرنسا لمناقشة تشديد الحصار على المهاجريين من دول العالم الجنوبي، إصطحب معه زير الخارجية جيمس سبنسر كليفرلي ووزيرة الداخلية سويلا برافرمان في حوامة "هيلوكبتر" القوات المسلحة البريطانية وفي عرض بحر المانش. تعطلت مراوح الحوامة فسقطت في البحر.
صادف أن في ذاك الوقت كانت هناك مركب مهاجرين من دول العالم الجنوبي في موقع سقوط الحوامة وتم إنقاذ الفريق الوزاري.
وعلى بعد نصف فرسخ بحري وداخل المياه البريطانية كانت هناك فرقة من حرس الحدود البريطانية وهي مشكلةٌ من أبناء منطقة سمرست والتي يتميز شعبها بلون الشعر الجنجيري والنمش البني الغامق الذي يغطي على الجسم والوجه خاصة وينطقون لهجة "الكوكني" كما لها أن تكون، لأنهم أنجلوساكسون أصليين.
قبضت فرقة حرس الحدود على كل ممن في المركب وإقتادوهم الي البر، حيث بدأت رحلة معاناة المهاجريين والثلاثي الوزاري معهم. كم حاول الثلاثي جاهد إقناع المحقيقين في البر، بأنهم بريطانيين ولكن الأصل غلاب. وهنا إنطبق عليهم القول: حفر أيدك يغلب أجاويدك. ما لو كنتم ولاد ناسن وطيبين، كان يتم التعامل معكم بصورة أحسن.
رحل الجميع الي معسكر للجيش لإيواء المهاجريين (غير الشرعيين) وهناك كان أن تعرف احد أفراد الجيش على زميله السابق جيمس سبنسر وتسهل أمرهم بعد أن عاش الثلاثي التجربة بأنفسهم. في جلسة البرلمان اللاحقة لهذه الحادثة والمخصصة لمناقشة رئيس الوزراء ووزيرة الداخلية ووزير الخارجية.؟؟
تغيب الثلاثي لإصابتهم بأعراض سوء التغذية وأمراض جلدية وأمراض نفسية جراء التجربة التي عاشوها وسط المهاجريين والمعانة التي يتعرضون لها.
الثلاثي يظهروا ولائهم لبريطانيا من خلال نكران ذاتهم إلي أن وقعت الواقعة:
"وَكُنتُمْ أَزْوَاجًا ثَلاثَةً، فَأَصْحَابُ الْمَيْمَنَةِ، مَا أَصْحَابُ الْمَيْمَنَةِ، وَأَصْحَابُ الْمَشْأَمَةِ مَا أَصْحَابُ الْمَشْأَمَةِ، وَالسَّابِقُونَ السَّابِقُونَ، أُوْلَئِكَ الْمُقَرَّبُونَ" صدق الله العظيم

[بابكر مخير]

كيييييف الواحد في طفولتهو كان معجب بالينيفورم، جيش ولا شرطة، ما فارق..
الموضوع كان ملازم حتى سن الشباب وقدمت ليهم الاتنين لكن الإنسان بشوف شوفتها والله شفتهو هي البتبقا.. ما ظبطت لا جيش لا بوليس مع أنهو كان هناك قبل من الاهل صديق مخير ووصل لي مساعد مدير البوليس وعلي مخير وصل لحدي حكمدار "مقدم بالحالي" وكان هناك في الجيش الأمير أبقرجة كنتباي والبابكرين عبد المجيد ومحمد مالك "أبو عزيزة" ولحقهم من دفعتي عثمان النقر ومامون عبد المجيد وإتنينتهم كحال أخوانهم الكبار زمن نميري إحيلوا للمعاش. رحم الله الذين غادرونا والحمد لله أن أبقا على الاحياء.
لكني إتوليقتا وأصريت أني لازم البس الدبابير فبعد إتخرجتا صيدلي، إلتحقت بالبوليس.
مع أن كل من سبقني للإنتماء لتلك المؤسسات، أصولنا مرتبطة بكيان الأنصار، إرث أو قناعة وبرابط وثيق وإيمان صادق. وممكن دآ السبب الكان ديمة ورا أننا ما بنطول في لبس اليونيفورم لأنهو مرابط بوثاق "الطائفية" وهو ما يبعد هذه المؤسسات عن واقع ما كان يجب أن توصف به من قومية وأنها وعاء جامع فيه تذوب كل النعرات الجهوية والعنصرية وفقط يبقآ الوطن هو الإنتماء التام. (يعني المفروض أنها تكون أقرب للعلمانية في بلد ذي السودان فيهو الديانات متعددة)..
مع هذه الرؤية، أحزن على حال الضباط وصف الضباط والأفراد من هذه القوات والذين الإنتماء أعمى بصيرتهم وأظلمت الغشاوة نظرهم وأصبح ولائهم الأول للمؤسسة التي ينتموا اليها وأن ينساقوا خلف قادتهم كما الخراف يقودها راعي جاهل..
بشوف للدساتتير والقوانيين التي يتحدث عنها دوما الطغاة من بنو جلدتهم ويستعملوناه لتبرير إرتكاب أكبر الجرائم في حق البلاد إلا وهي جريمة الإنقلاب على دستور البلاد بحجة أن مسئوليتهم الاساسية هي حماية البلاد..
وهنا المضحك البكي بكل معانيه..
الجيش والشرطة هما مؤسسات يكونها الشعب لتخدمه، يصرف عليها وحتى أنه يعطيها بناته وبنوه الذين يعلموا حق العلم أن رأس مالهم "طلقة" وأنهم ليس إلا أدوات تستعمل دروع تتصدى حاميتن لصدور شعب بلدهم.
أذكر أن صديق لي من جمايكا وهو يتبع لجماعة يِهُوشُوَّع، قال ليا: لمن كانت الحضارة عند العالم الافريقي (بكل حضاراته من كوش لي أكسوم ولي غيرهو) فكروا في استنساخ مخلوقات يستعملوها في الحروبات بدل عنهم ولهذا غضب الخالق "القدير" عليهم فسلط تلك المخلوقات بعد عصور لاحقات، أن يستعمروهم ويهينهم (المقصود البيض من سكان العالم الشمالي) وقاموا يولولوا ويتبكوا..
ياها دي حالتنا نحنا مع الدياشة، نلبسهم اليونيفورم ونوفر ليهم المسكن والماكل ونديهم رواتب أكتر مما يستحقون ومنها يتزوجوا من القوارير الحسان وينجبوا ذرية تتفشخر وتفاخر أنهو أبواتهم وأماتهم ظباط (ما خطاء إملائي ولكنهو بقصد) ويقوموا بالسلاح الإحنا إشتريناهو ليهم، يكتلونا..
وياها دي حالة هؤلاء الطائفيين مع جماعة الدعم السريع وحسي لمن الدعامة شعروا بأنه من حقهم كذلك الإنقلاب "السنة التي تؤمن بها طائفة اليونيفورمويين" بقت حارة على البرهان والكباشي وياسر الني، كمان...
ضوقوها يا كريبت ما حسي بقآ في جلدكم...

[بابكر مخير]

حلم زلوط، الحطموهو ناس زعيط ومعيط..
في الايام الأخيرة الفاتت. من قناة تلفزيون للتانية ليل الزول كله مشغول. الأصابعين وّرمَن من الدوسان على الريموت والنظر إتزغلل من إرتدادات الأشعة السينية المنبعثة من جهاز التلفزيون.
دآ كلهو هين. لمن ينقاس بي الإصتراتيجيين وعلى وجه الخصوص العسكريين الكيزان ناس دأك قائد البحرية الاسبق والمصيبة السخيف جداً، جداً خالد الإعيسر..
مع دآ كلهو وتلقى ليك غفوة!! لي دقايق وينتهز العقل الباطن الفرصة ويدور يثبت نفسهو أنهو برضهو جزء من تكوين الجسد وينط ليك بي حلمة جميلة وهي بقصد التنافس مع العقل الواعي. فيقدم أشياء جميلة ومفرحة مغايرة للواقع المعاش والذي يتملكه العقل الصاحي..
فيقوم في لحظات تملكه على العقل. يعيشك في الخرطوم أيام أواخر الستينات وبدايات السبعينات وشارع الجمهورية مع بدايتهو من صينية كونتمخاليوس وفي طرفها سانت جيمس وتصدح منهو موسيقة الجاز وبعد بخطوات مخبز باباكوستا والسمون (العيش التوست) الماخمج ويستمر بيك الشارع عابرا شارع القصر على شمالك في نهايتهو هنااااك نصب الجندي المجهول وعلى يمينك القصر الجمهوري "قصر الحاكم العام الذي شهد إنتصار الثورة الوطنية على الإستعمار" ويستمر سفر شارع الجمهورية حتى أن يصل المحطة الوسطى في الخرطوم، حيث يلتقي ترماي بحري مع ترماي أمدرمان كما يتلاقي النيلين الأبيض الذي يتهادى في سيره من محطته الأخيرة قبل أن يصلنا من الشقيقة دولة جنوب السودان والأزرق المندفع من هضاب أثيوبيا الشقيقة الثانية. في تلاحم ووفاق عند مقرن النيلين ليكون نهرا عظيم إسمه نهر النيل مسافرا الي شمال البلاد، عابرا يحمل الخير والحب للشقيقة مصر..
حلم جميل عشته في تلك الغفوة ولكن الحقيقة أنها كانت حلم زلوط (قصتها لاحقة في الرد الجآي) ..
حلمةٌ أفسدوها ناس شعيط ومعيط (قصتهم لاحقة في الرد الجآي) وكباشي وياسر الني نطاطين الحيط وصحوني على حقيقة الحاصل..
نزوح للسودانيين وقصف وموت والإصتراتيجيين بقُبحهُم وخالد إعيسرهم..
ولكن هناك لمحة تخفف..
اللأشقاء في السعودية نفرة للعون ودولة جنوب السودان وتشاد ومصر يرحبون بالنازحيين. منظر يشاهد لأول مرة أن أهل العاصمة يهجرونها على غير عادتهم والتي كانت فقط أيام الأعياد حيث يتجه الأغلبين لزيارة أهله لأيام ويعود بعدها من جديد لبيته في الخرطوم الأمنة..
أنها حرب؟؟
ضنا فيها الأبناء على وطنهم
ولكن العزاء، أن فرد الأشقاء
أزرعهم بنا رفقاء...
وللمتحاربيين أقول؟؟
صوتي أنا
صوت قومي
صوتي وحدي
لا تتجنوا على سلبه مني
ولا تقولوا؛ أنكم بإسمي
أنا..
هذا الشعب السامي...

[بابكر مخير]

” زلوط” كان ديكا تمتلكه الحاجة ” ام الحسن” ويعيش معها فى منزلها وكان ديكا قبيح المنظر ضعيف البنية وكان الريش الذى يغطى جسده منتوفا و ممعوطا و مزلط ( ومن هنا جاءت التسمية ب زلوط)
ويحكى بانه ذات مرة كان نائما فى فترة الظهيرة فوق حبل كان منصوبا فوق العنقريب الذى كانت تنوم تحته الحاجة ام الحسن فى البرندة نظام تعسيلة وكدة واثناء نومه حلم بان جسده قد كساه الريش الكثيف الجميل الملون بكل الوان قوس قزح وانه اصبح اجمل الديوك فى الحلة وان جميع حسناوات الدجاج قد اصبحن يطلبن وده و يرتمين تحت اقدامه عسى ولعل ان يحظين بنظرة من عيونه الخرزية الجميلة بعد ان كانوا يتجاهلونه بل و يسخرون من شكله الممعوط , وبينما كان زلوط يمشى متبخترا كالطاووس ( فى الحلم طبعا) مستمتعا بنظرات الاعجاب والحب من اناث الدجاج و الحسد والغيرة من بقية الديوك , فاذا بصقر يهجم من السماء على الدجاج وصغار السواسيو وهنا انتفش زلوط بوصفه ديك حمش و حامى حمى الدجاج وتصدى للصقر واشتبك معه و افاق زلوط من نومه و احلامه الوردية على يد صاحبته ام الحسن وهى تمعط باقى الريش المتبقى فى جسده بعد ان سقط عليها و ايقظها ( مخلوعة) من نومها وهكذا كانت نهاية احلام السيد زلوط.
أما قصة شعيط ومعيط؟؟؟
https://www.youtube.com/watch?v=CEJkllBdtRM

[بابكر مخير]

قلتا وبما أنهو القصة كُّبر.
أني أكتب عن أبواتنا وهم الحكوا لينا عن أبواتهم الل هموا أجدادنا وفي بالي أغنية "جدودنا زمان، وصونا على الوطن، على التراب الغالي....."
وأنهو ليييه شاعرها موسي حسن،، رجع لي فترة الجدود مع أنهو الأبوات عطاهم كان مؤثر أكتر من أباء الاباء لأنهو تأثيرهو مباشر..
أتذكر أنهو الوالد عليه الرحمة وحتى ما أكون جاحد وهنانا أقول الوالدة والوالد ودونهما آي تفضيل أو تقديم أو تأخير، هم الوضوع لينا اللبنات الأولى في حياتنا، شبعونا بيها، قومية ووطنية، مساواة بين الناس مهما تباينت طبقاتهم الإجتماعية، فطمونا بكلمة سوداني بلا جهوية أو قبلية، ياهو كان ولد دارفور دخل حوش الرباطاب. زوج وقبلها كان قد صادق، رزق بنات وأبناء ولكن قبلها كسب إخوات وإخوة أحباء (Siters & Brothers in Law)، أب هو عمه وأمه هي خالته فما النسب والمصاهرة إلا البنوة لأناس غير أهلك البيلوجيين وعلى قول الإنجليز (Mother & Father in Law).
هؤلاء الإثنيان هموا الوروك الأدب والتأدب، المعاملة والمجاملة، الرقي والفهم، تطعم الأذوآق، كان حسية عند المأكل (كنش أمي ما في طعم أكلن بضهاهيهو) ولا كان كلمات، لمن تسمع شعر الحقيبة ال؟؟ لي حسي الشباب بغنوهو وهو الزرع فيك حسن الخلق وجمال الملبس وتجويد المظهر، ..
أتذكر وأنا بشتغل في شركة قرنفلي للأدوية، كُلفت بمهمة فيها سفر لي القضارف وكانت سبيلة السفر بالطائرة ومعناها تركب، حاجة كدآ إسمها دآكوتا وهي بي محركيين والحكمة أنها موافق عليها من هيئة الطيران العالمية وأنا غايتهو إن عليا؟! ما كنت بديها رخصة تتساق في الشوارع المسفلتة، بس في الدقداق لأنها من أول ما تركبها لغاية ما ربنا يسهلا عليك وتنزل منها، طولت كوكتك في دقاداق وكمان أديها خجة أما لمن تكون السفرية بيها وبالذات لي القضارف. فدآ معناها ترسل كفنك قدامك وقبل تركب تشهد والمعوذتيين..
لا وفوق دآ كلهو. أني بخاف من الطيارة بالجد ومن لحظة ركوبي "مرة سافرت من القاهرة لي نيويورك أقولها وما ببالغ، أنا ما رمشت خليك أقول غمتا وطوال الرحلة، شريط حياتي كلهو قدامي، يوم شنهو دآك كنتا كذبتا وفي يوما ما عرفهو دآك كتلتا ليا نملة وحساب وجمع وطرح والتذكر الدائم أني قريب من مكان الحساب الأعظم، مع أني مسلم ومؤمن باليوم والقضاء إن تم ممكن راقد في سيررك".
خوفي من الطيارة عامة هو كان سبب أني فكرت أسافر بالبص "ما هو العمر مش بعزئة" ويضاف الي هذا مطار القضارف اللهو مزنوق بين تلال والطيارة بتجي نازلة بي بوزها.....
https://www.youtube.com/shorts/bvnWqnEcRg0
"صورة مرفقة حديثة لكن برضهو توضح خطورة المطار نسبيا"، فتصور دآ كلهو وتكون رأكب دآكوتا "الصورة مرفقة"
http://sudanyat.org/vb/attachment.php?attachmentid=2334&stc=1&d=1683069439
....
نرجع للمظهر، أها كنت لابس بنطولن جينز، مخرم ولإخفاء الأخرام أتذكر إتعمل ليا في كل خرم شكل وردة.. أها أبوي قال ليا لمن شافني مارق:
الهياب تحت الثياب، ناسك الماشي تلاقيهم في القضارف، ما أظنهم حيحترموك، رجعتا وغيرتا ولمن مشيت القضارف إلتقيت بي أخصائي الأطفال هناك. وأول حاجة قالها ليا لمن عرف إسمي! إتا ود الدكتور أبراهيم قاسم..
مش بالله الحمد لله أنهو شكلي كان نظك، كان تبقى ليا وصمة ولأبوي نقطة سالبة...
وأخيراً "بالجد" كنت عايز أكتب عن "جدودنا زمان" بصورة مغيرة. لكن الأستاذ محمد حسن شوربجي لقيتهو منزل ليهو موضوع ظريف في (الراكوبة)...

.. ....
بس خلاص،
ما تنخلعو!! ما في شيتن تاني :cool:

[عبدالحكيم]

قلتا وبما أنهو القصة كُّبر.
أني أكتب عن أبواتنا وهم الحكوا لينا عن أبواتهم الل هموا أجدادنا وفي بالي أغنية "جدودنا زمان، وصونا على الوطن، على التراب الغالي....."
وأنهو ليييه شاعرها موسي حسن،، رجع لي فترة الجدود مع أنهو الأبوات عطاهم كان مؤثر أكتر من أباء الاباء لأنهو تأثيرهو مباشر..

بس خلاص،
ما تنخلعو!! ما في شيتن تاني :cool:


بس انت خلص والوطن لما يخلص بعد وهو يعيش هذه الأيام أقسى وأفظع حالاته لم يشهدها من قبل ولا حتى في أيام دحر الغزاة الأجانب ..
نسأل الله أن يحقن دماء أهل السودان ويحفظهم .. وأن يأخذوا بوصايا أجدادنا زمان وصون ترابه وتعزيز كرامة الإنسان السوداني وأن يكون الجميع جندالله جند الوطن ..
أيام دق فيها نحاس الحرب بين بني السودان دون مبرر تصارع فيها جملان لا جنرالان راح ضحية ذلك شعب بأكمله عملت فيه شتى أنواع الأسلحة قضت على الأخضر واليابس قتلى وجرحى ونازحين وهاربين من نيران تقاتلهما ..
قتلهما الله ومن أيقظ لظى الفتنة ..
رحم اله جدودنا زمان وحفظ شعب سودان الخير ....
حياك الله دكتور وحيا الله السودان وصان أرضه وشعبه ...

https://www.youtube.com/watch?v=l6NiHh763V0&t=2s

[بابكر مخير]

[QUOTE=عبدالحكيم;1197242]

((قتلهما الله ومن أيقظ لظى الفتنة ..
رحم اله جدودنا زمان وحفظ شعب سودان الخير ....
حياك الله دكتور وحيا الله السودان وصان أرضه وشعبه ...))
اللهم آمين
تشكر الحبيب صاحب الحكمة والرأي السديد
تعرف يا حكوم..
الحالة الإحنا فيها دي، ياهو سببها البشير، خلط الأوراق وأدي فرصة لي شذآذ الأفاق، بتنظيرهم القاصر، ينظروا وبي إستبدادهم يحكموا ويظلموا..
هو على أيتها حال ديمة الناس بتنسى قولة؛
ما دوامة وهي أصلها لو بتبقى ديمة لي زول، ما كان بتصل لي عند الغاصبين، الظلمة ، الرعاع واكلت السحت وقاتلي النفس التي حرم الله في الأشهر الحرم..
الله يعجل لينا بالفرج وبلدنا تنعم بي حياة رغيدة بعد عسر!؟ يبقآ بالحق يسر..

[بابكر مخير]

في عمرنا دآ؟؟
ما تعرف ياتهو فيهم البتعبك أكتر. هل هي الأمراض أم الادوية للعلاج ولا حكاية المواعيد البقت في الاسبوع مرات ومرات..
تلقى المرض حاجة مع العمر حتمية الحدوث، يعني الركب ببقن ما الياهن، الضهر الفقرات بقن متلاصقات ولا التقول مصطفات لي صلاة، حتى فرقة توقف أبليس ما في ولا كمان يعني اليدين براااااااااهن التقول بيطبعو في الكيبورد مرافعة محامي ولا سناريو فيلم يتخبطن.
أها دي هي القصة الأصلن معروفة ولابدن منها لكن المصيبة أنك، عشان مشكلة القلب يدوك أدوية تخفف لزوجة الدم ويبقآ ليك هم براهو، إن إتجرحتا وقف ليا النزيف :mad: ولو مشيت دكتور السنون عشان الضروس بقن إتفتفتن براهن، ما بيقدر يشيلهو ما أخصائي القلب قال ممكن وقيف الادوية دي ممكن عمل جلطة دم وذييييييد على كدآ الاسبرين لبقآ للواحد ذي سجارة بعد فطور رمضان.
هيي صحي؟؟ ما حسي ليا خمسة شهور "خمسة وخميسة في وش الحساد" موقف السجاير، طبعا بعضهم يقول ليك: بطلت التدخين وهذه أنا ما بقولها، تحسبا لو النفس ضعت ورجعتا أظهر أني كضاب ولي الحقيقة خرمة بس ربنا يقويني وأركز:).
أها كمان الشغلة البقينا فيها والتقول بس شغال دوام كامل. ما الياها مواعيد الدكاترة والمستشفيات، كترن علي خلاااااص لمن عملتا ليهن بورد
http://sudanyat.org/vb/attachment.php?attachmentid=2336&stc=1&d=1683318652
تلقى مواعيدك مع الدكتور ويقول ليك، بس تعمل ليا فحص دم عشان كدا وكدا وحولتك لي أخصائي القلب ودآك بي دورهو يقول ليك أعمل ليا رسم وصدى وعينة وفي نفس الوقت دكتورك يحولك لي العلاج الطبيعي ودي شبكة بس ربنا يحلك..
مع الدوامة دي وقلتا أمشي أغير شوية، مصر ولا هولندا ولا حتى ليفربول أزور شقيقي الاكبر عبد المنعم سعد الدين "برات" لكن ويين ما هو إن ما باكر! أكيد بعد باكر في مراجعة وكمان بقوها يوم السبت ناس دكتور الاسنان والعلاج الطبيعي شغالين.
غايتهو بس البركة في الBank holday بتدي الزول جمة...
معليش شغلتكم معاي والأيام دي الناس براااااااها متنشنة...
اللهم فرج علي السودانين بعد الكد والكبد

[بابكر مخير]

مع أني وصفتهو بي حاجة ثقيلة، لكن يدهشني في أحيان وأحيان كُثر بإشراقات.
في مرة ذكرتا من فضايلهو؟!
الإهتمام الذي تحظى به في أوكات كتيرة، منها مجانية الترحال بالبص والقطارات المحلية من متحركة في باطن الأرض وعلى سطح المهيلة والحكمة لو كنت لُّجنة فبينعموا عليك بأن تترحل بسيارة الأجرة المعروفة بي Black Cab (قصتها جاية) بالمجان ودآ من ناحية الإمتيازات، لا كمان علاج الاسنان والنظر وطبعا علاج الاسنان دآ الواحد من صغار السن. لو لقآ بشتري ليهو شهادة ميلاد من شدة غلاتهو وغلاوتهو. وهناك العديد من الإعانات المادية نقداً والعينية والإجتماعية ودي قصدي أنهو كيف المجتمع بيتعامل مع أصحاب الأعوام المتراكمة عددا.بعضهم يختك مع أصحاب الهمم "دي التسمية في الامارات للمعاقين" فتلقى أماكن مخصصة لهاتيين الشريحتين من المجتمع مع السيدات الحوامل.
وحلات الكُبر تتجلى هنا وكيييييف لمن تدخل في وسيلة الترحال كل الجالسين ممن هموا دون هذه المرتبة الملكية والرئاسية "ما الملك تشارلس الثالث قريب مننا كدفعة والرئيس بايدن فايتنا دفع" تلقاهم طابور شرف واقفيين لك عشان تجد معقد وثير ويترك لك حرية الإختيار..
من الإشراقات الما بيحسوا بيها البعض هي أنك بتترتح ودون ما تكون أخدتا ليك بقة كحول وبالمناسبة الترتيحي "الترنح" ليهو لذة خاصة. فتصور أنك تكون بين السقوط والإستقامة، بين غياب الوعي واليقظة التامة، بين أنك تكون ذي ما بين البندال pendulum والعمود الركيزة..
كدي قبال ما أنسى أرجع لي قصة Black Cab
يعتبر من المعالم الرئيسية لشخصية العاصمة البريطانية وكان يشاركهو البص أبو طابقيين لكن دآ مع إحتفاظهو باللون الاحمر، إلا أنه تخلى عن شخصيته التراثيية وبقآ ذي باقي الباصات الحالية، صندوق مقفول بعد أن كان الدخول والخروج له ومنهو دون باب أتوماتيكي، بذكرني "السمع" وهو الترماج أو الترماي في السودان ودآ ليا معاهو ذكرى لا تعرف تقول جميلة ولا رهيبة أو مخيفة، فالجميل أني لي حسي عايش والمخيفة أنهو صدمني.
أتذكر زمان الوالد يكون بيحكي في حاجة ويقوم يخرم لي قصة تانية، تقوم مدون عليها الرحمة، تقول ليهو: هيء كدي يا أبو قاسم، تم لينا القصة. رحمهما الله أجمعين.
عشان كدآ نقوم نرجع لي الBlack Cab..
يا أخي أوفر ليكم وذي ما بيقولوا؛ الغنا حلو في خشم سيدهو وأهو معاكم الويكيبديا، يغني ليكم :cool:
https://en.wikipedia.org/wiki/Hackney_carriage#History

[عبدالحكيم]

في عمرنا دآ؟؟
ما تعرف ياتهو فيهم البتعبك أكتر. هل هي الأمراض أم الادوية للعلاج ولا حكاية المواعيد البقت في الاسبوع مرات ومرات..
تلقى المرض حاجة مع العمر حتمية الحدوث، يعني الركب ببقن ما الياهن، الضهر الفقرات بقن متلاصقات ولا التقول مصطفات لي صلاة، حتى فرقة توقف أبليس ما في ولا كمان يعني اليدين براااااااااهن التقول بيطبعو في الكيبورد مرافعة محامي ولا سناريو فيلم يتخبطن.
أها دي هي القصة الأصلن معروفة ولابدن منها لكن المصيبة أنك، عشان مشكلة القلب يدوك أدوية تخفف لزوجة الدم ويبقآ ليك هم براهو، إن إتجرحتا وقف ليا النزيف :mad: ولو مشيت دكتور السنون عشان الضروس بقن إتفتفتن براهن، ما بيقدر يشيلهو ما أخصائي القلب قال ممكن وقيف الادوية دي ممكن عمل جلطة دم وذييييييد على كدآ الاسبرين لبقآ للواحد ذي سجارة بعد فطور رمضان.
هيي صحي؟؟ ما حسي ليا خمسة شهور "خمسة وخميسة في وش الحساد" موقف السجاير، طبعا بعضهم يقول ليك: بطلت التدخين وهذه أنا ما بقولها، تحسبا لو النفس ضعت ورجعتا أظهر أني كضاب ولي الحقيقة خرمة بس ربنا يقويني وأركز:).
أها كمان الشغلة البقينا فيها والتقول بس شغال دوام كامل. ما الياها مواعيد الدكاترة والمستشفيات، كترن علي خلاااااص لمن عملتا ليهن بورد
http://sudanyat.org/vb/attachment.php?attachmentid=2336&stc=1&d=1683318652
تلقى مواعيدك مع الدكتور ويقول ليك، بس تعمل ليا فحص دم عشان كدا وكدا وحولتك لي أخصائي القلب ودآك بي دورهو يقول ليك أعمل ليا رسم وصدى وعينة وفي نفس الوقت دكتورك يحولك لي العلاج الطبيعي ودي شبكة بس ربنا يحلك..
مع الدوامة دي وقلتا أمشي أغير شوية، مصر ولا هولندا ولا حتى ليفربول أزور شقيقي الاكبر عبد المنعم سعد الدين "برات" لكن ويين ما هو إن ما باكر! أكيد بعد باكر في مراجعة وكمان بقوها يوم السبت ناس دكتور الاسنان والعلاج الطبيعي شغالين.
غايتهو بس البركة في الBank holday بتدي الزول جمة...
معليش شغلتكم معاي والأيام دي الناس براااااااها متنشنة...
اللهم فرج علي السودانين بعد الكد والكبد

آه يا دكتور ..
من بعد السلام ... طبعا ..
علل المت بي كالذي ذكرت الا من القليل كالتدخين فلم اكن اتعاطاه البتة وقد عافاني الله وعفاني منه فلا ادري له طعم ولا ذائقة او حتى كيف يتكيف له متعاطيه وحين اشمه من راحته اصاب بالضيق في التنفس وافر منه ..ولا اعرف انواعه ولا حتى اسعاره وبهذا حققت وفرا ماديا واقتصاديا لقضاء بعض ضروريات الحياة بدلا من تذهب ادراج الرياح في شكل دخان ( ثُمَّ اسْتَوَى إِلَى السَّمَاء وَهِيَ دُخَانٌ ) لذلك كان التدخين وويجد الكثيرون صعوبة في الإقلاع عنه وأنت دكتور وفيه علل وما يقرأ على علبته التدخين ضار .. عافى الله متعاطيه ...
الشاهد يا دكتور قولك :ـ
في عمرنا دآ؟؟
ما تعرف ياتهو فيهم البتعبك أكتر. هل هي الأمراض أم الادوية للعلاج ولا حكاية المواعيد البقت في الاسبوع مرات ومرات..

منذ سنين عددا اتناول أدوية السكر (انسولين ) والضغط وحبة الاسبرين وغيرها حتى مللت هذا الوضع وقررت (شوف قررت دي ) من نفسي وفجأة زهجة يعني أن أوقف كل هذه الأدوية وفعلا خمسة شهور لم اتعاطى أي دواء ما بعرف إن كان كجارا أو زهجة أم ماذا وكنت بيني وبين نفسي أه أنا عايش ولم اشعر بشيئ بعد التوقف عن تناول اللأدوية وانا ماشي ...
فكان التنبيه الأول من ملابسي وبنطالي صرت لا البسها دون حزام وفي اصغر مقاساته ..
التنبيه الثاني ممن هم حولي من الإخوة ماذا حصل لك ايها الرجل نقصت النصف ..
والتنبيه الثالث حينما أنظر في المرآة (المراية) وقد اكتسى وجهي شحوبا وتجاعيد في الوجه والرقبة خاصة .. وتناقص ملموس في وزني
عندها انتبهت ورجعت للدكتور وصرف لي أدويتي وانسوليني ورجعت من كجاري ومعاكستي لروحي وتذكرت قوله تعالى (وَلاَ تُلْقُواْ بِأَيْدِيكُمْ إِلَى التَّهْلُكَةِ ) ..
فوصيتي لا تنازع المرض وحاول أن تتداوى فما من داء الا وضع الله له دواء ..
قوله صلى الله عليه وسلم : «تداووا عباد الله، فإن الله عز وجل لم ينزل داء، إلا أنزل معه شفاء، إلا الموت، والهرم».[2] أي ضعف الشيخوخة، ونقص الصحة، فإن ذلك يقرب من الموت، ويفضي إليه، وفي رواية “إلا السام” والسام بتخفيف الميم الموت، أي المرض الذي قدر لصاحبه الموت منه، فلا دواء له.[3]

إذن هو واقع علينا التعايش معه وما بنا من علل ورغم الثقيل هذا ..
ومعذرة على الإطالة وهذه تجربتي ..
ونسأل الله لنا ولكم الشفاء من كل داء ..
https://www.youtube.com/watch?v=4PLhGRJPNec&t=10s

[بابكر مخير]

آه يا دكتور ..
من بعد السلام ... طبعا ..
علل المت بي
(سلامتك من كل شر)


ونسأل الله لنا ولكم الشفاء من كل داء ..


حكوم الحبيب
حسب رأي أنهو في فرق بين المرض والعلل وبون شاااسع بين الاتنين...
بيتعرف الكُبر أنهو أمراضهو كتيرة ومتنوعة، منها المستعصي والما ليهو علاج ومنها العلاجهو ياهو بالكّيِ بي أنواعهو من تعطيل للأجزاء المريضة وهي مع العمر بتكون كتيييييرة أو إستئصالها وصعب أن يستعاض ببدائل لأن قدرت التحمل مع الكُبر لأيتها جسم خارجي أن يتأقلم ويتعايش مع المتهالك من خلايا أو أنسجة غير واردة في أكثر الاحيان..
المرض دوما يربط بالاعضاء في الجسم، من أعلى قمة الرأس، نقول مثلن "الصلع الموضعي" الذبيبة، مرورا بالقلب وضعف عضلاته والشرايين وتراكم الدهون والرئة وأمراضها وحتى الحاجب بين الجوفيين العلوي والسفلي تصيبه بعض الامراض ومنه الي الاسفل الامعاء وأمراضها الكثيرة، الي ضعف الكلاى والبروستات آفة الكبر الالازمة الحدوث والي الاعضاء الطرفية من يدين الي رجلين، ناس ركب ومفاصل وغيره... هذه أمراض وهي التي تأتي على غير رغبة ودون باعث داخلي. ما هو يعني بتمرض بالكتير من الامراض ما بس لانك بتسجر ولا بتلعب قوى.
لا؟؟
لانهو في عامل ما ليك يد فيهو، مثلن نقول الجينات والحمض النووي ولا سكنك في منطقة ضارة أو عوامل بيئية وضعف الغذاء يعني كتيرات العوامل الخارجية والتي يقف على قمتها والأشدها بطش الا وهو الكُبر..
أما العلل فيمكن النظر اليها بمنظور الأصحاء من محبين وعشاق واصحاب كلمة، فلا بينها علل عضال لأن حلها هو نفسي ومعنوي ولست بالقطع أو البتر أو الكيء ...
شوف الناس الشفيفة بتقول شنهو عن العلل:
من صغري تعبان وأحس
كل يوم تكبر علتي
ما بيّ حيل اصبر بعد
والدنيا شلت حالتي
بنيران وبهم دنيتي
هالقلب كم مرة انكوى.......
____________
عليل يا ربي وأنت الطبيب
عليل يريد دوا للذنوب.
فكيف السبيل إلى أن أتوب
وتمحى الخطايا.
وتصفي القلوب

[عبدالحكيم]

حكوم الحبيب
حسب رأي أنهو في فرق بين المرض والعلل وبون شاااسع بين الاتنين...
بيتعرف الكُبر أنهو أمراضهو كتيرة ومتنوعة، منها المستعصي والما ليهو علاج ومنها العلاجهو ياهو بالكّيِ بي أنواعهو من تعطيل للأجزاء المريضة وهي مع العمر بتكون كتيييييرة أو إستئصالها وصعب أن يستعاض ببدائل لأن قدرت التحمل مع الكُبر لأيتها جسم خارجي أن يتأقلم ويتعايش مع المتهالك من خلايا أو أنسجة غير واردة في أكثر الاحيان..
المرض دوما يربط بالاعضاء في الجسم، من أعلى قمة الرأس، نقول مثلن "الصلع الموضعي" الذبيبة، مرورا بالقلب وضعف عضلاته والشرايين وتراكم الدهون والرئة وأمراضها وحتى الحاجب بين الجوفيين العلوي والسفلي تصيبه بعض الامراض ومنه الي الاسفل الامعاء وأمراضها الكثيرة، الي ضعف الكلاى والبروستات آفة الكبر الالازمة الحدوث والي الاعضاء الطرفية من يدين الي رجلين، ناس ركب ومفاصل وغيره... هذه أمراض وهي التي تأتي على غير رغبة ودون باعث داخلي. ما هو يعني بتمرض بالكتير من الامراض ما بس لانك بتسجر ولا بتلعب قوى.
لا؟؟
لانهو في عامل ما ليك يد فيهو، مثلن نقول الجينات والحمض النووي ولا سكنك في منطقة ضارة أو عوامل بيئية وضعف الغذاء يعني كتيرات العوامل الخارجية والتي يقف على قمتها والأشدها بطش الا وهو الكُبر..
أما العلل فيمكن النظر اليها بمنظور الأصحاء من محبين وعشاق واصحاب كلمة، فلا بينها علل عضال لأن حلها هو نفسي ومعنوي ولست بالقطع أو البتر أو الكيء ...
شوف الناس الشفيفة بتقول شنهو عن العلل:
من صغري تعبان وأحس
كل يوم تكبر علتي
ما بيّ حيل اصبر بعد
والدنيا شلت حالتي
بنيران وبهم دنيتي
هالقلب كم مرة انكوى.......
____________
عليل يا ربي وأنت الطبيب
عليل يريد دوا للذنوب.
فكيف السبيل إلى أن أتوب
وتمحى الخطايا.
وتصفي القلوب




تشكر على التوضيح والفرق بين المرض والعلة ..
يعني العلل دي الواحد يجلبها بنفسه لي روحه ..
والمرض ده يجيك دون استئذان ويعلك ..:) من الطبيب ..
وبعد يجيك الثقيل تقوم تكوس لي دواء الذنوب ..
اللهم الطف بنا وامح ذنوبنا
وأصلح قلوبنا ..
واملى جيوبنا ..
وعمر بيوتنا ..
ونور قبورنا ..
وقت يكمل عميرنا ..

[بابكر مخير]

وأصلح قلوبنا ..
واملى جيوبنا ..
وعمر بيوتنا ..


حكومي العزيز
الفوق دآ كلهو كويس
إلا التحت دآ
بيمسح كل الفوق

اللهم الطف بنا وامح ذنوبنا
ونور قبورنا ..
وقت يكمل عميرنا ..

ما هو لمن نمشى منها، شن فايدة مليان الجيوب وصليح الحال وعمِّر البيوت..
خيلاني المصرييين قالوا:
الكفن ما لهوش "قيوب" ومن الزالية مانا شايلين التكتحة...
حكومي عندك معلومة عن كلمة التكتحة؟؟
التكتحة، الكتاحة والهبوب
نبداها في الشرح بي قولة: جيشنا ما عندهو التكتحة ومع دآ بيجيب الكتاحة
التكتحة؟؟
أنا غايتهو ببني مرجعي فيها وعلى حسب ظني. قولة، وانا ما مستحضرها للشيخ فرح ود تكتوك وأفتكر كلمة تكتحة مرجعها لكلمة الكتاحة وهي متعارف عليها بأنها عاصفة رملية وفي بعض الاحيان يكون لونها مايل للإسوداد وظنيتهو بسبب "التراب" لست الرمل لكن المخلوط بذرات طين البحر وهو صاحب لون غامق أقرب للإسوداد.
كما يذكر أنهو عندنا في السودان مسميين لمثل هذه العواصف.. رملية كانت أو ترابية؟؟
كتآحة وهبوب...
إلا أن الكتاحة هي مملوءة دوما بالكثير من الرمل مصطحب بكم من أوساخ المناطق التي تعبرها؟ ناس كوشة وأوساخ مخلفات الحيوانات قول بعر وقول أوساخ بيئية وطبيعية الخ... وهذ عكس التكتحة التي ترمز للعدم
أها جيشنا دآ وما نظلمهو فقد أفقره الكيزان عن قصد ليقلموا آظافره ويصبح فزاعة للشعب دون قدرات يضاهي بها جيوش العالم ولا حتى الاقليمية. فآلياتهو قديمة الصنع ورغم ذلك يثير كتآحة بتحريكها وبقذائف طيارتهو قليلة العدد والعتاد فيثير الغبار وتبقى الكتاحة .. وبرضهو ما عندهو التكتحة........
والشيء بالشيء يذكر؟؟
قصة الهبوب دي كمان أمرها ما مفهوم ذي حكاية جيشنا دآ.. فالجيوش معروف هي الدفاع عن الوطن وحماية حدودهو. إلا جيشنا الديمة عايز يحكم وبالسلاح والزندية لتمكين حوكمهو.. فالهبوب حسب المعاجم العربية هي: ريح مثيرة للغبار يعني كتاحة وفي نفس الوكت بنقول في الغنا: هبت نسايم الليل بقصد تصوير أنها عليلة كالنسيم...
وهذا يشابه قولة:
جيش واحد، شعب واحد فهو مثل الهبوب ضرارا ولكن كمان هو حقنا ومننا فيصبح الإحساس نحو كالتمتع بالنسايم، بحكم العاطفة القومية والوطنية....
وللزيادة في المعرفة؟! هذا منقول.....................
اللهجة السودانية Sudanese Dialect
@SUDAN000000
#كُبتة
هذا المصطلح والذي يعني #الكتاحة، اعتقد انه محلي وخاص بالشمالية. لم يذكر قاموس عون المعنى، ولكنه اورد شاهداً لكلمة كبتة بمعنى الخمر... ولكن الشاهد يدل على ان المقصود هي الكُبتة بمعنى الكتاحة
الشاهد: قال المنصوري (وأعلم إنو قدامك هبايب وكُبتة المناصير في الشمالية)
[/B][/SIZE]

[بابكر مخير]

في عمرنا دآ؟؟
ما تعرف ياتهو فيهم البتعبك أكتر. هل هي الأمراض أم الادوية للعلاج ولا حكاية المواعيد البقت في الاسبوع مرات ومرات..


ويستمر المسلسل والحكمة أنهو في حياتي ما حاولت أغني ولا حتى أعزف في آلة موسيقية.
أتذكر أيام الجامعة في تشكوسلوفاكيا كنا ثلاثي أصدقاء؛ أوليفر أكوبايوو "نيجريا"، جورجس مجارآ "روندآ" وأنا.. جمعنا الفن الغنائي ولي درجة أننا في إجازتين
بتاعت الكريسماس. ذهبنا لي قرى مجاورة لبراتسلافا وبدعوة من مجموعة موسيقية. أوليفر كان الفنان هو حافظ الغنا بالانجليزي (من أولاد الذوات في بلدهو وأهلهو مريشين وعايزين في إنجلترا) جورجيس كان طويل ونحيف وكان راجل لبيييس ورقاص ممتاز وهو يقوم بالرقص أثناء غناء أوليفر. أما شخصي خالي الوفاض من غرفان شيتن من نهر الغنا، كانت مشاركتي بأني كنت مدير أعمال الفرقة ومرة مرة كدآ بشارك في الجهد بأني "أعرض" أو أرقص "المردوم"..
من الذكريات برضهو الفنية في أيام الجامعة أني كنت ممثل الطلبة الافارقة في مكتب الطلاب في داخلية هورسكي بارك وفي إحتفالية قلنا نشار وكان وقتها معنا كوكبة من الصيادلة مبعوثيين من كلية الصيدلة جامعة الخرطوم للتخصص، عبد العظيم، عثمان وقاسم.
دكتور عثمان كان راجل فنان فخلق من مجموعتنا الطلبة فرقة "كورال راقصة" وقدمنا عرض جميل أخرجه عن قصة العبودية في أمريكا وبمصاحبة أغنية سام كوك chain gang ....

https://www.youtube.com/watch?v=PRyDlVOE86U

ذكريات جميلة، دشرت في مخيلتي وأنا في هذا اليوم والود يعني خلاص هاميهو صوتهو، خضعت لي عملية جراحية لإزالت ورم في الحبال الصوتية.
مع العلم بأني ما ليا في الغنا وشنهو يعني لو صوتي بقآ صهيل خيل (horse neighing)

http://sudanyat.org/vb/attachment.php?attachmentid=2337&stc=1&d=1685132718

ولا تغريد كنار....

[عكــود]

سلام حبيبنا وألف سلامة وربنا يجعلها كفارة ليك.
ذكرياتك عن فترة الدراسة في تشيكوسلوفاكيا، جميلة وتوّرت ضرس ذكرياتي في رومانيا.
ياخي كتاباتك ممتعة حتى وإنت تحكي عن وعكاتك، ربنا يحفظك ويمتعك بالصحة والعافية :cool:

[بابكر مخير]

سلام حبيبنا وألف سلامة وربنا يجعلها كفارة ليك.
ذكرياتك عن فترة الدراسة في تشيكوسلوفاكيا، جميلة وتوّرت ضرس ذكرياتي في رومانيا.
ياخي كتاباتك ممتعة حتى وإنت تحكي عن وعكاتك، ربنا يحفظك ويمتعك بالصحة والعافية :cool:

ما عندي ليك رد، غير أنك عارف أكيييييييد مدي إجلالي ليك ومحبتي الخالصة..
يا حليل فطور رمضان الذاكرتهو منقوشة في القلب. كما "فِي خَزَائِنِهِ عَسْجَدٌ وَدُرٌّ وَيَاقُوتٌ"....
قلتا ليا الذكريات تورت الضرس؟؟
لكن الضروس ما خشم بيوت..
إتا يابا ضروسك حقات اللبن وياهن إلات عقل وإحنا ديك كانن طقم عضم وبدون عقل...
كوكي الحبيب :biggrin:

[بابكر مخير]

تخريمة بعيدة من حكاية " يا أخي الكُبر دآ حاجة ثقيلة بشكل" وإن كان في رابط ;);)!!
البَدروم والخلوة..
في الخلوة يخلو الذهن من شوائب وأفكار مزعجة ولهذا أخذ المتصوفة "الجّد طبعا مش المتعطرين والمتزينين" مكانن ليهم يعيشوا فيهو مع أنفسهم وتصفوا أفكارهم ويفكروا بعمق في الأمو، كما أن الخلوة دائما تكون في مكان منعزل وحتى إن كان داخل البيوت..
البَدروم من ناحية معمارية مشابه للخلوة فهو حتى في داخل البيوت يعتبر مكان نائى وفيه ميزة الإبتعاد عن الضوضاء وخوطة البيوت العادية من أصوات بشر أو أجهزة إلكترونية أو ميكانيكية..
هذا التشابه بين الموقعيين ديل وبرضك التشابه في الهدوء وخلو المكان من معكرات المزاج أو دواعي الملهاة العادية أو حتى التي تقترب من الموبغات، إلا أن البعض يتخذ من البدرومات بؤر لمناشط مختلفة ومتباينة في ما يحدث بها عكس الخلاوي "والله أعلم". طبعا حكاية الفلقة والجلد والربط بالحبال دي في الخلاوي يقولوا ليها دواعي علاجية :eek:..
الفكرة في التشابه بين البدروم والخلوة هندسيا وجغرافيا في المباني وما هو بينهما من تباين، إلا أنه في الحالتين إن في زول إنقفل في خلوة أو بَدروم فهو يخرج بشخصية أكثر تماسكا في رؤيتها، ناهيك إن كانت إنجذاب أكثر نحو الترابط الروحاني عند الصوفية أو بافكار شيطانية وهذا التباين مرتبط بالذات. وهذا يحكم بما كان الإختلاء في آي من المكانيين سببه أو القصد منه؟
في أمر الخلوة، نمسك على سبيل المثال بعض أهلنا الصوفية لمن يمرق من الخلوة في وشيهو يكون كم هائل من الإشعاع الروحي مرسوم بشكل واضح ويمرق بأفكار ورؤى وصل اليها بسبب أن قصده من الاول أن يعرف ويقراء ويتبحر في مقصده.ز
أما العزلة في البَدروم وكما قلنا أسبابها (بؤر لمناشط) بقصد أو صدفة..
وعن العزلة في البَدروم، يجب أن لا تمر علينا حالة مجموعة برهان، كبش والنيء ياسر ويلاحظ أن إتنين من هؤلاء خرج من العزلة وهما أكثر شراسة في التصريحات وكأن الذي كان يدور بينهم شديدة نكد "بتاعين المزاج بيعرفوا المقصود شنهو" مخلوطة بي برانويا وعداء مستعير لأنفسهم وكل ممن حولهم، فجاء البرهان ببدعة معادة هيئة الأمم المتحدة وإنكار مبعوثها وجال النيء ياسر وسط مجموعة من العسكر، يهز عصاته ويتوعد "رغم طول المدة والوعد بمحو الدعامة، إلا أن الوعد لم يتحقق وما ظنيتهو قريب يبقا". إلا أننا لا نكابر على أن عزلة البَدروم لم تأت بنفع، أبدن والله عبد الفتاح بتاعنا لونهو قرب من عبد الفتاح بتاع شمال الوادي
لمن صعب عليه قراية المكتوب في الصورة " البدروم مبيض البشرة"
http://sudanyat.org/vb/attachment.php?attachmentid=2338&stc=1&d=1685275838

[بابكر مخير]

مع الكُبر، الواحد شبكاتهو بتتداخل، يعني حاجة قدامك عديييييلة، ذي قولة واحد زايد واحد بساوي إتنين..
أها تقوم تقول مقصود بيها شنهو يعني حكاية واحد زايد واحد، هل هي مقصودة ولا ليها تفسيرن تاني.
تقوم يا زول تمخمخها في رأسك وتتناولها بأوجه عديدة تانية.
الواحد دآ لو زول يعني؟
في الحالة دي بيبقوا زولين:eek:
طيب نقول واحد زول وواحد حمار؟
كمان هنا دي قصة تانية ما حتى لو السما والارض إنطبقوا، ما حيكونوا إتنين، ما النوع مختلف، إلا أكان قاصد البرهان وحمار!
كدآ بيبقوا حماريين:L
وأنا حسي؟! قمتا مخمختا حكاية مندوب "الواحد" الرسلهو لي تركيا ونفس اليوم وافق البرهان والعسكر واللجنة الأمنية والفلول على أن الهدنة لمدة 24 ساعة وإيقاف الحرابة..
لو كان حميدتي (واحد تاني) هو الماسك الحكومة، كان قلنا أنهو في شحنات دهب متجهة شرقاً..
لكن بما أنهو "الواحد" الشكل مع الحمار إتنيين، هو الماسك تلابيب الأمر وخانق القصة لمن مفطسها، بيبقآ في قصة تانية هيا الموقفيين ليها الحرابة وفاتحيين ليها الطرقات..
طيب في شنهو يابا (دآ أنا لي أنا)..
يكون (بشة) قد وافقت تركيا على أن يقيم فيها وهذا كان لب زيارة ممثل "الواحد" وعليه فقد تم تهريبه شمال شرقا...
ما أظن في زول سبقني على هذه المخمخة والتي إحتمال صحتها موثوق وبالظبط يساوي الواقع، مثلما واحد زايد واحد؟؟
يساوي إتنين:gap::gap::gap:

[بابكر مخير]

الكُبر محيي الجماليات وخالق المواهب.
ذي ما ذكرت مسبقاً؟ أنا والغنا بعد علو السموات السبع من عمق الأراضي السبع.
إتصور كييييف هذه المسافة وبعدها والسؤال بعد الممات. ما هو قالوا؟
حين تسأل.. إن لم تجاوب أو كذبت. يضربك الملائكة "والتي هي رحيمة عكس الأبالسة" ويغفس بيك أولن الي الأراضي السبع دون مستوى البحر، ثم تطير الي السموات السبع ويتمر الحال طول الوكت.
عشان هذا الأمر والذي لساتهو الكاذب والعاصي للإجابة حيدخل النار وسعير النار وحرقة كل ما يخلق جلد يحرق. يبقآ أحسن حاجة ولتلافي كل هذا..
خت ليك قروش من مالك المكتسب ولمن تمر عليهو 12 شهر وبالنسبة المعروفة حسب دائرة الزكاة وإن بقيت موظف كحيان، نصيحتي ما تبقآ تتذاكاء وتدكن ليك قروش لأنهو مرور الحول عليها تستوجب الزكاة والنصيحة أن يصرف ما في الجيب الي أن يأتي ما في الغيب وصلي أوكات مع عدم التقصر فيها والصوم لأنهو ركن هام وللذين هم أصحاء، ففيه إنتظام وللمرضى من إستطاع سبيل فأجره عظيم والحج لمن إستطاع اليه سبيل ولمن لم يستطع فكتر خير خادم الحرميين والدول من خلال بعثات الحج وما ننسنا الوالديين لإستطحاب القصر والجنا للوالدين فكلهم مسهل والحكمة أنهو بيكسب برضك أجر وقبل هذا وذلك تشهد بأن الله لا إلاه إلا الله وأن محمد عبده ورسلوه..
القصد من هذا الإرستسال هو وصف بعدي من الغناء لعدم الموهبة ولكن؟؟؟؟؟
الكُبر جعل من صوتي به بحة وكم من بحة تخلق إطراب وتحسين في الترنيم ومتعة في الإستماع وهناك العديد من فنانينا بحتهم جميلة ذي عبد العزيز المبارك الله يرحمه...
وبهذا أحييا الكُبر هذه الموهبة ومن الجماليات التي لا تكون إلا بنعمة لله حين يخلق الانسان وهي في العيون مما جعل الشعراء قديما وحديثا تغنوا بها ولها!!
إِنَّ العُيونَ الَّتي في طَرفِها حَوَرٌ........... قَتَلنَنا ثُمَّ لَم يُحيِينَ قَتلانا
يَصرَعنَ ذا اللُبَّ حَتّى لا حِراكَ بِهِ ....... وَهُنَّ أَضعَفُ خَلقِ اللَهِ أَركانا
هذه النعمة حتى وإن لم تكن ولدت بها، إلا أن الكُبر "يصيبك" بها وهنا الطرافة في الامر، فهي تأتيك بسبب تجاعيد صابت الوجه من الكُبر أو مرض صاب العيون من ناس بتاعت الكُبر منها الجفاف والجلكوما والتركوما والهلما جرآ

[بابكر مخير]

إبنتي الغالية، العزيزة والحبيبة بدور التركي...
في كل سطر وجدت ذكري. لأن الوصف يطابقني..
أسمحي لي بمشاركة "كبرتُ كثيراً أبي" كما أني شيرتهو في الفيس بوك...


كميات الردود والمشاركات طوال هذه السنيين العديدات من عمري ووواسع المساحات التي شغلتها في سودانيات أورغيها ونتها..
تلخصت في هذه الصفحات ال162؟! معنى ومفهوما، سردا وقصا وحكيا ووصفا...
جميل الحكي ليقال عنه في خشم سيدهو، الذي يعرف كيف يرط الحروف فيجعل الكلمات، تنزل بردا ولألئ في قلب القارئ قبل أن تراها عيونه.. والأعجب هو التعقيب على هذا الكتاب (عزيز/تي من يقراء أو تقراء.. الكتاب هو في الرابط.. متعو وشيء عجيب
https://www.facebook.com/permalink.php?story_fbid=571845225138783&id=100069399327336&ref=embed_post

[بابكر مخير]

وكل مرة بنقول؟؟
متلازمات الكُبر، بتتصور أنك أفهم زول وأعلم زول وأكتر زول وطني وقومي...
وممكن "إستراتيجي" ههههه ما ذي ديك البيظهروا في القنوات العربية..
المهم؟؟
انا دآك؟
شايف أنهو لمن؟؟
ربنا يعيد السودان أرض ويرجع الشعب ليهو..
فبفتكر رغم ما صاب وما حاك، فهذا يمكن أن يكون لي خير؟؟
والوكت دآك نقوم بي ثورتنا أحنا على ناس إحنا..
يرجع الناس بروح تانية.. أولن التخاوي ومسح الفرقة الكانت وأدت للحصل..
يرجعوا الناس ذي جدودنا، زول الطورية يمسك طوريتهو ويزرع، زول السعية يمسك الأنعام ويرعها، زول القلم، يفتح فصول وزول العلاج يلزم عيادتهو.
بلد يكون أمن، عسس ظاتهو ما عايزيين وعسكور ما يكون ليهم سبب، حتى في الحدود ما في ليهم لزوم..
لأننا حنكون إحنا بي روحنا ولي روحنا، ودانيين صرف، البيجي مار بنخليهو اليمر وإن قال عايز يقعد. بنخت ليهو الشروط، ضيف وما ليك في أمر البلد شيء.
يكون لبسنا واحد وركوبنا واحد، لقمتنا من الفتريتة والدخن والدرة وشرابنا من النهرين ونهر نلينا، من حفايرنا وأبارنا.. نستغل ثوراتنا والبفيض؟؟؟، ينباع ويتخزن تمنهو لي الأجيال الجاية..
كلهو ممكن، ما هو شوف الصين بعد متعاطيين أفيون، راقديين، مساطيل سجمانيين لي أكبر دولة مصنعة من الإبرة لحاملة الطيارات، وشوف اليابان، هدوها الإمريكان وقامت عشان تفوتهم في التكنلوجيا وحتى كمان في الأخلاق والتسامح والأدب فاتوهم مشوااااااااااار...
برجع تاني؟؟
جيش لي شنهو، ياهو نشيل صباعنا نطبز بيهو عينا ولا نشيل لقمة عيالنا نأكلها لزولن قصدهو ياذينا..
جيش لي شنهو وإحنا لا بنعادي ولا بنخون، ناسن حنكون؟ نحب وننحب، بنخاوي ونصادق، نحفظ للتانين حقوقهم وخوتهم ونصونها، نمشي نجيب لينا خميرة عكننة من ناسن، ياهو الموت شغلهم والديسديس قصدهم (الإستخبارات).
لا، لا تب ما كيسينهو والعسس دآك ياهو نجركوكهم، عايش على غيرهم وينهشوا لحمهو ويقرمش لي عضامهو..
بفتكر أنهو "رب ضارة نافعة "..
الصابنا دآ، عشان نفتح عيونا ونتعلم.. ونعرف وين أخطائنا ونصلح الخطاء..
أنا بس حاجة عايز أقولها.. غلطنا لمن كل زول فينا، ساب غنمهو وحتى باعن، عشان يجي الخرتوم، ودآك رمى طوريتهو وساب زرعهو عشان يجي الخرتوم.. جيناها ومليناها، نعم لا ينكر أنهو الناس إتعلمت حاجات وعفت دروب وكسبت مهارات..
طيب ما دآ حسي الخرطوم سبناها ورجعنا لي حتتنا..
ما نجيها تاني صاديين، بالعلامة الإتعلمناها والمعرفة الإكتسبناه والخبرة اصبناها والقرشيين تلاتة الإكتنزناهم. نقعد قبلنا في حلالنا وربوعنا وقرانا نعمرهم وتبقى النهضة شاملة ويعم الخير بلدنا وبالمحبة نحميها وبالعلم نرفع ليها وموضوع الحكم؟؟
بعد ما نكون بقينا ناس ولاد ناس، أخوان وحبايب.. الديمقراطية برااها بتختارنا عشان نعيشها...
لا للحرب
وكفانا يا دعامة ويا عسكر

[بابكر مخير]

ما زولن كبير ناقشها وحافظها وفاهم كل حاجة وحاشر رأيي في أيتها رؤية أو قصة كانت أو قضية..
هذا دلوي في أمرن عاصي ومستعصي تبيانهو؟؟
نحن السودانيين في هويتنا تباينات أفارقة وفي الافارقة نيلوتيك وغيرهم حتى أن نافلة القول أن أهلنا النوبيين هموا أدم (adem ) وتعني الإنسان بالنوبية ونحن أعراب وهنا ما يقال أن زيجة قديمة حدثت وتصاهر فيها بنو آدم فبين سام وحام وجدت هذه القبيلة المفقودة؟؟ ما تعرف هل هم الصوماليين أم نحنا السودانيين وجمعنا البين عرب وأفارقة...
لكن المدهش في الامر أن لسننا، عربي في النطق صحيحا وفي المعاني متفرد وفي الوصف مكتمل..
دآ كلهو إستحضرني في الحسي أنا عايشهو...
كتمت الحبال الصوتية وضياع الصوت ودآ كوم، لكن الإنشغال بالنفس ونسيان الحواليك..
دآ هو لب الحديث وقلبهو المفروط، فهناك قول سودانية، عفوية جداً وبسيطة خالص. يقول ليك: فلان مشغول أو أنا مشغول في (أم حلقومي).. ونحن في السودان لمن تكون عايز توري منبع الزول أو الشيء بتخت (أم) قبل الاسم أو الوصف.. مثلن أم روحي يعني أصلها ومنبعها وتعظيما للشأن برضك تتختا (أم)..
يومتها وصديقي وأخي الدبلوماسي توعك وأنا تراني ياهو إنشغلتا في قصة الحبال الصوتية والتي تعرف بإسم الصندوق الصوتي ومكانها في أنتومية الانسان anatomy هو "الحلقوم".. وما إتصلت بيهو تلاتة يوم أستفسر عن أحواله..
المهم كتبتا ليهو، ما هو وييييييين الكلام والصوت العذب وقلتا ليهو بعتذر.. أني إنشغلت في أم حلقومي، معنى وتعبير...
وفعلن كنت إنشغلت بي حكاية النزف وأنهو أضعف الدم وهلك الجسد.. وبقيت علي أم حلقومي وهنا تجلية تانية للغتنا السودانية، فما هو الحلقوم؟؟
هو أخر مراحل الحياة، فالإهتمام بأُمهو تعني العض بالنواجز على الSurvival...
"فَلَوْلَا إِذَا بَلَغَتِ الْحُلْقُومَ" وهي الروح، متى ما بلغت الحلقوم فهو الاحتضار..
هنا؟؟ قيل أيضاُ. أن الروح تغادر من الجسد أولاً؟! القدميين صعودا الي؟؟
( كلا إذا بلغت التراقي وقيل من راق وظن أنه الفراق والتفت الساق بالساق إلى ربك يومئذ المساق )..
:011::011::011::011:

[عبدالحكيم]

دآ هو لب الحديث وقلبهو المفروط، فهناك قول سودانية، عفوية جداً وبسيطة خالص. يقول ليك: فلان مشغول أو أنا مشغول في (أم حلقومي).. ونحن في السودان لمن تكون عايز توري منبع الزول أو الشيء بتخت (أم) قبل الاسم أو الوصف.. مثلن أم روحي يعني أصلها ومنبعها وتعظيما للشأن برضك تتختا (أم)..
يومتها وصديقي وأخي الدبلوماسي توعك وأنا تراني ياهو إنشغلتا في قصة الحبال الصوتية والتي تعرف بإسم الصندوق الصوتي ومكانها في أنتومية الانسان anatomy هو "الحلقوم".. وما إتصلت بيهو تلاتة يوم أستفسر عن أحواله..
المهم كتبتا ليهو، ما هو وييييييين الكلام والصوت العذب وقلتا ليهو بعتذر.. أني إنشغلت في أم حلقومي، معنى وتعبير...
وفعلن كنت إنشغلت بي حكاية النزف وأنهو أضعف الدم وهلك الجسد.. وبقيت علي أم حلقومي وهنا تجلية تانية للغتنا السودانية، فما هو الحلقوم؟؟
هو أخر مراحل الحياة، فالإهتمام بأُمهو تعني العض بالنواجز على الSurvival...
"فَلَوْلَا إِذَا بَلَغَتِ الْحُلْقُومَ" وهي الروح، متى ما بلغت الحلقوم فهو الاحتضار..
هنا؟؟ قيل أيضاُ. أن الروح تغادر من الجسد أولاً؟! القدميين صعودا الي؟؟
( كلا إذا بلغت التراقي وقيل من راق وظن أنه الفراق والتفت الساق بالساق إلى ربك يومئذ المساق )..
:011::011::011::011:

بداية سلامتك وسلامة أم حلقومك (وأبوه كمان ) أو بلعومك ولا أراك الله شرا .. فكلها كفارات إن شاء الله وزكاة جسد وكذلك زكاة كلام وما زكاة المال منهم ببعيد ..

جَاءَ رَجُلٌ إلى النبيِّ صَلَّى اللهُ عليه وسلَّمَ فَقالَ: يا رَسولَ اللَّهِ، أَيُّ الصَّدَقَةِ أَعْظَمُ أَجْرًا؟ قالَ: أَنْ تَصَدَّقَ وأَنْتَ صَحِيحٌ شَحِيحٌ تَخْشَى الفَقْرَ، وتَأْمُلُ الغِنَى، ولَا تُمْهِلُ حتَّى إذَا بَلَغَتِ الحُلْقُومَ، قُلْتَ لِفُلَانٍ كَذَا، ولِفُلَانٍ كَذَا وقدْ كانَ لِفُلَانٍ.

[بابكر مخير]

أَنْ تَصَدَّقَ وأَنْتَ صَحِيحٌ شَحِيحٌ تَخْشَى الفَقْرَ، وتَأْمُلُ الغِنَى، ولَا تُمْهِلُ حتَّى إذَا بَلَغَتِ الحُلْقُومَ

حكومي العزيز
ما بنا شح ولكن قلة في الموارد وعافتنا الصحة، لم نأمل الغنى وهو أصلن بعيد المنال لكنا راضيين بكفاف العيش، ترانا بنحاول ومانا متمهلين ومهملين بحمد الله وقدرته.. وترانا بنحاول نحسن السجل.. كدآ يعني نرقد قفا وكفارتنا مقبولة..
بس الحبيب:confused::confused:
لحدي هنا وكفانا :D:D:D

[بابكر مخير]

في الداير الايام دي وبما أني وصلت من العمر، أنهو حسب القانون والعرف والتقاليد السودانية والتي تنكر لها العسكر، فنكلوا بمن صابهم العمر بتعدد السنين وبقوا فوق السبعين وأعدموهم. فها أنا أستفيد من تلك الحصانة رغم الحكام العسكر عملوا على تجاوزاتها وأذكر أمرن عشته قبل خمسين سنة يمكن وذي ما قلت في الاول (في الداير الايام دي....) وأخص به سودانيات حصريا..
الموضوع هو الممارسات الغير إنسانية التي حُرص على ممارستها من قبل النظاميين في هذا الوطن المسالم كما يوصف دوما..
كانت تلك الايام مشابهة لهذه الايام، حين تمردت قوات قوامها معارضيين لنظام نميري وكانت الغلبة من تلك القوات من أهل دارفور نسبة لإرتباطهم بحزب الامة (ما كان بينه شتات اليوم فلم تكن هناك الحوجة لأن يوصف بالقومي) وكانت التسمية مماثلة لي حقت اليوم "مرتزقة"..
تم قمع التمرد، قتل من قتل بدم بارد وأسر من أسر من قبل القوات المسلحة والشرطة وتم تحديد مواقع إعتقال وجماعات تحقيق ميدانية، فورية وناجزة..
كنت على رأس واحدة من الجماعات في إدارة الأدلة الجنائية بكلية الشرطة ببري. وكنت حينها برتبة (ملاحظ) نقيب ونسبة لعدم خبرتي الإجرائية في مثل هذه الامور (تخرجت من كلية الشرطة قبل شهرين بعد قضاء ثلاثة أشهر دورة تأهيلية مخصصة لدفعة ملحقة من الجامعيين الملتحقين بالادلة الجنائية وموظفي الجوازات المحوليين لرتب عسكرية) فقد تم إختيار بتشاويش وشاويش وإتنين أمباشية (حسب التسميات القديمة) وكان البتشاويش من العاملين معنا في الادلة والأخرين من كلية الشرطة..
أتذكر أن الامور كانت ماشة عادية والإجراءات تتم بسلاسة. إلا أن أحضر الينا واحد من أفراد التمرد المعتقليين وأثناء التحقيق. إذا بالبتشاويش والذي كان يتميز ببنية جسمانية متميزة وكأنه من أبطال مصارعة جبال النوبة أو أحد أبطال فريق الملاكمين من نادي العمال والذي وقتها كان كائن شمال سينما كلزيوم وفي الناصية المقابلة لأبو جنزير.. يطيييير فووووووووق ويلطش المشتبه كف.. لا أكذب القول إن قلتا أن اليد وهي في طريقها لوجه المشتبه شاء القدر أنها مرت على بعد قدم ونص من أمام وجهي، إلا أني التيار الذي خلفته كان بالقوة التي إنحاز رأسي في إتجاه الكف ولطف الله أنهو ما وقع فيني وإلا كنت قد أصبت بتشوه الي يومنا هذا..
هنا أنا حقيقة والله أوقفت هذا الامر وخرجت أشم شوية هواء فالامر لي كان غير متقبل وطلبت إجتماع مع الرتبة الاعلى مني لإعفائي..
لم يتم الاعفاء ورجعت لأحادث فريق التحقيق على إنفراد.. عرفتا منهم أن هذه المشتبه وحسب خبرتهم له وضعية مميزة في وسط المتمردين وأهو أكيد يحمل معلومات. إتفقنا أنهو ما في ضرب ووافق الفريق وخاصتين البتشاويش..
إستمر التحقيق وإستمر المشتبه في النكران ومعرفته بالامر غير أنه فرد ورافق بعض المعارف في هذه المهمة..
هنا طلني البتشاويش في كلمة خارج الغرفة وقال ليا: يا جنابهو، إحنا حنخوفهو وما حنعمل الشيء الذي سنقوله وهذا لعلمك حتى لا تمانعنا أثناء التحقيق وأخذت منه التعهد بأن لا يصيب المشتبة أي أذى جسدي..
القصة أنهم لاحقاً قالوا للمشتبه. أنهو فلان دآ "البتشاويش ذو القامة المشهودة" سيمارس معه (يغتصبهو)وأنهم حياخدوهو وأشروا ليهو لي الحمامات وأنهو هناك سيدخلوا خرطوش في مؤخرته لتنظيفه قبل (الممارسة)...
أنا خرجت لإكمال التمثيلية التي إتفقت مع الفريق عليها وبتعهدهم لي..
ما هي إلا لحظات وحتى قبل خروجهم من غرفة التحقيق. جاني واحد من فريق التحقيق وقال ليا: يا جنابهو عندهو إفادة تعال عشان تتسجل ف حضورك:
أفاد بأنه على رأس مجموعة وأنهم تدربوا في ليبيا وبعض المعلومات الاخرى.. جاء نفر من الاسخبارات العسكرية وإستلموا المشتبه واوراق التحقيق...
وهذا أكيد هو الداير الايام ديز.....
هذا للتأريخ والله على ما أقول شهيد ولا حول ولا قوة إلا بالله..
اللهم أعف عني وأغفر لي

[عبدالمنعم الطيب حسن]

هلا حبيبنا ودكتورنا وليالي هوانا
غاب عني الباصوورد
وفقدت في نفس الوكت
تلفون عمدتنا..
المهم باريت الفيس بوك حرف حرف
كتبت اسم عمدة بالف طريقة
حتى صدته اخيرا
ودخلت صفحته وتواصلت معاه
وارسل لي الباصوورد..
ودخلت برجلي اليمين
ونشاط نشاط
تسلم حبيبنا ما سال منك بلا
بالعكس ما شفتك من اكتر من 13 سنة في المنبر
ما شفتك زعلتا زول
انت رجل طيب ومحترم في زمن تافه
ربنا يحفظ ويخلي ويغطي على الاسرة جميعا.....
....
البوست في الخاص يا دوبك شفتو ..ودا ردي بهناك..
تسلم يا باشا..

[بابكر مخير]

ما شفتك زعلتا زول


هههههه
قال ليك.. الموية لا طعم ولا رائحة لها وزيادة على كدآ.. لا تترك أيتها إنطباعات على السطح البتلامسهو.. يعني ما بتوسخ ولا بتغلط وظنيتهم ناس هنا، شاربني موية looool...
تاني هااااااااااام،
ناس هنا ديل ما هم ظاتهم ذي الملايكة.. وفيهم من الصفات ما فوق صفات البشر.. الأنبياء في سيرتهم قيل: إن صفعك على خدك الايمن، أدر له خدك الايسر :011:...
تالتتها،،،،،
من أقوال العرب؛ وإن خاطبك السفهاء فقل سلام وهنانا، ياهمناس سودانيات، إن ما عرب، ياها لغتهم فمنها صابوا من هذا القول، وظنيتهم بيفطوا قولي لو ما وافقهم :D...
يابا والله بتذكر زمان أول صداقتي الئطوتدت مع أخي الحبيب حمدي أبو جقادو، كانت زعلة منهو في شيتن قلتهو. لكن الحمد لله بقت، ما من محبة إلا بعد خصام.. ود خالي الحبيب شوقي بدري، زعلتهو وغلطتا في حقهو كمين مرة ودي مناسبة أستميحه العذر وأطلب منه المسامحة التامة والدنيا وساعها ياهو الشبر وين بتختا راسنا..
الحبيب شكرا ليك على الكلمات الجميلة في حقي وأريتني قدرها...
وانا شغال في ابوظبي، المدير بتاعي، كان قال لي الضباط العندهو: اليبي من الدكتور شئ، يشوف متى مزاجهو زين.. الراجل عرفني أني مزاج متقلب.. فيا الحبيب ما تملآ كفك بيا :eek:
محبة وإجلال وربنا يحفظك

[عبدالمنعم الطيب حسن]

هههههه
قال ليك.. الموية لا طعم ولا رائحة لها وزيادة على كدآ.. لا تترك أيتها إنطباعات على السطح البتلامسهو.. يعني ما بتوسخ ولا بتغلط وظنيتهم ناس هنا، شاربني موية looool...
تاني هااااااااااام،
ناس هنا ديل ما هم ظاتهم ذي الملايكة.. وفيهم من الصفات ما فوق صفات البشر.. الأنبياء في سيرتهم قيل: إن صفعك على خدك الايمن، أدر له خدك الايسر :011:...
تالتتها،،،،،
من أقوال العرب؛ وإن خاطبك السفهاء فقل سلام وهنانا، ياهمناس سودانيات، إن ما عرب، ياها لغتهم فمنها صابوا من هذا القول، وظنيتهم بيفطوا قولي لو ما وافقهم :D...
يابا والله بتذكر زمان أول صداقتي الئطوتدت مع أخي الحبيب حمدي أبو جقادو، كانت زعلة منهو في شيتن قلتهو. لكن الحمد لله بقت، ما من محبة إلا بعد خصام.. ود خالي الحبيب شوقي بدري، زعلتهو وغلطتا في حقهو كمين مرة ودي مناسبة أستميحه العذر وأطلب منه المسامحة التامة والدنيا وساعها ياهو الشبر وين بتختا راسنا..
الحبيب شكرا ليك على الكلمات الجميلة في حقي وأريتني قدرها...
وانا شغال في ابوظبي، المدير بتاعي، كان قال لي الضباط العندهو: اليبي من الدكتور شئ، يشوف متى مزاجهو زين.. الراجل عرفني أني مزاج متقلب.. فيا الحبيب ما تملآ كفك بيا :eek:
محبة وإجلال وربنا يحفظك

ماليين ايدنا على الضمانة والله..
دي عشرة 13 سنة وتزيد..
لم نرى منك الا وجه امدرماني اصيل ومأصل
قامة واستقامة
واخلاق اولاد المدينة..
العارفين الكنهة ومتجاوزين بمزاجهم..
تسلم حبيبنا
انت من الناس الذين تضج المجالس بسيرتهم العطرة..
ويُسال عنك ساعات الغياب..
يطول عمرك..
لا جاء يوم شكرك..

[بابكر مخير]

لا جاء يوم شكرك..
أخي الحبيب. عفواً على إستغلال قولك هذا، مدخل لي طق حنك وونسة دون أي قصد سالب أو مغزى ناكر لي نيتك الحقيقية في المعنى الذي تقصده..
_____________________________________

من نوادر الاقوال السودانية والتي تقال بقصد غير تفسيرها ومنطقيتها ولكنها تطلق بحسن نية وعفوية..
* ما جاب يوم شكرك.
بمعني أنهو لا يأتي اليوم الذي فيه تموت.
تفسيرها بين وواضح؟ يتحضد القصد بتاتاً، ففيه عدم المعقولية والواقعية، فمن المعروف "كل نفس ذائقة الموت ثم إلينا ترجعون" كما أن هناك نوع من الجحد وظلم ومنع بين في أن لا تشكر في حياتك وإن تشكر فقط في ذاك اليوم وهو الذي تموت فيه. (يا لهويي)
وهنا النادرة. ليييييييييه الزول ما تشكرو في حياتهو لتفرحه وتسره وتظهر له تقديرا بعبارة شكر تحفزه وتشحذه دافعن لعطائن أكتر..
* إن شاء الله أخر الاحزان.
والمقصود بها أن لا ترى محزن بعد هذا، لكن الواقع والتفسير الصاح لهذه القولة من الواقع المنطقي. أن الاحزان سنة وحتمية الحدوث، مع تفاوت مستوياتها من خفيفة الي متوسطة وصولا لأقصاها. فقولة أنها أخر الاحزان بأنك لا تعيش لترى منها جديد وأن هذا هو أخرها. (لييه بس كدآ).
العرب من عاربة ومستعربة الاخرين بخففوها كتير ويقول ليك. ما تشوف شر وعدم ربط هذا بوقت معين، لكن إحنا ما الياهو، ظابطين ورابطيين فحددناها بأنها (أخر)..
وفي كتير غير ذلك من أقوال تستعمل بعفوية أهلنا ناس، الجاتك في مالك فدتك وكأن خروف الضحية ما بكفي كفداء وبرضك ناس، المؤمن مصاب وكان الإصابة مقياس لإيمانك من عدهم و و و جرآ

[عبدالمنعم الطيب حسن]

تحت

[عبدالمنعم الطيب حسن]

أخي الحبيب. عفواً على إستغلال قولك هذا، مدخل لي طق حنك وونسة دون أي قصد سالب أو مغزى ناكر لي نيتك الحقيقية في المعنى الذي تقصده..
_____________________________________

من نوادر الاقوال السودانية والتي تقال بقصد غير تفسيرها ومنطقيتها ولكنها تطلق بحسن نية وعفوية..
* ما جاب يوم شكرك.
بمعني أنهو لا يأتي اليوم الذي فيه تموت.
تفسيرها بين وواضح؟ يتحضد القصد بتاتاً، ففيه عدم المعقولية والواقعية، فمن المعروف "كل نفس ذائقة الموت ثم إلينا ترجعون" كما أن هناك نوع من الجحد وظلم ومنع بين في أن لا تشكر في حياتك وإن تشكر فقط في ذاك اليوم وهو الذي تموت فيه. (يا لهويي)
وهنا النادرة. ليييييييييه الزول ما تشكرو في حياتهو لتفرحه وتسره وتظهر له تقديرا بعبارة شكر تحفزه وتشحذه دافعن لعطائن أكتر..
* إن شاء الله أخر الاحزان.
والمقصود بها أن لا ترى محزن بعد هذا، لكن الواقع والتفسير الصاح لهذه القولة من الواقع المنطقي. أن الاحزان سنة وحتمية الحدوث، مع تفاوت مستوياتها من خفيفة الي متوسطة وصولا لأقصاها. فقولة أنها أخر الاحزان بأنك لا تعيش لترى منها جديد وأن هذا هو أخرها. (لييه بس كدآ).
العرب من عاربة ومستعربة الاخرين بخففوها كتير ويقول ليك. ما تشوف شر وعدم ربط هذا بوقت معين، لكن إحنا ما الياهو، ظابطين ورابطيين فحددناها بأنها (أخر)..
وفي كتير غير ذلك من أقوال تستعمل بعفوية أهلنا ناس، الجاتك في مالك فدتك وكأن خروف الضحية ما بكفي كفداء وبرضك ناس، المؤمن مصاب وكان الإصابة مقياس لإيمانك من عدهم و و و جرآ


يقول اهلنا ان شاء الله يوم شكرك ما يجي..
بمعني يطول عمرك
..
وانا اصلا اخدتها هكذا
لا جاء يوم شكرك
من الاستاذ علي المك..
..
يطول عمرك يا حبيب..

[بابكر مخير]

حضرت الورقة والقلم وقلتا أكتب..
هو شنهو البينكتب والمزاج خربان..
أيوااا نكتب عن كلمة خربان!؟
الكلمة دي الواحد بيفتكر أنها من الغنائم الطلع بيها من دولة الإمارات.. فكلمة خراب في "مذاقها" أسيوية خاصة وأن الباكستانيين يستعملونها بإسراف وهم الذين يشكلوا كم كبير من العمال المهرة وفي نفس الوقت أصحاب عمل خاص. فهم الواحد ممكن يكون شغال في مؤسسة حكومية تحت بند عامل، لكنهو بعد الدوام تلفونه الخاص هو مكتبهو. قول مثلن مع تلاجي لمن كانت "خراب"، ضربت لي (صادق الحق) ولاحظ الإسم كيف يبعث الطمئنينة في القلب ويزيل منك شك أنك وقعتا ليك في عامل غير كفء.. يجي هذا الصادق ويفتح التلاجة من وراء وما تعرف عمل شنهو وبعد نص ساعة وهو يصوط ويجوطز يقول ليك،: في خلاص أرباب.. من ناحية خلاص فهو قائل كلمة حق، بس أنا الما فهمت القصد الحقيقي. وعشان يضمن أنهو أمره لن يكشف في لحظتها يقول ليك: في قاز إتا لازم في ما يشغل تلاجة إلا بعد نص ساعة، يصير كلهو خير..
ما خلاص الخبير قال كدآ وعلى أحر من الجمر، تنقضي نص الساعة وشغل في تلاجة، ضوها يبهر ووصوت الموتر ساكن ما ذي ما كان قبل ما صادق الوعد يدخل يدهو ليعالج الامرويا مؤمن، يا مصدق. إنتظر وأصبر، أمل البرودة تبدا تعم جوف التلاجة وساعة إتنين، بعدها إتصلت بي داك الزول.. ويرد عليا بهجوم، إتا أنا يقول في موتر "خراب"، إتا ما في معلوم عربي...
أهاااااااااااا الحكاية فيها عدم فهم للعربي. بيني وبين نفسي تداخلت الامور. فأنا أفريقي وهو أسيوي واللغة العربية منبعها آسيا. ممكن كلام الزول دآ صاح. أنا ما في معلوم عربي.
زعلتا وإشتطت غيظا وكوركتا فيهو، ما طبعا الوكت دآك كان الصوت يلعلع والحبال الصوتية كأوتار القيثار، مشدودة على أخرهو. وهو صننن ذي حالت صوتي حسي ولا حتى همس من الطرف الاخر في التلفون.
ختيت الامر، إما أنهو توبيخي ليهو أتى بثمار وأنهو حيهرول حضورا ويصلح ما أفسده ودآ طبعن دآ كان غير واقعي؟ فحتى العطار لا يصلح ما أفسده الدهر أو أنه صاحبي دآ ختا الصوت في mute وخلاني أهرج وكلامي يذهب أدراج الرياح بلا عودة ولا ناتج.. في الأخر إقتنعتا بأني أولن تبادي؛ عربي ما في معلوم وتانيين أنهو الموتر خراب فأحسن أشوف ليا صرفة تانية ويستحسن أشتري تلاجة أم راس وقعر أمريكية الصنع والمصدر...

[بابكر مخير]

قالوا للمرأة ولا الرجل، ما فرقت والياهو واحد..
ياتهو بتريد من عيالك؟؟
صعبت الإجابة على السؤال. لأنهو صعب بيناتهم تفضل وتفرق. رغم تحت، تحت.. بيناتهم فرق وفروقات.
شوف البتلقاهو في أمر الصلاة من حيث أنها ياها وااااحدة وما فيها فرق وتفريق ففيها الإختلاء بالخصوصية والإنفراد بالتناجي والتقرب من المولى عز وجل. لكن أوكاتها مختلفة وفيهن الوسطى هي الأُختصت بالتركيز "حافظوا على الصلوات والصلاة الوسطى " ..
أها الجنا بيكون فيهم، المفرح وبيناتهم المؤنس وبيناتهم الخدوم والأكتر همة وليك مطيع، لكن برضك ما ذي ما في الصلاة في أمر الخصوصية، لأنهم وااااااااحد رغم المفاضلات المذكورة ما بتختص واحد على التانيين ولا بتفضل واحد على الاخرين..
دآ كلهو قادني لي موضوع شخصي وخاص ورغم عدم الشبه والتشبيه والمشابهة، لكن نوع ما صعب فيهو التفريق والتفضيل بين الواحد على الاخر..
الأمر هو معني بي تلفوناتي الاتنين والحيرة بيناتهم في التفضيل وحقيقة البين ولزوم الذكر والتبيان..
الحكمة الإتنين سامسونج. واحد دآك قالاقسي والتاني أخر موديل.
واحد محمل وقدر من المخزون ما قدر يشيل والتاني من الحديث في التكنلوجيا، أكتر بميل..
واحد من أيام أبوظبي الماضيات، بين فرحة وضحكات عارمات وبعض لحظات أسى مقبورات...
فيهو أرقام من ناس الشغل وأرقام بتاعين شغل وأرقام كايسين في المندولا شغل..
فيهو الفيديوهات والصور من محل السكن والأماكن الكنتا فيها والذكريات الحلوة منها ما بتمل...
والتاني الجديد، بدا مع عصر تطوير وتغير دنيا المعلومات، مالك جدد للتويتر في الاصل سيد تسلا للسيارات..
لساتهو بحاول أجمع فيهو وهو الوسيع..
قدر ما تقدور تملاء الداتا، صعب بلحيل.. فيهو التخزين ما بس في الجهاز؟؟ لكنهو في السماوات بين قوقل وعديد المواقع من الحايمات وسط الإسافير الواسعات وجاهزات..
ما عرفتا قولتن أفضل واحد علي التاني.. الأول وصعب تقول قديم، لأنهو من البرامج قادر للزيادة في التحميل وفيهو كمان التحديث، البخلي من المتهالك؟ شباب وفورة وقابلية التجديد... ميزتهو رابطني بالكان هناك من صحاب وقصص وحكايات، من خلال الواتساب اللساتهو شغال بي رقم الإمارات ودآ واحدن من الاسباب تمسكي بيهو بيد من حديد وما ببدلهو حتى بي نوتبوك قالاقسي فولد خمسة زيد (Z)..
:tongue::tongue:
معليش على إضاعت وقتكم
:like2::like2:

[بابكر مخير]

ليا فكرة.
بسم الله ونبدى؟؟
الحرب مستمرة وما شايف أن الجوز ديل يكونوا عاقليين ويوقفوها. وإن قرروا أن يعملوا ذلك، فالوكت رأح.. البلد دي ما حترتاح. فالحصل بأن الدعم السريع وقف ضد الجيش القومي وأذاقه ما أذاقه، ما بقول هزيمة ولكن شيء قريب من كدآ، مية واربعة من الأيام ولساتهو، القصر الجمهوري رمز الدولة تحت الدعم السريع، القيادة العامة رمز الجيش وعزته مهددة بأن تسقط، إذاعتنا المتحدث بإسمنا عند الدعم السريع..
فمدام الحكاية كدآ. يبقآ كييييييف نضمن أنهو ما بكرة واحدة من قوات ناس جبرين والحلو و و و و المسلحة كمان ما تشم صناحآ وتبدآ لينا حرب تانية..
هنا بقآ فكرتي والبفتكر أنها المخرج..
في اربعة وخمسين وبي ضغط من عبد الناصر، بأنه سينسحب من السودان ويسيب المرفعين الهزم غردون للإنجليز، أها في ستة وخمسين من القرن الماضي، رفعنا علم السودان وبعدها بي سنة إنقلب الجيش الشايل السلاح على الجيش المفروض يحمي الدولة. ما هو الحقيقة لمن يحصل إنقلاب، ما بيكون إنقلاب على الحكومة المدنية ما دي ما عندها دبابات ولا طيارات ولا ذخيرة، يا هو الجيش هو المفروض يكون جيشها وهكذا يبقآ الجيش في نوفمبر ومايو ويونيو وأكتوبر وأبريل 2023 بنقلب على جيش الحكومة..
في أتوبر ثار الشعب وأسقط إنقلاب "في سبعتاشر ولى الظلم" ونفس وغنينا "يأكتوبر الاخضر" وأعادها الجيش في "يا حارسنا وفارسنا" ومن ثم "يوم الجيش للشعب إنحاز"..
الحكمة أنهو الجيش وكترت إنقلاباتهو خلال الاربعة سنين دي ما لقن ليهم زول يغني ليهم ولا يمجدهم. بل بالعكس للثورة حناجر الشباب في تنوع موسيقي، منهو الراب ومختلف الألحان وشعراء ثوار لي ديسمبر 19..
فكرتي جاية من هذه الحقائق.. أننا أخدنا إستقلالنا "بااااااارد" دون قطرة دم سالت، قبلها كتييييييييييير من الدماء ولم ننل إستقلالنا (ثورة 24) إلا في واحدة وهي الثورة المهدية، حيث تلاحم كل أهل السودان من الشرق والغرب والشمال والجنوب وهزموا المستعمر. (لكنه رجع وإستعمرنا والموضوع دآ ننساهو أخير).
شعب ياهوكدآ. عشرات السنين لي قدام، ما بيقدر يقوم بلد.
شعب لساتهو قبلي، جهوي، عنصري. ما قادر يتعايش مع نفسهو ولا مع بعضه.
يضاف وذي ما قلت المخاطر الداخلية المحدقة بيهو من قوات تحمل سلاح وطامعة أنها ذي ما الدعم السريع قدر يقلقل الجيش، هم كمان عايزيين نصيبهم ويعملوا ما عمل في الجيش السودان.. (أهو حسي الحلو بيعمل كدآ)
خلاصتهو..
الواقع أنهو جيشنا ما شيتن يعتمد عليه في المستقبل، ساستنا فشلوا في كل ما توفر لهم فرص، فتناحروا وتحاربوا ذي الشايلين سلاح ديل.
إحنا كشعب؟؟
بفتكر أننا عديمي الوطنية والحس القومي وما نا ناسن نكون ساس لي دولة ولا غدوة لأهل السودان القادميين..
بفتكر وزبدة القول؟؟
أننا وبقناعة نسلم أنفسنا للوصاية من قبل الأمم المتحدة. حاكم عام يعين علينا ولفترة خمسين سنة، ناس أحنا، نروح والجيل البعدنا يروح ويبقآ الجيل الحيتربى في ظل الوصاية الدولية.. عرف سودان جديد..
وممكن تكون دي مبادرة..
"الأمم المتحدة للوصاية فوراً"

[بابكر مخير]

رسالتيين لمن يجمل في وجه البرهان وزبانيته...

رسالة للحارث ادريس..
تحدثت عن دولة اقليمية ارسلت قوات تحارب مع الدعم السريع. ممكن جدا تكون صادق. لكن اخذ عليك. حجب تسمية هذه الدولة وتغيبنا نحن السودانيين اصحاب الحق لمعرفة من هم اعدائنا.. اسلوب الاستئثار بالمعلومة والتكتم عليها مرفوض. الا ان كان هذا الحديث كاذبا ومستقى من نهج الزبانية اللذين تعمل معهم الان فهذا سلبا على شخصك...
الحق روحك وجمل من الاخفاقات المحسوبة عليك من الماضي والان في الحاضر...
............
رسالة لي عثمان ميرغني..
يا استاذ، سمعتك تتكلم ان الجيش يمثل الشرعية.. دحن الجيش دا مش قام بانقلاب في اكتوبر وفي ابريل ضد البشير...
الاستاذ، انا من المعجبين جدا بتحليلك وقرايتك وبشبهك ديمة بالمرحوم حسن ساتي.
البرجوهو منك، انك تحترم عقولنا عند الحديث عن العصابة المهيمنة على القوات المسلحة، فهي بنفس سوء الدعم السريع. بعدين يا اخي الناس دي كضابة. الحارث في الامم المتحدة ممثل للحكومة (حسب قولك الشرعية) بكذب ويقول سبع الف محارب من دولة اقليمية تحارب مع الدعم السريع.. ما يسميها لو فعلن وما يغيبنا كشعب

[بابكر مخير]

بين الطيور، تفاوتات في الشكل وفي مستوى الذكاء ومنها ذو فائدة للبشر ومنها ما يحسب سلبا وعديم الفائدة. وهنا أخص بالذكر أحدها وهو الببغاء..
يعرف هذا الطائر والذي في كثير من الأحيان ينافس الطاوؤس جمال والصقر في حدة النظر ويتفوق على الكثير من الطيور ذكاء. يقال أن مستوى ذكاءه يعادل ذكاء طفل في الخامسة من عمره في المعرفة والإدراك والتعلم واستنتاج الصلات بين الأشياء وأنه من بين المخلوقات الوليفة وسهل إستئناسه. غير أنه لا يخلوا من الخبث وحين يجد فرصة لا يتاخر في الهروب "قصة التاجر والببغاء لجلال الدين الرومي" تعكس مدى ذلك..
ما ذا وراء هذا السرد؟؟
كثير من الناس "السودانيين" يتمتعوا بقدر الببغاء في ترديد ما يسم ولكن دون فهم (إنّ الببغاء لا يَفهم الكلام، ولكنّه يَستطيع أن يربط بين الكلمات ليكون جملة ويقول ما يردده الإنسان بصورة صحيحة)..
مثال حي لذلك هو الحديث الذي يرددهو الببغاوات في القنوات الفضائية وفي الصحف وفي وسائل التواصل الإجتماعية في أن الساسة هم سبب الحاصل في البلد...
لا يغيب على آي زولن فاهم وبيعرف سياسة أن من يقف وراء هذه النظرية دوماً هم؟
الأيدلوجيين، فمن قبل، كانت هذه القولة حكر شيوعي وذلك في سعيهم شيطنة الاحزاب السياسية في أواسط العامة البسيطة وهذه الايام إستطاع الأديلوجيين الإسلامويين "الجداد" الذي ورث كل الخصال السيئة فرفعوا نفس القول والذي وجد بيئة خصبة بين السذج وجهلاء السودانيين.
هذه الاحزاب الايدلوجيية حين يشوهوا شكل الساسة، ففي الحقيقة هم يدينوا أنفسهم، فهم ساسة وحزبيين وإلا كيف كان للحزب الشيوعي ممثليين في أول برلمان سوداني ونفس الامر ينطبق على "الكيزان" في الجمعية التأسيسية قبل إنقلابهم على الديمقراطية..
والفرق بين ببغاء التاجر وبين ببغاوات السودان، أنهم في ذكاء أطفال بعمر الخمسة سنيين دون أن يشغلوا مخهم حين قصة التاجر توري أنهو الببغاء الطائر أنبه وأذكى وأحسن من السودانيين...
__________________

(التاجر والببغاء)
خلاصة هذه القصة أن تاجرًا كان لديه ببغاء جميلة فصيحة وأزمع السفر إلى الهند للتجارة، فقال لأولاده وخدمه: ليقترح كُلٌّ من يشاء من هدايا الهند. فاقترح كل واحد ما أحبَّ، وسأل الببغاء: ما تريدين؟ فقالت: إذا بلغت الهند ورأيت أسراب الببغاء فأبلغهن عني ما ألاقي من عناء في الحبس، وأبلغهن عتبي بما نسينني ونَعِمن بالعيش في الغابات على غصون الأشجار.
فلما أبلغ التاجر هذه الرسالة إلى ببغاوات الهند ارتعدت إحداهن وخرَّت ميتة.
فلام التاجر نفسه على إبلاغ رسالة لم يعرف عواقبها.
ولما رجع إلى بلده أدَّى الهدايا التي وعد بها، وسألته الببغاء عن رسالتها، فأبان عن أسفه وندمه وقصَّ عليها ما رأى، فإذا هي تنتفض وتخر ميتة كتلك.
فحزن التاجر على الببغاء الجميلة، ورجع يلوم نفسه على التكلم بما لا يدرك عاقبته، ويندب ببغاءه التي كانت أنسه ومتعته.
ثم أخذها من القفص ورمى بها، فإذا هي تطير وتقف على غصن شجرة.
فدهش الرجل وسألها عن هذه الأعجوبة. فقالت له: هذه هي الرسالة التي رجعت بها من الهند، فقد أشارت الببغاء التي خرَّت أمامك هامدة هناك بأن أفعل فعلها وأموت موتها، لأخلص من الأسر الذي أعانيه … إلخ.

[بابكر مخير]

وليدي ود الصوفية، الحبيب صهيب يوسف قال ليا: لكن يا أبوي، محل رهيفة بتنقد، لمن
اهو جبتهو..
القصة وما فيها!! من زمن وأنا صغير (بالجد زمااان كنت صغير، ما من يومي؟ عمي بابكر ولا جدو) كان عندي عادة سيئة وهي تقليد الاخرين في طريقة مشيهم مثلا أو كلامهم، المهم يعني أقلد الناس، أها أمي الله يرحمها، كان تقول ليا: بكرآ بتبقآ عليك والناس تحاكيك.
وتاني شيء برضهو أمي كانت تعلق عليهو، لمن أكون مدبرس وتلاحظ أنهو دي حالتي؟ تقول: بس إن شاء الله بعيد ما قريب الآرو الضاربك دآ وفعلن يكون في شيء Shoking يحصل.
عكس واحدة من خصالي، أني كنت لمن أصوم روحي المعنوية بتعلى وأصاب بي أيفوريا "euphoria" وبرضهو في حالات الخوف قبل ما اسافر واركب الطيارة بكتر كلامي ودمي ذي ببقا خفيف (دآ على عكس طبعي بدميالتقيل البتعرفهو) وبرضهو كانت الوالدة تقول ليا: يا أخوي صوم طوالي، أهو تبقا بتتونس..
كان برضهو فيني خصلة بتاعت أني بنقز بكل أمر يخصني وما بسكت بالحاجة وأصارح بيها نوع دآك البقولوا عليهو، البليلة ما بتنبلى في خشمهو. السيدة حسب سيدها، ليها رأي في الحكاية دي وخاصتن لو الناس بتتكلم "تقطع في غير الحضور"، بتقول : هووي بابكر قاعد، كلامكم دآ كلهو بيصل.. قاسم عليه الرحمة ديمة بيقول ليا: يا أخي إستعين على قضاء حوائجك بالكتمان. لكن الطبع غلاااااب...
هذه الخصال ويضاف عليها الإرث الرباطابي بتاع العين..........
القصة تبدى من أني أتذكر قاسم أخوي لمن يدور يشيل ليهو سجارة من زول يقول: أديني صباع سرطان عليه الرحمة توفي وهو مصاب بسرطان البنكرياز"س" وهذا مربوط في كتير من الاحيان بالتدخين........
التفاول دآ، عندي برضهو فمن قبل تمانية شهور الكان بيسألني؛ سجارك اللف دآ ما تقيل، أها برد وأقول أبدن. هو أضيف وأسترسل في الشرح بأنهو أقل ضرر من السجاير الفي الصناديق "المكنة" وأنهو المواد الكيمائية أقل من الفي السجاير المكنة (والتي تقدر بأكثر من متين مادة) لأنهو ما بيغسلهو بالبليتش وعشان كدآ لونهو أغمق . لا وبزييد أني من 1968 بدخنهو وأستطرد في الفشخرة وأتكلم عن عمي شريف والذي كانت السجارة لا تفارق خشمهو وأنهو أكيد توفي وهو فوق التمانيين لو ما التسعين..
تجمعت هذه الامور وعليها كمان جاء بوست سودانيات دآ الحسي عدد مشاهدينهو 823,791، بي عنوان "يا أخي الكُبر دآ حاجة ثقيلة بشكل" والود يعني خلاص، تام العافية ومكملة لمن طقيت روحي واحدة رباطابية كاملة الدسم، وإبتديت بي الشريان التاجي وبي دعامتهو (ما سريع. هههه) ولسة بخفف في دمي وياهو القولة الرددها عليا، وليدي الحبيب صهيب: محل رهيفة بتنقد وبدت معاناتي مع الحبال الصوتية، بدايتها صهيل خيل وبعدها راح وشوية إنعدم وحسي رجع على خفيييييف، لكن قالوا؟؟
في فترة العلاج والنقاهة، عيني إلا تشوف النور..
غايتهو الدكتور هون الامر عليا وقال هن 20 جلسة radiotherapy وممكن (على قول الدياشة) نرجع "كما كنت" ودي طبعن في حساب المستحيلة مع العمر ويبقآ ينطبق القول: لا يصلح العطار ما أفسدهو الدهر... ومعرووووووووووووووف وبديهي البتنقد في أحسن والاحسن من الأحول أنها تترقع إلا اللستك الكبس إلا جديد ودآ بتن ما ظنيتها بعد دآ...
وعلى أيتها حال؟؟
إن شاء الله، غدا لناظره لقريب. إن مدى في العمر ونشوف بعد العشرين جلسة والشهر، شهرين نقاهة...
شنهو الببقا :wink:

[بابكر مخير]

ما هو خلاص كِبرنا والقلم عننا إترفع..
دحن هاكم:

محجوب شريف عليه الرحمة، كان طول حياتهو مالي يدهو بأننا أمة جميلة، قوية، فاهمة ومني بقول سمحة مع غبشتنا دي..
قال:
ماكَ هوين سهل قيادك
سّيد نفسك مين أسيادك؟...
وهنا ما صدق شاعرنا عليه الرحمة لكن ياها من كلمات التفاءل..
نحن الهوان لبسناهو توب وهو سرح فينا سرطان، هنا وإنهنا وهان هوانا. إنهنا من الما بيسوى ولاهو شبه لباسنا، من ماضينا يوم بدل السوداني أخوهو بالأجنبي الغازي وكان غَاوٍ ولكن ضلالته وصورة له ذلك إنجاز ولم يكن يدري أي منقلب ينقلب وحالنا اليوم أمر وحذاري من السير في طريق الأسلاف أولائك..
سهل قيادك؟
بإستثناء العم عبود والذي حين إستلم الحكم كان من القلائل من أهلنا الذين إرتقى لمنصب قيادي بحق. فهو قبل أن يحكم كان أعلى رتبة في الجيش السوداني وعن أحقية وجدارة. أما الباقيين ممن حكم من هذه الطائفة "العسكرتارية"، فهموا صعدوا من خلال الحكم لأعلى رتبة في "قوات الشعب المسلحة" وناصرهم من هم بهم راصفٌ سواء من رفقاء الطائفة أو من حزى حزو أجدادهم الغاوون. ها نحن اليوم نعيش نفس الخزي وبين أنفسنا نتقاتل فنهون لكل راغب في أن يستأثر بالبعض ليهننا ويتملكنا..
سيد نفسك؟؟
كيف ندعي بأننا سادة لأنفسنا ونحن الذين نستجدي العون لنطعم والدواء لنتعالج، السلاح لنقتل به أنفسنا، آي سادة نحن والجملان يتناطحا فوق رؤسنا، فيهلك تحت أرجلهم رضعينا وبي عراكهم يكشفوا عورتنا فيتفرج فينا ممن حولنا وهموا بين حزين على هول ما صار فينا وبين شامت على إدعائنا الزائف بأننا..
إحنا أحسن ناس... إحنا شلنا الكأس..
مين أسيادك؟
من ملك قوتك، ملك حريتك ومن ملك قرارك صرت له عبدا. هؤلاء إثنان فقط وكثر غيرهم يملكون ما نحتاجه من علم ومعرفة وتكنلوجيا و و و. هؤلاء ممكن أن يسموا بأسيادك..
رحم الله كل شاعر مجد أمة في متاهات الزمان راحت وشعب يتقاتل أبناءه بلا هوادة ورحمة الله على كل لحن قصيدة يتغنى بها عن عظمة أمة ما تبقى منها إلا ذكريات عن الكنداكة وبعانخي والمك نمر والمهدي الإمام عليه السلام ....

[بابكر مخير]

يا أخوانا..
دآ شنهو الحاصل دآ..
يا أخي زمنا خلاااااص الجديد؟؟
سياسيا؟!
كان بداية عهدنا بالإنقلابات العسكرية..... إنقلاب عمنا عبود...
صحينا الصباح وكنا وكتها ساكنين في بيت مخصص للوالد من وزارة الصحة في شارع عثمان دقنة جنوبه كان روضة أطفال الحي الشرقي "عشرة بيوت" والروضة دي غيرها نميري لي مسجد القوات المسلحة والذي هو على مرمى باقة ورد من القيادة العامة للجيش السودان قبل ما يبقى القوات المسلحة وكانت القيادة بتذكر بيرقها أبيض وأسود ويزين البلاد علم بثلاثة ألوان (الأزرق، والاصفر والأخضر "من فوق لي تحت") له تأريخ كأول ما رفع في السماء ليمثل حكومة السودان والتي كان رمزها وحيد القرن "الخرتيت"..
صحينا صباح يوم 17 نوفمبر وناقلات الجنود تذهب روحة وإياب (على غير عادة الإنقلابات بتاعت السرقة التانية البتجي في أخر الاسبوع والناس نايمة عشان تسرق السلطة .. فهذا الانقلاب كان بداية الاسبوع. "ما هو حسب المتعارف أنهو كان إستلام وتسلم") وإستغربنا الامر الي أن سمعنا من المذياع خبر الإنقلاب العسكري ومعرفتنا بالإنقلابات العسكرية جات من شمال الوادي فقبل تلاتا سنين كان إنقلاب عمنا محمد نجيب والذي لفحهو عبد الناصر وهيص بيهو..
أكاديميا..
قبلنا تأريخ التعليم قديم وفي أخر البوست بتلقى رابط مهم في شأن التعليم في السودان..
لكن إحنا، كنا نعرف جامعة الخرطوم وفي تأريخها كانت تعرف بكلية غردون التذكارية ورصيفها المعهد الفني بجانب جامعة القاهرة فرع الخرطوم وكانت الأنهر التي تغذي الجامعات من الثانويات، بخت الرضا، حنتوب، وادي سيدنا، البعثة المصرية، الخرطوم الثانوية، الأحفاد، المعهد العلمي على ما أذكر ولكن تبع ذلك إنتشار أكبر ومع بداية الحكم الوطني الديمقراطي منه والعسكري..
إعلاميا،،
الإذاعة كانت قديمة ومذيعيها أصواتهم لها نبرة خاصة، الفنانيين، ما بتذكر ناس كرومة وسرور لكن جيلنا تمتع بي أولاد الدبيبة أحمد المصطفى وسيد خليفة وود حي العرب أبراهيم عوض وظهر وردي والكابلي وقبل يفوتني كانوا ناس الهاوي والحويج والجابري وعمر أحمد "أغنية كان بدري عليك" وظهر وكتها صلاح مصطفى وبن البادية وغيرهم.. وفي زمن حكومة عبود، جاء التلفزيون دعم من الألمان وكذلك مركز التدريب الألماني وهو كان كثانوية للتعليم المهني..
ممكن لي قدام نرجع تاني ونشوف أوجه الحياة التانية زمنا والحسي ناس؟؟
يا صغير .. يا محيرني ومتحير looool
https://www.hindawi.org/books/27373961/29/

[بابكر مخير]

دي على هامش "يا أخي الكُبر...."
متلازمات الكبر ممكن يندرج "الخوف" ضمنها..
ما الزول لمن يكبر بيتجنب الشدايد الببقود للدواس، فممكن جدا كان في شبابهو ذي ثابتُ بنُ جابر الفَهْمي لكن الكُبر هداهو وختاهو في مواعينهو..
كدي أولن تبادي نشوف "الخوف" دآ، شنهو ومابه وما عليه ولي العلم هذا إجتهادات شخصية وفي بعض الاحيان مدعومة بحقائق علمية؟؟
في رأيي أنهو حالة إستشعار خفية، لما سيحدث. ناهيك أنهو فعلن حيحصل ولا بس حسابات خاطئة وهنا شيء من العلم وفلسفتي الخاصة، أنهو في أحداث بيشوفها الانسان فترسل الاشارات من العين الي العقل ومنها تعليمات للغدة الكظرية أنها تدشر كمية كبيرة من الأدرينالين وطبعا معروف عن هذه المادة أن تسرع في ضربات القلب، فتلقى الزول الخايف، نفسه متسارع وحتى أنهو ممكن يعرق وطاقتهو اللاإرادية تزيد، نوع رجفة ولعثمة في الحديث وكمان تفكيرهو بتشتت وهنا نذكر الرهبة والرعب وهما مختلفان، إذ في حالتيهما، ممكن الانسان من شدة الرهبة والفزع أنهو يتجمد في مكانهو ويصاب بنوع من الشلل "دآ ما موضوعنا حسي;)"
المهم أنهو وبالرغم أن الخوف ما ليهو دخل في نوع بنية الشخصية الخاصة، إلا أن الزول العادي البتمر بيهو جنس الحالة دي، تطلق عليه مسميات سلبية كتيرة وحتى الخواجات الناس الفاهميين ديل يقولوا ليك؟ chiken..
المثل بيقول: الخواف ربى عيالهو. طيب نشوف المثل دآ وكيف أنهو بيوري، أنهو الخواف دآ؟؟
أكرم وأنبل وأشجع من غيرهو..
كونو الإنسان يخاف على غير"لاحظ الفرق بين علىّ ومِن" أنهو ممكن تصل حد يعرض نفسهو وحياتهو ليغطي على غيرهو "عيالهو". نذكر قصة سيدنا علي بن أبي طالب كرم الله وجهه، أنه رقد في فراش النبي عليه الصلاة والسلام، ليكون هو ولست النبي حال هجم أهل قريش قاصدين السوء. أها في حسي دآ زول خواف حسب فهمنا الخاطيء بيعمل كدي؟؟؟
المهم "السالفة" وما فيها؟؟
كان عندي ميعاد بداية العلاج..
لكن بالله عليكم، خوفة نوع أبو كديس "للذين يعرفوا قصة أبو كديس، أما الذين لا عرفوا؟ فهذا من تأريخ سودان الأمس النضر" وعشان كدي؟؟
بقنع في نفسي أني بكرا لو مشيت، بمشي كبطل قدوتي الكرار ::gap:::gap:::gap:

[عكــود]

تحياتي يا بابكر،

القلب بقى خفيف وما بيقدر على الهبباي في عز الصيف.
ياخي إن شاء الله ما فيك إلا العافية، وخوفنا بيكون على التانين القريبين لينا أكتر من خوفنا على تولاتنا.
كلنا دخلنا زون الخوف والدمعة القريبة، ربنا يصلح الحال ويحفظنا ويحفظ غوالينا.

[بابكر مخير]

قال ليهو: زمنا غير زمانكم
https://www.youtube.com/watch?v=TWXlxrAMw1k

[بابكر مخير]

الكٌبر بخلي دمك ينحرق لمن تشوف الغلط...
الخواجات كانو في السودان عايشين عيشة رغدة ومنغنيغين لي الاخر وإحنا كنا زيادة علي راحتهم، بنريحهم أكتر ونديهم أولوية في كل مضارب الحياة، يا أخي لو شعرنا أنه وجودنا في الشارع بضايقهم، قعدنا في بيوتنا ولو لي الحاجة مرقنا، ياهو منعصرين في طرف الشارع..
الخلاني أتذكر كيف كانوا عندنا مرتاحيين وهم ما جونا زيارة وا جوا عمال أو مقدمي خدمات طبية أو خبراء لرفعة قدرات أولاد البلد ولا حتى سياحة عشان يصرفوا ويدعموا إقتصادنا.
أبدن جونا غزاة مستعمرين ودخلوا بلادنا ما بي فيزة. دخلوها بالدبابات والسفن الحربية والمشاة وشالوا خيرات بلادنا وإستغلوا أراضينا لمصلحة نهضتهم وفوق كدآ، شالوا البشر من البلاد الإستعمروها لي بلادهم عمال عشان يبنوا نهضتهم، فبنوا الانفاق للقطارة وعملوا ف أرخص انواع العمالة وبعد دآ مارسوا عليهم ابغض الممارسات العنصرية والغير إنسانية...
حسي نشوف الفرنسيين الهم لي حسي بيستنزفوا خيرات أفريقيا في مصلحتهم... النيجر واليورنيم البتاخدهو فرنسا عشان كهربتهم المنتجة بالذرة والطلاينة الأبادوا شعوب أثيوبيا وليبيا "طبعا إحنا المستعمر الانجليزي، ساقنا نحارب ليهو في أثيوبيا وليبيا وحتى للمكسيك".. ما عايزين أنهو شباب دول العالم الثالث يجوهم في بلادهم، مع أنهم بيمارسوا هجرة سلمية..
ملاحظة: الفريق الوطني الفرنسي لكرة القدم، يشكل المهاجريين من أفريقيا، أكتر من 70% من تشكيلتهو...:mad:
الشكية لي الله من ظلم الانسان لأخيه الانسان.
إلا ظلمنا لي بعضنا إحنا السودانيين؟؟
دآ شيتن كُتر....
ولا للحرب

[بابكر مخير]

أيام زمان، كان في السودان السينمات مرشوشة على طول وعرض الوطن وإستأثرت العاصمة بعدد منها..
الوطنية أمدرمان وكانت أغلب الافلام التي تعرض فيها درامة وخاصة مصرية وهندية كذلك وبرضك مرة مرة أكشن وفي الاكشن الافلام الغربية الرخيصة في السودان وهي الايطالية بتاعت الغرب الدامي ومنها مثلا مسلس من أفلام "دجانقو"، سينما برمبل تعرض فيها الأفلام الغربية والهندية ذات ذوق رفيع، سينما العرضة وهي بالنسبة للإتنين ديك جديدة وهي كانت افلامها الاسوء نوعية..
بتذكر كان لما نطلع في سقف بيتنا بوضوح، نشوف شاشة السينما وهي كانت متجهة شمالا وعشان كدآ صوت الافلام كان بجيبهو الهواء لي خشم بيتنا.
الخرطوم بحري كان في سينمتين، الحلفايا ودي كانت نوعية الافلام البتنعرض فيها ذات جودة أعلى مقارنة للوطنية بحري ودي ذاتها مقارنة بسينمات أمدرمان أحسن في نوعية الافلام البتعرض فيها وخاصة الهندية والمصري..
أما الخرطوم "عموم" فكانت سينما النيل الازرق هي القمة في نوعية الافلام وكان نادر تعرض فيلم مصري أو هندي وإن حصل فأكيد متميز وأغلب رواد السينما دي، كان طلاب جامعة الخرطوم وسكان الحي الشرقي وأصلن كان ياهم الخواجات وكبار الموظفي الحكومة، من الحاجات البتذكرها وبتميز بيها السينما دي؟ البوفية بتاعها وخاصة سندوتشات المورتديلا ومعها قزازة بزيانوس بااااااردة.
هناك برضك سينما كلوزيوم وهي في شارع القصر وبرضها مشهورة بالافلام الغربية الكويسة وأحيان هندية ومصرية وسينما الخرطوم غرب موقعها من أكثر المناطق أمنا لأنها كانت قريبة من إشلاق البوليس، سينما السجانة وهي في أمرها قريبة من سينما العرضة لأنها خاصة بمنطقة معينة وأفلامها يتم إختيارها حسب ذوق سكان المنطقة.
ودور العرض نفسها صالتها (وهي ما صالة، فسحة عديل وما مسقوفة لكن ليها سور وديمة عالي ومداخل وهي نفسها المخارج، تباع التذاكر على أساس الموقع في الحوش دآ، منطقة يطلق عليها "الشعب" وهي رخيصة الثمن وأغلب الوجود من العامة وبعدها درجة أولى وهي مخصصة لمن يستطيع شراء التذكرة والتي هي نسبياً مرتفعة الثمن وهناك "اللوج" وهذه مجموعة كراسي منفصلة عن المجموعات الاخر بفاصل وفي أغلب الاحيان تشغلها الاسر، بتذكر في سينما النيل الازرق الخدمات للوج كأنها في فندق خمسة نجوم فيها جرسون في لبسه ذي بتاعيين فندق القراند هوتيل..
المهم كل دور العرض دي، كانت ملتزمة ببرنامج مماثل، نشرة الاخبار، تليها (المناظر) وهي فترة الدعايات وعرض للقادم من الافلام في تلك دار العرض المعنية، الإستراحة وهذه قصتها متنوعة، فمثلا في سينما العرضة، لو تعدت فترت الاستراحة خمسة أو ستة دقايق، الجمهور يثور ويطالب بالإسراع في البدء بعرض الفيلم، في بعض الاحيان وخاصة في فصل الخريف، أثناء العرض تهطل الامطار والجميل في الامر أن الكثي يقعدوا في وسط المطر، لأنهو لو مرقوا بروح عليهم شوفت الفيلم وحق التذكرة.
كان هناك عرضان، الدور الاول وهو يكون على الساعة سبعة مساء يعني بعد أن تظلم السماء والعرض الثاني "سواري" وكان العرض الاول هو الاكثر إذدحام فطبيعة أغلب أهل السودان ما بيساهروا برآ بيوتهم إلا في المناسبات، بسبب المواصلات والإنضباط الاسري..
أهااااااا ندخل في الموضوع البي سببه جاشت فيني الذكريات دي..
القصة أنهو الدكتور البعالجني كان أتاريهو قال ليا: العلاج دآ، لمدة أربعة أسابيع، الإسبوعين الاوائل، عاديات وما بتشعر بأي تغيير لا في جسمك ولا نهج حياتك العادي. بعدهن بتظهرالاعراض الإنسحابية..
مع العمر والذاكرة وخرابها، نسيييت القصة دي ومرا الاسبوع الاول والبعدهو عادي والتمتع بالأكل وكل شيء عادي عدآ النضمي الأنا إتحرمت منهو لكن أكيد في ناس حمدوا الله وإرتاحوا من النقة..
أول يوم من الاسبوع التالت، اللهو من الاتنين دآ..
أبتدت القصة تاخد شكل تاني والحصل أنهو.. ناس العلاج وهم أتاريهم عارفيين البيحصل وعشان كدآ بيعملوا ليك مواعيد مع الاخصائي بعد نهاية الاسبوع التاني ودآ الكان.
أها سألني لمن لاقيتهو ومن ناحيتهو تركيز على؟ كيف الاكل والشراب. قلتا ليهو البلع بقا صعب. والشنهو دآك والشنهو والشنهو، يعني لسة كدآ بتاعت تغيرات...
قال ليا: أيوة ما دي هي الاعراض الانسحابية القلنا ليك أنها بتظهر بعد الاسبوعين الاوليين..
أوكييييييييي..
يعني الكان دآك في الاسبوعين الاتنين. كلهو كان المناظر ويا دوبك الفيلم إبتدآ :frown::frown:

[حسين عبدالجليل]

أيام زمان، كان في السودان السينمات مرشوشة على طول وعرض الوطن وإستأثرت العاصمة بعدد منها..
الوطنية أمدرمان وكانت أغلب الافلام التي تعرض فيها درامة وخاصة مصرية وهندية كذلك وبرضك مرة مرة أكشن وفي الاكشن الافلام الغربية الرخيصة في السودان وهي الايطالية بتاعت الغرب الدامي ومنها مثلا مسلس من أفلام "دجانقو"، سينما برمبل تعرض فيها الأفلام الغربية والهندية ذات ذوق رفيع، سينما العرضة وهي بالنسبة للإتنين ديك جديدة وهي كانت افلامها الاسوء نوعية..
بتذكر كان لما نطلع في سقف بيتنا بوضوح، نشوف شاشة السينما وهي كانت متجهة شمالا وعشان كدآ صوت الافلام كان بجيبهو الهواء لي خشم بيتنا.
الخرطوم بحري كان في سينمتين، الحلفايا ودي كانت نوعية الافلام البتنعرض فيها ذات جودة أعلى مقارنة للوطنية بحري ودي ذاتها مقارنة بسينمات أمدرمان أحسن في نوعية الافلام البتعرض فيها وخاصة الهندية والمصري..
أما الخرطوم "عموم" فكانت سينما النيل الازرق هي القمة في نوعية الافلام وكان نادر تعرض فيلم مصري أو هندي وإن حصل فأكيد متميز وأغلب رواد السينما دي، كان طلاب جامعة الخرطوم وسكان الحي الشرقي وأصلن كان ياهم الخواجات وكبار الموظفي الحكومة، من الحاجات البتذكرها وبتميز بيها السينما دي؟ البوفية بتاعها وخاصة سندوتشات المورتديلا ومعها قزازة بزيانوس بااااااردة.
هناك برضك سينما كلوزيوم وهي في شارع القصر وبرضها مشهورة بالافلام الغربية الكويسة وأحيان هندية ومصرية وسينما الخرطوم غرب موقعها من أكثر المناطق أمنا لأنها كانت قريبة من إشلاق البوليس، سينما السجانة وهي في أمرها قريبة من سينما العرضة لأنها خاصة بمنطقة معينة وأفلامها يتم إختيارها حسب ذوق سكان المنطقة.
ودور العرض نفسها صالتها (وهي ما صالة، فسحة عديل وما مسقوفة لكن ليها سور وديمة عالي ومداخل وهي نفسها المخارج، تباع التذاكر على أساس الموقع في الحوش دآ، منطقة يطلق عليها "الشعب" وهي رخيصة الثمن وأغلب الوجود من العامة وبعدها درجة أولى وهي مخصصة لمن يستطيع شراء التذكرة والتي هي نسبياً مرتفعة الثمن وهناك "اللوج" وهذه مجموعة كراسي منفصلة عن المجموعات الاخر بفاصل وفي أغلب الاحيان تشغلها الاسر، بتذكر في سينما النيل الازرق الخدمات للوج كأنها في فندق خمسة نجوم فيها جرسون في لبسه ذي بتاعيين فندق القراند هوتيل..
المهم كل دور العرض دي، كانت ملتزمة ببرنامج مماثل، نشرة الاخبار، تليها (المناظر) وهي فترة الدعايات وعرض للقادم من الافلام في تلك دار العرض المعنية، الإستراحة وهذه قصتها متنوعة، فمثلا في سينما العرضة، لو تعدت فترت الاستراحة خمسة أو ستة دقايق، الجمهور يثور ويطالب بالإسراع في البدء بعرض الفيلم، في بعض الاحيان وخاصة في فصل الخريف، أثناء العرض تهطل الامطار والجميل في الامر أن الكثي يقعدوا في وسط المطر، لأنهو لو مرقوا بروح عليهم شوفت الفيلم وحق التذكرة.
كان هناك عرضان، الدور الاول وهو يكون على الساعة سبعة مساء يعني بعد أن تظلم السماء والعرض الثاني "سواري" وكان العرض الاول هو الاكثر إذدحام فطبيعة أغلب أهل السودان ما بيساهروا برآ بيوتهم إلا في المناسبات، بسبب المواصلات والإنضباط الاسري..
أهااااااا ندخل في الموضوع البي سببه جاشت فيني الذكريات دي..
القصة أنهو الدكتور البعالجني كان أتاريهو قال ليا: العلاج دآ، لمدة أربعة أسابيع، الإسبوعين الاوائل، عاديات وما بتشعر بأي تغيير لا في جسمك ولا نهج حياتك العادي. بعدهن بتظهرالاعراض الإنسحابية..
مع العمر والذاكرة وخرابها، نسيييت القصة دي ومرا الاسبوع الاول والبعدهو عادي والتمتع بالأكل وكل شيء عادي عدآ النضمي الأنا إتحرمت منهو لكن أكيد في ناس حمدوا الله وإرتاحوا من النقة..
أول يوم من الاسبوع التالت، اللهو من الاتنين دآ..
أبتدت القصة تاخد شكل تاني والحصل أنهو.. ناس العلاج وهم أتاريهم عارفيين البيحصل وعشان كدآ بيعملوا ليك مواعيد مع الاخصائي بعد نهاية الاسبوع التاني ودآ الكان.
أها سألني لمن لاقيتهو ومن ناحيتهو تركيز على؟ كيف الاكل والشراب. قلتا ليهو البلع بقا صعب. والشنهو دآك والشنهو والشنهو، يعني لسة كدآ بتاعت تغيرات...
قال ليا: أيوة ما دي هي الاعراض الانسحابية القلنا ليك أنها بتظهر بعد الاسبوعين الاوليين..
أوكييييييييي..
يعني الكان دآك في الاسبوعين الاتنين. كلهو كان المناظر ويا دوبك الفيلم إبتدآ :frown::frown:




تحياتي أخ بابكر:
من كوارث الكيزان أن كل دور السينما في الخرطوم توقفت عن العمل في عهدهم.

نحن الديامة كانت سينماتنا هي سينما النيلين , و إن كنت حينها أفضل سينما الخرطوم غرب /إلوطنية الخرطوم عليها والتي كانت بجوار استاد الخرطوم وكانت تعرض افلاما اكثر رقيا من أفلام النيلين .

[بابكر مخير]

تحياتي أخ بابكر:
من كوارث الكيزان أن كل دور السينما في الخرطوم توقفت عن العمل في عهدهم.

نحن الديامة كانت سينماتنا هي سينما النيلين , و إن كنت حينها أفضل سينما الخرطوم غرب /إلوطنية الخرطوم عليها والتي كانت بجوار استاد الخرطوم وكانت تعرض افلاما اكثر رقيا من أفلام النيلين .

Hassan Gasm
سينما السجانه يا بابكر كان اسمها سينما النيلين و كانت تقع في منطقه المايقوما ومشهوره بعرض الافلام الهنديه و معظم روادها من منطقه الديوم و معظمهم بتعارفوا.
شوف بالله القلوب شواهد، هناك في الفيس بوك، دكتور حسن قسم السيد تداخل معاي في البوست... ههههه.... سبحان الله :L

[بابكر مخير]

كان أيام البشير الاولى، لمن بزغت شمس سودانيزأونلاين. توجه نحوها كل قلم معارض أو قلم لشخص يريد أن يعارض أو هاوي معارضة أو أيدلوجيا طبعه معارض وأيضا مع بدايتها كان هناك فصيل أخر وهو المتعارض عليهم.
شيخ بكري زولن طيب وهو قصد أن يخلق منبر يتفاكر فيه السودانيين أمورهم وشأن بلدهم وعن الغربة والمهجر الذي هموا جديدين عليهو وفعلن يحتاج الامر، أن يلتقي الناس في الغربة في مكان واحد ويتواصلوا لتبادل الاراء والمنفعة..
لكن كما هو حال كل ما يجمع، تجد أنهو يتقاسم الفيهو خصال وأخلاق متنوعة ومتباينة.. أها قدر ما كان تباين التوجاهات السياسية تعمر بها سودانيزأونلاين، كان كذلك رؤى أيدلوجيية ضد النظام ويحملها جناح المُعارِضون وأخرى نظاميية يدافع عنها أولائك ممن المُعارضة واقع عليهم. كان وعائها جامع ولامي "كرش فيل" ما بين الكاتب المحترف والكاتب الغاوي، وكان هناك كلمات والفاظ تتداول مما إستدعى صاحب الموقع التدخل للتقليل من الذي يجري بالموقع وينعكس علىيه في المقام الاول ولمؤسسته بالظن سيء كبير..
كان هناك غير هذا الموقع مواقع عديدة أخرى، شكلها معارض للنظام القائم في السودان (من حينها، لأنه لساتهو 34 سنة) ومضمونها إجتماعي، أدبي وغيره، تلك المواقع إستقطبت من لم يوفق في الانضمام لسودانيزأونلاين أو لم يقبل كعضو أو فض من أصلهو.
المهم زخرت الاسافير بمواقع جمعت السودانيين ووفرت لهم سبل التواصل بين أهل الداخل وأولائك الهايمين في الشتات..
هنا يجب الاشادة بسودانيزأونلاين وقبل ذلك بصاحبها المهندس بكري أبو بكر كمؤسس لمنابر السودانيين الاسفيرية وحدبه الدائم على النهوض بيها وعلى كل الاحوال، لا يمكن أن يلام على كتابات وملاحظات ومشاحنات البعض من عضوية داره..
وهنا يأتي القول؛ أن سودانيزأونلاين ومع الإعتذار لصاحبها والعديد من الناس الكويسين والخلوقيين والطيبين فيها، فيها كتير من القح والقبيح من القول والمعلومات الزائفة والاقلام السيئة وعليا أن أعترض في حال بسودانيزأونلاين على القولة البتقول (كل إناء بما فيه ينضح) لأن بسودانيزأونلاين ولدت وقامت وترعرت على حسن القصد والقيم والاخلاق لكن وبالارجح أن المعارض عليهم نجحوا في خرق من حين الي أخر لحرمت هذا الصرح الشامخ...
الخلاني أسرح في القول دآ..
ود خالي بلالي بروفسير حسن فرح، أنهو دوما ياتينا بروابط لأخبار هامة من هناك وكما هو الحال دوما، أنهو فيها إضافة للقارئ في سودانيات ولكن كمان ما نكون ذي باب من صحيفة (شعور شخصي ربما يكون خاطئ، واعتذر) أو سودانيزأونلاين لمن لست لهم عضوية أو أحقية في عضوية...
إقتراح لإدارتنا،
رأيكم شنهو لو تفردوا منتدى ونسميهو.. من الحيشان التانية ويبقآ فرصة الناس تجيب لينا فيهو من المواقع الاخرى، ناي الراكوبة وجهينة وسودانلاين والكتير.
برضك من الانستقرام والفيسبوك وتنزيلات من اليوتيوب..
يا أخوانا والله وحشتنا مجموعات الحصاحية الفنية..
بالله عليكم، قول لي دآما ياخد منحى غير أنهو مشاركة بريئة..
والله من وراء القصد

[بابكر مخير]

يومتها قلتا؟؟
محل رهيفة بتنقد بقصد أنهو الكُبر دآ هو البرهفها..
لكني لقيت أنهو لو لا الكُبر.. كان نوع الفيني حسي دآ.. ما شيتن لي جنوننا صغار...
دآ داير ليهو زولن فعلن، عاااااش في الدنيا دي جرب وحضر وشاف..
يعني الزول ما هو بيبقا يعاين لي عمرهو وبكلم نفسهو عشان ديمة يركز ويقول؟؟
شنهو يعني ما خلاص.. أدي فرصة للتانيين. ما هو الوساع كويس ولو لا كسكسنا وإتضايرنا، الوسيعة ما بتشيل..
أها النحكي ليكم؟؟
أول يوم مشيت قال عشان علاج الذرة بيحتاج أنهو يقيسوا ليك القناع، يا مؤمن يا مصدق، إتنهزتا من الدغشية، ما هو شنهو؟؟
قالوا الورم إتلحق في بدايتهو وبعد جزارة الليزر، جلسات ذرة والنسبة كبيرة في العلاج..
تحفيز والروح سمحة وكل زول ، مع أنهو نسبياً عمر، لكن طمعان في الزيادة رغم قولي بتاع السطور الفوق;)..
مشيت يا صحبان وهناك لقيت في الاستاف بنية من بناتنا السودانيات، يا حليلها إهتمت بيا وأنا قلتا خلاص أهو في زولن من عندنا وهي فعلن "من عندنا" بت أخويا لينا الله يرحمه من ناس لندن القدام وأني لازم أنستر. ما هو شنهو لي شقاوتي، عملتا ليا home work في موضوع القناع البلبسهو لي الزول عشان يثبتهو في البنش بتاع العلاج..

http://www.sudanyat.org/vb/uploaded/118_1697689663.jpg

قول يا زول رقدوني وجابوا ليهم حاجة ذي القماش كدي ودافية وختوها في وشي وغتت لين الصدر..
بس، أقول شنهو... إتذكرتا يومي داك لمن دخلوني الجحر بتاع MRI وأني زول بعاني من الرهاب وبالذات ال claustrophobia.
ولا إشتغلتا بالبنية السودانية الواقفة جمبي وقولتن تقول عمو خواف ولو لا شوية عيزوتي كسوداني، ظنيتني كنت صرختا..
المهم انهو المهمة بائت بالفشل ولكن كونهو هناك بصيص أمل في العلاج من الورم، أقنعوني وكان سهل إقناعي ووعدت زولتي الكانت واقفة محتارة، بأني سأكون ثابت التجربة الجاية وكانت في اليوم التالي مباشرة ونجحنا في هذا..
لكن ولكنن كبيييييييييرة، بقآ موضوع الجلسات والتي إتحددن بعشرين، هي الحكاية كلها ذي ربع ساعة أو أقل.وبرضك إتحظيت بي بنيتن سودانية وبرضك أبوها من ناس لندن القدامة..
أها لشدة القناع الاخضر وبي صواميل مربوط علي البنش.. شيتن تاني وياها دي الحالة تحت الاشعاع.
وأعدت نفس الموال بتاع قياس القناع ومع بنيتي ديك... غايتهو لو لا أنهو في أوربا... كان حسي إتشال من نمولي لين حلفا ومن بورتسودان لين عند أهلي في دارفور...
خلصنا القصة لكن أتاريها كانت ذي المناظر وبتعدي لكن الفيلم بتاع الHorror وعلى قولهم الاطباء؟؟
بيبتدي بعد الاسبوع التاني، أقول شنهو، الحلق ينقفل وشراب الموية صعب، البشرة ولا يغرنك "فسخت البرهان" ترجع كما أنت ود بلد وأفريقي حر، والغريبة أنهو دقني الكنت إجتهدتا وربيتهو بي مزاج، علاج الذرى حشآ فيهو ولا غنم الحلة الإنطلقن في الجروف..

اها أنا دآك، أول ما فتحتا البوست دآ..
قلتا أنهو القصد منهو عكس تجارب الحياة وحسي ياهو..
دي واحد من تجارب الحياة وربنا يغطيكم ويحفظكم :cool::cool::cool::cool:

[عكــود]

اللهم أنت الشافي أنت المعافي لا شفاء إلا شفاءك
اللهم أشف بابكر ود مديني شفاء عاجلاً لا يغادر سقما
اللهم اجعل مرضه كفارة له وطهور

عليك بسورة يس ففيها شفاء بإذن الله تعالى

[بابكر مخير]

بابكر ود مديني
يا الله من نضمي الشوايقة الطاااعم وحنين دآ..
يا با بالجد عات؟؟
دي أقوى وأنجع من جلسات علاج الذريي..
أتذكر من علاجات الملاريا الزمان، شراب الكينا، أها الشيء دي، أخير منها وردت المرض (قع أقوم قع أوقع، قع أنوم، قع أورّد;))، وبرضك من العلاجات الحارة حقنة الفيتامين بالوريد..
أها الشيء الإسمهو علاج الذرى، هو في ظاتهو، هويين. كلها ما تامة ليها تلت ساعة في الجلسة وعلى قول الدكاترة، أول إسبوعين بيمروا هينات، لكن بعد دآك بتظهر الأعراض الناتجة عن العلاج.
التقول بس المنبه المضبوط دآك وبيضرب في الساعة بالتمام والزمان، الإسبوع التالت، شيء خنقة في الحلق وجغمة الموية التقول بلعتا ليك نبقة نوع النبق الهندي وأها الشعور بيها حاقصة يستمر معاك زمن، لمن تهدآ، يمروا الإسبوعين الاخرانيات وبعدها، شوف بقآ؟؟
الوزن ينقص، المزاج يتعكر، النفسيات تنحطا، الكلام سك يا جنآ وإن قلتا تقول تنضم، الصوت من الحلقوم ما بيقوم..
وأتاريهو الشيء العشرين جلسة العملتهن ديل، بيحرقن الجلد وين كانوا منشنين عليهو. أها نوع الحريق السطحي، ما نوع البتقاس بالدرجات لأنهو إسبوعين مع إستعمال كريم مرطب والقشرة بتقع..
حسي أربعة أسابيع مما إنتهيت من العلاج ولي حسي النضمي مجافيني والبلع دآ إلا بالغسب..
أها عات دي حالة؟؟
لكن بكل حال.. نقول مرحب بالعلاج إن كان أخرتها نجاح وقطع شك في كل الحالات أسهل وأخير من نوع المرض دآ...

[عبدالحكيم]

يا الله من نضمي الشوايقة الطاااعم وحنين دآ..
يا با بالجد عات؟؟
دي أقوى وأنجع من جلسات علاج الذريي..
أ
لكن بكل حال.. نقول مرحب بالعلاج إن كان أخرتها نجاح وقطع شك في كل الحالات أسهل وأخير من نوع المرض دآ...

بابكر ود مديني ..
لك من الله ما لا نهاية سلام وما لا نهاية سلامي من المرض ..
أسأل الله أن كشف عنك الضر كما كشفه عن نبي الله أيوب وتبرأ من الذري .. كما المؤمن مصاب ..
وَلَمَن صَبَرَ وَغَفَرَ إِنَّ ذَٰلِكَ لَمِنْ عَزْمِ الْأُمُورِ
أي: لمن الأمور التي حث الله عليها وأكدها، وأخبر أنه لا يلقاها إلا أهل الصبر والحظوظ العظيمة، ومن الأمور التي لا يوفق لها إلا أولو العزائم والهمم، وذوو الألباب والبصائر..
فكلك صابر وصاحب عزائم وهمة وحكمة وبصائر ..
وشدة وتزول فما من داء والا له دواء الا السام وهو هذا الثقيل ..
نتمناك دايما بعافية ودوام الصحة ..
عاطر التحايا وسلامات ... وانت بالعافي التخصك في المصارين وتبقى لك هدم ...

[بابكر مخير]

كما المؤمن مصاب ..
وَلَمَن صَبَرَ وَغَفَرَ إِنَّ ذَٰلِكَ لَمِنْ عَزْمِ الْأُمُورِ

الحِّكيم، عابد الحكيم..
تحايا..
جدي، يابا العم..
في الصبر ليهو قولتين:
عن المرض؟
"المرض داير صبر و نحن عندنا"
عن الصبر؟
"الصبر، خادماً لأبونا الشيخ"
..
نرجع لي قولة: يابا العم...
هو عبد الكريم بدري، الأخ الأصغر لي بابكر بدري..
زمن صغرتنا كنا نسمع خيلانا وخالاتنا يقولوا ليهو (العم) ونحنا عارفين أنهو جدنا فهو عم أمهاتنا وأبائنا وعملية حسابية أبجدية، يبقآ ما ممكن نقول ليهو العم وقولة جدي عبد الكريم، صعبة وتقيلة وجافة. فبقينا نوقلها بمحنة السودانيين "يابا" العم....

[بابكر مخير]

بعد إنقطعنا مدة بسبب الإنشغالة في أم حلقومي، جيت بي شمار عن شيتن وأريتهو؟! ينطبق علي القسام على جنا العم سام (اللئام)..
أها أنا ذي الكدي هزمتا الشيء الصعب دآك وياهو دآ بنحكي الحكاية؟؟؟
من قبل صباحات الله تشرق، ومقلتاي ما غطاهن ساتر ولا خدر من ضوء اللمبة السهارة في طرف الغرفة والهي في الأصل كل سكني الذي يجمع، مجلسي ومرقدي. كان زمان مكان شيشتي ويااااااا حليلها. ما الما يتسماشي؟ حرمني منها ومن سجارتي اللف المميزة... يا حليلهوم، "ودوما بطراهم"..
فلا نمت ولا بقيت صاحي، بس ياهو راقد وأتململ ومستني ساعة مواعيد الدكتور..
ما كنت ذي كل مرة شايل هم المنظار وحشرهو في فتحت الأنف. بل بالعكس كنت منتظر بترقب تلك اللحظة لأنهو حتكون "جهينة وعندها الخبر الأكيد"..
يا أنهو إشعاعات الذرى أتت أكلها وكانت أوقع فتكا من قنبلة هيروشيما على الورم السرطاني في الصندوق الصوتي. أو أن ذاك الخبيث أفشل ذاك القصف على رقبتي المسكينة والذي يضاهي قنابل النابلام في فيتنام وآلية الحرب التي تبيد في أهل غزة هذه الايام وإنتصر على الإثم فوق الحق.
دخلتا والدكتور عاجز أن يقول شيء غير أنهو أحضر ذاك الجهاز (المنظار) واللفظ يحاكي الواقع بأنهو؟؟
حشرهو في فتحت الأنف اليمين حتى كاد أن يتعدى البلعوم (يعني الحلقوم الإنشغلتا بيهو الفترة الفاتت) الي أسفل الإمعاء وحين أخرجه ظننت أنها روحي هي الإنسلت، إلا أن بشائر الفرح أشرقت في وجهه ولا شعوريا من ذاك الذي رأيته طرت من الكرسي وقلدتهو.
الدكتور طمني أنهو الصندوق الصوتي أصبح خالي من الورم (الخبيث) وكأنه قال لي. أضحى لك أن تتحدى مصطفى السني وعاصم البنا وحتى الطيب مدثر وتبدآ الغنا... فالصندوق الصوتي (بقا عال العال) وهذا فأل بقدرتك هزم الكبار والأقوياء وأنك هزمت ما يعرف بالمرض السرطاني...

[عكــود]

ألف حمد لله على السلامة
ياخي ده خبر مفرح والله،
وقّنك حسناتك ودعوات الناس

[ناصر يوسف]

بعد إنقطعنا مدة بسبب الإنشغالة في أم حلقومي، جيت بي شمار عن شيتن وأريتهو؟! ينطبق علي القسام على جنا العم سام (اللئام)..
أها أنا ذي الكدي هزمتا الشيء الصعب دآك وياهو دآ بنحكي الحكاية؟؟؟
من قبل صباحات الله تشرق، ومقلتاي ما غطاهن ساتر ولا خدر من ضوء اللمبة السهارة في طرف الغرفة والهي في الأصل كل سكني الذي يجمع، مجلسي ومرقدي. كان زمان مكان شيشتي ويااااااا حليلها. ما الما يتسماشي؟ حرمني منها ومن سجارتي اللف المميزة... يا حليلهوم، "ودوما بطراهم"..
فلا نمت ولا بقيت صاحي، بس ياهو راقد وأتململ ومستني ساعة مواعيد الدكتور..
ما كنت ذي كل مرة شايل هم المنظار وحشرهو في فتحت الأنف. بل بالعكس كنت منتظر بترقب تلك اللحظة لأنهو حتكون "جهينة وعندها الخبر الأكيد"..
يا أنهو إشعاعات الذرى أتت أكلها وكانت أوقع فتكا من قنبلة هيروشيما على الورم السرطاني في الصندوق الصوتي. أو أن ذاك الخبيث أفشل ذاك القصف على رقبتي المسكينة والذي يضاهي قنابل النابلام في فيتنام وآلية الحرب التي تبيد في أهل غزة هذه الايام وإنتصر على الإثم فوق الحق.
دخلتا والدكتور عاجز أن يقول شيء غير أنهو أحضر ذاك الجهاز (المنظار) واللفظ يحاكي الواقع بأنهو؟؟
حشرهو في فتحت الأنف اليمين حتى كاد أن يتعدى البلعوم (يعني الحلقوم الإنشغلتا بيهو الفترة الفاتت) الي أسفل الإمعاء وحين أخرجه ظننت أنها روحي هي الإنسلت، إلا أن بشائر الفرح أشرقت في وجهه ولا شعوريا من ذاك الذي رأيته طرت من الكرسي وقلدتهو.
الدكتور طمني أنهو الصندوق الصوتي أصبح خالي من الورم (الخبيث) وكأنه قال لي. أضحى لك أن تتحدى مصطفى السني وعاصم البنا وحتى الطيب مدثر وتبدآ الغنا... فالصندوق الصوتي (بقا عال العال) وهذا فأل بقدرتك هزم الكبار والأقوياء وأنك هزمت ما يعرف بالمرض السرطاني...



كبيرنا الحبيب د.بابكر مخير ألف حمداً لله علي سلامتك العافية تبقالك غطاء و توب علي الدوام يا رب

[بابكر مخير]

شكرا لكم، لدعواتكم وتهانيكم..
حقيقة كدا؟
لو لا انتم والدعاء الذي استجاب له المولى عز وجل ودفعني ان اكون غير انا.. فوقفت قويا ومحاربا، مؤمنا بما يريده الله لي وانه الكريم، الرحيم جاد علي بمعايشة احساس الملايين من المرضى والفوز بالكثير من الدعاء لإتمام صحتي وان كشف لي محبة الناس تجاهي.
إنه العارف، العالم بالناس ودواخلها. فلم يركنني لنفسي فسخركم لي قوة والا لو كان ترك الامر لي لوحدي.....
ما ظنيتني البخاف من ركوب الطيارة، دآك كنت قدرتا غلبتهو.🤣🤣🤣
مجددا الحمد لله والشكر لكم..
محبة واجلال💗💗💗💗💗

[بابكر مخير]

والله دآ حرام في حقي..
يعني ما كافيني الفيني من الحلق والبلعوم والركب والمفاصل والضغط البقآ بين الامراض التانية، قزقزة تسالي..
جات حرب أوكرنيا وقلنا شر بعيد ما علينا فيهو وبعدها جات في اللحم الحي، دعم وجيش والجيش برية من حرب جماعة البراء واللساتنا فيها نتفرج في المهذلة دي بين الدبيب وجناهو أو العقرب وأمن ووويرة أو بين إبليس وجناهو سطان Satan..
وحسي عشان يكتمل الوجع والحرقة. الحاصل في غزة...
كيزان فلسطين ما عايزين يجيبوها على بر والبدفع التمن هم المساكين الفلسطينين (تشابه الحال وعمايل كيزان السودان) وهم من طرف الغرب من طرف أخر، ما هو ما اسرائيل بل الدعم هايل من الغرب..
اسرائيل لو براها فهي إنهزمت في أكتوبر السنة الفاتت لكن ديل وخاصتن الامريكان الما دخلوا حرب وكسبوها من فيتنام وافغانستان وحتى الصومال وحسي البحر الاحمر والحوثيين..
يعني حالة صعبة (أوع زول يقول أحسن منها العرس););)

[بابكر مخير]

https://www.alrakoba.net/31907053/%d8%a5%d8%b5%d8%a7%d8%a8%d8%a9-%d9%86%d8%ac%d9%84-%d9%82%d8%a7%d8%a6%d8%af-%d8%a7%d9%84%d8%ac%d9%8a%d8%b4-%d8%a7%d9%84%d8%b3%d9%88%d8%af%d8%a7%d9%86%d9%8a-%d8%a8%d8%ad%d8%a7%d8%af%d8%ab-%d8%b3%d9%8a/

[بابكر مخير]

قالوا: الشكية لغير الله مذلة..
أها أتاري المزلة دي راكبانا عدلة وقلبة...
قول من طفولتك، إن زول إتعدى عليك بي شوفة ساكت فيها صرة وش، تجري تشتكي لأمك، إن درتا ليك شبط، تمشي تشتكي لأبوك عن حوجتك. تمشي الدكتور عشان تشتكي ليه عن مرضك، تمشي البوليس تقول تشتكي الزول المؤجر بيتك وما عايز يمرق ليك منهو، تشكي المراة لي أبوها وأخوانها وهم طناش وتّنزلَ ترجع وإنتا مهيض الجناح ، تشكي إسرائيل لي مجلس الامن وأمريكا تزلك وتلعن ساسفيل جدك وترجعك مزلول بأنه دفاع عن النفس..
ظنيتهو الشكية الوحيدة الما فيها مزلة..
ياها الفي الكعبة لمن ترفع يدينك ولي المولى عز وجل؟!
تشكي ليهو الكيزان والديش والدعامة..
أها دي ياها الشكية الما فيها مزلة لكنها بتأخد وكت :eek:

[بابكر مخير]

هل هو الثقيل بشكل ولا الواحد هو اللساتهو بتلويق ومتشبط بالحياة وعايزها تكون ذي زمان وردية اللون وحلوة المذاق وسهلة الإيقاع؟؟
معروف في كل الكائنات الحية والجماد، أنهو لمن تقدم بتتغير فيها حاجات كتييرة..
الحديد بيصدي وبيتاكل ويهش لمن قوتهو بالتمآآآم تروح ويبقآ واهن حتى نسمة تفلفلهو.
الجبل قدر ما هو عالي ومرتفع ومتراص التأكل حتمي ليهو وأها يبقا يضمحل وحجمهو يصغر وممكن ليين يتلاشى.
الفيل الماكن دآك؟ "مرة كان في فيل يسبح في حوض السباحة، جات نملة قالت ليهو أطلع من الحوض؟؟ لما طلع قالتله أرجع خلاص.. فسألها ليه؟ قالت ليهو إفتكرتك لابس المايهو بتاعي" :gap::gap:. أها جسمهو مع الكبر، بيترهل ويكركب وعن سكات يمشي محل بيموتوا وهناك يهلك (من الأقوال المتداولة؛ أن الفيلة لها أماكن مخصصة بتموت فيها).
يعني الحقيقة الثابته من دآ؟؟
كل شيتن بالعمر بتغير، فما في سبب لي الشكية في أنهو الضغط إرتفع والسكر ضرب والمعدة بقت ما بتتقبل أنواع الأكل الشهية والنظر ضعف والكرعين بقن تقاال وما بتشالن بي هينة من الواطة والسماع طشاش ذي العيون والكلام بقآ كُّتر والقلب عضلاتهو ضعفن والدم إلا يسرسب بشيش وبي صعوبة يصل الدماغ ويروي الذاكرة ما تروح ويمنع الزهايمر..
تااااااااني أها؟؟
خاتي الشقا ولا خاتي البقع فيئ..
وعن قناعة الزول يفتش محل الفيلة بتمشي.. ويمشي يتلم عليها وهناك الباقي يبقا وإلا ياهو المصير

[بابكر مخير]

أمس بنشوف في الاخبار؟؟
جابو منياوي وفي كلمة موجها لي ناس الجزيرة؟
أنهو جآي عشان يطرد الدعم السريع من مدني والقرى والحلال..
طبعا الزول دآ؟؟
حاكم دارفور والهو عاصمتها الفاشر اللهيا نارها مولعة والدعم السريع ماسك أغلبها..
أها للجمبي قلتا ليهو:
بس منياوي دآ باقية عليهو المقولة البتقول:
بتها .... وشايلة موسها تطهر:rolleyes::rolleyes::rolleyes:

[بابكر مخير]

وما أنفك، كل يوم يأتي بجديد..
وذي ما ذكرتها قبل كدي، قصة المرحوم بروفسير أحمد عبد المجيد، في إختصار!؟
لمن صاحبه قال ليهو عن الرد اللقاهو من الطبيب الصيني على شكواه المتكررة عن؛ كل يوم لمن يصحى في شيء بيألمه غير الكان بألمهو أمس: في العمر بتاعك دآ لو صحيت وما في شيء بيواجعك. تكون...
أهآ دحن ياها دي القصة الباقية عليا وعلى قولة أُماتي "بنات بابكر" كل ديكن بكوكي وكل زولن طاعنآ شوكي، إلا حارة اللتي.
الواحد شايف أنهو البيهو دآ من ألم يومي ووجع متنوع وضعف متشكل. ما في زول بيكون يشكي بمثل هول ما بي والإنعكاسات السالبة عليا..
أها مع الكُبر، أمس ما ذي اليوم وبكرآ قطع شك ما ذي أمس..
المستجدات التي صابت مني مرما ليها مع الصلوات:rolleyes:..
أول ما قمتا تصلي كان ضهر، تتسأل؟
يا ربي أنا صليت الصبح ولا كنت صليت الفجر، تعاين وتفتش لي شيتن يذكرك بأنك فعلا صحيت وكت الفجر. ياهو دآك المغ MUG بتاع الشاي في التربيزة، فدي بتقوي إحتمالية أني صحيت وكت الفجر ولا الصبح وشربتا الشاي وهنا شبه أكيدة أن أواصل في مشروع صلاة الضهر.
كّبِر والحمدو وبعدها صنة تفتش لي الايات التقراها، غايتهو أهو عاركها ولا تاركها تخلص ركعاتك وسجداتك وتتشهد وتقوم..
بس؟؟؟
هل هو زهايمر ولا سرحان ولا نوعن كُّتر. يا ربي أنا سلمتا؟
وتدخل في هاجس صلاتي صحيحة ولا ناقصة وواجبن تنعاد..
على أيتها حال قالوا أنهو السلاميين مشروعان، مش شرعاً. المهم تقنع نفسك بأنك صليت ولتفادي حيرة صليت الضهر ولا لءآ تترك محل صلاتك بصورة واااااااضحة ولا تدع للبس حين صلاتك القادمة..
دي عينة من حق الكُّبُر:mad::mad::mad:

[بابكر مخير]

الكُبر، حكاويهو ما بتخلص، بل كل يوم تزداد..
تصحى الدغشية وبتاعت لندن مختلفة كليتن عن دغشية السودان، هناك الديك بشيش، بشيش يبدآ ليك في النغوشة، لساتهو ما بيكون طرق صوتهو، حاجة كدآ ذي بتاع الميكرفون قبل ما يبدى الفنان يغني، تستا، تستا، واحد واحد... لغاية ما الموجات تظبط (طبعن الموجات دي طوالي تتداخل ليا مع صندوق الحبال الصوتية والزنقة ال لي حسي ما إتفكت وما أنفكت نكد عليا أوقاتي، خلاص يعني الوحد كان فنان ومحتاج لي صووته).. أها في الدغشية وبين الديك وصدى آذان الفجر، كتير مرات يكون في مارثون، أيتهم حيلحق يشنف أذانك قبل التاني، الآذان لي الإضنين ذي الحُلى وصوت الديك ذي نقرقعر الحلة..
القصة أنهو من الدغشية والتي تحل بعد نوم متقطع يتخلله صحيان وكانو بالمنبه، كل ساعتين لي زيارة روتينية للغرفة المجاورة حيث الدش وحوض غسيل الوش والشيء الأهم، تبقآ فرضاً صحيت وفعلن إستيقظت، راضي إو إغيظت.
البيغيظ أنهو ما في برنامج لي اليوم الفي وش إبتداء دآ؟
ما زولن معاشي، عاطل.. تتكاسل وتدخل الحمام عن رغبة وما فرضا ذي الكان كل ساعتين بالليل دآك..
تبدا المراسيم وهنا الواحد من خلال هذه الصفحة بتقدم بالإعتذار كل من شاركني السكن أو جاورني في السكن أو حتى الذي يسكن أو يسكنوا في المربع والمربع المقابل الأنا ساكن فيهو، فعملية سواكي "غسيل الفم والاسنان" كانت مزعجة وبعد مضاعفات علاج الذرى اللخبطة البقت في الحلق، زاد الإزعاج..
صارت تقارب صوت طيارة لوكهيد إس آر-71 بلاك بيرد وهي طايرة جم رأسك،، وفي الحمام كم المدة طول، ما هو ما في عجلة وخليك بتعمل ليك في شيتن فيهو فايدة صحية، حسب البيقولوا؛ أنه الواحد يسوِّك سنونه لمدة دقيقتين (جمعية طب الأسنان الأمريكية) لكن مع العطلة تديها ذيادة دقاقيق ويضاف ليها صنفرة اللسان والغرغرة والتفنن بإصدار أصوات الحشجرة الخارجة من حلق صندوق حباله الصوتية فارغ لخلق جلبة متنوعة بين صهيل الحصان وزئير الاسد وصوت ضرب النوبة وهنا يستحضرني الأمر جله كما هو مصور في قصيدة ليلة المولد...
وهنا حلقة شيخ يرجحن
يضرب النوبة ضربا فتئن وترن
ثم ترقص هديرا أو تجن
وحواليها طبول صارخات فى الغبار...
وهنا نكتفي ونقول؟؟
إئيا دي الحالة :frown::frown:

[بابكر مخير]

يوميات زولن يعاني من ثِقل الثقيل...
تتناول بالفحص والتمحيص واحدة من العُقد في حبل العمر والتي تتضخم مع مرور السنين في البداية والأيام في هذه المرحلة الثقيلة جداً...
لعبة "البِلي"..
كانت في أيام الطفولة لها رونقها ومتعتها..
أم لمن لا يعرفها؟؟
الرابط: https://www.facebook.com/permalink.php?story_fbid=pfbid02mpRwoRoMk9BQzNZAmV YJFuMNxjSyEEtfRgiaXnt6cmgp2eTvHEMAk5ayTsve1mq9l&id=459813264150330
..
هذه اللعبة كانت موسمية، في أوقات الإجازات المدرسية ووقتها كانت شوارع وأزقة المدن لا تخلوا من الأطفال وهم يلعبوها.. قدر ما كان أغلب من يمارس هذه اللعبة هموا من الذكور، إلا أنهو في بعض الأحيان كانت بعضهن من البنات يمارسهن مع إخوتهن..
مع مرور العمر على الانسان، ينتقل الي ممارسة ألعاب أخرى وهكذا سنة الحياة ولكل زمان دولة وحال. المقصود بالدولة هو ما يفرض على الانسان من نظم والحال هو نسق الحياة وتغير ظروفها، بمعنى أن الوضع الإجتماعي يملي أنك لا تلعب في الشارع وأن الإهتمامات يغلب عليها طابع الجد ولست اللعب.
إلا أن يصل الإنسان الي العمر الذي يدخل فيهو عامل أقوى وأعتى من ما تفرضه الدولة ويؤثر على نسق الحال وهو الكِّبر..
يومياتي هي من واقع، إجترار مرُ الذكريات ولعبة البِلي ونفنط حرقة هجمة الثقيل الإسمهو "الكُبر" ومسببات الحرمان؟
نبداها بي القدرة على أن تمسك "الضراب" وتصوبه تجاه البلي، حين الحقيقة أن هناك حتمية سقوط "الضراب" من اليد فهي تتراجف التقول ضاربها صاقعة والرؤية تقف مانع أكبر من رؤية "اللين" وهذا إن نجحت أصلن أن تكون واقف بإعتدال في خط البداية.
وختمتها معضلة إن صدف وإجتاز "الكهل، العجوز، الزول كبير العمر" كل هذه المراحل في تسلسل اللعبة وأصبح الضراب وسط اللين وإفتراض أن يلعب "نظر" والتي هي أن تمسك "الضراب" بالأصبعين الوسطي والإبهام في مستوى يحازي الكتف أو دونه قليل ولا فوقه وتطلقه ليصيب البلي في المثلث "اللين" بقصد أن يخرج واحدة أو عدد أكبر..
أها مشكلة دي يعيشها الذين صاب منهم (الثقيل) موجعا في المعانات بالحمام أو أن يبصق في سلة الأوساخ وفي الحالتين لا يصيب..
لن أُكتر في الشرح، برغبة دون الخوض في أمور حساسة..
وإلى يومية أخرى..
سلام
http://sudanyat.org/vb/attachment.php?attachmentid=2372&stc=1&d=1713206067

[بابكر مخير]

"شدت"
لعبة من ألعاب الصبا أيضا.
http://sudanyat.org/vb/attachment.php?attachmentid=2373&stc=1&d=1713393375
حسي الواحد بي كرعينهو الإتنين ومتكل ليهو على عصاية ولابس جزمة نوع دكتور شول
المعروفة بأنها لينة وطرية وتحافظ على قدرة القدم في أن تكون راكزة وثابتة وبيمشي خطوة بي خطوة ما خوفتن:wink::wink::wink:..
ممكن يقع ويشق الحوض، ما في حاجة إسمها هشاشة العظام، شوف الحكمة الطفل عضامهو لينة التقول معمولة من بلاستيك، يقع ويقوم، ينطط ولا كانهو حاجة حصلت وإن خلااااص؟ إلا ياها بكية وينسى الوقعة. لكن ناس أحنا, يتجبس ورقاد إسبتالية في السرير لمدة كمين شهر وهنا بقآ:o؟؟
الخطورة من الإصابة بي موية الرئة وقرقرينة السرير، حتى الحمام الكان كل ساعتين عندك واجب زيارتهو. تنحرم منهو...
لا شوف لعبة "شدت" دي بيكون الطفل فيها ينطط بي رجل واحدة وماسك التانية بيد يده ويدافر عشان ما يرتمى على الارض أو خلى سبيل الرجل من اليد ويخسر المنافسة وبدل ما يزف الي الميز كمنتصر. يشيع عروس مهزوما الي الميز..
مشكلة الوقوف هي مع الكُبر أنها مواجهة بي ال(imbalance) ودآ من حقيقة أنهو "محل رهيفة بتنقد" والرهيفة دي ياها الزول لمن يكبر :o:o

[عبدالحكيم]

"شدت"
لعبة من ألعاب الصبا أيضا.

مشكلة الوقوف هي مع الكُبر أنها مواجهة بي ال(imbalance) ودآ من حقيقة أنهو "محل رهيفة بتنقد" والرهيفة دي ياها الزول لمن يكبر :o:o

الدكتور / بابكر مخير ...
سلمك الله من كل بلاء وحفظكم الله وأهل السودان .
وكل عام وأنت بخير ..
**********************
وترجع لي شدت من جديد
وليس ذلك على الله ببعيد .
يمر العيد وكل عام وانت سعيد
**********************

قد شمّرتْ عن ساقها فشُدّوا
وجـدَّتِ الحربُ بكم فجِـدّوا
والقــوس فيها وتَـرٌ عُـــرُدُّ
مِثلُ ذِراع البَـكرِ أو أشــــدُّ
لا بـدَّ مـما ليـس منه بُـــــدُّ

ما عدمناك ****************

[بابكر مخير]

وترجع لي شدت من جديد
وليس ذلك على الله ببعيد .
يمر العيد وكل عام وانت سعيد
**********************

قد شمّرتْ عن ساقها فشُدّوا
وجـدَّتِ الحربُ بكم فجِـدّوا
والقــوس فيها وتَـرٌ عُـــرُدُّ
مِثلُ ذِراع البَـكرِ أو أشــــدُّ
لا بـدَّ مـما ليـس منه بُـــــدُّ

ما عدمناك ****************

الحبيب العزيز
هي ما واقفة بس عند شدت والبلي.
دآ حتى الفات وفات بعد ما كان لعبة أيام الصبا، إنقلب وبقآ؟؟
أنهوالعمر فات وماشي في الفوات...
اللعبة دي بالجد مستحيل تصور أنه زولن عجوز يقدر يحلم أنهو يلعبها؟
إتصور أنهو البيلعبوها يكون متفرشخين في الواطة وفي لحظة إن بقت "الرمة" إترمت في ضهرو، يكون شب واقف وبداء الجري للحاق بصاحبها..
وبعض اللعيبة ما بتفرشخ بل يكون في وضع "أم قللوو" وهذه الوضعية مع الركب الحسي دي. يستحيل القيام منها.
مرة بيا طرفة أيام الconfinement في كلية الشرطة وهناك الحمامات بلدية وكان عندي مشكلة مع الركب.. طلبت إذن بالسماح ليا الذهاب للبيت مرتين في اليوم والبيت كان قريب. وافق حينها مدير الكلية ولكن لإكمال الإجراءات طلب مني إحضار خطاب من طبيب بأن الركب لحقن ركب العربية الهلمان. مشيت أخي الكبير الأكبر دكتور جعفر بن عوف وكتر خيرهو عمل ليا الجواب.. لمن وديتهو لي مدير الكلية. ضحك لمن ضرسهو بانت..
السر في كدآ؟؟
دكتور جعفر هو أخصائي الاطفال الشهير:eek::eek:
المهم إعتمد الجواب برضهو وسمح ليا بالمطلوب..
أها معقول زول سنة 75 ركبهو ما شايلاهو!!
يقدر علي جلست أم قللوو ولا يتفرشخ في الواطة ويقوم علي حيلهو;);)

[بابكر مخير]

يا أخي! هي الروح بتروح..
فترة من الزمن ولينا لندن ما اليها ديك ذاتها الكانت. الأيام بقت فيها شهور والشهور الفاتن وكأنها سنين، ما كانن سبع جحاف؟ فيها ضرع الحنان جفا ونبع الفكر نضب بعد ما في الفهم لينا بكرم أوفا. شمسنا الضواية بت الخال غربت وبعلها سيل الكرم إنقطع. عانينا فيها فترة وذي ما بقولوا: رأسنا إنقطع...
جات لحظة إنقشعت غيوم الوحشة وإنفتح نفاج الخلاص وقرر الحبان، العودة لي نفس المكان في إيدجور الكان مسيخ، دون حلاوة طعم وجاف ونشفان.
أها؟ أنا دآك إنشحنت فيني طاقة إيجابية وردت عروق الحنان إتملت، تريانة بأمل اللقاء بالإتنين البشوف فيهم أم قاسم والأمير أبو خليل، شبهم مع بعض، ظاهر في هدوء الكرام الفيهو وجمال النساء الكاملة الفيها.
وفي لهفة شوقي لي اللقاء طغت على عقلانية الفكر ومسحت روئية حقيقة نفسي في أن أراعي ذآك الشيب؟ وضعف قدرته الجسدية وتركزيه الذهني، فكان الهم الوحيد هو سرعة الوصول للمبتغى. المقالدة والمطايبة والتمتع برؤية صاحب البسمة المفرحة وتلك ذات الإطلالة السمحة في تلك البقعة الكائنة في لندن حيث تفوح رائحة بخور الصندل السوداني المتميز من عند مدخل مبنى العمارة لترحب بك وتطمئنك بي أنك وصلت ديار حاتم الطائي والكنداكة فاطنة السمحة قبل أن تدخل تلك الحديقة الغنا، حيث الجود والعطاء.
مع تلك اللهفة ولسرعة الوصول للمبتغى، أمامي كان خيارات، هل بالتأكسي "الكاب" ولا بي الأوفر، إلا أن الخيارين. عليا فيهم الإنتظار، بس العجلة للرؤية ساقتني أن أفكر في أركب عجلة "بسكليتة (ibike)" والمسافة أصلن قريبة من مكان سكني الجديد.
ركبتا العجلة وفي وكتها جاني شعور يوم ركبتا صهوة جواد أول مرة في حياتي سنة 76 الألفية السابقة، لمن كنت في دورة تدريبية في كلية الشرطة ببري شرق الخرطوم، إحساس بتاع زول إتشلهت بين الأرض والسماء وبرضهو أنهو ميزان العجلة "الدركسون أو المقود" بقا ذي سير اللجام مع الفارق الكبير في أنهو اللجام واجب تمسكهو قوي وميزان العجلة بإرتخاء وسلاسة. المهم إمتطيت علو العجلة وبديت "التبديل" وهذه الكلمة تتوافق مع وصف الفعل، فأنت تبدل رجل لتكون فوق حين التانية تحت وتغير الوضع لتكون الرجل تحت والتانية فوق، غلوطية بس "ذكرتني حسين خوجلي وغلوطية القرد... ههههه" وأنا في حالة في التبديل والبسكليتة بدت من تحتي تعاني من الإنتظام في السير على خط مستقيم وبدأت تتمايل في توازنها وأن ترسم مؤشر زقاق على الأرض وهنا؟! أفقت من نشوة التهور الغير معقول وغير مقبول، فوقفتا المهزلة دي ونزلت من صهوة ال (ibike) وشكرت الله من قلبي أن الله نجاني، حمدت الله أني كامل بنياني الجسدي ولكني مشوش التفكير ومرتج التوازن.
وهنا جات الصقعة وأنهو التلفون فداني من الوقعة بنفسه وفقدتهو. إلا عات موازنة مع الحدث قلتا في نفسي ولي نفسي:
يا أخي! هي الروح بتروح خليهو التلفون..
إلا أن تجلت حقيقة. ربنا ديمة كريم ورحيم وهو ياهو العارف الحال وما مستخبي منهو شيتن وأنهو شراية تلفون جديد في الحالة! دي ضرب من المحال. فسهل الأمر أن سخر رجل عظيم ولقى التلفون مرمي في الأرض مستوحشا في ظلمة الليل فأخذه وإتصل بي "مدون" ليزف لها خبر أنهو وجد الضال وهو له مأوى ومسكنا على أنهو صباح اليوم التالي سيسلمه.
وقد تم أن رجع التلفون لمَكمنه سالما بعد أن كان في لحظتها ليلة الأمس؟؟
كرامة وكفارة.....

[عكــود]

التلفون لو ضاع فداك يا حبيبو
وإنت الغالي، بس تاني ما تجازف
أملنا فيك كبير ولسع قدامك مشاوير من المحبة

[بابكر مخير]

بس تاني ما تجازف
تسلم الحبيب وإتا الأغلى

من الأقوال؛ الجن بداوآ، كعبة الإندراوآ.
أنا بفتكر أنهو المقصود بالإندراوآ هو خلل ذهني بإرادة ذاتية ما موضوع مرض ذي الجنون. ففي حالتي دي أنا هجمني هذا الخلل وهو ما يقال عنهو عندنا كسودانيين؛ طرطشة وهي وصف لي تصرف وقتي من زول قليل أو عديم المسئولية فيعود عليه شخصيا أو مجتمعيا بضرر..
يعني إتصور وأنا أهتز والعجلة تتفاعل معي بنفس الصورة، كان ممكن أخم الدلجة وتكون في وكتها في عربية مسرعة تعفصني؟
إن ما لحقتني أمآت طه، أكيد بتودني بداية طريق الماناة، بداية من كسر الحوض وإنقلاع الترقوة ونزف في الدماغ ورقاد سرير لي شهور وهاك يا تقرحات سريرية وموية في الرئة وعيييييييييييييييك....
ودآ كلهو لحظة طرطشة وشغل إندراوة وعدم مراعاة لي عامل السن...

[بابكر مخير]

حكاية العمر دي، عندي كسوداني شايفها كدآ؛ حكاية هوبلي وحكاية هوبلي دي طبعاً إشتهرت بعد مقولة المرحوم متولي عيد عند أحيل للمعاش وهوما كان وصل لي سن المعاش وقد قال: حكومة الهوبلي، الرفدت متولي "إشارة لمتولي عيد".
بالنسبة لينا الحكاية ما مربوطة بأي من العوامل لا الصحية من نوع الغذاء ولا البيئة من ناحية الطقس ولا بأي من العوامل المتعارفة. أنا بفتكر أنهو تشكيلة الإنسان السودان ذكر كان أو أنثى الفوضوية والقصد هو التنوع الإثني، لا هم عرب ولا أفارقة، شيء ساميين وحاميين وخلطة متنوعة الأعراق والأصل.
هوبلية العمر عندنا تتجلى واضحة في حكاية الموت. تلقى في واحدة من الاسر، أنها تفقد الصغار قبل الكبار، شافع يافع يموت وجدهو وحبوبتهو عايشين، شديدين ولضيدين. يعني حكاية الموت فاقدة الإنضباط تماما كطباع أهل البلد ذاتها، متناقضات وتلقاها جلية في كلامهم، ذي حكاية قاعد يمشي ولا بيتكلم ساكت وبرضك في وصفهم كما عرفوا بين الشعوب التي خالطتهم. فهم شعب هاديء وصبور وفي نفس الوقت أحمق.
الخلاني أتذكر الحكاية دي أنهو أغلب السودانيين ممن ربنا يطول في عمرهم ليصلوا في سفر السنين لي السبعين، بنضربوا بي خلل المزاج يعني بيدبرسوا ودي هي الكلمة الانجليزية "depression" حتى من ملاحظاتي لي رويحتي دي وكتيرين ممن هم في "ستلايتي" بتضربنا الحالة دي. حتى أني سميتها متلازمة السبعينات (70`s syndrom) والحكاية دي ما بتخفى على زول عن نفسهو ولا في ناس السبعين من طريقة المعيشة والمتغيرات البتحصل فيها وعليها. قعاد في البيت طوالي، عدم الرغبة في مقابلة الناس، الشهية تنسدآ، لا تعجبك الاشياء الجميلة وكتييييييييير من جنس الحاجات دي....
غايتهو الكُبر حاجة ثقيلة بشكل :o:o
هاكم جنس الحالة دي

https://www.youtube.com/watch?v=ewxDv1kY_Gs

[بابكر مخير]

يا أخوانا الكُبر دآ تاريهو سماحة نفس وشجاعة أدبية وفيهو كمية كدآ من العلو على الصغار وأنهو الزول بيشوف حاجات كتييرة من الزمان برفضها ويستصغرها وأنهو الأن بيعرف عظمتها..
كان الواحد فينا إن داس ليهو رجل حد أصغر منه سنا أو حجما. ما بيعبر الحكاية ويستمر في دربهو وإن قال ليهو كمة جارحة، ما بيشرع ردها على غيرهو ووقعها الصعب..
أه أنا دآ "طبعا ناس تقول ليك؛ والعياذ من قولة أنا (بعضهم بيربطها بأنه للذات العليا والتي تصف نسفها بالجمع ﴿ إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ ﴾ وغير كدآ؟ أقول شنهو لمن أرجع الامر لنفسي، أقول الإسم رباعي يعني... غايتهو وغايتون كبيييييييرة".
نبتدي ونتعوذ! بابكر ابراهيم قاسم مخير، كنت فرعتا ليا زمان بوست منتقدا فيهو شيخ الامين طول الله عمرهو (شيخ التشيكس)، لكن سبت أنهو الزول دآ ما هين وثبت دآ بفعايلهو الجديدة والحميدة حسي في أيام حرب الجهلاء الحايكة في السودان، فقمتا ودون تردد نزلتا ليا رد في نفس البوست (http://sudanyat.org/vb/showpost.php?p=1199736&postcount=112)
دي ذكرتني برضهو يومتها، شاب من أبنائي الأحباء الإتعرفت بيهم مؤخرا في لندن، قال ليهو كلمة وبحكم الكُبر وسرعة الإنفعال. رديت بعنف وهو كان شيء ما حقهو يكون صادر من زولن في وضعي الإجتماعي والأدبي والعمري والأكاديمي. امهم زالت السكرة وجات الفكرة ورسلت للشاب رسالة إعتذار عما بدر وهو يظهر إستمر لفترة حامل في نفسهو وما ترددت في أني أخاطب جمع أبنائي من شلتهو وغيرهم ممن تعرفت بهم وتعرفوا بي وكتبت ليهو وليهم إعتذار عن تلك البادرة..
أكييييييد لو كنت بي صحة شبابي وعنفوان صباي. ما كنت عملتا كدآ إلا كان أكون نبي ولا غبي...........
نص الرسالة لأبنائي وإخوتي للرد العنيف والإعتذار عنه...
(أبنائي الأحباء وإخوة الأعزاء. أعتذر منكم لما بدر مني مساء الأمس فقد خرجت عن حدود المعقول وما هو مقبول. حين أن واجبي نحو إبنائي أن أكون لهم قدوة كما هو دور الإباء المنوط. ولأخوتي صون مركزهم القوي بين الأبناء لا أن أعكس ضعفا. الأن أبنائي وإخوتي؛ أطلب منكم أن تفغروا لي هذه الذلة... قال المولى عز وجل (قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعاً إِنَّهُ هُوَ الْغَفُورُ الرَّحِيمُ) وجاء في حديث شريف (كل ابن آدم خطاء، وخير الخطائين التوابون) فاللهم أجعلنا ممن رحمهم الله وغفر ذنوبهم وأن نكون من خير الخطائين التوابين لنفوز برضاءه وعفوه وبمسامحتكم ورضاكم وعفوكم.. بابكر مخير

[عبدالحكيم]

حكاية العمر دي، عندي كسوداني شايفها كدآ؛ حكاية هوبلي وحكاية هوبلي دي طبعاً إشتهرت بعد مقولة المرحوم متولي عيد عند أحيل للمعاش وهوما كان وصل لي سن المعاش وقد قال: حكومة الهوبلي، الرفدت متولي "إشارة لمتولي عيد".
بالنسبة لينا الحكاية ما مربوطة بأي من العوامل لا الصحية من نوع الغذاء ولا البيئة من ناحية الطقس ولا بأي من العوامل المتعارفة. أنا بفتكر أنهو تشكيلة الإنسان السودان ذكر كان أو أنثى الفوضوية والقصد هو التنوع الإثني، لا هم عرب ولا أفارقة، شيء ساميين وحاميين وخلطة متنوعة الأعراق والأصل.
هوبلية العمر عندنا تتجلى واضحة في حكاية الموت. تلقى في واحدة من الاسر، أنها تفقد الصغار قبل الكبار، شافع يافع يموت وجدهو وحبوبتهو عايشين، شديدين ولضيدين. يعني حكاية الموت فاقدة الإنضباط تماما كطباع أهل البلد ذاتها، متناقضات وتلقاها جلية في كلامهم، ذي حكاية قاعد يمشي ولا بيتكلم ساكت وبرضك في وصفهم كما عرفوا بين الشعوب التي خالطتهم. فهم شعب هاديء وصبور وفي نفس الوقت أحمق.
الخلاني أتذكر الحكاية دي أنهو أغلب السودانيين ممن ربنا يطول في عمرهم ليصلوا في سفر السنين لي السبعين، بنضربوا بي خلل المزاج يعني بيدبرسوا ودي هي الكلمة الانجليزية "depression" حتى من ملاحظاتي لي رويحتي دي وكتيرين ممن هم في "ستلايتي" بتضربنا الحالة دي. حتى أني سميتها متلازمة السبعينات (70`s syndrom) والحكاية دي ما بتخفى على زول عن نفسهو ولا في ناس السبعين من طريقة المعيشة والمتغيرات البتحصل فيها وعليها. قعاد في البيت طوالي، عدم الرغبة في مقابلة الناس، الشهية تنسدآ، لا تعجبك الاشياء الجميلة وكتييييييييير من جنس الحاجات دي....
غايتهو الكُبر حاجة ثقيلة بشكل :o:o
هاكم جنس الحالة دي

https://www.youtube.com/watch?v=ewxDv1kY_Gs

د.بابكر/ متعك الله بالصحة والعافية وأمد الله في عمرك ...
أحيانا أرجع لهذا الفيديو وأقعد أضحك ... بمناسبة الكبر ...:p:D

https://www.youtube.com/watch?v=k_XZcYlZZkE

مع خالص اعتذاري وتقديري للجميع ونحن في ظروف الحرب ... ما كان ينبغي أن آتي بمثل هذا الفيديو لكنه الكبر ...

اللهم .. إنا نعوذ بك من فواجع الأقدار ..
ومن خراب الديار ..
ومن فراق الأحباب ..
ومن الفزع ..
والخوف ..
وحزن القلب ..
وحرقة الشعور..
اللهم .. أصرف عنا هذه المحنة ..
وازل عنا تلك الغمة ..
بلطفك يالطيف .. وكرمك ورحمتك يا أرحم الراحمين.
اللهم .. احفظ .. السودان .. واهله

[بابكر مخير]

د.بابكر/ متعك الله بالصحة والعافية وأمد الله في عمرك ...
أحيانا أرجع لهذا الفيديو وأقعد أضحك ... بمناسبة الكبر ...:p:D
[/COLOR][/SIZE]
العزيز حكوم
ياكآ الفاهمني صاح..
الحياة ما بتنقاس بعدد السنين، حتى إن كانت تسعين..
إلا ياها الروح هي المحك..
شوف حسي ناس التمنين وأواخر السبعين "بايدن وترامب" يومتها في التلفزيون ولا في حلبة مهارشة الديوك كمان شفتا ليا بعد دآك بايدن وفاتح زراير قميصهو الفوقانيات (يزروهو سارق) وترامب دآك أصلن مهوس بالجيكس (خيهو في غباهو بكرا بيجيبن خبرهو)..
http://http://sudanyat.org/vb/attachment.php?attachmentid=2375&stc=1&d=1720353532
قولك تب عجبني يا حكيم وسيد الحِّكم...
الشباب، شباب الروح.....

https://www.youtube.com/watch?v=Hr3LL-oMveM

[بابكر مخير]

البروفسير محمد الريح "حساس محمد حساس".....
يشارك ناس عمرنا، بعض من الذكريات

https://www.youtube.com/watch?v=kQdm75763fU

و؟؟؟
الذكريات صادقة وجميلة
مهما تجافينا بنقول حليلة
الذكريات في كل ليلة
توحي للحبايب اشياء كثيرة
فمن يغني يذكر خليلة
ومن بينعي ماضي وذميلة
و من بيعبود وقد طال ليلة
فل تذكورنا كثيرة او قليلة
الذكرة تجمعنا ونمرح طويلة
الذكرى للحبان اجمل اشارة
هي للقلوب مراة وللحب منارة
مرات تجود بجنانة ومرة نارة

[بابكر مخير]

يومتها وظنيتني ذكرتها قبل كدي..
زينب بنيتي باقي ليا القرن الماضي "تاكيا لطول الفترة الزمنية التي مضت على الحادثة، قالت ليا، عندي "واحدة" عايزة أساعادها عشان تقدم لجوء فشوف ليا محامي مختص في أمور الهجرة. عندي كان واحد محامي بورمي أصول صينية، ضربتا ليهو فسألني سؤال فات عليا أسألوه لي زينب، إسمنها وبلدها الاصلي. قلتا ليهو والله ما عارف لكن أديني فرصة وأرد عليك بالاجابة.
أها يا زينب "الواحدة" دي إسمها منهو ومن وين بلدها؟؟
والله يا أبوي ما عارفة، وصعب عليا أسألها، لكنها من دول أفريقيا جنوب الساحل والدول الجنوب السودان، لكنها محتاجة مساعدة، وقبل ما أضرب ليهو ضربتا خماسيي في سداسيي ولقيت أنهو عيب أرد على الزول دآ وأقول ليهو كدآ، فحافقد إحترامهو ليا أني زول غير منضبط وسبهللي ساكت.. فقلتا ليها أنا حأكلمهو أنك حتسوقي "الواحدة" وتمشي ليهو وإن شاء الله يقوم باللازم..
أها القصة دي رجعت بيا بفكرة وااااااحدة؟؟
أنهو الطريقة الإتا إتربيت عليها، بتربي بيها جناك وإن شاء الله تستمر إن كانت هي مزروعة في الجينات..
أها وما فيهو أني لقيت غير أمر الوقوف مع الناس، هناك كمان أشياء لبعض الناظريين تبدوا صغيرة ولكنها كبيرة جدا.
يوم ومحمد طفل صغير، ظنيتني فقدت حاجة وفتشتها فيي البيت وصعب عليا أن ألقاها، فسألتهو،،، إتا شلتا الحاجة دي، قال ليا لآ. قلتا ليهو ما تكذب، مدينة بتي قالت ليهو أمشي يا محمد أوضتك، وقبل ما أسألها تصرف شنهو دآ، بادرتني؛ يا أبوي إتا ولا أمي بتكضبوا علينا، قلتا ليها: لآ، طيب إحنا بنكضب عليكم، قلتا ليها: أبدن..
طيب محمد يججيب الكضب من وين..
وهنا قصة الكضب هي هذه الخصلة التي طبعنا عليها، كذب بقصد الإدعاء بالمعرفة أو بقصد الخوف أو بقصد الإضرار بشخص ما أو بقصد تمجيد زولن ساكت..
ودآ المخلي الحرابة لي حسي مدورة..
ياسر والبرهان والكيزان والفلول تكضب وإستشاريين حميدتي ما بيدوا الحقيقة كمان.. وياهو نعيش في دوامة سببها شيتن جوانا...
كذابيين أو كضابيين وكدآ

[بابكر مخير]

مع الكُبر لمن شيتن يحصكن ليك في رأسك. بيبقا الياهو في منامك وأصل ما غصبين تفتح عيونك وقبل تلبس نضارتك، إلا بتشوف كل شئ أغبش. أها بتنقط القطرة وشوية الشيتن الذي السحابة المغطية العيوينات ينغشع، تلبس النضارة وبعدها توضح الرؤية والدرب من السرير الي كفتيرة الشاهي توضح معالمهو.
عات ما معاشاتي وولا شغل ولا مشغلة، تسوي كباية شاهيكا وتمسح ليك قطعة توست ولا إتنين ووكت الكفتيرة مويتها تغلى والتوستات يتحمرن، تكون أديت المهام الصحية وقووول أنها عشرة وشوية صباح، برضك بتلحق الصُبح... وطوالي على التلفزيون، ما هو الإشعاعات المنطلقة منهو ليها تأثير مغنطيسي.. درتا وإن ما درتا غسباً عنك قاعد قدامهمو وتسلم عمش عيونك وطرش إضنينك للمذيعات الحسان وأنا ما عارف هل الإعلامية التلفزيونية لازمتن تكون سمحة وشعرها أسود طويل وتجوط ليك أبو حرف الجيم لمن نطقهو الصحيح إنسى ومن باب القول؟ أنا في واحدة في الحدث ولا العربية غايتهو من القناتين ديل برفع ليها القبعة بكامل الاحترام، لغتها سهلة بس عندها حشرجة كدي ما عاجاني وما عشان سبب مربوط بالتلفزيون لكن بسبب شيتن عشتي وياهو طرطش ليا صوتي وحسي أنا خايف عليها وبوصيها تراجع أخصائي ENT شاطر.. غايتهو لو سمعت كلامي تجي لندن وتتصل بيا أوديها لي زولي العالجني. شفتا الزولة دي غير لغتها السهلة كمان أديها إعتزازها بنفسها وأنها إمراة ما بتتشبه بالرجال وتلبس بنطلون ولا نوع المطولة شعرها ولا مصلقة فيها حق هنديات من أسيا ولا أمريكا الجنوبية، باقي ليا إسمها تهاني فلك التهاني قد نلتي رضاي "شنافع وما كتير أالبعجبني:eek:"..
نرجع كدي لي السبب الفتحتا بيهو بوستي دآ..
التلفزيون ما فيهو شيتن غير الحروب، كنا مع روسيا والأوكران وقلنا بعيد بلا يخمهم. مشوا ديل جابوهو في الحتة البتوجع الوطن الاصلهو من يومهو ما شما عافية إلا يمكن زمن "كوش" حرابة بين الجيش وصنيعتهو، بين برهان وحميدتي وفي الاصل بين الكيزان وذات أنفسهم ما هم المتحاربين بين بعض "كيزان" والبموتوا أهل السودان ودورت في غزة وبرضك هم ناس حماس ما "كيزان" وبدفع تمن العملوهو شعب فلسطين صاحب الحظ الشيء مثلنا فهو برضهو ما عندهو وجيع ذينا كان، ضفة وأبو مازن اللاصق في الكرسي ذي وحافظ والقرد الجديد دبيبة والطامع فيها كمان البرهان..
يعني زول في عمري كدآ، البيشوفهو في التلفزيون دآ؟؟
أكيد بيجيب خبرهو وخاصتن أنهو عاش أيام في بلد الجنيه فيها قيمتهو تلاتة دولار وهبشة ويعادل ظنيتهو عشرين شيلن إنجليزي وإحنا طلبة في تشكسلوفاكيا كانت الكبة سبعمية كرونا، أها حاجة مدينة من خير أبو قاسم بعد كل شهر كدي تنفحني بي عشرة جنيه سوداني وأستلمها إتناشر إسترليني. اليوم دآك هو شنهو الما بتعمل يا أخي أكتر من راتب أستاذي في الجامعة. لكن كمان هو لي الحقيقة بي راتبهو حكومتهو مسكناهو وموفرين ليهو كل شيء رخيص ومتوفر..
ما ما عندهم كيزان يسرقو خير البلد ذي ناس عبد الباسط وكرتي ومامون حميدة لعنة الله عليهم

[بابكر مخير]

أيام صغرنا وفي شبابنا وحتى فترة نضوجنا وبداية تحمل المسئولية في التلاتينات وصهر خبرتنا ومعرفتنا ودرايتنا ليين أول السبعينات..
كنا بنتحمل كل الأمور من خاصة لي عامة وبي كل طيبة خاطر وسماحة خلق ورحابة صدر، بي هدوء وجلد وصبر والواحد كان وعلى قول الانجليز very flexible، يعني لي درجة تقارب عدم الإكتراث.
أها مع الكُبر والتغيرات الجسدية المنهارة والعقلية المتلاشية والنفسية السالبة وضعف العزيمة في الوقوف ومواجهة الصعاب وإنعدام الرغبة في تحدي الأهوال والتصدي للصعاب وأنهو الشخصية تضحى من قتالية الي إنهزامية ومن مصادمة لي متهالكة. أها ينتج من هذا أنك تعمل على تنويم العقل الواعي وتستعيض عنه بالعقل الماضي، عقل زمان، بالذكريات الكانت فيهو لما الأدباء هم الصفوة والمتعلمون هم القادة والسيدات هن المستورات وساترات الحال والكلام عند المحاميين والعلاج عند الاطباء والتسلسل الاجتماعي نسيجه معروف وقت كان الاساتذة لهم الرهبة والهيبة والمكانة السامقة وللمهندسين تركت الأناقة والذوق وحسن الهندام. أيام كان كل زول ليهو دوره المقدر والمعروف والذي لا يتجاوزه ليزاحم الاخرين في وضعيتهم في شكل ذاك النسيج الاجتماعي المنتظم، فالصيدلي له دوره وللطبيب مكانته، لا دآ ولا دآ بتداخل في عمل الاخر ولكنهم بيكملوا بعضهم.
هناك على سبيل المثال النجادون وإختلاف مجالتهم، قول بتاعين المراتب والعامليين في مصانع الاثاث وبتاعين البردعات للحمير وهودج الجمال، الإسم يجمعهم ونوع العمل يفرقهم ولكنهم حلقة في عقد مجتمع متسامح كما التسامح الذي كان مَلأَ قلوب أهل السودان بإختلاف أجناسهم وأعراقهم، دياناتهم ولغاتهم..
أنا سرحتا بعقلي الماضي براحته وفرحهو وسعادتهو، بعيد من عقل زولن كهل يعيش في واقع مظلم لا ترى فيه الخير ولكن رغم دماس ظلامه تشوف فيهو العجب؟؟
أتذكر وأنا لسة جديد في الشرطة كان المدير العام المرحوم له المغفرة الفريق عبد الله حسن سالم قد أوقف (تعبير عسكري) حينها صديقي الحبيب الملاحظ "نقيب شرطة" عبد الحميد محمد عثمان بيرم لأنه وهو يقود سيارته ما كان خاتي الكاب في راسهو وهو لابس الذي الرسمي وأتذكر أني أخدتا ليا من قرصة صغيرونية لمن كنت قاصي كم القميص الميري (الحكومي) لحدي فوق الكوع، حين التعليمات أنك تكِّفهو لنفس المكان وعلق قال ليا يا مخير إنت مدخل تحسينات يعني على اللذي الرسمي وربنا حينها منعني من الايقاف.
قبل كم يوم هالتني مشاهد في فيديوهات أولن تبادي خطر على بالي؟، كييييييييف يا ربي لو كان المرحوم عبدالله حسن سالم (وللذين لا يعرفوا، فهو من قندتو "البرهان برضهو") شاف الفيديوهات دي.
فيديوهات لي واحد لابس رتبة عميد قوات مسلحة وهو بيعمل سيلفي، يا ربي الزول دآ ماخد موافقة من روؤساهو.
الطامة الكبرى كمان فنانة مشهورة لابسة ميريي وهي بتغني وماسكة الميكرفون بيدها اليمين وعاملة تحية باليد الشمال والإندهاشة في أحد الفيدوهات بتاعتها واحد عسكري بحييها بالتحية العسكرية وإن كان في جيش البرهان، عادي جداً ضابط بي دبابيرهو يحيي مدني كما فعل عبد الفتاح للعديد من الرؤساء...
ناجي مصطفى مش العقل الماضي نعمة من ناس جنس دآ؟؟ :(
https://www.youtube.com/watch?v=AwJxWLUoQQo

[بابكر مخير]

الوحشة بقت مع العمر دآ؟
ذي الرفيق/ة، ملازمة الزول، بس الرفيق/ة بيكون بشر وهنا بون شاسع بين رفقة الوحشة ورفقة البشر..
دي بتخليك حتى إن بقيت في إستاد مليان خلق، تمل وجودهم وحتى الشيء البتحضر فيهو، ما ليهو لا طعم ولا ريحة ذي الماء، بس الغريبة يقولوا ليك الماء تعرف بأنها لا طعم لها ولا رائحة؟؟
يعني الزول يكون عطشااااان ويلقى ليهو كباية موية "موية زرقاء عادية ما ديك الباااااااااردة" ويمسكها ويقرضعا وتمجخ بي طقطقت اللسان ديك والبعض من المرضي عليهم يقول؛ الحمد لله والعادييين ياهو قولة: آآآح.. معقولة ما ليها طعم والتلذذ بي تذوقها دآك كله؟ مش الطعم بس كمان وتاني شيء عدم الرائحة... كدي خليها تصب وريحة الدعاش تهب عليك وتشعر بي متعة وراحة سيبها المطر، حسي ناس الحكومة ديل الكلهم من جمب طين النيل والسمك البلطي مشوا يزاحموا ناس بورتسودان في رزقهم، ما بيشموا زفارة البحر الأحمر وتقول ليا لا رائحة لها، بعدين برضهم ظنيتهم بيوصفوها بعدم اللون..
طيب من ويييين جات قولة أزرق سماوي ولا ذي ما قلتا قبل شوية "موية زرقا" ولا يقول ليك تشوف وشيهو لامع تقول قزاز نضيف ما فيهو خدشة والقزاز طبعا من صفاته أنهو see through (انظر من خلال)..
كسرة صغيرة وعن اللون الازرق؟؟
الأزرق البودرة
الأزرق السماوي
الأزرق الكهربائي
الأزرق الفاتح
لون مايا الأزرق
اللون الأزرق الفولاذي
....
طيب النرجع لي موضوعنا بتاع الوحشة..
هي كما يبدوا أنها واحدة من متلازمات الكُّبر وبفتكر أنها حالها كحال وجع العظام والتهاب الفصال العظمي وتاكل الغضروف وتهالك عظام الفك وتضخم البروستاتا وضعف السمع وزغللة العيون فقدان التوازن في المشي حتى لو في جريدة في الواطة ممكن تعتر ليك والكثير من الامراض، حتى أنه لمن ممن هموا مثلي يمشوا للدكتور ويشكي من علة أو مرض. الدكتور ولا بيتردد وأول شيء يقولهو ليك؟؟
طبعا مع عمرك دآ، كل الاعراض دي حاصلة ولا بد. يعني ما تخوت ليا راسي وأمشي شوف ليك ركن كدي "قعمز" أقعد فيهو لمن يقضى أمرا كان مكتوبا..
غايتهو ياهو إلا بس قولت: الشكية لي الله
ننسي كدي الهم والغم دآ ونشوف، طبعا بيقولوا نص الكباية المليان. لكن هو في الحقيقة بقا الشريط الفي قعر الكباية وهو أجمل شيء حسب البفتكر أنهو شيتن الغلب بيهو الوحشة؟
هو الأحفاد والاسْباط...
ربنا يحفظهم ويحفظ أمهاتهم وأبائهم

[بابكر مخير]

سودنا المسكين والمنحوس. حالتهو تتمثل في قصة زولنا محمد احمد (الاغبش) المريض بالسكري ورجله استئصلت والتانية ملتهبة من جرح غوير وشالهو المستشفى. الدكتور ابتدى المعاينة ولسة بفكر في البتر خوف من انتشار الغرغرينا. اها لي حظ محمد احمد العاتر، هناك شافع ود مصارين بويوض، اهلو جابوهو. قال: بيلعب مع طفل جيرانهم في الفيلا الجمبهم، اتزلق في البلاط وخدش ركبتهو.
طبعا الدكتور هرول بانزعاج شديد لمعاينة ود المصارين البويوض وساب زولنا في حالته..
اها علاج الشافع شغل المستشفى كلهو مدة اسبوعين واكتر شوية. قبل ما الدكتور يطرى زولنا، دخلت حالة تانية والمريض زولن عندهو واسطة قوية وبتكلم فرنسي وبدأ الاهتمام بي حالتهو اهتمام يتناسب والواسطة. الوكت دا الغرغرينا اكلت رجل زولنا ومرقت لي الكرش وعملت تسمم في الدم و(الاغبش) بين الحياة والموت وراجي سيل المرضى الهاي هاي ينتهي ويرجع ليهو الدكتور كان يلحق شيء يعالجهو...
السودان لسة مجلس الأمن قال يناقش مشكلتهو وقبل ما يستأصل منو جزء تاني..
جات غزة وحسي لبنان..
متين يا ترى، زولنا الاغبش يلقى ليهو ضهر عشان يلقى الاهتمام.
ولا ياهو الا بس العلاج الكي (حرب البلابسة والدعامة)؟؟
حسبنا الله

[بابكر مخير]

تونس مع صديق عن الاخبار المنتشرة في الميدا بين السودانيين، عن إنتصارات الجيش وشبه الإستيلاء التام على العاصمة.
قلت ليهو: تعرف ما بضاهي فرحة السودانيين بالعودة للسودان بعد دآ؟ إلا سعادة المصريين بأننا حنغور منهم..
قال ليا: سعادت شنهو؟؟ دآ إقتصادهم حينهار 😱😱
سكتا لأني إتذكرتا كلمات من خطاب لي مالك عقار..
https://www.youtube.com/watch?v=KcXNOOL2ZZI

[Abdullahi Gaafar]

حبيبنا باكر
حتي نص الكباية المليان طلع مجرد سراب
تعبنا وهرمنا بسبب مباراة الأحلام ودفيق الموية على السراب
بروستاتا وووو

لله الحمد من قبل ومن بعد

[بابكر مخير]

حبيبنا باكر

وباكر ;) لناظره قريب. أما لينا السودانيين. فباكر أسود ولناظره مهيب، مخيف، مرعب..
أنا بفتكر دكتور منصور خالد، لمن كتب النخبة السودانية وإدمان الفشل. لم يوفق في المعني. فهو الجيش قبل تلك النخبة التي قصد وهو للأسف كان واحد منها عليه الرحمة ومن أكثرهم تاثيرا في فشلها..
تفتكر يا الحبيب؟
أخر النفق فيهو نور ولا ضلام دامس يحجب رؤية أخر النفق :mad:

[بابكر مخير]

قال الله تعالى (إِنَّما يَفتَرِي الكَذِبَ الَّذينَ لا يُؤمِنونَ بِآياتِ اللَّـهِ وَأُولـئِكَ هُمُ الكاذِبونَ).
كما قال الله تعالى (هَلْ أُنَبِّئُكُمْ عَلَى مَن تَنَزَّلُ الشَّيَاطِينُ* تَنَزَّلُ عَلَى كُلِّ أَفَّاكٍ أَثِيمٍ* يُلْقُونَ السَّمْعَ وَأَكْثَرُهُمْ كَاذِبُونَ).
وقد قال الله تعالى (سَيَقولُ الَّذينَ أَشرَكوا لَو شاءَ اللَّـهُ ما أَشرَكنا وَلا آباؤُنا وَلا حَرَّمنا مِن شَيءٍ كَذلِكَ كَذَّبَ الَّذينَ مِن قَبلِهِم حَتّى ذاقوا بَأسَنا).
وقد ورد في الذكر الكريم (إِنّا قَد أوحِيَ إِلَينا أَنَّ العَذابَ عَلى مَن كَذَّبَ وَتَوَلّى)
وعن النَّبي صلى الله عليه وسلم، قال:
آية المنافق ثلاث: إذا حدَّث كذب، وإذا وعد أخلف، وإذا ائتمن خان
كفى بالمرء كذبًا أن يحدِّث بكلِّ ما سمع
ويلٌ للَّذي يحدِّثُ فيَكذِبُ ليُضحِكَ بِه القومَ، ويلٌ لَه، ويلٌ لَه
رأى النبي صلى الله عليه وسلم رؤيا في عذاب وعقوبة الكاذب، إنَّه أتانِي اللَّيْلَةَ آتِيانِ، وإنَّهُما ابْتَعَثانِي، وإنَّهُما قالا لي انْطَلِقْ، وإنِّي انْطَلَقْتُ معهُما… فأتَيْنا علَى رَجُلٍ مُسْتَلْقٍ لِقَفاهُ، وإذا آخَرُ قائِمٌ عليه بكَلُّوبٍ مِن حَدِيدٍ (الكلوب، حديدة منحنية معوجة الرأس)، وإذا هو يَأْتي أحَدَ شِقَّيْ وجْهِهِ فيُشَرْشِرُ شِدْقَهُ إلى قَفاهُ، ومَنْخِرَهُ إلى قَفاهُ، وعَيْنَهُ إلى قَفاهُ… قالَ: ثُمَّ يَتَحَوَّلُ إلى الجانِبِ الآخَرِ فَيَفْعَلُ به مِثْلَ ما فَعَلَ بالجانِبِ الأوَّلِ، فَما يَفْرُغُ مِن ذلكَ الجانِبِ حتَّى يَصِحَّ ذلكَ الجانِبُ كما كانَ، ثُمَّ يَعُودُ عليه فَيَفْعَلُ مِثْلَ ما فَعَلَ المَرَّةَ الأُولَى قالَ: قُلتُ: سُبْحانَ اللَّهِ ما هذانِ؟… قالَا لِي: أما إنَّا سَنُخْبِرُكَ… وأَمَّا الرَّجُلُ الذي أتَيْتَ عليه، يُشَرْشَرُ شِدْقُهُ إلى قَفَاهُ، ومَنْخِرُهُ إلى قَفَاهُ، وعَيْنُهُ إلى قَفَاهُ، فإنَّه الرَّجُلُ يَغْدُو مِن بَيْتِهِ، فَيَكْذِبُ الكَذْبَةَ تَبْلُغُ الآفَاقَ
في المسيحية:
اِبْتَعِدْ عَنْ كَلَامِ ٱلْكَذِبِ ، وَلَا تَقْتُلِ ٱلْبَرِيءَ وَٱلْبَارَّ، لِأَنِّي لَا أُبَرِّرُ ٱلْمُذْنِبَ (اَلْخُرُوجُ)
لَا يَسْكُنُ وَسَطَ بَيْتِي عَامِلُ غِشٍّ. ٱلْمُتَكَلِّمُ بِٱلْكَذِبِ لَا يَثْبُتُ أَمَامَ عَيْنَيَّ. ‘
طَرِيقَ ٱلْكَذِبِ أَبْعِدْ عَنِّي، وَبِشَرِيعَتِكَ ٱرْحَمْنِي. ‘ (اَلْمَزَامِيرُ)
ٱلْمُتَكَبِّرُونَ قَدْ لَفَّقُوا عَلَيَّ كَذِبًا ، أَمَّا أَنَا فَبِكُلِّ قَلْبِي أَحْفَظُ وَصَايَاكَ (اَلْمَزَامِيرُ)
وتحت أخلاق اليهودية جاء : الكذب والمدح الكاذب وشهادة الزور والحلف كذبًا كل ذلك محرَّم...
بعد هذه المقدمة الروحية عن الكذب، نتطرق لي رواية أسطورية سمعتها عن ألهة الكذب والتي كان لها رأسان وقد سميا؛ الأول (قائِل) والثاني (مُصَدِّق) ورغم أنها رأسان لذات الشيء (الألهة)، إلا فهما يعكسان جهالتهما.
(قائِل) الذي يكذب جاهل يغرر بالرأس الثانية (مُصَدِّق)، إلا أنه وفي بدايات النصف الأول للقرن الخامس ووعشرون أن يكون هناك مثل هذه الألهة فهو أمر سيء ومشين في حق البشرية..
الذي دفعني للحديث هذا؟ هو ما يجرى في بلادنا الحبيبة السودان وبما يمارسه شعبه من كذب وتصديق..
على سبيل المثال ولتأكيد هذا. هو ما تفيض به وسائل التواصل الإجتماعي من أقوال عتاة الكاذبين ومن أقبح كذباتهم هو الإدعاء بأنهم غير حقيقة ذاتهم، فهناك من يسمي نفسه خبير إستراتيجي وهناك من يقول أنه محلل سياسي وأخر يصف نفسه بأنه يحمل من شهادات أكاديمية لا يعرف عنها تفاصيل الحصول عليها شيئا ونرى في (الليفات) أشخاص الجهالة تقفز خارج شاشة الهاتف أو التلفاز لتحدث بحقيقة أمرهم.
أستميح القاريء أن أذكر إثنان على سبيل المثال، أحدهم صاحب رتبة عسكرية عالية والأخر صاحب منصب رفيع به يتقلد تمثيل دولتنا المحزن حالها فهو سفير السودان في ليبيا. هذان وعلى قنوات التلفاز، أكدا أن قائد الجنجويد قد مات. لست هذا بأمر له قيمة إن هو ميت أو حي، ما دامت الحرب تحصد في الارواح والإقتتال مستمر ولكن لتغطية هذه الكذبة نشر (قائِل) رواية سخيفة لا يصدقها إلا (مُصَدِّق) في أن الذي يشاهد في التلفاز وفي مقابلات مع رؤساء دول، ما هو إلا "روبوت".
هذا هو الحال اليوم بين كاذب جاهل وبين مغيب أكثر جهالة.
والذي حقيقة يحزنني هو أن كثير من الذين أعرفهم، وطني غير مشكوك فيذلك وقومي بلا منازع وأن معظمهم إن لم يكن كلهم قد نال حظا من التعليم والمعرفة على مستويات عالية. لكن للأسف أنه قد أهدر كل هذه الخصال السمحة وأصبح تلك الرأس الأخرى التي تسمع وتصدق (قائِل)

[بابكر مخير]

[QUOTE=بابكر مخير;1199927]
رواية أسطورية سمعتها عن ألهة الكذب والتي كان لها رأسان وقد سميا؛ الأول (قائِل) والثاني (مُصَدِّق) ورغم أنها رأسان لذات الشيء (الألهة)، إلا فهما يعكسان جهالتهما.
(قائِل) الذي يكذب جاهل يغرر بالرأس الثانية (مُصَدِّق)، إلا أنه وفي بدايات النصف الأول للقرن الخامس ووعشرون أن يكون هناك مثل هذه الألهة فهو أمر سيء ومشين في حق البشرية..
الذي دفعني للحديث هذا؟ هو ما يجرى في بلادنا الحبيبة السودان وبما يمارسه شعبه من كذب وتصديق..
على سبيل المثال ولتأكيد هذا. هو ما تفيض به وسائل التواصل الإجتماعي من أقوال عتاة الكاذبين ومن أقبح كذباتهم هو الإدعاء بأنهم غير حقيقة ذاتهم،

الفيديو دآ من الاستاذة زينب بدوي وتحكي فيهو عن المتداول من كلام مضلل في الاسافير..
ما قدرتا أعمل اليهو داونلود وعشان كدآ دي اللينك
https://www.facebook.com/laila.s.m/videos/10219424946308255

[بابكر مخير]

بمناسبة شعبن واحد جيشن واحد والحرابة الدايرة والنضمي الحاصل في القروب، عيد ميلادي إتخرب :(............
إتولدتا في فترة حكم الاستعمار المصري البريطاني (24 نوفمبر 1946 ) وعشتا حكم الازهري وعبد الله خليل والمحجوب. حكم العم إبراهيم عبود وسر الختم الخليفة وحكم مايو والجزولي دفع الله وحكم الكيزان الأول بقيادة عمر البشير تحت مسمى حزب المؤتمر الوطني وحكم الكيزان الثاني مشاركة بين الجيش (بشقيه القوات المسلحة والدعم السريع) و"قحت" والأن أعيش حكم جيش الكيزان الثالث بقيادة البرهان وفلول النظام البائد..
القصد؟؟
شايف أنهو ناس كتيرين يمجدوا في الجيش وقولي في هذا؟؟
نعم للجيش إن هو جيش الشعب، من الشعب والي الشعب يحميه ويزود عن أراضيه..
لكن وللأسف كل هذا العمر شايف الجبش يتمثل في أخلاقيات شأئنة...
1 - أنشء الجيش إلإستعمار المصري الإنجليزي بمسمى قوة دفاع السودان ليحارب كل أعداء الإنجليز حينها (الحرب العالمية الثانية والحروب ضد النازيين) حيث حارب في ليبيا وأثيوبيا وكل العايشته في تلك الفترة، أن الجيش يعطي التمام للمستعمر
2 – حكم الجيش السودان بقيادة الفريق إبراهيم عبود من عام 1958، أي بعد عاميين فقط من إستقلال السودان من المستعمر المصري البريطاني وفي فترة حكم الجيش في تلك الفترة. كانت حرب الجنوب والتي توصف حرب إبادة للسكان الاصليين. بدأ ذلك الوقت في إنحراف بعض قادة وضباط الجيش من واجباتهم المفروضة وصاروا تاجر تهريب سن الفيل والعاج ونهب ممتلكات شعوب الجنوب. تنازل الجيش الحاكم من أراضي سودانية وهي تلك الذي كان واجبه حمايتها في حلايب وشلاتين وحلفا التي هجر قسريا شعبها لإقامة السد العالي المصري.
3 – حكم الجيش للسودان بقيادة جعفر النميري 1969 كان هذا الحكم في بدايته لونه أحمريساري التوجه ولم يمعاما وحتى صار لونه أحمر دموي حين إنقلب بعض الحكام العسكر أصحاب الميول القومي العربي "الناصري" على بعضهم من اليساريين الشيوعيين وأعدم من أعدم وكانت جريمة القتل في القصر الجمهور، كما شاب تلك الفترة إستمرار لحرب الإبادة في الجنوب وغرب السودان.
4 - حكم الجيش للسودان بقيادة 1989 عمر البشير، حيث كان الجيش هو الغطاء لحركة تنظيم الاخوان المسلمين العالمية "الكيزان" وتنقسم هذه الفترة الي ثلاث،
- الفترة الاولى الي العام 2019 حيث بدأت تمكين تنظيم الاخوان المسلميين الهيمنة على مفاصل الحكم في البلاد، مما أدى لتدهور ف الهياكل الإدارية وشح القيادات المهنية إثر إستفراد عناصر الاخوان المسلمين الهيمنة على الوظائف،وفي هذه الفترة كان الحكم لحزبهم السياسي والذي عرف بإسم المؤتمر الوطني. كما في تلك الفترة، إفتقد الجيش لشخصيته المهنيو والقومية وأصبح جيشا لجماعة الاخوان المسلمين من تقلد الرتب العليا وأخطر ما صاب الجيش من هدم هو تكوين قوات الدعم السريع التي كونت للقيام بمهام قوات المشاة في الجيش ووجهت لمحاربة الحركات المسلحة في مناطق الجنوب والجنوب الشرق وغرب السودان وإنتهت الفترة واحدة بثورة شعبية عارمة
- الفترة الثانية حيث فرضت على جيش الاخوان المسلمين، (إذ في الفترة السابقة كان الجيش قد خلع عباءة القومية وأصبح جيش برداء الاخوان المسلمين) التراضي المرحلي والتكتيكي للموافقة المظهرية الجلوس ومشاركة تدوير أمر البلاد مع قوة مدنية أخرى "قحت" وإستمرت تلك الفترة لمدة عاميين، كان لجيش الكيزان القِدْح المعلّى في تسيير الأمور وإفشال ما يهدف هدم تمكين الأخوان المسامين في مفاصل الدولة والذي يشمل أيضا القوات النظامية والتي هي جناح حزب المؤتمر الوطني (حزب الاخوان المسلمين).
- الفترة الثالثة والمستمرة الي الأن. بدايتها كان قرارات أكتوبر 2021 حيث أعلن الجيش إنقلابه على أهداف ثورة 2019 الداعية لمدنية الحكم ومن ذاك الحين إستفرد الجيش بالحكم.
5- وهذا أمر جديد في مسار حكم الجيش السوداني للبلاد؟ إذ حدث إنقلاب مدوي داخل إنقلاب الجيش 1989 (وصف مدوي لأنه الأقوى ما بين الإنقلابات التي حدثت داخل الجيش من أيام حكم الفريق عبود ومرورا بحكم النمير الي فترة الجيش بقيادة البشير) وهو إنقلاب قوة وصفها القادة العسكريين بأنها جاءت من رحم القوات المسلحة فجاء إنقلاب قوات الدعم السريع والذي نتجت عنه هذه الحرب بين فصيلين للكيزان يحتربا للسيطرة على حكم البلاد والتي دوما ما تشهد دمار وخزي في فترات حكم الجيش السوداني…
هذامختصر لرؤيتي في الجيش السودان والذي يجعلني أكفر به كجيش من شعبي وجاء ليحمي شعبي ولست ليحكمه كطائفة توارثت سلب مقدراته وثرواته

[بابكر مخير]

يعني لم عدد السنين بزيد، الواحد بيفتكر أنهو الزول بيكبر في العقل وبيسيب حركات الشفع وحركات الشباب الطايشة وأمور كتيرة بيترفع عنها.
يعني مثلا في وسائل التواصل وخاصة الأخطر منها بتاع الميتا الfacebook بتحاول مشاركتك تكون حذرة وبي تقلة، ما تتعدى على زول إلا زولن يكون مرض ومؤذي وكاذبون أشر. وأنك ما تنزل مواضيع فيها قبيح القول ولا فيديوهات خادشة "للحياء" أو صور فاضحة.
أها مع دآ كلهو ومحاولة تروح هباء لمن يقوم زولن مسلط "يهكر" الوسيلة البتشارك بيها في الوسايط..
أمس المساء خالص أو وشيش الصباحية، إتداخل معاي زولن عزيز في المسنجر طلب مني خدمة بسيطة، ليا ما مكلفة وليهو حسيت بأنها تحقق ليهو شيء، وباريحية تحادثنا وأجبت لي طلبه (ما كانت مالية ولكنها نسبيا معنوية)..
نمتا وشاعر بأني أسعدت زول، فكان نوم على غير العادة متواصل وخالي من صحيات الكلة ساعة ونص لي الأمر المتكرر الذي يفهمه ويعرفه جيداً كُبار السن :wink:. وصحيت على رنين الهاتف (زينب بابكر ما تسمع لأني قلتا ليها صاحي) خاصة وأني لمن شفتا هي المتصلة في الصباح الباكر، طبعا دآ نسبين لي عادة الصحيان المعتادة إتخديت..
وإذا بها تزف ليا خبر تهكر حيطتي في "وش الكتاب Facebook"، ظنيتني لو كنت واقف، كان وقع! ما أصلي لمن أتخلع إن أقوم، قع أوقع..
شيلتا شيلتي خوفا وخلعة على قول خيلانا سند البرهان "إتخضيت" ما يكون التهكير نوع الفيهو فديوهات قبيحة ولا صور ما الياها.
لكن الحمد لله طلع هكرنجي مستهبل كايس فلوس بي إسمي..
والجاتك في مالك، سامحتك

[بابكر مخير]

مع أنهو الروح المعنوية عيلت وطارت السما، بي شوفت الحبان من جديد ملمومين في حوش الغائب الحاضر خلودي..
إلا الكُبر وجايعهو بتزيد وتدبرس بي الزول..
في سر كبييير وطلاسمه في كتب العلم والمعرفة مدونة، لكن برضهو طبع الزول؟ أنه بيكضب الشينة..
قلنا العلم بتكلم عن عوامل التعرية "erosion"والهي مرتبطة بي الزمن على الأشياء، حتى الجبال من قدر مهولة وكيف بتصغر والشمعة ديك أصلها وصفها الشاعر دكتور أزهري عوض الكريم (وهو طبعا عضو معانا هنانا)
بشوف كل حاجة في الدنيا......بتمشي مع الزمن تكبر
الا الشمعة لما تدور تفارق الليل.....تكون .... اصغر..
مع الزمن حجم رأس الزول تشوفهو تقول كِّبر مما كان زمان والإضنين كذلك لكن الطبيعي بحصل أنهو باقي الجتة بتنحل وبما انهو الراس اللحم والعضلات فيها قليلة بالنسبة لأعضاء جسم الإنسان الباقي، فما بتأثر بي عوامل خصر العضلات وقلة الدهون، ما حسي رأس النيفة وزنهو يكون كيلويين وشوية، لكن كل اللحمة البتطلع منهو ما بتكون ربع كيلو مع العيون والمخ :biggrin:.
تاني هم، الكرش تتندل والرجليين يبقن التقول بس مساوييك، وهنا تنعرف خدعة الناس لمن يكبر ليييه بيبقى أغلب الوكت لابس جلابية، ما البنطلون حتى لو بقآ نوع "الإسليم" بيكون فضفاض علي الرجليين والوراكيين والجلابية وخاصتن مع السروال والراقي بتزيد من هيل الجسم الكلي للناظر..
يعني قولة بكضب الشينة بتجي من حقيقة الزول مع رجليين السواسيو ديل والراس البقآ كبير ومن كبرهو يتلولح ويكابر (denial) يقول ليك السبب من أشياء متل أصلهو عندي ضغط الدم ولا السكري والحقيقة أنهو الرأس تقل على الجسم الهزيل..
لعن الله الكِّبر كما لعن الله الحرب وجنرالاتها

[شبارقة]

تحياتنا وسلامنا ومحبتنا لعزيزنا ودكتورنا بابكر مخير .

[بابكر مخير]

تحياتنا وسلامنا ومحبتنا لعزيزنا ودكتورنا بابكر مخير .

شبو الغالي..

ليك وحشة ولآهيِّ

[بابكر مخير]

ولسة زيادة في النكد، أستطرد في الكلام عن هذا السخيف، الثقيل والشئوم الإسمهو الكُبُر...
فهمنا أنه الزول يشيخ باطنيا. إذ أن الأعضاء الباطنية في جسم الزول البعجز تفقد مناعتها وتبقى ملطشة للباكتريا ذيي بتاعت اللكتوز وعضلات البطن تضعف وتترهل والإمعاء، الإتنين منهم يبقن في حالة إرتخاء يعني بس ذي المزلقان، اليدخل كله وبدون سابق إنذار يتزحلق خارج والمنفذ يبقآ بوابة دون قِفل وظاهريا وكما تعرضنا من قبل لهذا، التجاعيد والكرمشة وضيف لي كل ما ذكرناه، نشاف الجلد ومتاسف لكن يقال: لا حياء في الدين "والعلم كذلك" واللعاب ينزل وكانه يتنافس مع الدموع في أيهما بيقرف الناظر أكتر..
دآ كلهو كوم وأهو ربنا خلقنا من نطفة لنمر عبر السنيين الي أرزل العمر ونشيخ ونعجز وأخرتها ياهو الشبر. لكن القصة البتحير؟؟
تلقى التلفون بتاعك وبدون سبب الإستقبال فيهو يضعف والهاي فاي "النت" ما يهم تدفع إشتراك كم، لكن برضها تنخ..
الأدهش من دآ كلهو قصتي مع ال travel card أها دآآ والمسمينهو freedom pass لمن تبقآ ياهو في عمري دآ؟ بيدوك ليهو مجانا وبتترحل بيهو داخل لندن الكبرى بالبصات والقطارات مجانا من الساعة التاسعة ونص صباحا كل اليوم والمساء. كان راح مني ودي طبعا عادية في هذا العمر، هو الأيام بتروح ودون ما تعرف كيف، بلغتا عليهو عشان يدويني واحد تاني وهنا الحكاية، مش قلنا بيدوك ليهو مجانا، لو راح لازمتن تدفع عشان يدوك واحد جديد وفعلا وبرضاء تام دفعت المبلغ ما المنفعة والمصلحة والسفر المجاني بيحتم ذلك وكان دآ قبل اربعة شهو وهو صلاحيتهو سنيين.
قوووم يا الكرت ما تشتغل ومشيت لمحطة القطار وهناك سألت المسئول عن أمري.
قال ليا شنهو؟؟
ودآ ياهو الخلاني أرص الرص دآ كلهو، لأني فعلن لعنت أبو العُّجز، قال ليا أنهو عطلان وإتسهلك وبقآ غير صالح للإستعمال..
يعني ذيهو وذي التلفون وذيي كلنا بقينا سواسية.
قال عليه الصلاة والتسليم رسولنا محمد:
(مثل المؤمنين في توادهم وتراحمهم وتعاطفهم مثل الجسد، إذا إشتكى منه عضو تداعى له سائر الجسد بالسهر والحمى)
:(:(:(

[عكــود]

سلام حبيبو،
ياخي نحن شايفنك لسه شباب بكل الجمال!

لفت نظري بطاقة البصات المجانية. قبل سنة عرفت إنو هنا برضو بيدوك بطاقة بصات مجانية لو عمرك فوق الستين تتيح ليك التنقل المجاني في كل البصات داخل مدينة أبو ظبي وضواحيها والعين وضواحيها.
خدمة مجتمعية جميلة صراحة، طلعت بطاقة وبقيت نادرا ما استخدم العربية في مشاويري، خاصة ال ما مستعجلة وفوائدها كتيرة:
المشي من وإلى محطة البص
الإحتكاك والونسة مع الناس
مافي هاجس باركنج
مافي تنشن سواقة والبال مرتاح
مافي مخالفات مرورية
استكشاف معالم ومحلات ما كنت بتنتبه ليها لو إنت سايق

الله يديك العافية

[Abdullahi Gaafar]

مقتطفات من أوراق ومقالات حول الشيخوخة
أظهر تقرير الأمم المتحدة حول الشيخوخة في العالم، أنه "بحلول عام 2050، سيكون 1 من كل 6 أشخاص في العالم فوق سن 65 عاما، ومن المتوقع أن يكون عدد الذين تبلغ أعمارهم 65 عاما فأكثر في جميع أنحاء العالم، ضِعف عدد الأطفال دون سن الخامسة، ومساويا تقريبا لعدد الأطفال دون سن 12 عاما
علميا تعرف الشيخوخة بالتطور والتغير الفيزيولوجي نتيجة التحول الذي يطرأ على أنسجة الإنسان وخلاياه بفعل التقدم في العمر وقد اتضح علميا ان من الممكن تأخير الفعل الذي يفعله الزمن او التقدم في العمر في الخلايا والأنسجة باتخاذ العديد من الافعال منها ماهو مرتيط بالغذاء ومنها ما هو مرتبط بالرياضة والحياة الاجتماعية للافراد. وقد اتفق العلماء على تحديد نوعين من العمر (التقدم في السن) هما العمر الزمني والعمر الفيزيزلوجي بحيث عرف العمر الزمني بالفترة الزمنية التي قضيتها منذ ولادتك إلى هذه اللحظةأما العمر الفيزيولوجي فيعبر عن مقدار الفعل والضرر الذي فعله الزمن في خلايا وانسجة الجسم ولهذا يقال أن من الممكن أن يكون الإنسان في عمر الثلاثين لكن جسمه في عمر الخمسين وقد وجد ان الفرق بين العمرين تبلغ حوالي 10 سنوات وفقا لدراسة نشرت عام 2021.
وقد اكد العلماء أن بناء عقلية العمر الصحي الطويل هي الخطوة الاولى للوقاية من أمراض وأعراض الشيخوخة مع التقدّم في العمر وهي العقلية التي يمكن أن تساعد على إعطاء الأولوية للشيخوخة الصحية
و تؤكد الأبحاث أن "وجهات النظر السلبية حول الشيخوخة يمكن أن تقصر من أعمارنا"، كما يمكن لوجهات نظر المجتمع حول التقدم في السن، أن تمنع الأشخاص من الانخراط في مجتمعهم أو تجربة أشياء جديدة، تعتبر أساسية لمكافحة الآثار الصحية الجسدية والعقلية الضارة للوحدة؛ "مما يعرضهم للإصابة بمشاكل القلب والأوعية الدموية والأمراض المزمنة المسببة للوفاة المبكرة".
نموذج لبناء عقلية العمر الصحي الطويل
قدم موقع "بزنس إنسايدر" تجربة جراح الأعصاب الأميركي جوزيف مارون، الذي يبلغ من العمر 83 عاما، ويمارس العديد من الرياضات، كنموذج لنمط حياة يعزز عقلية العمر الصحي الطويل.
فقد غَيّر مارون أسلوب حياته ونظامه الغذائي في الأربعينيات من عمره، عندما وجد نفسه يكافح من أجل صعود الدرج، بعد أن ظل يعيش على الوجبات السريعة ولا يمارس الرياضة، ثم ما لبث والده أن توفي في العام نفسه، "مما أوصل صحته الجسدية والنفسية إلى أدنى مستوى لها". قبل أن يقترح عليه أحد الأصدقاء أن يجرب الجري لتخفيف اكتئابه، فبدأ في إجراء تغييرات تدريجية في نمط حياته، ومارس المزيد من التمارين الرياضية وتناولِ طعام أفضل.
• بحلول سن 53 عاما، سجل مارون بأول سباق للجري، وشارك بعدها في 8 سباقات أخرى، وأصبح يستخدم 4 مبادئ غذائية رئيسية للتمتع بصحة جيدة وعمر مديد، وهي:
• اتباع النظام الغذائي المتوسطي، لتركيزه على الفواكه والخضراوات والحبوب الكاملة والفاصوليا والبقول والدهون الصحية مثل زيت الزيتون، إلى جانب الأسماك واللحوم في بعض الأحيان.
• تجنب الأطعمة فائقة المعالجة، مثل ألواح البروتين والهوت دوغ والمشروبات الغازية والوجبات المعبأة والحلويات ورقائق البطاطس، لما تتضمنه من إضافات وأملاح وسكريات ودهون مشبعة، ترتبط بزيادة خطر الإصابة بأمراض مثل السرطان والخرف وأمراض القلب.
• تجنب الدهون المتحولة، وهي الدهون المُصنعة عن طريق هدرجة الزيت النباتي، وتعتبرها إدارة الغذاء والدواء الأميركية "غير آمنة للأكل" منذ عام 2015، لكنها لا تزال موجودة في أطعمة مثل السمن، ومبيضات القهوة، والفطائر والمخبوزات المعبأة، وفقا لأخصائية التغذية كريستين غيليسبي.
روتين يومي بسيط لتعزيز طول عمرك الصحي
• بحسب كين فو، اختصاصيّ طب الشيخوخة، "قد تساعد الروتينات اليومية التي لا تستغرق أكثر من 5 دقائق، في إضافة سنوات صحية إلى حياتك"، وهذه 4 أمثلة عليها:
• مراكمة العادات، فبدلا من بدء عادة جديدة من الصفر، ينصح فو بدمجها ضمن روتينك اليومي "لمزيد من الالتزام"، مثل أن تجعل من استعمال الهاتف أو تناول القهوة أو الذهاب إلى الحمام، محفزات لإضافة عادة جديدة مثل التمارين السريعة، أو التنفس العميق، على سبيل المثال.
• قم بتمارين رياضية لمدة 5 دقائق، حيث تشير الأبحاث إلى أن "التمرين المنتظم قد يكون أحد أفضل أدوات مكافحة الشيخوخة المتاحة"، ويقول فو، إن 5 دقائق من التمارين اللطيفة وتمارين التنفس، سوف تمنحك الطاقة اللازمة". كما يمكن أيضا الاستفادة من حركات مثل القرفصاء أو الجلوس على الحائط أو المشي السريع، في تصفية ذهنك أو إعطاء نفسك دفعة.
• مارس الامتنان، يقول فو "إن البدء بممارسة الامتنان، طريقة بسيطة لتقليل التوتر وتحسين الصحة العقلية"، وذلك بالتفكير -ولو أثناء تنظيف أسنانك بالفرشاة- في 3 أشياء قد تبدو عادية، لكنها تستحق الامتنان، مثل قهوتك الصباحية، أو صحة عائلتك.
• وبمرور الوقت، يمكن أن يساعدك ذلك على أن تصبح أكثر وعيا واهتماما بالعالم من حولك، بالإضافة إلى "حماية صحتك الجسدية، من خلال عوامل مثل خفض ضغط الدم"، وفقا للأبحاث.
• تواصل مع الناس، فالأبحاث تشير إلى أن "التفاعل الاجتماعي يشكل جزءا أساسيا لمساعدة بعض الأشخاص على العيش حياة أطول وأكثر صحة".

وفي الآخر الأعمار بيد الله

[بابكر مخير]

مقتطفات من أوراق ومقالات حول الشيخوخة
أظهر تقرير الأمم المتحدة حول الشيخوخة في العالم، أنه "بحلول عام 2050، سيكون 1 من كل 6 أشخاص في العالم فوق سن 65 عاما، ومن المتوقع أن يكون عدد الذين تبلغ أعمارهم 65 عاما فأكثر في جميع أنحاء العالم، ضِعف عدد الأطفال دون سن الخامسة، ومساويا تقريبا لعدد الأطفال دون سن 12 عاما
يابا الغالي، مصداق لي كلامك دآ...
قبل أربعة يوم توفي أحد السودانيين القامات والناس الفعلن تشرف إسم السودان ويتشرف بها السودان، داخليا وأين ما كان في بقاع الارض..
البروفسير محمد أبراهيم خليل هو الحالم، العالم..
حلم كان دوما يلازم بروفسير محمد ابراهيم خليل بسودان ديمقراطي حر، يسوده القانون الذي درسه وابدع فيه.
العالِم الذي اثرأ علم القانون بوافر معرفته ودرايته ببواطن ومظاهرا ودروب هذا العلم.
بروفسير محمد ابراهيم خليل كان وزيرا وكان رئيس لاعلى مؤسسة تشريعية في السودان، كان خبيرا في مجال الدساتير وكان منظم لها في عدد من الدول..
كان انسان نظك، نظيف، جميل وكان مؤدب في حديثه، لبق وصوته هادئ يسمع خافتا ولكنه مليء باللطف والمحنة..
هذا الشيخ توفي عن عمر يناهز المئة عام، برضهو بتذكر جدي الشيخ بابكر بدري في نفس العمر وكتيرين غيرهم لكن في حاجة بتربطهم بي قوة... انهم كانوا دائمي الحركة وطعامهم صحي ورياضتهم يأدونها خمس مرات حسب المفروض ويزيدون في أوقات أخرى..
غايتهو يا صاحبي Abdullahi Gaafar أنا راجي أوصلها الستة وتمانيين. لكن إن ما ظبتط يبقى في شيء مشى غلط;);)
كتب الدكتور فيصل عبد الرحمن علي طه عن الفقيد:

فقيدنا الأستاذ محمد إبراهيم خليل
فيصل عبدالرحمن علي طه
[email protected]

بلغني في فجر يوم الثلاثاء الموافق 10 ديسمبر 2024 نبأ وفاة أستاذنا العالم الثبت
محمد إبراهيم خليل في الولايات المتحدة الأمريكية، فلا حول ولا قوة إلا بالله وإنا لله وإنا إليه راجعون.
ينتمي فقيدنا إلى أسرة أنصارية عريقة، فجده لأبيه خليل جمعة كان من أمراء
المهدية. وأما جده لأمه فهو الأمير السيد محمد أحمد شيخ إدريس ودفحل إبن عم الإمام المهدي.
ولد أستاذنا عام 1919 وترعرع في أم درمان، تلك المدينة التي انبثقت منها نهضة
السودان في السياسة والأدب والمسرح والرياضة والفن. أكمل الفقيد تعليمه الثانوي بكلية
غردون. وبموجب توصيات لورد ديلاوير في العام 1937 بأن ت ستغل مباني الكلية
لتطوير التعليم العالي، فقد أنشئت في مباني الكلية المدارس العليا. وقد ورد اسم فقيدنا في قائمة القبول للمدارس العليا عام 1941، ضمن قائمة مدرسة الهندسة. وكان من بين من
ضمتهم تلك القائمة: محمد عبدالله قلندر، وأبو الحسن محمد صالح، ومصطفى الأمين،
والسيد عبدالله السيد، وأحمد دفع الله شبيكة.
ولكن الفقيد آثر الالتحاق بمدرسة العلوم، وعندما سألت ه ذات مرة عن سبب انصرافه عن الهندسة والتحاقه بمدرسة العلوم، قال ضاحكاً بأن ذلك ربما كان بتأثير صديقه أحمد
محمد سعد. وقد ق ¸ بل معهما في مدرسة العلوم: عبدالله سليمان، وعبدالعظيم التيجاني، و
إبراهيم شبيكة، ومحمد نور عمر اسحق، وعبدالرحمن دياب، ومحمد عبدالمجيد طلسم،
ومصطفى حسن أمين.
وبعد دورة تأهيلية في طرائق التدريس والتربية، وعلم النفس في معهد التربية ببخت الرضا، د رس الفقيد العلوم الطبيعية بمدارس المعهد، وفي المدرسة الريفية بالدويم التابعة

للمعهد. ولكنه بعد بضع سنوات غادر سلك التدريس طلباً للعلم بكلية الخرطوم الجامعية
لدراسة القانون، حيث نال من خلالها درجة البكالوريوس في القانون من جامعة لندن عام
.1954 ونال معه نفس الدرجة كل من أبو القاسم ميرغني وعبدالحليم الطاهر. ومن ث´م
عمل أستاذنا بمكتب محمد احمد محجوب للمحاماة. والتحق بعد ذلك بديوان النائب العام الذي ابتعثه إلى جامعة لندن لنيل الماجستير في القانون. وإبان فترة عمله بالديوان تعاون مع كلية الحقوق بجامعة الخرطوم في تدريس مادة قانون الشركات. ومن خلال
محاضراته تلك، تعرفنا عليه، وعلى روحه المرحة أحياناً، ووقفنا على تمكنه من المادة
ومن اللغة الانجليزية التي كانت ت د رس بها. وعندما ¸بتنا على أعتاب التخرج عام 1964،
أصبح أستاذنا أول عميد سوداني لكلية الحقوق. ولكنه لم يبق طويلًا في ذلك المنصب.
فبعد ثورة اكتوبر 1964 وعودة النظام الديمقراطي، انخرط الفقيد في العمل السياسي.
وخلفه في المنصب لبضعة أشهر الدكتور حسن الترابي، ثم غادر هو الآخر الكلية إلى
رحاب السياسة.
بعد انقلاب 25 مايو 1969، غادر أستاذنا السودان إلى زاريا بنيجيريا حيث عمل
محاضراً بكلية القانون فيها ثم أصبح عميداً لها خلفاً للدكتور زكي مصطفى. ولا عجب
أن نيجيريا قد استقبلت بترحاب مدير جامعة، وعمداء كليات، وأساتذة جامعات، وعدداً من السودانيين من أصحاب التخصصات الرفيعة ممن طالتهم حملة التطهير في بداية عهد مايو.
لم أعرض لسيرة استاذنا الراحل في السياسة السودانية بكل انقلاباتها وتقلباتها.
ولربما يفعل ذلك غيري. غير أنني أورد في ما يلي ما صرح به للصحفيين عندما تقدم باستقالته من منصبه كرئيس للجمعية التأسيسية عام .1988 وذلك من منطلق أنها شهادة عصر فقد قال حسب ما نشر:
«إن الأسباب التي دفعته للاستقالة من رئاسة الجمعية كان المباشر منها سلوك بعض النواب غير اللائق في بعض جلسات الجمعية والذي وصفه بأنه يعبر عن عدم احترامهم للمؤسسات الديمقراطية والدستور.....
وقال خليل أن ما كان يجري وراء الكواليس تصرف غير لائق خاصة في الظروف

التي تمر بها البلاد والتي تقتضي الوضوح والصدق في التعامل، وأضاف أنه يرغب في أن يطلق "لسانه المعقود" طوال الفترة التي قضاها رئيساً للجمعية.»
أسأل الله الرحمة والمغفرة لاستاذنا ولا حول ولا قوة إلا بالله، وكل من عليها فان ويبقى وجه ربك ذو الجلال والإكرام.

[بابكر مخير]

سلام حبيبو،
ياخي نحن شايفنك لسه شباب بكل الجمال!

لفت نظري بطاقة البصات المجانية. قبل سنة عرفت إنو هنا برضو بيدوك بطاقة بصات مجانية لو عمرك فوق الستين تتيح ليك التنقل المجاني في كل البصات داخل مدينة أبو ظبي وضواحيها والعين وضواحيها.
خدمة مجتمعية جميلة صراحة، طلعت بطاقة وبقيت نادرا ما استخدم العربية في مشاويري، خاصة ال ما مستعجلة وفوائدها كتيرة:
المشي من وإلى محطة البص
الإحتكاك والونسة مع الناس
مافي هاجس باركنج
مافي تنشن سواقة والبال مرتاح
مافي مخالفات مرورية
استكشاف معالم ومحلات ما كنت بتنتبه ليها لو إنت سايق

الله يديك العافية
ها يا كوكي،
ما بقت عليا قصة الزول المشى الدكان يشتر ليهو حاجة وشايل قروشهو حسب تمن الحاجة كما إشتراها أول أمس. أها بتاع الدكان قاليهو والله سعرها زاد بقا كدآ. زولن جايب قروضش قدر السعر الكان قايلهو. فقال لي بتاع الدكان خلاص بي بكرا وبكمل قروشي عشان تساوي السعر. بكر جا وجابو القروش ومعاها الزيادة اإتقررت من سيد الدكان. أها بتاع الدكان قال ليهو: والله يا أخي السعر اليوم زاد شوية وبقى كدآز صاحبنا قال ليهو يعني ما ننموم عشان الاسعار تثبت.. أها بقت عليا قبل كم شهر دفعتا 12 جنيه بنات حفر وياهو ظاتهو المرسومة فيهو صورة الملكة، أصلو لسة ما غير العملة كلها بصور الملك تشارلس الثالث، تعرف الزول دآ "المكرتب ومكرمش دآ، أصغر مني بسنتين". المهم يابا السعر بتاع الإستبدال للكرت بقآ 14 جنيه يخشن علي العدويين.. كرت السنيرز في أبوظبي ظنيتهو بخمسة وعشرين درهم... خليكم صاحيين عشان ما يزيدهو::gap:::gap:

[عكــود]

ها يا كوكي،
ما بقت عليا قصة الزول المشى الدكان يشتر ليهو حاجة وشايل قروشهو حسب تمن الحاجة كما إشتراها أول أمس. أها بتاع الدكان قاليهو والله سعرها زاد بقا كدآ. زولن جايب قروضش قدر السعر الكان قايلهو. فقال لي بتاع الدكان خلاص بي بكرا وبكمل قروشي عشان تساوي السعر. بكر جا وجابو القروش ومعاها الزيادة اإتقررت من سيد الدكان. أها بتاع الدكان قال ليهو: والله يا أخي السعر اليوم زاد شوية وبقى كدآز صاحبنا قال ليهو يعني ما ننموم عشان الاسعار تثبت.. أها بقت عليا قبل كم شهر دفعتا 12 جنيه بنات حفر وياهو ظاتهو المرسومة فيهو صورة الملكة، أصلو لسة ما غير العملة كلها بصور الملك تشارلس الثالث، تعرف الزول دآ "المكرتب ومكرمش دآ، أصغر مني بسنتين". المهم يابا السعر بتاع الإستبدال للكرت بقآ 14 جنيه يخشن علي العدويين.. كرت السنيرز في أبوظبي ظنيتهو بخمسة وعشرين درهم... خليكم صاحيين عشان ما يزيدهو::gap:::gap:


الاربعطاشر جنيه معوضات صحة وعافية إن شاء الله.
الله وكيلك طلعتها مجاااان لا مليم لا تعريفة، بطاقتك وصورة شخصية وانتظار دقيقتين وبطاقتك في إيدك.
يمكن كانت بخمسة وعشرين، لكن الآن مجانية.

[بابكر مخير]

الاربعطاشر جنيه معوضات صحة وعافية إن شاء الله.
الله وكيلك طلعتها مجاااان لا مليم لا تعريفة، بطاقتك وصورة شخصية وانتظار دقيقتين وبطاقتك في إيدك.
يمكن كانت بخمسة وعشرين، لكن الآن مجانية.

لا يابا، ظنيتها دي لو ضاعت منك عشان تعمل واحدة جديدة باقي ليا كدي:confused::confused: وكمان فيها وقفت صف (هو بيني بينك ما وقفت صف، لكنه قعاد ويقربوا يجيبوا ليك قهوة، ناس عايشة وناس دايشة " ربنا يديم ليهم نعمتهم")

[Abdullahi Gaafar]

قال الله تعالى (إِنَّما يَفتَرِي الكَذِبَ الَّذينَ لا يُؤمِنونَ بِآياتِ اللَّـهِ وَأُولـئِكَ هُمُ الكاذِبونَ).
كما قال الله تعالى (هَلْ أُنَبِّئُكُمْ عَلَى مَن تَنَزَّلُ الشَّيَاطِينُ* تَنَزَّلُ عَلَى كُلِّ أَفَّاكٍ أَثِيمٍ* يُلْقُونَ السَّمْعَ وَأَكْثَرُهُمْ كَاذِبُونَ).
وقد قال الله تعالى (سَيَقولُ الَّذينَ أَشرَكوا لَو شاءَ اللَّـهُ ما أَشرَكنا وَلا آباؤُنا وَلا حَرَّمنا مِن شَيءٍ كَذلِكَ كَذَّبَ الَّذينَ مِن قَبلِهِم حَتّى ذاقوا بَأسَنا).
وقد ورد في الذكر الكريم (إِنّا قَد أوحِيَ إِلَينا أَنَّ العَذابَ عَلى مَن كَذَّبَ وَتَوَلّى)
وعن النَّبي صلى الله عليه وسلم، قال:
آية المنافق ثلاث: إذا حدَّث كذب، وإذا وعد أخلف، وإذا ائتمن خان
كفى بالمرء كذبًا أن يحدِّث بكلِّ ما سمع
ويلٌ للَّذي يحدِّثُ فيَكذِبُ ليُضحِكَ بِه القومَ، ويلٌ لَه، ويلٌ لَه
رأى النبي صلى الله عليه وسلم رؤيا في عذاب وعقوبة الكاذب، إنَّه أتانِي اللَّيْلَةَ آتِيانِ، وإنَّهُما ابْتَعَثانِي، وإنَّهُما قالا لي انْطَلِقْ، وإنِّي انْطَلَقْتُ معهُما… فأتَيْنا علَى رَجُلٍ مُسْتَلْقٍ لِقَفاهُ، وإذا آخَرُ قائِمٌ عليه بكَلُّوبٍ مِن حَدِيدٍ (الكلوب، حديدة منحنية معوجة الرأس)، وإذا هو يَأْتي أحَدَ شِقَّيْ وجْهِهِ فيُشَرْشِرُ شِدْقَهُ إلى قَفاهُ، ومَنْخِرَهُ إلى قَفاهُ، وعَيْنَهُ إلى قَفاهُ… قالَ: ثُمَّ يَتَحَوَّلُ إلى الجانِبِ الآخَرِ فَيَفْعَلُ به مِثْلَ ما فَعَلَ بالجانِبِ الأوَّلِ، فَما يَفْرُغُ مِن ذلكَ الجانِبِ حتَّى يَصِحَّ ذلكَ الجانِبُ كما كانَ، ثُمَّ يَعُودُ عليه فَيَفْعَلُ مِثْلَ ما فَعَلَ المَرَّةَ الأُولَى قالَ: قُلتُ: سُبْحانَ اللَّهِ ما هذانِ؟… قالَا لِي: أما إنَّا سَنُخْبِرُكَ… وأَمَّا الرَّجُلُ الذي أتَيْتَ عليه، يُشَرْشَرُ شِدْقُهُ إلى قَفَاهُ، ومَنْخِرُهُ إلى قَفَاهُ، وعَيْنُهُ إلى قَفَاهُ، فإنَّه الرَّجُلُ يَغْدُو مِن بَيْتِهِ، فَيَكْذِبُ الكَذْبَةَ تَبْلُغُ الآفَاقَ
في المسيحية:
اِبْتَعِدْ عَنْ كَلَامِ ٱلْكَذِبِ ، وَلَا تَقْتُلِ ٱلْبَرِيءَ وَٱلْبَارَّ، لِأَنِّي لَا أُبَرِّرُ ٱلْمُذْنِبَ (اَلْخُرُوجُ)
لَا يَسْكُنُ وَسَطَ بَيْتِي عَامِلُ غِشٍّ. ٱلْمُتَكَلِّمُ بِٱلْكَذِبِ لَا يَثْبُتُ أَمَامَ عَيْنَيَّ. ‘
طَرِيقَ ٱلْكَذِبِ أَبْعِدْ عَنِّي، وَبِشَرِيعَتِكَ ٱرْحَمْنِي. ‘ (اَلْمَزَامِيرُ)
ٱلْمُتَكَبِّرُونَ قَدْ لَفَّقُوا عَلَيَّ كَذِبًا ، أَمَّا أَنَا فَبِكُلِّ قَلْبِي أَحْفَظُ وَصَايَاكَ (اَلْمَزَامِيرُ)
وتحت أخلاق اليهودية جاء : الكذب والمدح الكاذب وشهادة الزور والحلف كذبًا كل ذلك محرَّم...
بعد هذه المقدمة الروحية عن الكذب، نتطرق لي رواية أسطورية سمعتها عن ألهة الكذب والتي كان لها رأسان وقد سميا؛ الأول (قائِل) والثاني (مُصَدِّق) ورغم أنها رأسان لذات الشيء (الألهة)، إلا فهما يعكسان جهالتهما.
(قائِل) الذي يكذب جاهل يغرر بالرأس الثانية (مُصَدِّق)، إلا أنه وفي بدايات النصف الأول للقرن الخامس ووعشرون أن يكون هناك مثل هذه الألهة فهو أمر سيء ومشين في حق البشرية..
الذي دفعني للحديث هذا؟ هو ما يجرى في بلادنا الحبيبة السودان وبما يمارسه شعبه من كذب وتصديق..
على سبيل المثال ولتأكيد هذا. هو ما تفيض به وسائل التواصل الإجتماعي من أقوال عتاة الكاذبين ومن أقبح كذباتهم هو الإدعاء بأنهم غير حقيقة ذاتهم، فهناك من يسمي نفسه خبير إستراتيجي وهناك من يقول أنه محلل سياسي وأخر يصف نفسه بأنه يحمل من شهادات أكاديمية لا يعرف عنها تفاصيل الحصول عليها شيئا ونرى في (الليفات) أشخاص الجهالة تقفز خارج شاشة الهاتف أو التلفاز لتحدث بحقيقة أمرهم.
أستميح القاريء أن أذكر إثنان على سبيل المثال، أحدهم صاحب رتبة عسكرية عالية والأخر صاحب منصب رفيع به يتقلد تمثيل دولتنا المحزن حالها فهو سفير السودان في ليبيا. هذان وعلى قنوات التلفاز، أكدا أن قائد الجنجويد قد مات. لست هذا بأمر له قيمة إن هو ميت أو حي، ما دامت الحرب تحصد في الارواح والإقتتال مستمر ولكن لتغطية هذه الكذبة نشر (قائِل) رواية سخيفة لا يصدقها إلا (مُصَدِّق) في أن الذي يشاهد في التلفاز وفي مقابلات مع رؤساء دول، ما هو إلا "روبوت".
هذا هو الحال اليوم بين كاذب جاهل وبين مغيب أكثر جهالة.
والذي حقيقة يحزنني هو أن كثير من الذين أعرفهم، وطني غير مشكوك فيذلك وقومي بلا منازع وأن معظمهم إن لم يكن كلهم قد نال حظا من التعليم والمعرفة على مستويات عالية. لكن للأسف أنه قد أهدر كل هذه الخصال السمحة وأصبح تلك الرأس الأخرى التي تسمع وتصدق (قائِل)


السلام مليون حبيبنا بابكر
ديل أن اسميتهم الناعقون


النَّاعِقُون
أَوِ الْخُبَرَاءُ الأمنِيون/ الإستراتيجيون

وَجَوهٌ تَعْلُوهَا غَبَرَة
وَقَلُوبٌ تُرْهِقُهَا قَتَرَة
وَحُروفٌ تَخَرج مِنْ إستِ الشَّيْطَانِ
لِأفْوَاهٍ لَا تَعَرفُ قَوْل الْحَقْ
نِصْفُ رِجَالٍ فِي شَيْطَان
جَاءُوا مِنْ حَيْثُ يَجِيءُ اللَّوْنُ الْأسْوَدُ لِلْأحْزَانِ
وَحَيْثُ الْكَلْمِ الْآسِنِ يَعْلُو فِي الْأرْضِ كَشَاهِدِ قَبْر
نَبَّتُوا بِالشَّاشَاتِ كَأَشْجَارِ الزَّقَّوم
وَعَلى الصَّفْحَاتِ الصَّفْرَاءِ كَفَقْرَةِ نَعْي
هُمْ صُنَّاعُ الْمَوْتِ اللُّغَوِيِّ وَعُهْرِ الْحَرْفِ
أبْوَاقُ الْفِرْعَوْنِ الْهَائِمِ فِي جَبَرُوتِ الظُّلْمِ
نِصْفُ رِجَالٍ فِي شَيْطَانٍ
تَسْرِقُ مِنّا لَحْظَةَ أَنّا أَبْنَاءُ الْحُلْمِ
وَلَحْظَةَ كَنَّا نعَبرُ مِنْ بَابِ الْحَرْفِ
إِلَى الْفِرْعَوْنِ بِزِلْزَالِ اللُّغَةِ الْكُبْرَى
فُجَّارٌ لَا يَسْتُرُهُمْ إِلَّا عُرْي الْخَوْفِ مِنَ الآتي
نِصْفُ رِجَالٍ فِي شَيْطَانٍ
كَذَّابُونَ وَمُحْتَالُونَ وَدَجَّالُونَ وَغَشَّاشُونَ
وَأَصْنَامٌ مِنْ طِينِ آسِن

[بابكر مخير]

السلام مليون حبيبنا بابكر
ديل أن اسميتهم الناعقون


النَّاعِقُون
أَوِ الْخُبَرَاءُ الأمنِيون/ الإستراتيجيون

وَجَوهٌ تَعْلُوهَا غَبَرَة
وَقَلُوبٌ تُرْهِقُهَا قَتَرَة
وَحُروفٌ تَخَرج مِنْ إستِ الشَّيْطَانِ
لِأفْوَاهٍ لَا تَعَرفُ قَوْل الْحَقْ
نِصْفُ رِجَالٍ فِي شَيْطَان
جَاءُوا مِنْ حَيْثُ يَجِيءُ اللَّوْنُ الْأسْوَدُ لِلْأحْزَانِ
وَحَيْثُ الْكَلْمِ الْآسِنِ يَعْلُو فِي الْأرْضِ كَشَاهِدِ قَبْر
نَبَّتُوا بِالشَّاشَاتِ كَأَشْجَارِ الزَّقَّوم
وَعَلى الصَّفْحَاتِ الصَّفْرَاءِ كَفَقْرَةِ نَعْي
هُمْ صُنَّاعُ الْمَوْتِ اللُّغَوِيِّ وَعُهْرِ الْحَرْفِ
أبْوَاقُ الْفِرْعَوْنِ الْهَائِمِ فِي جَبَرُوتِ الظُّلْمِ
نِصْفُ رِجَالٍ فِي شَيْطَانٍ
تَسْرِقُ مِنّا لَحْظَةَ أَنّا أَبْنَاءُ الْحُلْمِ
وَلَحْظَةَ كَنَّا نعَبرُ مِنْ بَابِ الْحَرْفِ
إِلَى الْفِرْعَوْنِ بِزِلْزَالِ اللُّغَةِ الْكُبْرَى
فُجَّارٌ لَا يَسْتُرُهُمْ إِلَّا عُرْي الْخَوْفِ مِنَ الآتي
نِصْفُ رِجَالٍ فِي شَيْطَانٍ
كَذَّابُونَ وَمُحْتَالُونَ وَدَجَّالُونَ وَغَشَّاشُونَ
وَأَصْنَامٌ مِنْ طِينِ آسِن



أخي الغالي
وفي الحديث عن النَّاعِقُون.
أني أمنت بالمثل المنقول من التراث "رب ضارة نافعة". إذ أني حزنت وغضبت يوم أعلن المذياع نباء، تولي خالد الإعيسر مهام وزير الثقافة والإعلام وهو منصب متعارف عليه على أقل قدر في سوداننا الحبيب، أن من يتقلد هذا المنصب هو يكون الناطق الرسمي بإسم الحكومة.
كيف لأرض جاء منها وزراء إعلام مثل عمر الحاج موسى المتحدث اللبق وموسى المبارك الأديب العالم ورئيس لوزرائها محمد أحمد المحجوب تجف ليكون الوهن حصادها.
لكني أفقت من هذه الحالة حين أمنت بأنا ضارة، نفعها جم.
على سبيل المثال ولست الحصر؟
1 إنقطع النَّاعِقُ (إن صح القول كمفرد للنَّاعِقُون) عن الظهور في شاشات التلفزيون العالمية إلا لماما
2 هذا النَّاعِقُ هو حقاً ذاك الوجه الذي يمثل حكومة الامر الواقع مجموعة وصفتها ب (كَذَّابُونَ وَمُحْتَالُونَ وَدَجَّالُونَ وَغَشَّاشُونَ
وَأَصْنَامٌ مِنْ طِينِ آسِن)
إن شاء كمان يعينوا باقي "النَّاعِقُون"! وزراء إعلام في كل الولايات:frown::frown:

[بابكر مخير]

https://www.alrakoba.net/32017283/%d9%88%d8%b2%d9%8a%d8%b1-%d8%a7%d9%84%d8%a5%d8%b9%d9%84%d8%a7%d9%85-%d9%8a%d9%87%d8%af%d8%af-%d8%a8%d8%a7%d9%84%d9%85%d9%84%d8%a7%d8%ad%d9%82%d 8%a9-%d8%a7%d9%84%d9%82%d8%a7%d9%86%d9%88%d9%86%d9%8a/
:confused::confused::confused::confused:

[بابكر مخير]

كتير مرات؟
أفكر أمدرمان دي أضافة ليا أشياء ولا حرمتني من أشياء..
بتذكر طفولتي وكيف كانت السكن ومتنازعة بين العباسية، شارع الاربعين "تلطيفاً" حي الامراء وحي الشيخ دفع الله (الغرقان) والعرضة شمال ميدان الربيع وكيف بعدها فترة الدراسة جنوب المجلس البلدي للروضة والكتاب الكان وكتها اللبس غير مقيد لكن بعدها الهجرة لمدرسة الاحفاد أولاد وسطى وثانوية بالعرضة غرب وبسميها وسط لأنه كانت تتوسط معلميين متميزين وهما إستادي المريخ وبه أبدا لأنه الأول من شارع العرضة ومن بعد الهلال شرق المنطقة الصناعية وكمان هذه القطعة من أمدرمان بها مصانع تخصصاتها متنوعة ورشة إدريس الهادي ومصنع عوض حسين للأثاثات ومصنع حلويات الطحنية الشهير. بعدها موسم الهجرة الي الشمال لمدرسة وادي سيدنا قبل أن تطولها يد الجيش لتحتكر وتصير أولا الكلية الحربية ولاحقا قاعدة عسكرية و"نميري" الجوية إذ سُميت بإسم مغتصب تلك الجنة.
غايتهو ما أنساق وراء غضبي من تغول الجيش في حياتنا السياسية والعمرانية والاقتصادية وبس بقول حسبي الله.
أتذكر في فترة من حياتي إنتلقنا للسكن في الخرطوم شرق وكانت المنطقة سكنية كاملة وفيها روضة للأطفال جميلة ومنظمة إسمها روضة الخرطوم شرق، بقدرة قادر نميري حولها لجامع وعرف بجامع القوات المسلحة وكان هناك جنوب تلك الروضة قسم شرطة الخرطوم شرق وبرضك الجيش "أممهو" إستلمه وتبعه للقيادة العامة للجيش وبرضك حي المطار.. قصة تجنن...
المهم نرجع لي أمدرمان وإضافاتها وهي كثيرة. فهي مكون مع الخرطوم عموم والخرطوم بحري للعاصمة وهي مركز العلم الجامعات والمعهد الفني ومعهد المعلمين وأقدم الثانويات (الخرطوم الثانوية) وأقدم مدارس الوسطى (أمدرمان الوسطى) أما عن الكتاتيب فهي كذلك وعن الخلاوي (ما ظنيتها الاولى والله وغيري أعلم).
برجع تاني وأقول هل حرمتني من أشياء؟؟
حققي لمن أقراء للحبان عن ذكرياتهم في بلداتهم، ناس كوكي ويحكي عن البركل وناس دآك يقول قولن جميل عن الإبيض وزولن يوصف جبال التاكا، بشعر أني قدر ما فزت بأمدرمان، إلا أني إتحرمت من نوع عيشة ممتعة، حياة الريف والزراعة والحياة وسط الألبي والأنعام..
بس برضي بريدك يا أمدرمان، لأنهو فيك القبة وفيك الأمة مجتمعة..
وعنك صور أحاسيسي أخي الصديق عليه الرحمة عبد الله محمد زين...
أنا أم دُرمـــــان .. أنا الســـــودان أنا الـــــــدُرة البزيــن بـــــــلدي
أنا البرعـَـــاك ســـلام و أمــــان و أنـا البفــــــــــداك يــا ولــــــدي
أنـا أم درمـَــان لِسـَــــــان حالـــــك أريتــــك تـــــدري بي حـَــــالي
أنـا الــقـــــــــدرت أحـــــــــوالــــك و حبــــك بــــــــدري أو حــالي
أقـــــــوم بـــي أعــــظـم الأدوار و أكــــون الســـــــاحة للثـــــوار
وأبــقى البُقعة للأحــــــــــرار و أمثــــــل عـــــــــــزة الســـــودان
أنـا أم درمــــان ســـليلة النـــيل قسـمت الليـــل و بـنتَ صــــبـاح
أنـا الولــــدوني بـالتــــهليـــــل وهلـــت فــوقي غابــة رمــــــــاح
أنـا الطـابيـــة المقــــابله النيـل وأنـا العـافيــه البشـــد الحيــــــل
وأنـا القُبـــه البتـــضـوي الليـل وتـهدي النـاس ســلام و أمــــان
أنــا أم درمــان نصـــــرت الدين و كنـت فـــــدآيــــه للإســــــــلام
و روحـو حـولي ناس صادقين فنـــاهـــم في حيــــاتــي غـــــــرام
و زانــــوا المبــــــدأ و الفكرة و خــــلــدوا أعـــــظـــم الذكــــــرى
و دخــــلو المـدرســة الكـــبرى و نــالوا شهـــــــــادة الإيمـــــــان
أنــا أم درمـــــان أنــا الأُمــــة و صــــوت الأُمـــــة و إحســاســا
وأنـا التأسيـســـــه بـي تـــــــم و أنـــا اللــميـت شتــات ناســــــــا
مزجـــــت شمالــــــه بجنــوبه و سكــبت شــروقــــــه في غــروبه
و زرعت الطيبــه في دروبــه و طابــت عـــــــزة للأوطــــــــــــــان
أنـا أم درمـــان سقــــاني النيـل رحـــيـق العــزه مــن كـاســــــــــــو
أنـا اللي مجدو كُنت دليل وآيه و حـــــــــده لــي نـــــاســــــــــــــــــو
أنـا الـفي الشاطئ الغربـــــــي و رأس غردون مهـــر حربـــــــــــي
أنـا النيـــل الطلب قُـــــــــربي و مـــــــزج بــــــين كـافة الألـــــوان
أنا أم درمـــان أنـا الواحـــــة ورى البســـــقي و العطشــــــــــــــان
بروقي تضـــوي لوآحــــــــة و تهـــدي الســـــــــــاري و الضهبـــان
و وردو و جــــرو فـــــوقــي و نــــــادوا بقيـــــــــة الأجنـــــــــــــاس
و للتـــعمير بقيـــت مقيــــاس و للتقـــــــديـر بقيـــــــــت مـــــــــيزان
أنـــا أم درمــان مهيرة الميس أصــــيلة و مرســــــــــوني رجَـــــــــال
قــلادتــي القُــــــــدرة و التقديس و إرآدتي تــســــــــابـــق الآجــــــــال
أجــلـــب فـــوق ربـــوع داري و نـفـســي تـــنــــافـــس أقــــــــــــداري
أريتم يعرفــو مســــــــــــداري و يخــلــو زمــــــامــي للفــرســـــــــان
أنــا أم درمـــان دا ميـــــلادي و تيـــــلادي البشــــــــــــيل إسمــــــــــــي
أنــا الـــــقــــدمــــــت أولادي شــــــــرآفــــة و سيــــــف على و سمـــى
و كـــــنت القـــــوة و الحـــولة و حــــــــــزت و فُــــــــزت بالجـــــــــولة
و شلت الـــــرآية و الـــدولة و فـــــي التـــــاريـــخ بقـيـــت عنــــــــوآن

[بابكر مخير]

في الافلام بيكتبوا دايمن العمر المسموح له بمشاهدة الفيلم والشركات في أغلب الاحيان بتلتزم بذلك، يعني لمن يكون مكتوب أنه الفيلم 15 فمعناهو بالكتير فيهو قبلة أو ضمة "مش بتاعت سبويه وحصص اللغة العربية من نحو وإملاء وإعراب الخ". غايتهو ناس نتفليكس ديك مرفوع منهم القلم، شايتين ضفاري على طول وأنا في (الرد) دآ حا أحزو حزوهم، لكن من باب العلم، دون الاربعين والسيدات (الحبش مسئولية الراكب)..
القصة وأني في مشواري، تأكدت من وصول البص 18 الباخدهو من بيكر إستريت لي هاروو رود ولقيت أنهوحسي، لمن إتلفت وراي، لقيتهو زاحف نحو الموقف وأنا على بعد عشرين خطوة ويستوجب عليا أن أجري عشان الحق..
قدامي كان شاب جاري برضهو وسيدة على الاربعينات برضها.
وأنا في جريي دآ وبملاحظة الإتنين ديل، جا لي خاطري، حكاية أنهو الشخص لمن يكبر وذي حالتي، بنرجع لي سن الطفولة في حاجات كتييرة وأنه الشباب عنفوان.
لكن الشيء الجديد اللاحظتهو أنهو مع الكِّبر المساحة الفاصلة بين الذكر والأُنثى بتتلاشى..
تغيرات في الجسم ويلاحظ في صدر الذكر من عضلات ينقلب لي شيتن مشابه الثدي وأنهو يبقى رخو ومع مرور الزمن يترهل وينزل بالمناسبة من الذكور والفي ما فوق السبعينات ينكر ذلك فهو كاذب.
تاني شيء والخلاني فعلن أخوض في هذا؟؟
أنهو طريقة الجري الكان الشاب داك بيجري بيها وطريقة السيدة ولقيت أني بجري مثلها، يعني الوراكين الي الإلتصاق أكتر من ما يكونن مشبحات، لكن كمان الموضوع بتاع الوراكين بيكون مضمومات عند الإناث برضهو مربوط بالعمر فهناك إناث شابات بيجرن في السباقات وديل بيشبحن جد وبرضهو في عامل تاني ليهو تأثير مباشر في حتي مشي الإناث وهو موضوع الطهارة..
خلاصتهو الكُبر دآ حاجة ثقيلة وبيغير في البني آدم وما بعيد يوم ومن خلال مباشرة في التغيير، يبقا التستسترون هو الإستروجن والعكس صحيح وإن كان التستسترون يوجد عند بعض النساء وتلقى بيأثر في توزيع الشعر، فيكون لي بعضهن دقون وشنبهة :011:

[النور يوسف محمد]

نحن غايتو لسه فى عمر الزهور:D:D:D:D:D:D

[بابكر مخير]

نحن غايتو لسه فى عمر الزهور:D:D:D:D:D:D

يعني الجري والوراكين ما مضمضمات ;)

[عبدالمنعم الطيب حسن]

(ياخى الظاهر على ح أسرق فكرة البوست ده

عندى قصص ومواقف داير ألمها فى حتة واحدة)
اعلاه مكتوب من سعادة جنابو النور يوسف
في بوستي قصص وحكاوي..
.....
اسفل ردي عليه
👇
...


عادل امام مفلس جدا، مشي محل اخذ فلوس خلسة
وجاء راجع البيت بالمقاضي..
مرتو عارفة البير وغطاها
قالت لو اوعى تكون سرقت الفلوس دي
قال ليها لا
انا "استلهمتها"..
اصلا انا فكرة البوست (استلهمتها) من بوست حبيبنا الدكتور بابكر مخير
الشهير "ياخ الكبر دا حاجة بايخة بشكل"
استلهمت منه الفكرة
وفعلا فكرته هي جمع مواد نبثها هنا وهناك
وعندما اجد التفاعل معاها كبير
بجي انزلها هنا
منها ديس ومنها ساك..

[بابكر مخير]

(ياخى الظاهر على ح أسرق فكرة البوست ده

عندى قصص ومواقف داير ألمها فى حتة واحدة)
اعلاه مكتوب من سعادة جنابو النور يوسف
في بوستي قصص وحكاوي..
.....
اسفل ردي عليه
👇
...


عادل امام مفلس جدا، مشي محل اخذ فلوس خلسة
وجاء راجع البيت بالمقاضي..
مرتو عارفة البير وغطاها
قالت لو اوعى تكون سرقت الفلوس دي
قال ليها لا
انا "استلهمتها"..
اصلا انا فكرة البوست (استلهمتها) من بوست حبيبنا الدكتور بابكر مخير
الشهير "ياخ الكبر دا حاجة بايخة بشكل"
استلهمت منه الفكرة
وفعلا فكرته هي جمع مواد نبثها هنا وهناك
وعندما اجد التفاعل معاها كبير
بجي انزلها هنا
منها ديس ومنها ساك..

شوووووف؟؟
ما شاء الله وتبارك الله..
وصلنا مصاف الكوبار
وبقينا عننا يتداول ذكرنا في ما بيناتهم..
عظمة ذي دي ما كنت عشمان بوستيي يلقاها. إلا إيا دآ الله ودي نعمه.
جنابهو، سعادتهو ومعالي صاحب القلم العالي النور مع زولن عزيز وعظيم عبد المنعم الطيب، إسم وخلق:L

[بابكر مخير]

وأنا على أبواب التمانيين وكم راغب في الولوج خلف ذاك الباب وبيهو تكون؟؟
أربعة من المسميات من العمر قد إجتزتها وخبرت باطنها بعد أن سبحت في سطحها..
مرحلة الطفولة بضعفها ووهنها وعجزها، فلا حول لك ولا قوة. تُطعم وتسقى، تُحمم ويلبسوك ويبدوا في تعليمك الأساسيات والأبجديات وتجيهزك لي قدام؟
البلوغ وهي مرحلة الإنتقال من الطفولة الي المراهقة وعمر الشباب وهي فترة قاسية.
تحارب لتكون أنت وبرأيك لتسمع صوتك وتبرز شخصك وسط مجتمعك وتُحارب لكن ثائر ومعارض ورافض ويستمر الحال الي الوصول عمر الكهل وهي فترة إعلانها يبدا بالشيب في شعر الرأس وتكوين الاسرة ومسئولية أعاشها والإعتناء بمن يقدم ليمر بمراحل العمر التي مرت عليك مع فارق سبل تعاملك مع ممن هموا في سن البلوغ وعمر المراهقة (يعني تتباهى بي البيك وتتناسى الكان عليك وأنك في يوم كنت كدآ) وهي فترة عمرية طويلة في أحضانها مسميات منها الشيخ وهو من إكتسى رأسه شيبا (يعني مش كم سبيبة ذي بتاعت الكهل، لكن كمية وممكن كمان في الحواب وشعر اليد) والشيخ تطلق على العالم وهنا الفرد مع التجارب والمعايشىة للعديد من الأحداث يكون عارف والشيخ في الاسلام هو الفقيه والشيخ في السوق هو أقدمهم وأعرفهم بضروب التجارة وهلما جرا.
بعد الكاهل والذي تمتد فترة عيشه طويلا الي أن يبدا في فقدان العديد من الصفات التي كانت سانداهو في فترة العمر الماضية يصير هرما (ذي ما قال التونسي في الفيديو الشهير "هّرِمنا") وهي الثمنينات وما فوق..
هرمٌ حيث أني هرُمت
ولساتني، كايس ليا فيها كجة.
وخليهو الباقي علي الله:p
أذكر وحسب رواية شقيقتي العزيزة عزيزة، أنه الوالد وهو في الثانية بعد الثمانين من عمره وواقف يسقي في نجيلة البيت المخصص له من جامعة الخرطوم وهي برفقته. قال ليها: تعرفي لسة والواحد شايف أنه لسة محتاج يعيش. وقد توفي بعدها بسنيين..
جدودي الأمير يابا ود مخير والشيخ بابكر بدري تجاوزوا المائة..
مش برضي ليا حق أطمح في رخصة مرور سنين أُخريات;);)

[بابكر مخير]

رأس السنة وعيد الاستقلال عاى الابواب. كانت الإحتفالات جامعة وشاملة..
في السودان كلوب وهو كان أيام مايو مقر الإتحاد الاشتراكي وفي الجي بي وكان في البناية الإنتهت بأنها المصنوعات المصرية في شارع القصر وكان فيهو سهرة رأس السنة للإنجليز والأجانب من أوربيين، في وكت الجاليات القبطية ديل كانوا في النادي القبطي، بعدها بقت النوادي كتيرة البتحتفل بي راس السنة، النادي الأمريكي والنادي المصري والفنادق، فندق القراند هوتيل وفندق صحارى وأكسلسيور وفندق السودان وكانت في الحدائق العامة برضهو الإحتفالات وبي فرق سودانية، العقارب وكمال كيلة في
كازينو المقرن وفرقة شرحبيل غالبا في الفنادي ووليم أندرية في النادي القبطي وهناك كمان النادي السوري، بتذكر في السبعينات كانت كفتيريا النيل الازرق وفتحي وبياضة برضهم بنظموا حقلات رأس السنة وكذلك بعض الاسر السودانية تحتفل بهذه المناسبة وكل بطريقتهو..
إستمر الحال والإحتفالات برأس السنة مستمر لغاية ما نميري عمل بالقوانيين المسماة "شريعة" كان دآ كلهو في الليلة الاخيرة من العام وهي ليلة 31 ديسمبر من كل عام.
يصبح اليوم التالي 1 ياناير من كل عام منذ 1956 يحتفى به مولد الحكم المستقل للسودان.
الإحتفال بيهو قديما كان في القصر الجمهوري قبل الإنقلابات وكذلك في سرايا السيد علي الميرغني وسراي السيد عبد الرحمن المهدي وهناك أيضا على مستوى أصغر حجما في بيت إسماعيل الازهري، غير ذلك بتشعر فعلا أنهو في عيد والناس محتفلة والعديد من الحفلات لكبار الفنانين السودانيين، طبعا المسرح القومي والذي أصبح صاحب النصيب الاكبر في الاحتفالات، ما كان لغاية حكم عبود والثقافة والإعلام كان على رأسها الأمدرماني طلعت فريد. أتذكر كانت الفرق الأجنبية تحضر للسودان ومن حظي أني شاهدت فرقة التزلق على الثلج الامريكية (كانت في المسرح القومي وعملوا طبقة ثلجية كان بيتزحلقوا فيها) وفرقة الأكروبات الصينية الأولى وفرقة رضا المصرية..
وبالمناسبتين ديل..
أتمنى للجميع سنة قادمة أبرك وأخير من دي والحرب تقيف والناس الراجعة السودان تعود للأمن والسلام وبمناسبة عيد الإستقلال أوصي السودانيين أن يعضوا على إستقلالهم بالنواجز ولا ينجرفوا خلف من يريد ببلادنا شرا وسوء

[Abdullahi Gaafar]

كتير مرات؟
أفكر أمدرمان دي أضافة ليا أشياء ولا حرمتني من أشياء..
بتذكر طفولتي وكيف كانت السكن ومتنازعة بين العباسية، شارع الاربعين "تلطيفاً" حي الامراء وحي الشيخ دفع الله (الغرقان) والعرضة شمال ميدان الربيع وكيف بعدها فترة الدراسة جنوب المجلس البلدي للروضة والكتاب الكان وكتها اللبس غير مقيد لكن بعدها الهجرة لمدرسة الاحفاد أولاد وسطى وثانوية بالعرضة غرب وبسميها وسط لأنه كانت تتوسط معلميين متميزين وهما إستادي المريخ وبه أبدا لأنه الأول من شارع العرضة ومن بعد الهلال شرق المنطقة الصناعية وكمان هذه القطعة من أمدرمان بها مصانع تخصصاتها متنوعة ورشة إدريس الهادي ومصنع عوض حسين للأثاثات ومصنع حلويات الطحنية الشهير. بعدها موسم الهجرة الي الشمال لمدرسة وادي سيدنا قبل أن تطولها يد الجيش لتحتكر وتصير أولا الكلية الحربية ولاحقا قاعدة عسكرية و"نميري" الجوية إذ سُميت بإسم مغتصب تلك الجنة.
غايتهو ما أنساق وراء غضبي من تغول الجيش في حياتنا السياسية والعمرانية والاقتصادية وبس بقول حسبي الله.
أتذكر في فترة من حياتي إنتلقنا للسكن في الخرطوم شرق وكانت المنطقة سكنية كاملة وفيها روضة للأطفال جميلة ومنظمة إسمها روضة الخرطوم شرق، بقدرة قادر نميري حولها لجامع وعرف بجامع القوات المسلحة وكان هناك جنوب تلك الروضة قسم شرطة الخرطوم شرق وبرضك الجيش "أممهو" إستلمه وتبعه للقيادة العامة للجيش وبرضك حي المطار.. قصة تجنن...
المهم نرجع لي أمدرمان وإضافاتها وهي كثيرة. فهي مكون مع الخرطوم عموم والخرطوم بحري للعاصمة وهي مركز العلم الجامعات والمعهد الفني ومعهد المعلمين وأقدم الثانويات (الخرطوم الثانوية) وأقدم مدارس الوسطى (أمدرمان الوسطى) أما عن الكتاتيب فهي كذلك وعن الخلاوي (ما ظنيتها الاولى والله وغيري أعلم).
برجع تاني وأقول هل حرمتني من أشياء؟؟
حققي لمن أقراء للحبان عن ذكرياتهم في بلداتهم، ناس كوكي ويحكي عن البركل وناس دآك يقول قولن جميل عن الإبيض وزولن يوصف جبال التاكا، بشعر أني قدر ما فزت بأمدرمان، إلا أني إتحرمت من نوع عيشة ممتعة، حياة الريف والزراعة والحياة وسط الألبي والأنعام..
بس برضي بريدك يا أمدرمان، لأنهو فيك القبة وفيك الأمة مجتمعة..
وعنك صور أحاسيسي أخي الصديق عليه الرحمة عبد الله محمد زين...
أنا أم دُرمـــــان .. أنا الســـــودان أنا الـــــــدُرة البزيــن بـــــــلدي
أنا البرعـَـــاك ســـلام و أمــــان و أنـا البفــــــــــداك يــا ولــــــدي
أنـا أم درمـَــان لِسـَــــــان حالـــــك أريتــــك تـــــدري بي حـَــــالي
أنـا الــقـــــــــدرت أحـــــــــوالــــك و حبــــك بــــــــدري أو حــالي
أقـــــــوم بـــي أعــــظـم الأدوار و أكــــون الســـــــاحة للثـــــوار
وأبــقى البُقعة للأحــــــــــرار و أمثــــــل عـــــــــــزة الســـــودان
أنـا أم درمــــان ســـليلة النـــيل قسـمت الليـــل و بـنتَ صــــبـاح
أنـا الولــــدوني بـالتــــهليـــــل وهلـــت فــوقي غابــة رمــــــــاح
أنـا الطـابيـــة المقــــابله النيـل وأنـا العـافيــه البشـــد الحيــــــل
وأنـا القُبـــه البتـــضـوي الليـل وتـهدي النـاس ســلام و أمــــان
أنــا أم درمــان نصـــــرت الدين و كنـت فـــــدآيــــه للإســــــــلام
و روحـو حـولي ناس صادقين فنـــاهـــم في حيــــاتــي غـــــــرام
و زانــــوا المبــــــدأ و الفكرة و خــــلــدوا أعـــــظـــم الذكــــــرى
و دخــــلو المـدرســة الكـــبرى و نــالوا شهـــــــــادة الإيمـــــــان
أنــا أم درمـــــان أنــا الأُمــــة و صــــوت الأُمـــــة و إحســاســا
وأنـا التأسيـســـــه بـي تـــــــم و أنـــا اللــميـت شتــات ناســــــــا
مزجـــــت شمالــــــه بجنــوبه و سكــبت شــروقــــــه في غــروبه
و زرعت الطيبــه في دروبــه و طابــت عـــــــزة للأوطــــــــــــــان
أنـا أم درمـــان سقــــاني النيـل رحـــيـق العــزه مــن كـاســــــــــــو
أنـا اللي مجدو كُنت دليل وآيه و حـــــــــده لــي نـــــاســــــــــــــــــو
أنـا الـفي الشاطئ الغربـــــــي و رأس غردون مهـــر حربـــــــــــي
أنـا النيـــل الطلب قُـــــــــربي و مـــــــزج بــــــين كـافة الألـــــوان
أنا أم درمـــان أنـا الواحـــــة ورى البســـــقي و العطشــــــــــــــان
بروقي تضـــوي لوآحــــــــة و تهـــدي الســـــــــــاري و الضهبـــان
و وردو و جــــرو فـــــوقــي و نــــــادوا بقيـــــــــة الأجنـــــــــــــاس
و للتـــعمير بقيـــت مقيــــاس و للتقـــــــديـر بقيـــــــــت مـــــــــيزان
أنـــا أم درمــان مهيرة الميس أصــــيلة و مرســــــــــوني رجَـــــــــال
قــلادتــي القُــــــــدرة و التقديس و إرآدتي تــســــــــابـــق الآجــــــــال
أجــلـــب فـــوق ربـــوع داري و نـفـســي تـــنــــافـــس أقــــــــــــداري
أريتم يعرفــو مســــــــــــداري و يخــلــو زمــــــامــي للفــرســـــــــان
أنــا أم درمـــان دا ميـــــلادي و تيـــــلادي البشــــــــــــيل إسمــــــــــــي
أنــا الـــــقــــدمــــــت أولادي شــــــــرآفــــة و سيــــــف على و سمـــى
و كـــــنت القـــــوة و الحـــولة و حــــــــــزت و فُــــــــزت بالجـــــــــولة
و شلت الـــــرآية و الـــدولة و فـــــي التـــــاريـــخ بقـيـــت عنــــــــوآن


ضمن مساجلات بيني وبين صديقنا الجميل جدا ابوذر بابكر كتبنا عن امدرمان
ولأمدرمان الغناء
كَمْ مَضَى مِنْ وقتنا الْمَمْنُوح لِلْأحْلَاَمِ
كَيْ نَبْقَى هُنَا فِي حَضْرَةِ أمدرمان؟
هي بنت ملك العنج (كما يحكي أهلها) ألبسها أهلها ومن احتمى بها من فاخر الكلام صنوفا من ثياب الغناء العذب ودثارا من الثقافة الراقية
كقوس قزح أناقة الألوان وبهاء التمازج في اختلاط الأعراق والأديان وروعة تآلفها مدينة من انسان وغناء ونيل وقمر وما كان انحناء النيل لديها إلا تأدبا واسترخاءا في لحظات الدخول إلى الحضرة كغيره من دراويش المدينة الغارقة في بهاء الحب الإلهي على إيقاع آذانٍ أو ازيز طبل أو ايقاع طار أو تنهيدة كمان
نصبها التاريخ والماهرون من الأبناء المبدعين مركزا للفنون والثقافة ... وألبسوها طقسا من البهج القدسي المريح والنضال طقس رتبه الدين وزينه الفن وأرهقته السياسة وما كان إلتقاء عبد المنعم عبد الحي ومحمود محمد طه في أنا أمدرمان إلا لوحة موناليزا لتاريخ أمدرمان الشاهدة على تاريخ ابداع أهل السودان منذ أن عرف السودانيون الطرب والغناء من الدوبيت وأغاني التمتم والطنبارة إلى ميلاد الأغنية الحديثة
فما بين اللول لولك ويا العروس الكابي ديسا وحتى (يا ليتهم وبنفس قوة بطشهم)
تتهادى أمدرمان كحضنٍ آمنٍ لرائدات الفن النسائي الجميل عقد نسجت حباته الملهمات لشعراء الجمال ومبدعات الغناء وزينته نجمات سطعن في سماء المدينة الحلم موالا يمتد من عائشة الفلاتية ومهلة العبادية وفاطمة خميس وماريا وحواء الطقطاقة وحتى نانسي عجاج

[بابكر مخير]

ضمن مساجلات بيني وبين صديقنا الجميل جدا ابوذر بابكر كتبنا عن امدرمان
ولأمدرمان الغناء
كَمْ مَضَى مِنْ وقتنا الْمَمْنُوح لِلْأحْلَاَمِ
كَيْ نَبْقَى هُنَا فِي حَضْرَةِ أمدرمان؟
هي بنت ملك العنج (كما يحكي أهلها) ألبسها أهلها ومن احتمى بها من فاخر الكلام صنوفا من ثياب الغناء العذب ودثارا من الثقافة الراقية
كقوس قزح أناقة الألوان وبهاء التمازج في اختلاط الأعراق والأديان وروعة تآلفها مدينة من انسان وغناء ونيل وقمر وما كان انحناء النيل لديها إلا تأدبا واسترخاءا في لحظات الدخول إلى الحضرة كغيره من دراويش المدينة الغارقة في بهاء الحب الإلهي على إيقاع آذانٍ أو ازيز طبل أو ايقاع طار أو تنهيدة كمان
نصبها التاريخ والماهرون من الأبناء المبدعين مركزا للفنون والثقافة ... وألبسوها طقسا من البهج القدسي المريح والنضال طقس رتبه الدين وزينه الفن وأرهقته السياسة وما كان إلتقاء عبد المنعم عبد الحي ومحمود محمد طه في أنا أمدرمان إلا لوحة موناليزا لتاريخ أمدرمان الشاهدة على تاريخ ابداع أهل السودان منذ أن عرف السودانيون الطرب والغناء من الدوبيت وأغاني التمتم والطنبارة إلى ميلاد الأغنية الحديثة
فما بين اللول لولك ويا العروس الكابي ديسا وحتى (يا ليتهم وبنفس قوة بطشهم)
تتهادى أمدرمان كحضنٍ آمنٍ لرائدات الفن النسائي الجميل عقد نسجت حباته الملهمات لشعراء الجمال ومبدعات الغناء وزينته نجمات سطعن في سماء المدينة الحلم موالا يمتد من عائشة الفلاتية ومهلة العبادية وفاطمة خميس وماريا وحواء الطقطاقة وحتى نانسي عجاج


في زمنا وزمن القبلنا..
أمدرأمان هذه المعشوقة، جمالها في إبائها..
ماشة تتعرجن وكاشفة رأسها، لا بهمها ولا بتخاف لأنها محروسة بقبة المهدي وبوابة عبد القيوم، جنوبها حمد النيل وشمالها البكري وشرفي مدفونيين. شرقها حديقة الجندول وصاجات سمك السوكي وغربها إستاد المريخ وملاعب مدارس الأحفاد (مضمار جري والعاب القوى الاخرى، رمي الرمح، رمي الجلة وزنك ألعاب القوى الداخلية متل رفع الأثقال) وخور أبعنجة لفاي لين شرق جامع فيصل فاصل بين العباسية والعرضة..
المبدعين فيها غير ناس الفن وناس الكورة، الهادي نصر الدين (الهادي الضلالي) وكمال سينة، كمال أفرو وأخرين..
الأسواق فيها الملجة، السوق الكبير وسوق العرضة والدكاكين الشهيرة، منها العدني والتيمان والطوخي وعبد الله شلقامي..
ياها الجميلة الكان ناسها بين نسابة أو أقارب أو أهل..
ناس كمال في حي الشيخ دفع الله وميلاد وبيت عبد الله خليل وعلى شوارع منه بيت الازهري وبيت خاطر في بيت المال وإسرائيلي في حي البوستة وبيت الجاك في الموردة وبندا في حي الضباط وآل فريد في بانت وآل المقبول في ود نوباوي وأُرو في حي ود أورو..
ياها أمدرمان ومنها بتذكر الكتير غير القليل المذكور أعلاه

[بابكر مخير]

أهلي الرباطاب والغرابة حديثهم، تلقى الكلمات عندهم ليها معاني ظاهرة وباينة وعلى القولة: تقع نأقر ما مدنقر. يعني ممكن ينقال عليهو دراب. أها دآ في كتير أحيان بيجيب اللوم.
وفي كلام، مغتغت ممكن يكون نفس الكلام الفوق دآ، إلا بتقال وعليهو بهارات ومحسنات طعم وقدر ما دآك خشن الملمس، التاني دآ مخملي اللمس.
المخملي هو ذي لمن تلمس ليك قطيفة تعر بي نعومتهو مع أنهو الناس لمن تدور تعبر عن نعومة الملمس (خده أملس تقول حرير) والملمس الحقيقي للحرير أخر وخاصة لو اليد بيها جفاف جلدي تلقاهو أخرش حين القطيفة ملمسها تجاه إنسياب موجها ناعمة الملمس أكثر.
غير تأثير الكلمات كمفردات في الحديث، هناك عامل اللهجة وإحنا السودانيين لهجتنا جافة متل بيئتنا الصحراوية، عدا ونسبيا سكان مناطق خضراء لهجتهم رويانة ودآ بيوضح في إنتقاء الكلمات للتوافق واللهجات، نشوف مثلن أهلنا الشوايقة أرضهم زراعية وحلاقيمهم رويانة عشان كدي لهجتهم حنينة وكلامهم مغتغت لا بيجرح ولا بيخدش. أهلي الرباطاب مع أنهم جيران الشوايقة إلا أرضهم جبلية. إتصور جزيرة حجر وهناك مروي المرويي:cool:
تلاحظ الفارق في أئمة المساجد حين يخطبون، وعند الفانانين في يتفنون وفي صوت البلابل يصدحون..
إلا الفايتنهم الإتنين؟ ناس الشرق، في طبعهم معجنيين وصوتهم الكروان باعجاب على راس المستمعين والملمس، حرير، قطيفة، طرىء وليين
دآ كلهو جفاف الكُبر الثقيل دآ، يخلي الزول ياهو كدي :mad::mad:

[بابكر مخير]

الساعة حسي حداشر ونص ليل يوم التلاتا، الموافق 31 /12/2024 وهي أخر دقايق للمقبور إن شاء الله، عام 24، المنهو ما شفنا شيتن سمح تقول تتذكرهو للأيام القادمات في الاعوام الجاية لو ربنا مدآ وأخر لينا الأجل..
قلتا قبل ينتهي الشيء دآ؟ أعمل ليا جرد للأعمال وأشوف أوجه الاهمال ونوازنها بين فعل وأقوال، ما هن الاقوال كتييرة والواحد خايف أكون بقيت ذي دآك؛ حشاش بي دقينتَّ. إلا بمرق من بيتَّ ويراعاي للمحصول النجض ويقبل رأجع، بكرا بنجي من صباحتن دغشية ونحش من هنا لي هِنووووووك..
لقيت وقولتن لي جسمي، بلحيل راعيتهو وغير النكستين ديك بتاعت إنسداد التاجي وسرطان الحبال الصوتية، ياها النزلة اللاها معروفة متحول كروما ولا العادية البتجي في فصل تغيير الجو في بداية الشتاء، هي الايام دي قرصتني وبي شدة. ماهو الاصابة بتاعت سرور (بدلع للسرطان، شيتن يقول خلاص مدام إنقرص وبقا يكسر تلج، نطلق سراحهو) وثقالة الكِّبر، قرصة النملة بتبقآ أحر من عضة الدبيب.
قولتن لي أهلي، ما الإنكسر وتترمت أطرافهو صعب يتلم وإن حتى كان حصل بيبقى شكلهو إشتر، لكن الإجتهاد متواصل والفي القلب ما بشوبو شايبة، ركِزتهو قوييية وصامدة لا بتهزها براميل حارقة ولا صواريخ باليستية. ما أهلي هم عزوتي وهم ناسي بي سحناتهم المختلفة ولغاتهم المتعددة، هم الشرق والغرب والشمال والجنوب، ناس فرتاق وناس جمعة وبلية وناس بليل وحتى الشتر منهم ناس العوض بي عفويتهم الحد السذاجة وناس العطا والجغمة والإنطماسة وناس حمت الله وحمدان، ناس عقار وعبدالرحمن الحلم لجناهو تبقى السكنة بورتسودان (الرئاسي) وقلتا بإذن العالي المتعالي والقادر المقتدر والرحمن الرحيم العندهو محتسبين، تنفكا الكاتمة وترجع الناس لامة ويتعافوا والقلوب تتصافا ولي الفضل الباقي يلملموهو ويقولوا هيلا هوب، نبدا نبنيهو..
وقولتا؟ النقوم نستحمى ونغتسل والحمد لله نضيف إلا بدور أصلي ليا ركعين، عقابن، بين تارك وعارك. وأستغفر وأنوي وعلى ما يمكنني وإن كان، كلهو بيد العفو، الي الطالب معافي وعافي..
سنة جاية إن شاء الله أبرك وأخير لي كل الناس في العالم. وخلاص يكونوا فتروا من الحروب واللهم أهدي أمريكا وعقلها لتكف عن خلق الفتن..
القول كتير والمطالب لا تحصى ولا تعد.
لكن العشم في الذي يعلم ما في القلوب أن يحقق المطلوب وأُذكر نفسي وغيري بقوله تعالى:
" أَوَلَمْ يَرَوْا أَنَّا خَلَقْنَا لَهُم مِّمَّا عَمِلَتْ أَيْدِينَا أَنْعَامًا فَهُمْ لَهَا مَالِكُونَ* وَذَلَّلْنَاهَا لَهُمْ فَمِنْهَا رَكُوبُهُمْ وَمِنْهَا يَأْكُلُونَ* وَلَهُمْ فِيهَا مَنَافِعُ وَمَشَارِبُ ۖ أَفَلَا يَشْكُرُونَ * وَاتَّخَذُوا مِن دُونِ اللَّهِ آلِهَةً لَّعَلَّهُمْ يُنصَرُونَ* لَا يَسْتَطِيعُونَ نَصْرَهُمْ وَهُمْ لَهُمْ جُندٌ مُّحْضَرُونَ "

[بابكر مخير]

قلتا قبل ينتهي الشيء دآ؟

ربنا يلطف ويجيبها سلمية
https://www.youtube.com/shorts/tqRZEjFFdK8

[بابكر مخير]

من تمسي والواحد يشيل هم،
النوم كيف.... شراب داك الكان بيسندك، زمن ووقفناهو الحاجات التانية؟ عيييييييك منها، الشيشة كان راس "السلوم" يا دوبك اخد ليا نفسين وأحس بلطشة خفيفونية كدآ وطوالي على السرير، بعض مرات الواحد يترتح قبل ما يصل السرير. بس غيرتا لي التفاحتين النخلة البحريني. كان بيظبط الراس لكن ما بنوم والواحد يقعد يجرجر فيهو قريب الساعة ومشكلتهو أنه الزول، كل ما يطول ماسك اللي (الخرطوش) النوم بقا يطير من العين..
أها بقا النوم مع الكُبر يتضادوا، تزيد السنين والنوم يتناقص، معادلة سخيفة بالجد، غايتهو بقا الواحد يشوف في المُّصنع من حبوب النوم، ودي مشكلتها السرحان في إستعمالها. تبدى بي واحدة وتاني كم يوم حتى تاخد التانية، أها ما العمرر بيجري والكُبر بيتملكن تبقى تاخد في أيام متقاربة وتنوع تشوف ياتهو الأكثر قوة في جلب النوم وما ننسى حقيقة أني صيدلي، يعني عارف المضار وعارف دروب تحسين أداء الحبوب وكتير من الاوكات الواحد يستفيد من الخبرة في خلط وإستحداث خلطات ذات تاثير سريع والنكران يتسيد الفهم وتتوهم أنك بتخلط بصورة ما ضارة مع أنهو معروووووف ويكون مبدأ عام وثابت، ما من مادة تدخل الجسم وإلا فيها مضار وحتى في أنواع لتعالج تضر عضويا ونفسيا. ذي قصتي مع العلاج بجرعات الذرة، يعني حرقت الجلد ودآ غير أصلن إستعملوها عشان تحرج وين كان السرطان، ذي مشاريع زراعة القصب، تحرق عشان تقوم زرع جديد لكن للبشر ومع العمر دآ؟؟؟ البفوت بموت وما ليهو عودة من تاني، يا أخي حتى بعض مرات الجسم مع الهرم بيبقا ذي المتهري ومشرتم وأطرافهو لزجة ومتأكلة. يعني قطع إسبيرات ذاتها ما بتلفق..
غايتهو يعني حسي الساعة حداشر ونص قبل منتصف الليل وأكييييييد ظنيتني بعد ساعة إتنين، بقوم أشوف ليا حبتين بندول وحبة حساسية الأكيد من النوع المن يصرفهو دآك. يقولوا للبستعملهو: ما تسوق عربية، عشان بنعسك ومع الخلطة دي كباية لبن دافيء ونشوف كان ينفع..
طبعا ممكن البعض يتجاوب مع مشكلتي دي ويحن عليا وويتشوق يشوف، بكرا إن نجحتا نمتا ولا كان أخير ليا أشوف حبة منومة عديل فاليم كدا، وفي أغلب الأوكات عيارهم أبو خمسة مليغرام بيكون لونن أزرق والمعروف بيتاخدوا بالليل وكما هو الحال في أن الليل سماهو كذلك أزرق والنوم بالليل..
يمكن يكونوا برضك الحبة ديك بقصد أدوها اللون الازرق اللبني لإرتباطها بالنوم والليل;)looool

[عبدالحكيم]

طبعا ممكن البعض يتجاوب مع مشكلتي دي ويحن عليا وويتشوق يشوف، بكرا إن نجحتا نمتا ولا كان أخير ليا أشوف حبة منومة عديل فاليم كدا، وفي أغلب الأوكات عيارهم أبو خمسة مليغرام بيكون لونن أزرق والمعروف بيتاخدوا بالليل وكما هو الحال في أن الليل سماهو كذلك أزرق والنوم بالليل..
يمكن يكونوا برضك الحبة ديك بقصد أدوها اللون الازرق اللبني لإرتباطها بالنوم والليل;)looool


دكتورنا العزيز .. وانت دايما بصحة وعافية يا رب .
الثقيل ده أصلو لا بد مما ليس منه بد ... مرحلة إن طال العمر ...
ويبدو صيدليانيتك أو صيدليتك بحكم مجالك واختصاصك تجعل اتجاهك أو تفكيرك في تناول العقاقير التي ربما تقوم بتركيبها أنت بيديك السمحين دول من بندول وفيفادول وفاليوم ومسكن ( وكل دول ) من أجل دروختك وتنويمك ..
فهناك علاج ناجع ونافع بإذن الله تعالى لا فيه وخذ ولا فيه تناول بالفم بل آت من الفم .. ألا وهو القرآن الكريم فيه شفاء من كل داء يقول رب العزة (
( وَنُنَزِّلُ مِنَ الْقُرْآنِ مَا هُوَ شِفَاءٌ وَرَحْمَةٌ لِّلْمُؤْمِنِينَ ۙ وَلَا يَزِيدُ الظَّالِمِينَ إِلَّا خَسَارًا (82) الإسراء .
فجاءت الآية صريحة (شِفَاءٌ) ومطلفة مفسرة يقصد من كل داء ومرض وَرَحْمَةٌ خص بها المؤمنين ...
فتعهد القرآن كل ليلة قبل النوم لتنام مرتاح قرير العين ...
سلمك الله وشفاك بالقرآن ...

وَنُنَزِّلُ مِنَ الْقُرْآنِ مَا هُوَ شِفَاءٌ وَرَحْمَةٌ لِّلْمُؤْمِنِينَ ۙ وَلَا يَزِيدُ الظَّالِمِينَ إِلَّا خَسَارًا (82)
يقول تعالى مخبرا عن كتابه الذي أنزله على رسوله محمد صلى الله عليه وسلم - وهو القرآن الذي لا يأتيه الباطل من بين يديه ولا من خلفه ، تنزيل من حكيم حميد - إنه : ( شفاء ورحمة للمؤمنين ) أي : يذهب ما في القلوب من أمراض ، من شك ونفاق ، وشرك وزيغ وميل ، فالقرآن يشفي من ذلك كله . وهو أيضا رحمة يحصل فيها الإيمان والحكمة وطلب الخير والرغبة فيه ، وليس هذا إلا لمن آمن به وصدقه واتبعه ، فإنه يكون شفاء في حقه ورحمة . وأما الكافر الظالم نفسه بذلك ، فلا يزيده سماعه القرآن إلا بعدا وتكذيبا وكفرا . والآفة من الكافر لا من القرآن ، كما قال تعالى : ( قل هو للذين آمنوا هدى وشفاء والذين لا يؤمنون في آذانهم وقر وهو عليهم عمى أولئك ينادون من مكان بعيد ) [ فصلت : 44 ] وقال تعالى : ( وإذا ما أنزلت سورة فمنهم من يقول أيكم زادته هذه إيمانا فأما الذين آمنوا فزادتهم إيمانا وهم يستبشرون وأما الذين في قلوبهم مرض فزادتهم رجسا إلى رجسهم وماتوا وهم كافرون ) [ التوبة : 124 ، 125 ] . والآيات في ذلك كثيرة .
قال قتادة في قوله : ( وننزل من القرآن ما هو شفاء ورحمة للمؤمنين ) إذا سمعه المؤمن انتفع به وحفظه ووعاه ( ولا يزيد الظالمين إلا خسارا ) إنه لا ينتفع به ولا يحفظه ولا يعيه ، فإن الله جعل هذا القرآن شفاء ، ورحمة للمؤمنين .

https://www.youtube.com/watch?v=c6I7qdJ-qsk

[بابكر مخير]

[SIZE="5"]
فهناك علاج ناجع ونافع بإذن الله تعالى لا فيه وخذ ولا فيه تناول بالفم بل آت من الفم .. ألا وهو القرآن الكريم فيه شفاء من كل داء يقول رب العزة
[SIZE="6"][COLOR="Magenta"]
[COLOR="DarkGreen"]الحبيب حكومي..
ونعم بالله أن في القرآن وبالقرآن شفاء وحلول..
لكن إتصور معاي أنهو محكم التنزيل بداء بقوله تعالى "ٱقۡرَأۡ بِٱسۡمِ رَبِّكَ ٱلَّذِي خَلَقَ، خَلَقَ ٱلۡإِنسَٰنَ مِنۡ عَلَقٍ، ٱقۡرَأۡ وَرَبُّكَ ٱلۡأَكۡرَمُ، ٱلَّذِي عَلَّمَ بِٱلۡقَلَمِ، عَلَّمَ ٱلۡإِنسَٰنَ مَا لَمۡ يَعۡلَمۡ"
فوجاب علينا أن نقراء والقراءة هي المعرفة والعلم والولوج في الامر والتبحر فيه..
فتصور عزيزي وإنتا عقلك في أوج توهجة، مما تسبب لك، أرق يصعبُ عليك النوم. فمع سماع القرآن تلفحك الشومة وتدخلك في دوامة حلزونية، وتبقا سارح وتفكر في؟ على سبيل المثال قوله تعالى "وَإِلَى الْأَرْضِ كَيْفَ سُطِحَتْ" "وَإِلَى السَّمَاءِ كَيْفَ رُفِعَتْ"..
سبحان الله بعد نزلتا البوست الفوق دآ..
وما ذكرت للعزيز أشرف في أن ملء الجيوب الانفية في كثير الاحيان نتاج لحساسية ما. وهو ما كنت أعاني منه ليلة الاامس بسبب تغير الجو، أخدتا ليا حبة حساسية ومعاها حبتين بانادول لأنهو الجيوب بتعمل صداع..
أها على الساعة اتناشر كدأ، دخلتا ونمتا. هنئت بي نومة طفل وما صحيت إلا على الساعة تمانية.
لكني مستني الاعراض الجانبية، من كسير جسم وعكرة في المزاج...

[بابكر مخير]

أيام الطفولة الناضجة، يعني بداية التاشرات، كان في مطبخ البيت، شباك يظهر أنه قبل كدآ، كان باب، لأنهو فيهو عتبة. أها الأيام الكان الوالدين يكونوا خارج البيت.. بعمل لي أشقائي الاصغر وأقرب لنا في عمرهم، محل بتاع سندوتشات، وهم يصطفوا في عتبة الشباك ويطلبوا وفي أغلب الاحيان كان من بقايا الموجود أصلن في المطبخ من البايت وباقي الافطار..
الهواية دي، إتقننت لمن درستا صيدلة وأتذكر مرة سئلت عن سر قراية الصيدلة غير أنها متوارثة من الوالد والخال يوسف بدري كأول صيادلة سودانين، فأجبت أني في الطفولة كنت بكثر من الذهاب لي صيدلية الوالد "إجزخانة أمدرمان" وكان في المعمل يشابه نوعا ما الطباخ في المطبخ وبما أن هوايتي في الطفولة الناضجة كانت ما سبقت ذكره، فالصيدلة تمكنني من تجويد خلط الاشياء وفي الحالتين هم لي صحة الناس، كان تحضير الطعام "الطبخ" ولا تحضير الدواء..
ثم حدث أني جيت لاجيء للندن وكان وكتها صديقي، شقيقي الاصغر يوسف، يملك مطعم "المندولا" وشرفني أن خصص لي يوم الاحد لأمارس هوايتي المحببة وهناك تعلمت منه، أشياء وأطعمها كانت الطعمية والتي شكل خلطتها بفنه (هو فنان مطبوع ومتقد الرؤى دوما) وكذلك المش السوداني وكيف عمل "الرسيبي" خاصته..
لمن مشيت الامارات وبقصد التحضير لما سيكون الحال بعد إنهاء خدمتي في الشرطة هناك، فتحتا ليا شبه مطعم وأخدت موافقة يوسف مخير أني أستعمل إسم المندولا وقد كان أن بديت ولكن صاحب "شغلين" كضيب وركاب "وظيفتين" وقيع، ما مشت الحالة لكني الإستفدتهو وهو بقيت أظبط طعمية كاربة وهنا سبب البوست اليوم، ما هو مع الكُبر، عشان ما تمرق من الموضوع بالمرة، لأزمتن تلحق روحك وترجع لي الطريق "القويم"..
القصة أنهو جاني مزاج، أعمل ليا طعمية من المحفوظة عندي في التلاجة وخاصة أني قبل كم يوم ضبتا مش يوسفي "منسوب ليوسف مخير صاحب الحقوق" وفي الفريز عندي سمون "Baguettes" نص خبز، أها بديت وضع الخطة والعمل الجاد..
حضرتا حلة الغلي وكبيت ربع لتر من زيت عباد الشمس المكرر لأنه ما بشرب الطعمية زيت ومرقتا الطعمية المحضرة بالطريقة اليوسفية؛ كيلو كبكبي مع بصلة ونص راس توم وقرنين شطة خضرا، وقبل ما أبتدي العمل شغلتا الفرن عشان أخبز "Baguettes" حتى يكون في درجة حرارة ال160 درجة مئوية، حسب المكتوب في ورق السمون..
بديت أيضا في تحضير أرض المعركة وأهم ما فيها، ظرف بتاع أندروس (للمعلومية الاندروس، حاله حال العديد من الادوية الأخذة في الانقراض) وكباية قزاز، عشان ما يحصل تفاعل بين الاكواب الاخرى المصنعة من اللامنيوم أو الورقية وينفد شيء من فعاليتهو المتعددة الاشكال;) قزازة موية بااااردة عشان بعد العضة أشرب بيها المهضم..
(يعود تاريخ ملح أندروز للكبد إلى عام 1894 عندما باعه ويليام هنري سكوت وويليام موردوك تورنر لأول مرة كجزء من أعمالهما، سكوت وترنر. في ذلك الوقت، كان يُعرف باسم ملح أندروز للكبد. سُمي على اسم كنيسة سانت أندروز في نيوكاسل أبون تاين، التي كانت على مرمى حجر من مكتبهما، وكان سكوت وترنر يبيعه كملين فعال ومضاد للحموضة لآلام المعدة الخفيفة.)
أها في كورية ختيت العجينة الطعمية وأضفت ليها ربع ملعقة شاي من البيكنج باودر "طبعا برضه بساعد في الهضم لأنهو من ضمن مستحضراتهو كوربنات الصودا" يعني الواحد بياخد حذرهو برضهو ما مع العمر دآ، البطن لازمتن تراعى خاصيتها :redface: وكمان ملح حسب المسموح، ما كمان ضغط الدم متلازمة كُّبر وكدآ، أها لمن يستطيع ممكن يخت ليهو شمار من بتاع السودان، شمار السودان ونعناع السودان من التوابل الممكن تحفظ روحها لمدة طويلة.
بديت في رمي الطعمية وبي هناك دخلتا السمون الفرن وبعد 10 دقايق، كلهو بقا في التمام، مسحة مش، كسير أربع طعميات في السمون...
أأأأأأأأأأأه يستاهلها خشمكم الحلو وبعدها ظرف الاندروس في الكباية وشحنه بالماء البارد وشفطة واحدة...
و؟؟
كررررررررررأأأأأأأأأأأاااع:mad:

[بابكر مخير]

هل ما يجري في السودان ولا حتى في العالم كله؟؟
بيقدر زولن في عمري يتحملهو :eek::eek:
شوف يعني نمسك الفترة من 2019 لي يوم فتح مدني من قبل قوات "الجيش" مدعومة بقوات مستنفرة وقوات تواجدها يعيد للأذهان قصة تكوين وخلق ودعم وفتح السكة سالكة للقوة التي جاءت من رحم "الجيش" القوات المسلحة لتحمل نفس المسببات من إيجادها وهو فعل ما فشل الجيش من القيام به، من قتل وإبادة وتهريب للددهب ليقتسموه سواسية.
طيب بعد الجنا (المن رحم القوات المسلحة) عمل عملتهو السودة وعلى قول قادة الطائفة الحاكمة وزبانيتها؛ إنقلب عليهم وتشتت الناس في داخل البلد، نازيحين وخارج البلد، لاجئين..
تجو تاني تحملوا يا ناس الجيش وترتكبو نفس الغلطة وتلدوا قوة البطانة بتاعت كيكل رفيق حميدتي في إبادة ناس الجزيرة وشبيهو في الطموح..
زولن في عمري يشوف أحمد طه، يملطش في جهلاء السودان والمتنازعين على إمتلاك الكيكة بأكملها، ناس التوم هجو من جهة والباشا طبيق من الجهة الأخرى،،
في الخُمس الاخير من سبعينات العمر ويبقآ وزير إعلام دولته المجنى عليها من قبل شذاذ آفاق خالد الإعيسر ومساعد رئيس سيادة دولته، ياسر العطا (هناك مصدر موثوق وصادق حكى ليا؛ أنه أيام شبابهم وفي جلسات السمر مع أحدهم، جاب معاهو قريبهو وهذا القريب، استمراء حضور هذه الجلسات ولكنه لم يكن يشارك ماديا وقد لقبه الجلاس بالبشكير، لأنه يستمع بكل ما يدور ولكن بلا مشاركة وكان هذا القريب هو ياسر العطا).
والمحزن أكثر لي وأنا من عشت في سودان الخير والرخاء والمحبة والأخاء..
احضر هذا الزمن الردئ، حين يقتل السوداني أخوه، ناهيك عن المسلم لأخيه المسلم ويكبر لسفك دم أخيه ويتباهى للعالم بان أبادهم وحرقهم، في قراهم وفي معسكراتهم.
أن يلجاء السوداني في حربه على أخيه للدول الأجنبية لتسانده بتمويله لشراء سلاح أو تعطيه مباشرة السلاح، أن ترسل طيرانها لتدك معاقل أخوانه ويموت جراء هذا المسالمين الراغبين في عيش كريم..
الحمد لله أن أنعم عليا بهذا العمر وما كنت أنتظر أن تكون أواخره بهذا السوء وأن ألعن حالي أن حضرت في خواتيمه هذا وأن أَسى على حال ما ألت اليه بلادي الحبيبة التى كم تمنيت لها الخير والرفاة ....
أها يا أخونا شوفو..

[بابكر مخير]

بقولوا؟؟
السترة والفضيحة متباريات.
أها إتنين تقريبن حايمين معاي في العمر. واحدهم أصغر بي سنتين والتاني فايتني بي سنتين، لكن هم وييييين وأنا دآ ياني الحمد لله قدر حالي..
بايدن؟؟
وصل لغاية رئيس أقوى دولة في العالم وسفر بي طيارة جامبو هانقدر تحت أمرته وين ما عايز يسافر يملوها بنزين ويفك البيرق. قرارات تهز دول وتهدم بلدان، تغني ناس وتفقر أخريين.
هجمهو الثقيل دآ (الكُبر) فقلل من هيئتهو وأضعف من شخصيتهو وبقآ لبانة في خشم الإسواء والما يسواء يوم إتروكبن رجلينهو وبقن ما شيلاتنهو، في سلم الطيارة إترتح ليهو كم مرة وهو في إستقبال حاشد، خما الدلجة. لا وكمان هجمت الثقيل كانت عليهو تقيلة، بقا يفط سطرين تلاتة ويمسح في عيونهو "طبعا من مصايب الكُبر وذكرناها قبل كدي أنهو العيون بيصيبها جفاف ولا دآك بتاع الصومال، لكن جفاف العين أمرهو غريب لأنهو بجري الدموع وما بتقيف، تخلي الواحد، يقرب يشيل ليهو بشكير في جيبهو" وهو أكبر مني بسنتين، يعني من حسي الواحد يتحضر للوقيع اللإرادي:frown:
الملك تشارلس التالت!
أصغر مني بسنتين ومع الرغد في العيشة الهو عايشها والترف المتمتع بيهو وسكنة القصور والدهب والجواهر المدثر بيها والتاج الفوق راسهو، إلا ياهو ضيق الخلق بتاع الكُبر الحسي أنا عايشهو، إستعجل وأُصيب بيهو. دآ يوم بيمضي على تسلمهو الملك، نفض ليك الدواية الخاتينها ذي هناك وجدع ليهم قلمهم وطلع ليهو قلم من جيبهو... طبعن ضيق الخلق والنرفزة من متلازمات الكُبر وهو مع صغره مني، لكنها ضربتهو...
شوف كلفة الشهرة كيف، عترة في المشي ولا لفخت لا إرادية، تتسجل ليك في الفيديوهات وتذاع في التلفزيونات وشوف كمية من المحللين (فيهم برضهو إستراطجين ذي ناس اللواء فلان وقائد البحرية السابق) يقعدوا بالساعات يتكلموا عن الظاهرتيين الحصلوا للقادة العالميين وطبعا لو الجوز ديل كانوا ذي حلاتي كدي..
ما كان زول إنشغل بيهم إلا من هم حوالينهو وهنانا تبقى القولة معكوسة:
فضيحة الغنية مشهورة، وفضيحة الفقيرة مستورة

[بابكر مخير]

مع (الثقيل دآ) مسببات خلجات القلب غير تلك البيعرفها الحبيب لمن يشوف المحبوبة ولا هي تلك السرعة في الضربات البتعتري الحوار في خلوة الشيخ أو التلميذ في حصة التسميع، كان قران ولا شعر جاهلي (بالله إتصور طفل لساتهو ما وصل سن النضوج "الفتيات في عمر 15-17، أما الفتية فبين 16 حتى 17") والخوف والرعب من الذي ينتظره، كانت فلقة الشيخ أو سوط المدرس حال فشل في إرضاء هؤلاء بمستوى حفظه.
القلب هو عضو في جسد المخلوقات، بشر أو حيوانات وهو مضخة الدماء في الأوعية الدموية في الجسد ويعرف بأنه عضو عضلي بغرف أربع مربوطة أكيد بالعقل كهربائيا في حالتي الإنقباض والإنبساط وحاله كبقية أعضاء الجسم يتطوّر كباقي الأعضاء..
عند ضحايا (الثقيل دآ) وكما هو عضو عضلي ومع الكُبر وذي ما عارفين، فإن العضلات عامة بتضعف ويبقآ كمان عضلات القلب والذي في حديث البشر عن النواحي غير الطبية.
يقولوا: زول قلبهو كبير أو واسع ويعنى بأن الزول دآ مسامح ويعفو بسهولة وأيضا زول قلبهو أبيض. زول قلبهو رهيف ودآ ممكن نوصف بهو الحبيب وأيضا الزول البينخلع وينصدم عند سماع خبر محزن. زول قلبه أسود هو الحقود، سيء النية.
ويقال ايضا: القلب دليل سيدهو، قلبه التقول هوتيل (للزول البيكون يعشق كثيرات في وقت واحد) قلبهو ميت وهو قليل الإحساس..
المهم أنها القلوب أشكال وقلوبنا، ربنا يحفظها بعافيتها رغم الكِّبر ويحفظ قلوبكم بالمحبة والصحة التامة..
اللهم تقبل هذا الدعاء وأنت المجيب..
طبعا البعض حيقول آمين..
ودي كمان قصة براها:confused::confused:
هل آمين المقصودة والتي تقال في الصلاة ولا في ختم سورة الفاتحة وهي عند البعض يعتقد أنها في السورة ودآ خطاء شايع :frown::frown:

[بابكر مخير]

يقولوا: زول قلبهو كبير أو واسع ويعنى بأن الزول دآ مسامح ويعفو بسهولة وأيضا زول قلبهو أبيض. زول قلبهو رهيف ودآ ممكن نوصف بهو الحبيب وأيضا الزول البينخلع وينصدم عند سماع خبر محزن. زول قلبه أسود هو الحقود، سيء النية.
ويقال ايضا: القلب دليل سيدهو، قلبه التقول هوتيل (للزول البيكون يعشق كثيرات في وقت واحد) قلبهو ميت وهو قليل الإحساس..:frown::frown:
على قول المرحوم ساخر سبيل يتقبله الله في نعيمه:
وفي نفس المسار؟؟
كسرة خارج البوست عشان ما إتحلج بي نظرية فلسفية looool
هناك من يقول: تقيلة على قلبي والمقصود أن العقل والذي يسيطر على القلب في الإنقباض والإنبساط، لا يتقبل هذا الامر التقيل على القلب...
أها أنا تقيلة على قلبي حكاية؛ النبي عليه الصلاة والتسليم "رهن درعه عند يهودي" بقصد أنه عليه الصلاة والتسليم إستعار مبلغ مقابل رهن الدرع... هل اليهود يبيكون رهن الدرع بدون ربح في هذا المال. إذا كان بدون فيبقى يهودي غير من أصله وإن كان بربح فيبقى نوع من الربا... طيب لزومهو شنهو البنوك الإسلامية:rolleyes::rolleyes::rolleyes:

[بابكر مخير]

من الأقوال العربية وباللهجة السودانية..
مد كرعيينك قدر غوتاك وأيضا، بارك الله في رجل عرف قدر نفسه.
ودآ بيعني أن النفس البشرية أدرى بحالها..
أها مع الكُبر مفروض الزول يضع الاقوال دي قدامه وذي ما بيقولوا: نصب عينيه لكن بعض مرات والعقل الذي صابه تأكل ومناطق فيهو شبه تدمرت وخاصة بتاعت الذاكرة "الحصين"، الفصّ الصدغي في قشرة المخ وناس البنقو والحشيش عرضة لي الا إصابة دي وبتكون وحسب معرفتي الضئيلة، أنهو بتتلسع (ذي لفحة اللهب البتبعها تقرحات) وتضعف الذاكرة وتكتر السهّية وكمان الذكراة بتكون موجودة في الفصّ الاماميّ الجهيّ وظنيتهو أنهو الإصابات في الجبهة بتسسب فقدان الذاكرة تنمي الأنميزيا "ذي حالة محمد علي كلاي من كترت اللكمات التقبلتها الجبهة في تاريخ حياته الرياضية.."
وهنا قصة الغدة الدرقية مع العمر والبيكون إمتد وحسب نشاطها، لمن تخسدغ مشكلة ولو نشطة برضهو مشكلة، المهم الزول الذيي وذي حلاة القدري..
نظرية مد الكرعيين وبركة المولى عز وجل في مقدرة نفسهو، بتنمحي وتتلاشى ويبقا ياهو ماشي سااهي..
اليوم وفي الحمام بتاع لمن تجي مارق (بوخة مرقة loooollooool) والحمام هو دوش أرضيتهو فاتحة ودا الامر المطبق بحمامات الشقق في الإنقتيرا كنوع من ضمان السلام، يعني ناس بانيو وتتشبح عشان تدخل فيهو ودا جزء شوية صعب والصعوبة تتجسد في الطلعة من البانيو وأنك رجلك تنزلق وخد يا كسور ورقدة حوادث والضمور في عضلات القلب وضخ الدم يهبط والاطراف ذي التنشل وعضلات الحلقوم تنسد وصعب التنفس ويدخلوا أنبوبة أوكسجين والإلتهابات من الرقدة تنتج عنها موية الرئة ويقدوا الصدر من جنبة ويشفطو لترات منها..
دآ كلهو ومع الدوش بالارضية الفاتحة كان قرب يحصل عليا (مع الكُبر السيناريو الفوق دآ ممكن يحصل حتى لو كنت في قصور مشيدة:(:()، قال عامل شبشبين واحد جوا الدوش والتاني في مكان ناشفة عشان بعد ما أزيل الموية من جسمي ألبسه وأطلع بيهو برا الحمام..
قوووم يا بابكر وناس الحصين والفصّ القشري والأماميّ في ثبات، تنكر للقولتين وقول تنط لي الشبشب الجاف ولو لا ربنا ستر وكتب ليا أنجو من العواقب السيئات "لو الي حين"..
كان السطور دي في خبر كان يا ماكان على وزن (حدث ما حدث)..
لعن الله الحرب في السودان ومشعليها وصابين البنزين فيها:mad::mad:

[بابكر مخير]

ظبت الهندام وشيكتا الاناقة وتوكلت عليك يا الله..
قال ماشي، التقي بأصدقاء عشان أقضي معاهم وكت، ونسة وتفريق عن الهموم..
أها ومستني قطار الانفاق في محطة بيكر إستريت..
ويظهر أنه هناك طرف خفي طلب مني أن أتاكد من التناسق بين الألوان في قشرتي. ما هو البنطلون والشوراب والجزمة لون..
أوبس (Opss) وأوبسن كبيييييييرة...
تاريهو الشوراب لوناً تمام التمام.
لكن :wink:
الزخرف غير شكل وإختلاف بين الإثنين بين ولا يخفى إلا علي الزول في العمر دآ:mad::mad:..
لعنتا يوم عدم التركيز والذي أضحى ذو شأن كبير، سمح وإستبداد الثقيل على الحال والاحاويل..[]

http://www.sudanyat.org/vb/uploaded/118_1739871994.jpg

[بابكر مخير]

تاني الصورة، هجيمة كبيرة، ذي الخرف الكبير..
متأسف يا شباب ويا كوكي، نصايحك القيمة الرسلتها ليا في الواتس، ما عرفتا أعملها...
الكُبر يابا :cool:

[عكــود]

تاني الصورة، هجيمة كبيرة، ذي الخرف الكبير..
متأسف يا شباب ويا كوكي، نصايحك القيمة الرسلتها ليا في الواتس، ما عرفتا أعملها...
الكُبر يابا :cool:

ولا يهمك حبيبو،
عملت اللازم.

بعدين ياخي كفة البنطلون الكوردرويد بتضاري الحكاية، والفرق ما كبير.
أنا متأكد مافي زول بيكون لاحظ غيرك إنت.
وعلى العموم شكلك حلو وكلك حلو ولو مشيت بدون شراب :075:

[بابكر مخير]

ولا يهمك حبيبو،
عملت اللازم.

بعدين ياخي كفة البنطلون الكوردرويد بتضاري الحكاية، والفرق ما كبير.
أنا متأكد مافي زول بيكون لاحظ غيرك إنت.
وعلى العموم شكلك حلو وكلك حلو ولو مشيت بدون شراب :075:

https://sudanyat.org/vb/attachment.php?attachmentid=2386&stc=1&d=1739979356

[بابكر مخير]

الحنية الشدييييييييييدة:redface:
بتكبر مع العمر..
فيديو حنين خلاص...
الدمعة بتجري. بكل صدق إحساس
https://www.youtube.com/watch?v=iPVOsDnwJk8

[بابكر مخير]

أيام ونستقبل رمضان وهو الشهر الذي بداء فيه تنزيل القران الكريم على سيدنا محمد عليه الصلاة والتسليم. شهر يتعارف الناس عليه، أنه شهر التوبة والغفران، شهر يقترب الناس فيه بإحساس بعضهم البعض، يمسك الثري الشبعان والرويان فيه لساعات، تتساوى مع تلك التي يعيشها الفقير الجوعان والعطشان.
يجي الشهر هذه السنة والسنين قادمات في شتاء النصف الشمالي من الكرة الأرضية وهو نقيض ما عنَى به إسم الشهر والذي قصد العرب به شهر الحر الشديد (رمَض).
"أما تسمية رمضان فجاءت من الأصل «رمَض» وهي شدة الحر، حيث وافق رمضان وقت حر شديد؛ فأُطلق عليه هذا الاسم. والاسم متطابق مع طبيعة هذا الشهر عند المسلمين، حيث أن جوف الصائم يشتد حره من شدة الجوع والعطش فيكون جوفه رمِضاَ" وهكذا كان العرب يسمون الأشهر حسب حالة الطبيعة (المناخ) أو الأحداث؛ مثل ربيع وذو الحجة وهي أشهر السنة الهجرية..
بعضهم يربط تسمية الشهر بأنه جاء مع الإسلام ويفسرون ربط "الرمض" بأن سخونة حرق الذنوب في هذا الشهر وهو أقرب من حيث المنطق من ربطه بالحر المناخي، لأن الشهور الهجرية، غير الأشهر المتعارفة (الميلادية) ودي قصتها محيرة، لأنها سميت مع ميلاد عيسى عليه السلام، بس الناس تحتفل بعيد الميلاد المجيد في 24 ديسمبر من العام.
نرجع لي قصة رمضان وهل تسميته بعد الإسلام ولا قبله؟
﴿ يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ﴾ ودآ أمر واضح أنهو الصيام كان مكتوب على الذين من قبلنا وفعلن المسحيين بيصوموا واليهود كذلك ودآ في أشهر حسب تقويمهم، مثلن المسيحين الاورثودوكس الكنيسة القبطية والحبشية صومهم ظنيتهو 45 يوم، بس ما إمساك تام لكن من حاجات ولي فترة أقصر..
نرجع لي رمضان وكترت ما يقال فيه وعنه ومنه..
{ فمن كان منكم مريضا أو على سفر فعدة من أيام أخر وعلى الذين يطيقونه فدية طعام مسكين } نص واضح فالمريض وعندهو رخصة ما يصوم وذي البتسقط عنه أيام أخر ويبقا على الفدية. هذا لي مرضى السكر والكلى والقرحة والعديد من الامراض. لكن ولاكنن كبيييييرة، هناك من يقول أن الصوم لي زول السكري مفيد:rolleyes::rolleyes:.. وخلينا على كدآ..
نرجع لي رمضان تاني وإختلاف المسلمين على يوم بدايتهو ويوم إنتهاءه..
ربنا يسهل علي العالم معاوية شداد ويقنع العالم الاسلامي أن يستفيد من علمه ويبقوا على إعتماد الإمساكية حسب تنبوءه ببداية الشهر...
أتذكر من الأشياء فترة صومي الأولى، أنهو بتصيبني أيفوريا Euphoria وما عارف هل كانت نتيجة أمور نفسية ولا روحانية..
حسي بقيت زول فدية وما توفر وعايش واقعي دون "نشوة" loooollooool

اللهم يعيده عليكم أعوام عديدة وأزمنة مديدة، بكل الخير والبركات والأمن يعم البلاد وتتصافى النفوس ونرجع أخوان وأحباء في سودان يتسع للجميع:cool:

[بابكر مخير]

أول يوم صيام "للناس الصايمة"، بالنسبة لعديد من السودانيين هي تجربة جديدة، لست من ناحية سخونة السودان "العارمة" ولا شح الماء وإنقطاع التيار الكهربائي والعديد الذي لا يحصر من منقصات الحياة الأمنة الكريمة للإنسان، كنت عايز أكتب "لي بنو بشر" رجوعا المتدول عامة، بعضهم يقول ليك ديل أفظاظ التقول ما بشر والبعض يقول في إطار التعامل الانساني فيصف عدبم الذوق بأنه ما بشر. لكن لقيت أنهو بنو بشر هي قبيلة تسكن الجزيرة العربية ولروايات عنها مختلفة وأغلبها أنها قبيلة محاربيين أشداء..
أول يوم صيام السنة دي للكثير مننا، صايمنهو يا في أماكن نزوح في مناطقهم أو مناطق أخرى من الوطن العريض وتانيين صايمنهو في بلاد الهجرة.
أولائك الايمنهو في اماكن النزوح كان الله في عونهم فمثلا قليل الماء البيتلقهو من الماسورة قبل تشخر (دي جبتها من مرجع، خطابات أبعاج لمن قربت تشيلهو؛ فال لو تفتحو الماسورة وقالت شخ، أنا قاعد) في النزوج ندر واللقمتين بقن مجازفة، الكهرباء البتضوي اللمبات، راح طاريها وبقا راسم مالهم رتينة أو شموع بي خجل تنير قدر مرمى ضيائها وهو لا يتعدى البوصات، ريحة الأبرية المالية الحلة، خشاشميهم إرتاحت منهو وصوت مدفع الإفطار تلاشى وسط صوت القذف المتبادل وطنين المسيرات وإنفجارات البراميل.
الحالة دي ما ظنيتهو حقهو يكون معاها صوم (سخونة الحالة الإنسانية وسخونة الأوضاع السياسية والإجتماعية والإقتصادية)، حالة يتبراء منها عام الرمادة، فهي سوداء أكثر من سواد الليل والفحم الحجري وفحم الخشب، ظمء تشققت فيهو الجباه وجفت الشفاه وبنى العنكبوت في الحلقوم..
لو بيدي أفتى، كنت قلتا ليهم ما قاله العالم المصري..كيييييييييييف؟؟
قالوا: في قرية من قرى السودان قاحلة التربة، مياهها تستجل من بئر للوصول الي الماء فيه، يحتاج يوم وليلتين بحبل طوله ربع الكيلو، تكرمت عليهم وزارة الشئون الدينية من حرصها على أن يفهم الناس أصول دينهم وأرسلت شيخا من شيوخ الازهر، حضر من مصر في عملية التبادل الثقافي والديني بين دولتي حوض النيل (غينا وأثيوبيا، منابع فما خاشيين في الصفقة دي).
شيخنا من شمال الوادي جاء لتلك القرية ووصلها مع أذان المغرب، أهلنا الطيبين وكعادتهم في القرى وفي الأحياء حتى المرتاحة، بيجيبوا صواني الافطار ويكون جماعيا..
الصواني مليئة بالكوريات وكل كورية بغطاءها الملون الجميل "شوف مع الفلس والحالة الضنك دي يانا؟؟ أقرع ونزهي"..
جلس الجمع والكواري، في جوفها، بعض من التمر وقليل من البليلة وحتى الشراب وضع فيها فبداء المنظر مغري وكانها مليئة بالطيبات، من كشري ومحمر ومقمر..
بداء الناس بالبسملة وقطع التمر لزوم تحليل الإفطار وتناول الجمع من تلك الكور من بليلة ومشوربات سوائل ونادى المؤذن للقيام الي الصلاة وهنا، لا يعلو الحجاب على العين، فأمهم شيخنا من شمال الوادي فهو عالم ديني وبعد الصلاة، عاد الجيمع للجلوس على البرش وقال شيخ القرية موجها حديثه للشيخ الزائر وداعيا له أن يباشر في الحديث القيم عن الدين الحنيف والدرس المرتجى عن سماحة ديننا وعن جمال الصوم والحسنات الناتجة عن صيامه والذي أصلن جاء من أجله..
بأدب أهلنا المصريين وحلاوة حديثهم ومغطى بأداب الإسلام أن نخفت في صوتنا. قال لشيخ القرية:
طيب مش نِّفطر بالأول..
وجأت إجابة الشيخ القرية صادمة: يا مولانا ما إحنا يانا فطرنا..
ذهل مولانا وأخذته دقائق، حتى جمع في ذهنه قول هذا الشيخ وبينه وبين نفسه التي حكمها بيد الله الواحد الأحد، قال وهويف وينفض قفطانه ويعدل من كوفيته الحمراء على رأسه وهنا مولانا رجل الازهر المهذب والمصري صاحب اللسان الحلو، صرخ في ذاك الفضاء حتى كاد أن يكون صداها وصل لجامع الأزهر وعلى أقل تقدير، مكاتب وزراة الشون الدينية والأوقاف بالخرطوم:
يا أخي درس إييه، إذا دآ فطاركم، إتوا حتا الصيام نفسه مش مكتوب عليكم...
والأن مع النزوح في زمزم وغيرها من مراكز.
ما هي الفتوة المرجوة من أجل صيام هؤلاء :frown:
ملاحظة: الرد دآ مكتوب من التلفون، فمعذرة للأخطاء وحتى النقص في بعض الكلمات:o

[بابكر مخير]

ذي الايام دي وزمن زمنا الكنا فيهو صغار،
كان رمضان لينا، فرحة ولعب وخاصة لمن يكون في إجازة المدارس.. كان المقتدرين بيعملوا طبليات ويباع فيها حلاوة البمبوني "... سكينة" وكان البعض يعملوا كرتيلة وففايز جائزة دايمن حاجة رمزية، غير كدآ كان بيكون في الاحياء منتشرة، ظاهرة المدافع اليدوية الصغيرة وهي مكون من حديد في شكل قطراس أو قرن ومربوط بدبارة في طرفه الخارجي بمسمار، يعمل بأن تُخرت المادة المشتعلة في عود الكبريت داخل "المدفع" ويضرب بحائط أو شيء صلب فاتنفجر العبوة محدثة صوت وكنا نتباهى بأن مدفع أقوى، إلى أن غزا عمنا الطوخي سوق المدافع المصنعة بالبمبان (بإختصار، هي لفافة صغيرة من الورق وبداخلها حصى ومواد كيميائية متفجرة) وهو سهل الإستعمال وصوت إنفجاره أقوى، كما أنه غير مربوط فقط بشهر رمضان ولكن سوقه أكبر وأوسع إنتشار في الأعياد..
أكيد قليل من قراء هذا الرد، يتذكروا تلك الايام وغيرها من أحداث عشناها..
كان الدين في أيامنا، تسامح بلا كره وكان تخاوي، لا فرقة، كان الصوم لمن إستطاع ومن لم يستطع بسبب فعليه بما جاء ذكره ومن لا سبب له فأمره عند المولى عز وجل.
أذكر كانت المحلات التي يقدم فيها الطعام غير مقيدة بأمر ناهي أن تقفل أمام الزباين، إلا أن بعض المحلات كانت تقفل أبوابها الي منتصفها وتقدم الطعام لمن رغب. في سوق الخرطوم الأفرنجي كانت مرطبات زكي إمتداد شارع البرلمان، أما في السوق العربي فكان الكثير من المحلات تفتح أبوابها بشكل عادي وكذلك في أمدرمان، عمنا جورج مشرقي (من الإسم يعرف بأنه ما مسلم) كان يعامل الامر بحذر وبرضهو يجر الباب لي نصه..
كانت فترة العصرية في أيام رمضان، هي أكثر فترات اليوم نشاط في الاسواق وحتى داخل الاحياء، فكنا نحن الصغار ذي "الدليفرو" توصيل الاغراض الناقصة في اللحظات الاخيرة قبل ضرب المدفع وكان صوت المدفع يسمع أكاد أن أقول في كل أنحاء امدرمان، ما وكتها ما هناك الثورات وأمبدة وأحدة وما أمبدات ولا المهندسين وكما أخاف الكضب وأبالغ، ناس الفتيحاب بيسمعهو وظنيتني أقول كنا بنسمعهو في وادي سيدنا الثانوية. كان صوت المدفع (أفتكر كان يطلق من منطقة الجمعية التأسيسية حاليا وهي كانت كلية البوليس وعلى بعد أمتار الكلية الحربية، حيث المستشفى العسكري الأن) هو الاكثر تعارف لإعلان وقت الافطار منه صوت الأذان والمدفع الذي يضرب بعضهم بسموهو مدفع دلاقين وهو أيضاً مثل يضرب للشخص الصوتهو عالي وفعلهو دوّن...
الخرتوم وبحري رمضانهم في أحياء يشابه ذلك الذي ذكرته ولكن هناك بعض أحيائهم الخلطة السكانية ربما تفرض نظم أُخرى والله أعلم:(

[بابكر مخير]

طبعا في هذا الشهر الكريم يصيب المسلمون نوع من الهوس والإنجزاب القوي في أنهم يطروا دينهم ويبقا الغل الشاغل..
تفتح الرادي، أحاديث عن السيرة النبوية وتفسير للأحدايث، مؤكدها ومستنسخها وغيره ومن كتر ما يروى، الواحد بيصيبهو "الكنفيوشن" واحد بيتكلم عن صلاة التراويح وهل هي سنة والأخر يقول قول أخر وإبن الصعيد المتحدث القوي وصاحب جلسات الإستماع الأكثر إنتشار، شيخ متولي الشعراوي قال وبشكل حاااااااااااااااسم أنها (سنة) وإختلف مع التانيين القالوا، ما سنة لي درجة أنهو النبي عليه الصلاة والتسليم صلاها تلاتة ايام وتاني ما طلع المسجد وحين سئل لما إنقطع عنها، قالوا: قال: خفت أهو الناس يبقوها سنة.. طبعن حكاية فرض وسنة دي زمن الرسول ما كانت في وهي عرفت أكثر وأنتشرت أوسع من قبل الائمة والهما أصلن جاء أغلبهم بعد بعد قرون من زمن الرسالة..
مش سبب أنهو الواحد (إنكفش من كنفيوشن Confusion)..
واحد في قريب من السياق"يعني عن صوم المسلمين والتعامل معاهو كانهو شيتن خاص بيهم بس" في أنهو والايام دي الاقباط صايمين وبالمناسبة صومهم 45 يوم. أهم المسيحيين صايمين وحاجة عادية، لأنها بينهم وبين ربهم.. يعني ما شيتن تتغير ليهو مواعيد الشغل ومباريات كرة القدم وبرامج التلفزيون، يا أخي قناة الجزيرة مباشر التردد التاني، كان الساعة 4 مساءا بتوقيت قرينتش، بتجيب أحمد طه أو واحد من المتدربين تحته في برنامج خاص عن السودان. أها دآ إتغير لأنهم بيجيبوا صلاة العشاء وصلاة التراويح الاصلن فيها خلاف عن وجوبها من عدمه، مرة من القدس ومن غزة ومرات من بورتسودان.. يعني عديييييييييل شغل كيزان:wink:

[بابكر مخير]

سبحان الله على قدرته وتجلت صنعته..
الإنسان وذي ما ربنا قال: ﴿ لَقَدْ خَلَقْنَا الْإِنسَانَ فِي أَحْسَنِ تَقْوِيمٍ﴾ ومع الكُبر برضهو التناسق متكامل coordination، ونشوف القصة دي ومستقاة من حياتي وما عاصرتهو من تغيرات وتنوعات، الجسم في الطفولة، سنة ناعمة وساهل جداً تتنى وحتى لي درجة نقول تطوى ومثال لي كدآ؟ نشوف الاطفال لو الواحد وقع،ع يقوم يتنفض. لكن مع مرور الزمن والعوضام تتحور (طبعا دي من العبارات الحديثة، ذي "سردية وحتى كلمة إستراتيجية البقت على لسان من يشيل ذي ناس خبير إستراتيجي وهو طز من غيرهو ما ناقش وكمان حكاية التوحد الطالعة موضة، بالله زمان كان يا إتوصفت بالادب الجم ويوقولوا ليكن من أدبهو عينهو ما برفعها من الواطة وللا لمن تكون هيّ من شدة أدبها ما بتعاين ليك في عيونك، أها الجوز ديل حسي تصنيفهم الدرجة الأولى ولا التانية من التوحد"). تتحور لتأخذ وصف مغاير لما عرف في الاول "ذي احمد الشرع تحور من محمد الجولاني ولا في أحيان العلم والدراسة في أمر ما أو مرضن تجوط ليهو القصة ويقوم يلصق ليها صفة متحورة ذي الكرونا اللي حسي ما إتعرف أمرها"..
أها العظام بالعربة الفصحى عند الاطفال تشكل حوالي 40% من الجسم لكنها ما عضام ناشفة ذي الفي الزول نقول الرجل هي ياها عظام غضروفية، عشان كدي لمن تمسك الطفل تقول لو تنيتهو بيتني وعضام ناس إحنا ديل والهي حوالي 12 وا 13% من الجسم بقت ذي "الطرورة" ولي الما عارفين الطرور، هو نوع خشب والغريب انهو في تقارب من الخيزران، لكنه أخف وزنا حتى في الموية بيطفح...
نرجع لي قصة البوست دآ وقصة التناسق.
أها مع الكُبر رغم أنهو الخلايا في الجسم تكوينها الخلقي ضعف وأنهو العضلات ضمؤرت والعضان بقت هشة والأعضاء الباطنية والمكونة لشكل الجسم (ناس كرعين ويدين وراس..) تبدلت والجلدة المغطيا القصة للجسم كله ذبلت ومن الجفاف تشققت وفقدت بريقها ولمعانها..
لكن مع دآ كلهو والحمد لله مدافريين وشاكرين، حامدين لين يوم الدين:wink::wink:

[بابكر مخير]

مع الكبر،
البصيرة بتسد محل البصر، يعني الكنت بتشوفهو واضح بي عيونك قبل ما يطش الشوف لضعف النظر وبي المسببات الكتيرة، ناس سكر، موية بيضاء وتحولها لي سوداء، إرتفاع ضعط العيون، طشاش الكُبر البخلي الزول، يصهين من البيشوفهو.
أها البصيرة هي شنهو هي لي الما عارفنها؟؟
البصيرة هي الشوف دآك ظاتهو لكن ما بالعيون. بالقلب والعقل..
أنا وسليل بيت أنصاري من جدودي الكبار وبتذكر مرة كتبتا وقلتا أني مع شقيقي الحبيب بروفسير قاسم بدري، مشينا وبناء على دعوة كريمة من الخليفة كمبال لحضور موليدية السيد على الميرغني وإحنا الاتنين أولاد أنصار وحزب أمة ملتزمين وذكرتا الإشعاع الشفتهو في وش أحفاد السيد على الميرغني، كما أني ما بذكر ولا مرة في حياتي ذكرت الإسم دون أن أسبقه بلقب السيد وهو السيد علي الميرغني...
أها القصة ورا القول دآ؟؟
أني في صفحتي في الفيسبوك نزلتا خطاب لي سماحة مولانا السيد محمد عثمان الميغني في شأن الحرابة القايمة في السودان وبترجاهو أن يحسم الامر..
https://www.facebook.com/permalink.php?story_fbid=pfbid02GnbdXcpUDXu6hEFBj2 N6mXCz3NrdCh1CJ35VRxf1nXoqQei1r7231Hh8QvbxSX7el&id=100073438879860

[بابكر مخير]

بطقس في خبارات العالم وعلى غير رغبة، أول قناة إتفتحت ليا سيئة الذكر الجزيرة مباشر، كان فيها نقل لجلسة مجلس العموم البريطاني عن بيان حكومة صاحب الجلالة في أحداث الشرق الاوسط (غزة وغزوها ثانية من جيش إسرائيل).
وعشان ما أحرق دمي وأتغيب عن ما يتحدث النواب ووزير الخارجية بترجمة ضعيفة ولي درجة سيئة، إنتقلت فورا لي محطة البي بي سي، قناة نقل جلسات "البرلمان"..
كانت الجلسة وحسب مفردات الصحافة "ساخنة" وقد فاتني الإستماع لبيان الحكومة بلسان وزير خارجيتها وهو السيد لآمي هو قانوني وينحدر من أصول غينية (أفريقية)..
وأنا أستمع لمداولات النواب وأسئلتهم وإجابات الوزير جآ في خاطري؟؟
أنهو أيام الكروونة كان الفحص نتيجته مقلوبة عكسيا، فالبيكون negative هو بالنسبة للزول أمرٌ positive، وهو الحال في أغلب الفحوصات المختبرية الطبية للعيانات المأخوذة من دم أو بول وفي أحيان ولا مؤاخذة "البراز" أو صور تشخيصية.
لكن السؤال هل، ديمة السلبي، هو إيجابي القبول..
أها مع سرحتي دي؟!
إتذكرتا لمن كان بنسمع جلسات برلمانات السودان المتعاقبة والتي عاصرتها وجلسات البرلمانات الما حضرتها مع أني كنت موجود في الدنيا حين كنت أبلغ العامين من العمر. وهو البرلمان الاول وإسمه كان الجمعية التشريعية، تأسست 1948 وبلغ عدد أعضائها 79 عضوا برئاسة محمد صالح الشنقيطي. بعدها برلمان 1953 وفي فترته تم إعلان الاستقلال في ديسمبر/كانون الأول 1955. ثم برلمان 1958 وإلانتهى بإنقلاب عبد الله خليل/عبود.
بعد كدآ البرلمانات العايشتها متنوعة، منها البرلمانات الديمقراطية الحقة ومنها المزورة الشمولية.
في التسلسل الرقمي نمرة تلاتة هو برلمان عام 1965 الذي جاء بعد ثورة أكتوبر 1964 وكان ضمن البرلمانات الديمقراطية الحرة "الملاحظ؛ فترة حكم الفريق عبود، ما عمل تمثيلية بتاعت برلمان كسلطة تشريعية، بل كان صادق في أنهو باشر الحكم بسلطة عسكرية منفردة في التشريع مع الإستعانة ببعض المدنيين في السلطة التنفيذية" بعد كدآ رجع العسكر للحكم مرة ثانية في 1969 من خلال إنقلاب نميري ودآ عمل ليهو سلطة تشريعية صورية وسماها مجلس الشعب. بعدها جات ثورة رجب/أبريل 1985 ورجعت الديمقراطية منهكهة وإنتخب البرلمان الديمقراطي الرابع 1976 بمسمى الجمعية التاسيسية وعلى قول المصريين "يا فرحة ما تمتش" جاء العسكر تحت راية الاخوان المسلمين (إعترافات الشيخ حسن الترابي) للحكم وشكلوا دمية تشريعية خاصة بهم..
أها دآ الحصل في السودان وبداية البرلمانات في السودان ومن 1948 بالجمعية التشريعية والتي كانت في ظل الاحتلال العثماني البريطاني وبالمناسبة بريطانيا ما سبقتنا كتير في حكاية أنهو رئيس الوزراء (رأس السلطة التنفيذية) يجي من البرلمان ، دآ حصل في 1902 وقبلها السلطة التشريعية ما كانت باإنتخابات الديمقراطية بل كانت عند مجلس اللوردات وديل إختيارهم بيجي من الملك أو الملكة..
نقوم نرجع لحكاي ال negative وال positive؟؟
السلبي أني لأسباب سبتا البلد (السودان) لكن كمان الإيجابي أني لقيت ملجاء هنا (في بريطانيا)..
السلبي أنهو الإنسان في السودان يكون عندهو قيمة مع الحاصل وما ظنيتهو البلد بشم عافية بعد دآ وينعم بدمقراطية أبدن ما دام الجيش والإسلاموين خاتيين راسهم على الحكم...
والإيجابي في إطار شخصي أناني بلا حد ولا حدود؟؟؟
أني عايش في بلد ديمقراطي وللإنسان فيهو، عندهو قيمة..

[بابكر مخير]

مستوحاة من بوست كبيرنا "مقاما" معتصم (زووم) وخوفا من حلج ذاك البوست المنسق.
حأنزل صور خاصتي، بتحكي تأريخ...
في الصورة الجماعية 1958. أنا على اليمين من الصف الاول جلوس
https://www.sudanyat.org/vb/attachment.php?attachmentid=2390&stc=1&d=1742740380

[بابكر مخير]

[QUOTE=بابكر مخير;1201324]
[B]صور خاصتي

الصور دي في جواها ذكريات مرتبطة بي ذكريات، أحداث وأماكن وناس ونبداها بالكبر، ما العلمونا ليهو أنهو الكبيرإن زول فليهو القِدْح المعلّى، الكبير في المساحة ليهو خاصية أعلى وإن كبير كمية فدا ليهو تقدير بأنهو زايد في الكفاية وكبير الحيوانات الفيل ودآ زمان كان شعار مديرية الخرطوم هو صورة لرأس الفيل ودا ربما المقصود إظهار "خرطوم لفيل" بالذات..
الكبير برضهو ليهو خاصية مثلن الكبر يعني القِدم والكُبر بقصد الإجلال والكبير في العلم وبيقولوا الكيبير، كبير...
أها أنا ببتدي بالكبر الفتحين ليها بوست "الكبر دا حاجة ثقيلة بشكل" وهنا تتجلى المتناقضات لتبرز معنى، فالصور بتاعت الكُبر هي في الحقيقة الأحدث والاحدث هو الأجد، يعني أحدث موديل ودآ يكون جديد طازة وما عدى سنين، لكن في حالة الصور فالامر مختلف.
أحدث الصور هي للشخصي مع الكُبر..
الصور والانا فيها بدقن أبيض، أخدتها "سلفي" وأنا في البص والعمر يناهز ال78 عام وزول تجاوزت عمر المعاش بحده الاقصى بثلاث سنوات، ما بيقولوا لغاية 75 المعاش ممكن يمتد إلا في حالة أنك شغال لي روحك ولا ياهو إتفتحت ليك كدآ ذي ناس موسفيني وسلفاكير والثقيل ترمب وبقيت رأس دولة وإترفع عنك قلم المعاش. الامركان الرئيس بيستمر رئيس وما بيقولوا معاش لكن الرئيس السابق. اها كتير أحيان بسأل نفسي بعد ما أشكر المولى أنهو مدى ليا في الايام وأشوف فيها أحفاد وأزيد من معارف وأني عشتا فرد من بين الطبقة الوسطى، موظف طول عمري. عملتا شنهو غير أني موظف.. أقوم أتذكر أني إتفلسفتا ودي مربوطة بالصورة التانية في مرحلة الكبر، القاعد منجعص فيها في كفتريا المندولا بأبي ظبي والخاصة بي وكانت ذي سكرة وكتها إنجعاصة والولد رجل أعمال لكن ما طولت وبعدها بي شوية جات الفكرة وطلعن القرشين تلاتة الإنصرفن فيها، راحن هباء وبقت عليا؟؟
إنّ حظّي كدقيق ٍ ... فوقَ شوكٍ نثروهُ
ثمّ قالوا لحُفاةٍ ..... يومَ ريح ٍ إجمعوهُ
صعُبَ الأمرُ عليهمْ.. قلتُ يا قوم ِ اتركوهُ
إنّ من أشقاهُ ربِّي .. كيفَ أنتم تسعدوهُ؟
الصورة البي العمة دي في فترت الإغتراب الاولى بدولة الامارات العربية بين 78 - 86 وكنت وكتها شغال لحكومة أبوظبي خبير فحص السميات والمخدرات وكانت فترة جميلة من الحياة فيها معارف كتيرة وناس جميلة من السودانيين صفوة منهم أذكر دكتور عبد المنعم بلة وهو كان أنصاري بقدرم ما يحمل المسمى من قيم سامية وخلق كريم ورجولة توفي رحمة الله عليه وأتذكر الصورة دي أخدتها يوم مشينا السفارة السودانية في أبوظبي لتقديم ترشيحه في دوائر الخريجين للإنتخابات التبعت ثورة رجب/أبريل...
ظنيتهو في تاني صورتين نقول عنهن لمن المزاج يكون معتدل ويساعد loooollooool

كسرة...
كوكي شكرا يابا،
سرعة الإستجابة في الموقع رجعت "تش" :cool:

[بابكر مخير]

[QUOTE=بابكر مخير;1201324]
[B]صور خاصتي

الصور دي في جواها ذكريات مرتبطة بي ذكريات، أحداث وأماكن وناس ونبداها بالكبر، ما العلمونا ليهو أنهو الكبيرإن زول فليهو القِدْح المعلّى، الكبير في المساحة ليهو خاصية أعلى وإن كبير كمية فدا ليهو تقدير بأنهو زايد في الكفاية وكبير الحيوانات الفيل ودآ زمان كان شعار مديرية الخرطوم هو صورة لرأس الفيل ودا ربما المقصود إظهار "خرطوم لفيل" بالذات..
الكبير برضهو ليهو خاصية مثلن الكبر يعني القِدم والكُبر بقصد الإجلال والكبير في العلم وبيقولوا الكيبير، كبير...
أها أنا ببتدي بالكبر الفتحين ليها بوست "الكبر دا حاجة ثقيلة بشكل" وهنا تتجلى المتناقضات لتبرز معنى، فالصور بتاعت الكُبر هي في الحقيقة الأحدث والاحدث هو الأجد، يعني أحدث موديل ودآ يكون جديد طازة وما عدى سنين، لكن في حالة الصور فالامر مختلف.
أحدث الصور هي للشخصي مع الكُبر..
الصور والانا فيها بدقن أبيض، أخدتها "سلفي" وأنا في البص والعمر يناهز ال78 عام وزول تجاوزت عمر المعاش بحده الاقصى بثلاث سنوات، ما بيقولوا لغاية 75 المعاش ممكن يمتد إلا في حالة أنك شغال لي روحك ولا ياهو إتفتحت ليك كدآ ذي ناس موسفيني وسلفاكير والثقيل ترمب وبقيت رأس دولة وإترفع عنك قلم المعاش. الامركان الرئيس بيستمر رئيس وما بيقولوا معاش لكن الرئيس السابق. اها كتير أحيان بسأل نفسي بعد ما أشكر المولى أنهو مدى ليا في الايام وأشوف فيها أحفاد وأزيد من معارف وأني عشتا فرد من بين الطبقة الوسطى، موظف طول عمري. عملتا شنهو غير أني موظف.. أقوم أتذكر أني إتفلسفتا ودي مربوطة بالصورة التانية في مرحلة الكبر، القاعد منجعص فيها في كفتريا المندولا بأبي ظبي والخاصة بي وكانت ذي سكرة وكتها إنجعاصة والولد رجل أعمال لكن ما طولت وبعدها بي شوية جات الفكرة وطلعن القرشين تلاتة الإنصرفن فيها، راحن هباء وبقت عليا؟؟
إنّ حظّي كدقيق ٍ ... فوقَ شوكٍ نثروهُ
ثمّ قالوا لحُفاةٍ ..... يومَ ريح ٍ إجمعوهُ
صعُبَ الأمرُ عليهمْ.. قلتُ يا قوم ِ اتركوهُ
إنّ من أشقاهُ ربِّي .. كيفَ أنتم تسعدوهُ؟
الصورة البي العمة دي في فترت الإغتراب الاولى بدولة الامارات العربية بين 78 - 86 وكنت وكتها شغال لحكومة أبوظبي خبير فحص السميات والمخدرات وكانت فترة جميلة من الحياة فيها معارف كتيرة وناس جميلة من السودانيين صفوة منهم أذكر دكتور عبد المنعم بلة وهو كان أنصاري بقدرم ما يحمل المسمى من قيم سامية وخلق كريم ورجولة توفي رحمة الله عليه وأتذكر الصورة دي أخدتها يوم مشينا السفارة السودانية في أبوظبي لتقديم ترشيحه في دوائر الخريجين للإنتخابات التبعت ثورة رجب/أبريل...
ظنيتهو في تاني صورتين نقول عنهن لمن المزاج يكون معتدل ويساعد loooollooool

كسرة...
كوكي شكرا يابا،
سرعة الإستجابة في الموقع بقت أحسن :cool:

[بابكر مخير]

أما عن الصورة الفيها لابسة بدلة وأخر شياكة تاريخها كانت في السبعينات وأتذكر وكتها كنت شغال في شركة قرنفلي للأدوية، كممثل لشركة ميدجونسون وهي واحدة من مجموعة شركات برستول مايرز وكان عندهم مقوي يحوي عناصر كتير مفيدة للجسم وحفظ اللياقة وإسم المنتج Sustagen وبيكون بي نكهات مختلفة، فنيليا وشوكلاتة وغيره.
هناك كان في قصة نتعرض ليها.
كان فريق الهلال مشارك في منافسات إقليمية وأنا هلالابي علي السكين وفي الطرف التاني كان سيد صادق المهدي يقف في الطرف الاخر "المريخ". كان سيد صادق وشهادة مني بأنه شخص منفتح ويحب كل التغيير في النمط السياسي والاجتماعي وهنا قمتا إتصلت بي مكتبه وهو كان رئيس وزراء الفترة بعد ثورة رجب/ابريل وأتذكر مدير المكتب كان أبراهيم علي وهو كان مخلص في أداء عمله ولكنهو ما قدر إستيعاب فكر سيد صادق وكان إتصالي بالمكتب أني نظمت زيارة لرئيس الوزراء لمعسكر إقامة فريق الهلال وأنا حضرت كمية كبيرة من المنتج دآ وكان رد ابراهيم علي في الاول، لكن إتا عارف سيد صادق ميوله مريخابي. فرديت عليهو إتا ما عليك كلمهو وأنا متأكد أنه حيوافق، فهو قومي فوق التحيز العاطفي وكانت الزارة وكان لها وقع حسن للأعبين والادارين وأنا قمت بدوري في ترويج المنتج.
أها شركة قرنفلي دي كانت في الطابق الاول من البناية الفاتحة علي "الأتينة" في عمارة أو العلا وهي في عمارة الشيخ مصطفى الامين وفي الطابق الارضي كان أستديو تصوير يمتلكه الخال عصام عبد الغفار وهو فنان مطبوع، رسام مبدع وأظن عائلتهم كلها كدآ فهو إبن خالة الفنانة ستنا بدري وإبن خالة شقيقها الطيب بدري أستاذ الفنون وخريج المعهد الفني، كان من بين رواد أستديو عصام الفنان الرسام والموسيقي شرحبيل أحمد كان بيناتهم علاقة جميلة ودائمة المطاعنة، فعصام يقول لي شرحبيل "فلاتي" ويرد عليه أستاذ شرحبيل يا "حلبي" وكان هناك الكثير من الرواد أصحاب مشارب مختلفة في حياة السمر والسياسة والرياضة.
هذه الصورة أخدها ليا عصام وعلى قولهو؛ وشك في الصورة سمكرتهو وسنفرتهو..
وفعلا صدق وطلعت بالشكل القدامكم دآ

[بابكر مخير]

﴿ قُلْ يَا أَهْلَ الْكِتَابِ تَعَالَوْا إِلَىٰ كَلِمَةٍ سَوَاءٍ بَيْنَنَا وَبَيْنَكُمْ أَلَّا نَعْبُدَ إِلَّا اللَّهَ وَلَا نُشْرِكَ بِهِ شَيْئًا وَلَا يَتَّخِذَ بَعْضُنَا بَعْضًا أَرْبَابًا مِّن دُونِ اللَّهِ ۚ فَإِن تَوَلَّوْا فَقُولُوا اشْهَدُوا بِأَنَّا مُسْلِمُونَ﴾ صدق الله العظيم

أتذكر أبواتنا قدر ما إختلفوا في أرائهم السياسية، إلا أنهم حافظوا عليها فيما بيناتهم ولم نتأثر نحن أبنائهم بذلك..
عمنا إسماعيل الازهري تزامل مع الوالد في بيروت وهناك تولدت صداقة والوالد كان حزب أمة وأزهري معروف للجميع أنه كان إتحادي، إذكر إبن أخي دكتور مصطفى الصادق كان صديق ودود مع محمد إسماعيل الازهري وفي السياسة مختلفين، صديقي وأخي عبد الوهاب مكي عربي ود خليفة وهو شقيق الروح وأخ عزيز، عبد الخالق محجوب متزوج من نعمات ووالدها حزب أمة..
كانا في زمن صغرتنا وشبابنا لا بنعرف نفرق بين دآ ود منهو ولا دآ أهلهو منهو، كنا داعكين الحياة في الحلة كلنا ياهو من العباسية، حي الشيخ دفع الله ولا ولاد العرضة، أصل أهلنا شنهو ما كان لينا فيهو كبير غرض..
إتشاركنا القعاد تحت نور العامود في الحلة وفي نفس الفسحة الزمان لعبنا فيها دافوري .
كان لمن واحد من أبواتنا ودي تشمل كل الأباء في الحلة، كان قريبك ولا غريب، لكن ليهم كان نكن الإحترام بتساوي وذي ما هم كانوا علينا يعطفون وشاعرين بأنهم في تربيتنا هم مشاركين أبائنا البيلوجيين. لمن واحد فيهم يجي ماشي بي قدامنا، السكون والهدوء يسود جلستنا وإن كنا قاعدين بنقيف إجلال وإحترام ودا ما بس لي أبائنا بل كلن لي أشقائنا الاكبر منا سنا وكذلك مدرسينا. وكتها كان فعلا الكبير ليهو مكانتهو والمعلم الذي علمك سطرا، صرت له عبدا...
كان الإختلاف ما بيسبب الخلاف وإن كان في!! بيكون في حدود ولا يصل لمرحلة الكره والضغاين..
السياسة آفة وهي فتاكة عند تكون متداولة بين الناس الما بيعرفوا لعبتها وتداولها وف الفترة الاخيرة بقت سلاح فتاك يهدم القيم والاخلاق..
أختلف معاك لي أبعد الحدود ولكن برضك في شيء قوي بيربطنا وهو الوطن الواحد، أها بقينا حسي هذه النعمة التي وهبنا لها الله (السودان) أقحمناه في إختلافتنا والبقينها خلافات فاجرة. بقينا نشيطن بعض وننكر على بعض وطنيتنا ونحرم بعض من هويتنا، نسب الانساب ونلعن الاصول والمشكلة الاكبر أننا بقينا حتى ممكن داخل الاسرة الواحدة نمارس هذا في بيننا كإخوة أو أقارب أو نسابة..
جات على كدا هذه الحرب المفتعلة وزادت في إلهاب نار الفرقة والعداوة بيننا، بقينا نتناول مسميات عادية لنصورها إهانة..
أتذكر في سودانيات كان معانا الأخ بدر الدين يوسف، رغم إختلاف الكثير معاه سياسيا، لكن ما فينا زول تعدى على سودانيتهو ووطنيتهو وقوميتهو..
أنا شخصيا من مناصري إيقاف الحرب ومن الفعلن متمنيين أنهو الحكم يكون مدني ومؤمن بي شعارات ثورة الشباب الاخيرة وأنه فعلن الجيش للثكنات والدعم السريع وكل الحركات المسلحة تنحل...
أنا كنت مع قحت روحا وكيانا وإيمانا ومع تقدم بعد للحزن الشديد، تشتت قوة الحرية والتغيير وإنقسمت. وحسي مع صمود بعد أن إنفصلت مجموعة من تقدم وحا أستمر إن شاء الله مع قيادة حزبي الملتزمة بالخط الذي توافقنا عليه من زمن حياة زعيمنا عليه الرحمة الصادق المهدي نحو سودان حر ديمقراطي، يحكمه المدنيين وأن كل أجهزة الدولة لها مسئولياتها تقوم بيها ولا تتدخل في أمور الحكم وسأكون دوما رافضا لأي حكم شمولي عسكري كان أو أيدلوجي...
وحقيقي أتمنى أنهو أحنا السودانيين نسيب الفُرقة العنصرية البيناتنا ونرضى بي بعضنا ولا نخون على غير وجه حق وأن نتخاوى ونعمل لنرتفع بأنفسنا لنستحق أن نكون سودانيين....

[بابكر مخير]

أمس مشيت ندوة عالينها ناس صمود. المتحدثين فيها تلاتة من القيادات، خالد سلك وبداء يفقد بريقه بتكرر نفسه وكترت ظهورهو هنا في لندن، بكري الجاك، أنا معجب بالشاب دآ، لأنه منظم في أفكارهو وبيجيب ليك المفيد يعني بالجد "precise"، أها في وجه جديد أول مرة أشوفه وهو الاستاذ بابكر فيصل، ما شاء الله شباب الإتحاديين الظهروا بعد ثورة ديسمبر، راقيين في حديثهم، منظمين في أفكارهم وعندهم إسلوب جاذب للجمهور المخاطب.
إنتهيت من الفيهو كفاية ليا ومن طول قعدة وشميط بنطلون وكتمة بديت أشعر معاها بي مشروع دوخة وقررتا أنهو (العمر ماهوش بعزئة) فكفاية وأمرق أتخارج.
على قول حبانا المصريين (وعينك ما تشوفش إلا النور)، الواطة ضلمت وفي لندن عادي في الشتاء بتضلم قبل وكتها لكن مع أنهو الصيف وبداء يرمي بضيائه إلا أنهو الساعة سبعة ونص كانت ضلمت وزاد من سوداها، زمرة من شباب مؤيدي الحرب واقفين قدام المبنى الكان فيهو الندوة وحتى غير ما يتبينوا هوية الزول المارق من ذاك المبنى وهو فندق، إن كان نزيل ولا دخل له بالسودان، فيكفيهم لون بشرته (يعني ممارسة قانون الوجوه الغريبة حتى هنا في أرض المساوة تشمل الجميع)يهجموا بعنف وهياج شديدن ويسبون الشخص ومن خلفه ويلعنوا أبو أبوهو ويصفون أمه بأقبح الالفاظ..
أنا في الحقيقة، قاعد أشوف جنس دآ في الميديا، لكني أمس أول مرة أتعرض لمثل هذا الوضع.
وقفت قدامهم وقلتا أشوف شنهو العيملهو لكنهم يظهر ممن هم ورائهم معلمينهم أنهو لا يعتدوا ولا يشتبكوا مع كائن من كان ويكتفوا بقبيح السباب والإساءة وتبينت بنهم شابين، أحدهم يعمل حلاق ويلقب بالشبح والتاني بشوفهو ديمة لابس ليهو تيشيرت يا فيهو صورة البرهان أو الصورة الوهمية للإنصرافي. قلت ليهم يا وليداتي أنا بعرفكم وإتو بتعرفوني، حصل مرة شفتو من شين ولا كلمة بذيئة، واحد من الباقيين ردا، إتا قحاطي، قلتا ليهو يابا قحتي دي ناسك فاتهم عليهم تعلميك مواكبة المسميات، أكيد إتا ظاتك يمكن كنتا قوى حرية وتغيير قلب ما ينجح الكيزان في تفتيتها، أها أنا يابا، متطور أكتر منك إتا الوليد الصغير دآ. أنا حسي بقيت صمودابي بعد كنتا تقدم..
لكن يا وليداتي وحسي إحنا في نص السوق وإتو من حماستكم دي، ذي الأنكم غيروين على بلدكم. فما شينة العالم دآ كلهو يشوفوكم تتناحروا مع بعضكم بالعلن وبعدين..
إتو كان سودانيين بالجد، أكيد ببتذكروا كيف أننا بنحترم الكبير وبنديهو مكانتهو، ممكن نختلف لكن قولتن تسبوني وتلعنوا أهلي، دي عديييل بتسحب منكم الأصل المشرف بأنكم سودانيين...
مشيت منهم ولكن يظهر بعد ما مشيت، لموا ليهم في ضحية تانية، لأني سمعت من بعيد، نبيح وعواء لهم...
حليلهو سودان زمان، الكان لمن تكون في الغربة، تتمنى تشوف ليك سوداني عشان تقالدهو وتتمطق فيهو من عبق البلاد...

[بابكر مخير]

من العام 1975 ، يعني من القرن الماضي وأنا شغال في مجال مكافحة المخدرات من خلال فحص وتحليل المخدرات وإستمريت في العمل هذا وفي دولتين وإكتسبت معرفة واسعة عن أنواع المخدرات مع نشاطاتي المختلفة في مجال مكافحة المخدرات "مدنيا"، عن طريق العمل مع منظمات طوعية. زاد من معرفتي بالإنعكاسات السالبة على متعاطي المخدرات والمجتمع من حوله (الاسرة متضمنة في "المجتمع").
حتى جاء السدس الاول من هذا القرن وأكملت حلقة مكافحة المخدرات ثلاثية الدوائر؟
1 المعرفة العلمية والتركيبات الكيميائية للمخدرات وتأثيراتها الفارماكولجية وأخطارها الصحية.
2 المعرفة المدنية من خلال العمل الطوعي وزيادة المعرفة بالمضار السيئة على المجتمع وبالنواحي العديدة من إسرية، مادية
3 العمل مع الاجهزة الميدانية في مجال مكافحة المخدرات من ضبطية وقضائية.
فعملت خبير لإدارة مكافحة المخدرات الضبطية، ...
مع هذا الزخم المعرفي "نسبيا" في معرفة مضار المخدرات على الانسان ومباشرتي العمل في مجالات المكافحة بنوعيها الوقائي التوعوي والوقائي الضبطي وتأكدي أن الآفة الحقيقة التي تصاحب إنتشار المخدرات وتعاطيها هي (الإدمان) وما يصاحبه من أخطار ممكن أن تكون مميتة..
إلا أنه وكما يبدو؟؟
أني قد فشلتا من حماية نفس من هذا البلاء:eek::eek:
فمع هذا التقدم في العمر (الكُبر) والتقدم في معرفة أخطار المخدرات والتي أسوئها "الإدمان"..
فأنا مصاب بداء الادمان العضال..
أبتدت الحالة مع بداية ثورة الشباب في 2019 ومتابعتي اليومية لمجريات الامور من خلال قناة الجزيرة "القطرية" وإستمر الحال. التعاطي اليومي من خلال جرعات متفاوتة مع بداية الساعة ومن خلال نشرات الاخبار.
بدا الحال يأخذ منحى أخطر حين جاء إنقلاب 25 أكتوبر وزادت جرعات التعاطي فشارك موزعي الأساسي (قناة الجزيرة القطرية) قنوات تلفزيونية أخرى. حتى جاءت الهجمة الكبرى وإتسمت بوساع شرس في التعاطي مع حرب 15 أبريل 2023 وظهر برنامج بتاع أحمد طه وهو الاشد فتكا وأخطر الأنواع تأثيرا ونجح مقدمه في أن صار المعلم الاساسي في تمويلي اكتر نوع كارب من هذه السموم..
خلاص بقيت مدمن درجة ممتاز حتى أنهو قدر ما أزيد الجرعة ما بشعر بسطلة مضبوطة. حتى إكتشفت قناة تلفزيوني إسمها الزرقاء. دي بقا نوعيتها؟؟ الكمدة بالرمدة، تجيب خبر الزول من أول جرعة وأول ما يشوف البيقدموا برامجها..
ياها دي حالتي ومع علمي ومعرفتي بأخطار الإدمان المدمرة، إلا أني بقيت ماسوشي (من الماسوشية، حب تعذيب النفس) وبتلذذ بي مشاعدة هذه القنوات وبنكرش وأنا في الإنتظار:frown::frown:

[شبارقة]

يا سلاااام يا دكتورنا العزيز .. والله متابعك بمتعة وإنت بتحكي وتنثر في الدرر .. كلنا كبرنا ورغم ذلك بنداقش .. إنت كبيرنا ومنك نستفيد والماعندو كبير يشوف ليهو كبير .

[بابكر مخير]

يا سلاااام يا دكتورنا العزيز .. والله متابعك بمتعة وإنت بتحكي وتنثر في الدرر .. كلنا كبرنا ورغم ذلك بنداقش .. إنت كبيرنا ومنك نستفيد والماعندو كبير يشوف ليهو كبير .

شبو الحبيب
شبابك، إن صنتهو صانك..
زمنا، زمااااااان. ما كنا قايلين القولة دي؟ بيجي اليوم النندم عليها..
للأسف هيصنا وساهرنا، فرحنا وسطنا الدنيا! أعليها، أسافيلها. شقلبناها ولولوناها وبألوانا صبغناها..
شيء نطيط وطاقة مستهلكة وياريتها كانت السالبة.. أبدن كانت الإيجابية الحسي غايبة علينا..
أبدن كانت من داخل العضام منخورة وفي جوووا القلب محفورة. شيء شواكيش وشيء شرا في المواعيد..
إتا قايل جنس دآ؟؟ عواقبهو ما بتظهر من الكُّبر.
ياهو القلب الرهيف دآ، سببهو شنهو غير الذي دآ...
شبو؛ يابا ربنا يحفظك لي شبابك..
شكراً الحبيب. شوفتك هنانا ردت فيني الروح..
ليك المحبة وإجلال

[بابكر مخير]

أول مايو من كل عام.
يذكرني بأحجية نفسها ومتكررة.
يعرف عن الشيوعين أنهم بتسيدوا كل شيء مثل الأفكار والمناسبات، وكمان ديمة بيسموا المناضلين والشهداء بأنهم منهم..
أولن تبادي الفكرة هي نظرية فلسفية وكل أمر ربط بالفلسفة هو غير واقعي، يعني نظرية وما هي معادلة عشان تكسب واقعية التطبيق فمثلا نظرية الوجودية لسارتر وهي برضها ليبرالية كما الشيوعية ما قدروا الفلاسفة في أن يفكوا رموزها، إلا أن ماركس مؤسس الفكر الشيوعي حظي بي لينين في أنهو يربطها طبقة العمال والذين قامت حركتهم أصلن في أمريكا وكانت حركة مطلبية في القرن التاسع عشر، يعني تقريبا في نفس الوكت الكانت فيهو إنتفاضة الشعوب السودانية ضد الدولة العثمانية والغريب أنه الحركة المطلبية دي كانت في أمريكا وسببها تعديل الاجور وتصدت لهم السلطات ومات منهم نفر ومن وكتها بقى الاول من مايو يوم عالمي لتمجيد أولائك العمال.
طبعا وذي ما قلتا أنهو الشيوعيين بتسيدوا الحاجات، بقوا العيد أكثر مناسباتهم ظهورا. لمن ذكرتا برضهو إدعاء أنه المناضلين هم من كوادرهم، قصدت الشهيد أحمد القرشي والذي أستشهد في داخليات جامعة الخرطوم وصدفت الايام أن يكون شقيقه صديقي عزيز لدي ونفى إنتماء شقيقه للحزب الشيوعي..
المهم في القصة أنه إحتفالات عيد العمال ليها في وجداني ذكريات حلوة خالص في أيام دراستي في براتسلافا عاصمة إقليم أسلوفاكيا (حسي جمهورية أسلفاكيا) وخلينا على كدآ. ;);)

[بابكر مخير]

الروتين هو بوصلة الحياة، إن إختل المؤشر في البوصلة فالإتجاهات يتعدم تحديدها وهو نفس الحال بالنسبة لأمر الحياة.
الإنسان، الحيوان، الطيور والأسماك، الجبال والبحار والانهر. الأرض والقمر والأفلاك والواكب وكل الكون..
روتين واحد، الارض تدور بشكل روتيني حول الشمس ولو إختلآ الروتين دآ. ما تعرف حيكون شنهو، إلا المولى سبحنه وتعالي هو الذي يعرف ويأمر..
شوف بقا؟؟
لما كتا زول زمااااان؟؟؟ ما حسي بقينا ناس زمان والقصة علي القدرة الجسدية والذهنية فطلعنا من قبضة الروتيين، كونك تتذكر فعل الاشياء بي الامر الروتيني المتكرر حسي تحت رحمة الزهايمر وإن قلتا كمان ترسم خطة لي طريقك تمشي عليهو قدام؟! تبقى موهوم لأنك ما بعد شوية البيحصل شنهو ما عارفهو وياهو تبقا بدون روتين وفاقد بوصلة..
ما شوف زمااااان الواحد بصحا الصباح وعلي الحمام وإستخدام كل جزئياتهو من حوض غسيل الوش، للمقعد أو الحفرة ومن ثم البانيو أو الدش (حكاية الجردل والطشتا دي كانت في مرحلة الطفولة وتجاوزنها).
إن الله هدى، ياها المصلاية وبعدها كباية شاي وبسكويتة ولا تقضم ليك عيشة حال العزابة وإن كنت من محظوظي الزواج، فبتلقى ليك فطرة وإن كنت ساكن مع الحاجة؟ أكيد بتلقا ليك لقيمات يسندك لغاية وكت الفطور.
الروتين برغم تنوع أشكاله في مرحلة كباية الشاي والفطور إلا أنه بيرجع للسير في نفس المسار.
أكان بالترحيل الجماعي ولا بي بوكسي الحكومة ولا الحافلة المشتركينها ناس الشغل مع بعض، طوالي على المكتب كان حكومي ولا قطاع خاص أو حتى حقك وإتا سيد القصة كلها، برضهو الروتين ماسك دربهو والتسلسل اليومي، عدا أيام العطلات الإسبوعية أو الدينية لين الحكومية..
تخلص من الدوام بكل أشكاله المذكورة سابقا، بترجع لي سكنك، كان بيت وياهو مع زوجتك ولا لي أمك ولا شقة خاصة ولا مجمع سكني للعاملين بتاع المؤسسة البتشتغل فيها وهنا الروتين بيديك فسحة وبراح تشكل فيهو برنامجك لفترة، لكن برضهو بيرجع يختك في مواعينك، لو بتنوم بعد الغدا، حتصحى مكفرن وزهجان لغاية ما تنتقل لي المرحلة التالية من خط الروتين، يا بتقعد مع الاهل وتشرب كباية شاي العصر ولو فيها تلفزيون تشوفهو والحكمة هنا، يكون التلفزيون عروضهو بتمرضك وتتدبرس بيك، لكن برضهو ما السيد الروتين بيقعدك رغم أنفك وهنا نلقى أمر مشترك بين الروتين والإدمان ما في الحالتين، إتا عارف الشيء دآ ما كويس ليك الروتين معروف بيقال عنهو "قاتل" والإدمان مما جميعهو فتاك ولا لو قلتا تكتفي بس بسيدك الروتين، ياهو تمشي تلاقي صحبانك وتتونس ولا أيتها حاجة وبعدها العودة لسريرك والنوم عشان تصحى بكرا من جديد على نفس التسلسل والروتيييييييييييييييييين.
يبقى خلاصتهو أنهو الروتين هو البسير حياتك وذيهو وذي ما البوصلة بتتحكم في أمر توصيلك لي الهدف فمثلهما مهميين للإنسان الي أن؟ الله يكتب ليها فكاك من تحكم غيرك في أمرك (الروتين) وتسيير ظاتك الي أخرها (البوصلة)

[بابكر مخير]

حصل أني قبل شوية. كتبتا بوست هنانا في المساحة دي بالذات وسرحتا فيهو وكمان أرفقت فيديو من اليوتيوب.
بي قدرة قادر "قضى" على الكتبتهو كلهو وجاني إشعار أني أسجل من جدد. أها لمن سجلتا من جديد لقيت أنهو بوستي قد قضى والقضية؟؟
لإصراري وبي إختصار وكيتن في الحظ العاثر حأنزل ما تيسر من البوست الرايح وبما قد تجود !! علي به الذاكرة......
المهم أنه كان عن؟؟
القضاء والقدر والصدفة..
قضى، أني ولدت سوداني رغم ما في هذا من تناقضات وأنهو قضي علي أني وبحمد الله قد وصلت لهذا العمر وما يعنيه ذلك من اخطار ومخاطر ومتلازمات و"القدر" أني أكون ماشي، أعتر وأقع ولهشاشة العظام أنكسر وأصاب ووو ولكن "صدفة"، أن يكون هناك شخص أو شيء، عليه أتكل وأتفادى الوقوع وتكون الصدفة قد حالت من نفاذ القدر ولكنها قطاعاً لن تفحل في رد القاضِيةُ..

[عبدالحكيم]

الروتين هو بوصلة الحياة، إن إختل المؤشر في البوصلة فالإتجاهات يتعدم تحديدها وهو نفس الحال بالنسبة لأمر الحياة.
الإنسان، الحيوان، الطيور والأسماك، الجبال والبحار والانهر. الأرض والقمر والأفلاك والواكب وكل الكون..
روتين واحد، الارض تدور بشكل روتيني حول الشمس ولو إختلآ الروتين دآ. ما تعرف حيكون شنهو، إلا المولى سبحنه وتعالي هو الذي يعرف ويأمر..


الدكتور / بابكر مخير
تحايا عطرات ..
الروتين والأرض والسموات ومن وما فيهن .. ترى من خلقنا والحال ياهو الحال لا تغيير ولا تبديل إلا عند هذا الكائن الإسمو الإنسان ... ده عجيب وأمره عجب وكلنا عجائب ... إلا من رحم
( إِنَّ فِي خَلْقِ السَّمَاوَاتِ وَالْأَرْضِ وَاخْتِلَافِ اللَّيْلِ وَالنَّهَارِ لَآيَاتٍ لِّأُولِي الْأَلْبَابِ (190) الَّذِينَ يَذْكُرُونَ اللَّهَ قِيَامًا وَقُعُودًا وَعَلَىٰ جُنُوبِهِمْ وَيَتَفَكَّرُونَ فِي خَلْقِ السَّمَاوَاتِ وَالْأَرْضِ رَبَّنَا مَا خَلَقْتَ هَٰذَا بَاطِلًا سُبْحَانَكَ فَقِنَا عَذَابَ النَّارِ (191) آل عمران

الروتين والعمر ياخي أحيانا لما تشفق على روحك في الشقة (البيت ) وأنت وحيدا وبي طولك وعرضك ده وبكل ألبابك وجلبابك تتحرك وفي بالك ( لَآيَاتٍ لِّأُولِي الْأَلْبَابِ ) شي ما عليك أن تفعله أو تدركه وأنت متجه إلى الشي لتنجزه أو تحصل عليه وماشي تجاهه أو نحوه فجأة تقف أوتتوقف وين ماشي وكايس شنو ؟ يا ربي قايم ومنشحط واقف ؟؟؟؟؟
والعجيب أظل واقف ومصرا أن لا أرجع ولا أقعد ولا أتكي ولا أرقد إلا أن أصل لهذا الشي وفجأة ... نعم وصلت عايز واتجه وآخذه أو أفعل الشي ...
يا ربي الأمر عجاب ...
الشاهد الكبر ....متعك الله بالصحة والعافية وطول العمر وإيانا في طاعة الله .
ننتظرك بشغف في كل ما تخطه وتجاربك الحياتية .. لَآيَاتٍ لِّأُولِي الْأَلْبَابِ ..
ربنا ما خلقت هذا باطلا ...

نستمع لنرتاح :

https://www.youtube.com/watch?v=CCmxm-K0Bdc

[بابكر مخير]

الدكتور / بابكر مخير
تحايا عطرات .
الروتين والعمر ياخي أحيانا لما تشفق على روحك في الشقة (البيت ) وأنت وحيدا وبي طولك وعرضك ده وبكل ألبابك وجلبابك تتحرك وفي بالك ( لَآيَاتٍ لِّأُولِي الْأَلْبَابِ ) شي ما عليك أن تفعله أو تدركه وأنت متجه إلى الشي لتنجزه أو تحصل عليه وماشي تجاهه أو نحوه فجأة تقف أوتتوقف وين ماشي وكايس شنو ؟ يا ربي قايم ومنشحط واقف ؟؟؟؟؟
والعجيب أظل واقف ومصرا أن لا أرجع ولا أقعد ولا أتكي ولا أرقد إلا أن أصل لهذا الشي وفجأة ... نعم وصلت عايز واتجه وآخذه أو أفعل الشي ...
يا ربي الأمر عجاب ...
الشاهد الكبر ....متعك الله بالصحة والعافية وطول العمر وإيانا في طاعة الله .
ننتظرك بشغف في كل ما تخطه وتجاربك الحياتية .. لَآيَاتٍ لِّأُولِي الْأَلْبَابِ ..
ربنا ما خلقت هذا باطلا ...

شكراً حكومي يا الديمة مؤازرني..
شفتا قولك دآ. ياهو ظنيتني الكان بقا عليا امس، وفي شان أعمل نفسي ما صفيت ونسيت عايز اعمل شنهو. قمتا نزلتا الرد الاخير رقم #[1700]. وهو ممكن؟؟ من أصلهو ما كنت كتبت حاجة ولا راحت في الشبكة وإختفت من سودانيات وأنهو كل الحصل نقوئشت كُبر وبدايت زمهرير شتاء الكُبر التي هبة نسايم عاصفة (الزهايمر);) وكدآ وذي قلتا:

والعجيب أظل واقف ومصرا أن لا أرجع ولا أقعد ولا أتكي ولا أرقد إلا أن أصل لهذا الشي وفجأة ... نعم وصلت عايز واتجه وآخذه أو أفعل الشي ...
[/B]
اها ولي حسي متردد، هل كان في بوست من أصلهوا:eek::eek:..
لكني نزلتا البوست وفيهو ملامة أنهو الاول راح لي سبب وما بقيت صبور وحاسم ذيك قولتن أنتظر وأركز لمن أتوكد، فاخدتها أخدتها من أخرهو. وكتبت الرد...
تعرف يابا مشكلة الزهايمر قالوا: الزول بتذكر القديم والحالي بيتختا في الرف ولو الله أدي عمر بيرجع لمن يتعتق ويبقا قديم. أها حسي ظنيتهو صاحبك (شخصي الضعيف) تكون هجمتهو ذكرى بوست نزل في الماضي الغابر والله على العكس كان ماضي جميل:o:o

[بابكر مخير]

ذي الفي عمرنا دآ
بيقولوا عليهو في السودان: يفرش تبروقته ويقعد فيها..
يعني يتفرغ للعبادة وينصرف عن أمور الحياة الاخرى من ونسة وحضور مناسبات مفرحة (المناسات المحزنة حضوره مقدر:mad::mad:).
أها وبرضك الزول لمن كون في أخر لحظاتهو، يقال أنه لا يكذب، حتى لو سئل عن جريمة قتل إفتعالها يقر بأنه الفاعل.
من الامثال الاتنين البسطين ديل نقول، ذي ناس إحنا ديل والبقينا في عمر ما دايرين من الدنيا دي شيء. لا قرش نقول نغنى بيهو ونغنغ في أيامنا الجاية ولا طمع في شراية أرض نزرع فيها ونحصد قروش ولا نعمل مصنع من منتجاتهو نخلد إسم نعرض ونتمختر بيهو وسط الناس..
يبقا ياهو العشناهو وشفناهو بندور غيرنا كمان يتمتع بيهو لمن يصل ذينا كدي لي قعدة التبروقة..
بندور الناس تفرح بي بعضها، تتساعد لمنفعة روحها من خلال سند بعضها.
ما يتكارهو في شين شيتن زايل وما يمعوا للشيطان القصدهو ديمة ضرر البشر.
سيبو الجهوية وأنبذو الفرقة
خلونا من قولت ود غرب وبسر القلب ومن ثول جعلي حر ولا شايقي حفيد العباس.
العملو على أنهو الجنجويدي هو سوداني والبلبوسي برضهو سوداني.
التأسيسي نديهو حسن الظن والإسلامي ناخدهو بحسن الظن والصمود ما نوجه بسوء الظن وحتى الإعيسر ما نظن فيهو الكتير، زولن مغرور في روحهو وربنا يعد خطوته وكامل إدريس إن جاء رئيس وزراء ناخدهو بحسن ظن.
نشوف خيرنا وين.
معقول أصلهو وفي عالم بقا الامريكان بيتفاوضوا مع ايران وروسيا واوكرنيا ممكن قريب تقيف حربهم وأهو محمد الجولاني بقأ أحمد الشرع وملص لبس الدواعش وقعد مع محمد بن سلمان وإتوسط ليهو عند الامريكان.
العندنا معاهو مصالح نتفق معاهو بندية وما دونية، مصر طول عمرها أخت بلادي الكبيرة وشقيقة، الامارات من زمن شيخ زايد ياها أختنا الصغيرة وشقيقة، السعودية اها قبلتنا ومحجتنا الشقيقة..
تعالوا نتعلى على الشرور الفي نفوسنا ونوحد قولنا وفعلنا ونعمل بجد ووفاق بين القلوب ومحبة في الانفس ونوقف الحرابة ويلا...
أيد في إيد، تجدع بعيد
نجدع العنصرية ما يان كلنا ولاد تسعة وكلنا السودان بلدنا، كان أصل جدودنا الكوشيين ولا العبدلااب وناوشيك وفور ولا أنقسنا ولا شوام، كان ناس شاشاتي ولا سركيس أزمرليان ولا قبايل عربية إستوطنت دارفور وسط قبايلها الأفريقية القديمة..
ما عارف تاني أقول شنهو وأنا ياني في أخر الدرب وما بكرا إن وقع الراس في الفاس والسودان إنمحى، نقول والله قال قبل كدا بابكر وكنا قايلنهو كلام خَرّف من زول مُزهمِر.
حكوا ليا؛ لمن عملوا الصيادلة تأبين لي أبراهيم قاسم، خاطبهم العميد يوسف بدري وقال: يا الاطباء،. من حسي كرموا دكتور حليم عليهم الرحمة ثلاثتهم من عظماء بلادي (دكتور عد الحليم محمد والملقب بابو الطب والذي هو حاضرا) وما تطبق عليكم قولة: جلابة شكارين ترب والزول بعد يموت حتى تكرموهو..
دحن ما تبقوا يا سودانيين طرش وأسمعو قولي دآ وما بعدين تقولوا والله أتاريهو كان قول بابكر فيهو عقل وشوف

[عبدالحكيم]

د. بابكر مخير

يا أخي الكُبر دآ حاجة ثقيلة بشكل ‏(موضوع متعدد الصفحات 1 2 3 ... الصفحة الأخيرة)
بابكر مخير
25-05-2025 03:07 PM
بواسطة بابكر مخير الذهاب إلى آخر مشاركة
1,702 1,000,289

حق لك أن نقف لك اجلالا وتقدير ومشاهدات موضوعك أعلاه تتجاوز المليون مشاهدة ويعني هذا أن متابعيك يترددون كحالي أنا بحثا عن الجديد من تجاربك الحياتية لما تلامس كافة الفئات العمرية مستفيدين ..
فكل الشكر والتقدير والله يجيب يوم نكرمك فيه وأنت ترفل في صحة وعافية وأطال الله في عمرك على طاعة الله وإلى جنة المأوى ..
خالص الود والشكر ....

[بابكر مخير]

د. بابكر مخير



حق لك أن نقف لك اجلالا وتقدير ومشاهدات موضوعك أعلاه تتجاوز المليون مشاهدة ويعني هذا أن متابعيك يترددون كحالي أنا بحثا عن الجديد من تجاربك الحياتية لما تلامس كافة الفئات العمرية مستفيدين ..
فكل الشكر والتقدير والله يجيب يوم نكرمك فيه وأنت ترفل في صحة وعافية وأطال الله في عمرك على طاعة الله وإلى جنة المأوى ..
خالص الود والشكر ....

حكوم العزيز
لو لا كُم، ما ظنيتني إستمريت لين أصل هنانا
شكرا ليك وليكم الحبان، على المشاركات والتي لو ما كانت لما كنا قد وصلنا الي هذا
:cool::cool:

[بابكر مخير]

1,000,289
شوف بالله، إبتديتهو قبل عشرة سنين إلا شهور وبتذكر لمن إبتديتم (كتر خيركم) تشجعوني بالمشاركة المكتوبة وبالمشاركة من خلال المشاهدة ووصل الامر لي فوق نص الألف ((طبعا زمنا كان نسمع أبواتنا لمن يصفوا زول بالثراء الفاحش، يقولوا عندهو نص الألف)).
كتبتا وقلتا لو كان كل مشاهدة تساوي جنيه، كنت حا أغنىّ.
حسي أهو لو فعلن...
كل مشاهدة كان تكون قيمتها جنيه..
كنتا أكون مع ناس آلن ماسك ومارك زوكربيرغ في مصاف المنغنغين :(:(.
ومع قناعتي أني لن أصل هذا الرقم، كنت عايز أخصكم عضوية سودانيات الاحباء، بطلب.
أني لو ما حضرتا هذا المليونية، تعملوا وتصولوها لي كدآ، لكن أهو ربنا قسم أني أحضرها وحسي كدي النفكر في الترليونية ;););)

[بابكر مخير]

كمين مرة كدآ؟
قلتا أنهو مع الكُبر، بتشعر أنك المصلح الصالح وطبعا بتكون تقاضيت عن سنيين مضت من شباب متهور اللي رجُل برضك غِّلط.
لكن والله وأنا متأكد أنهو كتيرين بشوفوا شوفي في أمر كينونتنا كسودانين وشخصيتنا الما قدرا تتحسن عشان تكون ليها هوية ذات طابع وطني وحس قومي لي يوم الليلة..
قصة تروى وبعضهم نسبها لحادثة شيخ العرب منعم منصور في حواره مع المدير الادري الانجليزي "المستعمر" وهي أن الانجليزي قال للناظر. إتو السودانيين ما بتحبوا بعضكم بل وبتحسدو بعضكم ومثال لذلك لو مروا جماعة بشخص يحالوا قطف ثمرة من شجرة ولقصر قامتهو ما قادر يحصلها، ما بتعملوا ذينا، أنكم تساعدهو عشان يقطعها بل بالعكس تقولوا: إن شاء الله ما يحصلها وتتمنوا لو تقع على الارض وياكلها حيوان من أن تكون لذاك السوداني مثلك. ودي النقطة الفعلن حسي دايرة (لافا، مدورة)؟؟............
غايتهو في حياتي، لا شفتا ولا سمعتا بشعب يكره ناسهو قدرنا السودانيين.
المستعمر ما كرهناهو ذي كرهنا لي بعضنا.
الخواجات كنا نكرمهم ونرحب بيهم وخاصة بمناسبات الأفراح. اهلنا من شمال الوادي عملنا لنكون متحدين معهم (الحزب الوطني الاتحادي).
لكن حسي والحرب دي طلعت ما في النفوس من كره وبغض لي بعضنا وبيناتنا نتمنى الموت بعضنا للبعض.
جغم، بل، نصر او شهادة، قحاتا العملاء، السودانيين الشرفاء وغيرهم خونة، معركة الكرامة وبقينا نعرض القتلى من كل جانب مصحوبا بتكبير وتهليل. اكسح، امسح ما تجيبوا حي..
معقول اصلهو يا سودانيين يا شعب يا جاهل..
رحم الله السفير الحردلوا..
وملعون ابوك بلد

[بابكر مخير]

قلتا يوم أكسر الروتين وأشوف ليا زهجة، تتضائل أمامها الزهجهات البمر بيها، مهما كبرت.
لقيت ما في شيتن يفوت العايش فيها من زهج، لأنها دي زهجة تساوي أكتر من 40 مليون واحدة بل هناك زهجات، زهجت الكم هائل من الأربعين مليون.
الاربعين زهجتهم مشتركة في أمر الحرب. العايزها تقيف وما وقفت ديل واحدين والما عايزها تقيف وما قدر يفوز فيها كل واحدين وواحدين ما فاهمين الحاصل، لكن أجواء الزهج المخيمة على البلاد مزهجاهم وزيادة كمان مدبرساهم و ديل ياهم الاطفال، لساتهم ما مستوعبيين الحاصل لكن زهجتهم في قعاد ساكت. لا قراية يمشوا ليها المدارس ولا حيشان أمنة يلعبوا فيها ولا شوارع خالية من القنص والقصف، عشان يمرقوا يتجاروا فيها.
الحكمة أنهو البرهان والحوالينهو من عسكر أكيد زهجانيين لأنها ما ماشة كما عشم وحميدتي وأخوه ومن لف حولهم زهجانيين من عدم قدرتهم لتحقيق تمنياتهم والمسمية قحت 2019 ومتحوراتها زهجتهم أنهو ما في زول سامعهم والإسلامويين نوع زهجهم كُّتر لأنهم ما باقي ليهم صليح في العالم إلا ياهو حتيتة ماسكين مفاصلها لكن أميرها بيديهم "بالقاطرة" والتي مستمدة من إسم الحتيتة.
زهجانيين النازحين وزهجانيين المهاجرين والمغتربين وذوييهم الحسي في ضيافتهم واللأجئين حيث أن بصيص أمل العودة لبلاد الاصل أصبح في كف عفريت..
الزهج في هذه السودان وما يحل بي السودانيين ما ظنيتنا نغلبه ويبقا علينا العشم في قول أعظم من قائل:
"واذكر عبدنا أيوب إذ نادى ربه أني مسني الشيطان بنصب وعذاب"
يا ناس ياهوووو!!!!
حسي بقا الحيحلنا كميل إدريس "شمعون":mad::mad:

[بابكر مخير]

كتير بيتردد من الأكبر عمرا وجيل أقدم من الجيل المعاصر، قولة: زمان وفي زمنا وأغلب أبناء الجيل المعاصر يتضايق من ترديد الجيل القديم لهذا.
لكن والله عات ما هو شيتن بتنكر.
أها زمان وقبل زمنا، كانت اللحمة بتتباع بالاوقة ولمن لا يعرفها فهي وحدة قياسية للأوزان وأصل الكلمة يوناني "أوكا" وفي السودان معروف أن كثير من الكلمات جاية من الشعوب الساكنة في السودان ذي بنطلون، كُلية وكتير وغير محدود عدد هذه الكلمات.
أها اوقة اللحمة كانت بكم قرش والاوقة في الوزن هي كيلو وربع وكان الخروف في الأعياد المعروفة ما بيفوت الخمسة جنيه في وكت أنه كانت الثروة الحيوانية أقل من الأن كتير..
زمنا في الساحة الفنية كان ناس أحمد المصطفي والشاعر أبو العلا وقبل زمنا كان ناس سرور وكروما والشعراء ناس خليل فرح..
ودا مربط الفرس،،
شباب اليوم عشان يكون غناه مستساغ وينفتح قدامهو طريق الشهرة، بيلقط ليهو كم أغنية من أغاني الحقيبة وهي الاغاني القبل زمنا أو من أغاني زمنا
فلق الصباح حن قولي، أهو نورك لاح خِلي
يا خفيف الروح هو هذا نداك أم ندى الأزهار..
أو من أغاني زمنا،،
قالو قالو علي شقي ومجنون صحيح مجنون
وانتو جنوني يا حلوين
انتو لي قلبي زاد عمرو ليهو المنية والسلوى
جنوني عيون
عيون لو شافا عطشان السنين يروى
وكلهو كوم والصبا النجدي لي الشاعر عمر البنا، كوم براهو...
:cool::cool::cool::cool:
الصبا النجدي زارني وحرك وجدي متي يا عين بتهجدي
لو كان يا عين تشوفي طبيبه النجدي، هللي واستبشري بالله شكرا اسجدي
متي يا عين بتهجدي
لكن هذا محال في الطيف لن تجدي، املك اضحي معلق مابين سهيل وجدي
متي يا عين بتهجدي
في شوقي ودموعي يا نسايم اهدي، روحي حبيب العفه والحسن الفردي
متي يا عين بتهجدي
نتعطف نحوك وليك سمح بالردي جيبي، نفحه ردو احلي من طيب الوجدي
انت دخلي خزر و يا نسايم هزي احزر سيف لحظو وقنابل الهندي
متي عين بتهجدي
بلغيهي اشواقي بكايا وسهدي قولي ليهو عاشقك لم يزل علي عهدي
متي يا عين بتهجدي
كان سيوف لحاظو يا ناعم الجسدي ما شفنا الغزال بعيونو بجرح الاسدي
متي يا عين بتهجدي
العجب العجيب والشئ العجيب لو بسم حبي، يمطر سحبا الرعدي
والاغرب غصنو اللادن اسمر كوكب سعدي
متي يا عين بتهجدي
قرب السما لو يمكن ممكن انجاز وعدي، بعد الثري لفلق الاقرب من بعدي
متي يا عين بتهجدي
مهما يطول هجرانك انا لم ازل علي عهدي اري الغذاب في حبك احلي من الشهدي متي يا عين بتهجدي
الصبا النجدي زارني وحرك وجدي متي يا عيييييين بتهجدي
https://www.youtube.com/watch?v=S44HaFolsfA

[بابكر مخير]

غايتهو الشيء دآ، عجيب في أمرهو وهو أتاريهو؟
في الكُبر، كل يوم بمر، معاهو حاجة بتضمر والحكمة أنهو كلمة "ضمر" وبي كل تشكيلاتها وتنويناتها ومعانيها، تناسب الوصف (it fits, it) والضمور ما في الجسم خارجيا.
لا وداخليا برضهو، البيحصل أنهو المعدة ما بتشيل ذي زمان والرئتين ما بيتملن ذي زمان والقلب ما بنشحن ذي زمان وحتى الدماغ خوفي أنهو فيهو حتت بيصغرن وأداهم بيعجز عن الكان زمان..
الضمور مش في الأعضاء بس، لكنهو بيصيب عطاء الانسان الإجتماعي والإقتصادي والحيوي، فتلقى الزول إجتمعياتهو قلت لأنهو الضمور صاب عضلات الجسم والمشي بقى الهوينا..
الأعشى قال:
غَرّاءُ فَرْعَاءُ مَصْقُولٌ عَوَارِضُها ... تَمشِي الهُوَينا كما يَمشِي الوَجي الوَحِلُ
كَأنّ مِشْيَتَهَا مِنْ بَيْتِ جارَتِهَا ... مرّ السّحابة ِ، لا ريثٌ ولا عجلُ
هيهاااااااااااااااات من دآ والواحد كل شيتن كان فيهو بيعجب، إندثر وإضمحل وزبل...
والغريبة في موضوع الاقتصاد دآ. بيحصل أنهو الزول قدر ما كان الفي الجيب تنصرف وتستنى الفي الغيب. بيبقا قابض وأظن دآ سببهو النظرة المظلمة للغيب والذي لا ينتظر منهو فرجا، عكس الروئية المضت المبهرة..
الضمر في الأطراف مشكلة فبقت الاصابع تخرج عن ما يملي عليها العقل تلقاها في الكيبورد: خبط عشواء من تصب، تعمى عن الحروف المقصود ومن الرجفة تضرب الحرف الجمبها فتخرج عن القصد وتشوه النص.
الضمور برضك بيصيب واحدة من أقوى سبل التواصل وهو الحديث (النضمي) فالحبال الصوتية توهن مع العمر وأن ترمى بثالثة الاسأفي، ذي مرض يصيب الحنجرة ويبقا الكلام إما متعثر أو معدوم..
مع الضمور الحاصل في خبط الحروف كالأعشى في الكيبورد والإصابة بثالثة الأسافي، يبدو أن الحيل وسبل التواصل. في طريقها مش للضمور وبس؟؟
بل للتلاشي..

[بابكر مخير]

مع الكُبر؟؟؟
تتشقلب الأمور وتبقا حركات الجسد والإستجابات العضوية مقلوبة، الفوق يبقا هو البستجيب للحركات المفروض تقوم بيها الاجزاء التحتانية والعكس ينطبق على التحتانية لمن تبقا هي البتتصرف كانها فوقانية..
تلقى الراس في حركة دائمة ذي الركبة لمن الزول يكون ماشي والراس طبعاً في سنين ما قبل اليأس، ثابت وإستجابتها إرادية، الي ان يسلبها منه العمر فيصبح غير متحكم وتجوط حكاية سيطرتهو على شئون الجسم بالكامل.
العقل نفسهو ينحط مقدارهو الوعيي ويسلب من الكثير من قدراته مثل، التذكر، ونشاطه في تنشيط الحواس؛ السمع يقل واللسان يتقل والشوف يضعف وحتى حاسة اللمس تبطء والفعل الإنعكاسي (reflex) يكاد أن ينشل.
المعروف أن المعدة تمتلئ وتتقل لمن الزول ياكل، أها هنا مع الثقيل دآ، البتتقل الجفون وترتمي الحواجب ليلتصق العلويات مع السفليات وحتى العقل بدل ما التخمة تصيب المعدة، هو يفقد قدرة مقاومة النوم وينهزم في لحظة خارج عن ساعات الليل حين يكون له أن يخلد لقدر الإنهزام وتتعطل قدراته ويترك الأمر للعقل الباطن لتسير كل أنشطة الجسم وطبعا الاخير دآ (العقل الباطن) أول مما يستلم النبطشية، يركز سطوته في أن يعيش الانسان في دنيا الإفتراض ويبقا ياهو يحلم بي أشياء لا يتقبلها العقل (الصاحي) حين سيطرته.
وهذا قليل من كثير وما خفي أعظم، يعني قطرة من محيط في الخلل البيحصل...
صدق أو العتاهية في قوله:
بكيتُ عَلى الشَبابِ بِدَمعِ عَيني ... فَلَم يُغنِ البُكاءُ وَلا النَحيبُ
فَيا أَسَفا أَسِفتُ عَلى شَبابِ ... نَعاهُ الشَيبُ وَالرَأسُ الخَضيبُ
عَريتُ مِنَ الشَبابِ وَكانَ غَضّاً ... كَما يَعرى مِنَ الوَرَقِ القَضيبُ
فَيا لَيتَ الشَبابَ يَعودُ يَوماً ... فَأُخبِرُهُ بِما صَنَعَ المَشيبُ

[بابكر مخير]

أتذكر حبوبتكم وخالتكم مدينة، كان ديمة تقول: غايتهو تقل دمك، ما بتتونس أصلك..
كان هذا لمن تكون طمعانا أني أونسا عن الحال أو أديها شمار من أي نوع ومن أيتها مكان..
بتذكر كلمتها دي حسي وكت الحال إتغير وإنقلب السكوت الي طربقة في الخاص والعام وخاصة لمن تلقى ليك أكتر من مستمع. أها ديل تملاهم "ورجغة لي الطيش" وحتى لو في جماعة بيتكلموا مع بعض، كان نقاش أو ونسة أو شمار، وعينك وقعت فيهم ولي سوء حظهم؟ أن هناك من بينهم واحد بتعرفهو.
أها تجي متلب في نصهم وتركب الورجغة مشاركا من أول كلمة سمعتها يعني مثل قول كان حديثهم في نهايتهو والكلمة كانت المستشفى، تقوم طوالي تدخل تووووش؟؟
ياتو مستشفى؟ قصدكم مستشفى الذرة..،
أنا كنت قبل شوية في مستشفى الذرة ولقيت ناس متجمعين قال شنهو؟ قالوا أنهو جابو لهم جهاز جديد ولمن داروا يشغلوهو، الكهرباء قطعت. ما هو أصلهو القطع بقا ما مجدول، تعرفوا فرن نافع الكهربائي بقوا يشغلوهو بي الطاقة الشمسية ومن موضوع لي موضوع وإتا في الحالة دي ما تنتبه وإلا أنك بتكلم روحك براك، ما الجماعة إنفضوا من حولك لفظاظة فضولك.

[عبدالحكيم]

أتذكر حبوبتكم وخالتكم مدينة، كان ديمة تقول: غايتهو تقل دمك، ما بتتونس أصلك..
كان هذا لمن تكون طمعانا أني أونسا عن الحال أو أديها شمار من أي نوع ومن أيتها مكان..
بتذكر كلمتها دي حسي وكت الحال إتغير وإنقلب السكوت الي طربقة في الخاص والعام وخاصة لمن تلقى ليك أكتر من مستمع. أها ديل تملاهم "ورجغة لي الطيش" وحتى لو في جماعة بيتكلموا مع بعض، كان نقاش أو ونسة أو شمار، وعينك وقعت فيهم ولي سوء حظهم؟ أن هناك من بينهم واح بتعرفهو.
أها تجي متلب في نصهم وتركب الورجغة مشاركا من أول كلمة سمعتها يعني مثل قول كان حديثه في نهايتهو والكلمة كانت المستشفى، تقوم طوالي تدخل تووووش؟؟
ياتو مستشفى؟ قصدكم مستشفى الذرة..،
أنا كنت قبل شوية في مستشفى الذرة ولقيت ناس متجمعين قال شنهو؟ قالوا أنهو جابو لهم جهاز جديد ولمن داروا يشغلوهو، الكهرباء قطعت. ما هو أصلهو القطع بقا ما مجدول، تعرفوا فرن نافع الكهربائي بقوا يشغلوهو بي الطاقة الشمسية ومن موضوع لي موضوع وإتا في الحالة دي ما تنتبه وإلا أنك بتكلم روحك براك، ما الجماعة إنفضوا من حولك لفظاظة فضولك.

دكتور بابكر مخير / أسعدك الله
غايتو الواحد لا يعرف يضحك لا يعرف يبكي والحال من بعضه ..
( هي كتابة وكلام ) في شكل صورة أو صور بدأت :
تقل دم ..
جلسة ونسة وشمارات ..
مستمعين مستمتعين ..
ورجغة للطيش ..
وإنت مشرف اضنيك ومترقب ..
دخلت توش .. وهاك يا حكي أو نضمي ..
:D:)
فجأة انفضوا من حولك لفظاظة فضولك ..

فَبِمَا رَحْمَةٍ مِّنَ اللَّهِ لِنتَ لَهُمْ ۖ وَلَوْ كُنتَ فَظًّا غَلِيظَ الْقَلْبِ لَانفَضُّوا مِنْ حَوْلِكَ ۖ فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الْأَمْرِ ۖ فَإِذَا عَزَمْتَ فَتَوَكَّلْ عَلَى اللَّهِ ۚ إِنَّ اللَّهَ يُحِبُّ الْمُتَوَكِّلِينَ (159) آل عمران ...

شكرا دكتور .................................................. ....

[بابكر مخير]

دخلت توش

حكومي الصديق..
لو لا ثقتي في حدثي والذي دوما يؤكد لي؟
أنك عابد، ساجد، صائم ومسلم موحد الله ومؤمن بنبيه..
كنت إستغربتا دخولك توش!!
لا بسملة ولا إحم ولا دستورloooollooool
منكم نتعلم العزيز، يا ريت لو تفيدني وتفيدنا...

فَبِمَا رَحْمَةٍ مِّنَ اللَّهِ لِنتَ لَهُمْ ۖ وَلَوْ كُنتَ فَظًّا غَلِيظَ الْقَلْبِ لَانفَضُّوا مِنْ حَوْلِكَ ۖ فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الْأَمْرِ ۖ فَإِذَا عَزَمْتَ فَتَوَكَّلْ عَلَى اللَّهِ ۚ إِنَّ اللَّهَ يُحِبُّ الْمُتَوَكِّلِينَ (159) آل عمران ...

[بابكر مخير]

القلـــــــــــــــــــــــــــــق
في المدارس ورونا كيف تقراء وكيف تكتب وقالوا لينا دآ إسمه التعليم وحتى الدين الاسلامي ذاتهو أدونا ليهو في المدارس وحفظنا القرآن وهنا وضح لنا أن الذي صبناه في المدارس كان عبادة.
اقْرَأْ بِاسْمِ رَبِّكَ الَّذِي خَلَقَ* خَلَقَ الْإِنسَانَ مِنْ عَلَقٍ* اقْرَأْ وَرَبُّكَ الْأَكْرَمُ* الَّذِي عَلَّمَ بِالْقَلَمِ * عَلَّمَ الْإِنسَانَ مَا لَمْ يَعْلَمْ (على مسئولية حكوم، سادة كدا؟! لا بسملة، لا دستور ولا إحم) سورة العلق
فمنا من نجح في هذا وطوع علمه لخدمة الإنسانية ونفسه من بينها، فاصبح مهندس يتقن فنون تخصصه كانت كهرباء أو معمار أو فيره وكذلك من صار مطبب (Apothecary) كطبيب أو صيدلي نِطاسيّ في مجاله من تشخيص وتحليل وصناعة الدواء وهذا بيت القصيد والمعني به هذا البوست..
مع العلم الوفير والتخصص المبهر والذي يتميز به الاطباء النفسيين وعلماء النفس من ناحية معرفة بواطن المخ وخبايه وما يضمر وما يبين وكذلك الصيادلة الذين تفننوا في صنع العقاقير ذات التأثير الواسع في الدماغ من تنشيط وإِخمال.
تجدهم يقفون عاجزيين عن هذا القلـــــــــــــــــــــــــــــق والقدرو عليهو إختيار إسم اضطراب القلق العام وقد جاد الانجليز به إختصار (GAD) :o وتناولوا مسبباته وعددوها، ذي كميين سبب كدآ يعني كاد أن يقال أنه كالهواء إنتشار، كل شيء ممكن يسببه وعلاجه طلسم..
كيف تتعالج منهو؟؟
هو أن تخرج منهوgoood
طيب كيف؟؟
حاول أنك ما تقلق نفسك وتلقا انهو مثل الذي؛ فَسَّرَ الماءَ بعد الجهدِ بالماءِ...
طبعا مع الكُبر القلـــــــــــــــــــــــــــــق بحرهو عريض وشواطئه بلا مراسي:mad::mad:

[بابكر مخير]

في الكف وفي اليد وبيناتهم مفصل إسمهو الرسغ، أها الشيء دآ فيهو النفق الرسغي الذي هو مثل قناة السويس تعبر منها السفن محملة بالبترول من دول الانتاج للغرب وتعود بالبضائع المصنعة منها الي تلك الدول.
أها وكما تعلم ويعلم الجميع (طبعا القول دآ بينكد عليا طوالي لمن أسمعه لأنهو بيذكرني قناة الجزيرة مباشر التردد التاني وإلإستراطجين لمن المذيع يسألهم عن حاجة وقولوا ليهو "كما تعلم" والحقيقة أنه المذيع حين يسأل فهو يريد أن يعرف ولو كان يعرف لما سأل وهنا يتجلى جهل الشخص الذي عليه أن يجيب وخاصة إلإستراطجين منهم).
ما علينا، خلونا نرجع لي موضوع النفق الرسغي carpal tunnel.. أها المجرى النفق دآ ضيق وفيها بتمر أعصاب والمعروف بإسم العصب المتوسط "يوفر الإحساس بالإبهام والسبابة والإصبع الأوسط ونصف البنصر (النصف الذي يوجد ناحية الإبهام)، كما أنه يتحكم في بعض العضلات الصغيرة الموجودة في قاعدة الإبهام .. منقول"..
أها والله اليوم صحيت والتنل (الكاربل تنال) شادي أوتاره وبدل يتلقى اشعار من الدماغ، هو بقا صاحب الامر والنهي وقال لي الدماغ أنا حاجزك حكر ما تنشغل بايتها أوجاع تانية وخليني الانجضهو قدر ما أقدر.. غايتهو القدرتا عليهو؟ مسحتا الرسغ بكل أنواع الكريمات والجل والبخاخات المسكنة من ما انتجتها مصانع الادوية الغربية والصينية..
طبعا الوجع كوم والخدار البيضرب اليد كوم براهو، شيء نمل وشيء التقول ماسك ليك قطعة تلج.. والاضل هي العطلة بسبب متلازمة النفق الرسغي وهي الالم وقلة القدرة في إنجاز المهام التي تقوم بيها في الحمام من نظافة الاسنان وما دون ذلك من أماكن لليد قدح المعلى في تنضيفها وخلونا على كدآ..
والحكمة بحمد الله، أنهو بعد ما الألم خفا، التنميل ما وقف ليا سد من ممارسة هوايتي في الورجغة (ما هي بقت بالكتابة بعد، ما كانت كلام، والسبب الأوتار بتاعت الحلقوم ضمرت وقل سماعها خين تصدر الأصوات "نكران ساااكت!؟ حقيقة الامر؟ أنهو خروجها بوضوح نخآ:frown::frown:")

[بابكر مخير]

البوست دآ، عارف ماهو مجال لأمور السياسة، فهي قبيحة ويكفي أن البوست يتعامل مع الثقيل "الكُبر" فما بالنا نزيد الطينة بلةّ..
لكن كمان مع الزول وأنهو وصل لي عمر بعد سنين عاش فيها حكومات مختلفة ومع إحترامي للجميع ما فيهن واااااااااااحدة تسر.
لكن الحاصل حسي دآ؟؟؟
هو العجب العجاب وهاكم مثال:o:o:o

https://www.youtube.com/watch?v=YzZTpfYWzBQ

[عبدالمنعم الطيب حسن]

يا دكتور سلام حبيبنا
تصدق مع زحمة العمل بتاعي الجديد
12 ساعة مكتبي دا غير التلفونات والواتسابات..
بقيت اقرا هنا بس البوست دا..
وصفك للكبر ابهجني وافزعني
وعاد وطمني
ان مع كل هذا الابداع
فان الكبر مرحلة من العمر ممتعة..
ابوي قال يصف مرحلة كبره وقد اقترب من المائة وربما تجاوزها.. قال
إيدَيْ الشُداد من المفاصل ماتَنْ
وكٍرعَيْ العُدال في الدرب إتخاتنْ
عينَيْ قَزَّعَنْ جابَنْ دموعَنْ باتَنْ
ديل سلبات الصبا الاتقطعن ما اتكاتن
...
ماشاء الله عليك
البوست دا اجمل بوح في
هذه الاسافير قاطبة..
فهنيئا لنا بك..

[بابكر مخير]

ابوي قال يصف مرحلة كبره وقد اقترب من المائة وربما تجاوزها.. قال
إيدَيْ الشُداد من المفاصل ماتَنْ
وكٍرعَيْ العُدال في الدرب إتخاتنْ
عينَيْ قَزَّعَنْ جابَنْ دموعَنْ باتَنْ
ديل سلبات الصبا الاتقطعن ما اتكاتن

نعومي الغالي..
أبوك في الأربعة ديل، فات حد الوصف..
أنا ياهو عشرة سنين وأوصف. لكن ما وصلتا لي عظيم القول متل الفوق دآ..
جدنا أجمعين، شيخ بابكر بدري في كتاب "تأريخ حياتي" كان لمن الأمر يكون صـــــــــــــــــــــعب، يقول: الصراحة هجمتني تاني ويفك ليك مصيبة مدهولة..
الوالد قطع شك، تحفظ وذكر الاربعة ديل أما عن أشياء، أنا ظاتي، فشلتا ألقى شجاعة جدنا الشيخ..
ربما أكون تحدثت عن الضمور وعن الأصوات البتصدر غير إرادية ولكن ما هبشتا ال؟ لاإرادي الما بلحقك تصل ال Rest House :wink::wink::wink:

[بابكر مخير]

لقيت أنهو مع الكُبر وقدر ما بقولوا أنه البصمات ما بتتغير، إلا في حالات محددة، بعرف زولة، عشان تغير من هويتها، حرقت أصابعها لأخفاء بصمة اليد وطبعا ذلك لأنه ما كان بتم تحديد الهوية ببصمة العين وبس بي الاصابعين، بصمت الصوت مثلن وذي حلاتي كدآ.. بتختفي أو في الحقيقة تتلاشى وهنا يقف المرض سببا في ذلك..
ودا المدخل لي البوست دا وعن الاصوات الصادرة من البشر (ما تمشوا بعيد، قصدي الكلام).
القصة وما فيها، لاحظت أنهو الانجليز صوتهم وكما يقال "صوت جهوري" وهو في الحقيقة صوت أنا عايشته قبل ما يعرف أني مصاب بي سرطان الحبال الصوتية وبيقولوا عليهو Horsey يعني مشتق من صوت صهيل الخيل...
عنة إذنكم جاني شيء مستعجل، أقضيهو وإن شاء الله بكرا، بعد بكرا بجيكم صاد ولي وكتها... Ciao
آآآآآآآآآآخ، إتذكرت العزيز الغالي أبو أماني كان ديمة بيستعمل هذا، له عميق الحب والاشواق

[بابكر مخير]

[COLOR="DarkGreen"]
القصة وما فيها، لاحظت أنهو الانجليز صوتهم وكما يقال "صوت جهوري" وهو في الحقيقة صوت أنا عايشته قبل وانا مصاب بي سرطان الحبال الصوتية وبيقولوا عليهو Horsey يعني مشتق من صوت صهيل الخيل...


"دآ، فيهو المنقول وفيهو حقي"
الصوت هو طاقة تخلق اهتزازات تتقبلها الاذن، يعني مصادره كتير ومتعددة، منها صوت الموج، صوت الريح، أصوات الالات وباقي ليا الصوت دآ بيكون إهتزازات تتجمع وتخلق قوة ضاربة، ممكن تكسر ودا البشعر بيهو حتى الاطرش، الما بيسمع الكلام ولا حفيف الشجر، لكنه بيشعر بطاقة الصوت من الريح والبهز الشجر وبيشوف أثار الصوت تحرك الاغصان.
الصوت والمتعارف عليه بالصوت (الكلام) عند البشر من إختصاص الاعضاء العلوية من جسم الانسان (ما علينا من الاصوات الاخرى، نحن بنتكلم عن صوت الكلام:eek:).
أولن تبادي الجهاز التنفسي، والمعروف أنهو في ترابط بين أعضاء الجسم وتكامل تام، لو نخا واحد بنحصل الشلهتة وأنها كلها بتعمل تش، الا إن صاب احدها خلل وفي أغلب الاحيان نتيجة عدم إنضباط في تنظيم الفرد للعيش، فترابط مهام الجسم تاكيدها في قول المولى عز وجل "لَقَدْ خَلَقْنَا الْإِنسَانَ فِي أَحْسَنِ تَقْوِيمٍ".
أها الكلام أولن تبادي الجهاز التنفسي، دآ غير أنهو بيدي الاوكسجين للدم من الهواء ومرورا بالانف والقصبة الهوائية الي الرئتين "وردي ديمة لم يغني وعشان يطلع صوتهو بنغمة معينة، يشحن رئايتهو تمام وتلقاهو يرفع كتافينهو لجمع كم من الهواء ليزفرهو لحنا شجيا ودا البيقولوا عليهو كرب القفص الصدري" (على وزن كرب قاشهو).
بعد الاعضاء القُلاد ديل الصوت والبِأثر فيهو بي لمسات ناعمة يخرج بالنغمة "البصمة" المتفرد بها هذا الفرد، تجينا الحنجرة وهي البتخرج الذبذبات الارتجافية بصورة خاصة بيها؟ الجهاز الصوتي، ديل ناس الحنجرة والحبال الصوتية الأوتار، اللسان، الشفايف، حتى السنون ليها أثر إخراج الصوت ليكون مسموع وواضح. أه دآ كلهو كوم ولمن يجي للزول الكُبر، الحكاية بتجوط والترهل البيصيب عديد من الجسم، لمصنع الصوت نصيب كذلك..
قصة الانجليز شنهو البديت بيها البوست؟؟
الناس ديل صوتهم أقول جهوري، أجش وأقرب لي صهيل الخيل الذي كان ساقني وdiagnosed بما صابني..
أها طلع أنهو حجم الرأس ليهو تاثير في قوة الصوت، مثلن شوف أهلنا الاثيوبين الرجال منهم صوتهم هادي لأنهو أحجام رأسهم ما كبيرة وكت الإنجليز من كُبر رأسهم، إضنينهم تقول حقات فيل.
ناس الموسيقى، عشان ما ألخبت خليني في جهوري وأجش وهادي، حكاية عالي ومنخفض وري سي، عالي ومنخفض دي بتعرفوها براكم.
برضك شوف السيدات في الغالبية وحتى تكون الصفة الواحدة، أنهن رؤسهن ما كبار، عشان كدى أصواتهن "حنينات";). من أقوى أصوات الأحياء هو الحوت، دا تحت الموية بنسم وبين الحيوانات المعاشة نلقى الاسد زئيره إسمع مسافات دا من ناحية القوة وما التصنيف اللحني..
أهو مشاركة وكدآ

[بابكر مخير]

مش قالوا، العمر دائرة، نقطة الانطلاق هي الطفولة ونقطة المنهتى برضك الطفولة.
يعني في ما بعد عمر الرضاعة وتعلم الكلام، تجي قصة الأسئلة والفضول.
أها حسي ظنيتني عايش هذه الفترة وهي في الدائرة، تمثل ما قبل العودة لطفولة الرضاعة.
المهم في الامر هو السؤال الأتي؟؟
هل اليهودية، عرق أم دين
أبناء النبي نوح هموا!
سام: وهو أبو العرب والساميين الاُخر. حام: وهو أبو الحبش وما جاورهم. يافث: وهو أبو الروم وإفتراضا ما يسمى بالبيض "الأوربيين". كنعان: وعنه روايتان واحدة أنه إبن نوح والثانية أنه إبن حام..
ومن الديانات السماوية المتعارف عنها وبالتسلسل حسب القدم هي: اليهودية وأرسل بها موسى عليه السلام، المسيحية وأرسل بيها عيسى عليه السلام، الإسلام وأرسل به على سيدنا محمد صلى الله عليه وسلم.
غير أنه جاء في القران الكريم؛ {قُولُوا آمَنَّا بِاللَّهِ وَمَا أُنْزِلَ إِلَيْنَا وَمَا أُنْزِلَ إِلَىٰ إِبْرَاهِيمَ وَإِسْمَاعِيلَ وَإِسْحَاقَ وَيَعْقُوبَ وَالْأَسْبَاطِ وَمَا أُوتِيَ مُوسَىٰ وَعِيسَىٰ وَمَا أُوتِيَ النَّبِيُّونَ مِنْ رَبِّهِمْ لَا نُفَرِّقُ بَيْنَ أَحَدٍ مِنْهُمْ وَنَحْنُ لَهُ مُسْلِمُونَ}.
السؤال الذي يتبادر لذهن شخص عادي مثلي؟
إسرائيل وفي الكتب هو يعقوب إبن إسحق إبن إبراهيم عليهم السلام وموسى عليه السلام هو من أرسل بالديانة اليهودية وموسى عليه السلام هو حفيد (سبط) أوي بن يعقوب عليه السلام والأسباط هموا حسب الديانة اليهودية (التي يعرف أن جاء بها موسى علي السلام) إثني عشر ويعرفوا بأن كل سبط قبيلة.
في رأيي المتواضع أنهو اليهودية دين ولست عرق، كما إلاسلام والمسيحية وعليه يكون اليهود كما المسيحين والمسلمين لست لهم أرض محددة ولكن يمكن أن تكون لهم قبلة يخصونها بروحانيات التدين، مثل مكة المكرمة والمدينة المنورة عند المسلمين، وبيت لحم حيث ولد عيسى عليه السلام وجلجثة حيث صُلب وهو الان معروف بكنيسة القيامة للمسيحيين.
من باب ما يذكر أيضا..
"وَأُمِرْتُ لِأَنْ أَكُونَ أَوَّلَ الْمُسْلِمِينَ".. هذه الأية هي الاقوى فيما ذكر عن الإسلام. غير ذلك أترك لكم قرأة ما جاء في (النت)..........
https://www.almaany.com/quran-b/%D8%A7%D9%84%D9%85%D8%B3%D9%84%D9%85%D9%8A%D9%86/

[بابكر مخير]

حكاية الدكاترة مع الكُبر، هل هي شماعة ولا هي مخارجة ولا فعلن الكُبر يعني تحويل الزول لي لجنة عشان يتلجن؟؟
تمشي الدكتور وإتا حاسي بألم ما في أيتها عضو من أعضاء الجسم، تلقاهو فاتح في المونيتر بتاع كمبيوترهو صفحة وإسمك فووق فيها. سرقتا النظر ليها ووبالجد بقولها، أول ما إسترعا إنتباهي كلمة Birth وتحتها تقسيمة ليها تأثير سلبي فعلن، اليوم، الشهر والسنة وطبعا مبتدية بي 19 وقدمها رقمين.
قربتا أقول لي الدكتور: من فضلك لا تعير هذا إهتمام وركز معايا على شكواي الصحية وأكيد أنك تدين بواحدة من الديانات السماوية وهذا جلي من منظرك وأنك مسيحي، يا بروتسانت أو أنجليك أو كاثوليك ولا أرثودكس أو ماروني ولا ممكن تكون متبع ديانة موسي عليه السلام وتكون من الارثودكس اليهود أو إصلاحي أو من القراء ولا من الشميرا. لأنهو ما شكلك ولا إسمك مسلم حتى تكون سني حنفي ولا مالكي ولا شافعي ولا حنبلي ولا إسمك حتى شيعي إثني عشري ولا إسماعيلي كمان ما ظنيتك إباضي. علي أي حال مهما كانت ديانتك ومذهبك أكيد حتى لو من الصابئة لا تنسى أنهو نبي الله أيوب وهو معروف عند كل الديانات الإبراهيمية، لأنهو حفيد أب الانبياء أجمعين أبراهيم عليه السلام عاش عمر فوق التسعين وصابه من العلل الكثير في جسده وماله وأهله، فعشان كدآ ما تركز ليا على العمر وشوف شغلك..
بعد دآ كلهو يبدا كلامهو؛ طبعن في العمر دآ ويبدا يعلق ليك كل ما يغطي حفاظه على مهنته أو شق معلوماته في شماعة "عمري" تطير شقاوتي ويستغل كّبري طوق نجاة Lifebuoy ولا يكون الزول دآ؟
عارف شغلهو ومتمكن في علمهو إلا القصة وما فيني من علل!!
أني فعلن كّبِرت :075::075:

[عبدالحكيم]

حكاية الدكاترة مع الكُبر، هل هي شماعة ولا هي مخارجة ولا فعلن الكُبر يعني تحويل الزول لي لجنة عشان يتلجن؟؟

بعد دآ كلهو يبدا كلامهو؛ طبعن في العمر دآ ويبدا يعلق ليك كل ما يغطي حفاظه على مهنته أو شق معلوماته في شماعة "عمري" تطير شقاوتي ويستغل كّبري طوق نجاة Lifebuoy ولا يكون الزول دآ؟
عارف شغلهو ومتمكن في علمهو إلا القصة وما فيني من علل!!
أني فعلن كّبِرت :075::075:

بعد ده كله هل يصلح أن أقول لك دكتوري ...

فعلا دكتوري أو دكتورنا .... فأنتم الدكاترة أدرى بشعاب العلل :)

أقل من أسبوع وتحديدا السبت الماضي ذهبت للدكتور خليها الدكتورة لصرف علاجي التأميني وكانت نتيجة الفحص ارتفاع سكري التراكمي لدرجة مخيفة أخافتني وعندي ثقافة عن أعلى درجة تراكمية واستخلفت الله وقلت لها ليس لدي طريقة لخفضه إلا أن تزيدي الجرعة الأنسولونية أو تشوفي مخرج إلا المشي ففي هذا الجو الحار جدا يصعب كل شي حتى التنفس .. فما كان منها إلا أن استجابت لطلبي وكأني أنا المشخص والدكتور في وقت واحد وزادت الجرعة وأضافة أدوية جديدة وبعد مجابدة جاءت الموافقة من شركة التأمين ويممت صوب الصيدلية وحسيت أن الصيدلي انبسطت اساريره وقد اصطاد صيدا ثمينا وصار ينزل في بضاعته من انواع الأدوية المتعددة هاك يا لانتوس بإبره وهاك يا منظمات السكر وهاك يا فيتامينات وهاك يا مسحات طبية لزوم الحقن وهاك يا .... المهم الكيس الكبير إمتلأ علاج لمدة ثلاثة أشهر وإن حمله لتنوء به العصبة أولي القوة والطريف والظريف من الصيدلي زودني بجهاز قياس السكر مع شرائحه حريص على صحتي ومراقبة هذا السكر التراكمي ..
فحملته وذهبت به لداري ووضعت الأنسولين في الثلاجة وبقية الأدوية دولابها المخصص ..
علما أنه تم إيقاف حبوب الضغط بحجة أن سني هذه لا تقوى عليها ربما تؤثر على الدورة الدموية ... فهذه استشارة لك هذا صحيح ؟؟

فقلت الحمد لله على ما أنعمت وتفضلت فالشفاء بيدك والحمد لله تدبيرك وتيسيرك بتوفير هذه الأدوية والعلاجات ويقيني التام أن الشفاء من عند الله وهذه من أسبابه سهلها الله من عنده تماما لشفائه فما أنزل الله من داء وإلا أوجد له دواء ..

أنَّه صلَّى اللهُ عليه وسلَّم قالَ: «تَداوَوْا؛ فإنَّ اللهَ عزَّ وجلَّ لم يَضَعْ داءً إلَّا وَضَعَ له دَواءً، غيرَ داءٍ واحدٍ: الهَرَمِ»

الشاهد إني فعلن كبـــــــــــــرت .

سامحني للإطالة أطال الله في عمرك وأعمارنا على طاعته ..

:p

[بابكر مخير]

ب
سامحني للإطالة أطال الله في عمرك وأعمارنا على طاعته ..
:p

هو إتا يابا لقوك وين.
طول وطول ودا يوم فيهو بسعد لمن أشوف زول يتحاوم بي جاي وخاصتن لمن يكون قامة وزولن متلك...
يومتها، بعد ما وقتا من الدكتور، غشيت ليا مطعم، قعدتا ضربتا فيهو تمام والمعنويات عِلت وهبت ليك فيني نسمة "مورال" عالية..
هو تعرف فعلن الدكتور بشكل كم هائل من عجلة الشفاء وإن كان قبل كم يوم شفتا ليا فيديو موضوعه التشافي وفيهو سيدة إتكلمت عن أنهو الزول هو أحسن من يعالج نفسه وإتكلمت عن أمور دينية وأنهو المولى خلقنا على أحسن تقويم وإن ما حافظنا على هذا، فنحن تبقى علينا قولة: على نفسها جنت براقش وعليه أنهو ذي ما بنسبب في الامراض، ممكنا نتشافى وعلى قول المرحوم الممثل المصري سعيد صالح: إستك منو وفيهو

[بابكر مخير]

أتذكر وإحنا صغار، بيجبروننا أن نمشي أماكن ما دايرينها، يعني بيغسبونا ذي البيت الكبير وهو عجايز صرف وما فيهو شفع نلعب معاهم،،
مرت السنيين وحسي شايف الحالة تتكرر أمام أعيوني بي عمشتن دي.
البيحصل في سودانيات هو البذكرني تلك الاوقات الصعيبة، أيام الغسب..
تلقى الاحباء وهم بالعدد؛ ناصر، عبد الحكيم، عبد المنعم وبعض أخر منهن ومنهم وشخصي "اللايوق"، يظهر وأهو يعملوا ليهم رد كدا ذي المجاملة ولا ذي المغسوبين على التواجد هنانا (بعضهم يشوف في "هنانا" كأنها كلمة مختلقة لتعني "هنا"، لكني لقيت أنه وفي ما يبدو، في المخ في منطقة ترجعك لي جذور قديمة وتيقظ الحمض النووي DNA فتخليك تستعمل كلمات من عربي ما قبل أن يكتب ويتنقط ويشكل وهذا على ما يبدو، دا البيحاصل عليا وقولة هنانا)، يعني أخونا المحسي وبوستاتهو صاحبت القبول الاكتر وبي التجاوب المنقطع النظير يسجل غياب، ناس بوست دفعة خريجي مصر شيو وكيشو وباقي الاحبة البرضهم فاتوا المليون، إن شاء الله تبقى ليهم ملايين الدولارات (وما ينسونا)، سمراء (عفاف) والوجيهة ظهرن وبنيتي آل الدمرداش ديك من يوم فتحوا الواتساب وبدوا الفيسبوك، خلاص عافتنا لي غادي، جيلينا أكيد بيجي يعاين وهو ذي هندرزة معتصم، بس بيفوتونا حوبة..
كوكي ظاتهو وكنت قايلهو سيد وجعة والوجع بيغسبهو..
لكنه سك ما باين :(:(:(:(

[بابكر مخير]

العاطفة الجياشة وقبل هذه المرة تحدثت عها وكيف أن الكِبر يؤجج لهيبها.
الدمعة تبقى قريبة، الخلعة في طرف الأحاسيس، شنهو؟ مالووو، كيفن وهذه هي الأسئلة التي تصدر حين سماع إسم لشخص، فدوما هو التشاؤم يتبادر للذهن. ما الكُبر بيخليك قرفان وزهجان وما بتشوف الدنيا إلا بهذا المنظور، يعني زول جسده ضعف، عطاءه شح، سمعه ضعف، كلامهو وهن وما بسمعن غير مؤنس حديثه وشكله "يحنن".
تستنى منهو شنهو غير يكون سلبي؟؟
نرجع لي قصة العاطفة؟؟
(في جامعة كاليفورنيا الأميركية سوزان ترك تشارلز، تراقب تغير المزاج، والشعور بالرضا، ولحظات التأمل، ونوبات الغضب والحزن واليأس لدى الأفراد من مختلف الأعمار، مع اهتمام خاص بكيفية التعامل مع المشاعر واختبارها مع التقدم في السن. وقد لاحظت تشارلز هي وزملاؤها، أنه رغم علاقات كبار السن الاجتماعية الضئيلة إلا أنهم يتمتعون بعاطفة كبيرة تجاه المقربين منهم.)
المقربين من البشر، هم أهلك وأصدقاءك ومن الجماد هي أرضك وبيتك وهناك الجديد وهو الاسافير فمنها ما هو قريب منك قرب البشر والجماد وهنا بيت القصيد.
قرب سودانيات من قلبي، قرب البيت الذي أعيش فيه مع نخبة مميزة، التقيهم حين أضجر وعندهم بلقا التقبل، أشاركهم همي وهم يبادلوني الرأي والروئ، أشكيلهم ويخفيفو عني، في سودانيات وأنا الذي ندر أن أحظى بالنجاح، تغير أمري وششعرت بروح إيجابية عالية وغير مسبوق، حين دعمني أعضاء سودانيات وروادها من زوار، بأن أوصلي بوستي هذا لرقم لو شنهو وشنهو دآك ما كان بقى، مليونية من المشاهدات، خلال هذه العشر سنين وأنا مدفوع بهذا التشجيع، يومتها وفي سنة 2015؟ ولا في الخيال أني أستر في البوست لكن كنت بستمر بقصد الإستجابة لمتابعي البوست...
تاني وتالت ولي الدشليون،، شكراً ليكم وليهم..
أها عاطفتي تجاه سودانيات وبي ضلمة الكبر البتغطي سما من هم في عمري من تشاؤم ويأس، مخوفاني بالجد أنهو؟؟
سودانيات تمشي قبلي وللحق والله، بحزن شديد كل ما تراودني الخاطرة دي....
في نشيد مدارس الاحفاد قال شاعره في أحد البيوت؟؟
حافظ عليها يا فتى، تسمو على الاجيال وبطول السنين
https://www.youtube.com/watch?v=f4pbaBZiJaM

[بابكر مخير]

لمن زول يكون الناس مكتشننهو، يقولوا عنهو:
* عامل لينا وجع وش..
* كترت الطلة بتمسخ خلايق الله
* الكل يوم معانا
الي أخر من ما يقال للتعبير عن عدم تحملهو أو شوفتهو أو ما يربطهم بيهو..
أنا وذي ما بقول ديمة، مع الكبر بتزيد الحساسية (مش allergy بتاعت الهيستامين البتتسبب في الاكزيما والجيوب الانفية الي أخره) قصدي sensitivity من إحساس وهشاشة في المشاعر ويبقى يفسر كل شيء بتصورهو وكما قلناها قبل كدي أنهو الزول مع الكُبر بيبقى سلبيي وبشوف الدنيا إن خلااااااااص حالتهو في قمة الايجابية، بشوفها رمادي وغير ذلك فالدنيا بتتورا ليهو ضلما عديل..
أها وذي أولياء أمرونا والذين علمنا القرآن أن نطيعهم، أستعير قولتهم البيقولوها بي فهم أو كإرث سطووي، بقول: من هذا المنطلق وإستشعارن بأن الهروب الجماعي لعضوية سودانيات والتي تماثل هجة السودانيين من بلدهم الحبيب والذي سببه القوي والاعظم؟
هو تكشينتهم للجنجويد والحرابة "العبثية"..
أني أُمثل السبب المباشر وتنطبق عليا؟؟
* عامل لينا وجع وش..
* كترت الطلة بتمسخ خلايق الله
* كل يوم معانا
فبشوب وبسبب الحساسية بتعت المشاعر.
أخير أنقطع واتوارآ، عسى يتلم الجمع من تاني،،خليكم عافية وربنا يحفظكم متلمين ديمة....
:(:(:(

[عبدالحكيم]

لمن زول يكون الناس مكتشننهو، يقولوا عنهو:
* عامل لينا وجع وش..
* كترت الطلة بتمسخ خلايق الله
* الكل يوم معانا
الي أخر من ما يقال للتعبير عن عدم تحملهو أو شوفتهو أو ما يربطهم بيهو..
أنا وذي ما بقول ديمة، مع الكبر بتزيد الحساسية (مش allergy بتاعت الهيستامين البتتسبب في الاكزيما والجيوب الانفية الي أخره) قصدي sensitivity من إحساس وهشاشة في المشاعر ويبقى يفسر كل شيء بتصورهو وكما قلناها قبل كدي أنهو الزول مع الكُبر بيبقى سلبيي وبشوف الدنيا إن خلااااااااص حالتهو في قمة الايجابية، بشوفها رمادي وغير ذلك فالدنيا بتتورا ليهو ضلما عديل..
أها وذي أولياء أمرونا والذين علمنا القرآن أن نطيعهم، أستعير قولتهم البيقولوها بي فهم أو كإرث سطووي، بقول: من هذا المنطلق وإستشعارن بأن الهروب الجماعي لعضوية سودانيات والتي تماثل هجة السودانيين من بلدهم الحبيب والذي سببه القوي والاعظم؟
هو تكشينتهم للجنجويد والحرابة "العبثية"..
أني أُمثل السبب المباشر وتنطبق عليا؟؟
* عامل لينا وجع وش..
* كترت الطلة بتمسخ خلايق الله
* كل يوم معانا
فبشوب وبسبب الحساسية بتعت المشاعر.
أخير أنقطع واتوارآ، عسى يتلم الجمع من تاني،،خليكم عافية وربنا يحفظكم متلمين ديمة....
:(:(:(



الله يكضب الشينة ..
لا تفعلها ..
وما سودانيات إلا دكتور بابكر مخير ..
يا أخي مشاهداتك فاقت المليون ..
فكيف تنقطع وتتوارى ؟
يرضيك الله لا تنقطع ولا تتوارى ..
فماذا يبقى لسودانيات ...
رحم الله أخونا خالد الحاج رحمة واسعة فقد رحل وترك صدقة جارية من علم ينتفع به ..
فكان النفع مما سطرته يا دكتور فلا تحرمنا من ما ينتفع به وتوقف صدقاتك ..
لك من الشكر أجزله واترك الباب مفتوحا ولا يضيق صدرك وصبرك ودع حبل الود موصولا ...
فالكبر لا يقف حائلا بين العطاء والروح .
أطال الله في عمرك وأبقاك ونفع بك ..
فهذه مناشدة .. والله على كل شيئ قدير . ومن وراء القصد والهادي الى سواء السبيل .
ونهديك : ومين زيك ...

https://www.youtube.com/watch?v=eCmmFl5s3n8&t=5s